May

Loko Yesu a ha ri ntsongo, u endle xiboho xo yingisa vatswari vakwe. A nga tshikanga ku va yingisa hi ku tibyela leswaku u tiva swo tala ku va tlula. Leswi a ri mativula u byi hetisise kahle vutihlamuleri byakwe. U dyondze ntirho eka tata wakwe leswaku a ta kota ku khathalela ndyangu wa ka vona. Swi nga endleka vatswari vakwe va n’wi byele hi ta ndlela ya singita leyi a velekiweke hayona ni leswi tintsumi ti va byeleke swona. (Luka 2:8-19, 25-38) Yesu a nga yingisanga leswi a byeriweke swona ntsena; u tlhele a tihlayela ni Matsalwa. Hi swi tiva njhani leswaku Yesu a a rhandza ku hlaya Rito ra Xikwembu? Loko a ha ri xifanyetana, vadyondzisi va le Yerusalema a va tshamela ku hlamala “hikwalaho ka ku twisisa kakwe ni tinhlamulo takwe.” (Luka 2:46, 47) Loko a ri ni malembe ya 12, se a swi tiva leswaku Yehovha i Tata wakwe.—Luka 2:42, 43, 49. w20.10 29-30 ¶13-14

Ku pfuxiwa ka Yesu hi swona leswi endlaka hi kholwa leswaku ntshembo wa ku pfuxiwa ka vafi i wa xiviri. Loko Pawulo a sungula bulo rakwe ra ku pfuxiwa ka vafi, u boxe swilo swinharhu swa nkoka. Hi leswi swilo swa kona (1) “Kreste u fele swidyoho swa hina.” (2) U “lahliwile.” (3) U “pfuxiwile hi siku ra vunharhu hi ku ya hi Matsalwa.” (1 Kor. 15:3, 4) Xana rifu ra Yesu ni ku lahliwa kakwe swin’we ni ku pfuxiwa kakwe swi vula yini eka hina? Muprofeta Esaya u profete leswaku Mesiya a a ta ‘dlayiwa etikweni ra lava hanyaka’ kutani a ‘lahliwa ni lavo homboloka.’ A hi sweswo ntsena. U tlhele a vula leswaku Mesiya a a ta rhwala “swidyoho swa vanhu vo tala.” Yesu u endle tano hi ku nyikela hi vutomi byakwe leswaku a kutsula vanhu. (Esa. 53:8, 9, 12; Mat. 20:28; Rhom. 5:8) Hikwalaho, rifu, ku lahliwa ni ku pfuxiwa ka Yesu, swi endla hi tiyiseka hi ntshembo lowu hi nga na wona wa ku kutsuriwa eka xidyoho ni rifu ni wa ku pfuxiwa ka maxaka ya hina lama feke. w20.12 2-3 ¶4-6; 5 ¶11

Muapostola Pawulo a a chumayela emasinagogeni ya Vayuda. Hi xikombiso, esinagogeni ya le Tesalonika, u hete “tisavata tinharhu a ri karhi a kanerisana [ni Vayuda] hi Matsalwa.” (Mit. 17:1, 2) Pawulo a a titwa a ntshunxekile loko a ri esinagogeni. Phela a a ri Muyuda. (Mit. 26:4, 5) Leswi Vayuda lava Pawulo a va chumayela a va twisisa leswi a swi vula, swi endle leswaku a va chumayela a ntshunxekile. (Filp. 3:5) Loko Pawulo a baleka vaxanisi eTesalonika ni le Beriya, u ye eAtena. U tlhele “a sungula ku kanerisana ni Vayuda ni vanhu van’wana lava a va gandzela Xikwembu esinagogeni.” (Mit. 17:17) Kambe vanhu lava Pawulo a va chumayela endhawini ya vuxaviselo, a va hambanile ni lava a va chumayela esinagogeni. Exikarhi ka vayingiseri vakwe, a ku ri ni vativi va filosofi ni vanhu Vamatiko, lava a va teka rungula ra Pawulo tanihi ‘dyondzo leyintshwa.’ Va n’wi byele leswi: “U vulavula hi swilo leswi hi nga si tshamaka hi swi twa.”—Mit. 17:18-20. w20.04 9 ¶5-6

U nga titeki u nga pfuni nchumu loko swi pfa swi ku tikela ku endla swilo leswinene. Tsundzuka, hinkwerhu ha swi endla swihoxo. Hi kota ku va ni vuxaka lebyinene ni Xikwembu hikwalaho ka tintswalo leti xi hi kombeke tona hi ku tirhisa nkutsulo. (Efe. 1:7; 1 Yoh. 4:10) Vamakwerhu va ta hi pfuna loko hi titwa hi hele matimba! Va ta hi yingisela loko hi ri karhi hi tiphofula va tlhela va hi chavelela. (Swiv. 12:25; 1 Tes. 5:14) Joy, ku nga makwerhu un’wana wa xisati wa le Nigeria loyi a hele matimba, u ri: “A ndzi ta va mani handle ka vamakwerhu? Yehovha u hlamule swikhongelo swa mina hi ku tirhisa vamakwerhu. Va ndzi dyondzise ni ku chavelela van’wana lava heleke matimba.” Kambe hi fanele hi tsundzuka leswaku a hi mikarhi hinkwayo vamakwerhu va nga ta swi vona loko hi lava ku chaveleriwa. Hikwalaho, hi fanele hi ya eka vona kutani hi va byela leswi hi karhataka, va ta hi pfuna. w20.12 23-24 ¶7-8

