July

Hi fanele hi va ni vuxaka na Yesu leswaku swikhongelo swa hina swi ta hlamuriwa. Leswi swi katsa swo tala ku tlula ku tirhisa “vito ra Yesu” ntsena loko hi khongela. Hi fanele hi tiva ndlela leyi Yehovha a swi hlamulaka hayona swikhongelo swa hina hi ku tirhisa Yesu. Yesu u byele vaapostola a ku: “Xin’wana ni xin’wana lexi mi xi kombelaka hi vito ra mina ndzi ta xi endla.” (Yoh. 14:13) Hambileswi Yehovha ku nga yena a yingisaka a tlhela a hlamula swikhongelo swa hina kambe u nyike Yesu vulawuri bya ku hetisisa swiboho leswi a swi endleke. Loko Xikwembu xi nga si swi hlamula swikhongelo swa hina, xi rhanga xi vona loko hi xi yingisa xitsundzuxo lexi Yesu a hi nyikeke xona. Hi xikombiso, Yesu u te: “Loko mi rivalela vanhu swidyoho swa vona, Tata wa n’wina wa le tilweni na yena u ta mi rivalela; kambe loko mi nga va rivaleli vanhu swidyoho swa vona, Tata wa n’wina na yena a nge mi rivaleli.” (Mat. 6:14, 15) Se hi nga swi vona leswaku hakunene i swa nkoka ku khoma van’wana hi ndlela leyi Yehovha na Yesu va hi khomaka hayona! w20.04 22 ¶6

Muapostola Pawulo u xiye swilo leswi vayingiseri vakwe va swi rhandzaka kutani a cinca xingheniso xakwe. Hi xikombiso, vanhu lava a a va chumayela eListra a va nga ma tivi Matsalwa. Hikwalaho, Pawulo u vulavule na vona hi swilo leswi va swi tivaka. U vulavule hi ntshovelo wa mihandzu ni ndlela yo tiphina hi vutomi. U tirhise marito ni swikombiso leswi vayingiseri vakwe a va ta swi twisisa hi ku olova. Vana ni vuxiyaxiya leswaku u ta kota ku twisisa leswi vanhu va le nsin’wini ya ka n’wina va swi rhandzaka kutani u cinca xingheniso xa wena. U nga swi tiva njhani swilo leswi munhu a swi rhandzaka loko u ya eka yena kumbe ekaya rakwe? Swi lava vuxiyaxiya. U nga n’wi kuma a ri enghadini, eku hlayeni ka buku, eku lunghiseni ka movha kumbe a ri karhi a endla mitirho yin’wana. Swi nga va swinene ku sungula bulo na yena hi swilo leswi a nga eku swi endleni. (Yoh. 4:7) Ni mpahla leyi a yi ambaleke yi nga vula swo karhi hi yena, yi nga kombisa tiko leri a humaka eka rona, ntirho lowu a wu endlaka kumbe xipano lexi a xi seketelaka. w20.04 11 ¶11-12

Hikwalaho ka ku karhateka, vamakwerhu van’wana va chava naswona a va ntshunxeki loko va ri exikarhi ka vanhu. Swa va tikela ku va exikarhi ka vanhu vo tala kambe va va kona etinhlengeletanweni ta vandlha, ta muganga ni ta xifundzha. Swa va tikela ku vulavula ni vanhu lava nga va tiviki kambe va chumayela ensin’wini. Loko na wena u ri exiyin’weni xo tano, tiyiseka leswaku a wu wexe. Vanhu vo tala va langutana ni swiyimo leswi fanaka. Tsundzuka, Yehovha wa tsaka leswi u n’wi tirhelaka hi mbilu hinkwayo. Leswi wa ha yaka emahlweni u n’wi tirhela, swi kombisa leswaku wa ku seketela naswona u ku nyika matimba lawa u ma lavaka. (Filp. 4:6, 7) Loko u tirhela Yehovha hambileswi u vabyaka kumbe u nga ni ntshikilelo wa mianakanyo, tiyiseka leswaku Yehovha wa tinyungubyisa hi wena. Vo tala va hina, ha vabya kambe ha tiyisela. (2 Kor. 4:16) Hi ku pfuniwa hi Yehovha, hinkwerhu hi ta swi kota ku tsutsuma mphikizano ku kukondza hi heta! w20.04 31 ¶20-21

Vutlhari bya Xikwembu byi vonaka kahle eka ndlela leyi xi tumbuluxeke misava hayona, ku nga kaya ra hina. (Hev. 3:4) Misava yi hlawulekile hikuva yi ni swilo hinkwaswo leswi vanhu va swi lavaka leswaku va kota ku hanya. Hi ndlela yo karhi, pulanete ya misava yi fana ni xikepe lexi fambaka elwandle. Kambe ku ni ku hambana exikarhi ka xikepe lexi nga lo hontlo hi vanhu ni pulanete ya hina ya misava. Hi xikombiso, vanhu lava nga exikepeni a va ta hanya nkarhi wo tanihi kwihi loko a va boheka ku tiendlela okisijini, swakudya ni mati ya vona naswona ku nga ri na laha va cukumetaka kona thyaka? A va ta fa swi nga si ya kwihi. Ku hambana ni sweswo, misava i kaya ra swivumbiwa leswi hanyaka swa ntsandzavahlayi. Yi hi humesela okisijini, swakudya ni mati naswona swilo leswi swa nkoka a swi heli. Hambileswi ku lahliwaka thyaka eka yona kambe yi tshama yi xongile naswona vanhu va kota ku hanya kahle eka yona. Swi kotekisa ku yini leswi? Yehovha u tumbuluxe misava yi ri ni vuswikoti byo endla ndzhendzheleko wa swilo leswi tirhisiwaka. w20.05 20 ¶3-4

