December

Loko hi tsandzeka ku lawula ndlela leyi hi vulavulaka hayona, swi nga vanga swiphiqo swo tala. Hi xikombiso, loko u hlangana ni makwerhu loyi a tshamaka etikweni leri ntirho wa hina wu yirisiweke eka rona, xana wa n’wi vutisa leswaku ntirho wa hina wu endliwa njhani etikweni ra ka vona? A swi kanakanisi leswaku u va u vutisa hi xikongomelo lexinene. Hi rhandza vamakwerhu naswona ha khathala hi leswi swi va endlekelaka. Hi lava ku boxa swiphiqo leswi va langutanaka na swona hi ku kongoma loko hi va khongelela. Hambiswiritano, lowu i nkarhi wa leswaku hi miyela hi nga vuli nchumu. Loko hi tlhava munhu loyi a tameleke rungula leri nga xihundla hi swivutiso, hi kombisa leswaku a hi n’wi rhandzi yena swin’we ni vamakwerhu lava titshegeke hi yena leswaku a nga paluxi swihundla swa vona. A hi swi lavi ku tikisela vamakwerhu lava tshamaka ematikweni lawa ntirho wa hina wu yirisiweke eka wona. Hilaha ku fanaka, vamakwerhu lava tshamaka ematikweni wolawo, a va nge byeli munhu ndlela leyi Timbhoni ti wu endlaka hayona ntirho wa tona ematikweni ya ka vona. w20.03 21 ¶11-12

Xikongomelo xa Xikwembu a ku nga ri leswaku vanhu va fa. Kambe leswaku Adamu na Evha va hanya hilaha ku nga heriki, a va fanele va yingisa Yehovha, loyi a a va nyike xileriso xo olova lexi nge: “Loko ku ri mihandzu ya murhi wa ku tiva leswinene ni leswo biha u nga tshuki u yi dya hikuva siku leri u nga ta yi dya, u ta fa.” (Gen. 2:16, 17) Kutani Sathana u vange swiphiqo. Hi ku tirhisa nyoka, Sathana u byele Evha marito lama nga eka tsalwa ra siku ra namuntlha. Lexi twisaka ku vava, Evha u tshembe mavunwa wolawo kutani a dya mbhandzu. Endzhakunyana, nuna wakwe u dyile. (Gen. 3:6) Xidyoho ni rifu swi sungule hi ndlela yoleyo. (Rhom. 5:12) Adamu na Evha va file, hilaha Xikwembu a xi vule hakona. Kambe Sathana a nga tshikanga ku hangalasa mavunwa hi rifu. Hi ku famba ka nkarhi, u sungule ku hangalasa mavunwa man’wana. Man’wana ya mavunwa wolawo i dyondzo ya leswaku loko munhu a fa, moya wu ya emahlweni wu hanya. Mavunwa wolawo ma kanganyise vanhu vo tala ku ta fikela ninamutlha.—1 Tim. 4:1. w19.04 14-15 ¶3-4

Vana a va si swi kota ku tiendlela swiboho kumbe ku kota ku xiya ni ku papalata khombo. Hikwalaho swa olova leswaku vaxanisi va va kanganyisa. Vaxanisi va dyondzisa vana mavunwa ya rihlaza, yo tanihi leswaku n’wana u lo tilavela ku xanisiwa hi swa masangu, a nga fanelanga a byela munhu leswi endlekeke, a nga kona ni un’we loyi a nga ta n’wi tshemba loko o ringeta ku pota kumbe leswaku ku endla swa masangu exikarhi ka munhu lonkulu ni n’wana swi tolovelekile naswona swi kombisa rirhandzu. Swi nga teka malembe yo tala leswaku n’wana a swi xiya leswaku sweswo a ku ri mavunwa ya rihlaza. N’wana yoloye u ta kula a titwa a thyakile, a ri xikangalafula naswona a nga faneriwi hi ku rhandziwa kumbe ku chaveleriwa. Leswi swi hi pfuna ku twisisa leswaku hikwalahokayini n’wana loyi a tshameke a xanisiwa hi swa masangu, a twa ku vava malembe yo tala. Hi hanya emikarhini ya makumu, laha vanhu vo tala va nga “riki na rirhandzu” naswona “vanhu vo homboloka ni vaxisi va [yaka] emahlweni va nyanya ku biha.”—2 Tim. 3:1-5, 13. w19.05 15 ¶7-8

Hi tihi tindlela leti Yesu a dyondzisa ha tona? Xo sungula, u dyondzise vanhu hi leswi a a swi vula. Marito yakwe a ma ri ni matimba hikuva a vulavula ntiyiso hi Xikwembu, u dyondzise vanhu xikongomelo xa vutomi ni leswaku Mfumo wa Xikwembu wu ta herisa maxangu hinkwawo ya vanhu. (Luka 24:19) Yesu u tlhele a dyondzisa vanhu hi swiendlo. U vekele valandzeri vakwe xikombiso xa ndlela leyi va faneleke va hanya hayona. (Yoh. 13:15) Yesu u va dyondzise rini valandzeri vakwe? Hi nkarhi wa vutirheli byakwe bya laha misaveni. (Mat. 4:23) U tlhele a va dyondzisa endzhakunyana ka ku pfuxiwa kakwe. Hi xikombiso, u humelele eka ntlawa wa vadyondzisiwa lava kumbexana a va tlula 500, kutani a va nyika xileriso xo ‘endla vadyondzisiwa.’ (Mat. 28:19, 20; 1 Kor. 15:6) Leswi a nga nhloko ya vandlha, u ye emahlweni a dyondzisa vadyondzisiwa vakwe niloko se a tlhelele etilweni. Hi 96 C.E., Kreste u tirhise muapostola Yohane ku khutaza Vakreste lava totiweke ni ku va nyika ndzayo.—Kol. 1:18; Nhlav. 1:1. w19.05 3 ¶4-5

