March

A ho tihlawulela ku vengiwa. A swi hi tsakisi ku xanisiwa hikwalaho ka ripfumelo ra hina. Hikwalahokayini hi tsaka loko vanhu va hi venga? Twana swivangelo swinharhu leswi endlaka hi tsaka. Xo sungula, loko hi tiyisela hi tsakisa Xikwembu. (1 Pet. 4:13, 14) Xa vumbirhi, ripfumelo ra hina ra tiya. (1 Pet. 1:7) Xa vunharhu, hi ta kuma nkateko lowu nga pimanisiwiki na nchumu, ku nga ku hanya hilaha ku nga heriki. (Rhom. 2:6, 7) Endzhakunyana ka loko Yesu a pfuxiwile, vaapostola va himeteriwile kutani va lerisiwa ku tshika ku chumayela. Hambiswiritano, va ve lava tsakeke hilaha Yesu a vuleke hakona. Hikwalahokayini? “Hikuva a va tekiwa va faneriwa hi ku xaniseka hikwalaho ka vito ra Yesu.” (Mit. 5:40-42) A va rhandza N’wini wa vona ngopfu ku tlula ku chava ku vengiwa hi valala. Va kombise leswaku va rhandza N’wini wa vona hi ku ka va nga “tshiki” ku chumayela mahungu lamanene. Ninamuntlha vamakwerhu vo tala va ya emahlweni va tirhela Yehovha, ku nga khathariseki swiyimo swo tika leswi va hlangavetanaka na swona. Va swi tiva leswaku Yehovha a nge wu rivali ntirho ni rirhandzu leri va ri kombiseke hikwalaho ka vito rakwe. w21.03 25 ¶18-19

Vakreste lava hlawuriweke a va velekiwi va ri ni ntshembo wo ya hanya etilweni. I Xikwembu lexi va nyikaka ntshembo wolowo. Va ehleketa hi ntshembo wa vona, va khongela ha wona naswona va swi langutele hi mahlongati ku kuma hakelo ya vona etilweni. A va swi tivi leswaku miri wa vona wu ta va wu ri njhani loko va ri etilweni. (Filp. 3:20, 21; 1 Yoh. 3:2) Hambiswiritano, va swi langutele hi mahlongati ku ya eMfun’weni wa le tilweni. Lava tinyimpfu tin’wana va ni ntshembo lowu vanhu vo tala va nga na wona, ku nga ntshembo wo hanya hilaha ku nga heriki laha misaveni. Va swi langutele hi mahlongati ku hoxa xandla eku endleni ka misava hinkwayo leswaku yi va paradeyisi. Va wu langutele hi mahlongati nkarhi lowu va nga ta tiakela tiyindlu, va tiphina hi ku rima ni ku va ni vana lava hanyeke kahle. (Esa. 65:21-23) Va swi langutele hi mahlongati ku rhendzeleka ni misava, va valanga tintshava, makhwati, lwandle ni ku dyondza swo tala hi swilo leswi Yehovha a swi tumbuluxeke. Kambe lexi va tsakisaka ngopfu, i ku tiva leswaku vuxaka bya vona na Yehovha byi ta tiya ku tlula rini na rini. w21.01 18-19 ¶17-18

Loko Vababilona va hlasele muti, vanhu a va to sala va ku: “Tiko leri i rhumbi, a ku tshami munhu kumbe xiharhi naswona ri nyiketiwe eka Vakalidiya.” (Yer. 32:43) Kwalomu ka 200 wa malembe endzhaku ka vuprofeta bya Yuwele, Yehovha u tirhise Yeremiya leswaku a profeta swin’wana mayelana ni nhlaselo lowu. U vule leswaku Vaisrayele lava endleke swilo swo homboloka, a va ta hlotiwa etindhawini hinkwato naswona a va ta khomiwa hinkwavo. Yehovha u te: “‘Ndzi rhuma vaphasi va tihlampfi vo tala,’ ku vula Yehovha, ‘va ta va phasa. Endzhaku ka sweswo ndzi ta rhuma vahloti vo tala, va ta va hlota entshaveni yin’wana ni yin’wana ni le xintshabyanini xin’wana ni xin’wana ni le mabakweni ya maribye. . . . Ndzi ta va xupula hi ku ya hi xihoxo xa vona ni xidyoho xa vona.’” Hambi ku ri lwandle kumbe makhwati a swi nga ta swi kota ku sirhelela Vaisrayele lava nga hundzukiki eka nhlaselo wa Vababilona.—Yer. 16:16, 18. w20.04 5 ¶12-13

Enkarhini lowu Lota a langutane ni xiyimo xo tika, u nonokile ku yingisa swileriso swa Yehovha. Hi nga ehleketa leswaku Lota a nga ri na mhaka nileswi a byeriwa swona kumbe a a nga yingisi. Hambiswiritano, Yehovha a nga n’wi tsan’wanga. “Leswi Yehovha a a n’wi twela vusiwana,” tintsumi ti khome ndyangu wakwe hi voko ti wu humesela ehandle ka muti. (Gen. 19:15, 16) Ku ni swivangelo swo hlayanyana leswi nga vaka swi endle Yehovha a komba Lota ntwelavusiwana. Swi nga endleka Lota a a kanakana ku suka ekaya kakwe hikwalaho ka leswi a a chava vanhu lava a va ri ehandle ka muti. Nakambe a ku ri ni makhombo man’wana. Swi nga endleka Lota a a twile hi ta tihosi timbirhi leti weleke emigodini ya nhlaka enkoveni wa le kusuhi ni laha a a tshama kona. (Gen. 14:8-12) Leswi Lota a a ri ni nsati ni vana, swi nga endleka leswaku a a karhateka hi ndyangu wakwe. Ku engetela kwalaho, Lota a a fuwile swi nga endleka leswaku a a ri ni yindlu yo saseka eSodoma. (Gen. 13:5, 6) Swilo sweswo hinkwaswo a swi nga ta n’wi sivela Lota ku yingisa Yehovha hi ku hatlisa. Hambiswiritano, Yehovha a nga dzikanga eka swihoxo swa Lota kambe u n’wi teke tanihi “munhu wo lulama.”—2 Pet. 2:7, 8. w20.04 18 ¶13-14

