Xiyenge 3
Ndzayo Leyi Cincaka Vutomi
ANAKANYA hi dokodela la ha ku rhurhelaka laha u tshamaka kona. U nga ha kanakana leswaku u wu tiva kahle ntirho wakwe. Kambe u nga ku yini loko vanghana van’wana va wena va ye eka yena kutani rihanyo ra vona ri antswa hi ku hatlisa? Xana na wena a wu nga ta ya eka yena?
Matsalwa yo Kwetsima ma fana ni dokodela yoloye hi tindlela to karhi. Vanhu van’wana va ma kanakana. Kambe loko va tirhisa ndzayo ya vutlhari leyi kumekaka eka wona, vutomi bya vona byi cinca hi ku hatlisa. Xiya swikombiso swin’wana.
Ku Tlhantlha Swiphiqo Swa Vukati
Sumiatun u ri: “Loko ndza ha ku sungula evukatini a ndzi vona onge nuna wa mina Dumas a nga na mhaka na mina. Loko ndzi nyangatsekile minkarhi yin’wana a ndzi n’wi rhuketela, ndzi n’wi hoxetela hi swibye, hambi ku ri ku n’wi ba. Minkarhi yin’wana a ndzi hlundzuka lerova ndzi titivala.
“Loko Dumas a sungula ku dyondza Matsalwa yo Kwetsima, a ndzi n’wi vungunya. Kambe a ndzi yingisela leswi a a swi dyondza ndzi ri eka kamara lerin’wana. Siku rin’wana ndzi twe ku hlayiwa tindzimana tin’wana leti nge: ‘Vavasati a va tiveke ehansi ka vanuna va vona hilaha va endlaka hakona eHosini . . . Wansati u fanele ku va ni xichavo xo enta eka nuna wakwe.’ (Vaefesa 5:22, 33) Marito lawa ma ndzi khumbe mbilu. Ndzi kombele Xikwembu leswaku xi ndzi rivalela ku va ndzi xanise nuna wa mina naswona ndzi khongelele mpfuno wa xona leswaku ndzi va nsati lonene. Hi ku hatlisa mina na Dumas a hi dyondza Matsalwa swinwe.”
Matsalwa yo Kwetsima ma tlhela ma ku: “Vavanuna va fanele ku rhandza vasati va vona ku fana ni mimiri ya vona.” (Vaefesa 5:28) Sumiatun u ri: “Ku dyondza swilo leswi swi hi pfunile. Ndzi sungule ku endlela Dumas tiya loko a vuya hi le ntirhweni naswona ndzi vulavula na yena hi ndlela ya musa. Hikwalaho ka sweswo, Dumas u ye a ndzi rhandza swinene naswona a ndzi pfuna hi mintirho ya le kaya. A hi ti karhatela ku ‘kombisana musa, hi tsetselelana swinene, hi rivalelana hi ku ntshunxeka.’ (Vaefesa 4:32) Sweswo swi endle leswaku hi ya hi rhandzana ni ku xiximana swinene. Sweswi hi ni malembe yo tlula 40 hi tekanile naswona hi tsakile. Ndzayo ya vutlhari leyi kumekaka eka Rito ra Xikwembu yi sirhelele vukati bya hina!”
Ku Lawula Ku Hlundzuka
Tayib u ri: “Loko ndzi hlundzuka a ndzi va ni tihanyi. A ndzi rhandza ku lwa naswona hi xitalo a ndzi xungeta van’wana hi xibamu. A ndzi tlhela ndzi ba nsati wa mina Kustriyah, ndzi n’wi tlatlalata ehansi. Vanhu vo tala a va ndzi chava.