Masiku lawa swi lava u wa u pfuka leswaku u ta kuma xo yisa enon’wini. Vamakwerhu vo tala va tirha tiawara to tala leswaku va kota ku wundla mindyangu ya vona. Van’wana va heta nkarhi va ri endleleni loko va ya ni ku vuya entirhweni. Van’wana va kulula van’watseka leswaku va kuma swo tihanyisa. Loko ri ya pela, vamakwerhu lava va va va lo lakahla, hi ku karhala! Lexi va xi lavaka i ku wisa ntsena, ku nga ri ku hlaya. Ntiyiso wa mhaka hileswaku, hi fanele hi tinyika nkarhi wo dyondza, hi dyondza Rito ra Xikwembu ni mikandziyiso ya hina ya Vukreste. Leswi i swa nkoka ngopfu loko hi lava ku va ni vuxaka lebyinene na Yehovha ni ku hanya hilaha ku nga heriki. (1 Tim. 4:15) Van’wana va vindzuka siku ni siku va dyondza hikuva ku va ku nga ri na huwa naswona va va va xalamukile. Van’wana va dyondza Rito ra Xikwembu ni ku anakanyisisa ha rona nimadyambu ku nga ri na swikavanyeto. w19.05 26 ¶1-2

Ku hundzuka ko tano a ku tiendlekeli, swi lava matshalatshala. Swi nga ha teka malembe hi ri karhi hi ‘tikarhata.’ (2 Pet. 1:5) Hi fanele hi tirha hi matimba leswaku hi hundzula mianakanyo ya hina. Nchumu wo sungula wa nkoka i xikhongelo. Hi fanele hi khongela ku fana ni mupisalema: “Vumba mbilu yo tenga endzeni ka mina, Xikwembu xanga, naswona u nghenisa moya lowuntshwa lowu tiyeke endzeni ka mina.” (Ps. 51:10) Hi fanele hi xiya leswaku swi fanerile ku hundzula mianakanyo ya hina kutani hi kombela Yehovha a hi pfuna. Nchumu wa vumbirhi wa nkoka i ku anakanyisisa. Siku ni siku loko hi hlaya Rito ra Xikwembu, hi fanele hi tinyika nkarhi wo anakanyisisa hi leswi hi swi hlayaka leswaku hi ta xiya laha hi nga antswisaka kona. (Ps. 119:59; Hev. 4:12; Yak. 1:25) Hi fanele hi xiya mboyamelo wun’wana ni wun’wana lowu hi nga na wona wo navela ku va ni vutlhari bya misava. Loko hi wu xiyile hi fanele hi tikarhatela ku wu tsuvula. w19.06 8 ¶1; 10 ¶10; 12 ¶11-12

Loko u endla xiboho, u fanele u hlawula nkarhi lowu u nga ta xi hetisisa ha wona xiboho lexi u xi endlaka u tlhela u wu namarhela. U nga yimeli nkarhi lowu faneleke hikuva nkarhi lowu faneleke a wu nge pfuki wu fikile. (Ekl. 11:4) Tivonele leswaku u nga pfumeleli swilo leswi nga riki swa nkoka swi ku dyela nkarhi ni ku ku siya u karhele lerova u nga ha swi koti ku endla swilo swa nkoka swinene. (Filp. 1:10) Loko swi koteka, hlawula nkarhi lowu u nga taka u nga kavanyetiwi hi nchumu loko u endla mitirho ya wena. Byela van’wana leswaku hi nkarhi wo nge, a wu lavi ku kavanyetiwa. Swi kahle ku tima foni naswona tiimeyili kumbe social media u ta swi vona endzhaku. Vuyelo bya swiboho swa wena byi fana ni ndhawu leyi u yaka eka yona. Loko hakunene u lava ku fika endhawini yoleyo, a wu nge tlheli hambiloko gondzo ra kona ri pfariwile naswona u nga ha hlawula ku famba hi gondzo rin’wana. Hilaha ku fanaka, loko hi ehleketisisa hi vuyelo bya swiboho swa hina, a hi nge heli matimba hambiloko hi langutana ni mitlhontlho kumbe swikavanyeto.—Gal. 6:9. w19.11 30 ¶17-18

I yini lexi faneleke xi ku susumetela ku khuvuriwa? Leswi u dyondzaka Bibele, u dyondze swo tala hi Yehovha naswona u n’wi tiva ku antswa. Leswi u swi dyondzeke hi yena, swi ku khumbe mbilu lerova u kala u n’wi rhandza hi mbilu ni moya. Ku rhandza Yehovha hi swona leswi faneleke swi ku susumetela ku khuvuriwa. Nakambe ntiyiso lowu u wu dyondzeke eBibeleni, hi wona wu endlaka u teka xiboho xo khuvuriwa. Twana leswi Yesu a swi vuleke loko a nyika vadyondzisiwa vakwe xileriso xo endla vadyondzisiwa. (Mat. 28:19, 20) Yesu u vule leswaku lava khuvuriwaka, va fanele va endla tano “hi vito ra Tatana ni ra N’wana ni ra moya lowo kwetsima.” Swi vula yini leswi? U fanele u wu tshemba hi mbilu hinkwayo ntiyiso lowu u wu dyondzaka eBibeleni mayelana na Yehovha; N’wana wakwe, Yesu; ni moya lowo kwetsima. Ntiyiso wolowo i wa nkoka naswona wu nga fikelela mbilu ya wena. w20.03 9 ¶8-9

