Yobo U Tiyiserile—Na Hina Hi Nga Swi Kota!
“Langutani, lava hi vulaka leswaku va katekile, hi lava va tiyiseleke.”—YAKOBO 5:11.
1. Xana Mukreste un’wana la kuleke u vule yini hi miringo yakwe?
‘DIYAVULOSI u ndzi sale endzhaku! Ndzi titwa ku fana na Yobo!’ Hi marito yo tano A. H. Macmillan u phofule mintlhaveko ya yena eka munghana wakwe lonkulu eyindlu-nkulu ya Timbhoni ta Yehovha. Makwerhu Macmillan u hete pfhumba rakwe ra laha misaveni a ri ni malembe ya 89 hi August 26, 1966. A a swi tiva leswaku hakelo ya ntirho wa vutshembeki wa Vakreste lava totiweke vo fana na yena a “yi ta va landzela.” (Nhlavutelo 14:13) Kunene, a va ta ya emahlweni ni ntirho wa Yehovha hi ku pfuxeriwa evuton’wini lebyi nga riki na ku fa etilweni. Vanghana vakwe va tsakisiwe hi leswi Makwerhu Macmillan a kumeke hakelo yoleyo. Hambi swi ri tano, emalembeni yakwe yo hetelela emisaveni, u langutane ni miringo yo hambana-hambana, ku katsa ni vuvabyi lebyi n’wi endleke a ma vona kahle marhengu ya Sathana ya ku onha vutshembeki byakwe eka Xikwembu.
2, 3. Yobo a a ri mani?
2 Loko Makwerhu Macmillan a vula leswaku u titwe ku fana na Yobo, a a vula wanuna loyi a tiyiseleke miringo leyikulu ya ripfumelo. Yobo a a tshama “e tikweni ra Uts,” leri faneleke ri ri en’walungwini wa Arabia. A a ri ntukulu wa n’wana wa Nowa, Xeme, a a ri mugandzeri wa Yehovha. Swi tikomba onge ku ringiwa ka Yobo ku endleke exikarhi ka rifu ra Yosefa ni le nkarhini lowu Muxe a tikombiseke a lulamile ha wona. Enkarhini wolowo a ku nga ri na munhu emisaveni loyi a a fana na Yobo hi ku tinyiketela eka Xikwembu. Yehovha u langute Yobo tanihi munhu la nga solekiki, la lulameke, la chavaka Xikwembu.—Yobo 1:1, 8.
3 Tanihi loyi “a tlula v̌av̌anuna hinkwav̌o v̌a le v̌ušeni hi v̌ukulu,” Yobo a a ri ni malandza yo tala, naswona swifuwo swa yena a swi fika eka 11 500. Kambe rifuwo ra moya a ri ri ra nkoka swinene eka yena. Ku fana ni vatatana lava chavaka Xikwembu namuntlha, a swi kanakanisi leswaku Yobo u dyondzise majaha yakwe ya nkombo ni vanhwanyana vanharhu hi Yehovha. Hambi loko va nga ha tshami kona ekaya rakwe, a a tirha tanihi muprista wa ndyangu hi ku va endlela magandzelo, loko vo tshuka va dyohile.—Yobo 1:2-5.
4. (a) Ha yini Vakreste lava xanisiwaka va fanele va anakanya hi Yobo? (b) Malunghana na Yobo, hi swihi swivutiso leswi hi nga swi kambisisaka?
4 Yobo i munhu loyi Vakreste lava xanisiwaka va faneleke va anakanya ha yena leswaku va va ni matimba va ta kota ku lehisa mbilu. Mudyondzisiwa Yakobo u tsale a ku: “Langutani, lava hi vulaka leswaku va katekile, hi lava va tiyiseleke. Mi twile ta ku tiyisela ka Yobo, nakona mi vonile leswi Hosi a yi kongomile swona, ni hilaha Hosi yi taleke musa ni tintswalo hakona.” (Yakobo 5:11) Ku kotisa Yobo, valandzeri va Yesu lava totiweke ni “ntshungu lowukulu” wa namuntlha va fanele va va ni ku tiyisela leswaku va langutana ni miringo ya ripfumelo hi laha ku humelelaka. (Nhlavutelo 7:1-9) Kutani, hi yihi miringo leyi Yobo a yi tiyiseleleke? Ha yini yi ve kona? Naswona xana mintokoto yakwe yi nga hi pfuna njhani?
