January

Malandza hinkwawo yo tshembeka ya Xikwembu ma lava ku dyondza ndlela yo wu endla “kahle ntirho” lowu ma nyikiweke wona. (2 Tim. 4:5) Phela ntirho lowu i wa nkoka naswona i wa xihatla ku tlula ntirho wihi na wihi laha misaveni. Hambiswiritano, swi nga hi tikela ku heta nkarhi wo tala hilaha hi lavaka hakona ensin’wini. Mitirho yin’wana ya nkoka yi lava nkarhi ni matimba ya hina. Hi nga ha boheka ku tirha tiawara to tala entirhweni wa ku tihanyisa leswaku hi ta kota ku khathalela swilaveko swa hina ni mindyangu ya hina. Swi nga ha hi tikela ku khathalela swilaveko hinkwaswo swa mindyangu ya hina, hi nga ha vabya, hi va ni ntshikilelo wa mianakanyo kumbe hi va ni switlhavi leswi vangiwaka hi ku dyuhala. Loko swiyimo swa hina swi nga hi pfumeleli ku heta nkarhi wo tala entirhweni wa Yehovha, a hi fanelanga hi hela matimba. Yesu a a swi tiva leswaku a hi nge swi koti ku humesa mihandzu ya Mfumo leyi fanaka. (Mat 13:23) Yehovha wa swi tlangela hinkwaswo leswi hi swi endlaka entirhweni wakwe, ntsena loko hi endla leswi nga ematimbeni ya hina.—Hev. 6:10-12. w19.04 2 ¶1-3

Sathana u lumbeta Yehovha hi mavunwa yakwe mayelana ni vafi. Mavunwa wolawo ma katsa dyondzo ya leswaku vafi va xanisiwa endzilweni. Tidyondzo to tano ti onha Xikwembu vito! Hi ndlela yihi? Tidyondzo teto ti endla vanhu va tshemba leswaku Xikwembu xa rirhandzu xi ni tihanyi ku fana na Diyavulosi. (1 Yoh. 4:8) Xana sweswo swi endla u titwa njhani? Xa nkoka swinene, xana Yehovha u titwa njhani hi swona? Phela Yehovha u venga vubihi hinkwabyo. (Yer. 19:5) Mavunwa ya Sathana mayelana ni rifu ma endla vanhu va nga wu voni nkoka wa gandzelo ra Kreste ra nkutsulo. (Mat. 20:28) Mavunwa man’wana ya Sathana hileswaku vanhu va ni moya lowu nga fiki. Loko sweswo a ku ri ntiyiso, swi vula leswaku vanhu hinkwavo a va ta hanya hilaha ku nga heriki. Kreste a ta va a nga tikarhatanga a nyikela hi vutomi byakwe tanihi nkutsulo leswaku hi kuma vutomi lebyi nga heriki. Tsundzuka leswaku xitlhavelo xa Kreste i xikombiso lexikulu ngopfu xa rirhandzu leri tshameke ri kombisiwa vanhu. (Yoh 3:16; 15:13) Ehleketa ndlela leyi Yehovha ni N’wana wakwe va titwaka hayona hi tidyondzo leti endlaka nyiko ya risima yi vonaka yi ri leyi a yi nga bohi! w19.04 14 ¶1; 16 ¶8-9

Leswi Yesu a a swi dyondzisa swi kumeka kwihi? Tievhangeli ta mune ti vulavula hi swilo swo tala leswi Yesu a swi vuleke ni ku swi endla loko a ri laha misaveni. Matsalwa laman’wana hinkwawo ya Xigriki ma hi pfuna ku twisisa ndlela leyi Yesu a anakanya hayona, hikuva lava ma tsaleke a va huhuteriwe hi moya lowo kwetsima naswona a va “anakanya ku fana na Kreste.” Tidyondzo ta Yesu ta hi pfuna eka swiyimo hinkwaswo swa vutomi. “Nawu wa Kreste” wu lawula swilo hinkwaswo leswi hi swi endlaka ekaya, entirhweni, exikolweni ni le vandlheni. (Gal. 6:2) Hi dyondza nawu lowu hi ku hlaya Matsalwa ya Vukreste ya Xigriki ni ku anakanyisisa ha wona. Hi va hi yingisa nawu lowu, loko hi hanya hi switsundzuxo, swileriso ni misinya ya milawu leyi kumekaka eMatsalweni wolawo. Loko hi yingisa nawu wa Kreste, hi va hi yingisa Yehovha Xikwembu xa rirhandzu hikuva tidyondzo hinkwato ta Yesu ti huma eka yena.—Yoh. 8:28. w19.05 3 ¶6-7

Swi twisa ku vava ku vona vanhu va endla swilo leswi tsakisaka Diyavulosi. Hambiswiritano, Yehovha wa ma tiva marhengu ya Sathana ya vukanganyisi. Yehovha wa ku vona ku xaniseka ka hina naswona u ta hi chavelela. Hi katekile hikuva hi gandzela “Xikwembu xa nchavelelo hinkwawo, lexi hi chavelelaka emiringweni ya hina hinkwayo, leswaku hi ta kota ku chavelela van’wana lava nga emiringweni ya mixakaxaka hi nchavelelo lowu hi wu kumaka eka Xikwembu.” (2 Kor. 1:3, 4) Lava vatswari va vona va nga va sirhelelangiki eka vaxanisi kumbe lava va twisiweke ku vava hi vanhu lava va va toloveleke, va lava ku chaveleriwa. Mupisalema Davhida a swi tiva leswaku Yehovha wa hi chavelela mikarhi hinkwayo. (Ps. 27:10) Davhida a tiyiseka leswaku Yehovha i tatana eka lava khomiweke ku biha hi swirho swa mindyangu ya vona. Yehovha u swi endlisa ku yini sweswo? U tirhisa vagandzeri vakwe lavo tshembeka. Vamakwerhu lava hi nga na vona evandlheni va fana ni ndyangu wa hina. Hi xikombiso, Yesu u te, lava gandzelaka Yehovha va fana ni vamakwavo ni vamanana eka yena.—Mat. 12:48-50. w19.05 15-16 ¶8-9

