June

Anakanya ndlela leyi xi va tiyiseke ha yona vaapostola xitshembiso xexo! Hambileswi a va nga yi twisisi hilaha ku heleleke mhaka ya leswaku Murhangeri wa vona a ta dlayiwa ku nga ri khale kambe a nga ta va siya va nga ri na nseketelo. Yehovha a a lunghekele ku hlamula swikhongelo swa vona leswaku va ta ya emahlweni ni xileriso xo chumayela rungula ra Mfumo. Entiyisweni, endzhakunyana ka sweswo va vone ndlela leyi Yehovha a hlamuleke swikhongelo swa vona ha yona. (Mint. 4:29, 31) Swi tano ninamuntlha. Hi va vanghana va Yesu loko hi veka mihandzu hi ku tiyisela. Ku engetela kwalaho, hi nga tiyiseka leswaku Yehovha u lunghekele ku hlamula swikhongelo swa hina leswaku hi kota ku hlula miringo leyi hi hlanganaka na yona loko hi ri karhi hi chumayela mahungu lamanene ya Mfumo. (Filp. 4:13) Hakunene ha tsaka leswi hi nga ni lunghelo ro kuma tinhlamulo ta swikhongelo swa hina ni ku va vanghana va Yesu! Tinyiko leti, ti huma eka Yehovha naswona ti hi nyika matimba yo hambeta hi tswala mihandzu.—Yak. 1:17. w18.05 21 ¶17-18

Ku nga si hela malembe ya ntlhanu, Vakreste lava a va tshama eYerusalema a va ta vona leswaku “siku ra Yehovha” ri tshinele ni ku xiya xikombiso lexi Yesu a va nyikeke xona kutani va baleka va huma emutini. (Mint. 2:19, 20; Luka 21:20-22) Siku rero ri fike hi 70 C.E. loko Varhoma va tisa vuavanyisi bya Yehovha eYerusalema. Namuntlha hi ni swivangelo swo tala swo tshemba leswaku siku ra Yehovha ‘lerikulu na leri chavisaka ngopfu’ ri le kusuhi. (Yuw. 2:11) Muprofeta Sofaniya u te: “Siku lerikulu ra Yehovha ri le kusuhi. Ri le kusuhi, naswona ra hatlisa swinene.” (Sof. 1:14) Xilemukiso xexo xa vuprofeta xa ha tirha ni le nkarhini wa hina. Leswi siku ra Yehovha ri yaka ri tshinela, Pawulo u hi byela leswaku hi ‘khathalelana leswaku hi khutazana erirhandzwini ni le mintirhweni leyinene.’ (Hev. 10:24) Hikwalaho, hi fanele hi khathala swinene hi vamakwerhu leswaku hi ta va khutaza loko ku ri na xilaveko xo endla tano. w18.04 20 ¶1-2

Mawaku xikhutazo lexi tiyisaka lexi Yehovha a xi nyikeke Yoxuwa emahlweni ko va vanhu Vakwe va tshama eTikweni leri Tshembisiweke! Yehovha a a nga khutazi munhu un’we ntsena kambe u tlhele a khutaza vanhu vakwe tanihi ntlawa. Hi ku tirhisa marito ya vuprofeta lama a ma ta chavelela Vayuda lava a va ri evuhlongeni eBabilona, Yehovha u te: “U nga chavi, hikuva ndzi na wena. U nga languti ematlhelweni, hikuva mina ndzi Xikwembu xa wena. Ndzi ta ku nyika matimba. Kunene ndzi ta ku pfuna. Kunene ndzi ta ku khoma swi tiya hi voko ra mina ra xinene ra ku lulama.” (Esa. 41:10) Vakreste vo sungula va kume xitiyisekiso lexi fanaka, swi tano ni le ka vanhu va Xikwembu namuntlha. (2 Kor. 1:3, 4) Yesu hi byakwe u kume xikhutazo eka Tata wakwe. Loko a khuvuriwa, Yesu u twe rito leri humaka etilweni ri ku: “Loyi i N’wananga, la rhandzekaka, loyi ndzi n’wi amukeleke.” (Mat. 3:17) A swi kanakanisi leswaku marito wolawo ma n’wi tiyisile Yesu hi nkarhi wa vutirheli byakwe bya laha misaveni! w18.04 16 ¶3-5

Endzhaku ko hlaya xileriso lexi Yehovha a xi nyikeke Adamu, vanhu vo tala namuntlha va nga vula leswaku Adamu a a tsoniwe ntshunxeko wo endla leswi a swi lavaka. Lava vulaka tano va hlanganisa ku tirhisa ntshunxeko wo tihlawulela ni mfanelo yo endla xiboho xa leswi nga swinene ni leswo biha. Adamu na Evha a va ri ni ntshunxeko wo hlawula ku yingisa Xikwembu kumbe ku nga xi yingisi. Hambiswiritano, i Yehovha ntsena la nga ni mfanelo leyi heleleke yo endla xiboho xa leswi nga swinene ni leswo biha hilaha swi fanekiseriweke ha kona hi “murhi wa ku tiva leswinene ni leswo biha” lowu a wu ri entangeni wa Edeni. (Gen. 2:9) Hi ku tirhisa xileriso xakwe, Yehovha hi rirhandzu u dyondzise Adamu na Evha ndlela yo tirhisa ntshunxeko wa ntiyiso. Vatswari va hina vo sungula va hlawule ku nga xi yingisi Xikwembu. Xana xiboho xa Adamu na Evha xi va endle va va ni ntshunxeko lowu engetelekeke? Lexi twisaka ku vava hi leswaku, sweswo a swi endlekanga. Hikwalaho ko lwela ku tilawula, va lahlekeriwe hi ntshunxeko wa ntiyiso lowu a va nyikiwe wona. w18.04 5-6 ¶9-12

