“Loko Ri Phumela Ninhlikanhi”

HI MUTSARI WA XALAMUKA! LE BENIN

“VANHU va timiliyoni va hlamale ku Sirhiwa ka Dyambu hi N’weti.” Marito lawa ma vuriwe hi nhloko-mhaka ya phepha-hungu leri nge Daily Graphic ra le Ghana endzhaku ka siku leri n’weti wu sirheke dyambu hi March 29, 2006. Ku sirhiwa koloko ka dyambu ku sungule ku voniwa evuxeni bya tiko ra Brazil, kutani ku ya eAtlantic hi rivilo ra kwalomu ka 1 600 wa tikhilomitara hi awara, ku fika eGhana, Togo ni le Benin matiko lama nga le ribuweni, kwalomu ka awara ya nhungu nimixo. Xana ku sirhiwa koloko ka dyambu hi n’weti ematikweni lawa ya le Vupela-dyambu bya Afrika a ku ta va njhani?

Dyambu ri sirhiwe hi n’weti hi ku helela ro hetelela le Ghana hi 1947. Theodore loyi hi nkarhi wolowo a ri ni malembe ya 27 hi vukhale, u ri: “Vanhu vo tala enkarhini wolowo a a va nga si tshama va vona ku sirhiwa ka dyambu hi n’weti, hikwalaho a va nga swi tivi leswi endlekaka. Hikwalaho ka sweswo, vanhu va hlamusele xiendlakalo xexo va ku hi ‘loko ri phumela ninhlikanhi.’”

Magoza Lama Tekiweke Hi Valawuri Ku Lemukisa Vanhu Hi Makhombo Lama Fambisanaka Ni Ku Sirhiwa Ka Dyambu Hi N’weti

Valawuri va lemukise vanhu hi ta makhombo lama nga vaka kona loko munhu a languta dyambu hi ku kongoma loko ri sirhiwa hi n’weti. Swifaniso swo saseka le Togo swi tsundzuxe vanhu swi ku: “Sirhelela mahlo ya wena! Loko u nga tivoneli u nga ha hundzuka bofu!”

Vatirhela-mfumo va kandziyise leswaku vanhu va endla xin’wana xa swilo leswimbirhi. Xo sungula, va nga ha tshama emakaya kutani va hlalela xiendlakalo lexi eka thelevhixini. Xa vumbirhi, loko va nga ri etindlwini, va fanele va ambala manghilazi lama endleriweke ku sivela miseve ya dyambu. Vanhu va timiliyoni a va hlalele xiendlakalo lexi eka tithelevhixini ta vona ni le ka tikhompyuta ta vona. Kambe, tithelevhixini a ti nga ta swi kota ku kombisa ku nyanyuka ka vanhu loku vangiweke hi ku lava ku tiva ni hasahasa leyi veke kona loko dyambu ri nga si sirhiwa hi n’weti niloko ri ri karhi ri sirhiwa. A hi tweneni.

Vanhu Va Swi Langutela Hi Mahlo-ngati

A ri xe kahle ku fana ni masiku man’wana le matikweni ya le Afrika Vupela-dyambu—a ku pfumaleka ni mapapa exibakabakeni. Xana dyambu a ri ta sirhiwa hakunene? Loko nkarhi lowu ku vuriweke leswaku dyambu ri ta sirhiwa ha wona wu ri karhi wu tshinela, lava nga riki etindlwini va ambale manghilazi ya vona kutani va sungula ku languta exibakabakeni. Van’wana a va ri karhi va vutisa vanghana va vona hi tinqingho lava a va ri etindhawini tin’wana leswaku va vona yini.

Le xibakabakeni n’weti a wu ri karhi wu tshinela edyambyini hambileswi a wu nga vonaki eku sunguleni. Hi xitshuketa wu vonake onge i xiphemu lexitsongo lexi dzwihaleke, wu sungula ku sirha dyambu. Vanhu va sungule ku nyanyuka loko va vona xiendlakalo lexi.

Eka awara yo sungula, vahlaleri a va nga ku xiyi ku cinca loku nga kona. Hambiswiritano, loko n’weti wu ri karhi wu sirha dyambu xibakabaka xi sungule ku cinca. Xibakabaka xi sungule ku dzwihala. Ku sungule ku titimela. Timboni ta le switarateni ni timboni tin’wana ti sungule ku voninga. Vanhu va sungule ku suketela eswitarateni. Switolo swi pfariwile. Swinyenyana swi tshike ku yimbelela ni swiharhi swi tilunghiselela ku etlela. A ku ya ku dzwihala swinene. N’weti wu sirhe dyambu hi ku helela, hiloko ku ku whii!