Hi fanele hi rhanga hi dyondza yini? A hi tiyisekeni leswaku hi dyondza Rito ra Xikwembu siku ni siku. Ku hungutiwe tindzimana eka xiyimiso xa ku hlaya ka Bibele xa vhiki na vhiki leswaku hi ta kuma nkarhi wo anakanyisisa hi leswi hi swi hlayaka ni ku endla ndzavisiso. Xikongomelo i ku va hi pfumelela rungula ra Bibele ri fikelela timbilu ta hina ni ku tshinela eka Yehovha ku nga ri ku hlaya tindzimana leti hi averiweke tona ntsena. (Ps. 19:14) Dyondzo ya Xihondzo xo Rindza evandlheni yi hi pfuna ku twisisa Bibele. Hikwalaho, hlaya matsalwa lama kombisiweke, ngopfungopfu lama nga ta hlayiwa evandlheni. Xiya ndlela leyi marito kumbe swiga leswi nga ematsalweni wolawo swi fambisanaka hayona ni yinhla leyi ku buriwaka hayona eka pharagrafu. Nakambe anakanyisisa hi matsalwa lama u ma hlayaka ni ndlela leyi u nga ta ma tirhisa hayona evuton’wini.—Yox. 1:8. w19.05 27 ¶5; 28 ¶9

Yesu u veke xikombiso lexinene eka ndlela leyi a byi languta hayona vutirheli. Lexi a xi ri xa nkoka evuton’wini bya Yesu a ku ri ku vulavula hi Mfumo wa Xikwembu. U fambe mpfhuka wo leha leswaku a chumayela vanhu vo tala hilaha a nga kotaka ha kona. Mikarhi hinkwayo a a lava tindlela to chumayela vanhu emakaya ya vona kumbe kun’wana ni kun’wana laha a va kumeka kona. Yesu a a rhangisa vutirheli evuton’wini byakwe. Hi nga tekelela Kreste hi ku lava tindlela to byela vanhu mahungu lamanene nkarhi wihi na wihi ni le ndhawini yin’wana ni yin’wana loko swi koteka. Hi tiyimisele ku tirhisa nkarhi wihi na wihi leswaku hi chumayela. (Mar. 6:31-34; 1 Pet. 2:21) Van’wana evandlheni i maphayona yo hlawuleka, ya nkarhi hinkwawo kumbe ya nkarhinyana. Van’wana va dyondze ririmi rin’wana kumbe ku rhurhela endhawini leyi ku nga ni xilaveko xa vachumayeri. Nilokoswiritano, ntirho wo tala wo chumayela wu endliwa hi vahuweleri va Mfumo, lava nga kotiki ku phayona kambe va endlaka leswi nga ematimbeni ya vona. Hambiswiritano, Yehovha a nga langutelanga leswi tlulaka leswi nga ematimbeni ya hina. w19.04 4 ¶7-8

Tivutise: ‘Xana ndzi ni mavondzonyana?’ (1 Pet. 2:1) ‘Xana ndzi titekela ehenhla hikwalaho ka ndhawu leyi ndzi humaka eka yona, dyondzo kumbe hi leswi ndzi nga ni timali?’ (Swiv. 16:5) ‘Xana ndzi va vonela ebodlheleni vanhu va rixaka rin’wana kumbe lava nga riki na swona swilo leswi ndzi nga na swona?’ (Yak. 2:2-4) ‘Xana ndzi titwa ndzi rhandza swilo leswi nga emisaveni ya Sathana?’ (1 Yoh. 2:15-17) ‘Xana ndzi rhandza vuhungasi lebyi nga ni madzolonga ni ku tikhoma ko biha hi swa masangu?’ (Ps. 97:10; 101:3; Amo. 5:15) Tinhlamulo ta swivutiso leswi ti ta ku pfuna ku vona laha u faneleke u antswisa kona. Vanghana va hina va hi kucetela ngopfu. (Swiv. 13:20) Exikolweni kumbe emintirhweni hi hanya ni vanhu lava nga ta ka va nga hi pfuni ku ehleketa hi ndlela leyi tsakisaka Xikwembu. Hambiswiritano, hi nga kuma vanghana lavanene etinhlengeletanweni ta Vukreste naswona hi ta khutaziwa “ku rhandzana ni ku endla mitirho leyinene.”—Hev. 10:24, 25. w19.06 12 ¶13-14

A hi xikongomelo xa Yehovha leswaku hi weriwa hi swiphiqo ni maxangu lama hi kayakayisaka. Kutani swa twisiseka loko malandza ya Yehovha yo tshembeka ma vulavula handle ko anakanya loko ma tshikilelekile. (Yobo 6:2, 3) Hambiloko a vula swilo leswi hoxeke hi Yehovha kumbe hi hina a hi fanelanga hi hatlisela ku n’wi hlundzukela kumbe ku n’wi avanyisa hikwalaho ka leswi a swi vuleke. Mikarhi yin’wana munhu loyi a nga ni swiphiqo leswi tshikilelaka a nga ha nyikiwa ndzayo kumbe switsundzuxo leswi nga n’wi pfunaka. (Gal. 6:1) Vakulu va nga swi endlisa ku yini sweswo? Va fanele va tekelela xikombiso xa Elihu loyi a yingiseleke Yobo a ri karhi a n’wi twela vusiwana swinene. (Yobo 33:6, 7) Elihu u nyike Yobo ndzayo endzhaku ka loko a twisise ndlela leyi Yobo a a ehleketa hayona. Vakulu va tekelela Elihu loko va rhiya ndleve ni ku ringeta ku twisisa xiyimo lexi munhu a nga eka xona. Hikwalaho, loko va nyika munhu ndzayo yi ta n’wi fikelela mbilu. w19.06 22-23 ¶10-11