Yehovha a ngo ma twela vusiwana ntsena malandza yakwe lama xanisekaka. U endla swo karhi leswaku a ma pfuna. Hi xikombiso, loko Vaisrayele va ri evuhlongeni eEgipta, Yehovha a ku twa ku vava loku a va ku twa kutani u susumeteleke ku va pfuna. Yehovha u byele Muxe a ku: “Entiyisweni ndzi vone ku xaniseka ka vanhu va mina . . . , naswona ndzi twe xirilo xa vona . . . Ndza ku tiva swinene ku vava loku va ku twaka. Kutani ndza rhelela ndzi ya va kutsula evokweni ra Vaegipta.” (Eks. 3:7, 8) Leswi Yehovha a va twela vusiwana vanhu vakwe u va ntshunxile evuhlongeni. Endzhaku ka malembe yo tala, loko se Vaisrayele va ri eTikweni leri Tshembisiweke, va hlaseriwe hi valala va vona. Xana Yehovha u titwe njhani? Bibele yi ri: “A a tisola [a va twela vusiwana] hikwalaho ka ku konya ka vona hikuva vatshikileri va vona a va va yingayingisa.” Nakambe ntwelavusiwana wu susumetele Yehovha leswaku a pfuna vanhu vakwe. U rhumele vaavanyisi leswaku va ponisa Vaisrayele eka valala va vona.—Vaav. 2:16, 18. w19.03 15 ¶4-5

Milawu yimbirhi yo sungula eka Milawu ya Khume a yi lava leswaku Vaisrayele va gandzela Yehovha ntsena naswona a yi va lemukisa hi ku gandzela swifaniso. (Eks. 20:3-6) Milawu yoleyo a yi nga vuyerisi Yehovha. Ematshan’weni ya sweswo, a yi vuyerisa vanhu vakwe. Loko va gandzela swikwembu swa matiko man’wana a va xaniseka. Ku hambana ni sweswo, Yehovha u katekise vanhu vakwe loko va tshembeka eka yena ni ku khomana hi ndlela leyinene. (1 Tih. 10:4-9) Yehovha a nga fanelanga a soriwa loko lava tivulaka vagandzeri vakwe va honisa milawu yakwe ni ku vavisa vanhu vakwe. Hambiswiritano, Yehovha wa hi rhandza naswona wa swi vona loko hi xaniseka hikwalaho ka ku pfumaleka ka vululami. U twa ku vava loku hi ku twaka ku tlula loku manana a ku twaka loko n’wana wakwe a twa ku vava. Hambiloko a nga ngheneleli hi nkarhi wolowo kambe hi ku famba ka nkarhi u ta avanyisa vadyohi lava nga hundzukiki lava khomeke van’wana hi ndlela yo biha. w19.02 22 ¶13-15

Eka mavhiki ma nga ri mangani ku nga si fika Xitsundzuxo, hakanyingi mihlangano ya hina yi dzika eka xikombiso lexi Yesu a hi vekeleke xona ni ndlela leyi a kombiseke ku titsongahata hi ku nyikela hi vutomi byakwe tanihi nkutsulo. Hi susumeteleka ku tekelela ku titsongahata kakwe ni ku endla ku rhandza ka Yehovha, hambiloko swi tika. Anakanya hi xivindzi lexi a xi kombiseke eka masiku ma nga ri mangani a nga si dlayiwa. A a swi tiva leswaku valala va yena a va ri kusuhi ni ku n’wi khomisa tingana, va n’wi ba, va tlhela va n’wi dlaya. (Mat. 20:17-19) Nilokoswiritano, a tiyimisele ku langutana ni rifu. Loko nkarhi wu fika u byele vaapostola vakwe vo tshembeka, lava a va ri na yena eGetsemani a ku: “Pfukani, a hi fambeni. Maswivo! Muxengi wa mina u tshinele.” (Mat. 26:36, 46) Loko ntshungu lowu hlomeke wu ta ku ta n’wi khoma, u yime emahlweni ka wona, a titivisa kutani a lerisa masocha leswaku ma tshika vaapostola vakwe va famba. (Yoh. 18:3-8) Mawaku xivindzi xonghasi lexi Yesu a xi kombiseke! Namuntlha, Vakreste lava totiweke ni lava tinyimpfu tin’wana va tekelela Yesu hi ku kombisa Xivindzi. w19.01 27-28 ¶7-8

Ku fana ni leswi mumpfampfarhuti a hlanganisaka tipende to tala leswaku a endla xifaniso xo saseka, na hina hi fanele hi hlanganisa timfanelo to hlayanyana leswaku hi va lava rhuleke. Tin’wana ta timfanelo teto i ku titsongahata, ku yingisa, ku olova ni xivindzi. I vanhu lava titsongahataka ntsena lava nga ta endla ku rhandza ka Xikwembu. Ku rhandza ka Xikwembu swi katsa leswaku hi va lavo rhula. (Mat. 5:5; Gal. 5:23) Loko hi endla ku rhandza ka Xikwembu hi karihisa Sathana. Hambiloko hi titsongahata ni ku va lavo rhula, vanhu vo tala lava nga xiphemu xa misava ya Sathana va hi venga. (Yoh. 15:18, 19) Hikwalaho, hi fanele hi va ni xivindzi leswaku hi alela Sathana. Munhu loyi a nga riki na ku rhula wa titlakusa, loko a hlundzuka a nga lawuleki naswona a nga n’wi yingisi Yehovha. Sweswo swi n’wi hlamusela kahle Sathana. A swi hlamarisi leswi a vengaka vanhu lava titsongahataka! Va paluxa vuhomboloki byakwe hi ku va ni vumunhu lebyinene lebyi a nga riki na byona. Xo biha ngopfu eka Sathana hileswaku va paluxa leswaku i muhembi. Hikwalaho ka yini? Hikuva ku nga khathariseki leswi a swi vulaka kumbe ku swi endla, a nge swi koti ku tshikisa vanhu vo rhula ku tirhela Yehovha!—Yobo 2:3-5. w19.02 8-9 ¶3-5