Entiyisweni Sathana a a byela Evha leswaku Yehovha i muhembi. Xisweswo, Sathana u ve diyavulosi kumbe mulumbeti. Evha u kanganyiseke hi ku helela; u tshembe Sathana. (1 Tim. 2:14) U tshembe Sathana swinene ku tlula Yehovha. Sweswo swi endle leswaku a teka xiboho xo biha. U teke xiboho xo tshika ku yingisa Yehovha. U sungule ku dya muhandzu lowu Yehovha a nga te a nga wu dyi. Endzhaku ka sweswo, u teke wun’wana a nyika Adamu. (Gen. 3:6) Ehleketa hi ndlela leyi Evha a fanele a hlamule Sathana hayona. U ehleketa leswaku a ku ta va ku endleke yini loko a hlamule a ku: “A ndzi ku tivi wena kambe ndzi tiva Tata wa mina Yehovha, ndza n’wi rhandza naswona ndza n’wi tshemba. Mina na Adamu u hi nyike swilo hinkwaswo. A wu nyumi ku vulavula ku biha hi yena. Suka!” A swi kanakanisi leswaku nhlamulo yoleyo a yi ta va yi n’wi tsakise ngopfu Yehovha! (Swiv. 27:11) Kambe Adamu na Evha a va nga n’wi rhandzi Yehovha. Leswi a va nga n’wi rhandzi Tata wa vona, swi endle leswaku va tsandzeka ku yimela vito rakwe loko ri hlaseriwa. w20.06 4 ¶10-11

Vamakwerhu vaxisati va fanele va bumabumeriwa hikwalaho ka ntirho lowu va wu endlelaka Yehovha. Ntirho wolowo wu katsa ku aka ni ku khathalela miako ya nhlangano, ku seketela mitlawa ya tindzimi timbe ni ku tirha eBethele. Va hoxa xandla eka ntirho wo phalala, wa ku hundzuluxela naswona van’wana i maphayona ni varhumiwa. Ku engetela kwalaho, lava tekiweke va pfuna vanuna va vona leswaku va kota ku hetisisa vutihlamuleri bya vona evandlheni ni le ka nhlangano wa Yehovha. Vamakwerhu lava a va nga ta swi kota ku hetisisa vutihlamuleri bya vona tanihi “tinyiko leti ku nga vavanuna” handle ko seketeriwa hi vasati va vona. (Efe. 4:8) Vakulu lava tlhariheke va swi xiya leswaku vamakwerhu vaxisati “i vuthu lerikulu” ra vatirhi lava tiyimiseleke naswona i vachumayeri va mahungu lamanene lava nga ni vuswikoti. Nakambe vakulu va swi xiya leswaku vamakwerhu vaxisati va swi kota ku pfuna vamakwerhu vaxisati lava ha riki vantshwa va kota ku langutana ni swiphiqo. (Tito 2:3-5) Hakunene swa fanela leswaku hi va bumabumela vamakwerhu lava! w20.09 23-24 ¶13-14

Yehovha a nga va rivali vanhu lava tshameke va n’wi tirhela kambe sweswi va tshikeke ku n’wi tirhela; ni ntirho lowu va tshameke va n’wi endlela wona a nga wu rivali. (Hev. 6:10) Muprofeta Esaya u tsale xikombiso xa kahle ngopfu lexi kombisaka ndlela leyi Yehovha a khathalaka hayona hi vanhu vakwe. U te: “U ta risa ntlhambi wa yena ku fana ni murisi. Hi voko ra yena u ta hlengeleta swinyimpfana; u ta swi rhwala exifuveni xa yena.” (Esa. 40:11) Xana Murisi Lonkulu u titwa njhani loko yin’wana ya tinyimpfu ta yena yi lahleka? Yesu u kombise ndlela leyi Yehovha a titwaka hayona loko a vutisa vadyondzisiwa va yena a ku: “Mi swi vonisa ku yini? Loko munhu wo karhi a ri ni tinyimpfu ta 100 kutani ku lahleka yin’we, xana a nge ti siyi leta 99 etintshaveni kutani a ya lava leyi lahlekeke? Naswona loko swo endleka a yi kuma, ndzi tiyisile ndzi ri eka n’wina, u tsaka ngopfu hayona ku tlula leta 99 leti nga lahlekangiki.”—Mat. 18:12, 13. w20.06 19-20 ¶8-9

Hi swi teka ku ri nkateko ku tirhela Yehovha. (Ps. 27:4; 84:10) A swi bihanga loko makwerhu a navela ku va ni vutihlamuleri byo karhi enhlanganweni wa Yehovha. Hambiswiritano, loko a kuma vutihlamuleri byebyo, a nga fanelanga a titeka a ri wa nkoka ku tlula van’wana. (Luka 17:7-10) U fanele a tiyimisela ku tirhela van’wana hi ku titsongahata. (2 Kor. 12:15) Bibele yi ni swilemukiso swa vanhu lava a va titeka va antswa ku tlula vanhu van’wana. Diyotrefo a a nga titsongahati naswona a lava “ku tiveka emahlweni” evandlheni. (3 Yoh. 9) Hikwalaho ko tikukumuxa, Uziya u ringete ku endla ntirho lowu Yehovha a a nga n’wi nyikanga wona. (2 Tikr. 26:16-21) Absalomu u ringete ku kanganyisa vanhu leswaku va n’wi seketela hikwalaho ka leswi a lava ku va hosi. (2 Sam. 15:2-6) Hilaha rungula leri ra le Bibeleni ri swi kombisaka hakona, Yehovha a nga va tsakeli vanhu lava tilavelaka ndhuma. (Swiv. 25:27) Vanhu lava tikukumuxaka, hi ku famba ka nkarhi swi va khela matluka.—Swiv. 16:18. w20.07 4 ¶7-8