Hi yihi ndlela leyi u nga ta gandzela Yehovha hayona loko hi yirisiwile? Rhavi ri ta nyika vakulu swiletelo ni swiringanyeto. Loko rhavi ri nga swi koti ku tihlanganisa ni vakulu, vakulu va ta pfuna vandlha hinkwaro leswaku ri kota ku ya emahlweni ri gandzela Yehovha. Va ta hi kongomisa hi ku landza nkongomiso wa Bibele ni mikandziyiso ya hina ya Vukreste. (Mat. 28:19, 20; Hev. 10:24, 25) Yehovha u tshembise leswaku mikarhi hinkwayo malandza yakwe ma ta kuma leswi ma swi lavaka leswaku ma tiyisa ripfumelo ra wona. (Esa. 65:13, 14; Luka 12:42-44) Hikwalaho tiyiseka leswaku nhlengeletano yakwe yi ta endla hinkwaswo leswi kotekaka leswaku u kuma leswi nga ta tiyisa ripfumelo ra wena. Kambe i yini leswi u faneleke u swi endla? Loko vugandzeri bya hina byi yirisiwile, lava ndhawu yo tumbeta Bibele ni mikandziyiso yin’wana ni yin’wana leyi u nga ta va u ri na yona. Tiyiseka leswaku swilo swo tano swa risima, leswi kandziyisiweke kumbe leswi nga eka switirhisiwa swa elektroniki a wu swi veki endhawini leyi valala va nga ta swi kuma hi ku olova. Un’wana ni un’wana wa hina u fanele a endla leswi nga ematimbeni ya yena leswaku a tiyisa ripfumelo rakwe. w19.07 10 ¶10-11

Eka malembe ya magidi lama hundzeke, vanhu vo tala a va nghena kereke. Kambe emalembeni ya sweswinyana swilo swi cincile. Vanhu vo tala a va lavi ku twa nchumu hi kereke. Ematikweni man’wana, vanhu vo tala va vula leswaku a va ngheni kereke. (Mat. 24:12) Hikwalahokayini? Swi nga ha endleka leswaku van’wana va yengiwa hi ku hlongorisa mintsako kumbe va kavanyetiwa hi swiphiqo. (Luka 8:14) Van’wana a va nghena kereke kambe sweswi a va ha pfumeli leswaku Xikwembu xi kona. Van’wana va swi tiva leswaku Xikwembu xi kona kambe va anakanya leswaku ku nghena kereke swi hundzeriwe hi nkarhi, a swi pfuni nchumu naswona a swi fambisani ni sayense. Va nga ha twa vanghana, vadyondzisi kumbe vanhu lava dumeke va vula leswaku swilo leswi hanyaka swi lo tiendlekela, kambe hakanyingi a va byeriwi swivangelo leswi twalaka leswi nga va pfunaka leswaku va pfumela eka Xikwembu. Van’wana va siringiwa hileswi vafundhisi va rhandzaka mali ni ku rhandza ku lawula. Etindhawini tin’wana, mimfumo yi veka milawu leyi sivelaka mitirho yo karhi ya vukhongeri. w19.07 20 ¶1-2

A swi kali swi lava hi va ni matimba leswaku hi ta va ni ripfumelo leri tiyeke eka Yehovha ni ku hisekela ntirho wakwe. Entiyisweni, vanhu vo tala lava dyuhaleke va wu hisekela ntirho wa Xikwembu. (2 Kor. 4:16) Kumbexana na wena u tirhele Yehovha malembe yo tala naswona sweswi hikwalaho ka ku dyuhala, a wa ha swi koti ku endla swo tala leswi a wu swi kota. Loko swi ri tano, u nga wi mapa. Tshama u ri karhi u swi tiva leswaku Yehovha a nge swi rivali hinkwaswo leswi u n’wi endleleke swona. (Hev. 6:10) Tsundzuka leswaku ku tirhela Yehovha hi mbilu hinkwayo a swi yi hi ku tala ka ntirho lowu hi n’wi endlelaka wona. Ematshan’wini ya sweswo, loko hi endla leswi nga matimbeni ya hina naswona hi swi endla hi mbilu hinkwayo hi kombisa leswaku hi rhandza Yehovha. (Kol. 3:23) Yehovha a nga langutelanga leswaku hi endla leswi hi nga kotiki ku swi endla.—Mar. 12:43, 44. w19.08 3 ¶6; 5 ¶11-12

Yehovha u kokela vanhu eka yena hi ku va endla va vona ‘mintirho leyinene’ ya malandza yakwe. (Mat. 5:14, 15; 1 Pet. 2:12) Loko nuna wa wena kumbe nsati wa wena a nga ri Mbhoni ya Yehovha, xana va kona vamakwerhu, lava a va tivaka evandlheni ra n’wina? Rhamba nuna kumbe nsati wa wena leswaku a famba na wena etinhlengeletanweni ta vandlha. (1 Kor. 14:24, 25) Ha tshemba leswaku hi ku famba ka nkarhi maxaka ya hina hinkwawo ma ta tirhela Yehovha swin’we na hina. Hambiloko hi endla matshalatshala yo pfuna maxaka ya hina leswaku va va malandza ya Yehovha, swi nga endleka va nga pfumeli. Loko swi ri tano, a hi fanelanga hi titwa nandzu hikwalaho ka xiboho xa vona. Phela a hi nge va sindzisi leswaku va pfumela leswi hi swi pfumelaka. Hambiswiritano, u nga yi tekeli ehansi ndlela leyi mahanyelo ya wena ma nga va pfunaka hayona maxaka ya wena loko ma ku vona u tirhela Yehovha u tsakile. Ma boxe eswikhongelweni swa wena. U vulavula na wona hi vutlhari. U nga tshiki ku ma pfuna! (Mit. 20:20) Yehovha u ta ma katekisa matshalatshala ya wena. Loko maxaka ya wena ma hlawula ku ku yingisa, ma ta ponisiwa! w19.08 18-19 ¶15-17

