February

Rito “vululami” hilaha ri tirhisiweke ha kona eBibeleni ri vula ku endla swilo leswi Xikwembu xi swi vonaka swi lulamile handle ko ya hi nghohe. Ehleketa ndlela leyi swiendlo swa Yesu swi kombisaka vululami hayona. Enkarhini wakwe, varhangeri va vukhongeri va Vayuda a va venga lava nga riki Vayuda, a va va tekela ehansi Vayuda lava nga dyondzekangiki naswona a va nga va xiximi vavasati. Hambiswiritano, Yesu a a nga yi hi nghohe. U pfumelele vanhu lava kombiseke ripfumelo eka yena leswaku va va valandzeri vakwe, hambiloko va nga ri Vayuda. (Mat. 8:5-10, 13) A chumayela vanhu hinkwavo, lava fuweke ni swisiwana. (Mat. 11:5; Luka 19:2, 9) A nga va khomanga hi ndlela yo biha vavasati. A a xixima vavasati, ku katsa ni lava a va nyefuriwa hi vanhu. (Luka 7:37-39, 44-50) Hi nga tekelela xikombiso xa Yesu hi ku ka hi nga vi na xihlawuhlawu ni ku chumayela vanhu hinkwavo lava tiyimiseleke ku yingisa Rito, ku nga khathariseki vukhongeri lebyi va nga eka byona, hambi va fuwile kumbe i swisiwana. Vavanuna lava nga Vakreste va tekelela xikombiso xa Yesu hi ku xixima vavasati. w19.05 2 ¶1; 5 ¶15-17

Hilaha ku fanaka, loko vakulu va chavelela van’wana hi Matsalwa, va endla tano hi musa ni hi ntwelavusiwana. Xana i vakulu ntsena lava va faneleke va chavelela vanhu lava xanisiweke hi swa masangu? Doo. Hinkwerhu hi ni vutihlamuleri byo ‘ya emahlweni hi chavelelana.’ (1 Tes. 4:18) Vamakwerhu vaxisati lava wupfeke hi vona lava ngopfungopfu va nga khongotelaka vamakwerhu vaxisati lava lavaka ku chaveleriwa. Swa fanela leswi Yehovha Xikwembu a tifanisaka ni manana loyi a chavelelaka n’wana wakwe. (Esa. 66:13) EBibeleni hi twa hi ta vavasati lava chaveleleke van’wana lava a va ri emaxangwini. (Yobo 42:11) Hakunene Yehovha wa tsaka loko a vona vavasati va chavelela Vakrestekulobye vaxisati lava nga ni gome! Mikarhi yin’wana vakulu va nga ha kombela makwerhu waxisati la wupfeke leswaku a pfuna makwerhu waxisati la xanisiweke. Hambiswiritano, a hi fanelanga hi vutisa ni swilo leswi a nga laviki ku vulavula ha swona.—1 Tes. 4:11. w19.05 16-17 ¶10-12

Loko vakulu va nga si tenga nandzu, hikwalahokayini ku laveka timbhoni timbirhi? Hikuva hi leswi Bibele yi vulaka leswaku sweswo i vululami. Loko muhehliwa a nga pfumeli nandzu, vakulu va ta kota ku tenga nandzu wolowo ntsena loko ku ri ni timbhoni timbirhi. (Det. 19:15; 1 Tim. 5:19) Loko muhehliwa a tlula a nantswa tilo a kaneta, vakulu va ta lava vumbhoni bya timbhoni timbirhi. Loko ku ri ni timbhoni timbirhi, ku nga leyi n’wi hehlaka ni leyi tiyisekisaka leswaku muhehliwa u ni nandzu, vakulu va ta vumba komiti ya vuavanyisi. Hambiloko ku nga ri na mbhoni ya vumbirhi, a swi vuli swona leswaku xihehlo xexo i mavunwa. Hambiloko ti nga ri kona timbhoni timbirhi leti nga tiyisekisaka leswaku muhehliwa u ni nandzu, vakulu va swi tiva leswaku swi nga ha endleka muhehliwa a endle xidyoho lexikulu. Vakulu va ta ya emahlweni va seketela un’wana ni un’wana loyi a twisiweke ku vava naswona va ta tshama va xalamukile leswaku va sirhelela vandlha eka khombo leri nga ha vangiwaka hi munhu loyi a hehliwaka hi ku xanisa vana.—Mit. 20:28. w19.05 11 ¶15-16

I swa nkoka leswaku vana va dyondzisiwa ndlela yo dyondza. Va fanele va dyondzisiwa ndlela yo lunghiselela va nga si ya etinhlengeletanweni ta vandlha kumbe ku endla ndzavisiso hi xiphiqo kumbe hi xivutiso lexi va vutisiweke xona exikolweni. (Hev. 5:14) Loko vana va heta nkarhi va ri karhi va dyondza rungula ra le Bibeleni ekaya, va ta swi kota ku tshamiseka va yingisela loko va ri etinhlengeletanweni ta Vukreste. Nkarhi lowu vatswari va wu hetaka va ri karhi va dyondza ni vana va vona wu ta ya hi malembe ni vumunhu bya vana. Lava hi dyondzaka na vona Bibele na vona va fanele va tiva ndlela yo dyondza. Loko va sungula ku dyondza Bibele, swa hi tsakisa ku va vona va lunghiselele leswi va nga ta swi dyondza kumbe ku ya hlamula etinhlengeletanweni ta vandlha. Hambiswiritano, hi fanele hi va dyondzisa ndlela yo lunghiselela ni ku endla ndzavisiso. Loko va ri ni swiphiqo, va ta swi tiva leswaku va nga ri kuma kwihi rungula leri nga ta va pfuna hi ku endla ndzavisiso etibukwini ta hina. w19.05 26 ¶2; 28 ¶10-11