Mhaka Ya Nkoka Swinene
5. Xana a ku humelela yini etilweni, leswi Yobo a a nga swi tivi?
5 Hambi leswi Yobo a a nga swi tivi, etilweni a ku ta pfuka mhaka leyikulu. Siku rin’wana “v̌ana v̌a Šikwembu v̌a ya humelela e mahlweni ka Yehova.” (Yobo 1:6) N’wana wa Xikwembu la tswariweke a ri swakwe, Rito, a a ri kona. (Yohane 1:1-3) Nakambe a ku ri ni tintsumi to lulama ni “v̌ana v̌a Šikwembu” va tintsumi lava nga yingisiki. (Genesa 6:1-3) Sathana a ri kona na yena, hikuva a nga hlongoriwanga etilweni ku kondza ku simekiwa Mfumo hi 1914. (Nhlavutelo 12:1-12) Esikwini ra Yobo, Sathana u pfuxe mhaka ya nkoka swinene. A a ri kusuhi ni ku kombisa ku kanakana hi ku faneleka ka vuhosi bya Yehovha ehenhla ka swivumbiwa swa Yena hinkwaswo.
6. Xana Sathana a ringeta ku endla yini, naswona u n’wi lumbete njhani Yehovha?
6 Yehovha u vutise a ku: “U huma kwihi?” Sathana a hlamula a ku: “Nḍi huma misav̌eni, a nḍi v̌alanga kona.” (Yobo 1:7) A a lava loyi a nga n’wi dyaka. (1 Petro 5:8, 9) Hi ku onha vutshembeki bya vanhu lava tirhelaka Yehovha, Sathana a a ringeta ku kombisa leswaku a ku na munhu loyi a ta kota ku yingisa Xikwembu hi ku swi rhandza. Loko a ya emahlweni ni mhaka leyi, Yehovha u vutise Sathana a ku: “A ku ṭunḍukanga Yobo, nanḍa wa mina šana? Hikuv̌a a ku na munhu l’a fanaka na yena misav̌eni, l’a fambaka hi ku lulama ni ku tenga, l’a tšhav̌aka Šikwembu ni ku fularela ŝo biha.” (Yobo 1:8) Yobo u fikelele mimpimanyeto ya Xikwembu leyi a vekeriweke yona tanihi munhu la nga hetisekangiki. (Pisalema 103:10-14) Kambe Sathana u hlamule a ku: “Šana Yobo a tšhav̌a Šikwembu ntsena? Šana a hi leŝi u ṅwi siv̌elelaka, yena, ni yindlu ya yena, ni ŝilo hikwaŝo ŝa yena-ke? A ku anḍisanga mitiro ya mav̌oko ya yena, ni ku anḍisa mintlhambi ya yena misav̌eni šana?” (Yobo 1:9, 10) Xisweswo Diyavulosi u lumbete Yehovha hi ku vula leswaku a ku na munhu loyi a N’wi rhandzaka ni ku N’wi gandzela hikwalaho ka leswi A nga swona kambe U fumbarhelisa swivumbiwa leswaku swi ta N’wi tirhela. Sathana u vule leswaku Yobo u tirhele Xikwembu hikwalaho ka vutianakanyi, hayi hikwalaho ka rirhandzu.
Nhlaselo Wa Sathana!