Yehovha u rhume tintsumi leswaku ti lemukisa Lota ni ku n’wi pfuna leswaku a balekela khombo leri a ri ta wela Sodoma. (Gen. 19:12-14, 17) Hilaha ku fanaka, hi nga ha lemukisa makwerhu loko hi xiya leswaku u endla swilo leswi nga ta n’wi hoxa ekhombyeni. Hambiloko a hlwela ku tirhisa ndzayo ya le Bibeleni leyi a nyikiweke yona, hi fanele hi n’wi lehisela mbilu. Tekelela tintsumi letiya timbirhi. Hi nga heleli makwerhu mbilu kutani hi n’wi papalata, hi fanele hi lava tindlela to n’wi pfuna. (1 Yoh. 3:18) Tihomu ta rilana, hikwalaho hi fanele hi pfuna makwerhu a tirhisa ndzayo leyi a nyikiweke yona. Yehovha a a ta va a langute swihoxo swa Lota. Ematshan’weni ya sweswo u huhutele muapostola Petro ku vula leswaku Lota i munhu wo lulama. (Ps. 130:3) Xana hi nga yi tekelela njhani ndlela leyi Yehovha a a titwa hayona hi Lota? Loko hi tikarhatela ku xiya swilo leswinene eka vamakwerhu hi ta va lehisela mbilu. Kutani loko hi va pfuna, va ta swi amukela hi ku olova. w19.06 21 ¶6-7

Loko ntirho wa hina wu yirisiwile laha u tshamaka kona, u nga ha tivutisa loko swi fanerile leswaku u rhurhela etikweni rin’wana laha u nga ta tirhela Yehovha u ntshunxekile. Lexi i xiboho lexi wena hi wexe u nga tiendlelaka xona. Loko u nga si endla xiboho, u nga ha kambisisa leswi Vakreste vo sungula va swi endleke loko va xanisiwa. Vadyondzisiwa va le Yerusalema va rhurhele eYudiya ni le Samariya hambi ku ri ematikweni ya le kule yo tanihi Fenikiya, Kipra na Antiyoka. (Mat. 10:23; Mit. 8:1; 11:19) Hambiswiritano, loko Vakreste vo sungula va tlhele va xanisiwa, muapostola Pawulo a nga rhurhanga laha vanhu vo tala a va lwisana ni ntirho wo chumayela. (Mit. 14:19-23) Hi dyondza yini eka rungula leri? Nhloko ya ndyangu wun’wana ni wun’wana yi fanele yi endla xiboho emhakeni yo rhurha. Loko yi nga si endla xiboho, yi fanele yi khongela yi tlhela yi anakanyisisa hi swiyimo swa ndyangu wa yona, swiphiqo leswi ndyangu wu nga ha hlanganaka na swona kumbe vuyelo lebyinene. A hi fanelanga hi solasola van’wana eka swiboho leswi va swi endlaka. w19.07 10 ¶8-9

Yesu u hi byele leswaku hi ‘famba hi ya endla vanhu va matiko hinkwawo va va vadyondzisiwa.’ (Mat. 28:19) Nakambe loko hi dyondzisa xichudeni leswi Yesu a swi languteleke eka vadyondzisiwa va yena, hi fanele hi xi pfuna xi tiva ndlela leyi xi faneleke xi hanya hayona tanihi Mukreste wa ntiyiso. Hi fanele hi xi lehisela mbilu loko xi ri karhi xi ringeta ku hanya hi misinya ya milawu ya Bibele. Swichudeni swin’wana swa swi kota ku tshika mikhuva ni ku cinca ndlela leyi swi ehleketaka hayona hi tin’hweti ti nga ri tingani; kambe vanhu van’wana swi va tekela nkarhi wo leha. Murhumiwa un’wana wa le Peru u kote ku pfuna xichudeni xa Bibele hikwalaho ko lehisa mbilu. U ri: “Ndzi dyondze tibuku timbirhi na Raúl, xichudeni xa mina xa Bibele. Hambiswiritano, a ha ri na swiphiqo swo tala. A a ri ni swiphiqo swo tala evukatini byakwe, a a phyandlasela nhlambha naswona vana vakwe a va nga n’wi xiximi hikwalaho ka mahanyelo yakwe. Hambiswiritano, a a nga xwi etinhlengeletanweni ta vandlha, hikwalaho ndzi ye emahlweni ndzi n’wi endzela leswaku ndzi n’wi pfuna swin’we ni ndyangu wakwe. Endzhaku ka malembe manharhu u khuvuriwile.” w19.07 15 ¶3; 19 ¶15-17

Ehleketa ndlela leyi muapostola Pawulo a a khomeke hayona loko a tsalela Vafilipiya. A a ri xivochwa lexi pfaleriweke endlwini eRhoma ku nga ri ejele. A a nga swi koti ku huma a ya chumayela. Hambiswiritano, a tshama a khomekile hi ku chumayela vanhu lava a va n’wi endzela ni ku tsalela mavandlha mapapila. Pawulo a a swi tiva leswaku a a fanele a tikarhata hi matimba vutomi bya yena hinkwabyo hi laha Kreste a endleke hakona. Hikwalaho ka sweswo, vutomi bya Vakreste u byi fanise ni mphikizano. (1 Kor. 9:24-27) Loko xitsutsumi xi ri emphikizanweni a xi pfumeleli nchumu leswaku xi xi kavanyeta ku heta mphikizano. Hi xikombiso, switsutsumi swi nga tsutsuma laha ku nga ni switolo ni swilo swin’wana leswi nga swi kavanyetaka. Xana u ehleketa leswaku xitsutsumi xi nga yima endleleni xi langutisa swilo leswi xavisiwaka exitolo? A xi nge swi endli sweswo! Leswi hi nga emphikizanweni wa vutomi, hi fanele hi papalata swilo leswi nga hi kavanyetaka. Loko hi tshama hi ri karhi hi anakanyisisa hi pakani ya hina kutani hi tirha hi matimba ku fana na Pawulo, hi ta kuma hakelo! w19.08 3 ¶4; 4 ¶7