Sathana u tiyimisele ku onha miehleketo ya hina. U tirhisa swilo swo hambanahambana leswaku a hi tshikisa leswi Rito ra Xikwembu ri hi dyondziseke swona. Nisweswi Sathana wa ha vutisa xivutiso lexi a xi vutiseke Evha entangeni wa Edeni lexi nge: “Xana hakunene i ntiyiso leswaku Xikwembu xi vule leswaku . . . ?” (Gen. 3:1) Leswi misava leyi yi lawuriwaka hi Sathana, hi tshamela ku twa swivutiso swo fana ni leswi nge: ‘Xana hakunene Xikwembu a xi ku pfumeleli ku tekana ka vanhu va rimbewu leri fanaka? Xana hakunene Xikwembu a xi swi lavi leswaku mi tlangela Khisimusi ni masiku ya ku velekiwa? Xana hakunene Xikwembu xa n’wina a xi swi lavi leswaku mi cheriwa ngati? Xana hakunene Xikwembu lexi nga ni rirhandzu xi lava leswaku mi papalata ku tihlanganisa ni maxaka ya n’wina lama susiweke?’ Hi fanele hi swi twisisa kahle leswi hi swi pfumelaka. Loko hi tshika ku lava tinhlamulo ta swivutiso swa nkoka swa ripfumelo ra hina, hi nga sungula ku kanakana leswi hi swi pfumelaka. Ku kanakana ko tano ku nga onha miehleketo ya hina ni ku dlaya ripfumelo ra hina. w19.06 12-13 ¶15-17

Yehovha wa hi rhandza swinene. (Yoh. 3:16) Hi lava ku tekelela Tata wa hina la nga ni rirhandzu. Hi komba vanhu hinkwavo ‘ntwelavusiwana, rirhandzu, ni tintswalo’ kambe hi swi endla ngopfu eka “lava nga swin’we na hina eripfumelweni.” (Gal. 6:10) Loko vamakwerhu va langutana ni maxangu ha va pfuna. Hi nga n’wi chavelela njhani munhu la feriweke hi nuna kumbe nsati? Xo sungula, i ku vulavula na yena hambiloko hi nga swi tivi leswi hi nga swi vulaka. Paula, loyi nuna wakwe a feke swi nga languteriwanga u ri: “Ndza swi twisisa leswaku rifu ri endla vanhu va nga tivi xo xi vula. Va chava leswaku va nga vula swilo leswi nga vavisaka lava feriweke. Kambe lexi vavaka ngopfu hi loko vanhu va nga vuli nchumu.” Swi nga endleka munhu la feriweke a nga langutelanga leswaku hi vula swo tala. Paula u ri: “Swa ndzi chavelela loko vanghana va ndzi byela va ku, ‘Hi rila na wena.’” w19.06 20 ¶1; 23 ¶14

Loko ntirho wa hina wu yirisiwile, vakulu va ta hlela tinhlengeletano ta vandlha hi ndlela leyi nga ta endla leswaku hi nga tikokeli mahlo ya vakaneti. Va nga hlela leswaku mi hlengeletana hi mitlawa leyitsongo naswona va nga tlhela va tshamela ku cinca ndhawu ni nkarhi wa tinhlengeletano. Ntirho wo chumayela wu nga endliwa hi tindlela to hambana, swi ta titshega hi swiyimo swa ndhawu ya kwalaho. Kambe leswi hi rhandzaka Yehovha naswona hi tsakelaka ku byela van’wana hi Mfumo wakwe hi ta lava tindlela to chumayela. (Luka 8:1) Loko n’wamatimu, Emily B. Baran a vulavula hi Timbhoni ta Yehovha ta le khale ka Soviet Union, u ri: “Loko mfumo wu byele Timbhoni leswaku ti nga ha chumayeli, ti sungule ku bula ni vaakelani, vatirhikulobye ni vanghana. Loko ti yisiwe etikampeni ta nxaniso hikwalaho ko chumayela, ti sungule ku chumayela lava a ti ri na vona kwale etikampeni.” Hambileswi ntirho wa vona a wu yirisiwile, vamakwerhu va kwalaho a va tshikanga ku chumayela. Tiyimisele ku va tekelela! w19.07 11 ¶12-13