“Siku rin’wana, ndzi hlaye marito ya Yesu lama nge: ‘Ndzi mi nyika xileriso lexintshwa, leswaku mi rhandzana; tanihi leswi ndzi mi rhandzeke.’ (Yohane 13:34) Leswi swi ndzi khumbile swinene kutani ndzi tiyimisele ku cinca. Loko ndzi sungula ku hlundzuka, a ndzi khongela eka Xikwembu leswaku xi ndzi pfuna ndzi ehlisa moya. Kutani ku hlundzuka ku vohlile hi ku hatlisa. Mina na nsati wa mina hi tirhise ndzayo leyi nga eka Vaefesa 4:26, 27 leyi nge: ‘Dyambu ri nga peli ma ha ri eka xiyimo xa ku kariha, mi nga nyiki Diyavulosi ndhawu.’ Vusiku byin’wana ni byin’wana a hi hlaya Matsalwa ni ku khongela swin’we. Leswi swi endle leswaku hi rivala hi xin’wana ni xin’wana lexi hi hlundzukiseke hi siku rero naswona hi ya hi rhandzana swinene.
“Sweswi ndzi tiviwa tanihi wanuna wo rhula. Ndyangu wa mina wa ndzi rhandza ni ku ndzi xixima. Ndzi ni vanghana vo tala naswona ndzi titwa ndzi ri ekusuhi ni Xikwembu. Hakunene ndzi wanuna la tsakeke.”
Ku Tshika Swidzidziharisi Ni Vudakwa
Goin u ri: “A ndzi tihlanganisa ni ntlawa wa vantshwa, ndzi dzaha ngopfu naswona minkarhi yo tala a ndzi etlela exitarateni loko ndzi pyopyiwile. Nakambe a ndzi tirhisa ni ku xavisa swidzidziharisi leswi a swi nga ri enawini swo tanihi mbangi ni ecstasy leswi a ndzi swi tumbeta eka xiambalo xo tisirhelela ha xona eka maqulu. Hambileswi a ndzi languteka ndzi ri xitetemba naswona ndzi nga chavi nchumu, a ndzi tshama ndzi khomiwe hi rhumbyana.
“Kutani munhu un’wana u ndzi kombe tsalwa leri nge: ‘N’wananga, u nga wu rivali nawu wa mina . . . hikuva u ta engeteriwa masiku yo leha, malembe ya vutomi ni ku rhula.’ (Swivuriso 3:1, 2) A ndzi swi navela ku hanya vutomi byo leha lebyi nga ni ku rhula! Ndzi tlhele ndzi hlaya tsalwa leri nge: ‘Leswi hi nga ni switshembiso leswi, varhandziwa, a hi tibasiseni eka swilo hinkwaswo leswi nyamisaka nyama ni moya, hi hetisekisa vukwetsimi hi ku chava Xikwembu.’ (2 Vakorinto 7:1) Kutani ndzi tshike ku dzaha swidzidziharisi ni ku tihlanganisa ni ntlawa wolowo wa vantshwa kutani ndzi sungula ku tirhela Xikwembu.
“Sweswi ndzi ni malembe yo tlula 17 ndzi tshike swidzidziharisi. Ndzi ni rihanyo lerinene, ndyangu lowu tsakeke, vanghana lavanene ni ripfalo leri baseke. Ematshan’wini yo etlela exitarateni ndzi pyopyiwile, ndzi etlela ekaya hi ku rhula vusiku byin’wana ni byin’wana.”
Ku Hlula Moya Wa Xihlawuhlawu
Bambang u ri: “Loko ndza ha ri muntshwa a ndzi hanya ku fana ni xigevenga naswona vanhu vo tala lava a ndzi va karhata a va ri va rixaka leri a ndzi ri venga.
“Hi ku famba ka nkarhi, ndzi sungule ku lava Xikwembu. Sweswo swi endle leswaku ndzi kuma ntlawa lowu hlanganaka leswaku wu dyondza Matsalwa yo Kwetsima. Kwalaho, ndzi amukeriwe hi mandla mambirhi hi rixaka leri eku sunguleni a ndzi ri venga! Ndzi tlhele ndzi xiya leswaku eka ntlawa wolowo, ku ni tinxaka to hambana-hambana leti tsakeke. Swi ndzi hlamarisile! Ndzi kote ku twisisa tsalwa leri nge: ‘Xikwembu a xi yi hi nghohe, kambe eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.’—Mintirho 10:34, 35.
