February

Tiva vamakwenu ku antswa. Vulavula na vona loko tinhlengeletano ta vandlha ti nga si sungula ni loko se ti herile, tirha na vona nsimu naswona loko swi koteka va rhambe leswaku u ta tiphina na vona hi swakudya. Loko u endla tano, u nga kuma leswaku makwerhu wa xisati loyi a vonakaka a nga ri na xinghana u ni tingana, makwerhu loyi a wu ehleketa leswaku u rhandza rifuwo u ni malwandla kumbe ndyangu lowu talaka ku fika leti etinhlengeletanweni ta vandlha wa kanetiwa ekaya. (Yobo 6:29) I ntiyiso leswaku a hi fanelanga hi “nghenelela etimhakeni ta van’wana.” (1 Tim. 5:13) Kambe swi kahle ku tiva swo karhi hi vamakwerhu ni swiyimo leswi endlaka va hanya hi ndlela leyi va hanyaka hayona. Loko u tiva ndlela leyi Mukrestekulobye loyi u nga n’wi twisisiki a kurisiweke hayona, swi ta endla leswaku u n’wi twela vusiwana. Swi lava matshalatshala ku tiva vamakwerhu ku antswa. Loko u yingisa ndzayo ya le Bibeleni leyi vulaka leswaku u ndlandlamuka, u va u tekelela Yehovha loyi a rhandzaka “vanhu hinkwavo.”—1 Tim. 2:3, 4; 2 Kor. 6:11-13. w20.04 16-17 ¶10-12

Loko Yesu a nga si dlayiwa, hi vusiku byakwe byo hetelela u byele vadyondzisiwa vakwe leswaku va rhandzana. A a swi tiva leswaku loko va rhandzana va ta va ni vun’we naswona a swi ta va pfuna va kota ku tiyisela loko va vengiwa. Tsundzuka vandlha ra le Tesalonika. Loko ra ha ku simekiwa, swirho swa vandlha rero swi xanisiwile. Kambe vamakwerhu evandlheni rero, va kote ku tiyisela hileswi a va rhandzana. (1 Tes. 1:3, 6, 7) Pawulo u va khutazile leswaku va ya emahlweni va rhandzana “hilaha ku engetelekeke.” (1 Tes. 4:9, 10) Loko va rhandzana, a va ta kota ku chavelela ni ku seketela lava tsaneke. (1 Tes. 5:14) Va xi yingisile xikhutazo xa Pawulo hikuva eka papila rakwe ra vumbirhi leri a ri tsaleke endzhaku ka kwalomu ka lembe, u te: “Ndlela leyi mi rhandzanaka hayona ya kula.” (2 Tes. 1:3-5) Leswi a va rhandzana, va kote ku tiyisela loko va xanisiwa. w21.03 22 ¶11

Loko hi lava ku kuma hakelo ya vutomi lebyi nga heriki, hi fanele hi yingisa milawu leyi Vakreste va faneleke va hanya hayona. (Mit. 20:24; 1 Pet. 2:21) Kambe Sathana ni valandzeri vakwe a va lavi hi hanya hi milawu ya Vukreste; va lava hi ‘ya emahlweni hi tsutsuma na vona.’ (1 Pet. 4:4) Va hlekula vutomi lebyi hi hlawuleke ku byi hanya naswona va vula leswaku ndlela leyi va hanyaka hayona ya antswa hikuva yi endla va va ni ntshunxeko. Kambe sweswo a hi ntiyiso. (2 Pet. 2:19) Hi ta va hi endla kahle ngopfu loko hi hlawula gondzo leri faneleke! Sathana u lava hi tshika ku tsutsuma egondzweni ro lala leri “yisaka evuton’wini” kutani hi tsutsuma egondzweni ro pfuleka leri vanhu vo tala va tsutsumaka eka rona. Gondzo rero ri rhandziwa hi vanhu vo tala naswona swa olova ku tsutsuma eka rona. Kambe ri yisa “eku lovisiweni.” (Mat. 7:13, 14) Leswaku hi tshama egondzweni leri faneleke, hi fanele hi tshemba Yehovha hi tlhela hi n’wi yingisa. w20.04 26 ¶1; 27 ¶5, 7

Emalembeni ya sweswinyana, tiko ra Rhaxiya ni matiko lama ri seketelaka na wona ma nghene “etikweni ro Saseka.” (Dan. 11:41) Njhani? Hi 2017, hosi leyi ya le n’walungwini yi yirise ntirho wa vanhu va Yehovha yi tlhela yi khoma vamakwerhu van’wana. Yi tlhele yi yirisa tibuku ta hina ku katsa ni Vuhundzuluxeri Bya Misava Leyintshwa. Ku tlula kwalaho, yi tlhele yi teka hofisi ya hina ya rhavi eRhaxiya swin’we ni Tiholo leti hi gandzelaka eka tona. Endzhaku ka ku va yi endle sweswo, hi 2018 Huvo leyi Fumaka yi vule leswaku tiko ra Rhaxiya ni matiko lama ri seketelaka i hosi ya le n’walungwini. Hambiswiritano, hambiloko vanhu va Yehovha va xanisiwa hi ndlela yo vava, a va pfumeli ku lwisana ni mfumo wo karhi kumbe va ringeta ku wu cinca. Kurinasweswo, va landzela ndzayo ya le Bibeleni ya leswaku va khongelela “hinkwavo lava nga eswiyin’weni leswi tlakukeke,” ngopfungopfu loko vanhu volavo va endla swiboho leswi nga ta khumba ntshunxeko wo gandzela. w20.05 14 ¶9