Hi ntolovelo, goza ro sungula leri u ri tekaka loko u lava ku endla xinghana ni munhu un’wana, i ku heta nkarhi na yena. Loko mi ri karhi mi burisana, mi vonisana hi leti ni letiya, mi va vanghana. Hambiswiritano, hi langutana ni mitlhontlho loko hi lava ku endla xinghana na Yesu. Wun’wana wa mitlhontlho ya kona hileswaku a hi si tshama hi vona Yesu. Vakreste vo tala va le nkarhini wa vaapostola na vona a va langutane ni ntlhontlho lowu fanaka. Nilokoswiritano, muapostola Petro u te: “Hambileswi mi nga si tshamaka mi n’wi vona, ma n’wi rhandza. Hambileswi mi nga n’wi voniki sweswi, ma pfumela eka yena.” (1 Pet. 1:8) Swa koteka ku endla xinghana na Yesu hambiloko hi nga si tshama hi n’wi vona. Nakambe ntlhontlho wun’wana hileswaku a hi swi koti ku vulavula na Yesu. Loko hi khongela, hi va hi vulavula na Yehovha. I ntiyiso leswaku loko hi khongela hi tirhisa vito ra Yesu kambe hi va hi nga vulavuli na yena. Entiyisweni, Yesu a nga lavi hi khongela eka yena. Hikwalahokayini? Hikuva xikhongelo i xiphemu xa ku gandzela naswona i Yehovha ntsena loyi a faneleke a gandzeriwa. (Mat. 4:10) Hambiswiritano, hi nga swi kota ku kombisa leswaku hi rhandza Yesu. w20.04 20 ¶1-3

Switsutsumi eka mitlangu ya Magriki, a swi fanele swi hlula mitlhontlho yo fana ni ku karhala ni switlhavi. Kambe a swi titshege ntsena hi ku tiletela ni matimba ya swona. Ku fana ni switsutsumi sweswo, na hina hi leteriwa ndlela leyi hi faneleke hi tsutsuma hayona emphikizanweni lowu hi nga eka wona. Kambe hi hambanile ni switsutsumi sweswo. Hi kuma matimba eka xihlovo xa matimba lama nga heriki. Loko hi titshega hi Yehovha, u hi tshembisa leswaku u ta hi letela ni ku hi nyika matimba! Muapostola Pawulo a a langutane ni mitlhontlho yo tala. Ku engetela eka ku tseketseriwa ni ku xanisiwa, mikarhi yin’wana a a titwa a tsanile naswona a fanele a tiyisela leswi a swi vuleke “mutwa enyameni.” (2 Kor. 12:7) Kambe ematshan’weni yo teka mitlhontlho yoleyo ku ri xivangelo xo tshika ku tirhela Yehovha, u yi teke yi ri nkarhi wa leswaku a titshega hi Yehovha. (2 Kor. 12:9, 10) Leswi Pawulo a a ri ni langutelo leri, Yehovha u n’wi pfunile eka maxangu yakwe hinkwawo. w20.04 29 ¶13-14

Xuma xin’wana lexi nga vonakiki lexi hi nga na xona, i ku ‘tirha’ na Yehovha swin’we ni xiphemu xa nhlangano wakwe wa le tilweni. (2 Kor. 6:1) Hi endla tano loko hi endla ntirho wo endla vadyondzisiwa. Loko Pawulo a vulavula hi lava endlaka ntirho lowu ku katsa na yena u te: “Hi [vatirhikulorhi] ni Xikwembu.” (1 Kor. 3:9) Nakambe loko hi va kona ensin’wini, hi kombisa leswaku hi vatirhikulorhi na Yesu. Tsundzuka, endzhaku ka loko Yesu a lerise valandzeri vakwe ku “endla vanhu va matiko hinkwawo va va vadyondzisiwa,” u te: “Ndzi na n’wina.” (Mat. 28:19, 20) Ku vuriwa yini hi tintsumi? Tintsumi ta hi kongomisa loko hi ri karhi hi twarisa “mahungu lamanene lama nga heriki . . . eka lava tshamaka emisaveni”! (Nhlav. 14:6) I yini leswi hi kotaka ku swi fikelela hikwalaho ka nseketelo lowu hi wu kumaka etilweni? Loko hi ri karhi hi haxa rungula ra Mfumo, timbewu tin’wana ti wela etimbilwini letinene kutani ti kula ti tlhela ti veka mihandzu. (Mat. 13:18, 23) I mani loyi a endleka leswaku timbewu teto ti kula ti tlhela ti veka mihandzu? Yesu u yi hlamusele kahle mhaka leyi eka ndzimana ya siku ra namuntlha. w20.05 30 ¶14-15

Mindyangu yo tala yi hahlukile hikwalaho ko dlaya vukati. Hambi ku ri mindyangu leyi tshamaka endlwini yin’we, a yi na wona nkarhi wo dzumba swin’we. Mutsundzuxi un’wana wa mindyangu u ri: “Manana, tatana ni vana a va na nkarhi wo hungasa swin’we kambe va tihungasa hi khompyuta, tablet, selfoni kumbe video game. Hambileswi va tshamaka endlwini yin’we, a va tivani kahle.” A hi swi lavi ku ngheniwa hi moya wa misava leyi wo pfumala rirhandzu. Kurinasweswo, hi lava ku va ni xinakulobye lexikulu eka mindyangu ya hina swin’we ni le ka vamakwerhu evandlheni. (Rhom. 12:10) I yini xinakulobye lexikulu? Xiga lexi xi kombetela eka vunghana lebyi swirho swa ndyangu swi nga na byona. Leri hi rona rirhandzu leri hi faneleke hi va rhandza ha rona vamakwerhu evandlheni. Loko hi komba van’wana xinakulobye lexikulu, swi ta endla leswaku hi tirhela Yehovha hi tsakile naswona ku ta va ni vun’we evandlheni.—Mik. 2:12. w21.01 20 ¶1-2