N’wina majaha, lava va mi kuriseke swi ta va tekela nkarhi ku pfumela leswaku se mi kurile. Kambe tiyisekani leswaku Yehovha u mi tiva kahle. U tiva ni leswi mi nga kotaka ku swi endla. (1 Sam. 16:7) Tiyisani vuxaka bya n’wina ni Xikwembu. Davhida u endle tano hi ku xiyisisa swilo leswi Yehovha a swi tumbuluxeke. U swi vonile leswaku ntumbuluko wu kombisa leswaku ku ni Muvumbi. (Ps. 8:3, 4; 139:14; Rhom. 1:20) Xin’wana lexi mi nga xi endlaka i ku kombela matimba eka Yehovha. Hi xikombiso, xana vana van’wana exikolweni va endla xihlekiso hi wena hileswi u nga Mbhoni ya Yehovha? Loko swi ri tano, khongela eka Yehovha u n’wi kombela a ku tiyisa. Tlhela u tirhisa leswi u swi dyondzaka eBibeleni, eka tibuku ni le ka tivhidiyo ta hina. Loko u vona ndlela leyi Yehovha a ku pfunaka hayona, u ta ya u n’wi tshemba ngopfu. Nakambe, loko van’wana va ku vona u titshega hi Yehovha, va ta ku tshemba. w21.03 4 ¶7

Hakanyingi vanghana va byelana ndlela leyi va titwaka hayona ni swilo leswi va swi navelaka. Xana swi tano ni hi vunghana bya hina na Yehovha? Ina! Yehovha u vulavula na hina hi ku tirhisa Rito rakwe naswona u hi byela ndlela leyi a titwaka hayona ni swilo leswi a swi navelaka. Hi vulavula na yena hi xikhongelo naswona hi n’wi byela ndlela leyi hi titwaka hayona ni swilo leswi hi swi navelaka. Leswi Yehovha a nga munghana loyi a nga ni rirhandzu, u yingisa a tlhela a hlamula swikhongelo swa hina. Mikarhi yin’wana u hi hlamula hi ku hatlisa. Mikarhi yin’wana hi nga khongela ko tala hi mhaka yo karhi hi nga si kuma nhlamulo. Hambiswiritano, ha tiyiseka leswaku nhlamulo hi ta yi kuma hi nkarhi lowu faneleke. Mikarhi yin’wana swi nga endleka Xikwembu xi hi hlamula hi ndlela leyi a hi nga yi langutelanga. Hi xikombiso, ematshan’weni yo susa ndzingo lowu hi karhataka, xi nga hi nyika vutlhari ni matimba yo “tiyisela.” (1 Kor. 10:13.) Hi nga swi kombisa njhani leswaku ha yi tlangela nyiko ya xikhongelo? Hi nga endla tano hi ku yingisa xitsundzuxo lexi nga eBibeleni lexi nge: “Khongelani mikarhi hinkwayo.”—1 Tes. 5:17. w20.05 27-28 ¶7-8

Switsutsumi leswi ngheneleke mphikizano, swi tshama swi xalamukile leswaku swi nga khuguleki egondzweni. Loko swo tshuka swi wile, hi ku hatlisa swa pfuka ivi swi ya emahlweni ni mphikizano. A swi karhateki hi nchumu lowu wu swi khuguleke kambe swi karhateka hi ku heta mphikizano kutani swi kuma hakelo leyi swi tshembisiweke yona. Emphikizanweni lowu hi nga eka wona, hi ta pfa hi endla swihoxo, ku nga ha va hi marito kumbe hi swiendlo. Kumbe switsutsumikulorhi swi nga endla swihoxo leswi nga hi twisaka ku vava. Sweswo a swi fanelanga swi hi hlamarisa. Hinkwerhu a hi hetisekanga naswona hi tsutsuma egondzweni rin’we ro lala leri yisaka evuton’wini. Hikwalaho, mikarhi yin’wana hi ta pfa hi kandziyana swikunwana. (Kol. 3:13) Ematshan’weni yo ehleketisisa hi swilo leswi hi khunguvanyiseke, a hi ehleketisiseni hi hakelo leyi hi yi languteleke. Loko hi hlundzuka kutani hi tshika ku ya emahlweni ni mphikizano, a hi nge wu heti mphikizano naswona a hi nge yi kumi hakelo. Ku engetela kwalaho, hi ta kavanyeta van’wana lava ringetaka ku tsutsuma egondzweni ro lala leri yisaka evuton’wini. w20.04 26 ¶1; 28 ¶8-9

Muprofeta Daniyele u hlamusela mifumo ya vanhu hi ku tlhandlamana ka yona leyi xaniseke vanhu va Xikwembu. Mifumo yoleyo yi hlamuseriwa tanihi swiphemu swo hambanahambana swa xifaniso lexikulu xa nsimbi. Mfumo wo hetelela eka mifumo yoleyo, wu fanekiseriwa hi mikondzo ya nsimbi leyi pfanganisiweke ni vumba ya xifaniso xexo. Mikondzo yoleyo yi fanekisela Mfumo wa Misava wa Manghezi ni Maamerika. Vuprofeta byolebyo byi kombisa leswaku Mfumo wa Misava wa Manghezi ni Maamerika wu ta va wa ha fuma loko Mfumo wa Xikwembu wu herisa mifumo ya vanhu. Muapostola Yohane na yena u vulavula hi mifumo ya misava hi ku tlhandlamana ka yona leyi xaniseke vanhu va Yehovha. Yohane u hlamusela mifumo leyi tanihi leyi fanisiwaka ni xivandzana xa tinhloko ta nkombo. Nhloko ya vunkombo ya xivandzana xolexo yi fanekisela Mfumo wa Misava wa Manghezi ni Maamerika. Leswi i swa nkoka hikuva a ka ha ri na tinhloko tin’wana leti humelelaka endzhaku ka xivandzana lexi. Nhloko ya vunkombo ya xivandzana lexi yi ta va ya ha fuma loko Kreste ni mavuthu yakwe ya le tilweni va yi lovisa ku katsa ni xivandzana hinkwaxo.—Nhlav. 13:1, 2; 17:13, 14. w20.05 14 ¶11-12