Yehovha a a swi tiva leswaku vaaki va Babilona a va ta khomiwa hi rhumbyana. Vababilona a va ta hlaseriwa hi mavuthu lama nga ni matimba ya Meda-Peresiya. Yehovha a a ta tirhisa vuthu leri leswaku a ntshunxa vanhu vakwe lava a va ri evuhlongeni eBabilona. (Esa. 41:2-4) Loko Vababilona ni vanhu va matiko man’wana ya le nkarhini wolowo va twa leswaku nala wa vona a a ri ekusuhi, va ringete ku ti tiyisa hi ku byelana va ku: “Tiya nhlana.” Va tlhele va tiendlela swikwembu swo tala swa hava, va ri ni ntshembo wa leswaku swi ta va sirhelela. (Esa. 41:5-7) Hi nkarhi lowu fanaka, Yehovha u rhulise timbilu ta Vayuda lava a va ri evuhlongeni hi ku va byela a ku: “Wena Israyele, [ku hambana ni vaakelani va wena] u nandza wa mina . . . U nga languti ematlhelweni, hikuva mina ndzi Xikwembu xa wena.” (Esa. 41:8-10) Xiya leswaku Yehovha u te: “Mina ndzi Xikwembu xa wena.” Hi marito wolawo, Yehovha u tiyisekise malandza yakwe yo tshembeka leswaku a nga ma rivalanga—a a ha ri Xikwembu xa wona naswona a ma ha ri vanhu vakwe. U va byele a ku: ‘Ndzi ta ku rhwala ni ku ku ponisa.’ A swi kanakanisi leswaku marito wolawo lama khutazaka ma tiyise Vayuda lava a va ri evuhlongeni.—Esa. 46:3, 4. w19.01 4 ¶8

Marka 1:9-11 yi boxa swiendlakalo swinharhu leswi eka swona Yehovha a vulavuleke a ri etilweni. Yehovha u te: “U N’wana wa mina, la rhandzekaka; ndzi ku amukerile.” Sweswo swi fanele swi n’wi khumbe mbilu Yesu loko a twa Tata wakwe a vula ndlela leyi a n’wi rhandzaka ni ku n’wi tshemba ha yona! Marito ya Yehovha ma tiyisekise swilo swinharhu hi Yesu. Xo sungula, Yesu i N’wana wakwe. Xa vumbirhi, Yehovha u rhandza N’wana wakwe. Naswona xa vunharhu, Yehovha u amukele N’wana wakwe. Hi ku vula a ku “U N’wana wa mina.” Yehovha u kombise leswaku N’wana wakwe la rhandzekaka, Yesu, u sungule vuxaka lebyintshwa na Yena. Loko Yesu a ha ri etilweni, a ri n’wana wa Xikwembu wa moya. Hambiswiritano, loko a khuvuriwa u totiwe hi moya lowo kwetsima. Hi nkarhi wolowo, Xikwembu xi kombise leswaku N’wana wa xona la totiweke, Yesu, se a a ri ni ntshembo wo tlhelela etilweni a ya va Hosi leyi hlawuriweke hi Xikwembu tlhelo Muprista Lonkulu. (Luka 1:31-33; Hev. 1:8, 9; 2:17) Swi le rivaleni leswaku hikwalaho ka yini loko Yesu a khuvuriwa Tata wakwe a vule marito lama nge: “U N’wana wa mina.”—Luka 3:22. w19.03 8 ¶3-4

Vanhu va sungule ku nyikiwa switsundzuxo leswi hoxeke hi Sathana ku sukela eku sunguleni ka matimu ya vanhu. Xivumbiwa lexi tikukumuxaka lexi tiendleke mutsundzuxi, xi byele Evha leswaku yena ni nuna wakwe a va ta tsaka loko va tiendlela swiboho evuton’wini. (Gen. 3:1-6) Sweswo a ku ri vutianakanyi hikuva Sathana a lava leswaku Adamu na Evha swin’we ni vana lava a va ta va na vona va gandzela yena ematshan’weni yo gandzela Yehovha. Yehovha hi yena loyi a va nyike xin’wana ni xin’wana lexi a va ri na xona, kaya ro saseka, mimiri ya vona leyi hetisekeke ni ntshembo wo hanya hilaha ku nga heriki. Lexi twisaka ku vava, Adamu na Evha a va xi yingisanga Xikwembu, leswi endleke leswaku va lahlekeriwa hi vuxaka na xona. Vuyelo bya kona ku ve maxangu lawa u ma vonaka namuntlha. Va sungule ku fana ni xiluva lexi khiweke emurhini, lexi vunaka hakatsongotsongo kutani xi fa. Vana va vona va xaniseka hikwalaho ka ndzhukano wa xidyoho. (Rhom. 5:12) Nilokoswiritano, vanhu vo tala va ha hlawula ku nga xi yingisi Xikwembu. Va lava ku tihanyela ku rhandza. (Efe. 2:1-3) Vuyelo bya kona byi vekiwe erivaleni eka ndzimana ya namuntlha. w18.12 20 ¶3-4