Hi nga va pfuna njhani vanhu lava nga ngheniki kereke leswaku va rhandza Xikwembu ni ku va vadyondzisiwa va Kreste? Hi fanele hi tsundzuka leswaku ndlela leyi munhu a ri tekaka hayona rungula ra hina, yi nga ha ya hi ndhawu leyi a kuleleke eka yona. Hi xikombiso, vanhu lava kuleleke eYuropa a va nge anguli hi ndlela leyi fanaka ni ya lava kuleleke eAsia. Hikwalahokayini? Vanhu vo tala va le Yuropa va tiva swo karhi hi Bibele naswona va swi tiva leswaku Xikwembu hi xona xi nga tumbuluxa swilo hinkwaswo. Kambe vanhu vo tala va le Asia va tiva switsongo kumbe a va tivi nchumu hi Bibele naswona swi nga endleka va nga pfumeli leswaku ku ni Muvumbi. Tshama u ri ni ntshembo. Lembe rin’wana ni rin’wana vanhu lava nga ngheniki kereke va hundzuka Timbhoni ta Yehovha. Vo tala a va ri ni mahanyelo lamanene naswona a va nyenyetsiwa hi vukanganyisi bya vukhongeri. Van’wana a va nga ri na mahanyelo lamanene naswona vo tala a va ri ni mikhuva yo biha leyi a va fanele va yi tshika. Hi ku pfuniwa hi Yehovha ha tiyiseka leswaku hi ta kuma vanhu lava “[kombisaka] leswaku va lava ku kuma vutomi lebyi nga heriki.”—Mit. 13:48; 1 Tim. 2:3, 4. w19.07 20-21 ¶3-4

Hambi hi ni ntshembo wo hanya etilweni kumbe kwala misaveni leyi nga ta va paradeyisi, hi fanele hi ya emahlweni hi tikarhatela ku fikelela pakani yoleyo. Ku nga khathariseki leswi hi hlanganaka na swona, a hi fanelanga hi languta swilo swa le ndzhaku kumbe hi pfumelela nchumu wo karhi wu hi sivela ku tirhela Yehovha. (Filp. 3:16) Leswi hi swi languteleke swi nga ha vonaka swi hlwela kumbe hi dyuhala. Hi nga va hi tiyisele maxangu ni ku xaniseka malembe yo tala. Ku nga khathariseki xiyimo xa wena u “nga vileli ha nchumu.” Ematshan’weni ya sweswo, tivisa Xikwembu swikombelo swa wena hi xikhongelo ni xikombelo, kutani Xikwembu xi ta ku nyika ku rhula loku tlulaka miehleketo hinkwayo. (Filp. 4:6, 7) Onge hi nga tikarhatela ku fikelela pakani ya hina yo heta mphikizano wa vutomi ku fana ni xitsutsumi lexi tikarhataka ngopfu loko xi ri ekusuhi ni ku heta mphikizano. Nakambe a hi tshameni hi ri karhi hi anakanyisisa hi switshembiso swo tsakisa leswi Xikwembu xi hi tshembisaka swona tanihi leswi hi nga ekusuhi ni ku heta mphikizano ku nga khathariseki swiyimo swa hina. w19.08 7 ¶16-17

Swi nga hi tikela ku tiva leswi hi nga swi vulaka eka munhu loyi a feriweke. Mikarhi yin’wana loko hi rila na vona va ta swi vona leswaku ha khathala hi vona. Loko Lazaro loyi a a ri munghana wa Yesu a file, Mariya, Marta ni van’wana va ririle hikwalaho ko feriwa hi buti kumbe munghana wa vona. Loko Yesu a fika endzhaku ka masiku ya mune, na yena u “[xiririke] mihloti,” hambileswi a swi tiva leswaku u ta n’wi pfuxa. (Yoh. 11:17, 33-35) Ku rila ka Yesu a ku kombisa ndlela leyi Tata wakwe a a titwa hayona hi rifu ra Lazaro. Ku rila ka Yesu ku tlhele ku tiyisekisa vandyangu leswaku Yesu wa va rhandza ni ku chavelela Mariya na Marta. Hilaha ku fanaka, loko vamakwerhu va vona leswaku ha va rhandza ni ku khathala ha vona, va ta swi tiva leswaku a va voxe, kambe va ni vanghana lava khathalaka hi vona. Ndlela yin’wana yo chavelela Mukrestekulorhi loyi a feriweke i ku va muyingiseri lonene. Pfumelela makwerhu a phofula ndlela leyi a titwaka hayona naswona u nga khunguvanyeki loko a vula “leswi humeke endleleni.” (Yobo 6:2, 3) A nga ha va a karhatekile hikwalaho ko tshikileriwa hi maxaka yakwe lama nga riki Timbhoni. Kutani khongela na yena. Kombela “Mutwi wa xikhongelo” a ku nyika matimba ni vuswikoti bya ku ehleketa.—Ps. 65:2. w19.04 18-19 ¶18-19