Marito lawa ma hi byela mhaka yin’wana ya nkoka: Xikwembu i Xihlovo xa vutomi, hi hala tlhelo i Xihlovo xa rirhandzu. Yehovha wa hi rhandza! Ndlela leyi a hi rhandzaka hayona yi endla hi titwa hi sirhelelekile, hi tsaka ni ku eneriseka. Leswi hi nga Vakreste, swa boha leswaku hi va ni rirhandzu. Hi lerisiwa ku endla tano. (Mat. 22:37-40) Loko hi n’wi tiva kahle Yehovha, swi ta hi olovela ku yingisa nawu wo sungula. Sweswo swa koteka hikuva Yehovha u hetisekile, wa anakanyela naswona wa khathala hi hina. Kambe swi nga hi tikela ku yingisa nawu wa vumbirhi. Hikwalahokayini? Hikuva vamakwerhu evandlheni va velekiwe ni xidyoho. Mikarhi yin’wana va nga hi tlhava hi marito kumbe va endla swilo leswi nga hi tsakisiki. Yehovha a a swi tiva leswaku hi ta langutana ni swiphiqo swo fana ni leswi, hikwalaho u huhutele vatsari van’wana va Bibele leswaku va vulavula hi ndlela leyi hi nga rhandzanaka hayona nileswaku hikwalahokayini hi fanele hi rhandzana. Un’wana wa vatsari volavo i muapostola Yohane.—1 Yoh. 3:11, 12. w21.01 8 ¶1-2

Swi nga ri na mhaka leswaku ha ha ku sungula ku tirhela Yehovha kumbe se i khale, hi fanele hi tivutisa leswi, ‘Xana ndzi lwa hi matimba leswaku ndzi hlula miringo ya Sathana yo endla leswaku mbilu ya mina yi avana?’ Hi xikombiso, loko ku humelela xifaniso lexi nga pfuxaka ku navela ka timhaka ta masangu eka TV kumbe eka Inthanete, u endla yini? Swi nga olova ku tibyela leswaku xifaniso xexo a xi kombisi timhaka ta masangu hi ku kongoma. Swi nga endleka rero ku ri rhengu ra Sathana ro ringeta ku ava mbilu ya wena! Xifaniso xexo xi nga fanisiwa ni chizele leri wanuna a ri tirhisaka ku pandza ntsandza. U sungula hi ku ri nghenisa katsongo. Loko a ri karhi a ri belela ri nghena endzeni, ntsandza wu avana hi le xikarhi. Swi tano ni hi xifaniso lexi pfuxaka ku navela ka timhaka ta masangu. Swilo leswi vonakaka swi nga vuli nchumu, swi nga ava mbilu ya munhu lerova a tikuma a endle swidyoho kutani a tshika ku tshembeka. Hikwalaho, u nga pfumeleli nchumu ni wun’we lowu nga basangiki, wu nghena embilwini ya wena! Endla mbilu ya wena yi tshama yi ri ni vun’we ni ku xixima vito ra Yehovha! w20.06 11-12 ¶14-15

Vanhu lava tshikeke ku tirhela Yehovha va lava nseketelo wa hina. Ku fana ni n’wana loyi a lahlekile wa le xifanisweni xa Yesu, swi nga endleka va ha vavisekile emoyeni. (Luka 15:17-24) Kumbexana vuxaka bya vona na Yehovha byi tsanile hikwalaho ka swilo leswi va hlangavetanaka na swona emisaveni leyi ya Sathana. Hi fanele hi va pfuna va pfuxeta vuxaka bya vona na Yehovha. Eka xifaniso xa nyimpfu leyi lahlekeke, Yesu u hlamusela ndlela ya rirhandzu leyi murisi a yi tlakuleke hayona nyimpfu yoleyo kutani a yi tlherisela entlhambini. Murisi u tirhise matimba ni nkarhi wakwe wo tala a lavana ni nyimpfu leyi lahlekeke. Kambe u swi xiyile leswaku a swi ta lava a yi tlakula a yi tlherisela entlhambini hikuva a yi nga ha ri na matimba yo tifambela. (Luka 15:4, 5) Swi lava matshalatshala ku pfuna vanhu lava tshikeke ku tirhela Yehovha. Kambe hi ku pfuniwa hi moya wa Yehovha, Rito rakwe ni mikandziyiso leyi sekeriweke eBibeleni, hi nga swi kota ku va pfuna. Loko u komberiwa ku dyondzisa munhu wo tano Bibele, wu amukele hi mandla mambirhi nkateko wolowo! w20.06 28 ¶14-15