Vatswari, leswaku vana va n’wina va tshama entiyisweni, va fanele va va ni vuxaka lebyinene ni Xikwembu va tlhela va kholwa ntiyiso lowu va wu dyondzaka eBibeleni. Loko u fanele u dyondzisa vana wena ntiyiso hi Xikwembu, u fanele u va vekela xikombiso lexinene loko swi ta emhakeni ya ku dyondza Bibele. U fanele u tinyika nkarhi wo anakanyisisa hileswi u swi dyondzaka. Sweswo swi ta endla u kota ku dyondzisa vana va wena ku endla leswi fanaka. U fanele u dyondzisa vana va wena ku tirhisa switirhisiwa swo endla ndzavisiso, ku fana ni loko u dyondzisa xichudeni xa wena xa Bibele. Loko u endla tano, u ta pfuna vana va wena va rhandza Yehovha ni ku tshemba leswaku Yehovha u tirhisa “hlonga ro tshembeka ni ro tlhariha” ku hi pfuna hi twisisa Bibele. (Mat. 24:45-47) U nga dyondzisi vana va wena tidyondzo ta Bibele ta xisekelo ntsena. Va pfune va va ni ripfumelo leri tiyeke hi ku va dyondzisa “swilo leswi enteke swa Xikwembu,” hi ku ya hi malembe ni vuswikoti bya vona.—1 Kor. 2:10. w20.07 11 ¶10, 12-13

I vanhu vangani lava nga hetisekangiki lava nga vanghana va Yehovha namuntlha? I vanhu va timiliyoni. Vunghana lebyi byi koteka hikwalaho ka leswi va nga ni ripfumelo eka gandzelo ra nkutsulo ra Yesu. Sweswo hi swona leswi endlaka leswaku Yehovha a hi pfumelela hi tinyiketela eka yena hi tlhela hi khuvuriwa. Loko hi teka magoza lawa ya nkoka, hi joyina timiliyoni ta Vakreste lava tinyiketeleke va tlhela va khuvuriwa, lava nga vanghana va Yehovha Xikwembu! Hi nga swi kombisa njhani leswaku ha swi tlangela ku va vanghana va Xikwembu? Ku fana na Abrahama na Yobo lava tshameke va tshembekile eka Xikwembu ku ringana malembe yo tlula dzana, na hina hi fanele hi tshama hi tshembekile, ku nga khathariseki leswaku hi ni nkarhi wo tanihi kwihi hi tirhela Yehovha. Ku fana na Daniyele, hi fanele hi teka vunghana bya hina ni Xikwembu byi ri bya nkoka ku tlula vutomi. (Dan. 6:7, 10, 16, 22) Yehovha u ta hi pfuna hi tiyisela miringo ni ku tiyisa vunghana bya hina na yena.—Filp. 4:13. w20.05 27 ¶5-6

Hosi Davhida u vone nsati wa munhu un’wana a ri eku hlambeni. Phela a wu tiva kahle nawu wa Yehovha lowu nge: “U nga tshuki u navela nsati wa munhu un’wana.” (Eks. 20:17) Kambe u ye mahlweni a n’wi langutisa. Mbilu yakwe yi sungule ku avana, kutani u sungule ku navela wansati yoloye, ku nga Bati-xeba hi hala tlhelo a lava ku tsakisa Yehovha. Hambileswi a ku ri khale Davhida a rhandza ni ku xixima Yehovha kambe u pfumele ku hambukisiwa hi mbilu yakwe. Hikwalaho ka sweswo, Davhida u endle swilo swo biha ngopfu. U endle leswaku vito ra Yehovha ri sandziwa. Davhida u tlhele a twisa vanhu lava nga riki na nandzu ku vava, ku katsa ni ndyangu wakwe. (2 Sam. 11:1-5, 14-17; 12:7-12) Yehovha u tshinye Davhida naswona Davhida u hundzukile. (2 Sam. 12:13; Ps. 51:2-4, 17) Davhida u tsundzuke mbitsi ni maxangu lawa a veke na wona hikwalaho ko pfumelela mbilu yakwe yi avana. Marito lawa a ma tsaleke eka Pisalema 86:11, ma nga tlhela ma vekiwa hi ndlela leyi: “Ndzi nyike mbilu leyi nga avanangiki.” Xana Yehovha u n’wi pfunile Davhida leswaku a va ni mbilu leyi hetisekeke kumbe leyi nga ni vun’we? Ina, hi ku famba ka nkarhi loko Bibele yi vulavula hi Davhida yi vulavule hi yena tanihi wanuna loyi a a ri ni ‘mbilu leyi a yi hetisekile eka Yehovha Xikwembu xakwe.’—1 Tih. 11:4; 15:3. w20.06 11 ¶12-13