“Namuntlha a ndza ha ri na wona moya wa xihlawuhlawu. Van’wana va vanghana va mina lavakulu i va rixaka leri a ndzi ri venga. Eka Matsalwa yo Kwetsima, Xikwembu xi ndzi dyondzise ku va ni rirhandzu.”
Ku Tshika Madzolonga
Garoga u ri: “Loko ndza ha ri emalembeni ya kondlo-a-ndzi-dyi ndzi khomiwe kanharhu—kambirhi hikwalaho ko yiva, kan’we hileswi ndzi tlhaveke wanuna un’wana hi ndlela ya tihanyi. Endzhakunyana, ndzi joyine ntlawa lowu pfukelaka naswona ndzi dlaye vanhu vo tala. Endzhaku ka sweswo, ndzi sungule ku rhangela ntlawa wa swigevenga leswi a swi tekela vanhu mali ni ku kuma rungula hi ku va xungeta. Varindzi va mina a va ndzi heleketa kun’wana na kun’wana laha a ndzi ya kona. A ndzi ri ni rigombo naswona ndzi ri ni khombo.
“Kutani, siku rin’wana ndzi hlaye tsalwa leri nge: ‘Rirhandzu ri ni mbilu yo leha ni musa. Rirhandzu a ri na mavondzo, a ri tikurisi, a ri tikukumuxi, a ri tikhomi hi ndlela leyi nga tengangiki, a ri lavi leswi vuyerisaka rona ntsena, a ri hlundzuki. A ri hlayisi mhaka yo biha.’ (1 Vakorinto 13:4, 5) Marito lawa ma ndzi khumbe mbilu. Ndzi rhurhele endhawini leyintshwa, laha ndzi dyondzeke Matsalwa ni ku tirhisa ndzayo ya wona evuton’wini bya mina.
“Sweswi a ndza ha ri munhu wa madzolonga. Kambe, ndzi mudyondzisi la xiximekaka wa Rito ra Xikwembu. Vutomi bya mina byi ni xikongomelo naswona ndzi enerisekile.”
Rito Ra Xikwembu Ri Ni Matimba
Mintokoto leyi ni yin’wana ya ntsandza-vahlayi yi kombisa leswaku “rito ra Xikwembu ra hanya naswona ri ni matimba.” (Vaheveru 4:12) Ndzayo ya rona ya olova, ya twisiseka naswona ya aka.
Xana Matsalwa yo Kwetsima ma nga ku pfuna na wena? Ma nga ku pfuna eka xiphiqo xin’wana ni xin’wana lexi u nga ha va ka u ri na xona. “Matsalwa hinkwawo ma huhuteriwe hi Xikwembu naswona ma pfuna ku dyondzisa, ku tshinya, ku lulamisa swilo, ku laya eku lulameni, leswaku munhu wa Xikwembu a faneleka hi ku helela, a hlomisiwa hi ku helela eka ntirho wun’wana ni wun’wana lowunene.”—2 Timotiya 3:16, 17.
Hikwalaho, a hi kambisise tidyondzo tin’wana leti sekeriweke eka Matsalwa yo Kwetsima.
U Anakanya Yini?
• Eka mintokoto leyi nga laha henhla, hi wihi lowu ku tsakiseke ngopfu? Ha yini?
• Matsalwa yo Kwetsima ma nga ku pfuna njhani?
[Xifaniso lexi nga eka tluka 6, 7]
Dumas na Sumiatun
[Xifaniso lexi nga eka tluka 6, 7]
Kustriyah na Tayib va khongela swin’we vusiku byin’wana ni byin’wana
[Xifaniso lexi nga eka tluka 7]
Goin
[Xifaniso lexi nga eka tluka 8]
Sweswi Bambang u tsakela xinakulobye lexi a nga na xona ni vanhu va tinxaka to hambana-hambana
[Xifaniso lexi nga eka tluka 9]
Garoga a nga ha ri munhu wa rigombo kambe i mudyondzisi wa Rito ra Xikwembu la xiximekaka