Muapostola Pawulo a a tlharihile naswona a a dyondzekile, a a kota ku vulavula tindzimi timbirhi kumbe ku tlula. (Mint. 5:34; 21:37, 39; 22:2, 3) Kambe loko swi ta eka timhaka leti ku nga riki na nawu wo karhi, a a nga landzeli vutlhari bya misava. Swiboho swakwe a swi sekeriwe eMatsalweni. (Mint. 17:2; 1 Kor. 2:6, 7) Hikwalaho ka sweswo, Pawulo u tirhele Xikwembu a tsakile a langutele hakelo yakwe leyi nga heriki. (2 Tim. 4:8) Swi le rivaleni leswaku miehleketo ya Xikwembu yi tlakuke ku tlula ya vanhu va misava leyi. Swi ta hi fambela kahle naswona hi ta tsaka loko hi endla swilo hi ku kongomisiwa hi mianakanyo ya Xikwembu. Kambe Yehovha a nga hi sindzisi leswaku hi endla tano. “Hlonga ro tshembeka ni ro tlhariha” hambi ku ri vakulu a va yi lawuli mianakanyo ya vanhu va Xikwembu. (Mat. 24:45; 2 Kor. 1:24) Kambe i vutihlamuleri bya Mukreste ha un’we leswaku a va ni miehleketo yo fana ni ya Xikwembu. w18.11 20-21 ¶12-13

Hi ku tirhisa Esaya Xikwembu xi vule leswaku endzhaku ka loko vanhu va xona va tlhelele etikweni ra rikwavo a va nga ha ta chava ku hlaseriwa hi swiharhi kumbe hi vanhu lava hanyaka ku fana ni swivandzana. Vanhu lavatsongo ni lavakulu va ta va va sirhelelekile. (Esa. 11:6-9; 35:5-10; 51:3) Esaya u tlhele a vula leswaku misava hinkwayo, ku nga ri tiko ra Israyele ntsena, a “yi ta tala hi ku tiva Yehovha kukota mati lama funengetaka lwandle.” Esaya u ye emahlweni a kandziyisa leswaku vanhu volavo lava tlheleleke etikweni ra rikwavo, a va nga ta xungetiwa hi swiharhi kumbe hi vanhu. Tiko ra vona a ri ta humesa mihandzu yo tala naswona sweswo a swi ta koteka hikwalaho ka leswi a ku ta va ni mati yo tala ku fana ni le ntangeni wa Edeni. (Gen. 2:10-14; Yer. 31:12) Xana vuprofeta lebyi byi hetiseke kwalaho ntsena? Ku hava vumbhoni lebyi kombisaka leswaku lava vuyeke hi le vuhlongeni va hanyisiwe hi singita. Hi xikombiso, lava nga voniki a va tlhelanga va vona. Kutani Xikwembu a xi kombisa leswaku ku hanyisiwa ko tano hi singita a ku ta endleka enkarhini lowu taka. w18.12 5 ¶11-12

Hi tshemba leswaku hi ta ya emahlweni hi famba entiyisweni hilaha ku nga heriki. Hi nga ku tiyisa njhani ku tiyimisela ka hina ku ya emahlweni hi famba entiyisweni? Yana emahlweni u dyondza ntiyiso wa risima wa Rito ra Xikwembu u tlhela u anakanyisisa ha wona. Xava ntiyiso hi ku tinyika nkarhi wa ku hlaya Rito ra Xikwembu. Loko u endla tano u ta wu tlangela swinene ntiyiso naswona a wu nge pfuki u wu xavisile. Ku engetela eka ku xava ntiyiso, Swivuriso 23:23 yi vula leswaku hi fanele hi tlhela hi xava “vutlhari, ndzayo ni ku twisisa.” Vutivi byi ri byoxe a byi enelanga. Hi fanele hi hanya hi ntiyiso. Ku twisisa ku endla leswaku hi tiva ndlela leyi swilo hinkwaswo leswi Yehovha a swi vuleke swi pfumelelanaka ha yona. Vutlhari byi hi susumetela ku endla leswi hi swi tivaka. Mikarhi yin’wana ntiyiso wa hi tshinya, wu hi komba laha hi faneleke hi cinca kona. Onge mikarhi hinkwayo hi nga landzela nkongomiso wolowo. I wa nkoka swinene ku tlula silivhere.—Swiv. 8:10. w18.11 9 ¶3; 11 ¶13-14