Xana Yesu a a vula yini? A a vula leswaku hi fanele hi olovisa vutomi bya hina kumbe hi tikarhatela ku fikelela pakani kumbe xikongomelo, hi nga pfumeli ku kavanyetiwa kumbe ku hambukisiwa. Yesu hi byakwe u hi vekele xikombiso lexinene hi ku hisekela vutirheli byakwe naswona u dyondzise vadyondzisiwa vakwe leswaku va hisekela ntirho wa Yehovha ni Mfumo Wakwe. Hi tekelela Yesu hi ku rhangisa ntirho wo chumayela evuton’wini bya hina, hi ya “emahlweni [hi] lava Mfumo ni ku lulama ka [Xikwembu] ku sungula.” (Mat. 6:33) Ndlela yin’wana yo kombisa leswaku hi rhangisa vutirheli bya Vukreste i ku olovisa vutomi bya hina leswaku hi ta heta nkarhi wo tala hi ri karhi hi pfuna van’wana leswaku va tiva ni ku rhandza Yehovha. Hi xikombiso, xana hi nga hunguta tiawara leti hi ti hetaka eka ntirho wo tihanyisa leswaku hi ta kota ku heta nkarhi wo tala ensin’wini exikarhi ka vhiki? Xana hi nga hunguta nkarhi lowu hi wu hetaka eka vuhungasi? w19.04 5-6 ¶12-13

Emalembeni lama ha ku hundzaka, vamakwerhu vo tala va cinciwile eka swiavelo leswi a va ri ni malembe yo tala va tiphina ha swona. Ku cinca ko tano a ku nga olovi eka vamakwerhu lava. A swi kanakanisi leswaku a va yi rhandza ngopfu mitirho ya vona ya khale leyi va heteke malembe va ri karhi va yi endla. Van’wana va twe ku vava swinene hikwalaho ka ku cinca koloko. Kambe hi ku famba ka nkarhi va ye va tolovela. Hikwalahokayini? Hikwalaho ka leswi va rhandzaka Yehovha hi timbilu ta vona hinkwato. Va swi tiva leswaku va tinyiketele eka Xikwembu, ku nga ri eka ntirho kumbe xiavelo xo karhi. (Kol. 3:23) Va tiyimisele ku tirhela Yehovha hi ku titsongahata kun’wana ni kun’wana laha a lavaka va n’wi tirhela va ri kona. Va ‘lahlela ku vilela hinkwako ka vona eka yena’ hikuva va swi tiva leswaku wa va khathalela. (1 Pet. 5:6, 7) Loko hi tikarhatela ku titsongahata, hi ta va ni vuxaka lebyinene ni vanhu van’wana naswona hi ta kota ku langutana ni ku cinca ka swiyimo evuton’wini. Xa nkoka swinene, hi ta va ni vuxaka lebyinene ni Tata wa hina wa le tilweni. w19.09 6-7 ¶15-17

Yehovha a nga nyikanga Davhida vutihlamuleri byo va nhloko ya ndyangu ntsena kambe u n’wi nyike ni vutihlamuleri byo rhangela tiko ra Israyele. Leswi Davhida a ri Hosi, a a ri ni vulawuri byo tala. Kambe u tshame a tirhisa vulawuri byakwe hi ndlela yo biha ni ku endla swihoxo leswikulu. (2 Sam. 11:14, 15) Kambe u kombise leswaku u tiveke ehansi ka Yehovha hi ku amukela ndzayo. U khongele eka Yehovha hi mbilu hinkwayo. U tlhele a tirhisa ndzayo leyi Yehovha a n’wi nyikeke yona. (Ps. 51:1-4) Nakambe u kombise leswaku wa titsongahata hi ku amukela switsundzuxo leswi humaka ni le ka vavasati. (1 Sam. 19:11, 12; 25:32, 33) Davhida u dyondze eka swihoxo leswi a swi endleke naswona u tlhele a sungula ku rhangisa ntirho wa Yehovha evuton’wini byakwe. A a byi tiva vuyelo bya ku tiveka ehansi ka Yehovha. Namuntlha ha ku vona ku hambana exikarhi ka lava va tivekaka ehansi ka Yehovha ni lava va alaka ku yingisa ndzayo yakwe. Lava va tivekaka ehansi ka Yehovha va ta “ba nkulungwana hikwalaho ka leswi timbilu ta [vona] ti tsakeke.”—Esa. 65:13, 14. w19.09 17 ¶15; 19 ¶21

