I Swa Nkoka Ku Fikela Kwihi Ku Va Mudyondzisiwa?

Yesu u dyondzise tidyondzo ta nkoka loko a ri eku dyeni endlwini ya murhangeri wa Vafarisi. Loko a ya emahlweni ni riendzo rakwe ro ya eYerusalema, mitshungu leyikulu yi famba na yena. Hikwalahokayini? Xana hakunene va swi tsakela ku va valandzeri vakwe va ntiyiso, swi nga ri na mhaka leswaku sweswo swi ta va koxa yini?

Yesu u vula nchumu lowu hlamarisaka van’wana loko va ri karhi va famba endleleni, hi ku vula a ku: “Loko munhu a lava ku ndzi landzela kambe a nga vengi tata wakwe, mana wakwe, nsati wakwe, vana vakwe ni vamakwavo, hambi ku ri ku venga vutomi byakwe, a nge vi mudyondzisiwa wa mina.” (Luka 14:26) Xana sweswo swi vula yini?

Yesu a nga vuli swona leswaku hinkwavo lava vaka valandzeri va yena va fanele va venga maxaka ya vona hi ku kongoma. Ku ri na sweswo, u vula leswaku va fanele va n’wi rhandza swinene ku tlula ndlela leyi va rhandzaka maxaka ya vona naswona va nga fani ni wanuna wa le xifanisweni xakwe wa le swakudyeni swa nimadyambu loyi a aleke xirhambo xa nkoka hileswi a ha ku cata. (Luka 14:20) Yakobo kokwa wa Vayuda, ku vuriwa leswaku a a “venga” Leya kambe a rhandza Rahele, leswi vulaka leswaku a a n’wi rhandza ngopfu Rahele ku tlula sesi wakwe Leya.—Genesa 29:31.

Xiya leswaku Yesu u vula ku mudyondzisiwa u fanele a venga ‘ni vutomi bya yena n’wini.’ Leswi swi vula leswaku mudyondzisiwa wa ntiyiso u fanele a rhandza Yesu ku tlula ndlela leyi a rhandzaka vutomi byakwe hayona ni ku tiyimisela ku fa loko swi boha. Hakunene ku va mudyondzisiwa wa Kreste i vutihlamuleri lebyikulu. A swi fanelanga swi tekeriwa ehansi handle ko rhanga hi anakanyisisa kahle.

Ku va mudyondzisiwa swi nga ha katsa ku tikeriwa ni ku xanisiwa hikuva Yesu u ri: “Loyi a nga rhwaliki mhandzi yakwe ya nxaniso a ndzi landzela a nge vi mudyondzisiwa wa mina.” (Luka 14:27) Ina, mudyondzisiwa wa ntiyiso wa Yesu u fanele a tiyimisela ku langutana ni ku hlekuriwa ku fana na Yesu. Yesu u vule leswaku u ta fela emavokweni ya valala vakwe.

Hikwalaho, mitshungu leyi fambaka na Yesu yi fanele yi swi kambisisa hi vukheta leswi swi vulaka swona ku va mudyondzisiwa wa Kreste. Yesu u kandziyisa mhaka leyi hi ku va byela xifaniso. U ri: “Hi xikombiso, i mani eka n’wina loyi loko a lava ku aka yindlu a nga rhangiki hi ku hlayela swilo hinkwaswo leswi lavekaka ku vona loko a ri ni mali leyi ringaneke ku yi heta? Loko a nga endli tano, a nga ha sungula ku yi aka kambe a nga swi koti ku yi heta.” (Luka 14:28, 29) Hikwalaho, loko va nga si va vadyondzisiwa va Yesu, vanhu lava yaka na yena eYerusalema va fanele va endla xiboho xo hetisisa vutihlamuleri lebyi hi xitalo. U kandziyisa mhaka yoleyo hi ku va byela xifaniso xin’wana, u ri:

“Kumbe hi yihi hosi leyi loko yi ya lwa ni hosi yin’wana, yi nga rhangiki yi kanela ni van’wana ku vona loko yi ta swi kota ku lwa ni hosi leyi nga ni masocha ya 20 000 loko yona yi ri ni masocha ya 10 000? Loko yi swi xiya leswaku a yi nge swi koti, yi rhuma vanhu eka hosi leyin’wana ya ha ri ekule leswaku va ya kombela ku rhula.” Leswaku a kandziyisa yinhla leyi, Yesu u ri: “Hilaha ku fanaka, loyi a nga swi siyiki swilo hinkwaswo leswi a nga na swona, a nge vi mudyondzisiwa wa mina.”—Luka 14:31-33.

Entiyisweni, Yesu a nga byeli mitshungu leyi a fambaka na yona endleleni ntsena. Kambe hinkwavo lava dyondzaka hi Kreste va fanele va tiyimisela ku endla leswi a swi vulaka. Leswi swi vula leswaku va fanele va tiyimisela ku nyikela xin’wana ni xin’wana lexi va nga na xona loko va lava ku va vadyondzisiwa vakwe, ku nga ha va nhundzu kumbe vutomi bya vona. Lowu i nchumu wo anakanyisisa ni ku khongela ha wona.

Yesu u tlhela a pfuxa mhaka leyi a vulavuleke hayona eka dyondzo yakwe ya le Ntshaveni loko a vula leswaku vadyondzisiwa vakwe i “munyu wa misava.” (Matewu 5:13) Swi tikomba a vula leswaku ku fana ni leswi munyu wa xiviri wu endlaka swilo swi nga boli, vadyondzisiwa vakwe va hlayisa vanhu hi ku va sirhelela eka mimoya ni mahanyelo yo biha. Kambe leswi sweswi ntirho wakwe wo chumayela wu nga ekusuhi ni ku hela, u ri: “Kahlekahle, munyu i wunene. Kambe loko munyu wu heleriwa hi matimba, wu nga lungiwa hi yini?” (Luka 14:34) Vayingiseri vakwe va swi tiva leswaku munyu wun’wana lowu a wu kumeka hi nkarhi wolowo a wu nga basanga, a wu pfanganisiwe ni misava naswona a swi endla wu nga tirhisiwi ngopfu.

Hikwalaho, Yesu u kombisa leswaku hambi lava ku nga khale va ri vadyondzisiwa vakwe a va fanelanga va tshika ku tiyimisela. Loko leswi swo endleka, a va ta va lava nga pfuniki nchumu ku fana ni munyu lowu nga ha riki na nantswo. Misava a yi ta va hlekula. Ku tlula kwalaho, a va nga ha ta amukeleka eka Xikwembu naswona a va ta tisa ni xisandzu evitweni ra xona. Yesu u kandziyisa nkoka wo papalata vuyelo byebyo, u ri: “Loyi a nga ni tindleve ta ku yingisa, a a yingise.”—Luka 14:35.