Mindyangu yin’wana ya Vakreste yi rhurhele etikweni rin’wana leswaku yi kuma vutumbelo kumbe ntirho. Eka swiyimo swo tano, swi nga endleka vana se va tiva ngopfu ririmi leri tirhisiwaka etikweni leri va rhurheleke eka rona. Leswaku vatswari va kuma ntirho swi nga lava va dyondza ririmi ra le tikweni rero. Va ta endla yini loko etikweni rero ku ri ni vandlha kumbe ntlawa lowu tirhisaka ririmi ra vona? Xana ndyangu wu fanele wu ya evandlheni rihi? Xana va fanele va ya evandlheni leri tirhisaka ririmi ra le tikweni rero kumbe eka leri tirhisaka ririmi ra vona? Nhloko ya ndyangu yi fanele yi endla xiboho xa leswaku hi rihi vandlha leri ndyangu wu nga ta hlanganyela eka rona. Lexi i xiboho xa munhu hi yexe, yi fanele yi teka xiboho lexi nga ta vuyerisa ndyangu wa yona. Hi fanele hi xixima xiboho lexi tekiweke hi nhloko ya ndyangu. A hi amukeleni xiboho xin’wana ni xin’wana lexi yi xi tekaka, hi tlhela hi amukela ndyangu wolowo hi mandla mambirhi evandlheni.—Rhom. 15:7. w20.08 30 ¶17-18

Loko hi lava matimba lama humaka eka Yehovha, a hi fanelanga hi titshega hi matimba, dyondzo, ndhavuko kumbe rifuwo ra hina. Swilo leswi a hi swona leswi endlaka leswaku Yehovha a hi tirhisa. Entiyisweni, a hi vanhu vo tala lava tirhelaka Xikwembu lava “tlhariheke hi tlhelo ra nyama lava vitaniweke, a hi vo tala lava nga ni matimba, a hi vo tala va le vukosini.” (1 Kor. 1:26) Hikwalaho, a swi vuli swona leswaku loko u nga dyondzekanga, u nga ri na rifuwo kumbe u nga tlharihanga hi ntumbuluko, a wu nge swi koti ku tirhela Yehovha. Ematshan’weni ya sweswo, titshege hi Yehovha u ta ku pfuna. Hi xikombiso, loko u titwa u chava loko van’wana va ringeta ku ku endla u kanakana tidyondzo leti u pfumelaka eka tona, khongela eka Yehovha u kombela xivindzi xo yimela ripfumelo ra wena. (Efe. 6:19, 20) Loko u ri ni vuvabyi lebyi nga tshungulekiki kumbe u lamarile, kombela Yehovha a ku nyika matimba yo kota ku n’wi tirhela. Loko u vona ndlela leyi Yehovha a ku pfunaka hayona, ripfumelo ra wena ri ta tiya swinene. w20.07 16 ¶9

Loko hi lava ku rhangisa Mfumo wa Xikwembu evuton’wini bya hina, hi fanele hi titsona swo karhi leswaku hi ta tsakisa Xikwembu hilaha Abrahama a endleke hakona. (Mar. 10:28-30; Hev. 11:8-10) U nga ehleketi leswaku vutomi bya wena a byi nge vi na swiphiqo. Hambi ku ri vanhu lava tiyimiseleke ku tirhela Yehovha vutomi bya vona hinkwabyo na vona va langutana ni swiphiqo. (Yak. 1:2; 1 Pet. 5:9) Namuntlha, hi ni swivangelo swo tala swinene swo langutela vumundzuku. Swilo leswi endlekaka laha misaveni namuntlha swi swi kombisa kahle leswaku hi hanya evugimamusi bya masiku yo hetelela. Wun’wana wa mikateko leyi hi nga ta tiphina hayona emfun’weni wa Xikwembu i ku vona varhandziwa va hina loko va pfuxiwa eku feni. Hi nkarhi wolowo, Yehovha u ta hakela Abrahama hikwalaho ka ripfumelo ni ku lehisa kakwe mbilu hi ku n’wi pfuxa eku feni swin’we ni ndyangu wa ka vona. Xana u ta va kona leswaku u ta va hoyozela? U ta va kona ntsena loko u tiyimisele ku titsona swo karhi hikwalaho ka Mfumo wa Xikwembu, loko u tiyisa ripfumelo ra wena hambiloko u langutana ni miringo ni loko u dyondza ku lehisa mbilu u rindzela Yehovha hilaha Abrahama a endleke hakona.—Mik. 7:7. w20.08 5-6 ¶13-14; 7 ¶17

Ha swi tiva leswaku loko valala va hina va hi dlaya, Yehovha u ta hi pfuxa. A xi kona ni xin’we lexi va nga xi endlaka, lexi nga hi tshikisaka ku tirhela Yehovha. (Rhom. 8:35-39) Hakunene Yehovha u kombise leswaku u tlharihile hi ku hi nyika ntshembo wa ku pfuxiwa ka vafi! Ntshembo lowu, wu endla leswaku hi nga ha n’wi chavi Sathana hambiloko a hi xungeta hi rifu kambe hi va ni xivindzi xo tshama hi tshembekile eka Yehovha. Loko valala va Yehovha va ku xungeta hi rifu, xana u ta n’wi tshemba Yehovha leswaku u ta ku pfuxa? U nga yi kuma njhani nhlamulo? Ndlela yin’wana leyi nga ku pfunaka, i ku tivutisa leswi, ‘Xana swiboho leswitsongo leswi ndzi swi endlaka siku ni siku, swi kombisa leswaku ndza n’wi tshemba Yehovha?’ (Luka 16:10) U nga tlhela u tivutisa leswi, ‘Xana mahanyelo ya mina ma kombisa leswaku ndza xi tshemba xitshembiso xa Yehovha xa leswaku u ta ndzi khathalela loko ndzi rhangisa Mfumo wakwe evuton’wini?’ (Mat. 6:31-33) Loko nhlamulo ya swivutiso leswi ku ri ina, u ta swi kota ku yima u tiyile loko u langutana ni miringo.—Swiv. 3:5, 6. w20.08 17-18 ¶15-16