Hi wihi nchumu wa nkoka swinene eka wena? Xana u nga pfumela ku wu cincisa ivi u nyikiwa nchumu wun’wana lowu nga riki wa nkoka? Vagandzeri va Yehovha lava tinyiketeleke swa va olovela ku hlamula swivutiso leswi. Nchumu wa nkoka swinene eka hina i vuxaka bya hina na Yehovha naswona a hi nge pfumeli ku nyikiwa nchumu wun’wana ematshan’weni ya byona. Ntiyiso wa le Bibeleni na wona hi wu teka wu ri wa nkoka hikuva wu endle leswaku hi kota ku va ni vuxaka ni Tata wa hina wa le tilweni. (Kol. 1:9, 10) Anakanya hi swilo hinkwaswo leswi Mudyondzisi wa hina Lonkulu a hi dyondzisaka swona eRitweni rakwe, ku nga Bibele! U hi byela ntiyiso mayelana ni vito rakwe ra nkoka ni timfanelo takwe leti endlaka a rhandzeka. U hi byela hi lunghiselelo ro hlawuleka ra nkutsulo, leri a hi lunghiseleleke rona hi ku tirhisa N’wana wakwe, Yesu. Yehovha u tlhela a hi byela hi Mfumo wa Mesiya naswona u hi tshembisa ku hanya eParadeyisini laha misaveni. U hi dyondzisa ndlela leyi hi faneleke hi hanya ha yona. Ntiyiso lowu, hi wu teka wu ri wa nkoka hikuva wu endla leswaku hi kota ku tshinela eka Muvumbi wa hina. Wu endla hi va ni xikongomelo evuton’wini. w18.11 3 ¶1-2

Vanhu lava hembaka hi ndlela yoleyo a ve nge swi koti ku tumbetela Yehovha hikuva eka yena “swilo hinkwaswo swi lo dla, swi paluxeka erivaleni.” (Hev. 4:13) Hi xikombiso, Ananiya na Safira va luke mano yo kanganyisa vaapostola. Va xavise nsimu ya vona kambe va nga yi yisi hinkwayo mali eka vaapostola. Vatekani lava, a va lava ku tiendlela vito evandlheni, hi ku endla onge va nyikele hi mali hinkwayo. Hambiswiritano, Yehovha a lo va nhwii, naswona u va xupurile. (Mint. 5:1-10) Xana Yehovha u titwa njhani loko hi hemba? Sathana ni vahembi hinkwavo lava nga hundzukiki lava n’wi tekelelaka hi ku hemba mavunwa ya rihlaza va ta “lahleriwa etiveni ra ndzilo.” (Nhlav. 20:10; 21:8; Ps. 5:6) Ha swi tiva leswaku Yehovha a nga ‘fani ni munhu leswaku a nga hemba.’ Kahlekahle a ‘swi koteki leswaku Xikwembu xi hemba.’ (Tinhl. 23:19; Hev. 6:18) “Yehovha [u] venga . . . ririmi ra vunwa.” (Swiv. 6:16, 17) Leswaku hi amukeriwa hi Yehovha hi fanele hi hanya hi milawu yakwe ya ntiyiso. w18.10 8 ¶10-13

A hi nge, muthori wa wena u ku kombela leswaku u humesa mali yo seketela nkhuvo lowu nga ta va kona lowu fambisanaka ni vukhongeri bya mavunwa. A wu ta endla yini? Ematshan’weni yo rindzela xiyimo xo tano, hikwalaho ka yini sweswi, u nga ehleketi hi ndlela leyi Yehovha a ehleketaka ha yona hi mhaka leyi? Kutani loko u tikuma u ri eka xiyimo xo tano, u ta tiva leswi u nga swi endlaka ni leswi u nga swi vulaka. Ku anakanyisisa ka ha ri emahlweni swi ta hi pfuna leswaku hi tshama hi tshembekile loko hi langutana ni xiyimo xa xihatla xa swa vutshunguri. Hambileswi hi tiyimiseleke ku papalata ku pomperiwa ngati kumbe swiaki swa mune leswikulu swa yona, kumbe tindlela tin’wana leti katsaka ku tirhisiwa ka ngati ti lava leswaku un’wana ni un’wana a tiendlela xiboho lexi sekeriweke eka misinya ya milawu ya Bibele leyi nga ta hi pfuna hi va ni miehleketo ya Yehovha. (Mint. 15:28, 29) Ku ta va ku nga ri vutlhari ku rindza ku kondza hi ya exibedlhele, hi ri karhi hi twa ku vava naswona hi ri ehansi ka ntshikilelo kutani hi endla xiboho xa xihatla. Sweswi i nkarhi wa kahle wo endla ndzavisiso, leswaku u kota ku endla xiboho xa vutlhari loko u tata khadi ra wena ra le nawini ni ku vulavula ni dokodela wa wena. w18.11 24 ¶5; 26 ¶15-16

Yehovha i murisi la nga ni rirhandzu la khathalelaka vanhu vakwe ni ku va sirhelela eka valala va vona. Hakunene leswi swa hi tiyisa tanihi leswi makumu ma tshinelaka! Yehovha u ta hambeta a khathalela vanhu vakwe ni hi nkarhi wa nhlomulo lowukulu lowu nga kwala nyongeni. (Nhlav. 7:9, 10) Vanhu va Xikwembu hinkwavo lava vabyaka, lava hanyeke kahle, lava dyuhaleke kumbe vantshwa a va nge chavi nchumu hi nkarhi wa nhlomulo lowukulu. Entiyisweni va ta va ni xivindzi. Va ta tsundzuka marito ya Yesu Kreste lama nge: “Yimani mi ololoka ivi mi tlakusa tinhloko ta n’wina, hikuva ku kutsuriwa ka n’wina ka tshinela.” (Luka 21:28) Va ta va ni xivindzi hambiloko va hlaseriwa hi Gogo, ku nga nhlangano wa matiko lowu nga ni matimba. (Ezek. 38:2, 14-16) I yini lexi nga ta pfuna vanhu va Xikwembu leswaku va va ni xivindzi? Va swi tiva leswaku Yehovha a nga cinci. U ta tlhela a va muponisi la khathalaka ni la anakanyelaka.—Esa. 26:20. w18.09 26 ¶15-16