Xipano lexi vatlangi va xona va nga ni vun’we xi ta hlula. Mbilu ya wena yi nga fana ni xipano xexo, loko ndlela leyi u titwaka hayona, swilo leswi u swi ehleketaka ni leswi u swi navelaka, swi fambisana ni ku gandzela Yehovha. Tsundzuka, Sathana a nga swi lavi leswaku mbilu ya wena yi va ni vun’we. U lava leswaku ndlela leyi u titwaka hayona, miehleketo ni ku navela ka wena swi lwisana ni milawu ya Yehovha. Hambiswiritano, leswaku u kota ku tirhela Yehovha, u fanele u endla mbilu ya wena yi va ni vun’we. (Mat. 22:36-38) U nga n’wi pfumeleli Sathana a ava mbilu ya wena! Khongela eka Yehovha u ku: “Endla mbilu ya mina yi va ni vun’we leswaku yi chava vito ra wena.” Hanya hi ku pfumelelana ni xikhongelo xexo. Siku ni siku, tiyiseka leswaku swiboho leswi u swi endlaka, leswikulu ni leswitsongo, swi kombisa leswaku u xixima vito ra Yehovha leri kwetsimaka. Loko u endla tano, u ta ri yimela kahle vito rero tanihi leswi u nga Mbhoni ya Yehovha. (Swiv. 27:11) Hinkwerhu, hi ta vula marito lama vuriweke hi muprofeta Mikiya lama nge: “Hi ta famba hi vito ra Yehovha Xikwembu xa hina hilaha ku nga riki na makumu, hi masiku.”—Mik. 4:5. w20.06 13 ¶17-18

Loko hosi ya le n’walungwini swin’we ni mifumo leyin’wana ya misava yi hlasela vanhu va Xikwembu, sweswo swi ta hlundzukisa Lowa Matimba Hinkwawo kutani ku ta sungula nyimpi ya Armagedoni. (Nhlav. 16:14, 16) Hi nkarhi wolowo, hosi ya le n’walungwini swin’we ni matiko hinkwawo lama vumbaka Gogo wa Magogo, ma ta lovisiwa naswona “a yi nge lamuleriwi.” (Dan. 11:45) Ndzimana leyi landzelaka eka rungula ra Daniyele, yi hi nyika vuxokoxoko bya ndlela leyi hosi ya le n’walungwini ni mifumo leyi tirhisanaka na yona yi nga ta lovisiwa hayona ni ndlela leyi hi nga ta ponisiwa hayona. (Dan. 12:1) Ndzimana leyi yi vula yini? Mikayele i vito rin’wana ra Hosi ya hina leyi fumaka, Kreste Yesu. U ‘yimele’ vanhu va Xikwembu ku sukela hi 1914 loko Mfumo wakwe wu simekiwa etilweni. Ku nga ri khale, u ta ‘yima’ kumbe a teka goza ro lovisa valala vakwe enyimpini ya Armagedoni. Nyimpi yoleyo yi ta va xiendlakalo xo hetelela eka leswi Daniyele a swi vitanaka “nkarhi wa maxangu” lamakulu ematin’wini.—Nhlav. 6:2; 7:14. w20.05 15-16 ¶15-17

Loko Yosefa a ha ri hlonga niloko a ri ejele, a ku nga ri na lexi a ta xi endla ni laha a ta ya kona. I yini lexi n’wi pfuneke leswaku a tshama a ri ni langutelo lerinene? Ematshan’weni yo ehleketa hi swilo leswi a a nga ta kota ku swi endla, u dzikise mianakanyo yakwe eka ntirho lowu a nyikiweke wona. Xa nkoka swinene, Yosefa a a rhangisa Yehovha eka hinkwaswo evuton’wini byakwe. Hikwalaho, Yehovha u katekise hinkwaswo leswi Yosefa a a swi endla. (Gen. 39:21-23) Misava leyi hi hanyaka eka yona yi bihile swinene naswona vanhu va nga hi khoma hi ndlela ya tihanyi. Hambi ku ri vamakwerhu va nga hi khoma hi ndlela yo biha. Kambe loko hi teka Yehovha tanihi Ribye ra hina kumbe Vutumbelo bya hina, a hi nge heli matimba ku tlula mpimo kumbe hi tshika ku n’wi tirhela. (Ps. 62:6, 7; 1 Pet. 5:10) Tsundzuka, Yosefa a a ri ni malembe ya kwalomu ka 17 loko Yehovha a n’wi komba milorho. Swi le rivaleni leswaku Yehovha wa ma tshemba malandza yakwe lama ha riki vantshwa. Namuntlha, vantshwa vo tala va fana na Yosefa. Na vona va ni ripfumelo eka Yehovha. Van’wana va vona va pfaleriwe ejele hikwalaho ka ripfumelo ra vona eka Xikwembu.—Ps. 110:3. w20.12 16 ¶3; 17 ¶5, 7

Muapostola Petro na Yohane, va swi teke ku ri nkateko ku xanisiwa hikwalaho ko landzela Yesu ni ku dyondzisa ha yena. (Mit. 4:18-21; 5:27-29, 41-42) Vadyondzisiwa a va nga khomiwi hi tingana nikatsongo. Hi ku famba ka nkarhi, Vakreste volavo lava titsongahataka va pfune vanhu vo tala swinene ku tlula vakaneti va vona. Hi xikombiso, tibuku leti huhuteriweke leti tsariweke hi van’wana va Vakreste volavo, ta ha ya emahlweni ti pfuna vanhu va timiliyoni namuntlha. Mfumo lowu ti vulavulaka ha wona wu fuma etilweni sweswi kambe ku nga ri khale wu ta fuma vanhu hinkwavo. (Mat. 24:14) Ku hambana ni sweswo, mfumo wa Rhoma lowu xaniseke Vakreste volavo, a wa ha lorhiwi ni ku lorhiwa, kasi loko ku ri vadyondzisiwa volavo vo tshembeka, sweswi hi vulavulaka i tihosi etilweni. Kambe, vakaneti va vona va file naswona loko vo pfuxiwa, va ta va ehansi ka Mfumo lowu Vakreste volavo lava a va va venga a va chumayela ha wona.—Nhlav. 5:10. w20.07 15 ¶4

