Ta Rivala
◼ Eka tinh’weti leti tlulaka 15, ku kumiwe swihlangi swa 82 le swa ha ku tswariwaka swi lahliwile eswitarateni swa le Dorobeni ra Mexico, 27 wa swona swi file.—EL UNIVERSAL, MEXICO.
◼ Nkambisiso wa mabako le mintangeni ya le California, eU.S.A., wu kume 27 wa mixaka ya swiharhi leswi a swi nga tiviwi. Joel Despain, mutivi wa mabako wa National Park Service u ri: “Leswi swi komba kahle leswaku a hi tivi swo tala hi misava leyi hi hanyaka eka yona.”—SMITHSONIAN, U.S.A.
◼ Tiphesente ta 20 ta vaaka-tiko va laha misaveni a va na wona mati lama tengeke yo nwa. Kasi, 40 wa tiphesente a ti na rona fambiselo lerinene ra nkululo.—MILENIO, MEXICO.
◼ Vahloti lava nga riki enawini va dlaya kwalomu ka 20 000 ku ya eka 30 000 wa swiharhi hi lembe le Ntangeni wa Swiharhi wa Serengeti ntsena.—THE DAILY NEWS, TANZANIA.
◼ Nkambisiso lowu endliweke le Barcelona, eSpaniya, wu kume leswaku xichudeni xin’we eka swinharhu leswi nga ni malembe ya 16 swi dzaha mbangi nkarhi ni nkarhi.—LA VANGUARDIA, SPANIYA.
Switsongwatsongwana eTihofisini
Vativi va swilo leswitsongo ngopfu leswi hanyaka va le Yunivhesiti ya le Arizona va kambele switsongwatsongwana etihofisini to hlayanyana emadorobeni ya le United States. Va kume leswaku “tindhawu ta ntlhanu leti nga ni switsongwatsongwana (hi ku landzelelana ka tona) hi ku ya hi vunyingi bya laha va swi kumeke kona hi le ka tinqingho, henhla ka tafula, swikhomo swa laha ku nwiwaka mati kona, swikhomo swa microwave ni ti-keyboard,” hi ku vula ka phepha-hungu ra Globe and Mail. Hi ku ya hi xiviko xa kona, “hi xiringaniso tafula ra le hofisini ri ni switsongwatsongwana swo tala hilaha ku phindhekeke ka dzana ku tlula tafula ra le khixini naswona swi tele hilaha ku phindhekeke ka 400 ku tlula leswi nga eka xitshamo xa le xihambukelweni.”
“Vakreste Va Nomu”
Vanhu va le Philippine hi vona va vuriwaka leswaku i “Vakreste” ntsena le Asiya. Kambe, Bixopo wa Tikereke ta Evangelical, Efraim Tendero, u te: “Vo tala va hina ho va Vakreste va nomu ntsena ku nga ri hi swiendlo swa hina.” Hilaha swi vuriweke hakona eka Manila Bulletin, lava na vona va hoxeke xandla i varhangeri va kereke, lava tsandzekaka ku “dyondzisa vanhu Bibele ni ku endla leswaku va tlangela leswi yi swi tameleke.” Ku vuriwa leswaku tidyondzo tin’wana ta kereke ti vulavula hi tipolitiki ku nga ri hi Matsalwa.
Vanhu Ni Swiharhi Swi Lwela Swakudya
Phepha-hungu ra le Nairobi, The East African, ri ri: “Se swi tolovelekile ku twa leswaku timfenhe ni timhisi swi hlasela vanhu hikwalaho ka dyandza le Somalia.” Eka nyimpi yin’wana laha a ku lweriwa mati, ku fe timfenhe to hlayanyana naswona varisi van’wana va vavisekile. Ku vuriwa leswaku mintlawa ya tinkawu yi yima “emahlanganweni ya tindlela kumbe emabulohweni” leswaku yi ta hlasela tilori leti yisaka swakudya etimakete ta kwalaho. Phepha-hungu leri ri engetela ri ku: “Swi tolovelekile ku vona swiharhi swi ri karhi swi baleka ni swichocho swa mabanana kumbe makhalavatla [lamakulu].”
Ku Rhumela Nhundzu Swi Khumba Maxelo Ya Le Ribuweni
Phepha-hungu ra le Jarimani leri vuriwaka Kölner Stadt-Anzeiger ri vika leswaku ku tala ka swikepe le lwandle swi khumba maxelo ya le ribuweni. Valavisisi va le Hamburg va ka Max Planck Institute va xiyenge xa ta Maxelo va kambisise matsefu lama kumekaka le English Channel. Va kume leswaku matsefu lama nga le timbuweni ta lwandle ma larile, kasi lama kumekaka le English Channel ma bumburile. Ku ehleketiwa leswaku mhaka leyi yi vangiwa hi musi wa swikepe leswi. Ku vuriwa leswaku nsiti wa musi lowu humaka eka swikepe wu endla leswaku ku vumbeka mathonsi ya mpfula. Phepha-hungu leri ri ri: “Eka malembe ya 50 lama hundzeke, mpimo wa mafurha lama tirhisiwaka hi swikepe wu tlakukile swinene.”