Vito Ra Xikwembu Ra Tivisiwa!

● Loko wo famba-famba eXihlaleni xo saseka xa Orleans lexi nga ekusuhi ni Doroba ra Quebec le Canada, u nga kota ku vona emiakweni ya kwalaho leswaku vaaki va kona vo sungula a va rhandza vukhongeri. Tikereke ta khale leti akiweke etlhelo ka magondzo ta ha vonaka nisweswi egondzweni leri rhendzelaka xihlala xexo naswona muganga wun’wana ni wun’wana wu ni kereke ya wona.

Edorobeni ra Saint-Pierre, ku ni kereke ya khale swinene eQuebec, leyi akiweke hi 1717. Kereke yoleyo leyi sweswi yi tirhiseriwaka ku va nkombiso wa swilo swa vutshila, yi ni nchumu lowu nga tolovelekangiki. Ehenhla ka alitari ya yona ku ni Tetragrammaton—tinhlanga ta mune ta Xiheveru leti nga vito ra Xikwembu xa le Bibeleni, ku nga Yehovha.

Namuntlha, a swi tolovelekanga hambi ku ri ku twa vito ra Xikwembu ri vitaniwa ekerekeni ya Khatoliki, hi nga ha vuli ku ri vona. Entiyisweni, papila leri humesiweke hi Vatican hi 2008 ri vule leswaku mupapa u lerisa leswaku vito ra Xikwembu “ri nga tirhisiwi hambi ku ri ku vitaniwa” eminhlanganweni ya kereke ya Khatoliki, eka tinsimu kumbe eka swikhongelo. Kambe Bibele yi swi veka erivaleni leswaku Yehovha Xikwembu u lava leswaku vito rakwe ri “twarisiwa emisaveni hinkwayo.”—Eksoda 9:16.

Timbhoni ta Yehovha ti ehleketa leswaku ku va vanhu va kota ku tsakisa Xikwembu va fanele va endla leswi tlulaka ku tsala vito ra xona endzeni ka muako. Lembe ni lembe, ti heta tiawara leti tlulaka 1,5 wa tibiliyoni ti ri karhi ti dyondzisa vanhu hi vito ra Xikwembu ni swikongomelo swa xona emisaveni hinkwayo. Ti kale ti tlherisela vito ra Xikwembu leri nge Yehovha endhawini ya rona leyi faneleke. Bibele leyi ti yi kandziyiseke leyi nge Vuhundzuluxeri Bya Misava Leyintshwa Bya Matsalwa Yo Kwetsima, yi namarhela matsalwa ya ririmi ro sungula, lama eka wona vito leri nge Yehovha ri humelelaka minkarhi ya kwalomu ka 7 000. Ku fikela sweswi se ku kandziyisiwe tikopi leti tlulaka 165 000 000 ta Bibele ya Vuhundzuluxeri Bya Misava Leyintshwa yi helerile kumbe yi nga helelanga hi tindzimi ta 83. Entiyisweni, loko swi ta emhakeni yo tirhisa vito ra Xikwembu leri nge Yehovha, xivutiso lexi hi nga fanelangiki hi tivutisa xona hi lexi nge, Hi xihi xivangelo lexi hi nga na xona xo tirhisa vito ra xona? Kambe hi fanele hi tivutisa lexi nge, Hi xihi xivangelo lexi hi nga na xona xa ku nga ri tirhisi vito ra xona?

[Xifaniso lexi nga eka tluka 21]

Bibele ya Vuhundzuluxeri Bya Misava Leyintshwa leyi eka yona vito ra Yehovha ri humelelaka minkarhi leyi tlulaka 7 000, yi kandziyisiwa hi tindzimi ta 83 yi helerile kumbe yi nga helelanga