Abrahama a swi tshemba hi ku helela switshembiso swa Xikwembu, a swi fana ni loko a vona Mutotiwa kumbe Mesiya loyi a a ta va Hosi ya Mfumo wa Xikwembu. Hi yona mhaka Yesu a byeleke Vayuda va le nkarhini wakwe a ku: “Abrahama tata wa n’wina a a langutele siku leri a ndzi ta ta ha rona hi mahlongati. U ri vonile siku rero kutani a tsaka.” (Yoh. 8:56) Abrahama a a swi tiva leswaku vatukulu vakwe a va ta va xiphemu xa Mfumo lowu a wu ta simekiwa hi Yehovha naswona a swi langutele hi mahlo ngati ku vona ku hetiseka ka xitshembiso xexo. Abrahama u swi kombise njhani leswaku a a rindzele muti kumbe Mfumo lowu simekiweke hi Xikwembu? Xo sungula, Abrahama a nga seketelanga mfumo ni wun’we laha misaveni. Abrahama a a nga tshami endhawini yin’we naswona a ku na hosi ni yin’we leyi a yi seketeleke laha misaveni. Ku engetela kwalaho, Abrahama a nga ringetanga ku tisimekela mfumo. Kurinasweswo, u ye emahlweni a yingisa Yehovha naswona a a rindzele ku vona ku hetiseka ka xitshembiso xakwe. Sweswo a swi kombisa leswaku Abrahama a a ri ni ripfumelo leri tiyeke eka Yehovha. w20.08 3 ¶4-5

Yehovha u tshembisa leswaku a nga kona munhu ni un’we loyi a nga ta va ehansi ka Mfumo wa Kreste loyi a nga ta ku: “Ndza vabya.” (Esa. 33:24) Hikwalaho, lava va nga ta pfuxiwa va ta va va hanye kahle emirini. Kambe a va nge nambi va va lava hetisekeke. Loko a vo pfuka va hetisekile, maxaka ya vona a ma nga ta va tiva. Swi tikomba onge vanhu va ta hetiseka hakatsongotsongo hi nkarhi wa Mfumo wa Kreste wa Gidi ra Malembe. Endzhaku ka malembe ya gidi, Yesu u ta tlherisela Mfumo eka Tata wakwe. Mfumo wa Kreste wu ta va wu hetile ntirho wa wona, ku katsa ni ku endla leswaku vanhu va va lava hetisekeke. (1 Kor. 15:24-28; Nhlav. 20:1-3) Ehleketa hi ntsako lowu u nga ta va na wona loko u tlhela u pfuxelana ni maxaka ya wena. Xana ntsako wolowo wu ta endla leswaku u ba xikhiyana kumbe u khavaxela mihloti? Xana u ta yimbelela tinsimu u dzunisa Yehovha? Handle ko kanakana, u ta ya u n’wi rhandza ngopfu Tata wa wena wa le tilweni swin’we ni N’wana wa yena hikwalaho ka nyiko yo tsakisa, leyi va hi nyikeke yona ya ku pfuxiwa ka vafi. w20.08 16-17 ¶9-10

Muapostola Pawulo u khutazeVakreste leswaku va ehleketisisa hi ku tirhela Yehovha va nga nghenelanga vukati. (1 Kor. 7:8, 9) Pawulo a a nga va tekeli hansi Vakreste lava nga nghenelangiki vukati. U hlawule Timotiya loyi a ri muntshwa naswona a a nga tekanga leswaku a endla ntirho wa nkoka entirhweni wa Yehovha. (Filp. 2:19-22) Swi ta va swi hoxile ku ehleketa leswaku makwerhu wa faneleka kumbe a nga faneleki ku endla ntirho wo karhi hi ku ya hi leswaku u tekile kumbe a nga tekanga. (1 Kor. 7:32-35, 38) Yesu na Pawulo a va vulanga leswaku Vakreste va fanele va nghenela vukati kumbe va nga byi ngheneli. Se i yini leswi hi nga swi vulaka mayelana ni ku nghenela vukati ni ku nga byi ngheneli? Xihondzo xo Rindza xa October 1, 2012, xi ri: “Entiyisweni, [ku nghenela vukati ni ku nga byi ngheneli] swi nga hlamuseriwa tanihi tinyiko leti humaka eka Xikwembu. . . . Yehovha a nga swi teki tanihi leswi khomisaka tingana kumbe gome [ku nga ngheneli vukati].” Hikwalaho, hi fanele hi xixima vamakwerhu lava nga nghenelangiki vukati evandlheni. w20.08 28 ¶8-9