Hi fanele hi kota ku ri tirhisa kahle Rito ra Xikwembu. Hi nga dyondza tindlela tin’wana to ri tirhisa etinhlengeletanweni ta vandlha. Leswaku hi kota ku khorwisa vanhu leswaku ntiyiso lowu nga eBibeleni i wa risima, hi fanele hi va ni dyondzo ya munhu hi yexe ya Bibele nkarhi ni nkarhi. Hi fanele hi tirhisa Rito ra Xikwembu leswaku hi tiyisa ripfumelo ra hina. Leswi swi katsa swo tala ku tlula ku hlaya Bibele ntsena. Swi katsa ku anakanyisisa hi leswi hi swi hlayaka, ku endla ndzavisiso etibukwini ta hina leswaku hi ta kota ku twisisa ni ku tirhisa leswi Matsalwa ma swi vulaka. (1 Tim. 4:13-15) Loko hi endla tano, hi ta kota ku ri tirhisa kahle Rito ra Xikwembu loko hi dyondzisa van’wana. Kambe a hi fanelanga hi va hlayela Bibele swi helela kwalaho. Kurinasweswo, hi fanele hi va pfuna va twisisa ni ku vona ndlela leyi va nga swi tirhisaka hayona leswi Bibele yi swi vulaka. Loko hi va ni dyondzo ya Bibele ya munhu hi yexe, hi ta swi kota ku antswisa ndlela leyi hi ri tirhisaka hayona Rito ra Xikwembu leri huhuteriweke loko hi dyondzisa van’wana.—2 Tim. 3:16, 17. w20.09 28 ¶12

Lexi nga ta hi pfuna leswaku hi rhangisa ntirho wo chumayela, i ku ehleketa hi ndlela leyi Yehovha a hi pfunaka hayona. Hi xikombiso, u hi nyika tibuku leti kandziyisiweke ni rungula ro tala leri kumekaka eka Inthanete, ku nga ha va tibuku, rungula leri yingiseriwaka, tivhidiyo ni vuhaxi bya JW. Ehleketa hi mhaka leyi, website ya hina yi kumeka hi tindzimi leti tlulaka 1 000! (Mat. 24:45-47) Xin’wana lexi nga hi pfunaka leswaku hi rhangisa ntirho wo chumayela i ku tekelela Yesu. A nga pfumelelanga nchumu ni wun’we wu n’wi kavanyeta entirhweni wakwe wo chumayela. (Yoh. 18:37) A nga pfumelanga ku hluriwa hi ndzingo loko Sathana a n’wi nyika “mifumo hinkwayo ya misava ni ku vangama ka yona”; kumbe loko van’wana va lava ku n’wi endla hosi. (Mat. 4:8, 9; Yoh. 6:15) Yesu a nga pfumelanga leswaku rifuwo kumbe valala vakwe va n’wi kavanyeta entirhweni wakwe. (Luka 9:58; Yoh. 8:59) Xitsundzuxo xa muapostola Pawulo xa ndzimana ya siku ya namutlha xi ta hi pfuna leswaku na hina loko hi langutana ni miringo, hi nga yi pfumeleli yi hi kavanyeta. w20.09 9-10 ¶6-7

Ha tsaka swinene leswi hi nga ni vamakwerhu vo tala vaxisati lava gingiritekaka evandlheni! Va hoxa xandla etinhlengeletanweni ta vandlha naswona va va kona ensin’wini. Van’wana va pfuneta eku khathaleleni ka Holo naswona va khathala hi Vakrestekulobye. Kambe va langutana ni swiphiqo. Van’wana va hlayisa vatswari va vona lava dyuhaleke. Van’wana va kanetiwa hi swirho swa mindyangu ya vona. Kasi van’wana va wa va pfuka leswaku va wundla vana tanihi leswi va nga vatswari lava nga voxe. Hikwalahokayini hi fanele hi seketela vamakwerhu vaxisati? Hikuva vanhu va misava leyi a va va xiximi vavasati. Bibele yi hi byela leswaku hi va seketela. Hi xikombiso, muapostola Pawulo u kombele vandlha ra le Rhoma leswaku ri amukela makwerhu wa xisati Febe ni “ku n’wi pfuna hi swin’wana ni swin’wana leswi a nga ha lavaka ku pfuniwa ha swona.” (Rom. 16:1, 2) Pawulo a huma eka ndzhavuko lowu a wu teka vavasati tanihi lava nga pfuniki nchumu. Kambe leswi se a a ri Mukreste, a a tekelela Yesu naswona a a khoma vavasati hi ndlela leyi xiximekaka. w20.09 20 ¶1-2

