Leswi Vatswari Va Swi Vulaka

Malembe ya kondlo-a-ndzi-dyi ma vanga mintlhontlho yo hambana-hambana eka vatswari vo tala. U nga n’wi pfuna njhani n’wana wa wena loko a ri emalembeni wolawo—lama n’wi pfilunganyaka hilaha na wena ma ku pfilunganyaka hakona? Xiya leswi vatswari van’wana emisaveni hinkwayo va swi vulaka.

KU CINCA

“Loko n’wana wa mina wa jaha a ha ri ntsongo a a yingisa leswi ndzi n’wi byelaka swona handle ko vutisa. Kambe loko a fika emalembeni ya kondlo-a-ndzi-dyi, a tikomba a nga ha swi twisisi leswi ndzi n’wi byelaka swona. A a lava ku tiva xivangelo xa leswi ndzi n’wi byelaka swona ni leswaku ha yini ndzi swi vule hi ndlela yoleyo.”—Frank wa le Canada.

“N’wana wa mina wa mufana a nga ha vulavuli ngopfu. Ndzi boheka ku n’wi vutisa leswi a swi ehleketaka ematshan’weni yo va yena a ndzi byela. A swi olovi leswaku a hlamula xivutiso loko ndzi n’wi vutisa. U ta hlamula, kambe u ta teka nkarhi.”—Francis wa le Australia.

“Ku lehisa mbilu i swa nkoka. Minkarhi yin’wana hi titwa hi lava ku va holovela kambe minkarhi hinkwayo swa pfuna ku rhurisa mbilu ni ku burisana na vona!”—Felicia wa le United States.

KU VULAVURISANA NA VONA

“Minkarhi yin’wana n’wana wa mina wa nhwanyana la nga emalembeni ya kondlo-a-ndzi-dyi wa tiyimelela naswona minkarhi yin’wana u vona onge ndza n’wi xopaxopa. Ndzi fanele ndzi n’wi tsundzuxa leswaku ndza n’wi rhandza naswona ndzi n’wi navelela leswinene.—Lisa wa le United States.

“Loko vana va mina va ha ri vatsongo a va ndzi byela xin’wana ni xin’wana. A swi olova ku tiva leswi va swi ehleketaka. Sweswi ndzi ringeta ku va twisisa ni ku va komba leswaku ndza va xixima. Yoleyo hi yona ntsena ndlela leyi endlaka leswaku va ndzi phofulela leswi nga etimbilwini ta vona.”—Nan-hi wa le Korea.

“A swi enelanga ku yirisa vana ku endla swilo swo karhi. Hi fanele hi vulavurisana na vona hi mhaka leyi nga ta khumba timbilu ta vona. Loko hi lava ku va khutaza leswaku va vula leswi va swi ehleketaka, hi fanele hi lunghekela ku twa leswi va lavaka ku swi vula hambiloko swilo swa kona swi ta ka swi nga hi tsakisi.”—Dalila wa le Brazil.

“Loko ndzi lava ku tshinya n’wana wa mina wa nhwanyana, sweswo ndzi swi endlela exihundleni.”—Edna wa le Nigeria.

“Minkarhi yin’wana loko ndzi vulavula ni n’wana wa mina wa mufana, ndzi kavanyetiwa hi swilo swin’wana ekaya kutani ndzi nga ha n’wi nyiki nyingiso lowu heleleke. Wa swi xiya sweswo naswona ndzi anakanya leswaku hi swona leswi endlaka leswaku a nga buli ngopfu na mina. Ndzi fanele ndzi ringeta ku n’wi yingisela hi vurhon’wana loko hi vulavula leswaku a ta hambeta a tiphofula a ntshunxekile.”—Miriam wa le Mexico.

NTSHUNXEKO

“Minkarhi hinkwayo a ndzi vilela loko ndzi fanele ndzi nyika vana va mina ntshunxeko naswona leswi a swi endla leswaku hi nga twanani. Ndzi burisane na vona hi mhaka leyi. Ndzi va hlamuserile leswaku ha yini a swi ndzi chavisa ku va nyika ntshunxeko, kutani endzhaku ka sweswo va ndzi hlamusele leswi a swi endla leswaku va lava ntshunxeko lowu engetelekeke. Hi hetelele hi fikelele makumu ya leswaku a va ta kuma ntshunxeko lowu engetelekeke loko va ta kota ku landzela swipimelo leswi a ndzi va vekele swona.”—Edwin wa le Ghana.

