Xiyenge 1
Xana Xikwembu Xa Hi Khathalela Hakunene?
1, 2. Hi xihi xivutiso lexi vanhu va xi vutisaka mayelana ni Xikwembu, naswona hikwalaho ka yini?
NKARHI wun’wana evuton’wini bya wena, u nga ha va u vutisile: ‘Loko ku ri ni Xikwembu lexi hi khathalelaka hakunene, ha yini xi pfumelela ku xaniseka konghasi?’ Hinkwerhu ka hina hi tokote ku xaniseka kumbe hi tiva un’wana la tshameke a xaniseka.
2 Hakunene, ematin’wini hinkwawo vanhu va karhatekile ni ku dyisiwa mbitsi hi nyimpi, tihanyi, vugevenga, vuhomboloki, vusweti, vuvabyi ni ku fa ka varhandziwa va vona. Eka lembe xidzana ra hina ra vu-20 ntsena, tinyimpi ti dlaye vanhu vo tlula 100 wa timiliyoni. Madzana ya timiliyoni ta van’wana ma vavisiwile kumbe ku lahlekeriwa hi makaya ni swilo swa wona. Swilo swo tala leswi chavisaka swi humelerile enkarhini wa hina, swi vanga gome lerikulu, mihloti yo tala ni ku hela ka ntshembo eka vanhu va ntsandza-vahlayi.
3, 4. Vo tala va titwa njhani hi ku va Xikwembu xi pfumelela vubihi?
3 Van’wana va sungula ku karhateka kutani va ehleketa leswaku loko Xikwembu xi ri kona, a xi na mhaka na hina. Kumbe va nga ha ehleketa ni leswaku Xikwembu a xi kona. Hi xikombiso, munhu loyi a tokoteke nxaniso wa rixaka lowu dlayeke vanghana ni ndyangu eka Nyimpi yo Sungula ya Misava u vutisile: “Xikwembu a a xi ri kwihi loko hi xi lava?” Un’wana loyi a poneke ku dlayiwa ka timiliyoni hi Manazi eka Nyimpi ya Vumbirhi ya Misava, a a karhateke ngopfu hi ku xaniseka loku a ku voneke, lerova a ku: “Loko wo nantswa mbilu ya mina, yi nga ku chela chefu.”
4 Xisweswo, vanhu vo tala a va swi twisisi leswaku Xikwembu lexinene xi nga swi pfumelerisa ku yini swilo swo biha swi endleka. Va tivutisa loko xi hi khathalela hakunene kumbe loko xi ri kona. Naswona vo tala va vona va ehleketa leswaku ku xaniseka ku ta tshama ku ri kona loko munhu a ha ri kona.
[Xifaniso lexi nga eka tluka 2, 3]
Xana misava leyintshwa leyi pfumalaka ku xaniseka yi kusuhi?