7. Xana Diyavulosi u xi hehle njhani Xikwembu, naswona Yehovha u angurise ku yini?
7 Sathana u te: “Wa nga ṭhambuluta v̌oko ra wena u khumba hikwaŝo leŝi a nga na ŝona, u ta v̌ona šana a nga ka a nga ku sanḍi mahlweni e riv̌aleni-ke?” Xana Xikwembu a xi ta angula njhani eka xisandzu xo tano lexi tlhontlhaka? Yehovha u te: “V̌ona, leŝi a nga na ŝo hikwaŝo, nḍi ŝi v̌eka e mav̌okweni ya wena, ntsena u nga yisi v̌oko ra wena e mmirini wa yena.” Diyavulosi u vule leswaku leswi Yobo a a ri na swona a swi katekisiwile, swi andzisiwile ni ku sirheleriwa. Xikwembu a xi ta pfumelela Yobo a xaniseka, hambi leswi miri wa yena a wu nga fanelanga wu khumbiwa. Hi ku hisekela ku endla vubihi, Sathana u siye nhlangano wolowo.—Yobo 1:11, 12.
8. (a) Xana Yobo u lahlekeriwe hi swilo swihi leswi vonakaka? (b) Xana ntiyiso a wu ri wihi malunghana ni “nḍilo wa Šikwembu”?
8 Ku nga ri khale, nhlaselo wa Sathana wu sungurile. Un’wana wa malandza ya Yobo u n’wi vikele mahungu lawa yo biha: “Tihomu a ti rima, ni timbongolo a ti dya kusuhi na tona; kutani v̌a ka Šeba v̌a hi wele henhla, v̌a teka ŝifuwo, v̌a dlaya v̌arisi hi matlhari.” (Yobo 1:13-15) Nsirhelelo a wu susiwile emutini wa Yobo. Endzhakunyana ka sweswo, ku tirhe matimba ya mademona hi ku kongoma, hikuva nandza un’wana u vike a ku: “Nḍilo wa Šikwembu wu wele hi le henhla, wu hisile tinyimpfu ni v̌arisi.” (Yobo 1:16) A ku ri ku kombisiwa lokukulu ngopfu ka moya wa Diyavulosi hi ku endla swi tikomba onge Xikwembu hi xona xi vangelaka nandza wa xona maxangu yo tano! Tanihi leswi rihati ri taka hi le tilweni, a swi ta olova leswaku Yehovha a soriwa, kambe kahle-kahle ndzilo lowu a wu vangiwa hi mademona.
9. Xana ku lahlekeriwa hi swilo swa vutomi ku byi khumbe njhani vuxaka bya Yobo ni Xikwembu?
9 Loko Sathana a ya emahlweni ni nhlaselo wakwe, nandza un’wana u vike leswaku Vakalediya va teke tikamela ta Yobo naswona va dlaye varisi lavan’wana hinkwavo. (Yobo 1:17) Tanihi leswi Yobo a lahlekeriweke hi swilo swa vutomi, leswi a swi byi dlayanga vuxaka bya yena ni Xikwembu. Xana u nga tiyiselela ku lahlekeriwa lokukulu ka swilo leswi vonakaka handle ko tsema vuxaka bya wena na Yehovha?
Ku Wa Ka Mhangu Leyikulu
10, 11. (a) Ku humelele yini hi vana va Yobo va khume? (b) Endzhaku ka rifu leri hlomulaka mbilu ra vana va Yobo, xana u langute Yehovha hi ndlela yihi?
10 Diyavulosi a a nga si heta ku hlasela Yobo. Nandza un’wana u vike a ku: “V̌ana v̌a wena v̌a v̌av̌anuna ni v̌a v̌av̌asati, loko v̌a ri kari v̌a dya, v̌a nwa vinyo e ndlwini ya hosi ya v̌ona; moya lo’wukulu wu huma hi le mananga, wu ba tinhla ta mune ta yindlu, yi wela henhla ka v̌ona, yi v̌a dlaya; ku pona mina ntsena nḍi ku byelaka.” (Yobo 1:18, 19) Lava nga riki na vutivi va nga ha vula leswaku mhangu leyi vangiweke hi moya a yi ri ‘xiendlo xa Xikwembu.’ Hambi swi ri tano, matimba ya mademona ma hlasele Yobo hi nkarhi wo biha swinene.