Leswaku hi pfuna swichudeni swi navela ku chumayela van’wana mahungu lamanene, hi nga swi swivutisa leswi landzelaka: “Bibele yi ku pfune njhani leswaku u antswisa vumunhu bya wena? Xana u ehleketa leswaku van’wana na vona va fanele va dyondza Bibele? U nga va pfuna njhani?” (Swiv. 3:27; Mat. 9:37, 38) Tsundzuka, Yesu u hi lerise leswaku hi dyondzisa vanhu ‘ku hlayisa swilo hinkwaswo’ leswi a hi leriseke swona. Sweswo swi katsa ku yingisa milawu yimbirhi leyikulu, leyi fambisanaka kahle ni ntirho wo chumayela ni wa ku endla vadyondzisiwa, ku nga ku rhandza Xikwembu ni warikwenu. (Mat. 22:37-39) Phela lexi endlaka hi chumayela i rirhandzu. Hambiswiritano, swichudeni swin’wana loko swi ehleketa hi ku chumayela swi khomiwa hi rhumbyana. Kambe hi nga tiyisekisa swichudeni sweswo leswaku Yehovha u ta swi pfuna swi tshika ku chava vanhu.—Ps. 18:1-3; Swiv. 29:25. w20.11 3 ¶6-8

Loko u lunghiselela dyondzo ya Bibele, titolovete ku khongelela xichudeni xa wena ni swilaveko swa xona. Kombela Yehovha a ku pfuna u fikelela mbilu ya xona loko u ri karhi u xi dyondzisa Bibele. Tsundzuka leswaku xikongomelo xa wena i ku xi pfuna leswaku xi fanelekela ku khuvuriwa. Xichudeni xi fanele xi vulavurisana na Yehovha. Njhani? Hi ku n’wi yingisa xi tlhela xi vulavula na yena. Xi nga yingisa Xikwembu hi ku hlaya Bibele siku ni siku. (Yox. 1:8; Ps. 1:1-3) Xi vulavula na Yehovha hi ku khongela siku ni siku. Loko mi sungula niloko mi gimeta dyondzo, khongela swin’we na xona swi suka embilwini u tlhela u xi katsa exikhongelweni. Loko xi twa ndlela leyi u khongelaka hayona, xi ta dyondza ndlela yo khongela eka Yehovha Xikwembu swi suka embilwini hi vito ra Yesu Kreste. (Mat. 6:9; Yoh. 15:16) Ku hlaya Bibele siku ni siku (ku yingisela Yehovha) ni ku khongela (ku vulavula na Yehovha) swi ta xi pfuna leswaku xi tshinela eka Xikwembu!—Yak. 4:8 w20.10 8 ¶8; 9 ¶10-11

Ninamuntlha, nhlangano wa Yehovha wu hlelekile naswona wu ni ku rhula hilaha a swi ri hakona enkarhini wa vaapostola. (Mit. 16:4, 5) Hi xikombiso, loko u fanele u ya dyondza Xihondzo xo Rindza evandlheni kumbe etikweni rin’wana, wa swi tiva leswaku ku ta dyondziwa nhlokomhaka yihi ni ndlela leyi yi nga ta fambisiwa hayona. Loko u fika u titwa u ri ekaya! Moya wa Xikwembu hi wona lowu endlaka leswaku ku va ni vun’we hi ndlela leyi. (Sof. 3:9) Leswi u nga swi endlaka. Tivutise: ‘Xana ndzi kondletela vun’we ni ku rhula evandlheni? Xana ndza va yingisa lava rhangelaka? Xana vanhu va nga ndzi tshemba, ngopfungopfu loko ndzi ri ni vutihlamuleri evandlheni? Xana ndza wu khoma nkarhi naswona ndzi tiyimisele ku pfuna ni ku tirhela van’wana?’ (Yak. 3:17) Loko u vona leswaku ku na laha u faneleke u antswisa kona, khongela u kombela moya lowo kwetsima. Loko u wu pfumelela wu ku kongomisa, vamakwerhu va ta ku rhandza. w20.10 23 ¶12-13

Rito ra Xikwembu ri fana ni xivoni. (Yak. 1:23-25) Vo tala va hina loko hi nga si suka ekaya, hi sungula hi tinyanga exivonini. Sweswo swi endla hi vona laha hi faneleke hi lulamisa kona hi nga si famba. Hilaha ku fanaka, loko hi hlaya Bibele siku ni siku hi ta kota ku vona laha hi faneleke hi lulamisa kona. Vo tala va kume swi pfuna swinene ku hlaya ndzimana ya siku nimpundzu va nga si suka ekaya. Sweswo swi endla va kota ku anakanyisisa hi leswi va swi hlayeke siku hinkwaro. Hikwalaho, siku hinkwaro va tikarhatela ku tirhisa switsundzuxo leswi va swi kumeke. Ku engetela kwalaho, siku ni siku hi fanele hi tinyika nkarhi wa ku hlaya Rito ra Xikwembu ni ku anakanyisisa hi leswi hi swi hlayaka. Sweswo swi ta endla leswaku hi ya emahlweni hi famba egondzweni leri yisaka evuton’wini. Hi marito man’wana, Rito ra Xikwembu ri fana ni muchini wa X-ray, ri endla leswaku hi kota ku vona leswi nga endzeni ka hina. Kambe hi fanele hi titsongahata leswaku hi ta kota ku tirhisa xitsundzuxo lexi humaka eBibeleni ni le ka vanhu lava Xikwembu xi va tirhisaka. w20.11 18 ¶3; 20 ¶8