Un’wana ni un’wana wa hina u fanele a va ni rirhandzu, ku nga mfungho lowu Vakreste va tivekaka ha wona. Hi fanele hi tlhela hi va ni “vutivi lebyi kongomeke ni ku twisisa loku heleleke.” (Filp. 1:9) Handle ka swona, hi nga “yingayingisiwa hi mheho yin’wana ni yin’wana ya ku dyondzisa hi mano ya vanhu,” ku katsa ni vagwinehi. (Efe. 4:14) Enkarhini wa Yesu, loko vadyondzisiwa vo tala va tshike ku landzela Yesu, muapostola Petro u kombise leswaku wa khorwiseka leswaku Yesu u ni “marito ya vutomi lebyi nga heriki.” (Yoh. 6:67, 68.) Hambileswi Petro hi nkarhi wolowo a nga swi twisisi hi ku helela leswi a swi vuriwa kambe u tshame a tshembekile hikuva a a tiva ntiyiso mayelana na Kreste. Na wena, u nga swi kota ku kombisa leswaku wa swi kholwa leswi Bibele yi swi dyondzisaka. Loko u endla tano, a xi kona ni xin’we lexi nga tsekatsekisaka ripfumelo ra wena naswona u ta kota ku pfuna van’wana va va ni ripfumelo leri tiyeke.—2 Yoh. 1, 2. w20.07 8 ¶2; 13 ¶18

Leswaku hi pfuna vamakwerhu va tshama entiyisweni, hi fanele hi va komba ntsetselelo. (1 Yoh. 3:10, 11, 16-17) Hi fanele hi rhandzana, ku nga ri loko swilo swi famba kahle ntsena kambe ni loko xiyimo xi tika. Hi xikombiso, xana u tiva makwerhu wo karhi loyi a loveriweke naswona a lavaka ku chaveleriwa kumbe ku pfuniwa hi swin’wana? Kumbexana u tiva vamakwerhu vo karhi lava hlaseriweke hi mhangu ya ntumbuluko naswona va lavaka ku pfuniwa leswaku va pfuxeta Holo ya vona ya Vugandzeri kumbe makaya ya vona? Hi kombisa vamakwerhu leswaku ha va rhandza ni ku va twela hi swiendlo, ku nga ri hi marito ntsena. Loko hi rhandzana, hi kombisa leswaku hi tekelela Tata wa hina wa rirhandzu wa le tilweni. (1 Yoh. 4:7, 8) Ndlela yin’wana ya nkoka leyi hi swi kombisaka hayona leswaku ha rhandzana, i ku rivalelana. Hi xikombiso, munhu un’wana a nga hi twisa ku vava kutani a kombela ku rivaleriwa. Loko hi n’wi rivalela hi tlhela hi rivala hi xihoxo lexi a xi endleke, hi kombisa leswaku ha n’wi rhandza.—Kol. 3:13. w20.07 24 ¶14-15

Xana munhu un’wana ni un’wana u ta va ni mudyondzisi wakwe, hilaha hi va dyondzisaka hakona vanhu Bibele namuntlha? Xana vanhu volavo va ta hlengeletana emavandlheni lama hambaneke leswaku va ta leteriwa ndlela yo dyondzisa lava nga ta pfuxiwa endzhaku ka vona? A hi swi tivi, hi ta vona hi swona. Lexi hi xi tivaka hileswaku eku heleni ka Mfumo wa Kreste wa Gidi ra Malembe, “misava hinkwayo yi ta tala hi ku tiva Yehovha.” (Esa. 11:9) Hakunene hi ta tiphina swinene eka malembe wolawo ya gidi! Hi nkarhi wa Mfumo wa Kreste wa Gidi ra Malembe, vana va Yehovha hinkwavo va laha misaveni, va fanele va cinca mahanyelo ya vona loko va lava ku tsakisa Tata wa vona. Hikwalaho, hinkwavo va ta kombisa musa loko va ri karhi va pfuna vanhu lava pfuxiweke ekufeni leswaku va cinca mahanyelo ya vona kutani va hanya hi milawu ya Yehovha. (1 Pet. 3:8) Handle ko kanakana, vanhu lava pfuxiweke ekufeni va ta swi tsakela ku tihlanganisa ni vanhu va Yehovha lava titsongahataka, lava na vona va nga ta va va ri karhi va “tirhela ku ponisiwa.”—Filp. 2:12. w20.08 16 ¶6-7

Loko hi yingisa xitsundzuxo xa Pawulo lexi huhuteriweke, hi tlhela hi kambisisa swiendlo swa hina, hi ta swi xiya leswaku hi ni tinyiko ni vuswikoti lebyi nga faniki. Hi xikombiso, swi nga endleka nkulu a nga ri na yona nyiko yo dyondzisa epulatifomo kambe a ri ni vuswikoti byo endla vadyondzisiwa. Kumbe swi nga endleka a nga swi koti ku hlela swilo kahle ku fana ni vakulu lavan’wana kambe a ri ni vuswikoti byo chavelela ni ku tiyisa vahuweleri hi ku tirhisa Matsalwa naswona loko vamakwerhu va lava ku pfuniwa va titwa va ntshunxekile ku ya eka yena. Kumbexana u dume hi ku va ni malwandla. (Hev. 13:2:16) Loko hi xiya tinyiko leti hi nga na tona, hi ta va ni xivangelo lexi twalaka xo tinyungubyisa hi leswi hi kotaka ku swi endla evandlheni. Sweswo swi ta endla leswaku hi nga va vondzoki vamakwerhu lava nga ni tinyiko leti hambaneke ni ta hina. Ku nga khathariseki ntirho lowu hi wu endlaka evandlheni, hinkwerhu hi fanele hi tikarhatela ku antswisa vuswikoti bya hina. w20.08 24 ¶16-18