11 Yobo loyi a ri nhlomulweni, u ‘handzule tinguvu ta yena, a byevula nhloko, a tiwisa ehansi, a nkhinsama.’ Kambe, yingisela marito ya yena. “Yehova o nḍi nyikile, Yehova o tlhele a teka; a ku ḍunisiwe v̌ito ra Yehova!” Mhaka leyi yi engetela yi ku: “E ka ŝona hikwaŝo, Yobo a nga sanḍanga, a nga v̌ekangi nanḍu e ka Šikwembu, ni lo’wuṭongo.” (Yobo 1:20-22) Sathana u hluriwile nakambe. Ku vuriwa yini loko hi feriwa kumbe hi khomiwa hi gome tanihi malandza ya Xikwembu? Ku tinyiketela eka Yehovha handle ka vutianakanyi ni ku tshembela eka yena swi nga hi pfuna leswaku hi tiyisela tanihi vahlayisi va vutshembeki, hi laha Yobo a endleke ha kona. Vatotiwa ni vanakulobye lava nga ni ntshembo wa laha misaveni va nga kuma nchavelelo hakunene ni matimba emhakeni leyi ya ku tiyisela ka Yobo.
Mhaka Yi Biha Ngopfu
12, 13. Enhlengeletanweni yin’wana leyi a yi ri etilweni, xana Sathana u kombele yini, naswona Xikwembu xi angurise ku yini?
12 Ku nga ri khale Yehovha u tlhele a endla nhlengeletano yin’wana eswivaveni swa le tilweni. Yobo se a ri wanuna la nga riki na n’wana, la nga xisiwana, loyi a a tikomba a biwe hi Xikwembu, kambe vutshembeki bya yena a byi tiyile. Ina, Sathana a nga ta pfumela leswaku leswi a swi vuleke ehenhleni ka Xikwembu na Yobo a ku ri mavunwa. Sweswi ‘vana va Xikwembu’ a va ri kusuhi ni ku twa nkanerisano ni n’wangulano loko Yehovha a susumetela Diyavulosi leswaku a tiyisa mhaka leyi.
13 Loko a vulavula na Sathana, Yehovha u vutisile a ku: “U huma kwihi?” U hlamurise ku yini? “Nḍi huma misav̌eni, a nḍi v̌alanga kona.” Yehovha u tlhele a kombetela eka nandza wakwe Yobo, la nga solekiki, la lulameke, la chavaka Xikwembu, loyi a ha tshembekile hi laha ku tiyeke. Diyavulosi u hlamule a ku: “Ḍov̌o ri ringana ni ḍov̌o! Hikwaŝo leŝi munhu a nga na ŝona, a nga ŝi humesela v̌utomi bya yena. Wa nga tlakusa v̌oko ra wena, u khumba marambu ya yena ni nyama ya yena, u v̌ona loko a nga ku rukani riv̌aleni šana?” Kutani Xikwembu xi te: “O le mav̌okweni ya wena, ntsena u ṭeṭelela v̌utomi bya yena.” (Yobo 2:2-6) Hi ku kombisa leswaku Yehovha a nga si susa nsirhelelo wakwe hinkwawo, Sathana u lave ku vavisa rhambu ni nyama ya Yobo. Diyavulosi a a nga ta pfumeleriwa ku dlaya Yobo; kambe Sathana a swi tiva leswaku vuvabyi bya miri a byi ta n’wi twisa ku vava, byi endla swi tikomba onge u xupuriwa hi Xikwembu hi mhaka ya swidyoho swakwe swa le xihundleni.