Hakanyingi loko hi tirhela Yehovha hi ri eBethele kumbe hi ri eka swiavelo swin’wana swa ntirho wa nkarhi hinkwawo, hi tolovela vanhu hi tlhela hi rhandza ni ndhawu ya kona. Leswi hi swona swi hi tshovaka mbilu loko hi boheka ku suka eswiavelweni swa hina. Ha karhateka hi vamakwerhu ngopfungopfu loko hi va siya hikwalaho ko hlongoriwa hi vaxanisi. (Mat. 10:23; 2 Kor. 11:28, 29) Swi nga hi tikela ngopfu ku ya tshama endhawini yin’wana hikuva hi fanele hi tolovela ku endla swilo hi ndlela leyintshwa. Van’wana lava va kumaka swiavelo leswintshwa va nga ha tikuma va boheka ku hakela swilo leswi khale a va nga karhateki ha swona. Va nga titwa va hele matimba. I yini lexi nga va pfunaka? Tshama u ri ekusuhi na Yehovha. (Yak. 4:8) Hi nga swi endlisa ku yini sweswo? Hi ku n’wi tshemba tanihi “Mutwi wa xikhongelo.” (Ps. 65:2) Yehovha u ta “endla swo tala swinene ku tlula leswi hi swi kombelaka kumbe leswi hi swi ehleketaka.” (Efe. 3:20) Yehovha u hi nyika swo tlula leswi hi swi khongelelaka. A nga hi tlhantlhela swiphiqo swa hina hi ndlela leyi a hi nga yi ehleketi. w19.08 21 ¶5-6

Vanhu van’wana loko va twa hi rito leri nge, “Armagedoni” va ehleketa hi nyimpi ya nyutliya kumbe timhangu ta ntumbuluko. Ku hambana ni sweswo, Bibele yi vula leswaku Armagedoni i mahungu lamanene lama nga ta tsakisa vanhu! (Nhlav. 1:3) Nyimpi ya Armagedoni a yi teli ku ta herisa vanhu kambe yi tela ku ta va ponisa! Hi ndlela yihi? Yi ta herisa mifumo ya vanhu. Nyimpi yoleyo yi ta herisa vanhu vo biha yi siya lavo lulama. Yi ta ponisa vanhu hi ku sirhelela pulanete ya hina leswaku yi nga onhiwi. (Nhlav. 11:18) Rito leri nge “Armagedoni” ri humelela kan’we eMatsalweni naswona ri huma eka xiga xa Xiheveru lexi vulaka “Ntshava ya Megido.” (Nhlav. 16:16; nhlamuselo ya le hansi) Megido a ku ri muti wun’wana wa le Israyele wa khale. (Yox. 17:11) Kambe Armagedoni leyi ku vulavuriwaka hayona eBibeleni, a hi ndhawu yo karhi. Rito leri ri vula nkarhi lowu “tihosi ta misava hinkwayo” ti nga ta hlengeletana leswaku ti lwisana na Yehovha.—Nhlav. 16:14. w19.09 8 ¶1-3

Wansati loyi a ku ri khale a lava ku pfuniwa. U ye eka madokodela yo tala hi ku tshemba leswaku ma ta n’wi pfuna. Kambe endzhaku ka malembe ya 12 a ha vabya. Hi ku ya hi Nawu, a a nga tenganga. (Lev. 15:25) Kutani u twe leswaku Yesu wa swi kota ku horisa lava vabyaka, hiloko a famba a n’wi lava. Loko a n’wi kumile, u khumbe emakumu ka nguvu yakwe ya le handle kutani hi ku hatlisa vuvabyi byakwe byi hola! Yesu a nga lo hanyisa wansati yoloye ntsena, u tlhele a n’wi endla a titwa a ri ni xindzhuti. Hi xikombiso, loko a vulavula na yena u tirhise rito leri kombisaka xichavo ni rirhandzu leri nge, “n’wananga.” A swi kanakanisi leswaku wansati yoloye, u titwe a phyuphyile hakunene! (Luka 8:44-48) Xiya leswaku wansati yoloye, hi yena a nga ya eka Yesu. U endle matshalatshala leswaku a ya eka yena. Swa ha ri tano ninamuntlha, loko hi lava ku ya eka Yesu hi fanele hi endla matshalatshala. Namuntlha, Yesu a nge va hanyisi hi singita vanhu lava vabyaka lava yaka eka yena. Hambiswiritano, ninamuntlha wa ha rhamba vanhu, u ri: “Tanani eka mina, . . . ndzi ta mi phyuphyisa.”—Mat. 11:28. w19.09 20 ¶2-3

Muprofeta Zakariya u profete leswi fanaka. U tsale a ku: “Emasikwini wolawo vanhu va khume lava humaka eka tindzimi hinkwato ta matiko va ta khomelela nguvu ya Muyuda, va ku: ‘Hi lava ku famba na n’wina hikuva hi swi twile leswaku Xikwembu xi na n’wina.’” (Zak. 8:23) Timbhoni ta Yehovha ta swi xiya leswaku ku ta hlengeletiwa vanhu va tindzimi hinkwato, ntsena loko mahungu lamanene ma chumayeriwa hi tindzimi to tala. Sweswi hi hundzuluxela hi tindzimi to tala swinene ku tlula rini na rini. Swi le rivaleni leswaku Yehovha u endla masingita ya manguva lawa hi ku va a hlengeleta ntshungu lowukulu lowu humaka eka matiko hinkwawo. Namuntlha, leswi tibuku to dyondza Bibele ti kumekaka hi tindzimi to tala swinene, ntshungu lowukulu wu gandzela Yehovha hi vun’we hambileswi wu humaka eka tindzimi to hambanahambana. Timbhoni ti dume hi ku rhandzana ni hi ku chumayela hi ku hiseka. Hakunene, sweswo swi tiyisa ripfumelo!—Mat. 24:14; Yoh. 13:35. w19.09 30-31 ¶16-17