Ematikweni man’wana, vanhu va angula kahle loko va chumayeriwa mahungu lamanene. I khale va lava ku twa mahungu wolawo! Kasi ematikweni man’wana, vanhu a va lavi ku twa nchumu hi Xikwembu kumbe Bibele. Xana vanhu va le ndhawini ya ka n’wina va angula njhani loko va chumayeriwa? Swi nga ri na mhaka leswaku va angula njhani kambe Yehovha u lava hi ya emahlweni hi chumayela ku fikela loko a ku swi ringene. Ntirho wo chumayela wu ta fika emakumu hi nkarhi lowu Yehovha a wu vekeke kutani hi kona “makumu ma nga ta fika.” (Mat. 24:14) Yesu u vulavule hi swiendlakalo ni swiyimo leswi a swi ta kombisa mikarhi ya makumu naswona a swi ta kavanyeta valandzeri vakwe entirhweni wo chumayela. U tsundzuxe vadyondzisiwa vakwe leswaku va ‘tshama va rindzile.’ (Mat. 24:42) Namuntlha, hi langutana ni swikavanyeto swo fana ni leswi endleke leswaku vanhu va le nkarhini wa Nowa va nga ri yingisi rungula ra vuavanyisi leri Nowa a a ri chumayela. (Mat. 24:37-39; 2 Pet. 2:5) Hikwalaho, hi lava ku rhangisa ntirho lowu Yehovha a hi nyikeke wona. w20.09 8 ¶1-2, 4

Sathana u “hlundzukile swinene” naswona hi ta va ho tixisa loko hi tibyela leswaku hi ta swi kota ku balekela ku hlundzuka kakwe lokukulu. (Nhlav. 12:12) Ku nga ri khale, ripfumelo ra hina ri ta ringiwa naswona vanhu va ta weriwa hi “nhlomulo lowukulu lowu nga si tshamaka wu va kona hi mpfhuka misava yi va kona ku fikela sweswi.” (Mat. 24:21) Hi nkarhi wolowo, swi nga endleka swirho swa mindyangu ya hina swi hi jikela ni ntirho wa hina wu yirisiwa. (Mat. 10:35, 36) Xana hi ta tshemba leswaku Yehovha u ta hi pfuna ni ku hi sirhelela hilaha Hosi Asa a endleke hakona? (2 Tikr. 14:11) Yehovha wa hi hlomisa leswaku hi tshama hi vambe ngoma. U kongomisa “nandza wo tshembeka ni wo tlhariha,” leswaku a hi phamela “swakudya [swa moya] hi nkarhi lowu faneleke” leswi endlaka hi kota ku tshama hi ri ni ripfumelo leri tiyeke. (Mat. 24:45) Hinkwerhu hi fanele hi kulula hi n’watseka leswaku hi tiyisa vuxaka bya hina na Yehovha.—Hev. 10:38, 39. w20.09 18 ¶16-18

Yehovha a nga tirhisa moya wakwe lowo kwetsima leswaku a kongomisa valawuri va endla leswi a swi lavaka ntsena loko swi fambisana ni xikongomelo xakwe. Vanhu va nga cela nsele wa mati va ma hambukisa ma ya laha va lavaka leswaku ma ya kona. Hilaha ku fanaka, Yehovha a nga tirhisa moya wakwe leswaku a kongomisa valawuri va endla swilo leswi a swi lavaka. Loko sweswo swi endleka, valawuri va endla swiboho leswi vuyerisaka vanhu va Xikwembu. (Ringanisa na Ezra 7:21, 25, 26.) Xana hi fanele hi endla yini? Loko hi khongela hi fanele hi katsa “tihosi ni hinkwavo lava nga eka swikhundlha leswi tlakukeke” loko va fanele va endla swiboho leswi khumbaka ntirho wa hina wa Vukreste. (1 Tim. 2:1, 2; Neh. 1:11) Ku fana ni Vakreste va le nkarhini wa vaapostola, na hina loko hi khongela hi nga katsa vamakwerhu lava nga emajele.—Mit. 27:3; Hev. 13:3. w20.11 15 ¶13-14

Loko ku ri xichudeni xa wena lexi khuvuriwaka, a swi kanakanisi leswaku wa khapakhapa hi ntsako! (1 Tes. 2:19, 20) Vadyondzisiwa lava ha ku khuvuriwaka i “mapapila ya xibumabumelo” eka lava va va dyondziseke ni le ka vandlha hinkwaro. (2 Kor. 3:1-3) Lexi tsakisaka eka malembe ya mune lama hundzeke, hi xiringaniso ku vikiwe kwalomu ka 10 000 000 wa swichudeni swa Bibele emisaveni hinkwayo n’hweti ni n’hweti. Eka malembe wolawo, hi xiringaniso a ku khuvuriwa vanhu vo tlula 280 000 lembe ni lembe leswaku va va Timbhoni ta Yehovha ni vadyondzisiwa va Yesu Kreste. Hi nga swi pfuna njhani swichudeni sweswo swa timiliyoni leswaku swi khuvuriwa? Loko Yehovha a ha lehisela vanhu mbilu ni ku va nyika nkarhi wo va vadyondzisiwa va Kreste, hi lava ku va pfuna leswaku va khuvuriwa handle ko dya nkarhi. Nkarhi lowu saleke wu komile!—1 Kor. 7:29a; 1 Pet. 4:7. w20.10 6 ¶1-2

Sawulo a nga n’wi yingisanga Yehovha. Loko muprofeta Samuwele a n’wi tsundzuxa hi mhaka yoleyo, Sawulo a nga ti vonanga nandzu. Kurinasweswo, u ringete ku tiyimelela a komba van’wana hi rintiho. (1 Sam. 15:13-24) A ku nga ri ro sungula a endla sweswo. (1 Sam. 13:10-14) Lexi twisaka ku vava, se a a ri ni manyunyu ku tlula mpimo. A nga ma cincanga mahanyelo yakwe, hikwalaho Yehovha u n’wi tshinyile a tlhela a n’wi fularhela. Leswaku hi dyondza eka Sawulo hi fanele hi tivutisa swivutiso leswi landzelaka: ‘Loko ndzi kuma xitsundzuxo eRitweni ra Xikwembu, xana ndza tiyimelela? Xana ndzi tibyela leswaku leswi ndzi swi endlaka a swi bihanga ngopfu? Xana loko ndzi endle swihoxo ndzi komba van’wana hi rintiho?’ Loko nhlamulo ku ri ina, hi fanele hi lulamisa mianakanyo ya hina. Handle ka swona hi nga sungula ku va ni manyunyu lerova Yehovha a hi fularhela. w20.11 20 ¶4-5