14. Xana Sathana u be Yobo hi yini, naswona ha yini ku pfumaleke munhu loyi a a ta n’wi tshungula?
14 Loko a humile enhlengeletanweni yoleyo, Sathana u ye emahlweni ni vuntswaka bya yena. U be Yobo hi “marumba la’yo v̌av̌isa, ku suka mikonḍweni ku fika e nhlokweni.” Vona maxangu lamakulu swonghasi lawa Yobo a langutaneke na wona loko a tshame enkumeni a tinwaya hi xirhengele! (Yobo 2:7, 8) A ku ri hava n’anga ya munhu leyi a yi ta herisa ku xaniseka lokukulu ko vava, loku nyenyetsaka ni loku khomisaka gome, hikuva a ku vangiwe hi matimba ya Sathana. I Yehovha ntsena loyi a ta hanyisa Yobo. Loko u ri nandza wa Xikwembu la vabyaka, u nga tshuki u rivala leswaku Xikwembu xi nga ku pfuna u tiyisela naswona xi nga ku nyika vutomi emisaveni leyintshwa leyi nga riki na vuvabyi.—Pisalema 41:1-3; Esaya 33:24.
15. Xana nsati wa Yobo u n’wi kucetele ku endla yini, naswona u angurise ku yini?
15 Eku heteleleni, nsati wa Yobo u te: “Šana wa ha tiyisile ku lulameni ka wena-ke? Rukana Šikwembu, u fa!” ‘Vutshembeki’ byi vula ku tinyiketela loku nga solekiki, naswona a nga ha va a sole Yobo leswaku a ta rhukana Xikwembu. Kambe u hlamule a ku: “U v̌ulav̌ula kukotisa šihunguki loko ši v̌ulav̌ula. Šana hi ta amukela le’ŝo saseka e mav̌okweni ya Šikwembu, hi nga amukeri ŝo biha-ke?” Hambi ku ri rhengu leri ra Sathana a ri tirhanga, hikuva hi byeriwa leswi: “E timhakeni toleto hikwato Yobo a nga dyohanga hi nomu wa yena.” (Yobo 2:9, 10) Loko swo tshuka swi endleka leswaku swirho swa ndyangu swi vula leswaku hi hungukile leswi hi hisekelaka mintirho ya Vukreste, swi tlhela swi hi kucetela ku landzula Yehovha Xikwembu. Ku fana na Yobo, hi nga tiyisela ndzingo wo tano hikuva hi rhandza Yehovha naswona hi navela ku dzunisa vito ra yena ro kwetsima.—Pisalema 145:1, 2; Vaheveru 13:15.
Vakanganyisi Vanharhu Lava Tikurisaka
16. I vamani lava a va tikomba va tele ku ta chavelela Yobo, kambe Sathana u va tirhise njhani?
16 Eka rhengu rin’wana ra Sathana, “v̌anakulobye” vanharhu a va tikomba va tele ku ta chavelela Yobo. Un’wana a ku ri Elifasi, loyi a faneleke a ri ntukulu wa Abrahama, wa Esawu. Tanihi leswi ku rhangeke Elifasi ku vulavula, a swi kanakanisi leswaku a ku ri yena lonkulu. Bilidada na yena a ri kona, ntukulu wa Xuwaka, un’wana wa vana va Abrahama, wa Ketura. Wanuna wa vunharhu a ku ri Sofara, loyi a vitaniwa Munaamani ku kombisa rixaka rakwe kumbe ndhawu leyi a tshama eka yona, leyi kumbexana a yi ri edzonga-vupela-dyambu bya Arabia. (Yobo 2:11; Genesa 25:1, 2; 36:4, 11) Tanihi lava ringetaka ku endla Timbhoni ta Yehovha ti landzula Xikwembu namuntlha, vavanuna lavanharhu a va tirhisiwa hi Sathana loyi a a ringeta ku endla Yobo a pfumela leswaku u ni nandzu wa swihehlo swa mavunwa ivi a onha vutshembeki byakwe.