Ku Sirhiwa Ka Dyambu Hi N’weti Loku Nga Rivalekiki

Tinyeleti ti sungule ku voninga. Dyambu ri sungule ku vonaka onge ko va xingwavila xo basa lexi rhendzeleke n’weti wa ntima. Miseve ya dyambu leyi vuriwaka Baily’s Beadsa yi tlhave n’weti loko dyambu ri ri karhi ri voninga ematlhelo ka n’weti. Ku sirhiwa ka dyambu hi n’weti a ku languteka ku fana ni xingwavila xa dayimani. Ku vonake mivalavala edyambyini. Muhlaleri un’wana u te: “Lexi i xiendlakalo xo hlamarisa lexi ndzi tshameke ndzi xi vona, a xi sasekile hakunene.”

N’weti wu sirhe dyambu hi ku helela ku ringana timinete leti nga endlaka tinharhu. Endzhaku ka sweswo dyambu ri sungule ku vuyela exiyin’weni xa rona. Vahlaleri vo tala va phokotele mavoko va tlhela va huwelela. Ku ve ni ku vonakala exibakabakeni kutani tinyeleti ti nyamalala. Xiyimo xolexo xo chavisa xi nyamalale ku fana ni hunguva ya nimixo.

N’weti i “mbhoni yo tshembeka exibakabakeni.” Hikwalaho vanhu va kota ku swi tiva ka ha ri emahlweni leswaku dyambu ri ta sirhiwa rini hi n’weti. (Pisalema 89:37) Le Afrika Vupela-dyambu va boheke ku rindza malembe ya kwalomu ka 60 leswaku va vona ku sirhiwa loku ka dyambu hi n’weti. Ku sirhiwa kun’wana ka dyambu hi n’weti loku nga ta va kona le Afrika Vupela-dyambu ku ta va hi lembe ra 2081. Kumbexana na wena u ta vona ku sirhiwa ka dyambu hi n’weti loku u nga ta ka u nga ku rivali ku nga ri khale.

[Nhlamuselo ya le hansi]

[Bokisi/Xifaniso eka tluka 29]

Xana Dyambu Ri Sirhiwe Hi N’weti Loko Yesu A Fa?

Marka 15:33 yi ri: “Loko ku fika awara ya vutsevu, munyama wu funengeta tiko hinkwaro ku fikela hi awara ya vukaye.” Munyama lowu, lowu heteke tiawara tinharhu ku sukela ninhlikanhi ku ya fika hi awara ya nharhu nindzhenga a ku ri singita. A ku nga ta va ku sirhiwa ka dyambu hi n’weti. Xo sungula, ku sirhiwa ka dyambu hi n’weti loku tshameke ku teka nkarhi wo leha emisaveni ku hete kwalomu ka timinete ta nkombo ni hafu. Xa vumbirhi, Yesu u fe hi siku ra vu-14 ra n’hweti ya Nisani. Siku ro sungula ra Nisani ri vonaka hi ku thwasa ka n’weti, laha n’weti wu nga le xikarhi ka misava ni dyambu naswona wu nga ha sirha dyambu. Loko ku fika siku ra vu-14 ra Nisani, n’weti a wu va wu ri exikarhi ka ku rhendzeleka ka wona. Misava yi va yi ri exikarhi ka dyambu ni n’weti kutani dyambu ri tlhava emisaveni hi ku helela. Kutani hi vona n’weti lowu heleleke, ku nga nkarhi lowunene wo tsundzuka rifu ra Yesu.

[Swifaniso]

Minkarhi hinkwayo Nisani 14 yi va kona loko n’weti wu helerile kumbe wu ri ekusuhi ni ku helela

[Dayagramu/Mepe eka tluka 28, 29]

(Leswaku u swi vona kahle, pfula nkandziyiso hi woxe)

Ntila wa ku sirhiwa ka dyambu hi n’weti

●

⇧

●

⇧

●

⇧ AFRIKA

BENIN ●

⇧

TOGO ●

⇧

GHANA ●

⇧

●

⇧

●

⇧

●

⇧

●

⇧

●

[N’wini wa Xifaniso]

Map: Based on NASA/​Visible Earth imagery

[Xifaniso eka tluka 28]

Ku sirhiwa ka dyambu hi n’weti hi ku helela hi March 29, 2006

[Nhlamuselo ya xifaniso lexi nga eka tluka 28]

Manghilazi lama endleriweke ku sirhelela mahlo ma endle leswaku vahlaleri va kota ku tivonela ku sirhiwa ka dyambu hi n’weti hi matihlo ya vona