“Timbhoni Ta Yehovha Ti Hoxe Xandla Eka Swa Vutshunguri”
HI MUTSARI WA XALAMUKA! LE MEXICO
Timbhoni ta Yehovha ti tiveka emisaveni hinkwayo hi ku ala ku pomperiwa ngati loko ti tshunguriwa. Vanhu van’wana va sola Timbhoni hikwalaho ka xiendlo lexi, lexi sekeriweke eBibeleni. Kambe hilaha swi tsariweke hakona eka phepha-hungu ra Reforma leri tiviwaka swinene le Dorobeni ra Mexico, Dok. Ángel Herrera muendli-nkulu wa vuhandzuri eka Nhlangano wa Tiko wa Vutshunguri bya Matshumba, u ri: “Timbhoni ta Yehovha a hi swiphukuphuku. Naswona a ti hisekeli etlhelo hi leswi ti swi pfumelaka. . . . [Ti] hoxe xandla swinene eka swa vutshunguri hi ku endla leswaku madokodela ma xiya xilaveko xo londzovota ngati.”
Eka malembe ya 15 lama hundzeke Dok. Herrera u rhambe ntlawa wa vativi va ku titivarisa ni vativi va vuhandzuri leswaku va endla vuhandzuri handle ko tirhisa ngati. Dok. Isidro Martínez, mutivi wa ta ku titivarisa loyi a a ri eka ntlawa lowu u te: “Loko munhu a titivarisiwe hi ndlela ya kahle swi endla leswaku swi koteka ku tirhisa tindlela to hambana-hambana to londzovota ngati. Xisweswo hi nga swi kota ku pfuna Timbhoni ta Yehovha hi ku xixima ripfumelo ra tona.”
Hi October 2006, phepha-hungu ra Reforma ri vike leswaku ku ni tindlela to tlula 30 leti nga tirhisiwaka handle ko pomperiwa ngati. Ti katsa ku pfariwa ka misiha ya ngati hi nsimbi yo hisa, ku phutsela swirho hi lapi leri humesaka tikhemikhali leti sivelaka ku mpfempfa ka ngati ni switatisi swin’wana swa ngati.a
Dok. Moisés Calderón, muhandzuri-nkulu wa mbilu le Xibedlhele xa le Dorobeni ra le Mexico lexi vuriwaka La Raza, u tala ku endla vuhandzuri handle ko pompela ngati. U vule leswi landzelaka eka Reforma: “Ku pomperiwa ngati swi ni khombo. Hikuva u nga pomperiwa ngati leyi nga ni switsongwatsongwana, tibaktheriya ni swidyeleri. Nakambe swi nga ha khumba matirhelo ya tinso ni mahahu.” Hikwalaho ka makhombo lawa Dok. Calderón u ri: “Hi endla vuhandzuri eka vanhu hinkwavo hi ndlela leyi hi endlaka Timbhoni ta Yehovha ha yona. Hi ringeta hi matimba leswaku munhu a nga lahlekeriwi hi ngati yo tala, hi vuyetela ngati leyi lahlekeke ni ku tirhisa mirhi leyi endlaka leswaku ngati yi nga humi ngopfu.”
Phepha-hungu ri tshahe Mintirho 15:28, 29, ku nga tsalwa leri Timbhoni ta Yehovha ti wu sekelaka ha wona ntshembo wa tona wa ku papalata ku pomperiwa ngati. Eka tsalwa leri, muapostola Pawulo u tsale nawu lowu: “Moya lowo kwetsima swin’we na hina hi tsakele ku ka hi nga mi engeteleli ndzhwalo wun’wana, handle ka swilo leswi, leswi fanelaka, ku papalata swilo leswi nyikeriwaka swifaniso swa hava ni ngati ni swilo leswi dlayiweke hi ku tlimbiwa nkolo ni vumbhisa.”
Xiyenge xa Ndzawulo ya Rungula ra Swibedlhele erhavini ra Timbhoni ta Yehovha le Mexico xi vika leswaku ku ni Tikomiti to Vulavurisana ni Swibedlhele ta 75 ni vapfuneti va 950 etikweni lava endzelaka madokodela ku ma tivisa hi tindlela to endla vuhandzuri handle ko pompela ngati. Le Mexico ku ni madokodela ya kwalomu ka 2 000 lama tiyimiseleke ku tshungula Timbhoni ta Yehovha handle ko tirhisa ngati. Timbhoni ti tlangela swinene ntirho wa madokodela lawa, hi ntirhisano wa tona ni leswi se ma pfunaka ni lava nga riki Timbhoni.
[Nhlamuselo ya le hansi]
a Tanihi leswi matshungulelo lawa yo tshunguriwa handle ko tirhisa ngati ku nga mhaka ya munhu hi yexe, Xalamuka! a yi bumabumeli vutshunguri byo karhi.
[Xifaniso lexi nga eka tluka 30]
Dok. Ángel Herrera
[Xifaniso lexi nga eka tluka 30]
Dok. Isidro Martínez
[Xifaniso lexi nga eka tluka 30
Dok. Moisés Calderón