Hi nkarhi wa nhlomulo lowukulu, vanhu vo tala va ta tsemeka nhlana loko va vona swilo leswi a va tibyela leswaku swi ta tshama hilaha ku nga heriki swi lovisiwa. Va ta twa ku “getsela meno” swinene naswona va ta khomiwa hi rhumbyana hikwalaho ko ehleketa leswaku va ta lovisiwa hi nkarhi wa khombo ro chavisa ku tlula hinkwawo lama tshameke ma va kona. (Sof. 1:14, 15) Enkarhini wolowo, malandza ya Yehovha na wona ma ta koka exilogweni. Leswi hi nga riki xiphemu xa misava, hi ta xanisiwa swinene. Hi ta boheka ku hanya hi nga ri na swona swilo swin’wana swa nkoka leswi hi swi lavaka. “Nandza wo tshembeka ni wo tlhariha,” wa hi hlomisa leswaku hi ta tshama hi tshembekile hi nkarhi wa nhlomulo lowukulu. (Mat. 24:45) U hi hlomisa hi tindlela to tala. Hi xikombiso, ehleketa hi tinhlengeletano ta hina ta swifundzha leti fikeke hi nkarhi ta 2016 ku ya eka 2018. Tinhlengeletano teto, ti hi pfunile leswaku hi hlakulela timfanelo leti nga ta hi pfuna tanihi leswi siku ra Yehovha ri nga kwala nyongeni. w19.10 14 ¶2; 16 ¶10; 17 ¶12

Loko ho za hi mita, swakudya swi famba ni miri swi sungula ku tirha ntirho wa swona. Swakudya leswi nga ni rihanyo swi ta endla hi va ni rihanyo lerinene kambe leswi nga riki na rihanyo swi ta hi vangela mavabyi. Vuyelo bya kona a byi nge vonaki hi siku rero kambe byi ta vonaka hi ku famba ka nkarhi. Hilaha ku fanaka, ni le ka vuhungasi hi nga swi kota ku lawula leswi hi swi nghenisaka emiehleketweni ya hina. Hi ku famba ka nkarhi, vuhungasi byebyo byi ta sungula ku khumba miehleketo ni timbilu ta hina. Vuhungasi lebyinene, byi ta hi phyuphyisa kambe byo biha byi ta hi vavisa. (Yak. 1:14, 15) Nkucetelo wa vuhungasi byo biha a wu nge vonaki hi siku rero kambe wu ta vonaka hi ku famba ka nkarhi. Hi yona mhaka leyi Bibele yi hi lemukisaka yi ku: “Xin’wana ni xin’wana lexi munhu a xi byalaka, u ta tlhela a tshovela xona; hikuva loyi a hanyelaka ku tsakisa miri wakwe u ta tshovela rifu.” (Gal. 6:7, 8) Onge hi nga tikarhatela ku papalata vuhungasi hinkwabyo lebyi hlohlotelaka swilo leswi Yehovha a swi vengaka!—Ps. 97:10. w19.10 30 ¶12-14

Yehovha u kombise rirhandzu rakwe hi ku nyikela hi N’wana wakwe leswaku a va nkutsulo eka hina. (Yoh. 3:16) Hi nga ri tekelela njhani rirhandzu ra Yehovha? Hi ku teka vamakwerhu va ri va risima ni hi ku amukela “nyimpfu leyi lahlekeke” hi ntsako, loko yi tlhelela eka Yehovha. (Ps. 119:176; Luka 15:7, 10) Hi kombisa leswaku hi rhandza vamakwerhu hi ku va pfuna loko va lava ku pfuniwa. (1 Yoh. 3:17) Yesu u lerise valandzeri vakwe leswaku va rhandzana hi mbilu hinkwayo. (Yohane 13:34, 35.) Xileriso xa Yesu i xintshwa hikuva xi lava leswaku hi rhandza vamakwerhu hilaha Yesu a hi rhandzeke hakona, ku nga muxaka wa rirhandzu leri a ri nga ri kona eka Nawu lowu Xikwembu a xi wu nyike Vaisrayele. Hi fanele hi rhandza vamakwerhu ku tlula ndlela leyi hi tirhandzaka hayona. Hi fanele hi va rhandza lerova hi tiyimisela ku nyikela vutomi bya hina hikwalaho ka vona ku fana na Yesu. w19.05 4 ¶11-13