Bibele yi fanisa rirhandzu leri Yehovha a nga na rona eka vanhu vakwe ni mapindza kumbe ntambhu. Rirhandzu ra Xikwembu ri fana ni mapindza hi ndlela yihi? Ehleketa hi xikombiso lexi: A hi nge u le ku nweleni elwandle leri kariheke kutani munhu un’wana a ku nyiketa xikhwehle lexi endlaka leswaku munhu a nga nweli. Swi le rivaleni leswaku u ta wu tlangela mpfuno wakwe. Kambe xikhwehle lexi endlaka leswaku munhu a nga nweli xi to ku pfuna swa xinkarhana. Phela mati ma titimela naswona u nga fa loko wo ka u nga kumi xikepe lexi nga ku ponisaka. Ku laveka munhu loyi a nga ta ku nyiketa ntambhu kutani a ku kokela exikepeni. Hilaha Yehovha a vuleke hakona eka marito ya ndzimana ya namutlha hi rirhandzu u ‘kokele’ Vaisrayele lava a va tshike ku n’wi tirhela. Yehovha u titwa hi ndlela leyi fanaka hi vanhu lava tshikeke ku n’wi tirhela ni lava va langutanaka ni swiphiqo. U lava va swi tiva leswaku wa va rhandza naswona u lava ku va pfuna va tlhelela eka yena. Yehovha a nga tirhisa wena ku va komba ndlela leyi a va rhandzaka hayona. I swa nkoka ku tiyisekisa vanhu lava tshikeke ku tirhela Yehovha leswaku wa va rhandza naswona na hina ha va rhandza. w20.06 27 ¶12-13

Loko mudyondzisiwa Stefano a dlayiwile, Vakreste vo tala va balekile eYerusalema “va ya emigangeni hinkwayo ya Yudiya na Samariya,” van’wana va kale va ya fika ni le tindhawini ta le kule swinene, to tanihi le Kipra ni le Antiyoka. (Mit. 7:58–8:1; 11:19) Vadyondzisiwa a va cinisiwa rhuvurhuvu. Kambe va ye emahlweni ni ku chumayela mahungu lamanene etindhawini leti va fikeleke eka tona naswona mavandlha a ma ya ma simekiwa etindhawini leti a ti ri ehansi ka Mfumo wa Rhoma. (1 Pet. 1:1) Kambe Vakreste volavo a va ha ta cinisiwa gija. Hi xikombiso, hi 50 C.E., Mufumi wa le Rhoma Klawudiyo, u lerise Vayuda hinkwavo leswaku va suka eRhoma. Hikwalaho, Vayuda lava a va ri Vakreste, va boheke ku sukela makaya ya vona va rhurhela ematikweni man’wana. (Mit. 18:1-3) Kwalomu ka 61 C.E., muapostola Pawulo u tsale leswaku Vakrestekulobye va rhukaniwile emahlweni ka vanhu, va pfaleriwa ejele ni ku tekeriwa nhundzu. (Hev. 10:32-34) Nakambe ku fana ni vanhu van’wana, Vakreste a va karhatiwa hi vusweti ni mavabyi.—Rhom. 15:26; Filp. 2:25-27. w21.02 26-27 ¶2-4

A xi kona lexi Sathana kumbe vanhu lava kuceteriwaka hi yena va nga xi endlaka, lexi nga tsanisaka ripfumelo ra Mukreste loyi a weke a pfuka leswaku a tiyisa ripfumelo rakwe. (2 Yoh. 8, 9) Hi fanele hi langutela ku vengiwa hi vanhu va misava leyi. (1 Yoh. 3:13) Loko Yohane a hi tsundzuxa u ri: “Misava hinkwayo yi le hansi ka matimba ya lowo homboloka.” (1 Yoh. 5:19) Leswi makumu ya misava leyi ma nga kwala nyongeni, Sathana u dye makala ku tlula rini na rini. A nga hi hlaseli hi tindlela leti tumbeleke ntsena, to tanihi ku tikhoma ko biha hi swa masangu kumbe hi mavunwa ya vagwinehi. U tlhela a hi hlasela hi ku kongoma, hi ku endla leswaku hi khomiwa hi ndlela ya tihanyi. Wa swi tiva leswaku u saleriwe hi nkarhi wutsongo wo sivela ntirho wo chumayela ni ku tsanisa ripfumelo ra hina. A swi hlamarisi leswi ntirho wa hina wu yirisiweke ematikweni yo tala. Hambiswiritano, vamakwerhu lava nga ematikweni wolawo va ya emahlweni va tiyisela. Va tiyisekisa leswaku hambiloko lowo homboloka a hi hlasela hi miringo yo hambanahambana, hi ta hlula! w20.07 24 ¶12-13