Loko hi sungula ku hanya hi milawu ya Xikwembu swi nga ha ma tikela maxaka ya hina ku twisisa leswi hi swi pfumelaka. Hakanyingi, lexi va rhangaka va xi xiya hileswaku a ha ha katseki eka mikhuva ya vona ya vukhongeri hambi ku ri ku nghenelela eka tipolitiki. Maxaka man’wana ma nga hi hlundzukela. (Mat. 10:35, 36) Kambe a hi fanelanga hi ma lahlela mavoko. Loko hi tshika ku va pfuna leswaku va twisisa leswi hi swi pfumelaka hi ta va hi va avanyisa leswaku a swi va faneli ku kuma vutomi lebyi nga heriki. Yehovha a nga hi nyikanga ntirho wo avanyisa vanhu, ntirho wolowo u wu nyike Yesu. (Yoh. 5:22) Loko maxaka ya hina hi ma lehisa mbilu ma nga hetelela ma swi tsakela ku yingisa rungula ra hina. Hi fanele hi tiyisa voko kambe hi va ni vuxiyaxiya hambiloko hi ri ehansi ka swiyimo swo tika. (1 Kor. 4:12b) Maxaka ya hina ma nga ha hlwela ku swi twisisa leswaku ku tirhela Yehovha i swa nkoka ku fikela kwihi eka hina. w19.08 17 ¶10, 13; 18 ¶14

“Loko ndzi tsundzuka maxangu lawa ndzi tshameke ndzi langutana na wona, ndza swi xiya leswaku a ndzi nga ta swi kota ku ma tiyisela hi matimba ya mina.” Xana u tshame u vula marito yo fana ni lawa? Vo tala va hina hi tshame hi ma vula. Kumbexana u ma vule endzhaku ko tiyisela vuvabyi lebyi nga ni khombo kumbe ko loveriwa hi xaka. Loko u swi tsundzuka, wa swi xiya leswaku u kote ku tiyisela hikwalaho ka leswi moya lowo kwetsima wa Yehovha wu ku nyikeke “matimba lama tlulaka lama tolovelekeke.” (2 Kor. 4:7-9) Nakambe hi titshenge hi moya lowo kwetsima leswaku hi kota ku lwisana ni nkucetelo wo homboloka wa misava leyi. (1 Yoh. 5:19) Ku engetela kwalaho, hi fanele hi lwisana ni “madimona.” (Efe. 6:12) Moya lowo kwetsima wa Yehovha wu hi pfuna hi ku hi nyika matimba yo kota ku hetisisa vutihlamuleri bya hina hambiloko hi langutana ni miringo. Muapostola Pawulo u xiye leswaku u kote ku ya emahlweni a tirha hambiloko a langutane ni miringo hileswi a titshege hi “matimba ya Kreste.”—2 Kor. 12:9. w19.11 8 ¶1-3

Bibele hi yona ntsena leyi swi hlamuselaka kahle leswi Yesu a ku endleleke swona. Rhandza Yesu kutani ndlela leyi u rhandzaka Yehovha hayona yi ta kula. Hikwalahokayini? Hikuva Yesu u tekelele Tata wakwe hi ku helela. Loko u dyondza hi Yesu, ndlela leyi u rhandzaka ni ku tlangela Yehovha hayona yi ta kula. Ehleketa hi ntwelavusiwana lowu Yesu a wu kombeke vanhu lava a va tekiwa va nga pfuni nchumu, ku nga swisiwana ni vanhu lava a va vabya. Nakambe, ehleketa hi switsundzuxo leswi a ku nyikaka swona ni ndlela leyi u vuyeriwaka hayona loko u n’wi yingisa. (Mat. 5:1-11; 7:24-27) Ndlela leyi u rhandzaka Yesu hayona yi ta kula loko u anakanyisisa hi swilo leswi a hi endleleke swona leswaku hi rivaleriwa swidyoho swa hina. (Mat. 20:28) Ku tiva leswaku Yesu a tiyimiserile ku ku fela, swi ta endla leswaku u hundzuka kutani u kombela ku rivaleriwa eka Yehovha. (Mit. 3:19, 20; 1 Yoh. 1:9) Loko u rhandza Yesu na Yehovha, u ta susumeteleka ku rhandza vanhu van’wana lava rhandzaka Yesu na Yehovha. w20.03 5-6 ¶10-12

Makwerhu a nga ha sungula ku ehleketa leswaku hi yena ntsena loyi a fanelekaka kahle ku endla swiavelo swo karhi evandlheni. Kumbe makwerhu waxisati a nga ha tibyela leswi, ‘Nuna wa mina a nga xi endla kahle xiavelo lexi ku tlula makwerhu luya!’ Kambe loko hi titsongahata, hi ta wu papalata hi ku helela moya wo tano wa ku tikukumuxa. Hi nga dyondza swo tala eka ndlela leyi Muxe a anguleke hayona loko van’wana va nyikiwa vutihlamuleri. Muxe a byi tlangela swinene vutihlamuleri lebyi a nyikiwe byona byo rhangela tiko ra Israyele. Xana u angule njhani loko Yehovha a hlawula vanhu van’wana leswaku va n’wi pfuna eka ntirho lowu a wu endla? A nga vanga na mavondzo. (Tinhl. 11:24-29) Hi ku titsongahata, u pfumelele vanhu van’wana va n’wi pfuna eka ntirho lowu a a wu endla wa ku avanyisa vanhu. (Eks. 18:13-24) Leswi swi endle leswaku Vaisrayele va hatla va kuma mpfuno loko va lava ku pfuniwa. Swi le rivaleni leswaku Muxe a a rhangisa swilaveko swa vanhu ku tlula vutihlamuleri lebyi a ri na byona. Mayana xikombiso lexinene swonghasi lexi a hi vekeleke xona! Loko hi lava ku tirhisiwa hi Yehovha, ku titsongahata i swa nkoka swinene ku tlula vuswikoti lebyi hi nga na byona. w19.09 5-6 ¶13-14