Hi 1935, Timbhoni ta Yehovha ti swi twisisile leswaku ntshungu lowukulu, a wu boheki ku ya etilweni leswaku wu kota ku yima “emahlweni ka xiluvelo ni le mahlweni ka Xinyimpfana.” Wu yima hi ndlela yo fanekisela. Hambileswi ntshungu lowukulu wu nga ta hanya laha misaveni, wu ta yima “emahlweni ka xiluvelo,” hi ku yingisa ni ku titsongahatela vuhosi bya Yehovha. (Esa. 66:1) Wu ta yima “mahlweni ka Xinyimpfana” hileswi wu pfumelaka leswaku Yesu u wu ferile. Hilaha ku fanaka eka Matewu 25:31, 32, ku vuriwa leswaku “matiko hinkwawo” ku katsa ni lavo homboloka ma “ta hlengeletiwa emahlweni” ka Yesu la tshameke exiluvelweni xakwe xo vangama. Swi le rivaleni leswaku matiko wolawo a ma le tilweni kambe ma kwala misaveni. Mhaka leyi yi twisiseka kahle. Yi swi veka erivaleni leswaku hi ku ya hi Bibele, ntshungu lowukulu a wu yi etilweni. I ntlawa wun’we ntsena lowu tshembisiwaka ku ya hanya etilweni hilaha ku nga heriki, ku nga lava 144 000, lava nga ta fuma na Yesu tanihi “tihosi emisaveni.”—Nhlav. 5:10. w19.09 28 ¶9

Yehovha u lava leswaku vagandzeri vakwe va tihambanisa na Babilona Lonkulu. Kambe ku na swo tala leswi hi faneleke hi swi endla ku tlula ku tihambanisa ni vukhongeri bya mavunwa ntsena. Hi fanele hi seketela vugandzeri bya ntiyiso, ku nga ku gandzela Yehovha. Twana tindlela timbirhi leti hi nga swi endlaka ha tona leswi. Xo sungula, hi fanele hi yingisa milawu ya Yehovha ya mahanyelo. A hi fanelanga hi amukela milawu ya mahanyelo ya misava leyi. Hi xikombiso, a hi ku amukeli ku tikhoma ko biha hi tlhelo ra masangu ka muxaka wun’wana ni wun’wana, ku katsa ni ku tekana ka vanhu va rimbewu leri fanaka hambi ku ri ku tekelela mahanyelo ya vona. (Mat. 19:4, 5; Rhom. 1:26, 27) Xa vumbirhi, hi fanele hi ya emahlweni hi gandzela swin’we ni Vakrestekulorhi. Hi endla leswi kun’wana ni kun’wana laha hi nga kona, ku nga va eHolweni ya Mfumo, emakaya ya vamakwerhu kumbe hi hlangana swin’we exihundleni. Hambi ko ba lexi dumaka, a hi nge wu tshiki mukhuva wa hina wa ku hlengeletana leswaku hi gandzela swin’we. Hi fanele hi hlengeletana “ngopfungopfu leswi hi vonaka siku ri tshinela.”—Hev. 10:24, 25. w19.10 16 ¶6-7

Yehovha u lava hi tiphina hi vutomi naswona vuhungasi byi nga hi pfuna ku endla tano. Rito ra Xikwembu ri ri: “Ku hava nchumu wo antswa eka munhu ku tlula ku dya ni ku nwa ni ku tlhela a tiphina hi ntirho wakwe wa matimba.” (Ekl. 2:24) Hambiswiritano, vuhungasi byo tala lebyi nga kona namuntlha byi ni nkucetelo wo biha swinene. Byi onha mahanyelo ya vanhu naswona byi endla leswaku va rhandza swilo leswi lwisanaka ni Rito ra Xikwembu. Leswi hi tiyimiseleke ku gandzela Yehovha ntsena, a hi nge dyi “etafuleni ra Yehovha ni le tafuleni ra madimona.” (1 Kor. 10:21, 22) Hakanyingi, vanhu lava hi dyaka na vona i vanghana va hina. Loko hi hlawula vuhungasi lebyi hlohlotelaka madzolonga, vungoma ni mahanyelo yo biha, hi va hi dya swakudya leswi swekiweke ni ku swekeriwa valala va Xikwembu. Loko hi endla tano, ha tivavisa ni ku onha vuxaka bya hina na Yehovha. w19.10 26 ¶2; 29-30 ¶11-12

Leswaku mutluti a kota ku vuyeriwa eka moya, u fanele a endla swilo swimbirhi. Xo sungula, u fanele a veka xikepe xakwe laha moya wu hungelaka kona. Tsundzuka, xikepe a xi nge fambi loko mutluti a tshame ekule ehlalukweni laha ku nga hungiki moya. Xa vumbirhi, u fanele a phurumula maseyila yakwe ma helela. Hambiloko ku ri ni moya, xikepe xi ta kota ku famba ntsena loko maseyila ma khoma moya. Hilaha ku fanaka, hi ta kota ku tiyisela entirhweni wa Yehovha ntsena loko hi pfuniwa hi moya lowo kwetsima. Leswaku hi vuyeriwa eka moya wolowo, hi fanele hi teka magoza mambirhi. Ro sungula, hi fanele hi pfumela ku kongomisiwa hi moya wa Xikwembu hi ku endla swilo leswi xi hi lerisaka swona. Ra vumbirhi, hi fanele hi phurumula maseyila ya hina, ku nga ku endla hinkwaswo leswi hi nga swi kotaka entirhweni wa Yehovha. (Ps. 119:32) Moya lowo kwetsima wu ta hi nyika matimba yo tiyisela maxangu ni miringo naswona wu ta hi pfuna hi kota ku tiyisela. w19.11 9 ¶8; 10 ¶11