Xikongomelo xa Yehovha a ku ri leswaku vanhu va hanya hilaha ku nga heriki eka pulanete leyi yo xonga ya misava leyi a yi tumbuluxeke. Kambe endzhaku ka loko Adamu na Evha va tshike ku yingisa Tata wa vona loyi a a va rhandza, xidyoho ni rifu swi hangalake ni misava hinkwayo. (Rhom. 5:12) Xana Yehovha u angule njhani? U nambe a vula ndlela leyi a nga ta va ponisa hayona vanhu. (Gen. 3:15) Yehovha u hlele ku kutsula vana va Adamu na Evha eka xidyoho ni rifu. Hikwalaho, a ta endla leswaku vanhu lava hlawulaka ku n’wi tirhela va kuma vutomi lebyi nga heriki. (Yoh. 3:16; 1 Kor. 15:21, 22) Loko Yehovha hi ku tirhisa N’wana wakwe a pfuxa vafi va tsandzavahlayi, hi nga langutela leswaku vanhu valavo a va nge pfuxiwi hi nkarhi wun’we. Hikwalahokayini? Hikuva loko vanhu vo pfuka hi nkarhi wun’we, ku ta tala laha misaveni naswona swi nga vanga hasahasa. Yehovha a nga si tshama a endla swilo hi ndlela leyi nga hlelekangiki. Wa swi tiva leswaku loko ku fanele ku va ni ku rhula, swilo hinkwaswo swi fanele swi endliwa hi ku hleleka.—1 Kor. 14:33. w20.08 14 ¶3; 15 ¶5

Pfuna xichudeni xa wena xi swi twisisa leswaku xikongomelonkulu xo va u dyondza na xona Bibele u lava ku xi pfuna xi va Mbhoni ya Yehovha. Ku ni magoza lawa xichudeni xi faneleke xi ma teka leswaku xi ta fanelekela ku khuvuriwa! Xi fanele xi rhanga hi ku tiva ni ku rhandza Yehovha xi tlhela xi va ni ripfumelo eka Yena. (Yoh. 3:16; 17:3) Xi fanele xi va ni vuxaka na Yehovha xi tlhela xi tolovelana ni vamakwerhu evandlheni. (Hev. 10:24, 25; Yak. 4:8) Xi fanele xi tshika mikhuva yo biha xi tlhela xi hundzuka. (Mit. 3:19) Xi fanele xi byela van’wana hi leswi xi swi dyondzaka. (2 Kor. 4:13) Eku heteleleni, xi ta tinyiketela eka Yehovha xi tlhela xi khuvuriwa. (1 Pet. 3:21; 4:2) Vandlha hinkwaro ri ta giya hi siku rero! Loko xichudeni xi ri karhi xi endla nhluvuko, xi bumabumele u tlhela u xi khutaza leswaku xi ya emahlweni xi endla tano. w20.10 17-18 ¶12-13

Loko u tipimanisa ni van’wana evandlheni, u nga tivona u nga pfuni nchumu. Swi nga endleka van’wana evandlheni va ni vuswikoti byo dyondzisa, va kota ku hlela swilo kumbe i varisi lava nga ni vuswikoti. Kumbexana wa swi twisisa leswaku a wu na byona vuswikoti byo fana na bya vona. Sweswo swi kombisa leswaku wa titsongahata. (Filp. 2:3) Kambe, u fanele u tivonela. Loko wo tshamela ku tipimanisa ni vanhu lava nga ni vuswikoti byo karhi, u ta hela matimba. Sweswo swi ta endla u titwa u nga pfuni nchumu evandlheni hilaha muapostola Pawulo a hlamuseleke hakona. Hi singita Yehovha u nyike Vakreste van’wana va le nkarhini wa vaapostola tinyiko ta moya wo kwetsima kambe a hi Vakreste hinkwavo lava kumeke tinyiko teto. (1 Kor. 12:4-11) Kambe hinkwavo a va ri va risima eka yena. Namuntlha, a hi nyikiwi tinyiko ta moya wo kwetsima hi singita. Kambe mhaka leyi ku vulavuriwaka hayona laha ya tirha ni le ka hina. Hambileswi hi nga riki na vuswikoti lebyi fanaka kambe hinkwerhu hi va risima eka Yehovha. w20.08 23 ¶13-15

Loko u khongela u kombela xivindzi, Yehovha u ta hlamula swikhongelo swa wena naswona a nge pfuki a ku tshikile. (Mit. 4:29, 31) U tshama a lunghekele ku ku pfuna. Nakambe, anakanyisisa hi ndlela leyi Yehovha a va poniseke hayona van’wana enkarhini lowu hundzeke. Handle ko kanakana, Xikwembu lexi rhangeleke vanhu va xona leswaku va tsemakanya Lwandle ro Tshwuka, xi nga ku pfuna leswaku u va mudyondzisiwa wa Kreste. (Eks. 14:13) Vana ni ripfumelo ku fana ni mupisalema loyi a nga vula marito ya ndzimana ya namuntlha. Yehovha a nga pfuna vahuweleri lavantshwa leswaku va va ni “xivindzi.” Twana ntokoto wa makwerhu wa xisati Tomoyo. Loko a sungula ku chumayela hi yindlu ni yindlu, munhu wo sungula loyi a n’wi kumeke u n’wi holovele a ku: “A ndzi lavi ku twa nchumu hi Timbhoni ta Yehovha!” kutani a pfala rivanti. Hi xivindzi Tomoyo u byele loyi a a famba na yena a ku: “U swi vonile? A ndzi kalanga ndzi vula nchumu kambe u swi vonile leswaku ndzi Mbhoni ya Yehovha. Ndzi tsake ngopfu!” Sweswi hi vulavulaka, Tomoyo i phayona. w20.09 6 ¶13-14