A hi swi tivi leswaku matiko ma ta tiyimelela ma ku yini loko ma hlasela Babilona Lonkulu. Kumbexana ma ta ku vukhongeri hi byona lebyi endlaka ku nga vi na ku rhula naswona byi hoxa nhompfu eka swa tipolitiki. Kumbe ma vula leswaku mihlangano yoleyo ya vukhongeri yi ni rifuwo ro tala swinene. (Nhlav. 18:3, 7) Leswi a swi vuli swona leswaku swirho hinkwaswo swa vukhongeri lebyi swi ta lovisiwa. Ematshan’weni ya sweswo, matiko ma ta herisa mihlangano ya vukhongeri. Loko mihlangano yoleyo yi herisiwile, khale ka swirho swa yona swi ta swi xiya leswaku vafundhisi a vo swi dyelela ntsena naswona a swi nge he lavi ku twa nchumu hi vukhongeri byebyo. Ku lovisiwa ka Babilona Lonkulu ku ta endleka hi xihatla. (Nhlav. 18:10, 21) Yehovha u tshembisa leswaku u ta “[hunguta] masiku wolawo” ya nhlomulo lowukulu leswaku ku ta pona “vahlawuriwa” vakwe ni vukhongeri bya ntiyiso.—Mar. 13:19, 20. w19.10 15 ¶4-5

Vamanana swi nga endleka mi kurisiwe hi vatswari lava nga ni ximbilwambilwana, lava a va tshamela ku holovela vana va vona. Hikwalaho, mi nga ha tibyela leswaku yoleyo hi yona ndlela leyinene yo kurisa vana. Hambiloko se mi yi tiva ndlela leyi Yehovha a lavaka mi kurisa vana hayona, swi nga ha mi tikela ku va lehisela mbilu, ngopfungopfu loko va bayiza. (Efe. 4:31) Hi nkarhi wolowo, khongela eka Yehovha leswaku a ku pfuna. (Ps. 37:5) Vamanana van’wana swa va tikela ku komba vana va vona leswaku va va rhandza. Va nga ha va va kulele emindyangwini leyi vatswari va vona a va nga ri na vuxaka lebyinene ni vana va vona. Loko u kulele endyangwini wo tano, u nga endli xihoxo lexi fanaka ni xa vatswari va wena. Manana loyi a tivekaka ehansi ka Yehovha, u ta dyondza ndlela leyi a nga va kombisaka hayona vana vakwe leswaku wa va rhandza. Swi nga n’wi tikela ku cinca. Kambe swa koteka naswona ku cinca koloko ku ta vuyerisa yena ni ndyangu wakwe. w19.09 18-19 ¶19-20

Munhu loyi a gandzelaka Yehovha hi hala tlhelo a hetaka nkarhi wo tala a ri karhi a tihlengeletela rifuwo, u tirhela tihosi timbirhi. A nga gandzeli Yehovha ntsena. Vakreste va le vandlheni ra Lawodikiya a va tibuma, va ku: “Ndzi fuwile, ndzi kume rifuwo naswona a ndza ha lavi nchumu.” Kambe eka Yehovha na Yesu a va ‘dyisa mbitsi, va terisa vusiwana, va ri swisiwana, va fe matihlo naswona a va nga ambalanga.’ Yesu u va tshinyile ku nga ri hikwalaho ka leswi a va fuwile kambe hikwalaho ka leswi ndlela leyi a va rhandza rifuwo hayona a yi onha vuxaka bya vona na Yehovha. (Nhlav. 3:14-17) Loko hi vona onge se hi sungula ku rhandza rifuwo, hi nga ha yimayimi a hi lulamiseni langutelo rero. (1 Tim. 6:7, 8) Loko hi nga endli tano, hi ta sungula ku rhandza rifuwo na Yehovha hi nkarhi wun’we naswona Yehovha a nge byi amukeli vugandzeri bya hina. Tsundzuka, Yehovha u ‘lava leswaku vanhu va gandzela yena ntsena.’—Det. 4:24. w19.10 27 ¶5-6

Rito ra Xigriki leri hundzuluxeriweke ri va “kongomisiwa,” ri nga ha tlhela ri vula ku dlidlimbetiwa. Luka mutsari wa buku ya Mitirho, u tirhise xiga lexi fanaka xa Xigriki loko a hlamusela xikepe lexi ‘yaka’ laha moya wu belaka kona. (Mit. 27:15) Xidyondzi xin’wana xa Bibele xi vula leswaku loko muapostola Petro a tsala leswaku vatsari va Bibele a va “kongomisiwa,” u tirhise “xithathelo lexi fambisanaka ni ku tluta lexi kokaka rinoko.” Petro a vula leswaku ku fana ni ndlela leyi moya wu susumetaka xikepe hayona leswaku xi kota ku famba, moya lowo kwetsima wu susumete vatsari va Bibele ku endla ntirho wa vona. Xidyondzi xexo xi tlhele xi ku: “Vaprofeta a va vambe ngoma.” Yehovha u endle ntirho wakwe. U va nyike rimoyana kumbe moya lowo kwetsima. Vatsari va Bibele va endle ntirho wa vona. Va tirhisane kahle ni moya lowo kwetsima. Ninamuntlha, ku fana ni rimoyana ro tenga leri hungaka elwandle leri kariheke, moya lowo kwetsima wu hi pfuna leswaku hi kota ku tiyisela miringo ku kondza hi fika emisaveni leyintshwa leyi Xikwembu xi hi tshembisaka yona. w19.11 9 ¶7-9

