Timbhoni Ta Yehovha eMisaveni Hinkwayo—Riphabliki Ra Philippines

SWIHLALA swa le ka titropiki swa 7 083, leswi nga ni magoji-goji, leswi vitaniwaka Riphabliki ra Philippines, kahle-kahle i tinhlohlorhi ta ntshava yo leha leyi swiphemu swin’wana swa yona swi khubumetiweke hi mati.a Naswona vaaki va le Philippines va 62 000 000 va rhandza ku vulavula hi nhloko-mhaka yihi na yihi. Moya lowu wa xinghana wu endla nsimu leyinene ya ku nyikela vumbhoni hi Mfumo.

Ku Nyikela Vumbhoni eXikolweni

Exihlaleni xa Masbate, xichudeni lexitsongo xa le xikolweni xa le henhla xi kote ku nyikela vumbhoni eka mudyondzisi ni le tlilasini ya xona hi nkarhi wa xikambelo xa swivutiso leswi hlamuriwaka hi, i mavunwa kumbe i ntiyiso. Xa vika:

“Mhaka a yi ku, ‘Loko Xikwembu xi ndzi rhandza, a xi nga ta ndzi vangela swiphiqo kumbe ku pfumela leswaku ndzi xaniseka.’ Loko mudyondzisi a kambela maphepha ya hina, u kume leswaku hinkwavo handle ka mina va hlamule va ku i ntiyiso. Mudyondzisi u ndzi pfumelele ku hlamusela tlilasi leswaku ha yini ndzi hlamule ndzi ku i mavunwa. Ndzi vule leswaku a hi Xikwembu lexi hi vangelaka swiphiqo, hambi leswi xi pfumelelaka ku xaniseka naswona xi hi tshikaka hi ringiwa. Hi ku tirhisa Bibele ya mina, leyi a ndzi famba na yona exikolweni nkarhi hinkwawo, ndzi hlamulane na tlilasi hi marito lama nga eka 1 Yohane 4:8, ‘Xikwembu i rirhandzu.’ Endzhaku ka nhlamuselo ya mina, mudyondzisi wa mina a khorwile, a ba desika ra yena hi voko, kutani a ku: ‘Marilou u tiyisile.’ A a ku ri mina ntsena la kumeke nhlamulo leyi nga yona eka xivutiso lexi naswona ndzi kume timaraka ta le henhla.”

Rungula Ra Mfumo Ri Kona Hinkwako

Loko hi ri evutirhelini bya yindlu na yindlu exiphen’wini xin’wana xa Philippines, phayona ra nkarhi hinkwawo (muhuweleri wa mahungu lamanene wa nkarhi hinkwawo) u hlangane ni manana wa vana vanharhu lavatsongo. Wansati u kombise ku tsakela lokukulu eka rungula ra Mfumo, naswona leswi swi endle leswaku swi olova ku sungula dyondzo ya Bibele na yena. Hambi leswi nuna wakwe a swi nga n’wi tsakisi leswi a a dyondza Bibele, ngopfu-ngopfu leswi a dyondzisiwa hi Timbhoni ta Yehovha, dyondzo yi ye emahlweni.

Wanuna u rhurhise ndyangu wakwe wu ya edorobeni rin’wana, hi ku ehleketa leswaku leswi swi ta herisa ku hlangana ka nsati wakwe ni Timbhoni. Hambi swi ri tano, ku nga si hela nkarhi wo leha va kume wansati loyi ivi a sungula dyondzo yakwe ya Bibele. Kavula, nuna wakwe a khunguvanyekile swinene. U ye entirhweni a hlundzukile, laha a nga phofula mintlhaveko yakwe eka munhu un’wana loyi a n’wi lunghisela movha. A nga swi tivanga leswaku, loyi a a n’wi lunghisela movha a ri un’wana wa Timbhoni ta Yehovha.

Mbhoni yi hlamusele leswaku ndyangu hinkwawo a wu ta pfuneka swinene loko nsati wa yena a ya emahlweni ni tidyondzo takwe ta Bibele. U ta sungula ku tirhisa minsinya ya Bibele kwala kaya. U tlhele a ringanyeta leswaku wanuna loyi hi byakwe a ta vuyeriwa hi ku dyondza hi Mfumo wa Xikwembu.

Xana bulo leri ri ve ni vuyelo byihi? Nsati wa munhu loyi u ve ni ntshunxeko lowu engetelekeke wo dyondza Bibele, naswona u kunguhate ku tlhelela ekaya leri a va tshama eka rona ni ndyangu wakwe. Loko va fika kona wansati loyi u endle nhluvuko emoyeni ku fikela laha a nga va muhuweleri wa Mfumo la nga khuvuriwangiki. Nuna wakwe u amukele dyondzo ya Bibele na yena, naswona ndyangu hinkwawo wu sungule ku va kona emihlanganweni ya Vukreste.

[Nhlamuselo ya le hansi]

[Bokisi leri nga eka tluka 8]

NHLAYO YA TIKO

Lembe Ra Ntirho Ra 1993

NHLAYO YA LAVA NYIKELEKE VUMBHONI: 116 576

NTSENGO: Mbhoni yin’we eka vanhu va 549

LAVA VEKE KONA EXITSUNDZUXWENI: 357 388

AVHAREJI YA VAHUWELERI VA MAPHAYONA: 22 705

AVHAREJI YA TIDYONDZO TA BIBELE: 94 370

NHLAYO YA LAVA KHUVURIWEKE: 7 559

NHLAYO YA MAVANDLHA: 3 332

HOFISI YA RHAVI: MANILA

[Xifaniso lexi nga eka tluka 9]

Ku nyikela vumbhoni emakete swi tisa vuyelo lebyinene

[Xifaniso lexi nga eka tluka 9]

Hofisi ya rhavi ra Sosayiti ya Watchtower le Manila