Asa u byele vanhu leswaku i Yehovha loyi “a a [va] wisisile.” (2 Tikr. 14:6, 7) Asa a a nga teki nkarhi wolowo wa ku rhula tanihi nkarhi wa ku tiketla. U sungule ku aka miti, makhumbi, swihondzo ni tigede. U byele vanhu va le Yuda a ku: “Hi nyikiwe tiko.” Xana Asa a vula yini? A a vula leswaku vanhu a va ta kota ku fambafamba va tshunxekile etikweni leri Xikwembu xi va nyikeke rona ni ku aka handle ko siveriwa hi valala. U lemukise vanhu leswaku va wu tirhisa hi vutlhari nkarhi wolowo wa ku rhula. Asa u wu tirhise hi vutlhari nkarhi wa ku rhula leswaku a hlomisa masocha yakwe. (2 Tikr. 14:8) Xana leswi swi vula leswaku a a nga n’wi tshembi Yehovha? Doo! Asa a a swi tiva leswaku a ku ri vutihlamuleri bya yena tanihi hosi ku letela vanhu leswaku va tshama va lunghekele ku lwa ni valala. Asa a a swi tiva leswaku ku rhula loku tiko ra Yuda a ri ri na kona, a ku nga ta tshama hilaha ku nga heriki naswona sweswo swi endlekile. w20.09 15 ¶4-5

Leswi nkulu a rhandzaka vamakwavo, a nga sungula ku veka milawu evandlheni hi xikongomelo xo sirhelela tinyimpfu ta Xikwembu. Ku ni ku hambana lokukulu exikarhi ka vulawuri lebyi tinhloko ta mindyangu ti nga na byona ni lebyi vakulu va nga na byona. Hi xikombiso, Yehovha u nyike vakulu vutihlamuleri byo va vaavanyisi ni byo susa vadyohi lava nga hundzukiki evandlheni. (1 Kor. 5:11-13) Hi hala tlhelo, Yehovha u nyike tinhloko ta mindyangu vulawuri byo karhi lebyi a nga va nyikangiki vakulu. Hi xikombiso, u nyike tinhloko ta mindyangu vulawuri byo vekela mindyangu ya tona milawu ni ku tiyiseka leswaku milawu yoleyo ya landzeriwa. (Rhom. 7:2) Nhloko ya ndyangu yi ni mfanelo yo vekela vana va yona nkarhi wo vuya ekaya nimadyambu. Nakambe yi ni mfanelo yo va tshinya loko va nga yi yingisi milawu yoleyo. (Efe. 6:1) Loko nhloko ya ndyangu yi veka milawu yoloye, yi sungula hi ku burisana ni nsati hikuva havumbirhi bya vona i “nyama yin’we.”—Mat. 19:6. w21.02 16-18 ¶10-13

Xivangelo xin’wana lexi endlaka ntiyiso lowu nga eBibeleni wu va wa risima, hi leswi Yehovha a wu paluxelaka vanhu lava titsongahataka lava lavaka ku kuma “vutomi lebyi nga heriki.” (Mit. 13:48) Vanhu volavo va amukela ndlela leyi Yehovha a hi dyondzisaka ntiyiso wolowo hayona namuntlha. (Mat. 11:25; 24:45) A hi nge swi koti ku tidyondzisa ntiyiso lowu wa risima. (Swiv. 3:13) Yehovha u tlhele a hi nyika vutihlamuleri byo dyondzisa van’wana ntiyiso mayelana na yena ni hi swikongomelo swakwe. (Mat. 24:14) Rungula leri hi ri chumayelaka i ra risima hikuva ri pfuna vanhu leswaku va va xiphemu xa ndyangu wa Yehovha ni ku va nyika ntshembo wo kuma vutomi lebyi nga heriki. (1 Tim. 4:16) Swi nga ri na mhaka leswaku hi heta nkarhi wo tanihi kwihi hi ri eku chumayeleni, xa nkoka hi leswaku hi va hi endla ntirho wa risima ku tlula mitirho hinkwayo. (1 Tim. 2:3, 4) Mayana nkateko wonghasi wo va vatirhikulorhi ni Xikwembu!—1 Kor. 3:9. w20.09 26-27 ¶4-5

Loko muapostola Pawulo a ri eriendzweni rakwe ro ya eRhoma, Yehovha u n’wi pfunile hi ku tirhisa vapfumerikulobye. Hi xikombiso, Aristako na Luka, lava a va ri vatirhikulobye va Pawulo, va fambe na yena loko a ya eRhoma. Va hoxe vutomi bya vona ekhombyeni leswaku va famba na Pawulo hambileswi Yesu a a nga va byelanga leswaku va ta fika va hlayisekile eRhoma. Va swi twe loko va ri exikepeni lexi a xi hlaseriwa hi xidzedze leswaku a va ta fika va hlayisekile. Loko va fika ehlalukweni ra le Sidoni, Yuliyo u pfumelele Pawulo leswaku ‘a ya eka vanghana vakwe va ya n’wi khathalela.’ (Mit. 27:1-3) Loko Pawulo ni vatirhikulobye va fika ePuteyoli, ‘va fike va kuma vamakwavo kutani va kombele ku tshama na vona masiku ya nkombo.’ A swi kanakanisi leswaku loko Vakreste va le tindhawini teto va ri karhi va khathalela Pawulo ni vatirhikulobye, Pawulo u va khutazile swinene.—Ringanisa na Mitirho 15:2, 3. w20.11 15-16 ¶15-17