“N’wana wa mina wa mufana a a lava xithuthuthu. A ndzi nga swi lavi ku n’wi xavela naswona ematshan’weni yo n’wi nyika nkarhi wo hlamusela leswaku ha yini a xi lava, a ndzi n’wi holovela ni ku n’wi byela hi makhombo lama nga vangiwaka hi xithuthuthu. Sweswo swi n’wi hlundzukisile naswona swi endle leswaku a sindzisa. Ndzi ringete ku tirhisa rhengu rin’wana. Ndzi n’wi khutaze leswaku a endla ndzavisiso malunghana ni xithuthuthu ku katsa ni makhombo ya xona, ntsengo ni swilo leswi lavekaka leswaku a kuma maphepha yo chayela ni ku xi hlayisa. Ndzi tlhele ndzi n’wi byela leswaku a lava mpfuno eka Vakreste lava wupfeke evandlheni. Ndzi swi xiyile leswaku ematshan’weni yo n’wi tshikilela, ndzi fanele ndzi n’wi khutaza ku vulavula hi swilo leswi a swi lavaka a ntshunxekile. Hi ndlela yoleyo, a ndzi ta fikelela mbilu yakwe.”—Hye-young wa le Korea.

“Vana va hina hi va vekela swipimelo kambe hi tlhela hi va nyika ntshunxeko hakatsongo-tsongo. Loko va swi landzela, hi va nyika ntshunxeko lowu engetelekeke. Hi va byela swilo leswi nga ta endla leswaku va kuma ntshunxeko, hi va komba leswaku i khale hi swi navela leswaku va va ni ntshunxeko; kambe loko va nga yingisi ha va xupula.”—Dorothée wa le France.

“A ndzi yi tluli milawu leyi ndzi yi vekeke. Loko vana va mina va yingisa, a ndzi va tshika va endla leswi va swi lavaka. Hi xikombiso, minkarhi yin’wana a ndzi va pfumelela ku hundzisa nkarhi lowu va toloveleke ku vuya ha wona ekaya. Kambe loko vo endla tano ku tlula kan’we handle ka mpfumelelo, a ndzi va xupula.”—Il-hyun wa le Korea.

“Loko muthoriwa a yingisa a tlhela a wu endla kahle ntirho wakwe, muthori wakwe u ta n’wi nyika vutihlamuleri lebyi engetelekeke. Hilaha ku fanaka, n’wana wa mina wa mufana wa swi vona leswaku loko a yingisa leswi hi n’wi byelaka swona, sweswo swi ta endla leswaku a kuma ntshunxeko lowu engetelekeke hakatsongo-tsongo. Wa swi tiva leswaku muthoriwa wa xupuriwa loko a nga wu endlanga kahle ntirho wakwe, ni le ka yena swi nga va tano, loko a nga yingisi a nga ha lahlekeriwa hi ntshunxeko lowu a nyikiweke wona.”—Ramón wa le Mexico.

[Marito lama tshahiweke exihlokweni lama nga eka tluka 22]

“Dyondzisa vana ndlela leyi va faneleke va hanya ha yona, naswona a va nge hambuki eka yona loko se va kurile.”—Swivuriso 22:6, Good News Translation

[Bokisi/Swifaniso leswi nga eka tluka 23]

VUTOMI BYA NDYANGU

“Ku Kurisa N’wana La Nga eMalembeni Ya Kondlo-A-Ndzi-Dyi I Nchumu Lowu Tsakisaka Swinene”

Joseph: Vana va mina vambirhi va vanhwanyana va le malembeni ya kondlo-a-ndzi-dyi naswona ndzi xiye leswaku i swa nkoka ku va yingisa ni ku yi tekela enhlokweni ndlela leyi va swi vonaka ha yona swilo. Ku nga swi tumbeti swihoxo swa mina—ni ku va xixima loko ndzi bula na vona—swi endla leswaku hi tshama hi ri karhi hi burisana. Entiyisweni ndzi vona onge ku kurisa n’wana la nga emalembeni ya kondlo-a-ndzi-dyi i nchumu lowu tsakisaka swinene naswona ndza wu nkhensa swinene nkongomiso lowu humaka eRitweni ra Xikwembu, ku nga Bibele.