Anakanya ndlela leyi swi va khutazeke ha yona Vaisrayele ku twa marito ya Yehovha. Tanihi un’wana wa malandza ya Yehovha, na wena u nga tiyiseka leswaku Yehovha wa ku rhandza hi laha ku heleleke. Rito ra Xikwembu ri tshembisa lava nga evugandzerini bya ntiyiso ri ku: “U ta ponisa, leswi a nga Lowa matimba. U ta khana ha wena hi ku tsaka.” (Sof. 3:16, 17) Ku nga khathariseki miringo leyi vanhu va nga ha langutanaka na yona, Yehovha u tshembisa ku va tiyisa ni ku va chavelela. U ri: ‘Kunene mi ta an’wa. Mi ta rhwariwa hi tsheve, mi ta xingiwa. Ku fana ni n’wana loyi mana wakwe a hambetaka a n’wi chavelela.’ (Esa. 66:12, 13) Anakanya ndlela leyi n’wana a titwaka a sirhelelekile ha yona loko mana wakwe la nga ni rirhandzu a n’wi tlakurile kumbe loko a tlanga na yena! Sweswo swi kombisa tintswalo ni rirhandzu leri Yehovha a ri kombisaka malandza yakwe. Tiyiseka leswaku u wa risima eka Yehovha naswona wa ku rhandza.—Yer. 31:3. w18.09 13 ¶6-7

Eka swiyimo swo hambanahambana ematin’wini ya Israyele wa khale, vatirhi va ku tirhandzela a va laveka. (Eks. 36:2; Neh. 11:2) Ninamuntlha, u ni lunghelo ro tirhisa nkarhi wa wena, swilo swa wena ni vuswikoti bya wena leswaku u pfuna vamakwerhu. Loko u endla tano, u ta kuma ntsako lowukulu ni ku tlhela u kuma mikateko. Lava pfunetaka eka matsima lama hleriweke hi nhlengeletano hakanyingi va kuma vanghana lavantshwa. Xiya xikombiso xa Margie loyi a tshameke a tirha eka matsima yo aka Tiholo ta Mfumo ku ringana malembe ya 18. Eka malembe wolawo a rhandza ku letela vantshwa. U xiye leswaku sweswo a swi va nyika nkarhi lowunene wo khutazana hi tlhelo ra moya. (Rhom. 1:12) Loko Margie a langutana ni swiyimo swo tika u khutaziwe hi vanghana lava a va kumeke loko a ha ri eka matsima yo aka. Xana u tshame u pfuneta eka matsima wolawo yo aka? w18.08 25 ¶9, 11

Loko Pawulo a tsala marito lawa, swi nga endleka Timotiya a ri emalembeni ya va-30. Kambe Pawulo a a n’wi nyike vutihlamuleri lebyikulu. Ku nga khathariseki xivangelo xa kona kambe dyondzo ya kona yi le rivaleni. A hi fanelanga hi avanyisa vamakwerhu lavantshwa hi ku landza malembe ya vona. Hi fanele hi tsundzuka leswaku hambi ku ri Hosi ya hina Yesu u hete vutirheli byakwe hinkwabyo a ri emalembeni ya va-30. Swi nga ha endleka hi ri eka ndhavuko lowu va langutelaka ehansi vantshwa. Loko swi ri tano, vakulu va nga ha kanakana ku bumabumela vamakwerhu lava ha riki vantshwa tanihi hi malandza ya vutirheli kumbe vakulu. Vakulu hinkwavo va fanele va tsundzuka leswaku Matsalwa a ma hi byeli leswaku munhu u fanele a bumabumeriwa tanihi nandza wa vutirheli kumbe nkulu loko a ri ni malembe mangani.—1 Tim. 3:1-10, 12, 13; Tito 1:5-9. w18.08 11-12 ¶15-16

Leswaku hi endla swiboho leswinene, hi fanele hi va ni vuxokoxoko lebyi heleleke. Hikwalaho, hi fanele hi va ni vuxiyaxiya ni ku ri hlawula hi vukheta rungula leri hi nga ta ri hlaya. (Filp. 4:8, 9) A hi fanelanga hi tidyela nkarhi hi ku hlalela mahungu ya le ka Inthanete eka ti-website leti kanakanisaka kumbe hi hlaya swiviko leswi nga tshembekiki leswi hangalasiwaka hi imeyili. I swa nkoka swinene ku papalata ti-website ta vagwinehi. Xikongomelo xa vona i ku hambukisa vanhu va Xikwembu ni ku soholota ntiyiso. Loko hi hlaya rungula leri nga tshembekiki hi nga teka swiboho leswi hoxeke. U nga tshuki u wu tekela ehansi nhlohlotelo lowu rungula leri hambukisaka ri nga vaka na wona emianakanyweni ni le mbilwini ya wena. Xiya leswi endlekeke enkarhini wa Muxe loko tinhlori ta khume eka ta 12 leti a ti rhumeriwe ku ya kambela Tiko leri Tshembisiweke ti vuya ni xiviko xo biha. (Tinhl. 13:25-33) Xiviko xa vona lexi hundzeletiweke xi hete vanhu va Yehovha matimba. (Tinhl.14:1-4, 6-10) Ematshan’wini yo lava vuxokoxoko hinkwabyo ni ku tshemba Yehovha, va hlawule ku tshemba xiviko xo biha. w18.08 4 ¶4-5