Mutswari komba vana va wena hi marito ni hi swiendlo leswaku u rhandza Yehovha hi mbilu hinkwayo. Tsundzuka leswaku nyiko ya risima leyi u nga va nyikaka yona i ku va dyondzisa ku rhandza Yehovha. Yin’wana ya tidyondzo ta nkoka leti u nga va dyondzisaka tona i ku va dyondzisa ku hlaya Bibele, ku khongela, ku va kona etinhlengeletanweni ta vandlha ni ku va kona ensin’wini nkarhi ni nkarhi. (1 Tim. 6:6) U fanele u tlhela u va wundla. (1 Tim. 5:8) Tsundzuka leswaku vuxaka lebyi vana va wena va nga na byona na Yehovha hi byona lebyi nga ta endla leswaku va pona loko ku lovisiwa misava leyi, rifuwo a ri nge va pfuni hi nchumu. ( Ezek. 7:19) Hakunene swa tsakisa ku vona vatswari vo tala lava nga Vakreste va pfuna vana va vona leswaku va va ni vuxaka ni Xikwembu. Vana lava kuleleke emindyangwini yo tano va ya emahlweni va tirhisa leswi va swi dyondzeke niloko se va kurile naswona a va tisoli nikatsongo!—Swiv. 10:22. w20.10 28-29 ¶10-11

Siku rin’wana, muapostola Petro vule swilo leswi a ta tisola hi swona. Hi xikombiso, loko Yesu a byele vaapostola vakwe leswaku a a ta xanisiwa a tlhela a dlayiwa, Petro u n’wi tshinyile hi ku vula marito lama nga laha henhla. (Mat. 16:21-23) Kambe Yesu u n’wi tshinyile. Loko ntshungu wu ta leswaku wu ta khoma Yesu, hi magugu Petro u humese banga a tsema ndleve ya nandza wa muprista lonkulu. (Yoh. 18:10, 11) Yesu u tlhele a tshinya muapostola yoloye. Ku engetela kwalaho, leswi Petro a a titshemba ku tlula mpimo u vule leswaku hambiloko vaapostola lavan’wana vo baleka, yena a nge n’wi siyi! (Mat. 26:33) Kambe hikwalaho ko chava vanhu, ku titshemba koloko a ku tlhaveriwanga hi dyambu Petro u landzule N’wini wakwe kanharhu. Petro u hele matimba swinene kutani “a humela ehandle, a fika a rila hi xiviti.” (Mat. 26:69-75) U fanele a tivutisile loko Yesu a ta n’wi rivalela. Petro a nga ku pfumelelanga ku hela matimba ku n’wi tshikisa ku tirhela Yehovha. Endzhaku ka xihoxo xexo, u ye emahlweni a tirhela Yehovha, naswona hi ku famba ka nkarhi hi twa hi ta yena a a ri ni vaapostola lavan’wana.—Yoh. 21:1-3; Mit. 1:15, 16. w20.12 20 ¶17-18

Nhloko ya ndyangu yi nga kombisa leswaku ya titsongahata hi tindlela to tala. Hi xikombiso, a yi nge languteli leswaku nsati ni vana va yona va endla swilo hi ndlela leyi hetisekeke. Yi yingisela mavonelo ya ndyangu wa yona hambiloko wu nga pfumelelani na yona. Ku engetela kwalaho, nuna loyi a titsongahataka wa pfuneta hi mitirho ya le kaya hambiloko vanhu va teka mitirho yoleyo yi ri ya va ka manana. Kambe a swi olovi ku endla tano. Hikwalahokayini? Makwerhu wa xisati Rachel u ri: “Laha ndzi tshamaka kona, loko nuna a pfuna nsati wakwe ku hlantswa swibya kumbe hi ku kukula ekaya, vaakelani ni maxaka yakwe ma vula leswaku u dyisiwile. Va ehleketa leswaku u chava nsati wakwe.” Loko ku ri leswaku swi tano ni laha u tshamaka kona, tsundzuka leswaku Yesu u hlambise vadyondzisiwa vakwe milenge hambileswi ntirho wolowo a wu tekiwa wu ri wa mahlonga. Nhloko leyinene ya ndyangu a yi lavi ku titsakisa kambe yi lava leswaku ndyangu wa yona wu tshama wu tsakile. w21.02 2 ¶3; 4 ¶11