Mbulavulo lowu nga rivalekiki lowu a wu ri ni nhlokomhaka leyi nge “Ntshungu Lowukulu Swinene,” wu nyikeriwa hi J. F. Rutherford enhlengeletanweni ya xifundzha leyi a yi khomeriwe eWashington, D.C., eU.S.A, hi 1935. Eka mbulavulo wakwe, Makwerhu Rutherford u vulavule hi vanhu lava a va ta vumba “ntshungu lowukulu swinene” (King James Version), kumbe “ntshungu lowukulu,” lowu ku vulavuriwaka ha wona eka Nhlavutelo 7:9. Ku ta fikela hi nkarhi wolowo, a ku vuriwa leswaku ntlawa lowu wu ta ya hanya etilweni kambe a wu nga tshembekanga ngopfu ku fana ni Vakreste lava hlawuriweke. Makwerhu Rutherford u tirhise Matsalwa a hlamusela leswaku ntshungu lowukulu a wu nge yi etilweni kambe i tinyimpfu tin’wana ta Kreste leti nga ta pona “nhlomulo lowukulu” naswona ti ta hanya laha misaveni hilaha ku nga heriki. (Nhlav. 7:14) Yesu u te: “Ndzi ni tinyimpfu tin’wana, leti nga riki ta tshanga leri; na tona ndzi fanele ndzi ti tisa, ti ta yingisa rito ra mina, ti va ntlhambi wun’we ni murisi a va un’we.” (Yoh. 10:16) Lava tinyimpfu tin’wana i Timbhoni ta Yehovha to tshembeka leti nga ni ntshembo wo hanya hilaha ku nga heriki emisaveni leyi nga Paradeyisi.—Mat. 25:31-33, 46. w21.01 14 ¶1-2

Hi fanele hi tiyimisela leswaku hi ta kota ku tiyisela ni ku heta ntirho wa hina wo chumayela. (Mat. 28:19, 20) Ku tiyimisela swi lava ku hlakuleriwa. Hi ntolovelo hi lava ku endla swilo leswi olovaka. Leswaku hi kota ku tiyimisela, hi fanele hi kota ku tikhoma. Hikwalaho, leswaku hi kota ku endla swilo leswi vonakaka swi tika ku swi endla, hi lava ku pfuniwa. Yehovha wa hi pfuna hi ku tirhisa moya wakwe lowo kwetsima. ( Gal. 5:22, 23) Muapostola Pawulo a a tiyimisela. Kambe u vule leswaku u boheke ku “ba” miri wakwe leswaku a kota ku endla swilo leswinene. (1 Kor. 9:25-27) U tsundzuxe van’wana leswaku va tiyimisela ni ku endla swilo hinkwaswo hi “ndlela leyinene ni hi ku hleleka.” (1 Kor. 14:40) Hi fanele hi tiyimisela leswaku hi ta kota ku tiyisa vuxaka bya hina na Yehovha ni ku katseka entirhweni wo chumayela mikarhi hinkwayo.—Mit. 2:46. w20.09 6-7 ¶15-17

Ematikweni yo tala namuntlha, hi chumayela hi tshunxekile. Xana u tshama etikweni leri ku nga ni tshunxeko wo gandzela? Loko swi ri tano, tivutise, ‘Xana ndzi wu tirhisa njhani tshunxeko lowu?’ Enkarhini lowu wa makumu, nhlangano wa Yehovha wu kongomisa ntirho wo chumayela lowu endliwaka emisaveni hinkwayo. Vanhu va Yehovha va pfulekeriwe hi nkarhi wo hoxa xandla entirhweni lowu hi tindlela to hambanahambana. U nga wu tirhisa njhani nkarhi wa ku rhula hi vutlhari? (2 Tim. 4:2) Swi nga va swinene loko wo kambisisa swiyimo swa wena u vona loko wena kumbe xirho xa ndyangu wa wena xi ta swi kota ku heta nkarhi wo tala entirhweni wo chumayela, kumbexana ku teka vuphayona. Lowu a hi wona nkarhi wo tihlengeletela rifuwo hikuva loko ku fika nhlomulo lowukulu hi ta pona hi ri siya. (Swiv. 11:4; Mat. 6:31-33; 1 Yoh. 2:15-17) Vahuweleri vo tala va dyondze tindzimi tin’wana leswaku va ta kota ku chumayela vanhu va tindzimi teto. Nhlangano wa Yehovha wa va seketela hi ku humesa mikandziyiso leyi sekeriweke eBibeleni hi tindzimi to tlula 1000! w20.09 16 ¶9-11

Socha lerinene ra tshembeka. Ri ta lwa hi matimba leswaku ri sirhelela munhu loyi ri n’wi rhandzaka kumbe swilo leswi ri swi tekaka swi ri swa risima. Pawulo u hlohlotele Timotiya leswaku a tinyiketela eka Xikwembu, leswi vulaka ku tshama a tshembekile eka Xikwembu. (1 Tim. 4:7) Loko hi tinyiketela eka Xikwembu hi tlhela hi xi rhandza ngopfu, swi ta endla leswaku hi tshama entiyisweni. (1 Tim. 4:8-10; 6:6) Socha lerinene ri fanele ri tlhela ri tikarhata swinene leswaku ri ta kota ku tshama ri lunghekile. Timotiya u tshame a ri ni vuxaka lebyinene na Yehovha hikwalaho ka leswi a yingiseke xitsundzuxo xa Pawulo xo balekela ku navela ko biha kutani a hlakulela mikhuva leyinene ni ku tihlanganisa ni Vakrestekulobye. (2 Tim. 2:22) Sweswo a swi lava ku tikarhata swinene. Hi fanele hi tikarhata swinene loko hi lava ku hlula ku navela ka nyama. (Rhom. 7:21-25) Nakambe, swi lava hi tikarhata swinene loko hi lava ku hluvula vumunhu bya khale kutani hi ambala vumunhu lebyintshwa. (Efe. 4:22, 24) Loko hi karhele, swi lava ku tikarhata leswaku hi kota ku ya enhlengeletanweni ya vandlha.—Hev. 10:24, 25. w20.09 28 ¶9-11