Lisa: Ndzi xiye leswaku loko n’wana wa hina wa nhwanyana a nghena emalembeni ya kondlo-a-ndzi-dyi, a a lava leswaku ndzi heta nkarhi wo tala ndzi ri na yena. Siku rin’wana ndzi tshame ndzi heta nkarhi wo tala ndzi n’wi yingiserile, ndzi vulavula na yena ni ku n’wi tiyisekisa. Mina ni nuna wa mina hi byela vana va hina leswaku va hi byela xin’wana ni xin’wana nileswaku hi ta yi xixima ndlela leyi va titwaka ha yona. Ndzi ringeta ku tirhisa leswi Yakobo 1:19 yi swi vulaka, yi ri hi “hatlisa emhakeni yo twa, [hi] nonoka emhakeni yo vulavula.”

Victoria: Manana i munghana wa mina lonkulu. A ndzi si tshama ndzi hlangana ni munhu un’wana la fanaka na yena—naswona u tano eka vanhu hinkwavo. Ndza swi vona leswaku wa khathala hi vanhu van’wana. Ndza tsaka ku va ni Manana wa fana na yena.

Olivia: Tatana wa khathala naswona u ni malwandla. Wa va pfuna vanhu van’wana hi swilo leswi vonakaka hambiloko hi nga ri na swo tala. Minkarhi yin’wana u tiyisa voko, kambe wa swi kota ku hi tsakisa. I wa nkoka eka mina naswona ndza tsaka leswi a nga Tata wa mina.

“A Hi Na Wona Nkarhi Wo Phirheka!”

Sonny: Loko vana va hina va vanhwanyana va ri ni xiphiqo hi tshama na vona ivi hi xi lulamisa tanihi ndyangu. Hi vulavula hi ntshunxekile hi ndlela leyi hi titwaka ha yona naswona swiboho leswi hi swi endlaka swi fambisana ni milawu ya Bibele. Mina na Ynez hi tlhela hi tiyiseka leswaku va ni vanghana lavanene lava wupfeke hi tlhelo ra moya. Vanghana va hina i vanghana va vona naswona vanghana vona i vanghana va hina.

Ynez: Hi endla swilo tanihi ndyangu. Leswi hi nga Timbhoni ta Yehovha hi tshama hi khomekile hi ntirho wo chumayela, dyondzo ya munhu hi yexe, Vugandzeri bya Ndyangu ni ku endla ntirho wo tirhandzela—lowu katsaka ku pfuneta etindhawini leti hlaseriweke hi timhangu ta ntumbuluko ni le ku akiweni ka Tiholo ta Mfumo. Hi tlhela hi tinyika nkarhi wo tihungasa. A hi na wona nkarhi wo phirheka!

Kellsie: Tatana i muyingiseri lonene naswona loko a nga si endla xiboho lexikulu, u rhanga a bula na hina tanihi ndyangu. Minkarhi hinkwayo Manana u tshama a lunghekele ku ndzi pfuna kumbe ku ndzi yingisela loko ndzi lava ku vulavula na yena.

Samantha: Manana u endla leswaku ndzi titwa ndzi ri wa nkoka naswona ndzi rhandziwa, hambiloko a nga swi xiyi. Wa ndzi yingisa naswona wa khathala. A xi kona lexi ndzi nga xi ringanisaka ni vunghana bya hina.

[Swifaniso]

Ndyangu wa ka Camera: Joseph, Lisa, Victoria, Olivia na Isabella

Ndyangu wa ka Zapata: Kellsie, Ynez, Sonny na Samantha

[Xifaniso lexi nga eka tluka 22]

Vatswari va nga ha nyika vana va vona ntshunxeko wo karhi, kambe va tlhela va va vekela swipimelo