Ku tsundzuka mikarhi ya khale yo tsakisa, i nyiko leyi humaka eka Yehovha; kambe ntsako lowu hi nga ta wu kuma emisaveni leyintshwa enkarhini lowu taka a wu nge pimanisiwi na nchumu. Vanhu van’wana va ta hi twisa ku vava kambe loko hi tshika xikhomela kutani hi va rivalela, hi ta kota ku ya emahlweni hi tirhela Yehovha hi tsakile. Ku titwa nandzu ku tlula mpimo, ku nga endla hi tirhela Yehovha hi nga tsakanga. Kambe, ku fana na muapostola Pawulo, hi fanele hi tiyiseka leswaku Yehovha u hi rivalerile. (1 Tim. 1:12-15) Hi ni ntshembo wo hanya hilaha ku nga heriki. Emisaveni leyintshwa ya Xikwembu, a hi nge vileli hikwalaho ka swilo leswi hi swi endleke khale. Loko Bibele yi vulavula hi nkarhi wolowo yi ri: “Swilo swa khale swi ta rivariwa.” (Esa. 65:17) Ehleketa hi mhaka leyi: Van’wana va hina se i khale hi tirhela Yehovha naswona se ti dya tiya emagoveni kambe emisaveni leyintshwa hi ta tlhela hi va ni matimba. (Yobo 33:25) Hikwalaho, a hi tiyimiseleni ku tshika ku tshamela ku ehleketa hi swilo swa khale. Kurinasweswo, a hi tshameni hi langutele vumundzuku. w20.11 24 ¶4; 29 ¶18-19

I yini leswi nga ta endleka enkarhini lowu taka? Hi nkarhi wa nhlomulo lowukulu, Yehovha u ta hi ponisa hi ku tirhisa tindlela timbirhi. Yo sungula, u ta ponisa malandza yakwe yo tshembeka hi nkarhi lowu a nga ta endla leswaku tihosi ta misava ti lovisa Babilona Lonkulu, ku nga mana wa vukhongeri hinkwabyo bya mavunwa. (Nhlav. 17:16-18; 18:2, 4) Ya vumbirhi, u ta ponisa vanhu vakwe loko a lovisa xiphemu xo hetelela xa misava leyi lawuriwaka hi Sathana eArmagedoni. (Nhlav. 16:14, 16) Loko hi tshama hi ri ni vuxaka lebyinene na Yehovha, Sathana a nge swi koti ku hi vavisa hilaha ku nga heriki. Kambe hi yena loyi a nga ta loviseriwa makumu. (Rhom. 16:20) Hikwalaho, tshama u ambale swiambalo hinkwaswo swa nyimpi swo tisirhelela, u nga swi hluvuli! U nga ringeti ku lwa nyimpi u ri wexe. Seketela vamakwenu. Nakambe, landzela nkongomiso lowu Yehovha a ku nyikaka wona. Loko u endla tano, Tata wa wena wa le tilweni u ta ku tiyisa a tlhela a ku sirhelela.—Esa. 41:10. w21.03 30 ¶16-17

Hi nga swi kombisa njhani leswaku hi tshemba Yehovha? Hi ku landzela nkongomiso lowu a hi nyikaka wona. Bibele yi ni rungula ro tala leri kombisaka ndlela leyi swi nga swa nkoka hayona ku va vanhu vo rhula ni ku tshemba Yehovha. Loko u ri karhi u dyondza rungula rero, xiya leswi pfuneke malandza ya Xikwembu leswaku ma tshama ma ri ni ku rhula hambiloko ma kanetiwa. Hi xikombiso, loko huvo leyi tlakukeke ya Vayuda yi lerise vaapostola ku tshika ku chumayela, a va khomiwanga hi rhumbyana. Hi xivindzi va te: “Hi fanele hi yingisa Xikwembu tanihi mufumi ku tlula vanhu.” (Mit. 5:29) Hambiloko va bukuteriwa, a va tshikanga ku chumayela. Hikwalahokayini? Hikuva a va swi tiva leswaku Yehovha wa va seketela. A a tinyungubyisa hi vona. Hikwalaho, va ye emahlweni va chumayela mahungu lamanene. (Mit. 5:40-42) Hilaha ku fanaka, loko mudyondzisiwa Stefano a langutane ni rifu, u tshame a rhulile naswona xikandza xakwe a xi vangama ku fana ni “xikandza xa ntsumi.” (Mit. 6:12-15) Hikwalahokayini? A a swi tiva leswaku Yehovha wa tinyungubyisa hi yena. w21.01 4 ¶10-11

Leswi swi vula leswaku wu ni ripfalo leri baseke naswona Yehovha wa wu amukela. (Esa. 1:18) Lava ntshungu lowukulu va tinyiketerile, i Vakreste lava khuvuriweke lava nga ni ripfumelo eka gandzelo ra Yesu naswona va ni vuxaka lebyinene na Yehovha. (Yoh. 3:36; 1 Pet. 3:21) Hikwalaho, va faneleka ku yima emahlweni ka xiluvelo xa Xikwembu va xi endlela “ntirho wo kwetsima vusiku ni nhlikanhi” laha misaveni. (Nhlav. 7:15) Hambi ku ri sweswi, va hoxa xandla swinene entirhweni wo chumayela ni ku endla vadyondzisiwa naswona va rhangisa Mfumo wa Xikwembu evuton’wini bya vona ku tlula swilo hinkwaswo. (Mat. 6:33; 24:14; 28:19, 20) Lava ntshungu lowukulu lava nga ta pona nhlomulo lowukulu va tiyiseka leswaku Xikwembu xi ta va khathalela hikuva “Loyi a tshameke exiluvelweni u ta vamba tende rakwe leswaku va va ehansi ka rona.” Xitshembiso lexi lava tinyimpfu tin’wana va xi languteleke hi mahlongati xi ta hetiseka: “[Xikwembu] xi ta sula mihloti hinkwayo ematihlweni ya vona.”—Nhlav. 21:3, 4. w21.01 16 ¶9-10