Hi fanele hi lehisa mbilu loko hi ri karhi hi pfuna xichudeni leswaku xi ta fanelekela ku khuvuriwa. Kambe hi fanele hi xi kambela ku vona loko xi swi lava hakunene ku tirhela Yehovha Xikwembu. Loko u xi langutile, xana u vona onge xa swi yingisa swileriso swa Yesu? Kumbe xo tsakisa hi ku dyondza Bibele ntsena? Nkarhi ni nkarhi kambela xichudeni xa wena ku vona loko xi endla nhluvuko. Hi xikombiso, xana xa ku byela ndlela leyi xi titwaka hayona hi Yehovha? Xana xa khongela eka Yehovha? (Ps. 116:1, 2) Xana xa tinyika nkarhi wo hlaya Bibele? (Ps. 119:97) Xana xi tshama xi ri kona etinhlengeletanweni ta vandlha? (Ps. 22:22) Xana se xi ma tshikile mahanyelo ya xona ya khale? Xana se xi sungurile ku byela swirho swa ndyangu ni vanghana va xona leswi xi swi dyondzaka? (Ps. 9:1) Xa nkoka swinene, xana xa swi lava ku va Mbhoni ya Yehovha? (Ps. 40:8) Loko xi nga swi endli leswi, hi vutlhari xi vutise leswaku xi tiyimisele ku endla yini hi leswi xi swi dyondzaka. w20.10 18 ¶14-15

Mikarhi hinkwayo Tata wa Yesu wa le tilweni u endla swiboho leswinene, na Yosefa na Mariya vatswari vakwe na vona va endle swiboho leswinene. Kambe Yesu loko a ri karhi a kula na yena a fanele a tiendlela swiboho. (Gal. 6:5) Ku fana na hina, na yena a a ri ni tshunxeko wo tihlawulela. A a ta va a hlawule ku titsakisa. Kurinasweswo, u hlawule ku endla swilo leswi tsakisaka Yehovha. Loko Yesu a tiva leswi Yehovha a lavaka a swi endla u endle xiboho xo amukela ntirho lowu a nyikiweke wona. (Yoh. 6:38) A a swi tiva leswaku vanhu vo tala va ta n’wi venga naswona a yi nga n’wi dyisi byi rhelela mhaka yoleyo. Kambe u endle xiboho xo yingisa Yehovha. Loko Yesu a khuvuriwa hi 29 C.E., a a lava ku endla ku rhandza ka Yehovha. (Hev. 10:5-7) Hambiloko a ri ekusuhi ni ku fa emhandzini ya nxaniso, Yesu a a nga tshikanga ku endla ku rhandza ka Tata wakwe.—Yoh. 19:30. w20.10 29 ¶12; 30 ¶15

Xana ku ni vamakwerhu lava u va tivaka evandlheni ra ka n’wina lava nga ni ntshikilelo hileswi va vabyaka kumbe va nga ni swiphiqo swin’wana? Kumbe lava loveriweke? Loko hi tiva makwerhu wo karhi loyi a lavaka ku pfuniwa, hi nga khongela eka Yehovha a hi pfuna hi vula kumbe hi endla swo karhi leswi kombisaka leswaku ha n’wi rhandza. Swi nga endleka leswaku sweswo hi swona ntsena leswi makwerhu a swi lavaka leswaku a ta chaveleleka. (1 Pet. 4:10) Swa hi chavelela ku tiva leswaku Yehovha u ta hi pfuna. Wa hi pfuna hi ku tirhisa Yesu ni tintsumi. Nakambe Yehovha wa hi pfuna hi ku tirhisa valawuri loko timhaka ta kona ti fambisana ni ku rhandza kakwe. Hilaha vo tala va hina se hi swi voneke hakona, Yehovha u endla leswaku moya wakwe lowo kwetsima wu susumetela vamakwerhu leswaku va hi pfuna. Ku fana na muapostola Pawulo, na hina hi nga vula hi ku tiyiseka hi ku: “Yehovha i mupfuni wa mina; a ndzi nge chavi. Xana munhu a nga ndzi endla yini?”—Hev. 13:6. w20.11 17 ¶19-20

Vaapostola a va tiyiseka leswaku Yehovha wa va seketela. U va nyike matimba yo endla masingita. (Mit. 5:12-16; 6:8) Kambe hina a nga hi nyikanga. Hambiswiritano, Yehovha wa hi tiyisekisa hi ku tirhisa Rito rakwe leswaku wa tinyungubyisa hi hina loko hi xaniseka hikwalaho ka leswo lulama naswona wa hi seketela hi ku tirhisa moya wakwe wo kwetsima. (1 Pet. 3:14; 4:14) Ematshan’weni yo karhateka hi leswaku hi ta endlisa ku yini loko hi xanisiwa enkarhini lowu taka, a hi tiyiseni ripfumelo ra hina sweswi eka Yehovha ni ku tshemba leswaku u ta hi ponisa. Hi fanele hi tshemba xitshembiso xa Yesu lexi nge: “Ndzi ta mi nyika vutlhari naswona ndzi ta mi byela leswi mi faneleke ku swi vula, valala va n’wina hinkwavo a va nge swi koti ku mi kaneta kumbe ku mi hlamula.” U tlhele a hi tiyisekisa a ku: “Loko mi tiyisela mi ta ponisiwa.” (Luka 21:12-19) Tsundzuka, Yehovha a nge ma rivali malandza yakwe lama feke ma tshembekile. Hikwalaho, u ta ma pfuxa eku feni. w21.01 4 ¶12