Hambileswi Vakreste va le nkarhini wa vaapostola a va tshamela ku xanisiwa, a va pfa va wu kuma nkarhi wa ku rhula. Xana a va wu tirhisa njhani nkarhi wolowo? A va chumayela mahungu lamanene hi ku hiseka. Rungula leri nga eka buku ya Mitirho ri vula leswaku a “[va] chava Yehovha.” Va ye emahlweni ni ntirho wa vona wo chumayela kutani sweswo swi endle leswaku va ya va “andza.” Swi le rivaleni leswaku Yehovha u wu katekisile ntirho wa vona hi nkarhi wolowo wa ku rhula. (Mit. 9:26-31) Vakreste va le nkarhini wa vaapostola a va chumayela mahungu lamanene loko va pfulekeriwa hi nkarhi. Hi xikombiso, loko Pawulo a pfulekeriwa hi nkarhi wo chumayela eEfesa, u wu tirhise hi vutlhari nkarhi wolowo leswaku a chumayela ni ku endla vadyondzisiwa. (1 Kor. 16:8, 9) Vadyondzisiwa va tirhe hi matimba leswaku va “chumayela mahungu lamanene ya rito ra Yehovha.” (Mit. 15:30-35) Xana vuyelo byi ve byihi? Nhlamaulo hi yi kuma eka ndzimana ya siku ra namutlha. w20.09 16 ¶6-8

Endzhaku ka loko Adamu a dyohile, u tivangele rifu naswona rifu rero ri tlulele ni vana vakwe. Ninamuntlha ha fa hikwalaho ka leswi Adamu a tsandzekeke ku yingisa. Hambiswiritano, Xikwembu xi endle leswaku hi va ni tshembo wo tsakisa hi ku pfuxa N’wana wa xona eku feni! Loko muapostola Pawulo a vulavula hi Yesu u te: “Ku pfuka ka vafi ku va kona hikwalaho ka munhu. Tanihi leswi hinkwavo va faka hikwalaho ka Adamu, hinkwavo va ta tlhela va pfuxiwa hikwalaho ka Kreste.” (1 Kor. 15:22) Xana Pawulo a a vula yini loko a vula leswaku “hinkwavo va fa hikwalaho ka Adamu”? Pawulo a a vulavula hi vanhu hinkwavo tanihi leswi va velekiweke ni xidyoho naswona va faka hikwalaho ka Adamu. (Rhom. 5:12) Adamu a nge byi kumi “vutomi lebyi nga heriki.” Adamu a nge vuyeriwi eka nkutsulo wa Kreste hikuva a a nga ri na xidyoho kutani u hlawule ku nga xi yingisi Xikwembu hi vomu. Adamu u ta kuma vuyelo byo fana ni lebyi nga ta kumiwa hi vanhu lava “N’wana wa munhu” a nga ta va avanyisa tanihi “timbuti,” leswi vulaka ku “loviseriwa makumu.”—Mat. 25:31-33, 46; Hev. 5:9. w20.12 5 ¶13-14

Loko hi nga ri na vutihlamuleri byo karhi, a hi ehleketeni hi xikombiso xa tintsumi to tshembeka. Hi nkarhi wa ku fuma ka Hosi Akabu, Yehovha u kombele tintsumi ku vula mavonelo ya tona mayelana ni ndlela yo yenga hosi yoleyo yo homboloka. Tintsumi to tala ti vule mavonelo ya tona. Kambe Xikwembu xi hlawule ntsumi yin’we kutani xi yi byela leswaku mavonelo ya yona ma ta tirha. (1 Tih. 22:19-22) Xana tintsumi letin’wana ti hele matimba kutani ti tivutisa leswi, ‘Hikwalahokayini ndzi tlange hi nkarhi wa mina?’ Doo! Tintsumi ta titsongahata naswona ti lava leswaku ku dzuneka hinkwako ku ya eka Yehovha. (Vaav. 13:16-18; Nhlav. 19:10) Vutihlamuleri lebyikulu lebyi hi nga na byona i ku chumayela hi Mfumo wa Xikwembu ni ku vitaniwa hi vito ra xona. Vutihlamuleri a hi byona lebyi endlaka hi va va risima eka Xikwembu. Lexi endlaka leswaku Yehovha a hi rhandza ni vamakwerhu va hi rhandza, i ku titsongahata. Hikwalaho, kombela Yehovha a ku pfuna u titsongahata mikarhi hinkwayo. Ehleketa hi vanhu vo tala va ku titsongahata lava ku vulavuriwaka ha vona eBibeleni. Tikarhatele ku tirhela vamakwenu hilaha u nga kotaka hakona.—1 Pet. 5:5. w20.12 26 ¶16-17

Xihuku xa ku ponisa i ntshembo lowu Yehovha a hi nyikeke wona, ku nga ntshembo wa leswaku u ta hi ponisa eka rifu nileswaku vanhu hinkwavo lava endlaka ku rhandza ka yena u ta va hakela. (1 Tes. 5:8; 1 Tim. 4:10; Tito 1:1, 2) Ntshembo lowu hi nga na wona wa ku ponisiwa wa hi sirhelela leswaku hi nga ehleketi swilo swo biha. Wu endla hi dzikisa miehleketo ya hina eka leswi Xikwembu xi hi tshembisaka swona, wu tlhela wu endla leswaku hi nga karhateki ku tlula mpimo loko hi langutana ni swiphiqo. Hi ambala xihuku lexi hi ku ehleketa hi swilo leswi fambisanaka ni ku rhandza ka Xikwembu. Hi xikombiso, hi veka ntshembo wa hina eka Xikwembu, ku nga ri eka rifuwo. (Ps. 26:2; 104:34; 1 Tim. 6:17) Banga ra moya i Rito ra Xikwembu, ku nga Bibele. Banga leri ri ni matimba yo heta vukanganyisi ni yo tshunxa vanhu evuhlongeni bya tidyondzo ta mavunwa ni le ka mikhuva yo biha. (2 Kor. 10:4, 5; 2 Tim. 3:16, 17; Hev. 4:12) Dyondzo ya munhu hi yexe ni ndzetelo lowu hi wu kumaka eka nhlangano wa Xikwembu swi ta hi pfuna hi kota ku ri tirhisa kahle banga leri.—2 Tim. 2:15. w21.03 27 ¶4; 29 ¶10-11