Hi siku rakwe ro hetelela a ri munhu wa nyama, Yesu a karhatekile. Vanhu vo homboloka a va ta n’wi xanisa ni ku n’wi dlaya hi ndlela ya tihanyi. Kambe Yesu a a nga karhatiwi ntsena hileswi a ri ekusuhi ni ku dlayiwa. A n’wi rhandza swinene Tata wakwe naswona a lava ku n’wi tsakisa. Yesu a swi tiva leswaku loko o kota ku tshama a tshembekile kukondza a fa eka ndzingo lowu a wu ri ekusuhi ni ku n’wi wela, a ta susa swisandzu evitweni ra Yehovha. Nakambe Yesu a rhandza vanhu naswona a swi tiva leswaku hi ta va ni ntshembo wo hanya hilaha ku nga heriki ntsena loko a tshama a tshembekile eka Yehovha kukondza a fa. Hambileswi Yesu a ri ehansi ka ntshikilelo lowukulu, a a ri ni ku rhula. A a ri ni “ku rhula ka Xikwembu,” ku nga ku rhula loku munhu a vaka na kona hi leswi a nga ni vuxaka lebyinene na Yehovha. Ku rhula koloko ku pfune Yesu leswaku a nga vileli. (Filp. 4:6, 7) Ku hava ni un’we wa hina loyi a nga xanisekaka ku fana na Yesu kambe hinkwavo lava n’wi landzelaka va ta weriwa hi miringo. (Mat. 16:24, 25; Yoh. 15:20) Naswona ku fana na Yesu, mikarhi yin’wana hi ta titwa hi karhatekile. w19.04 8 ¶1-3

Tivutise, ‘Xana ndza swi tlangela ku va xirho xa nhlengeletano ya Yehovha ya laha misaveni?’ Yehovha u swi kombise kahle leswaku wa yi katekisa nhlengeletano yakwe namuntlha. Hi ni swivangelo leswi twalaka swo kombisa ku khensa. (1 Tes. 5:18) Hi nga swi kombisa njhani leswaku hi seketela nhlengeletano leyi Yehovha a yi tirhisaka? Hi ku yingisa nkongomiso lowu sekeriweke eBibeleni lowu hi wu kumaka eka tibuku ta hina, etidyondzweni ni le tinhlengeletanweni ta miganga ni ta swifundzha. Hi nga tlhela hi kombisa nseketelo wa hina, hi ku gingiriteka hilaha hi nga kotaka hakona entirhweni wo chumayela ni wo dyondzisa. (1 Kor. 15:58) A hi tiyimiseleni ku va lava amukelekaka eka Yehovha leswaku a ta amukela switlhavelo swa hina. A hi tirheleni Yehovha hikwalaho ka leswi hi n’wi rhandzaka. A hi yeni emahlweni hi nyika Yehovha swilo swa hina swa nkoka hikwalaho ka leswi hi n’wi rhandzaka hi timbilu ta hina hinkwato. A hi seketeleni nhlengeletano leyi a yi tirhisaka namuntlha hi timbilu ta hina hinkwato. Loko hi endla swilo leswi hinkwaswo, hi komba Yehovha leswaku ha wu tlangela swinene nkateko lowu hi nga na wona wo n’wi tirhela tanihi Timbhoni ta yena! w19.11 25 ¶17-18

Yesu a a nga vuli swona leswaku hi ta endla masingita ku fana na yena. Kurinasweswo, a a vula leswaku valandzeri vakwe va ta chumayela ndhawu leyikulu, vanhu vo tala ni nkarhi wo leha ku tlula lowu a wu heteke. Loko u tirha, tivutise swivutiso leswi landzelaka: ‘Xana entirhweni va ndzi tiva tanihi munhu wa migingiriko? Xana ndzi heta ntirho wa mina hi nkarhi naswona ndza tikarhata?’ Loko nhlamulo ya wena ku ri ina, muthori wa wena u ta ku tshemba. Nakambe, vanhu lava u tirhaka na vona va ta ku yingisela loko u va chumayela rungula ra Mfumo. Loko swi ta emhakeni ya ku chumayela ni ku dyondzisa, tivutise leswi: ‘Xana ndzi tiviwa tanihi munhu loyi a hisekaka? Xana ndzi swi lunghiselela kahle swingheniso? Xana ndzi tlhelela hi ku hatlisa eka vanhu lava kombiseke ku tsakela? Xana nkarhi ni nkarhi ndza katseka eka swiyenge hinkwaswo swa ku chumayela?’ Loko nhlamulo ya wena ku ri ina, swi vula leswaku u ta tiphina hi ntirho wa wena. w19.12 5 ¶14-15

Vatekani lava lavaka ku va ni vana va fanele va bula hi swivutiso swimbirhi swa nkoka: Xo sungula, va va lava rini vana? Xa vumbirhi, va lava vana vangani? Hi wihi nkarhi lowunene lowu vatekani va nga bulaka hi mhaka leyi ha wona? Hikwalahokayini swivutiso leswimbirhi swi ri swa nkoka? Hakanyingi, i swa nkoka ku va vanhu lava rhandzanaka, va bula hi timhaka ta vana va nga si tekana. Hikwalahokayini? I swa nkoka leswaku va vona hi tihlo rin’we emhakeni leyi. Nakambe, va fanele va tikambisisa ku vona loko va ta swi kota ku hetisisa vutihlamuleri byo tano. Vatekani van’wana va endle xiboho xo tshama lembe kumbe mambirhi va nga si va na vana endzhaku ka loko va tekanile hikuva ku khathalela vana swi lava nkarhi wo tala. Va vula leswaku ku yima nkarhinyana, swi ta va nyika nkarhi wo tolovelana ni ku tivana kahle. w19.12 23 ¶4-5