Muapotsola Pawulo a hi yena wo sungula ku vulavula hi ntshembo wa ku pfuxiwa ka vafi. Yobo na yena u vulavule hi ntshembo wolowo. A a tiyiseka leswaku Xikwembu xi ta n’wi tsundzuka naswona xi n’wi pfuxa eku feni. (Yobo 14:7-10, 12-15) Ntshembo wa ‘ku pfuxiwa ka vafi’ i yin’wana ya ‘tidyondzo’ leti Vakreste hinkwavo va sungulaka hatona ku tidyondza. (Hev. 6:1, 2) Rungula ra Pawulo leri vulavulaka hi ku pfuxiwa ka vafi, ri kumeka eka Vakorinto vo Sungula ndzima 15. Rungula rero ri fanele ri va tiyise ngopfu Vakreste va le nkarhini wa vaapostola. Na hina rungula leri ri ta hi tiyisa swinene swi nga ri na mhaka leswaku i khale ku fikela kwihi hi tshemba leswaku vafi va ta pfuxiwa. Ku pfuxiwa ka Yesu Kreste hi swona leswi endlaka hi tiyiseka leswaku maxaka ya hina lama feke ma ta pfuxiwa. Ku pfuxiwa ka Yesu a ku ri xiphemu xa “mahungu lamanene” lawa Pawulo a ma chumayeleke Vakorinto. (1 Kor. 15:1, 2) U vule leswaku loko Mukreste a nga pfumeli leswaku vafi va ta pfuxiwa, ripfumelo rakwe a ri pfuni nchumu.—1 Kor. 15:17. w20.12 2 ¶2-4

I yini lexi pfuneke muapostola Petro leswaku a hlula ku hela matimba? Loko sweswo swi nga si endleka, Yesu se a n’wi khongelerile Petro leswaku ripfumelo rakwe ri nga tsani. Yehovha u xi hlamurile xikhongelo xexo. Hi ku famba ka nkarhi, Yesu u humelele eka Petro, swi le rivaleni leswaku a a lava ku n’wi khutaza. (Luka 22:32; 24:33, 34; 1 Kor. 15:5) Endzhaku ka loko vaapostola va tirhe vusiku hinkwabyo kambe va nga phasi nchumu, Yesu u humelele eka vona. Hi nkarhi wolowo, Yesu u nyike Petro nkarhi wa ku vula ndlela leyi a n’wi rhandzaka hayona. Yesu se a n’wi rivalerile munghana wakwe loyi a n’wi rhandzaka naswona u n’wi nyike ntirho lowu engetelekeke. (Yoh. 21:15-17) Ndlela leyi Yesu a khomeke Petro hayona yi kombisa leswaku u ni musa ku fana ni Tata wakwe. Hikwalaho loko hi endla swihoxo, a hi fanelanga hi tibyela leswaku Yehovha a nge pfuki a hi rivalerile. Hi fanele hi tsundzuka leswaku Sathana u lava hi titwa tano. Ematshan’weni ya sweswo, hi fanele hi tilanguta ni ku languta van’wana lava hi endlelaka swihoxo hi ndlela leyi Tata wa hina wa le tilweni loyi a hi rhandzaka a hi langutaka hayona.—Ps. 103:13, 14. w20.12 20-21 ¶17-19

Hi nga dyondza swo karhi eka vanhu lava a va nga ri na ku rhula naswona a va nga n’wi tshembi Yehovha. Ku dyondza hi vanhu lava swi ta hi pfuna hi papalata ku endla swihoxo swo fana ni leswi va swi endleke. Hi xikombiso, loko Hosi Asa wa le Yuda a ha ku sungula ku fuma, u kombele Yehovha a n’wi pfuna. Kambe hi ku famba ka nkarhi, u tshike ku kombela Xikwembu xi n‘wi pfuna kutani a tiendlela swilo hi ndlela yakwe. (2 Tikr. 16:1-3, 12) Swi nga endleka leswaku mhaka ya ku va Asa a kombele Vaasiriya va n’wi pfuna loko a hlaseriwa hi Vaisrayele a yi vonaka yi ri kahle. Kambe sweswo a swi tlhaveriwanga hi dyambu. Hi ku tirhisa muprofeta, Yehovha u n’wi byele leswi: “Leswi u tshembeke hosi ya Siriya, u nga tshembangiki Yehovha Xikwembu xa wena, masocha ya hosi ya Siriya ma ku balekerile.” (2 Tikr. 16:7) Hi fanele hi tivonela leswaku hi nga titshembi ku tlula mpimo lerova hi tilulamisela timhaka hi hexe ematshan’weni yo kombela Yehovha a hi kongomisa hi ku tirhisa Rito rakwe. Hambiloko hi fanele hi endla xiboho hi ku hatlisa, hi fanele hi kombela Yehovha a hi pfuna hi endla swiboho swa vutlhari. w21.01 6 ¶13-15

Namuntlha, vanhu van’wana va Yehovha va sika hi ndlala hikwalaho ka swiphiqo swa ikhonomi kumbe hikwalaho ka tinyimpi leti vangaka vusweti. Van’wana va le jele hikwalaho ka ripfumelo ra vona. Hambiswiritano, lava ntshungu lowukulu va tsaka ku tiva leswaku loko vo pona loko ku lovisiwa misava leyi yo homboloka, va ta tiphina hi swakudya swa nyama ni swa moya. Loko misava leyi, leyi lawuriwaka hi Sathana yi lovisiwa, lava ntshungu lowukulu va ta sirheleriwa eka vukarhi bya Yehovha lebyi fanaka ni ‘mumu lowu vavulaka.’ Endzhaku ka nhlomulo lowukulu, Yesu u ta endla leswaku lava poneke va kuma “mati ya vutomi [lebyi nga heriki].” (Nhlav. 7:17) Ehleketa hi mhaka leyi: Lava ntshungu lowukulu va ni ntshembo wo hlawuleka. Eka vanhu va tibiliyoni lava nga kona, ntshungu lowukulu swi nga endleka wu nga ri nantswi rifu! (Yoh. 11:26) Lava tinyimpfu tin’wana va khensa Yehovha na Yesu hikwalaho ka ntshembo wo hlawuleka lowu va va tshembiseke wona! w21.01 16-17 ¶11-12

