Timbhoni Ta Yehovha eMisaveni Hinkwayo—Thailand

“TIKO ra vantshunxeki.” Leyi i nhlamuselo ya vito leri nge Thailand. Vaaki va rona vo tlula 57 000 000 va musa, va migingiriko, va ni mianakanyo yo hambana-hambana ya vukhongeri. Hambi leswi Vubudha byi andzeke, vukhongeri bya Vujagana byi kona na byona etikweni leri ra dzonga-vuxa bya Asia. Vanhu lava hinkwavo va fanele va twa mahungu lamanene ya Mfumo wa Xikwembu.—Matewu 24:14.a

Vahlapfa Va Twa Mahungu Lamanene

Etikampeni leti hangalakeke ni switsunga swa Thailand ku longoloka ni ndzilakana wa Myanmar, ntiyiso wa Bibele wu fikelela timbilu ta vahlapfa va rixaka ra Vakaren vo tlula 10 000. Swirho swa ndyangu wun’wana wa Vakaren lowu tshamaka endhawini yoleyo i Timbhoni ta Yehovha. Va ya emahlweni va haxa mahungu lamanene eka vahlapfa. Xana ntirho wa vona wu sungurise ku yini?

Malembe ma nga ri mangani lama hundzeke, jaha rin’wana ri tshike Kereke ya Anglican kutani ri va un’wana wa Timbhoni ta Yehovha. Hi ku kuceteriwa hi mufundhisi wa vona, maxaka yakwe ma n’wi kanetile. Hambi swi ri tano, u lehise mbilu naswona nkaneto wa ndyangu wakwe wu hungutekile hakatsongo-tsongo. Vafundhisi va Kereke ya Anglican va hambete va sandza ku fikela eka malembenyana mambirhi lama hundzeke, loko va susiwe exikhundlheni xa vona hikwalaho ka ku tikhoma loko biha. Tanihi leswi kereke a yi ri hava murisi enkarhini wolowo, ndyangu lowu ni maxaka man’wana ya Mbhoni leyi, a ma hele matimba, ma nga swi tivi leswaku ma nga endla yini. Khume-n’we wa vona va tshike kereke kutani va kombela Timbhoni leswaku ti dyondza na vona Bibele.

Dyondzo leyi yi fambe kahle, vahlapfa van’wana na vona va hlanganyela. Ntiyiso wu hangalake hi ku hatlisa, laha eku heteleleni ku khuvuriweke Timbhoni letintshwa ta 17, enambyeni lowu a wu khuluka endzeni ka kampa ya vahlapfa. Mawaku ndlela leyi a swi tsakisa ha yona ku vona mukhegula wa malembe ya 88 hi vukhale a khuvuriwa na vona!

Vhidiyo Yi Pfuxa Ku Tsakela

Swi tikomba onge ku ta va ni ku andza lokukulu exikarhi ka vahlapfa. Enkhubyeni wa Xitsundzuxo hi 1993, a ku ri ni vanhu va 57. Eka riendzo ra mulanguteri wa xifundzha lembe rero hi May, vanhu va 67 a va tile eka yin’wana ya tinkulumo ta yena. Naswona 250 wa vona a va vunganile va ta vona vhidiyo ya Sosayiti ya Watchtower leyi nge Jehovah’s Witnesses—The Organization Behind the Name.

Nsati wa mufundhisi wa Baptist ekampeni ya vahlapfa a ri kona enkulumeni ya le rivaleni ya Bibele leyi a yi hleriwe hi Timbhoni, naswona u tsale tindzimana ta Bibele leti a ti hlamuseriwa kwalaho. U byele nuna wakwe leswaku a a nga enerisiwi nikatsongo hi tidyondzo leti phindha-phindhiwaka ekerekeni ya vona. U arile, a vula leswaku loko o ya eminhlanganweni ya Timbhoni ta Yehovha, vangheni va kereke hinkwavo a va ta n’wi landzela. Loko a ya eminhlanganweni ra vumbirhi, nuna wakwe u n’wi hlongorise hi mukwana kutani a hisa buku leyi a tsalela ka yona eminhlanganweni ni tibuku ta Bibele. Ku nga khathariseki sweswo, loko vhidiyo yi kombisiwa, u tlhele a ta. Endzhaku ka nkarhi wansati loyi u byele nuna wakwe leswi a swi voneke. Hi mbilu leyi hundzukeke, u lave ku vona vhidiyo leyi naswona u tisorile leswi a nga hisa buku yakwe yo tsalela eka yona ni tibuku ta Bibele.

Ina, hi yona ndlela leyi vanhu va ma twaka ha yona mahungu lamanene eThailand. Xisweswo va kuma ntshunxeko wa moya eka “tiko ra vantshunxeki.”—Yohane 8:32.

[Nhlamuselo ya le hansi]

[Bokisi leri nga eka tluka 24]

XIVIKO XA TIKO

Lembe Ra Ntirho Ra 1993

NHLOHLORHI YA LAVA NYIKELAKA VUMBHONI: 1 434

NDZINGANYETO: Mbhoni yin’we eka vanhu va 40 299

LAVA VEKE KONA EXITSUNDZUXWENI: 3 342

AVHAREJI YA MAPHAYONA: 232

AVHAREJI YA TIDYONDZO TA BIBELE: 1 489

LAVA KHUVURIWEKE: 92

NHLAYO YA MAVANDLHA: 39

HOFISI YA RHAVI: BANGKOK

[Xifaniso lexi nga eka tluka 25]

Vahuweleri va Mfumo va chumayela mahungu lamanene hi ku hiseka

[Xifaniso lexi nga eka tluka 25]

Hofisi ya rhavi yo sungula, 1947

[Xifaniso lexi nga eka tluka 25]

Ndyangu wa Bethele emahlweni ka hofisi ya rhavi lerintshwa eBangkok, leyi nyiketeriweke hi February 8, 1992