Vanhu vo tala va ni mahanyelo lamanene hambiloko va nga ri Timbhoni, van’wana a hi mikarhi hinkwayo va endlaka swo biha. Loko swi ri tano hi vanghana va wena, xana u nga vula leswaku i vanghana lavanene? Tivutise leswaku vuxaka bya wena na vona byi ta khumba vuxaka bya wena na Yehovha hi ndlela yihi? Xana va ta byi antswisa? I yini leswi nga etimbilwini ta vona? Hi xikombiso, xana hakanyingi va vulavula hi fexeni, mali, switirhisiwa swa elektroniki, vuhungasi ni swin’wana swo fana ni sweswo? Xana mabulo ya vona ma katsa ku xopaxopa vanhu van’wana kumbe mafenya lama thyakeke? Yesu u lemukise a ku: “Nomu wu vulavula leswi mbilu yi taleke swona.” (Mat. 12:34) Loko u xiya leswaku vanghana va wena va veka vuxaka bya wena na Yehovha ekhombyeni, hatla u teka goza naswona loko swi fanerile, herisa vunghana bya n’wina.—Swiv. 13:20. w18.07 19 ¶11

Loko Muxe a ri ni malembe ya 80, Yehovha u n’wi nyike xiavelo xo kutsula Vaisrayele evuhlongeni bya Egipta. (Eks. 3:10) Mikarhi yo tala Muxe a kanakana ku endla ntirho lowu Yehovha a n’wi nyike wona. Kambe u n’wi lehisele mbilu a tlhela a n’wi nyika matimba yo endla masingita. (Eks. 4:2-9, 21) A xi ta va xi tirhise matimba ku chavisa Muxe leswaku a hatla a xi yingisa. Kambe, Yehovha u lehise mbilu, a tlhela a tiyisekisa nandza wakwe la titsongahataka leswaku u ta n’wi pfuna. Xana ku endla tano swi n’wi pfunile Muxe? Ina! Muxe u ve murhangeri lonene hikuva a tirhisana ni vanhu hilaha Yehovha a tirhisaneke na yena ha kona. Loko u ri ni vulawuri byo karhi, i swinene leswaku u tekelela Yehovha hi ku va ni musa, ku lehisa mbilu ni ku anakanyela loko u tirhisana ni van’wana. (Kol. 3:19-21; 1 Pet. 5:1-3) Loko u tikarhatela ku tekelela Yehovha na Yesu Kreste Muxe Lonkulu, u ta va la nghenekaka ni la phyuphyisaka eka van’wana.—Mat. 11:28, 29. w18.09 24-25 ¶7-10

Hikwalaho ka yini u nga tikarhateli ku kondletela vun’we exikarhi ka vamakwerhu? Loko ku ri leswi u nga eku swi endleni, wa bumabumeriwa. Xana u nga ‘ndlandlamuka,’ leswi vulaka ku swi endla hilaha ku engetelekeke naswona u swi endla nkarhi ni nkarhi? (2 Kor. 6:11-13) Xana u nga engetela matshalatshala lama u ma endlaka yo pfuna vaakelani va wena ku dyondza Bibele? Marito ni swiendlo swa wena swa musa swi nga susumetela muakelani leswaku a lava ku dyondza Bibele. Tivutise: ‘Xana vaakelani va mina va ndzi tiva ndzi ri munhu wa njhani? Xana kaya ra mina ri tshama ri basile leswaku ri va xikombiso lexinene eka vaakelani? Xana ndzi va wo rhanga ku pfuna van’wana?’ Loko u ri karhi u bula ni Vakreste van’wana, va kombele va ku byela ndlela leyi mahanyelo ya vona lamanene ni swiendlo swa musa swi ma khumbeke ha yona maxaka ya vona, vaakelani, vatirhikulobye kumbe swichudenikolobye. Hakanyingi u ta twa mintokoto leyi tsakisaka.—Efe. 5:9. w18.06 24 ¶13-14

Xilemukiso xexo xi ve tano eka lava dlayeke mudyondzisiwa Stefano naswona swi tano ni le ka van’wana. (Mint. 6:8, 12; 7:54-60) Swa hlamarisa hakunene leswaku varhangeri va vukhongeri lava hisekelaka etlhelo, va tlula milawu ya Xikwembu lexi va tivulaka vagandzeri va xona hi ku endla vugevenga lebyikulu byo tanihi ku dlaya! (Eks. 20:13) Swi le rivaleni leswaku mapfalo ya vona i mukongomisi la nga ni khombo! Xana hi nga endla yini leswaku ripfalo ra hina ri tshama ri tirha kahle? Milawu ni misinya ya milawu leyi nga eRitweni ra Xikwembu yi “pfuna ku dyondzisa, ku tshinya, ku lulamisa swilo, ku laya eku lulameni.” (2 Tim. 3:16) Hikwalaho, ku dyondza Bibele hi vukheta, ku anakanyisisa hi leswi hi swi dyondzaka ni ku swi tirhisa evuton’wini bya hina, swi letela ripfalo ra hina leswaku ri fambisana ni langutelo ra Xikwembu kutani ri ta va mukongomisi la tshembekaka. w18.06 16-17 ¶3-4

