Timbhoni Ta Yehovha eMisaveni Hinkwayo—Poland

HI XIXIKANA xa 1989, tihulumendhe ta Vukhomunisi ku suka eBaltic ku ya eLwandle ra Ntima ti sungule ku hohloka. Loko Rihlapfu ra Nsimbhi ri ri karhi ri tshoviwa, matiko ya le Yuropa Vuxa ma sungule ku lava tindlela ta wona to kuma ntshunxeko. Exikarhi ka wona a ku ri na Poland, tiko leri nga ni swintshabyana, timbala ni tintshava ta tinhlohlorhi to tala.a

Vanhu va le Poland i vatirhi lava gingiritekaka, naswona Poland ri humese van’wana va vatshila ni vativi va sayense lava tivekaka emisaveni. Kambe ku tlula kwalaho, kwalaho sweswi ku ni ntshungu lowu kulaka wa vahuweleri va mahungu lamanene ya Mfumo wa Xikwembu.

Ku Va Ni Xivindzi Eku Paluxeni Ka Mavunwa

EPoland ku ni vo tala lava lavaka ku dyondza ntiyiso wa Bibele. Kambe van’wana va hetiwa matimba hi maxaka ni vaakelani va vona. Hi xikombiso, ekusuhi na le Wrocław, wansati loyi a tsakelaka u tshike ku dyondza Bibele ni Timbhoni ta Yehovha loko ndyangu ni vanghana va n’wi tshikilerile. Hambi swi ri tano, n’wana wakwe wa nhwanyana wa malembe ya kondlo-a-ndzi-dyi u hlaye nxaxamelo wa swihloko swa Xihondzo xo Rindza leswi paluxaka vukhongeri bya mavunwa. Leswi swi n’wi susumetele ku tsakela ntiyiso.

Endzhaku ka tin’hweti ta tsevu a ri karhi a dyondza Bibele, muntshwa loyi u bohe ku dlaya vuxaka hinkwabyo ni vukhongeri bya mavunwa. U endzele mufundhisi wa kereke ya yena a ya n’wi tivisa hi ta xiboho xa yena. Mufundhisi u n’wi byele ku tsala leswi landzelaka: “Mina, K—— P——, ndzi tshika vupfumeri bya Khatoliki.”

Hi Sonto leyi landzelaka, nhlamuselo leyi yi hlayiwile ekerekeni. Kokwana wa xinuna wa nhwanyana loyi u titivarile, naswona kokwana wa yena wa xisati u ririle. Hambi swi ri tano, van’wana va vakhongeri-kulobye va tsake ngopfu, ivi va ku: “Eku heteleleni, un’wana u ve ni xivindzi lexikulu xo vula leswaku ku ni mavunwa yo tala ekerekeni ya hina.” Nhwanyana loyi wa kondlo-a-ndzi-dyi loyi a nga ni xivindzi sweswi i makwerhu wa moya la khuvuriweke, naswona u sungule tidyondzo ta nkombo ta Bibele emutini wa ka vona.

“Hi Mihandzu Ya Vona”

Kujawy i Pomorze ya vhiki na vhiki yi humese xiviko lexi nge “U Ta Va Tiva Hi Mihandzu Ya Vona.” Hi ku komisa, xihloko lexi xi vule leswaku vagandzeri va Vujagana “entiyisweni a va yi landzeleli ngopfu milawu ya vukhongeri leyi va yi amukeleke. Va hambana swinene ni Timbhoni ta Yehovha leti tirhisaka leswi ti swi dyondzisaka, naswona ti vula leswi Bibele yi lerisaka swona.”

Endzhaku ko ringanisa xiyimo xa Timbhoni ta Yehovha ni xa Vakreste va nomu ntsena, xiviko xi ye emahlweni: “Lava va nomu ntsena swi vonaka va nga wu tivi ntiyiso wa xisekelo ni misinya ya milawu ya vupfumeri bya vona, naswona hakanyingi a va yi tirhisi. . . . Hi langutelo ra tona, Timbhoni ta Yehovha ti kombisa ku twanana ka marito ya tona ni swiendlo, xisweswo ti swi veka erivaleni leswaku a hi ‘vaprofeta va mavunwa,’ kambe ti nga xiyiwa hi mihandzu ya tona. ‘Xana swichocho swa vhinya swi nga khiwa emitweni kumbe makuwa eswigantlwini xana?’ (Matewu 7:15-20).”

Wansati un’wana u tsale papila ri ya eka Przyjaciółka ya vhiki na vhiki, a vilerisiwa hi leswi n’wana wa yena wa mufana a tshikeke Kereke ya Khatoliki ivi a va un’wana wa Timbhoni ta Yehovha. Xana xitsundzuxo xa muhleri xi ve xihi? “Loko n’wana wa wena wa mufana a hlanganyela ni Timbhoni ta Yehovha, a dyondza ni ku amukela vupfumeri bya tona, hinkwaswo i xiboho xa yena, lexi faneleke ku amukeriwa ni ku xiximiwa. . . . Ntlawa lowu wa vukhongeri wu ni timfanelo to tala letinene ni leti rhandzekaka, tanihi vun’we lebyi nga tolovelekangiki ni ntirhisano lowukulu exikarhi ka wona, vutshembeki lebyikulu ni ku namarhela swinene milawu leyi amukelekaka evuton’wini bya vanhu, naswona xo hetelela, va kota ku hanya hi ku pfumelelana ni ntiyiso wa vona, va yi tirhisa hi ku kongoma misinya ya milawu leyi amukelekaka. Leti i timfanelo ta risima evuton’wini.”

[Nhlamuselo ya le hansi]

[Bokisi leri nga eka tluka 9]

XIVIKO XA TIKO

Lembe Ra Ntirho Ra 1993

NHLOHLORHI YA LAVA NYIKELEKE VUMBHONI: 113 551

MPIMANYISO: Mbhoni yin’we eka vanhu va 339

LAVA VEKE KONA EXITSUNDZUXWENI: 235 642

XIRINGANISO XA VAHUWELERI VA MAPHAYONA: 7 961

XIRINGANISO XA TIDYONDZO TA BIBELE: 79 131

NHLAYO YA LAVA KHUVURIWEKE: 8 164

NHLAYO YA MAVANDLHA: 1 397

HOFISI YA RHAVI: Nadarzyn

[Xifaniso lexi nga eka tluka 9]

Hofisi ya rhavi ra le Poland eLodz hi 1948

[Xifaniso lexi nga eka tluka 9]

Ntirho wo kombisa makhadi hi June 1948 etikweni leri khale a ri vuriwa Prussia Vuxa

[Xifaniso lexi nga eka tluka 9]

Swirho swa 72 swa vatirhi va le Bethele ya le Poland hi January 1993

[Xifaniso lexi nga eka tluka 9]

Rhavi lerintshwa eNadarzyn