Mikarhi yin’wana hi nga hela matimba. Kambe a hi fanelanga hi tshamela ku ehleketa hi swiphiqo swa hina. Ku endla tano, swi nga endla hi rivala hi ntshembo wo tsakisa lowu Yehovha a hi tshembisaka wona. (Nhlav. 21:3, 4) Ku hela matimba swi nga hi tekela ntsako kutani hi wa mapa. Twana hi ta makwerhu un’wana wa xisati wa le United States loyi a khathalelaka ripfumelo rakwe loko hi hala tlhelo a hlayisa nuna wakwe loyi a vabyaka ngopfu. U tsale a ku: “Mikarhi yin’wana xiyimo xa hina xa tshikilela ni ku heta matimba kambe ntshembo lowu hi nga na wona wa hi tiyisa. Ndza tlangela hikwalaho ka rungula leri hi ri kumaka leri hi chavelelaka ni ku hi tiyisa ripfumelo. Ha swi lava switsundzuxo leswi ni swikhutazo. Swi endla hi kota ku tiyisela.” Leswi makwerhu loyi a swi vuleke swi endla hi xiya leswaku hi nga swi kota ku hlula ku hela matimba! Njhani? Teka miringo leyi u langutanaka na yona tanihi leyi humaka eka Sathana. Teka Yehovha tanihi Muchaveleri lonkulu naswona u tlangela swakudya swa moya leswi a ku nyikaka swona. w19.11 16 ¶9-10

Vakulu va fanele va tirhisa nsinya wa nawu lowu wa le Bibeleni. Nkulu wa swi tiva leswaku a nga fanelanga a vulavula hi timhaka leti nga “xihundla” ta vamakwerhu va le vandlheni. Loko o endla tano, vamakwerhu a va nge he n’wi tshembi naswona u ta tionha vito. Lava va byarhisiweke vutihlamuleri evandlheni, a va fanelanga va va ni ‘vukanganyisi loko va vulavula’ kumbe va nga tshembeki. (1 Tim. 3:8) A va fanelanga va va ni vukanganyisi kumbe va hleva. Loko nkulu a rhandza nsati wakwe, a nge n’wi tikiseli hi ku n’wi byela timhaka leti a nga fanelangiki a ti tiva. Nsati wa nkulu u ta pfuna nuna wakwe leswaku a tshama a ri ni ndhuma leyinene hi ku ka a nga n’wi sindzisi ku vulavula hi timhaka leti nga xihundla. Loko a endla tano, u kombisa leswaku u seketela nuna wakwe ni ku xixima lava byeleke nuna wakwe timhaka ta vona leti nga xihundla. Xa nkoka swinene, u tsakisa Yehovha hikuva u kondletela ku rhula ni vun’we evandlheni.—Rhom. 14:19. w20.03 22 ¶13-14

Hi 1512 B.C.E., loko tabernakela yi yimisiwe ehansi ka Ntshava ya Sinayi, Muxe u fambise nkhuvo lowu eka wona Aroni ni vana vakwe va majaha va hlawuriweke ku va vaprista. (Eks. 40:17; Lev. 9:1-5) Yehovha u swi kombise njhani leswaku wa va amukela vaprista lava a va ha ku vekiwa? Loko Muxe na Aroni va ri karhi va katekisa vanhu, Yehovha u rhumele ndzilo leswaku wu hisa switlhavelo leswi a swi sele ealitarini. (Lev. 9:23, 24) Swilo swo hlamarisa leswi endlekeke hi siku ra ku vekiwa ka muprista lonkulu a swi kombisa yini? Yehovha u kombise leswaku wa byi seketela vuprista bya Aroni. Loko Vaisrayele va vone leswaku Yehovha wa va seketela vaprista, sweswo swi endle leswaku va va ni xivangelo lexi twalaka xo va seketela. Xana yi kona dyondzo leyi hi yi kumaka? Ina! Vuprista bya le Israyele a byi fanekisela vuprista lebyi tlakukeke. Kreste, Muprista Lonkulu swinene, u ni vaprista va vuhosi va 144 000, lava nga ta tirha swin’we na Kreste etilweni. (Hev. 4:14; 8:3-5; 10:1) Swi lo tlangandla, leswaku Yehovha hi yena loyi a kongomisaka ni ku katekisa nhlengeletano yakwe namuntlha. w19.11 23 ¶13; 24 ¶14, 16

Loko a ri eKorinto, muapostola Pawulo a a tshama na Akhwila na Prisila naswona a a tirha na vona hikuva hi “ntirho a va ri vaendli va matende.” Mhaka ya leswaku Pawulo a a tirha “vusiku ni nhlikanhi,” a yi vuli swona leswaku a nga wisi. Ntirho wakwe wa matende a nga wu endli hi Savata. Hi siku rero a chumayela Vayuda tanihi leswi na vona a va nga tirhi hi Savata. (Mit. 13:14-16, 42-44; 16:13; 18:1-4) Pawulo a a fanele a tirha ntirho wa ku tihanyisa kambe mikarhi hinkwayo a katseka “[entirhweni] wo kwetsima wo chumayela mahungu lamanene ya Xikwembu.” (Rhom. 15:16; 2 Kor. 11:23) U khutaze van’wana leswaku va endla hilaha ku fanaka. Hikwalaho, Akhwila na Prisila na Pawulo a va ri “vatirhikulorhi eka Kreste Yesu.” (Rhom. 12:11; 16:3) Pawulo u khutaze Vakorinto leswaku va va ni “swo tala swo swi endla entirhweni wa Hosi.” (1 Kor. 15:58; 2 Kor. 9:8) Yehovha u huhutele muapostola Pawulo ku tsala a ku: “Loko munhu a nga lavi ku tirha ni ku dya a nga dyi.”—2 Tes. 3:10. w19.12 5 ¶12-13