Vantshwa hlawulani loyi mi nga ta n’wi tirhela. U fanele u n’wi tiva kahle Yehovha, u tiva xikongomelo xakwe ni ndlela leyi u nga ku endlaka hayona ku rhandza kakwe. (Rhom. 12:2) Kutani u ta kota ku endla xiboho xa nkoka swinene evuton’wini bya wena, ku nga ku tirhela Yehovha. (Yox. 24:15) Loko u hlaya Bibele nkarhi ni nkarhi ni ku tinyika nkarhi wo dyondza, u ta ya u n’wi rhandza swinene Yehovha naswona ripfumelo ra wena ri ta tiya. Rhangisani ku endla ku rhandza ka Yehovha. Namuntlha vanhu va vula leswaku loko u tirhisa vuswikoti bya wena leswaku u tiendlela ndhuma, u ta tsaka. Ku vula ntiyiso, vanhu lava tilavelaka ndhuma ni ku hlongorisa rifuwo va titlhava “hinkwako hi switlhavi swo tala.” (1 Tim. 6:9, 10) Kambe loko u yingisa Yehovha u tlhela u rhangisa ku endla ku rhandza kakwe, swi ta ku fambela kahle evuton’wini naswona “u ta tlhariha.”—Yox. 1:8. w20.10 30-31 ¶17-18

Emikarhini ya vaapostola, rungula leri Yesu a a ri dyondzisa a ri endla leswaku vanhu hinkwavo va va ni ntshembo. U lerise vadyondzisiwa vakwe leswaku va ya emahlweni ni ntirho lowu a wu sunguleke, va chumayela “ku ya fika emakumu ka misava.” (Mit.1:8) A va nga ta swi kota ku endla ntirho wolowo hi matimba ya vona. A va ta lava moya lowo kwetsima, ku nga “mupfuni” loyi Yesu a va tshembiseke yena. (Yoh. 14:26; Zak. 4:6) Valandzeri va Yesu va amukele moya lowo kwetsima hi Pentekosta ya 33 C.E. Hikwalaho ko pfuniwa hi moya wolowo, va sungule ku chumayela naswona hi nkarhi wutsongo vanhu va magidi va amukele mahungu lamanene. (Mit. 2:41; 4:4) Loko vadyondzisiwa va kanetiwa a va tshikanga kambe va kombele mpfuno eka Xikwembu. Va khongerile va ku: “Endla leswaku malandza ya wena ma ya emahlweni ma vulavula rito ra wena hi vurhena lebyikulu.” Va tale hi moya lowo kwetsima kutani “va vula rito ra Xikwembu hi vurhena.”—Mit. 4:18-20, 29, 31. w20.10 21 ¶4-5

I yini lexi endlaka hi tshemba leswaku Yehovha u pfuxe Yesu eku feni? Yesu u voniwe hi vanhu vo tala endzhaku ka loko a pfuxiwile. (1 Kor. 15:5-7) Munhu wo sungula loyi muapostola Pawulo a vulavuleke hi yena loyi a voneke ku pfuxiwa ka Yesu i muapostola Petro (Khefasi). Vadyondzisiwa vo tala va vule leswaku Petro u n’wi vonile Yesu endzhaku ka loko a pfuxiwile. (Luka 24:33, 34) Pawulo u tlhele a vula leswaku “lava 12,” ku nga vaapostola va n’wi vonile Yesu endzhaku ka loko a pfuxiwile. Endzhaku Kreste “u humelele eka vamakwerhu vo tlula 500 hi nkarhi wun’we,” enhlengeletanweni yo tsakisa leyi a yi ri eGaleliya leyi ku vulavuriwaka hayona eka Matewu 28:16-20. U tlhele ‘a humelela ni le ka Yakobo’ makwavo loyi eku sunguleni a a nga pfumeli leswaku Yesu i Mesiya. (Yoh. 7:5) Endzhaku ka loko Yakobo a vone Yesu loyi a pfuxiweke eku feni, u khorwile leswaku hakunene Yesu i Mesiya. Lexi tsakisaka, loko Pawulo a tsala papila leri kwalomu ka 55 C.E. vanhu vo tala lava voneke Yesu endzhaku ka loko a pfuxiwile a va ha hanya kutani vanhu lava a va kanakana mhaka leyi, a va ta titwela hi ta vona eka timbhoni leti n’wi voneke. w20.12 3 ¶5, 7-8

Loko hi nga titwi kahle enyameni kumbe hi ri ni vuvabyi lebyi nga tshungulekiki, swi nga endla hi hela matimba. Kutani hi fanele hi kombela Yehovha leswaku a hi seketela. Hambileswi Yehovha a nga ta ka a nga hi hanyisi hi singita sweswi kambe wa hi chavelela ni ku hi nyika matimba yo kota ku tiyisela. (Ps. 94:19) Hi xikombiso, a nga tirhisa vamakwerhu leswaku va hi pfuna hi mitirho ya le kaya ni swin’wana. A nga endla leswaku vamakwerhu va hi katsa eswikhongelweni swa vona. A nga tlhela a endla leswaku hi tsundzuka marito lama chavelelaka lama kumekaka eRitweni rakwe, yo tanihi lama vulavulaka hi ntshembo wo hanya handle ka mavabyi ni switlhavi emisaveni leyintshwa. (Rhom. 15:4) Hikwalaho hi nga tsandzeka ku endla ntirho wo chumayela hilaha a hi ta lava hakona. Makwerhu wa xisati Laurel u hete malembe ya 37 a ri emuchinini lowu a wu n’wi pfuna leswaku a kota ku hefemula! Hi hala tlhelo a ri ni khensa, a endliwe vuhandzuri byo tala naswona a ri ni vuvabyi bya nhlonge lebyi nga tshungulekiki. Kambe sweswo hinkwaswo a swi n’wi sivelanga ku chumayela. A a chumayela vaongori ni vanhu van’wana lava a va n’wi endzela ekaya naswona u pfune 17 wa vanhu leswaku va tiva ntiyiso lowu Bibele yi wu dyondzisaka! w20.12 24 ¶9; 25 ¶12

