Vukati Byi Le Hansi Ka Ntshikilelo

“A ndza ha lavi ku twa nchumu!” Xana u tshame u twa vanhu va vula marito wolawo malunghana ni vukati bya vona? Loko se u nghenele vukati, xana u tshama u titwa hi ndlela leyi fanaka?

MIMPATSWA ya magidi-gidi yi nghenele vukati endzhaku ko kombisana rirhandzu lerikulu loko ya ha gangisana kasi yin’wana yi hatle yi byi nghenela hikwalaho ka ku tshwa kutani hinkwayo ka yona a yi langutele leswaku endzhaku ka sweswo yi ta va ni ntsako. Mutsundzuxi un’wana u te: “Kambe loko vatekani lava va ta eka mina, vo tala va va se va heleriwe hi ntshembo wa leswaku va nga ha kuma ntsako. Va va va hetiwe matimba hi munghana wa vona wa vukati, hi vukati hi byoxe, hi rirhandzu naswona minkarhi yin’wana hambi ku ri hi vutomi hi byoxe.” Xivangelo lexi endlaka leswaku mimpatswa yoleyo yo tala yi va ya ha tshama swin’we hileswi yi nga ni xitifiketi xa vukati nileswi yi tshamaka endlwini yin’we.

Vukati byin’wana byi hohloka hileswi ku andzaka ntshikilelo ni mivilelo exikarhi ka vatekani. Mintirho leyi tshikilelaka swinene, mintirho leyi lavaka leswaku munhu a tirha nimadyambu kumbe nivusiku ni ku tirha tiawara to tala swi nga siya munhu a karhele lerova a pfumala nkarhi wo dzumba ni munghana wakwe wa vukati, hambiloko va rhandzana swinene. Rirhandzu ni ku xiximana swi nga hela hakatsongo-ntsongo hikwalaho ka swiphiqo swa timali, mintlhontlho yo kurisa vana, ku rhurhela endlwini leyintshwa, ku cinca ka ntirho ni swiphiqo swa rihanyo. Entiyisweni, ku cinca loku vaka kona hi ku famba ka nkarhi ku nga ha vanga ntshikilelo lowu nga hambanisaka mimpatswa.

Vamanana vo tala swi fana ni loko va endla mintirho yimbirhi ya nkarhi hinkwawo—wun’wana entirhweni kasi wun’wana ekaya. Sweswo swi nga endla leswaku va tshika swilo leswin’wana hinkwaswo handle ka ntirho wa vona wo tihanyisa ni ku kurisa vana va vona. Ntshikilelo ni ku karhala swi endla leswaku vatekani va pfumala nkarhi wo va swin’we. Vo tala va titwa onge va tsandzeka ku langutana ni swiyimo swa vutomi bya vona lerova vuyelo bya kona ku va ku dya mbitsi va xeva hi nhlomulo. Ha yini vukati byo tala byi ri ehansi ka ntshikilelo lowukulu? Xana u nga endla yini leswaku u va ni vukati lebyi tsakisaka naswona swilo swi famba kahle?