EMisaveni hinkwayo, malandza ya Yehovha ma dya mbitsi ma xeva hi nhlomulo hikwalaho ka maxangu lawa ma langutanaka na wona. Vakreste van’wana va karhatiwa hi mavabyi lama nga ni khombo kumbe va ni gome hikwalaho ko feriwa hi xaka. Van’wana va vavisekile emoyeni hikwalaho ka leswi xirho xa ndyangu kumbe munghana wa vona a tshikeke ku tirhela Yehovha. Kasi van’wana va ha twa ku vava hikwalaho ko hlaseriwa hi timhangu ta ntumbuluko. Vamakwerhu volavo hinkwavo va lava ku chaveleriwa. Hi nga va chavelela njhani? Vana munghana wo tshembeka. Vanghana vo tshembeka va titsona swo karhi leswaku va ta kota ku seketela vanghana va vona. Hi xikombiso, loko makwerhu un’wana loyi a vuriwaka Peter a ye eka dokodela, u byeriwe leswaku u ni vuvabyi lebyi nga ni khombo swinene. Nsati wa yena Kathryn u ri: “Vatekani van’wana va le vandlheni hi vona lava hi yiseke eka dokodela loyi a hi byeleke hi ta vuvabyi bya Peter. Va hi seketerile swinene ni ku hi tiyisa hi nkarhi wolowo wa mangava.” Hakunene swa chavelela ku tiva leswaku hi ni vanghana lava nga ta hi seketela loko hi langutana ni maxangu! w20.01 8 ¶1; 9 ¶5; 10 ¶6

Loko a wu ri un’wana wa vadyondzisiwa lava a va hlengeletane ekamareni ra le henhla hi Pentekosta ya 33 C.E., a wu nga ta kanakana nikatsongo leswaku u totiwe hi moya lowo kwetsima. (Mit. 2:5-12) Xana vanhu hinkwavo lava totiweke hi moya lowo kwetsima, va totiwe hi ndlela yo hlamarisa hi nkarhi wun’we? Doo! Anakanya hi nkarhi wa ku totiwa. Vadyondzisiwa va kwalomu ka 120, a hi vona ntsena lava totiweke hi moya lowo kwetsima hi siku rero. Hi ku famba ka siku, vanhu van’wana va kwalomu ka 3 000 na vona va totiwe hi moya lowo kwetsima. Va totiwe loko va khuvuriwa. (Mit. 2:37, 38, 41) Kambe emalembeni lama landzeleke, a hi vatotiwa hinkwavo lava totiweke loko va khuvuriwa. Vasamariya va totiwe endzhaku ka nkarhi loko va khuvuriwile. (Mit. 8:14-17) Eka xiendlakalo xin’wana lexi nga tolovelekangiki, Korneliyo ni ndyangu wakwe va totiwe va nga si khuvuriwa.—Mit. 10:44-48. w20.01 20-21 ¶2-4

Eka Tievhangeli ta mune, Yesu u tirhise rito leri nge “Tatana” mikarhi ya kwalomu ka 165 loko a vulavula hi Yehovha. Hikwalahokayini Yesu a tirhise rito leri ko tala loko a vulavula hi Yehovha? A lava vanhu va kholwa leswaku Yehovha i Tatana la nga ni rirhandzu. (Yoh. 17:25) Xiya leswi hi swi dyondzaka hi Yehovha eka ndlela leyi a khomeke Yesu N’wana wakwe hayona. Mikarhi hinkwayo Yehovha a a yingisa ni ku hlamula swikhongelo swa Yesu. (Yoh. 11:41, 42) Loko Yesu a langutana ni miringo, a a swi xiya leswaku Tata wakwe wa n’wi rhandza naswona wa n’wi seketela. (Luka 22:42, 43) Leswi Yehovha a nga Tatana loyi a nga ni rirhandzu, u endle Yesu a swi vona leswaku wa n’wi seketela. (Mat. 26:53; Yoh. 8:16) Hambileswi Yehovha a nga sirhelelangiki Yesu eka makhombo hinkwawo kambe u n’wi pfunile leswaku a kota ku tiyisela maxangu. Yesu a a swi tiva leswaku ku xaniseka hinkwako loku a ta langutana na kona a ku ri ka nkarhinyana. (Hev. 12:2) Yehovha u kombise leswaku wa khathala hi Yesu hi ku n’wi yingisa, hi ku n’wi khathalela, hi ku n’wi letela ni hi ku n’wi seketela.—Yoh. 5:20; 8:28. w20.02 3 ¶6-7, 9

Loko hi lava ku katseka eka mikhuva kumbe ndhavuko wo karhi, hi fanele hi tlhela hi ehleketa hi ndlela leyi xiboho xa hina xi nga ta va khumba hayona vanhu van’wana, ngopfungopfu Vakrestekulorhi. Kahlekahle a hi lavi ku hlundzukisa munhu! (Mar. 9:42) Nakambe hi lava ku papalata ku khunguvanyisa vanhu lava nga riki Timbhoni. Rirhandzu ri ta endla leswaku hi vulavula na vona hi ndlela ya xichavo, leyi kwetsimisaka Yehovha. A hi lavi ku phikizana na vona kumbe ku hlekula mindhavuko ya vona. Tsundzuka, rirhandzu ri ni matimba! Loko hi ri kombisa hi ndlela yo anakanyela ni hi xichavo, hi nga vohlisa ku hlundzuka ka vakaneti va hina. Endla swi tiveka emugangeni wa ka n’wina leswaku u Mbhoni ya Yehovha. (Esa. 43:10) Swi ta ku olovela ku langutana ni swiyimo swo tika loko maxaka ni vaakelani va swi tiva leswaku u gandzela Yehovha Xikwembu. A hi fanelanga hi khomiwa hi tingana loko hi yimela ntiyiso.—Rhom. 1:16. w19.04 17-18 ¶14-16

