Xikombiso Lexinene—Yobo

Vutomi bya Yobo byi cince hi ku helela. U rhange a lahlekeriwa hi rifuwo ra yena. Endzhaku ka sweswo a feriwa hi vana. Ivi endzhaku ka sweswo, a nga ha vi ni rihanyo lerinene. Hinkwaswo leswi swi endleke hi ku copeta ka tihlo. Tanihi leswi Yobo a a ri ni gome lerikulu u te: “Kunene moya-xiviri wa mina wu nyenya vutomi bya mina.” U vule leswaku u “tele hi tingana naswona [wa] tsakama hi ku xaniseka.” (Yobo 10:1, 15) Hambiloko Yobo a langutane ni maxangu a nga kalanga a fularhela Muvumbi wa yena. (Yobo 2:10) Leswi n’wi humeleleke evuton’wini a swi endlanga leswaku a cinca. Sweswo swi endle leswaku Yobo a va xikombiso xa ku tiyisela.

Loko na wena u langutane ni swiphiqo u nga ha titwa ‘u nyenya vutomi bya wena.’ Nilokoswiritano, ku fana na Yobo na wena u nga tshama u nga cinci hambiloko swiyimo swi cinca, u nga tsekatseki eku tiyimiseleni ka wena ku tirhela Yehovha Xikwembu. Yakobo u tsarile a ku: “Maswivo! Lava tiyiseleke hi va vula lava tsakeke. Mi twile hi ta ku tiyisela ka Yobo naswona mi byi vonile vuyelo bya kona lebyi Yehovha a byi nyikeleke, leswaku Yehovha u ni xinakulobye lexikulu swinene ni tintswalo.” (Yakobo 5:11) A a khathala hi Yobo naswona wa khathala ha wena!