Hi vusiku byakwe byo hetelela a nga si dlayiwa, Yesu a a ehleketa hi mitlhontlho leyi vadyondzisiwa vakwe a va ta langutana na yona. Leswi a a va rhandza ngopfu, u kombele Tata wakwe leswaku a va “sirhelela eka lowo homboloka.” (Yoh. 17:14, 15) A a swi tiva leswaku loko se a ta va a tlhelele etilweni, Sathana Diyavulosi a a ta ya emahlweni a hlasela vanhu lava lavaka ku tirhela Yehovha. Swi le rivaleni leswaku vanhu va Yehovha a va ta lava ku sirheleriwa. Namuntlha hi lava ku sirheleriwa hi Yehovha ku tlula rini na rini. Sathana u caciwe etilweni, “a hlundzukile swinene.” (Nhlav. 12:12) U khorwise vanhu van’wana lava hi xanisaka leswaku loko va hi xanisa va endlela “Xikwembu ntirho wo kwetsima.” (Yoh. 16:2) Lava nga pfumeriki eka Xikwembu, va hi xanisa hileswi mahanyelo ya hina ma hambaneke ni ya vanhu lava nga dyondzisiwiki hi Yehovha. Ku nga khathariseki xivangelo xa kona, a hi va chavi nikatsongo! Hikwalahokayini? Nhlamulo hi leyi nga eka ndzimana ya hina ya siku ra namuntlha. w21.03 26 ¶1, 3

Hinkwaswo leswi Yehovha a swi endlaka u swi endla hi rirhandzu. Wa hi seketela ku kombisa leswaku wa hi rhandza. U tlhele a hi kutsula eka xidyoho ni rifu hileswi a hi rhandzaka. Kasi loko ku ri Yesu, u hi rhandze ngopfu lerova a kala a nyikela hi vutomi byakwe hikwalaho ka hina. (Yoh. 3:16; 15:13) A xi kona lexi nga herisaka ndlela leyi Yehovha na Yesu va va rhandzaka hayona vanhu lava tshembekeke eka vona. (Yoh. 13:1; Rhom. 8:35, 38, 39) Hilaha ku fanaka, hinkwaswo leswi nhloko ya ndyangu yi swi endlaka yi fanele yi swi endla hi rirhandzu. Hikwalahokayini swi ri swa nkoka ku endla tano? Muapostola Yohane u ri: “Loyi a nga rhandziki makwavo [kumbe ndyangu wakwe], la n’wi vonaka, a nge xi rhandzi Xikwembu lexi a nga si tshamaka a xi vona.” (1 Yoh. 4:11, 20) Wanuna loyi a rhandzaka ndyangu wakwe naswona a lavaka ku tekelela Yehovha na Yesu, u ta pfuna ndyangu wakwe leswaku wu va ni vuxaka lebyinene na Yehovha, u ta wu seketela a tlhela a wu wundla. (1 Tim. 5:8) U ta letela vana vakwe a tlhela a va tshinya loko swi fanerile. Nakambe u ta teka swiboho leswi nga ta yisa ku dzuneka eka Yehovha ni ku vuyerisa ndyangu wakwe. w21.02 5 ¶12-13

Tata wa hina wa le tilweni wa swi tiva swilo leswi hi tshameke hi langutana na swona ni ndlela leyi swi hi khumbeke hayona. Nakambe u tiva swilo leswinene leswi nga etimbilwini ta hina, leswi hina hi nga kotiki ku swi vona. (1 Yoh. 3:19, 20) Munhu loyi a lwaka hi matimba leswaku a tshika mukhuva wo karhi wo biha lowu se a wu ri engatini, a nga tikuma a tlhelele eka mukhuva wolowo hi xihoxo kutani sweswo swi n’wi heta matimba. I swa ntumbuluko ku titwa nandzu loko hi endle xihoxo. (2 Kor. 7:10) Kambe, a hi fanelanga hi titwa nandzu ku tlula mpimo kutani hi ku: ‘A ndzi pfuni nchumu. Yehovha a nge pfuki a ndzi rivalerile.’ Langutelo ro tano ro biha ri ni khombo naswona ri nga endla hi tshika ku tirhela Yehovha. Ematshan’weni yo hela matimba, “lulamisa timhaka” na Yehovha hi ku khongela u kombela ku rivaleriwa. (Esa. 1:18) Loko a swi xiya leswaku u hundzukile hakunene, u ta ku rivalela. Ku engetela kwalaho, yana eka vakulu u ya kombela ku pfuniwa. Va ta ku pfuna leswaku u tlhela u va ni vuxaka lebyinene na Yehovha.—Yak. 5:14, 15. w20.12 23 ¶5-6

Yesu a a va xixima vavasati. A a nga fani ni Vafarisi hikuva a va teka vavasati va nga pfuni nchumu, a va nga va vulavurisi emahlweni ka vanhu hambi ku ri ku burisana na vona hi Matsalwa a swi yila. Kambe Yesu loko a burisana ni vadyondzisiwa vakwe hi Matsalwa ni vavasati a va ri kona. (Luka 10:38, 39, 42) Nakambe, loko a ya eku chumayeleni u fambe ni vavasati. (Luka 8:1-3) U tlhele a rhuma vona va ya tivisa vaapostola vakwe leswaku u pfuxiwile eku feni. (Yoh. 20:16-18) Muapostola Pawulo u tsundzuxe Timotiya leswaku a xixima vavasati. Pawulo u vule leswaku mana wa Timotiya ni kokwa wakwe hi vona vo sungula ku n’wi dyondzisa “matsalwa yo kwetsima.” (2 Tim. 1:5; 3:14, 15) Eka papila leri a ri tsaleleke Varhoma, Pawulo u xewete vamakwerhu va xisati hi mavito. A a wu teka wu ri wa nkoka ntirho wa vona naswona a a wu tlangela swinene.—Rhom. 16:1-4, 6, 12; Filp. 4:3. w21.02 15 ¶5-6