Muapostola Pawulo a a lava ku pfuniwa. Kwalomu ka 56 C.E., ntshungu lowu a wu lava ku n’wi dlaya wu n’wi kokele ehandle ka tempele eYerusalema. Hi xamundzuku xa kona, loko Pawulo a yime emahlweni ka Sanedri, a ha twa ku vava swinene hikwalaho ko bukuteriwa hi valala. (Mit. 21:30-32; 22:30; 23:6-10) Hi nkarhi wolowo, Pawulo a nga va a tivutisile, ‘Xana ndzi ta tiyisela ku fikela rini?’ Hi wihi mpfuno lowu Pawulo a wu kumeke? Hi vusiku lebyi landzeleke endzhaku ka loko Pawulo a khomiwile, “Hosi” Yesu u yime etlhelo ka yena kutani a ku: “Vana ni xivindzi! Hikuva hilaha u nyikeleke vumbhoni lebyi heleleke ha mina eYerusalema, u fanele ku ya endla tano ni le Rhoma.” (Mit. 23:11) Sweswo swi n’wi khutazile swinene! Yesu u bumabumele Pawulo hikwalaho ka leswi a nyikeleke vumbhoni eYerusalema. U tlhele a tshembisa Pawulo leswaku u ta fika eRhoma a hlayisekile naswona u ta ya emahlweni a nyikela vumbhoni. Xitshembiso xexo xi endle leswaku Pawulo a titwa ku fana ni n’wana loyi a vukarhiweke hi tata wakwe. w20.11 12 ¶1, 3; 13 ¶4

Ntshembo lowu hi nga na wona wu fana ni “nsoma wa vutomi bya hina,” wa hi tiyisa hambiloko hi langutana ni swiyimo swo tika kumbe loko ku ri na leswi swi hi vilerisaka. Anakanyisisa hi xitshembiso lexi Yehovha a hi tshembisaka xona enkarhini lowu taka laha ku vilela hinkwako ku nga ta va ku nga ha ri kona. (Esa. 65:17) Tivone u ri emisaveni leyintshwa ya ku rhula, laha swilo hinkwaswo leswi hi vilerisaka swi nga ta va swi nga ha ri kona. (Mik. 4:4) Nakambe, ntshembo wa wena wu ta tiya loko u byela van’wana hi wona. Chivirikela ntirho wo chumayela ni wo endla vadyondzisiwa. Loko u endla tano, u ta va ni “ntshembo . . . lowu tiyeke ku ya fika emakumu.” (Hev. 6:11) Leswi makumu ma nga kwala nyongeni, hi ta langutana ni mitlhontlho yo tala leyi nga ta endla leswaku hi vilela. Hi ta kota ku langutana ni mitlhontlho yoleyo hi ndlela yo rhula, ntsena loko hi tshemba Yehovha. Onge hi nga swi kombisa hi swiendlo leswaku ha xi tshemba xitshembiso xa Yehovha lexi nge: “Mi ta va ni matimba loko mi tshamiseka mi tlhela mi ndzi tshemba.”—Esa. 30:15. w21.01 7 ¶17-18

Xiya leswaku Yakobo 5:11 yi vulavula hi xinakulobye lexikulu lexi Yehovha a nga na xona swin’we ni tintswalo leti a nga na tona, ku nga vumunhu byin’wana byo tsakisa lebyi a nga na byona. (Eks. 34:6) Ndlela yin’wana leyi Yehovha a hi kombaka tintswalo hayona i ku hi rivalela loko hi endla swihoxo. (Ps. 51:1) EBibeleni, tintswalo ti katsa swo tala, ku nga ri ku rivalela ntsena. Tintswalo ti katsa ndlela leyi munhu a titwaka hayona loko a vona munhu un’wana a xaniseka kutani a teka goza ro n’wi pfuna. Yehovha u hlamusela ndlela leyi a tiyimiseleke hayona ku hi pfuna tanihi leyi tlulaka ndlela leyi manana loyi a mamisaka a nga n’wi pfunaka hayona n’wana wakwe. (Esa. 49:15) Loko hi langutana ni maxangu, Yehovha wa hi pfuna hikwalaho ka leswi a nga ni tintswalo. (Ps. 37:39; 1 Kor. 10:13) Hi nga komba vamakwerhu tintswalo hi ku va rivalela hi mbilu hinkwayo loko va hi endlele swihoxo. (Efe. 4:32) Ndlela ya nkoka leyi hi nga kombaka vamakwerhu tintswalo hayona, i ku va seketela loko va ri emaxangwini. Loko hi endla tano hi va hi tekelela Yehovha, loyi a nga ni xinakulobye lexikulu swinene.—Efe. 5:1. w21.01 21 ¶5