Ha tsaka leswi hi nga xiphemu xa ndyangu wa Yehovha naswona hinkwerhu hi xiximaka vanhu lava Yehovha a va nyikeke vulawuri endyangwini wakwe. Bibele yi kombisa leswaku Yehovha u teka vavasati va ri va nkoka ku fana ni vavanuna. Hi xikombiso, yi kombisa leswaku enkarhini wa vaapostola, Yehovha u nyike vavasati swin’we ni vavanuna moya wo kwetsima leswaku va kota ku endla masingita, yo tanihi ku vulavula tindzimi to hambanahambana. (Mit. 2:1-4, 15-18) Hinkwavo va hlawuriwe hi moya wo kwetsima leswaku va ta ya fuma na Kreste. (Gal. 3:26-29) Vavanuna ni vavasati va ta kuma vutomi lebyi nga heriki laha misaveni. (Nhlav. 7:9, 10, 13-15) Nakambe, vavanuna ni vavasati va nyikiwe ntirho wo dyondzisa ni wo chumayela mahungu lamanene. (Mat. 28:19, 20) Buku ya Mitirho yi vulavula hi ntirho lowu endliweke hi makwerhu un’wana wa xisati loyi a a vuriwa Prisila ni nuna wakwe Akhwila, lava pfuneke Apolosi loyi a a ri xidyondzeki leswaku a twisisa ntiyiso.—Mit. 18:24-26. w21.02 14 ¶1; 15 ¶4

Vakulu, mi ni vutihlamuleri lebyikulu byo pfuna vahuweleri va va vachumayeri lava nga ni vutshila nileswaku va va vadyondzisi lavanene. Loko makwerhu a ku kombela leswaku u dyondzisa xichudeni xakwe hileswi a chavaka ku xi dyondzisa loko a ri na wena, xi dyondzise. Vakulu va ta endla matshalatshala yo khutaza ni ku pfuna vamakwerhu leswaku va kota ku tiyisela. (1 Tes. 5:11) Hambiloko sweswi hi nga ri na xona xichudeni xa Bibele kambe hi nga swi kota ku pfuna van’wana va khuvuriwa. Hambileswi ku nga riki hina hi dyondzisaka kambe loko hi lunghiselele kahle hi ta swi kota ku seketela n’wini wa xichudeni hi nkarhi wa dyondzo. A hi veni vanghana va swichudeni loko swi ta eHolweni, hi tlhela hi swi vekela xikombiso lexinene. Vakulu, khutazani swichudeni hi ku tinyika nkarhi wo vulavula na swona, mi tlhela mi tiyisa vadyondzisi va swona hi ku va bumabumela ni ku va letela. Mawaku ku tsakisa ka swona, ku tiva leswaku hinkwerhu hi nga hoxa xandla eku pfuneni ka xichudeni leswaku xi rhandza ni ku tirhela Tata wa hina Yehovha! w21.03 13 ¶18-19

Davhida a a tshembeka naswona loko a nyikiwe ntirho a a wu endla. Hi xikombiso, loko a ha ri jaha a a khathala ngopfu hi tinyimpfu ta tata wakwe. Ntirho wolowo a wu ri ni khombo. Davhida u tshame a byela Hosi Sawulo a ku: “Nandza wa wena a a risa tinyimpfu ta tata wakwe, hiloko ku ta nghala ni bere, ha xin’we xi fika xi teka nyimpfu entlhambini. Hiloko ndzi yi hlongorisa ndzi yi ba yi wela ehansi, ndzi namurhuta nyimpfu leyi a yi ri enon’wini wa yona.” (1 Sam. 17:34, 35) Davhida a a byi teka byi ri bya nkoka vutihlamuleri byakwe byo khathalela tinyimpfu. Majaha ma nga tekelela Davhida hi ku endla mitirho leyi ma nyikiwaka yona. Loko Davhida a ha ri ntsongo, a a ri ni vuxaka lebyinene na Yehovha. Vuxaka byebyo a byi ri bya nkoka ku tlula xivindzi lexi Davhida a a ri na xona ni vuswikoti byakwe byo chaya swichayachayana. Yehovha a a ri Xikwembu xa Davhida tlhelo munghana wakwe lonkulu. N’wina majaha, nchumu wa nkoka lowu mi nga wu endlaka i ku tiyisa vuxaka lebyi mi nga na byona ni Tata wa n’wina wa le tilweni. w21.03 3 ¶4-5