17. Xana vavanuna vanharhu lava a va endzile va endle yini, naswona i yini lexi va nga xi endlangiki hi masiku ya nkombo ni vusiku bya nkombo?
17 Vavanuna lavanharhu va tikombise va ri ni ntwela-vusiwana lowukulu hi ku rila, va handzula tinguvu ta vona, ni ku tichela misava etinhlokweni ta vona. Kambe va tshame na Yobo masiku ya nkombo ni vusiku bya nkombo handle ko vula rito ni rin’we ro chavelela! (Yobo 2:12, 13; Luka 18:10-14) Vakanganyisi lava vanharhu lava tikurisaka a va tsanile hi tlhelo ra moya lerova a va nga ta vula nchumu lexi chavelelaka malunghana na Yehovha ni switshembiso swa yena. Kambe, a va endla swiboho leswi hoxeke va tlhela va lunghekela ku sola Yobo ha swona endzhaku ka loko va n’wi ririsile hi mukhuva lowu tolovelekeke. Lexi tsakisaka, ku nga si hela ku miyela ka masiku ya nkombo, Elihu lontsongo a a tshame laha a swi kota ku va twa loko va vulavula.
18. Ha yini Yobo a lave ku kuma ku rhula eku feni?
18 Eku heteleleni Yobo u humese rito. Tanihi leswi a nga kumangiki nchavelelo eka vavanuna lavanharhu lava a va n’wi endzerile, u rhukane siku leri a nga velekiwa ha rona a tlhela a tivutisa leswaku ha yini vutomi byakwe bya nhlomulo byi ya emahlweni. A lava ku kuma ku rhula eku feni, a nga anakanyi ni leswaku a nga tlhela a kuma ntsako a nga si fa, hikuva a swerile, a feriwile, a vabya ngopfu. Kambe Xikwembu a xi n’wi tshikanga Yobo a vaviseka ku fikela eku feni.—Yobo 3:1-26.
Nhlaselo Wa Vahehli Va Yobo
19. Xana Elifasi u lumbete Yobo hi swilo swihi?
19 Elifasi ku rhange yena a vulavula eka njhekanjhekisano wa vanhu vanharhu lowu ringeke vutshembeki bya Yobo hi laha ku engetelekeke. Eku vulavuleni kakwe ko rhanga, Elifasi u vutisile: “V̌a kwihi la’v̌o lulama la’v̌a nga lov̌isiwa?” U gimete hi ku vula leswaku Yobo u fanele a endle vubihi byo karhi lebyi lulameriwaka hi nxupulo wa Xikwembu. (Yobo, tindzima 4, 5) Eku vulavuleni kakwe ka vumbirhi, Elifasi u sandze vutlharhi bya Yobo ivi a vutisa a ku: “U tiv̌a mhaka yihi leyi hi nga yi tiv̌iki?” Elifasi a a vula leswaku Yobo u ringeta ku tiendla la tlakukeke ku tlula lowa Matimba Hinkwawo. Loko a gimeta xihehlo xakwe xa vumbirhi, u lumbete Yobo hi vugwinehi, vuhomboloki ni vuxisi. (Yobo, ndzima 15) Eku vulavuleni kakwe ko hetelela, Elifasi u lumbete Yobo hi vubihi byo tala—ku dyelela, ku tsona lava pfumalaka vuswa ni mati, ni ku tshikilela tinoni ni vana lava nga riki na vatatana.—Yobo, ndzima 22.