Leswaku hi kuma moya lowo kwetsima, hi fanele hi khongela hi wu kombela hi ku phikelela. (Luka 11:13) Xifaniso xa Yesu lexi nga eka Luka 11:5-9 xi hi pfuna ku twisisa xivangelo lexi endlaka Yehovha a hi nyika moya lowo kwetsima. Wanuna loyi wa le xifanisweni a a lava ku amukela muendzi wakwe hi mandla mambirhi. A titwa a boheka ku phamela muendzi wakwe loyi a fikeke ni vusiku kambe a nga ri na nchumu. Yesu u vule leswaku muakelani wakwe u n’wi pfunile hikwalaho ko phikelela a kombela xinkwa. Xana Yesu a kandziyisa yini laha? Loko munhu loyi a nga hetisekangiki a kota ku pfuna muakelani wakwe loyi a kombelaka hi ku phikelela, swi vula leswaku Tata wa hina wa le tilweni a nge tsandzeki nikatsongo ku pfuna lava kombelaka moya lowo kwetsima hi ku phikelela! Hikwalaho, hi nga tiyiseka leswaku loko hi khongela hi kombela moya lowo kwetsima, Yehovha u ta swi hlamula swikhongelo swa hina. (Ps. 10:17; 66:19) Hi nga tiyiseka leswaku hi ta hlula hambiloko Sathana a ya emahlweni a endla matshalatshala yo hi hlasela. w19.11 13 ¶17-19

Yesu a a swi tiva leswaku yena ni vaapostola a va fanele va wisa. Kambe vanhu vo tala va le nkarhini wakwe ni va namuntlha, va nga fanisiwa ni wanuna loyi a fuweke wa le xifanisweni xa Yesu. Wanuna yoloye a a tibyela leswi: “Ndzi ta wisa, ndzi dya, ndzi nwa, ndzi tiphina.” (Luka 12:19; 2 Tim. 3:4) A a tibyela leswaku xa nkoka evuton’wini i ku wisa ni ku titsakisa. Ku hambana ni sweswo, Yesu ni vaapostola vakwe a va nga rhangisi ku titsakisa evuton’wini. Namuntlha, hi tekelela Yesu hi ku tirhisa masiku yo wisa lawa hi ma tekeke entirhweni leswaku hi wisa ni ku chumayela van’wana swin’we ni ku ya etinhlengeletanweni ta Vukreste. Leswi ntirho wo endla vadyondzisiwa ni ku ya etinhlengeletanweni ta Vukreste swi nga swa nkoka eka hina, mikarhi hinkwayo hi endla matshalatshala yo katseka eka mitirho yoleyo yo kwetsima. (Hev. 10:24, 25) Hambiloko hi teke maendzo, a hi xwi etinhlengeletanweni ta Vukreste hi endla matshalatshala yo ti khoma kun’wana ni kun’wana laha hi vaka kona naswona loko hi pfulekeriwa hi nkarhi hi chumayela vanhu lava hi hlanganaka na vona.—2 Tim. 4:2. w19.12 7 ¶16-17

Yehovha u hi pfumelela leswaku hi tihlawulela ndlela leyi hi lavaka ku hanya hayona. U hi dyondzisa ndlela yo endla swiboho leswinene naswona wa hi seketela loko hi endla swiboho leswi n’wi tsakisaka. (Ps. 119:173) Vutlhari lebyi hi byi kumaka eRitweni ra Xikwembu, byi ta hi pfuna hi kota ku endla swiboho leswinene. (Hev. 5:14) Hambiloko hi endla swiboho leswinene kambe swi nga hi tikela ku hetisisa leswi hi swi sunguleke. Xiya swikombiso leswi landzelaka: Makwerhu un’wana loyi a ha riki muntshwa u endle xiboho xo hlaya Bibele hinkwayo. U yi hlayile mavhiki ma nga ri mangani kambe u yime mpfhukeni. Makwerhu un’wana wa xisati u teke xiboho xo va phayona ra nkarhi hinkwawo kambe a tshamela ku tlhentlhisa siku ro sungula. Huvo ya vakulu yi teke xiboho xo endla maendzo ya vurisi eka vamakwerhu va le vandlheni kambe ku hundze tin’hweti to tala swinene va nga si sungula. Swiyimo leswi swa hambana kambe ku ni nchumu wun’we lowu swi fanaka ha wona. Swiboho leswi va swi tekeke a va swi hetisanga. w19.11 26 ¶1-2

Yesu u fanise nkarhi lowu hi hanyaka eka wona ni ‘nkarhi wa Nowa’ naswona swi le rivaleni leswaku hi hanya emikarhini yo “nonon’hwa leyi swi tikaka ku hanya eka yona.” (Mat. 24:37; 2 Tim. 3:1) Hikwalaho ka sweswo, vatekani van’wana va teke xiboho xo ka va nga vi na vana leswaku va ta kota ku heta nkarhi wo tala va ri ensin’wini. Loko swi ta emhakeni yo teka xiboho xo va ni vana nileswaku va lava vana vangani, vatekani lava tlhariheke va sungula hi ku “hlayela swilo hinkwaswo leswi lavekaka.” (Luka 14:28, 29) Vatswari lava se va kuriseke vana, va pfumela leswaku ku kurisa vana swi koxa mali yo tala naswona swi lava nkarhi wo tala ni matimba. Hikwalaho, i swa nkoka ku va vatekani va anakanyisisa hi swivutiso swo tanihi leswi: ‘Xana swi ta lava havumbirhi bya hina hi tirha leswaku hi ta kota ku wundla ndyangu wa hina? Xana hi vona hi tihlo rin’we loko swi ta etimhakeni ta swilaveko swa nkoka? Loko swi ta lava leswaku havumbirhi bya hina hi tirha, i mani loyi a nga ta sala ni vana? I mani loyi a nga ta va ni nkucetelo lowukulu evuton’wini bya vona?’ Vatekani lava tinyikaka nkarhi wo burisana hi swivutiso leswi, va ma tekela enhlokweni marito lama nga eka ndzimana ya siku ra namuntlha. w19.12 23-24 ¶6-7