Hambiloko a pfaleriwile hikwalaho ko chumayela hi Yesu, muapostola Yohane u kombise leswaku u rhandza vanhu van’wana. Hi xikombiso, u tsale buku ya Nhlavutelo kutani a yi rhumela emavandlheni leswaku ma ta tiva “swilo leswi faneleke swi endleka ku nga ri khale.” (Nhlav. 1:1) Endzhaku ka loko a tshunxiwile ePatmosi, u tsale buku yakwe ya Evhangeli leyi vulavulaka hi vutomi bya Yesu ni ntirho lowu a wu endleke. U tlhele a tsala ni mapapila manharhu leswaku a khutaza ni ku tiyisa vamakwavo. U nga n’wi tekelela hi ku kombisa leswaku u rhandza vanhu hi ku hlawula leswi u lavaka ku swi endla hi vutomi bya wena. Vanhu lava lawuriwaka hi Sathana va lava u tirhisa nkarhi ni matimba ya wena leswaku u tiendlela mali ni ndhuma. Kambe Vakreste emisaveni hinkwayo va heta nkarhi wa vona wo tala va ri karhi va chumayela mahungu lamanene leswaku va pfuna vanhu va va ni vuxaka lebyinene na Yehovha. w21.01 10 ¶9-10

Yonathani a a ta va a vondzoke Davhida. Leswi Yonathani a a ri n’wana wa Hosi Sawulo, a a ta va a vule leswaku hi yena loyi a nga ni mfanelo yo va hosi leyi a yi ta landzela. (1 Sam. 20:31) Kambe Yonathani a a titsongahata naswona a tshembekile eka Yehovha. Hikwalaho, u seketele xiboho lexi Yehovha a xi endleke xo hlawula Davhida tanihi hosi leyi a yi ta landzela. U tshame a tshembekile eka Davhida hambileswi sweswo a swi hlundzukisa Sawulo. (1 Sam. 20:32-34) Yonathani a a ri ni xinakulobye lexikulu eka Davhida hikwalaho a a nga n’wi teki tanihi nala wakwe. Yonathani a a ri socha leri nga ni ntokoto ni xivindzi. Yena ni tata wakwe Sawulo a va dume hi ku va ni “rivilo ku tlula magama” ni ku va ni “matimba ku tlula tinghala.” (2 Sam. 1:22, 23) Hikwalaho, Yonathani a a ta va a tinyungubyisile ni ku tibuma hileswi a a ri ni xivindzi. Kambe a a nga n’wi vondzoki Davhida. Ku hambana ni sweswo, a a xixima Davhida hikwalaho ka xivindzi lexi a a ri na xona ni hikwalaho ka leswi a a titshege hi Yehovha. Endzhaku ka loko Davhida a dlaye Goliyadi, Yonathani u sungule ku n’wi rhandza ku fana ni ndlela leyi a a tirhandza hayona. w21.01 21 ¶6; 22 ¶8-9

Nhloko ya Vakreste hinkwavo i Yesu Kreste. Kambe loko wansati a tekiwa u va ehansi ka nuna loyi a velekiweke ni xidyoho. Sweswo swi nga va ntlhontlho. Hikwalaho, loko makwerhu wa xisati a lava ku tekiwa, u fanele a tivutisa leswi: ‘I yini lexi kombisaka leswaku makwerhu loyi u ta va nhloko leyinene ya ndyangu? Xana u rhangisa ntirho wa Xikwembu evuton’wini byakwe? Loko swi nga ri tano, ndzi swi tiva njhani leswaku u ta rhangisa vuxaka bya ndyangu wakwe na Yehovha loko se a ndzi tekile?’ A nga tlhela a tivutisa leswi: ‘I yini leswi mina ndzi nga swi endlaka leswaku vukati byi famba kahle? Xana ndzi munhu loyi a lehisaka mbilu ni ku va ni malwandla? Xana ndzi ni vuxaka lebyinene na Yehovha?’ (Ekl. 4:9, 12) Swiboho leswi wansati a swi tekaka a nga si tekiwa, swi ta hoxa xandla eka ntsako lowu a nga ta va na wona evukatini. Vamakwerhu vo tala va xisati va va xixima vanuna va vona. Swa fanela leswaku va bumabumeriwa! w21.02 8 ¶1-2

Vamakwerhu vo tala namuntlha, va hlele ku dyondza ririmi rin’wana leswaku va ta ndlandlamuxa ntirho wa vona wo chumayela ni ku ya pfuneta evandlheni ra ririmi rin’wana leri nga ni xilaveko lexikulu xa vachumayeri. Va endle xiboho lexi hikwalaho ka leswi va lavaka ku tirhela Yehovha hilaha ku engetelekeke. Hambileswi va nga ha tekaka malembe va nga si ri tiva kahle ririmi lerintshwa kambe va pfuna swinene evandlheni. Vumunhu bya vona lebyinene ni ntokoto lowu va nga na wona swi tiyisa vandlha. Ha va xixima vamakwerhu lava hikwalaho ka moya wa vona wo tinyiketela! Vakulu a va nge tshiki ku bumabumela makwerhu leswaku a va nkulu kumbe nandza wa vutirheli hikwalaho ka leswi a nga ri tiviki kahle ririmi leri tirhisiwaka evandlheni. Vakulu va ta kambela makwerhu hi ku tirhisa Matsalwa ku vona loko a faneleka ku va nkulu kumbe nandza wa vutirheli, ku nga ri hi ku tiva ririmi leri tirhisiwaka evandlheni.—1 Tim. 3:1-10, 12, 13; Tito 1:5-9. w20.08 30 ¶15-16

