Dyondzo Ya Mfumo—Ku Letela Malandza Ya Hosi

WA N’WAYITELA loko u vona xivulavuri eplatifomo. I jaha ra le vandlheni ra ka n’wina naswona ri le ku nyikeleni ka nkulumo ya rona yo sungula eka nongonoko wa nhlengeletano. Loko u ri karhi u tiphina hi nkulumo ya rona, u hlamarisiwa hi ndzetelo lowu vanhu va Xikwembu va wu kumaka. U tsundzuka matshalatshala yo sungula ya jaha leri loko ri ri eplatifomo​—kutani u xiya nhluvuko wa rona! Ri endle nhluvuko lowukulu endzhaku ka loko ri ye eka Xikolo xa Ntirho wa Vuphayona. Sweswinyana, rona ni nsati wa rona va tiphine hi ku ya eka Xikolo Xa Vachumayeri Va Mfumo. Loko vamakwerhu va ri karhi va bela jaha leri mavoko eka nkulumo ya rona ya kahle, u languta ematlhelo kutani u anakanya hi ndzetelo lowu vanhu hinkwavo va Xikwembu va wu kumaka.

Bibele yi profete hi nkarhi lowu vanhu va Xikwembu va nga ta ‘dyondzisiwa hi Yehovha.’ (Esa. 54:​13) Hi hanya enkarhini wolowo. Hi kuma dyondzo ku nga ri eminkandziyisweni ya hina ntsena kambe ni le minhlanganweni ya hina, etinhlengeletanweni, emintsombanweni ni le ka swikolo swo hambana-hambana leswi endleriweke ku hi hlomisela swiavelo swo karhi enhlengeletanweni ya Yehovha. Eka xiyenge lexi, hi ta kambisisa ndlela leyi ha yona dyondzo leyi hinkwayo yi nyikelaka xitiyisekiso lexi tiyeke xa leswaku Mfumo wa Xikwembu wa fuma namuntlha.