Ku Va Ni Ntsako Hambiloko U Lamale Ngopfu

Hi ku vula ka José Godofredo Várguez

Ndzi velekiwe ndzi hanye kahle naswona ndzi kurisiwe ku fana ni vana van’wana. Loko ndzi ri ni malembe ya 17, ndzi sungule ku tirha ku hisela etifektri. Siku rin’wana endzhaku ka malembe mambirhi, a ndzi ri karhi ndzi hisela eka platifomo leyi a yi ri ekusuhi ni tintambhu leti fambisaka gezi leri nga ni matimba swinene, hiloko mpfula yi sungula ku na. Hi xitshuketa ndzi chokiwe swinene hi gezi ivi ndzi wela ehansi laha a ku lehe timitara ta 14, hiloko ndzi titivala. Ndzi tshame exibedlhele kukondza ndzi pfuka endzhaku ka tin’wheti tinharhu. A ndzi kota ku tlakusa nhloko ntsena. Mavoko ni milenge ya mina a swi nga ha tirhi naswona sweswo swi ndzi tseme nhlana!

EKU sunguleni, a ndzi hlundzukele Xikwembu naswona ndzi xi vutise leswaku ha yini xi ndzi tshike ndzi hanya. Ndzi ehlekete no ti dlaya. Ndzi lave mpfuno eka vukhongeri byo hlayanyana kambe ku hava lebyi ndzi chaveleleke kumbe ku hlamula swivutiso swa mina malunghana ni Xikwembu. Entiyisweni, a byi nga va khutazi vanhu leswaku va hanya hi tidyondzo ni milawu ya Bibele! Loko manana a file hi 1981, ndzi sungule ku nwa byala ni ku gembula. A ndzi ehleketa leswaku leswi ndzi lamaleke, Xikwembu a xi ta ndzi twela vusiwana kutani xi ndzi rivalela loko ndzi dakwile. Nakambe ndzi sungule ku va ni mahanyelo yo biha hi ku tshama ni wansati loyi a hi nga tekananga.

Ndzi Cinca Mianakanyo Ya Mina

Loko ndzi ri ni malembe ya 37, ndzi hlangane ro sungula ni Timbhoni ta Yehovha. Leswi manana a a kuceteriwa hi swilo swo biha leswi vanhu a va swi vula hi tona, a a tshamela ku vula leswaku i vukhongeri byo homboloka ku tlula hinkwabyo. Nilokoswiritano, ndzi ti amukerile ekaya ra mina hi xikongomelo xo lava ku ti komba leswaku leswi ti swi dyondzisaka i mavunwa hikuva a ndzi ehleketa leswaku ndzi yi tiva ngopfu Bibele. Swi ndzi hlamarisile ku vona leswaku a ndzi nga tivi nchumu! Ku tlula kwalaho, lexi ndzi hlamarise ngopfu hileswi a ti tirhisa Bibele ku hlamula swivutiso swa mina hinkwaswo. Ku nga ri kungani ndzi sungule ku vona leswaku ndzi kume ntiyiso.

Lexi vavisaka, wansati loyi a ndzi tshama na yena a nga byi tsakelanga vukhongeri bya mina lebyintshwa, kutani hi hambanile. Ndzi ye emahlweni ndzi cinca vutomi, mahanyelo ni langutelo ra mina leswaku swi fambisana ni tidyondzo ta Bibele. Nakambe hikwalaho ka mpfuno wa Xikwembu ndzi kote ku cinca ndlela leyi a ndzi ehleketa ha yona ni leyi a ndzi titwa ha yona embilwini malunghana ni mhangu ya mina, lerova eka malembe ya 20 lama hundzeke, ndzi kume ku eneriseka lokukulu hi ku va muchumayeri wa nkarhi hikwawo. Vanhu vo tala va tivutisa leswaku ndzi swi kotisa ku yini ku endla ntirho lowu ni ku tshama ndzi tsakile tanihi leswi ndzi lamaleke. Kahle-kahle ku ni munhu la ndzi pfunaka. Ndzi tshama ni ndzisana ya mina Ubaldo, loyi a nga ni vuvabyi lebyi vuriwaka Down syndrome. Ubaldo na yena u amukele ntiyiso wa le Bibeleni naswona hi tirhela Yehovha swin’we.

Ha khomisana naswona ha khathalelana. Loko hi ri eku chumayeleni, Ubaldo u chovha xitulu lexi ndzi fambaka ha xona ni ku ndzi gongondzela etinyangweni, naswona loko ndzi vulavula ni n’wini wa muti, u ndzi pfuna ku hlaya Bibele ni ku n’wi komba tibuku leti faneleke. U tlhela a ndzi pfuna hi swilaveko swin’wana swa mina swa nyama. Kutani mina ndzi xavisa switolwa leswi hi tihanyisaka ha swona. Ku engetela kwalaho, swirho swa vandlha ra ka hina ra Timbhoni ta Yehovha swi hi pfuna ku sweka, ku endla mintirho ya le kaya ni ku hi yisa eka dokodela. Mina na Ubaldo hi wu tlangela swinene mpfuno wolowo!

Ndzi nkulu evandlheni ra Vukreste naswona minkarhi hinkwayo vamakwerhu va moya va tiyimisele ku ndzi pfuna ku endla ndzavisiso wa timhaka ta le Bibeleni. Ndzi kota ku khwatihata tinhla ta nkoka etibukwini ta hina hi ku khoma pensele hi nomu.

Loko vanhu va ndzi vutisa leswaku ndzi tsakile, minkarhi hinkwayo ndzi hlamula hi ku tiyiseka ndzi ku, ina! I yini lexi nga ndzi endlaka ndzi nga tsaki? Ndzi kume xikongomelo xa vutomi naswona ndzi wu langutele hi mahlo-ngati ntshembo lowu tsakisaka lowu Xikwembu xi nga ta wu nyika vagandzeri va xona vo tshembeka, ku nga rihanyo leri hetisekeke eParadeyisini leyi taka laha misaveni.—Esaya 35:5, 6; Luka 23:43.

[Xifaniso lexi nga eka tluka 24]

José loko a ri ni malembe ya 18, ka ha sale lembe a nga si humeleriwa hi mhangu

[Xifaniso lexi nga eka tluka 25]

Mina ni ndzisana ya mina Ubaldo ha khomisana loko hi ri karhi hi chumayela swin’we eMexico

[Xifaniso lexi nga eka tluka 25]

Mbhoni-kulorhi yi ndzi pfulela Bibele loko ndzi ri karhi ndzi nyikela nkulumo eHolweni ya Mfumo

[Xifaniso lexi nga eka tluka 25]

Swirho swa vandlha ra ka hina swi hi pfuna ku sweka ni ku endla mintirho yin’wana ya le kaya