20. Xana Bilidada a a hlasela Yobo hi mukhuva wihi?
20 Tanihi leswi a ri wa vumbirhi ku vulavula eka njhekanjhekisano lowu wa vanhu vanharhu, Bilidada hakanyingi a landza mhaka-nkulu leyi andlariweke hi Elifasi. Bilidada a vulavula hi ku komisa kambe marito yakwe a ma tlhava swinene. U tlhele a hehla ni vana va Yobo a vula leswaku va endle vubihi kutani va faneriwa hi rifu. U tirhise xifaniso lexi hi mianakanyo leyi hoxeke: Tanihi leswi majekejeke ni tinhlanga swi omaka swi vuya swi fa loko swi pfumala mati, swi tano ni hi “la’v̌a riv̌alaka Šikwembu.” Marito wolawo i ya ntiyiso, kambe a ma nga tirhi eka Yobo. (Yobo, ndzima 8) Bilidada u hlamusele maxangu ya Yobo tanihi lama welaka lavo biha. (Yobo, ndzima 18) Eku vulavuleni kakwe ka vunharhu ko koma, Bilidada u vule leswaku munhu i “šiv̌ungu” ni “šiv̌ungwanyana” kutani a nga basanga emahlweni ka Xikwembu.—Yobo, ndzima 25.
21. Xana Sofara u hehle Yobo hi swilo swihi?
21 Sofara u ve wa vunharhu ku vulavula eka njhekanjhekisano lowu. Kahle-kahle, mavulavulelo yakwe ma kotise ya Elifasi ni ya Bilidada. Sofara u hehle Yobo hi vubihi naswona u n’wi khongotele leswaku a cukumeta swiendlo swakwe swa vudyoho. (Yobo, tindzima 11, 20) Endzhaku ko vulavula ra vumbirhi Sofara u pfale nomu. A nga ha vulanga nchumu eka rhengu ra vunharhu. Hambi swi ri tano, Yobo u hlamule vahehli vakwe hi xivindzi nkarhi hinkwawo. Hi xikombiso, kun’wana u te: “Hikwenu mi v̌atšhav̌eleri la’v̌a nḍi karataka. Marito ya ŝa hav̌a ma herile šana?”—Yobo 16:2, 3.
Hi Nga Swi Kota Ku Tiyisela
22, 23. (a) Tanihi le mhakeni ya Yobo, xana Diyavulosi a nga byi onha njhani vutshembeki bya hina eka Yehovha Xikwembu? (b) Hambi leswi Yobo a a tiyisela miringo yo hambana-hambana, xana hi nga ha tivutisa yini hi langutelo rakwe?
22 Ku fana na Yobo, hi nga ha langutana ni miringo yo tala hi nkarhi wun’we, naswona Sathana a nga ha ringeta ku onha vutshembeki bya hina hi ku hi heta matimba ni hi tindlela tin’wana. A nga ha ringeta ku endla leswaku hi fularhela Yehovha loko hi karhateka hi tlhelo ra timali. Loko murhandziwa wa hina a fa kumbe loko hi vabya, Sathana a nga ha ringeta ku endla leswaku hi sola Xikwembu. Ku kotisa vanakulobye va Yobo, un’wana a nga ha tshuka a hi lumbeta. Hi laha Makwerhu Macmillan a kombiseke ha kona, Sathana a nga ha hi ‘sala endzhaku,’ kambe hi nga swi kota ku tiyisela.
23 Hi laha hi swi voneke ha kona ku ta fikela laha, Yobo a a tiyisela miringo yakwe yo hambana-hambana. Hambi swi ri tano, xana ku tiyisela kakwe a ku ri ka hava? Xana entiyisweni a ri ni moya lowu tshovekeke? A hi voneni loko Yobo hakunene a heleriwe hi ntshembo.
A Wu Ta Hlamurisa Ku Yini?
◻ Hi yihi mhaka leyikulu leyi Sathana a yi pfuxeke esikwini ra Yobo?
◻ Xana Yobo u ringiwe hi mukhuva wihi lowukulu?
◻ Xana “v̌anakulobye” va Yobo vanharhu va n’wi lumbete hi yini?
◻ Tanihi le mhakeni ya Yobo, xana Sathana a nga ringeta njhani ku onha vutshembeki bya hina eka Yehovha?
[Xifaniso lexi nga eka tluka 10]
A. H. Macmillan