Nhloko ya ndyangu yi fanele yi ringanisela. A yi fanelanga yi khomeka ngopfu hi ntirho wa ku tihanyisa lerova yi nga ha swi koti ku seketela ndyangu wa yona ni ku wu pfuna wu va ni vuxaka lebyinene na Yehovha yi tlhela yi wu letela. Yehovha u hi letela ni ku hi tshinya hi ndlela ya rirhandzu. (Hev. 12:7-9) Ku fana ni Tata wakwe, Yesu u letela lava nga ehansi ka vulawuri byakwe hi ndlela ya rirhandzu. (Yoh. 15:14, 15) Wa hi tshinya loko swi fanerile kambe u swi endla hi rirhandzu. (Mat. 20:24-28) Wa swi twisisa leswaku hi vadyohi naswona hi tshamela ku endla swihoxo. (Mat. 26:41) Nhloko ya ndyangu leyi tekelelaka Yehovha na Yesu, ya swi tiva leswaku ndyangu wa yona wu ta pfa wu endla swihoxo. A yi va “hlundzukeli ku tlula mpimo” vana ni nsati wa yona loko va endle swihoxo. (Kol. 3:19) Kurinasweswo, yi tirhisa tsalwa ra Vagalatiya 6:1 leswaku yi va tshinya “hi moya wo rhula” naswona yi ri karhi yi swi tsundzuka leswaku na yona ya swi endla swihoxo. Ku fana na Yesu, ya swi xiya leswaku ndlela leyinene yo dyondzisa, i ku veka xikombiso lexinene. w21.02 6-7 ¶16-18

Yehovha u tirhise nkutsulo leswaku a xava vutomi bya vanhu lava nga evandlheni ni bya vanhu hinkwavo lava kombisaka ripfumelo eka Yesu. (Mar. 10:45; Mit. 20:28; 1 Kor. 15:21, 22) Leswi Yesu a nyikeleke hi vutomi byakwe leswaku a hi kutsula, swa fanela leswi Yehovha a hlawuleke yena a va nhloko ya vandlha. Leswi Yesu a nga nhloko, u ni vulawuri byo vekela mindyangu ni vandlha milawu. (Gal. 6:2) A ngo hi vekela milawu ntsena kambe wa hi wundla ni ku hi hlayisa. (Efe. 5:29) Vamakwerhu va xisati va kombisa leswaku va xixima Kreste hi ku yingisa nkongomiso lowu va nyikiwaka wona hi vavanuna lava a va hlawuleke leswaku va va khathalela. Vamakwerhu va xinuna va kombisa leswaku va byi twisisa vulawuri lebyi va nyikiweke byona hi ku xixima vamakwerhu va xisati. Loko vandlha hinkwaro, ri xixima vulawuri lebyi Yehovha a byi vekeke, ku ta va ni ku rhula evandlheni. Xa nkoka swinene, hi yisa ku dzuneka eka Tata wa hina wa le tilweni, ku nga Yehovha. w21.02 18-19 ¶14-17

Loko Davhida ni vavanuna lava a a ri na vona va ri etikweni leri a va balekele eka rona, va siye mindyangu ya vona va ya enyimpini. Loko va ha fambile, valala va te se hi fikile kutani va teka mindyangu ya vona va yi yisa evuhlongeni. Leswi Davhida a ri mathwarivona enyimpini, a ta va a tibyele leswaku swi nga n’wi olovela ku va ntshunxa evuhlongeni. Ematshan’weni ya sweswo, u kombele Yehovha leswaku a n’wi kongomisa. Davhida u vutise Yehovha a ku: “Xana ndzi fanele ndzi hlongorisa vuthu leri ra vaphangi?” Yehovha u pfumerile, a tlhela a n’wi tiyisekisa leswaku u ta hlula. (1 Sam. 30:7-10) U dyondza yini emhakeni leyi? Rhanga u kombela switsundzuxo u nga si teka swiboho. Vantshwa, vulavulani ni vatswari va n’wina. Nakambe mi nga ha tlhela mi kombela switsundzuxo leswi nga mi pfunaka eka vakulu. Leswi Yehovha a va tshembaka, na n’wina mi nga va tshemba. Yehovha u va teka va ri “tinyiko” evandlheni. (Efe. 4:8) Mi ta vuyeriwa loko mi tekelela ripfumelo ra vona ni ku yingisa switsundzuxo swa vutlhari leswi va mi nyikaka swona. w21.03 4-5 ¶10-11

Yesu u vule leswaku loko hi nga swi tirhisi leswi hi swi dyondzaka, hi fana ni wanuna loyi a akaka yindlu ehenhla ka sava. U tirha hi matimba kambe matimba yakwe mo va nyuku wa mbyana. Hikwalahokayini? Hikuva xidzedze ni ndhambi swi ta yi kukula hi ku olova yindlu yoleyo. (Mat. 7:24-27) Hilaha ku fanaka, loko hi nga swi tirhisi leswi hi swi dyondzaka, swi ta fana ni nyuku wa mbyana. A hi nge swi koti ku tiyisela loko hi langutana ni miringo kumbe loko hi xanisiwa. Hi hala tlhelo, loko hi tirhisa leswi hi swi dyondzaka, hi ta kota ku teka swiboho leswinene, hi ta va ni ku rhula ni ripfumelo leri tiyeke. (Esa. 48:17, 18) Leswaku hi kota ku tshama hi tshembekile loko hi langutana ni ndzingo, hi fanele hi khongela eka Yehovha hi tlhela hi tinyika nkarhi wo dyondza Rito rakwe siku ni siku. Nakambe a hi fanelanga hi rivala leswaku xa nkoka evuton’wini bya hina, i ku vangamisa Yehovha. Ha tiyiseka leswaku Yehovha a nge pfuki a hi fularherile nileswaku a nge tshiki ku hi rhandza.—Hev. 13:5, 6. w21.03 15 ¶6; 18 ¶20