Banga leri a ri tirhisiwa hi masocha ya Varhoma hi nkarhi lowu Pawulo a tsaleke papila rakwe ha wona, a ri lehe kwalomu ka 50 wa tisentimitara naswona a ri endleriwe ku lwa ni munhu loyi a nga ekusuhi. Xivangelo xin’wana lexi a xi endla leswaku masocha ya Varhoma ya hlula hileswi a ma titoloveta matlhari ya wona siku ni siku. Pawulo u fanisa Rito ra Xikwembu ni banga leri Yehovha a hi nyikeke rona. Kambe hi fanele hi dyondza ku ri tirhisa hi vutlhari loko hi lwela ripfumelo ra hina kumbe loko hi lulamisa mianakanyo ya hina vini. (2 Kor. 10:4, 5; 2 Tim. 2:15) A hi fanelanga hi chavisiwa hi Sathana ni madimona. Va ni matimba kambe hi nga swi kota ku va hlula. Nakambe a va nge hanyi hilaha ku nga heriki. Ku nga ri khale, hi nkarhi wa Ku Fuma Ka Kreste Ka Gidi Ra Malembe, va ta pfaleriwa naswona a va nge he koti ku endla nchumu, kutani endzhaku ka sweswo va ta herisiwa. (Nhlav. 20:1-3, 7-10) Ha n’wi tiva nala wa hina, marhengu yakwe ni swikongomelo swakwe. Hi ku pfuniwa hi Yehovha, hi nga yima hi tiyile hi lwisana na yena! w18.05 30 ¶15; 31 ¶19-21

A swi kanakanisi leswaku Adamu a a swi tiva leswaku tinyoka a ti swi koti ku vulavula. A nga ha va a swi lemukile leswaku xivumbiwa xa moya hi xona lexi vulavuleke na Evha hi ku tirhisa nyoka. (Gen. 3:1-6) Adamu na Evha a va nga xi tivi xivumbiwa xexo xa moya. Hambiswiritano, Adamu u hlawule ku xandzukela Tata wakwe la nga na rirhandzu naswona u landzele xivumbiwa xexo eku lwisaneni ni ku rhandza ka Xikwembu. (1 Tim. 2:14) Hi nkarhi wolowo, Yehovha u sungule ku paluxa nala loyi, la kuceteleke Adamu na Evha leswaku va xandzuka ni ku tlhela a tshembisa leswaku nala yoloye u ta herisiwa. Kambe Yehovha u tlhele a lemukisa leswaku ku ringana nkarhi wo karhi, xivumbiwa lexi xa moya lexi vulavuleke hi ku tirhisa nyoka, a xi ta hlasela vanhu lava rhandzaka Xikwembu. (Gen. 3:15) Yehovha a nga hi tivisanga vito ra ntsumi yoleyo, leyi n’wi xandzukeleke. Nakambe, Xikwembu xi hlawule ku nga hi tivisi hambi ku ri leswi vito ra nala yoloye ri vulaka swona, ku kondza ku hundza kwalomu ka malembe ya 2 500 endzhaku ka loko ku ve ni ku xandzuka.—Yobo 1:6. w18.05 22 ¶1-2

Loko u tshame u titwa u hele matimba loko u chumayela ensin’wini ya vanhu lava nga tsakeliki, u nga ha va u titwe hi ndlela leyi muapostola Pawulo a tshameke a titwa ha yona. Hi nkarhi wa vutirheli byakwe lebyi tekeke kwalomu ka malembe ya 30, u pfune vanhu vo tala va va vadyondzisiwa va Kreste. (Mint. 14:21; 2 Kor. 3:2, 3) Hambiswiritano, a nga swi kotanga ku hundzula Vayuda vo tala leswaku va va vagandzeri va ntiyiso. Ku hambana na sweswo, vo tala va kanete Pawulo naswona van’wana va n’wi xanisile. (Mint. 14:19; 17:1, 4, 5, 13) Xana Pawulo u titwe njhani hi ndlela leyi Vayuda va anguleke ha yona? U te: “Ndzi vula ntiyiso mayelana na Kreste . . . ndzi ni gome lerikulu ni xitlhavi lexi nga heriki embilwini ya mina.” (Rhom. 9:1-3) Hikwalaho ka yini Pawulo a titwe hi ndlela yoleyo? A a rhandza ntirho wo chumayela. A a chumayela Vayuda hi leswi a khathala ngopfu hi vona. A swi n’wi twisa ku vava loko a vona Vayuda va ala ku amukela tintswalo ta Xikwembu. Ku fana na Pawulo, hi chumayela hileswi hi rhandzaka vanhu.—Mat. 22:39; 1 Kor. 11:1. w18.05 13 ¶4-5

Pawulo u kombise leswaku hambi ku ri lava nga ni vutihlamuleri byo khutaza van’wana na vona va swi lava ku khutaziwa. U tsalele Vakreste lava tshamaka eRhoma a ku: “Hikuva ndzi navela ku mi vona, leswaku ndzi ta mi nyika nyiko yo karhi ya moya, mi ta tiyisiwa; kumbe, leswaku mi ta khutazana, un’wana hi ripfumelo ra un’wana, ra n’wina ni ra mina.” (Rhom. 1:11, 12) Hambileswi Pawulo a nyikeleke swikhutazo leswinene eka van’wana, mikarhi yin’wana na yena a lava ku khutaziwa. (Rhom. 15:30-32) Vanhu lava hanyaka vutomi bya ku tinyiketela va fanele va bumabumeriwa. Vamakwerhu lava nga nghenelangiki vukati hileswi va lavaka ku yingisa xileriso xo nghenela vukati “eHosini ntsena,” Na vona va lava ku khutaziwa. (1 Kor. 7:39) Nakambe Vakreste lava tshamaka va tshembekile loko va xanisiwa kumbe loko va vabya na vona va lava ku khutaziwa.— 2 Tes. 1:3-5. w18.04 21 ¶3-5