Muapostola Pawulo u langutane ni maxangu yo tala lama xungetaka vutomi. (2 Kor. 11:23-28) U boheke ku tiyisela “mutwa enyameni,” kumbexana mutwa wolowo a ku ri vuvabyi byo karhi. (2 Kor. 12:7) Nakambe u hele matimba loko Demasi loyi a a ri mutirhikulobye, a n’wi fularhela “hileswi a rhandzeke swa misava leyi.” (2 Tim. 4:10) Pawulo a ri Mukreste loyi a totiweke hi moya naswona a a rhandza ku chavelela van’wana kambe mikarhi yin’wana na yena a a lava ku chaveleriwa. (Rhom. 9:1, 2) Pawulo u chaveleriwile ni ku seketeriwa. Njhani? Yehovha u n’wi chavelerile hi ku tirhisa moya wakwe lowo kwetsima. (2 Kor. 4:7; Filp. 4:13) U tlhele a n’wi chavelela hi ku tirhisa Vakrestekulobye. Pawulo u hlamusele van’wana va vatirhikulobye tanihi ‘lava veke vachaveleri vakwe.’ (Kol. 4:11) Van’wana va vona a ku ri Aristako, Tixiko na Marka. Va n’wi chavelerile leswaku a kota ku tiyisela. w20.01 8 ¶2-3

Yesu u kombise leswaku a swi olovi ku hlamusela munhu loyi a nga totiwangiki leswaku swi njhani ku “velekiwa ra vumbirhi” kumbe ‘ku velekiwa hi moya.’ (Yoh. 3:3-8) Hi kwihi ku cinca loku va ka kona loko Vakreste va totiwa? Loko Yehovha a nga si va tota, a va ri ni ntshembo wo hanya laha misaveni hilaha ku nga heriki. A va wu langutele hi mahlongati nkarhi lowu Yehovha a nga ta herisa vuhomboloki hinkwabyo ni ku endla misava leyi yi va paradeyisi. Kumbexana a va tivona va ri karhi va hoyozela swirho swa mindyangu ya vona kumbe vanghana va vona lava pfuxiweke eku feni. Kambe endzhaku ka loko va totiwile, va sungule ku ehleketa hi ndlela leyi hambaneke. Hikwalahokayini? Phela a va wu tsakela ntshembo lowu a va ri na wona wo hanya laha misaveni. A va cincanga ndlela leyi a va ehleketa hayona hikwalaho ka leswi a va tshikilelekile emianakanyweni. A va nga ehleketi leswaku swi ta phirha ku hanya laha misaveni. Kurinasweswo, Yehovha u tirhise moya wakwe lowo kwetsima leswaku a cinca ndlela leyi a va ehleketa hayona ni ntshembo lowu a va ri na wona. w20.01 22 ¶9-11

Ehansi ka Nawu lowu Xikwembu a xi wu nyike Vaisrayele, vavanuna lava hlawuriweke a va tenga ni milandzu leyi a yi nga fambisani hi ku kongoma ni ku gandzela Yehovha. Ehansi ka “nawu wa Kreste,” vutihlamuleri bya vakulu i ku tamela milandzu loko ku tluriwe milawu ya Bibele. (Gal. 6:2) Va swi xiya leswaku vutihlamuleri byo tamela milandzu ya vugevenga, Xikwembu xi byi nyike vafumi va tiko. Sweswo swi vula leswaku vafumi va nga ha humesa xigwevo xa leswaku muhehliwa a humesa ndziho kumbe a pfaleriwa ekhotsweni. (Rhom. 13:2-4) Hi byihi vutihlamuleri lebyi vakulu va nga na byona loko un’wana evandlheni a endle xidyoho lexikulu? Va kambisisa mhaka hi ku ya hi Matsalwa kutani va endla xiboho. A va yi rivali mhaka ya leswaku nawu wa Kreste wu simekiwe erirhandzwini. Rirhandzu ri susumetela vakulu ku tivutisa va ku: Hi tihi tindlela to pfuna unʼwana ni unʼwana evandlheni loyi a twisiweke ku vava? Loko swi ta emhakeni ya mudyohi, rirhandzu ri susumetela vakulu ku tivutisa va ku: Xana mudyohi u hundzukile? Xana hi nga n’wi pfuna njhani leswaku a lulamisa vuxaka bya yena na Yehovha? w19.05 7 ¶23-24