Vaapostola va 12 va tirhe na Yesu entirhweni wo chumayela loko a ha ri laha misaveni kambe muapostola Pawulo u ve Mukreste endzhaku ka ku fa ni ku pfuxiwa ka Yesu. Hambileswi eku heteleleni a hlawuriweke ku va “muapostola eka vamatiko,” kambe a nga vanga na wona nkateko wo va un’wana wa vaapostola va 12. (Rhom. 11:13; Mit. 1:21-26) Ematshan’weni yo vondzoka vavanuna volavo va 12 hikwalaho ka leswi va tirheke na Yesu, Pawulo u enerisekile hileswi a a ri na swona. Loko hi eneriseka naswona hi titsongahata, hi ta fana na Pawulo naswona hi ta xixima vulawuri lebyi Yehovha a byi nyikeke van’wana. (Mit. 21:20-26) Yehovha u veke vakulu leswaku va rhangela eVandlheni ra Vukreste. Hambileswi va nga hetisekangiki, Yehovha u va teka va ri “tinyiko leti ku nga vavanuna.” (Efe. 4:8, 11) Loko hi va xixima naswona hi ku titsongahata hi landzela nkongomiso lowu va hi nyikaka wona, hi ta va ni vuxaka lebyinene na Yehovha naswona hi ta va ni ku rhula ni Vakrestekulorhi. w20.02 17 ¶13-14

Swi nga endleka leswaku ni loko u nga si sungula ku dyondza Bibele ni Timbhoni ta Yehovha, a wu yi rhandza Bibele. Nakambe a wu n’wi rhandza Yesu. Sweswi u tivaka Timbhoni ta Yehovha, wa swi rhandza ku heta nkarhi wo tala na tona. Kambe ku rhandza swilo sweswo leswinene a swi nge endli leswaku u tinyiketela eka Yehovha u tlhela u khuvuriwa. Nchumu wa nkoka lowu nga endlaka leswaku u khuvuriwa, i ku rhandza Yehovha Xikwembu. Loko u rhandza Yehovha ku tlula swilo hinkwaswo, a ku na nchumu kumbe munhu ni un’we loyi a nga ku sivelaka ku tirhela Yehovha. Ku rhandza Yehovha hi swona leswi nga ta ku susumetela ku khuvuriwa ni ku n’wi tirhela hi ku tshembeka loko se u khuvuriwile. Yesu u vule leswaku hi fanele hi rhandza Yehovha hi mbilu hinkwayo, hi vutomi bya hina hinkwabyo, hi mianakanyo hinkwayo ni hi ntamu wa hina hinkwawo. (Mar. 12:30) I yini leswi nga ku pfunaka u rhandza Yehovha hi mbilu hinkwayo u tlhela u n’wi xixima? Ndlela leyi Yehovha a hi rhandzaka hayona, yi endla leswaku na hina hi n’wi rhandza. w20.03 4 ¶4-5

Xana swi vula yini ku wu endla kahle ntirho wa Xikwembu? Hi ku kongoma, leswaku hi kota ku wu endla kahle ntirho wa Xikwembu hi fanele hi katseka hi ku helela entirhweni wo chumayela ni wo endla vadyondzisiwa. Kambe ku katseka swo tala ku tlula ku heta nkarhi wo tala hi ri eku chumayeleni. Xivangelo lexi hi susumetelaka ku chumayela i xa nkoka eka Yehovha. Hi tirha hi mbilu hinkwayo evutirhelini bya hina bya Vukreste hikwalaho ka leswi hi rhandzaka Yehovha swin’we ni vaakelani va hina. (Mar. 12:30, 31; Kol. 3:23) Ku tirhela Xikwembu hi mbilu hinkwayo swi vula ku tinyiketela, ku tirhisa matimba ya hina leswaku hi endla leswi hi nga swi kotaka entirhweni wakwe. Loko hi swi teka ku ri lunghelo ku endla ntirho wo chumayela, hi ta ringeta ku byela vanhu vo tala mahungu lamanene. Hi nga ha tsandzeka ku heta nkarhi wo tala hilaha a hi ta lava hakona hi ri entirhweni wo chumayela. Kambe, ntirho wolowo hi wona lowu hi wu rhandzaka. Hi tikarhatela ku antswisa vutshila bya hina leswaku hi ta fikelela timbilu ta vanhu hi mahungu lamanene. Hi rhangisa ntirho wo chumayela evuton’wini bya hina. w19.04 2 ¶3; 3 ¶4, 6

Mavunwa ya Sathana ma vangela vanhu swirilo ni ku xaniseka. Vatswari lava feriweke hi n’wana va nga ha byeriwa leswaku Xikwembu xi teke n’wana wa vona, kumbexana leswaku a ya va ntsumi etilweni. Xana mavunwa wolawo ya Sathana ya va chavelela kumbe yo tikisa xiyimo? Dyondzo ya mavunwa ya tihele yi tirhisiwa ku seketela ku xanisiwa ka vanhu, ku katsa ni ku hisiwa endzilweni ka vanhu lava nga ti seketeliki tidyondzo leti dyondzisiwaka ekerekeni. Hi ku ya hi buku leyi vulavulaka hi Huvo ya Vuavanyisi ya le Spain, van’wana va vaavanyisi va huvo leyi a va hisa vanhu lava a va nga ti seketeli tidyondzo ta kereke leswaku va ta hundzuka va nga si fa va ta kota ku pona ku xupuriwa endzilweni wa tihele. Ematikweni man’wana, vanhu va titwa va boheka ku gandzela vakokwana va vona lava feke, va va xixima kumbe va kombela mikateko eka vona. Van’wana va ringeta ku tsakisa vakokwana wa vona lava nga fa leswaku va nga va xanisi. Lexi twisaka ku vava, hileswaku tidyondzo teto leti sekeriweke eka mavunwa ya Sathana a ti tisi nchavelelo nikatsongo. Ematshan’weni ya sweswo, ti va vangela maxangu hambi ku ri ku chava. w19.04 14 ¶1; 16 ¶10