Vanhu vo tala va ehleketa leswaku va ta tsaka ntsena loko va ri ni rihanyo lerinene, va ganyile ni loko swilo swi va fambela kahle emindyangwini ya vona. Kambe ntsako lowu Yakobo a vulavulaka ha wona, i xiphemu xa mihandzu ya moya wo kwetsima naswona a wu titsheganga hi swiyimo leswi munhu a langutanaka na swona. (Gal. 5:22) Lexi endlaka Mukreste a tsaka, i ku tiva leswaku u tsakisa Yehovha naswona u tekelela Yesu. (Luka 6:22, 23; Kol. 1:10, 11) Ku fana ni langavi ra rivoni ra pharafini leri sirheleriweke hi nghilazi, ntsako lowu Mukreste a vaka na wona embilwini wu tshama wu ri karhi wu ku lavhulavhuu! Ntsako wolowo a wu heli hambiloko a vabya kumbe swa macheleni swi nga fambi kahle. Nakambe a wu heli loko a hlekuriwa kumbe a kanetiwa hi vandyangu kumbe vanhu van’wana. Ematshan’weni ya sweswo, ntsako wakwe wu ya wu engeteleka loko vanhu lava n’wi kanetaka va ringeta ku n’wi hetela wona. Miringo leyi hi langutanaka na yona hikwalaho ka ripfumelo ra hina, yi kombisa leswaku hi vadyondzisiwa va Kreste va ntiyiso. (Mat. 10:22; 24:9; Yoh. 15:20) Hi yona mhaka Yakobo a tsaleke marito lama nga eka ndzimana ya namuntlha. w21.02 28 ¶6

Loko u hlangana ni tindzimana ta Bibele leti kombisaka ndlela leyi swi nga swa nkoka hayona ku va munhu wo rhula ni ku tshemba Yehovha, ringeta ku ti tiva hi nhloko. Swi ta ku pfuna ku ti hlaya hi rito ra le henhla kumbe u ti tsala ehansi kutani u ti hlaya hi ku phindhaphindha. Yoxuwa a a lerisiwe ku hlaya buku ya Nawu nkarhi ni nkarhi hi rito ra le hansi leswaku a ta endla swilo hi vutlhari. Leswi a a ta swi hlaya a swi ta n’wi pfuna a hlula ku chava loko a rhangela vanhu va Xikwembu. (Yox. 1:8, 9) Matsalwa yo tala lama nga eBibeleni ma ta endla leswaku u va ni ku rhula loko u langutana ni swiyimo swo tika kumbe leswi nga ku vilerisaka. (Ps. 27:1-3; Swiv. 3:25, 26) Etinhlengeletanweni ta vandlha, ha vuyeriwa eka mivulavulo, tinhlamulo ni le ka mabulo lawa hi vaka na wona ni vamakwerhu. (Hev. 10:24, 25) Nakambe, vanghana va hina evandlheni va ta hi khutaza loko hi va phofulela timhaka leti hi karhataka. w21.01 6 ¶15-16

Loko u khuvuriwa, u kombise leswaku u ni ripfumelo naswona u tshemba Yehovha. Yehovha u ku amukele hi mandla mambirhi endyangwini wakwe. Lexi u faneleke u xi endla sweswi, i ku ya emahlweni u n’wi tshemba. Swa olova ku titshega hi Yehovha loko u teka swiboho swa nkoka kambe ku vuriwa yini loko swiboho leswi u faneleke u swi teka swi vonaka swi nga nyawuli? Loko u hlawula vuhungasi, ntirho ni leswi u lavaka ku swi fikelela, i swa nkoka ku va u titshega hi Yehovha. U nga titshegi hi vutlhari bya wena. Kurinasweswo, lava nkongomiso eBibeleni lowu fambisanaka ni xiyimo xa wena kutani u endla leswi yi swi vulaka. (Swiv. 3:5, 6) Loko u endla tano, u ta tsakisa Yehovha naswona u ta va ni ndhuma leyinene evandlheni. I ntiyiso leswaku leswi u nga munhu ku fana na hina, mikarhi yin’wana u ta pfa u endla swihoxo. Kambe leswi a swi fanelanga swi ku sivela ku endla leswi u nga swi kotaka entirhweni wa Yehovha. w21.03 6 ¶14-15

Xana u kanetiwa hi swirho swa ndyangu? Kumbe xana u tshama etikweni leri ntirho wa Yehovha wu yirisiweke? Loko swi ri tano, 2 Timotiya 1:12-16 na 4:6-11, 17-22 yi ta ku chavelela. Muapostola Pawulo u tsale Matsalwa lawa a ri ejele. Loko u nga si ma hlaya matsalwa lawa, byela Yehovha xiphiqo lexi u nga na xona ni ndlela leyi u titwaka hayona. Swi boxe hi ku kongoma leswi ku karhataka. Kombela Yehovha a ku pfuna u twisisa ndlela leyi matsalwa lama vulavulaka hi miringo leyi Pawulo a a langutane na yona, ma nga ku pfunaka hayona u kota ku tiyisela miringo leyi u langutaneke na yona. Yehovha u lemukise Pawulo leswaku u ta langutana ni maxangu loko a va Mukreste. (Mit. 21:11-13) Yehovha u n’wi pfune njhani Pawulo? U hlamule swikhongelo swakwe naswona hi ku famba ka nkarhi u n’wi nyike matimba. Pawulo u byeriwe leswaku u ta hakeriwa hileswi a tirheke hi matimba. Yehovha u tlhele a tirhisa vanghana va Pawulo vo tshembeka leswaku va n’wi pfuna. w21.03 17-18 ¶14-15, 19