Yehovha u vumbe vatekani vo sungula va ri ni ku navela ko va ni vana. Kambe i mani loyi a faneleke a endla xiboho xa loko vatekani va fanele va va ni vana naswona rini? Eka mindhavuko yin’wana, vanhu lava ha ku tekanaka ku languteriwe leswaku va va ni vana hi ku hatlisa. Va nga ha tshikileriwa hi maxaka ni van’wana leswaku va landzela ndhavuko wolowo. Makwerhu un’wana wa le Asia loyi a vuriwaka Jethro u ri: “Evandlheni, vatekani lava nga ni vana va kucetela vatekani lava nga riki na vana leswaku va kuma vana.” Makwerhu un’wana loyi a vuriwaka Jeffrey, loyi na yena a humaka eAsia u ri: “Van’wana va byela vatekani lava nga riki na vana leswaku loko se va dyuharile, a ku nge vi na loyi a nga ta va hlayisa.” Kambe, vatekani hi vona lava faneleke va tiendlela xiboho xa leswaku va lava vana kumbe a va va lavi. I vutihlamuleri bya vona ku endla xiboho xo tano. (Gal. 6:5) I ntiyiso ku vanghana ni maxaka va lava leswaku vanhu lava ha ku tekanaka va tsaka. Kambe, hinkwavo va fanele va tiva leswaku xiboho xo va ni vana xi titshege hi vatekani.—1 Tes. 4:11. w19.12 22 ¶1-3

Xana swa ku tikela ku teka Yehovha tanihi Tata wa wena? Van’wana va tivona va nga pfuni nchumu loko va tipimanisa na Yehovha. Va tibyela leswaku Xikwembu xa Matimba Hinkwawo a xi na mhaka na vona. Kambe Tata wa hina wa rirhandzu a nga lavi hi titwa hi ndlela yoleyo. U hi nyike vutomi naswona u lava hi va ni vuxaka na yena. Loko muapostola Pawulo a heta ku vula marito lawa, u byele vayingiseri vakwe eAtena leswaku Yehovha a nga le “[kule] ni un’wana ni un’wana wa hina.” (Mit. 17:24-29) Yehovha u lava hi vulavula na yena ku fana ni loko n’wana a vulavula ni mutswari wakwe loyi a n’wi rhandzaka. Van’wana swa va tikela ku teka Yehovha tanihi Tata wa vona hikwalaho ka leswi vatata wa vona va nga va kombisangiki rirhandzu. Makwerhu un’wana waxisati u ri: “Tatana a ndzi xanisa swinene. Loko ndzi sungula ku dyondza Bibele, a swi ndzi tikela ku titwa ndzi ri ni vuxaka ni Tata wa mina wa le tilweni.” Xana u titwa hi ndlela leyi fanaka? Loko swi ri tano, tiyiseka leswaku na wena u nga swi kota ku teka Yehovha tanihi Tatana loyi a nga ni rirhandzu. w20.02 3 ¶4-5

Yesu u hi dyondzise leswaku ku nga khathariseki swilo switsongo leswi hi kotaka ku swi endla loko hi ri karhi hi dyuhala, Yehovha wa swi tlangela hinkwaswo leswi hi swi endlaka entirhweni wakwe. (Ps. 92:12-15; Luka 21:2-4) Hikwalaho, endla leswi nga ematimbeni ya wena. U nga swi kota, hi xikombiso, vulavula hi Yehovha, khongelela vamakwerhu naswona khutaza van’wana leswaku va tshama va tshembekile. Yehovha u ku teka tanihi mutirhikulobye, ku nga ri hikwalaho ka leswi u kotaka ku swi fikelela kambe hikwalaho ka leswi u n’wi yingisaka hi ku tirhandzela. (1 Kor. 3:5-9) Mayana ku gandzela Yehovha, Xikwembu lexi tekaka malandza ya xona ma ri ya nkoka! U hi vumbe hi xikongomelo xa leswaku hi endla ku rhandza ka yena naswona vugandzeri bya ntiyiso hi byona lebyi endlaka hi tsaka. (Nhlav. 4:11) Hambiloko vanhu van’wana va hi teka hi nga pfuni nchumu kambe Yehovha a nga khomiwi hi tingana hi hina. (Hev. 11:16, 38) Loko vuvabyi, swiphiqo swa timali ni ku dyuhala swi hi endla hi titwa hi nga pfuni nchumu, a hi tsundzukeni leswaku a xi kona ni xin’we lexi nga hi hambanisaka ni rirhandzu ra Tata wa hina wa le tilweni.—Rhom. 8:38, 39. w20.01 18 ¶16; 19 ¶18-19