Yesu a a swi tiva leswaku Tata wakwe a ku ri Xihlovo ni Muhlayisi wa vutomi byakwe loko a vula marito lama nga laha henhla. Yesu a a tshemba Tata wakwe hi ku helela naswona Yehovha u n’wi khathalerile. Xa nkoka swinene, Yehovha u pfune Yesu leswaku a tshama a tshembekile. (Mat. 4:4) Yehovha u hi nyika leswi hi swi lavaka leswaku hi va ni vuxaka na yena. Hi ku tirhisa Bibele, u hi hlamusela ndlela leyi a nga xiswona, xikongomelo xakwe, xikongomelo xa vutomi ni leswi nga ta endleka enkarhini lowu taka. U kombise leswaku wa hi rhandza hi ku endla leswaku vatswari va hina kumbe munhu un’wana a hi pfuna leswaku hi n’wi tiva. Nakambe hi ya emahlweni hi kuma mpfuno eka vakulu evandlheni ni le ka vamakwerhu van’wana. Ku engetela kwalaho, Yehovha wa hi letela hi ku tirhisa tinhlengeletano ta vandlha, laha hi dyondzaka swin’we ni vamakwerhu. Hi ndlela leyi, Yehovha Tata wa hina u kombisa leswaku wa khathala hi hina.—Ps. 32:8. w20.02 3 ¶8; 5 ¶13

Ku rhula a ku nge vi kona loko hi vondzokana. Hi fanele hi tsuvula mavondzo etimbilwini ta hina, hi tlhela hi papalata ku endla swilo leswi nga ta endla van’wana va hi vondzoka. Hi nga va pfuna njhani van’wana leswaku va papalata mavondzo naswona hi nga ku kondletela njhani ku rhula? Langutelo ni swiendlo swa hina swi nga va ni nkucetelo lowukulu eka van’wana. Misava yi lava hi “bombisa” swilo leswi hi nga na swona. (1 Yoh. 2:16) Kambe moya wolowo, wu vanga mavondzo. Hi nga papalata ku endla leswaku van’wana va nga vi ni mavondzo hi ku ka hi nga tshameli ku vulavula hi swilo leswi hi nga na swona kumbe leswi hi lavaka ku swi xava. Nakambe hi nga papalata moya wa ku byala mavondzo, hi ku titsongahata loko hi nyikiwe vutihlamuleri byo karhi evandlheni. Loko hi tshamela ku vulavula hi vutihlamuleri lebyi hi nga na byona, swi nga endla leswaku van’wana va sungula ku va ni mavondzo. Kambe loko hi khathala hi van’wana hi tlhela hi va bumabumela loko va endla swilo leswinene, swi ta endla leswaku va eneriseka naswona hi ku endla tano, hi kondletela vun’we ni ku rhula evandlheni. w20.02 18 ¶15-16

Dyondza hi Yehovha eka swilo leswi a swi tumbuluxeke. (Nhlav. 4:11) Anakanyisisa hi vutlhari lebyi a byi tirhiseke loko a tumbuluxa swimilana ni swiharhi. Ehleketa hi ndlela yo hlamarisa leyi miri wa wena wu endliweke hayona. (Ps. 139:14) Nakambe, ehleketa hi matimba lawa Yehovha a ma tirhiseke eka dyambu, tsundzuka leswaku dyambu ko va yin’wana ya tinyeleti ta ntsandzavahlayi leti nga kona. (Esa. 40:26) Loko u endla tano, ndlela leyi u xiximaka Yehovha hayona yi ta ya yi kula swinene. Kambe ku tiva leswaku Yehovha u tlharihile naswona u ni matimba, ko va masungulo yo aka vuxaka na yena. Leswaku u va ni vuxaka lebyi tiyeke na Yehovha, u fanele u tiva swo tala hi yena. U fanele u tiyiseka leswaku Yehovha wa ku rhandza. Tsundzuka leswaku “loko u n’wi lavisisa, u ta endla leswaku u n’wi kuma.” (1 Tikr. 28:9) Yehovha u ri, ‘Ndzi ku kokele eka mina.’ (Yer. 31:3) Loko u tlangela leswi Yehovha a ku endlelaka swona, ndlela leyi u n’wi rhandzaka hayona yi ta ya yi kula swinene. w20.03 4 ¶6-7

Muapostola Pawulo u hi vekele xikombiso lexinene hi ku rhangisa ntirho wo chumayela evuton’wini bya yena. Loko a ri eKorinto eka riendzo rakwe ra vumbirhi ra vurhumiwa, u xiye leswaku a nga ha ri na mali leyi ringaneke kutani u boheke ku heta nkarhi wo karhi a ri karhi a endla matende. A a endla ntirho wolowo leswaku a ta kota ku tiwundla loko a ri karhi a chumayela mahungu lamanene eka vanhu va le Korinto “handle ko lava leswaku [va n’wi] hakela.” (2 Kor. 11:7) Hambileswi Pawulo a boheka ku endla ntirho wa ku tihanyisa, u ye emahlweni a rhangisa vutirheli naswona a a chumayela hi Savata yin’wana ni yin’wana. Loko swiyimo swa yena swa timali swi antswa, u hete nkarhi wo tala entirhweni wo chumayela. U sungule ku “khomeka ngopfu hi rito, a chumayela Vayuda ku tiyisekisa leswaku Yesu i Kreste.” (Mit. 18:3-5; 2 Kor. 11:9) Loko a pfaleriwe endlwini eRhoma ku ringana malembe mambirhi, Pawulo a a chumayela vaendzi ni ku tsala mapapila. (Mit. 28:16, 30, 31) Pawulo a a tiyimisele ku nga pfumeleli nchumu xi kavanyeta vutirheli byakwe. w19.04 4 ¶9