Ku titsongahata ni ku eneriseka swi ta hi pfuna leswaku hi papalata mavondzo. Loko hi ri ni timfanelo leti, mavondzo a ma nge kumi ndhawu yo tshama etimbilwini ta hina. Ku titsongahata swi ta hi pfuna hi nga titeki hi antswa ku tlula van’wana. Munhu loyi a titsongahataka a nga titeki a faneriwa hi swilo swo tala ku tlula van’wana. (Gal. 6:3, 4) Munhu loyi a enerisekaka wa tsaka hi leswi a nga na swona naswona a nga tiringanisi ni van’wana. (1 Tim. 6:7, 8) Munhu loyi a titsongahataka a tlhela a eneriseka, wa tsaka loko van’wana va kuma swilo leswinene. Hi lava ku pfuniwa hi moya lowo kwetsima wa Xikwembu leswaku hi kota ku papalata mavondzo kutani hi hlakulela moya wa ku titsongahata ni ku eneriseka. (Gal. 5:16; Filp. 2:3, 4) Moya lowo kwetsima wa Yehovha wu nga hi pfuna hi kota ku tikambisisa kahle swin’we ni ku kambisisa swikongomelo swa hina. Xikwembu xi nga hi pfuna leswaku hi kota ku siva miehleketo yo biha hi leyinene.—Ps. 26:2. w20.02 15 ¶8-9

Ku tinyiketela i xihlambanyo lexi Yehovha a languteleke leswaku u xi hetisisa. Tshama u ri kona etidyondzweni. Loko u ri ni vamakwerhu evandlheni, titwe u ri ekaya. Loko u nga xwi etinhlengeletanweni ta vandlha, vuxaka bya wena na vona byi ta tiya. Hlaya Rito ra Xikwembu siku ni siku u tlhela u anakanyisisa hi leswi u swi hlayaka. (Ps. 1:1, 2) Loko u heta ku hlaya xiphemu xo karhi eBibeleni, tinyike nkarhi wo anakanyisisa hi leswi u swi hlayeke. Leswi u swi hlayeke swi ta khumba mbilu ya wena. “Khongela” nkarhi ni nkarhi. (Mat. 26:41) Swikhongelo swa wena leswi humaka embilwini swi ta endla u tshinela eka Yehovha. ‘Yana emahlweni u lava Mfumo ku sungula.’ (Mat. 6:33) U nga endla tano hi ku rhangisa ntirho wo chumayela evuton’wini bya wena. Loko u ya ensin’wini nkarhi ni nkarhi, ripfumelo ra wena ri ta tiya. Maxangu hinkwawo lawa u nga ta langutana na wona emisaveni leyi, mo va ya “nkarhinyana naswona [i matsongo].” (2 Kor. 4:17) Kambe ku tinyiketela ni ku khuvuriwa ka wena, swi ta ku pfulela ndlela yo tiphina hi vutomi sweswi ni hi ‘vutomi bya xiviri’ enkarhini lowu taka. Xana swi kona leswi u nga ta vuyeriwa ha swona? Ina!—1 Tim. 6:19. w20.03 13 ¶19-21

Loko munhu loyi u dyondzaka na yena a nga cinci, u nga tivutisa leswi, ‘Xana ndzi tshika ku dyondza na yena?’ Loko u nga si teka xiboho, tivutise: ‘Xana munhu loyi ndzi dyondzaka na yena, u endla nhluvuko hi ku ya hi vuswikoti byakwe?’ ‘Xana se u sungurile ku “yingisa” kumbe ku tirhisa swilo leswi a swi dyondzaka?’ (Mat. 28:20) Vanhu van’wana lava hi dyondzaka na vona Bibele, va fana ni Vaisrayele va le nkarhini wa Ezekiyele. Xiya leswi Yehovha a swi byeleke Ezekiyele mayelana na vona, u te: “Eka vona u fana ni munhu wa rito ro saseka loyi a chayaka xitende, loyi a yimbelelaka risimu leri vulavulaka hi rirhandzu. Va ta ma twa marito ya wena kambe a nga kona loyi a nga ta swi endla leswi a swi tweke.” (Ezek. 33:32) A swi olovi ku byela munhu hi ku kongoma leswaku wa tshika ku dyondza na yena. Kambe “nkarhi lowu saleke wu komile.” A hi lavi ku tlanga hi nkarhi hi dyondza ni munhu loyi a nga endliki nhluvuko, hi lava ku dyondza ni munhu loyi a kombisaka leswaku u “lava ku kuma vutomi lebyi nga heriki.”—Mit. 13:48. w20.01 6 ¶17; 7 ¶20

Hi ntolovelo Vakreste va mavunwa a va wu dyondzisi ntiyiso wa Bibele wa leswaku siku rin’wana vanhu lava yingisaka va ta hanya hilaha ku nga heriki laha misaveni. (2 Kor. 4:3, 4) Vukhongeri byo tala lebyi tivulaka Vakreste byi dyondzisa leswaku vanhu hinkwavo lavanene loko va fa va ya hanya etilweni. Kambe, ntlawa lowutsongo wa Swichudeni swa Bibele lowu a wu kandziyisa Xihondzo xo Rindza ku sukela hi 1879 a wu nga dyondzisi swona sweswo. A wu swi twisisa leswaku Xikwembu xi ta endla misava yi va Paradeyisi naswona timiliyoni ta vanhu lava yingisaka ti ta hanya laha misaveni ku nga ri etilweni. Hambiswiritano, Swichudeni swa Bibele swi teke nkarhi ku swi twisisa kahle leswaku i vamani lava nga ta hanya laha misaveni. Swichudeni swa Bibele a swi ma twisisa matsalwa lama vulaka leswaku ku ni ntlawa wun’wana wa “lava xaviweke emisaveni” lava nga ta fuma na Yesu etilweni. (Nhlav. 14:3) Ntlawa wolowo a wu ta vumbiwa hi Vakreste lava hisekaka lava tinyiketeleke va 144 000, lava va tirheleke Xikwembu hi ku tshembeka loko va ha ri laha misaveni. w19.09 27 ¶4-5