March

“Tinyimpfu” ta le xifanisweni lexi nga eka Matewu 25:31-36 ti yimela vanhu vo lulama lava nga ni ntshembo wo hanya laha misaveni, ku nga lava tinyimpfu letin’wana. Hi ku tshembeka, va seketela vamakwavo va Kreste lava hlawuriweke hi ku va pfuna eka ntirho wa ku chumayela mahungu lamanene ni ku endla vadyondzisiwa. (Mat. 24:14; 28:19, 20) Lembe ni lembe, loko mavhiki ma ri karhi ma voyamela eka siku ra Xitsundzuxo, lava tinyimpfu tin’wana va kombisa nseketelo wa vona eka vamakwavo va Kreste hi ku katseka hi xitalo eka tsima ra misava hinkwayo ro rhambela vanhu eXitsundzuxweni. Va tlhela va wa va pfuka leswaku va endla malunghiselelo ya ku Xitsundzuxo xi va kona emavandlheni lama nga emisaveni hinkwayo. Futhi a va kali va ehleketa kambirhi loko swi ta emhakeni yo pfuna vamakwavo va Kreste. Va swi tiva ku Yesu wa swi vona leswaku loko va seketela vamakwavo va Kreste, swi fana ni loko va seketela yena.—Mat. 25:37-40. w22.01 22 ¶11-12

Loko hi tekelela vumunhu lebyinene lebyi Yesu a a ri na byona ni ndlela leyi a a tirhisana ni vanhu hayona, hi ta va hi tekelela Yehovha. Hi xikombiso, Yesu u ve ni ntwelavusiwana eka munhu loyi a a ri ni nhlokonho ni le ka wansati loyi a a vabya ngopfu naswona a a twela ni vanhu lava loveriweke. (Mar. 1:40, 41; 5:25-34; Yoh. 11:33-35) Loko hi tekelela Yehovha, hi ta va ni vuxaka lebyinene na yena. Loko hi landzelerisisa mikondzo ya Yesu a hi nge pfumeli ku kavanyetiwa hi misava leyi yo homboloka. Loko Yesu a nga si dlayiwa, hi vusiku byakwe byo hetelela u te: “Misava ndzi yi hlurile.” (Yoh. 16:33) A a vula leswaku vanhu va misava leyi a va swi kotanga ku endla leswaku a cinca mahanyelo yakwe ni xikongomelo xakwe. Yesu a nga kalanga a swi rivala leswaku xikongomelo xakwe xo ta laha misaveni a ku ri ku ta vangamisa vito ra Yehovha. Ku vuriwa yini hi hina? Emisaveni leyi, ku ni swilo swo tala leswi nga hi kavanyetaka. Kambe loko hi tikarhatela ku endla ku rhandza ka Yehovha hilaha Yesu a endleke hakona, na hina hi ta yi ‘hlula’ misava.—1 Yoh. 5:5. w21.04 3-4 ¶7-8

Muapostola Pawulo a a xi tiva kahle xitshembiso xa Yesu xa leswaku ‘hinkwavo lava pfumelaka eka Yesu va ta kuma vutomi lebyi nga heriki.’ (Yoh. 3:16; Rhom. 6:23) Pawulo i un’wana wa vanhu lava a a va ri ni ripfumelo eka nkutsulo. A a kholwa leswaku Yehovha u tiyimisele ku rivalela vanhu hinkwavo lava hundzukaka, ku katsa ni lava endleke swidyoho leswikulu. (Ps. 86:5) Pawulo a a tiyiseka leswaku Xikwembu xa n’wi rhandza hileswi xi rhumeleke Kreste a ta n’wi fela. Xiya marito lama tiyisaka nhlana lawa Pawulo a ma vuleke eka Vagalatiya 2:20 loko yi gimeta. U te: ‘N’wana wa Xikwembu, u ndzi rhandzile kutani a tinyiketa hikwalaho ka mina.’ Pawulo a a swi tiva leswaku Xikwembu xi rhandza vanhu va xona hinkwavo, hi yona mhaka a a tiyiseka leswaku na yena xa n’wi rhandza. U tsundzuxe Varhoma a ku: ‘Kreste u hi ferile loko ha ha ri vadyohi.’ (Rhom. 5:8) Swi le rivaleni leswaku a xi kona lexi nga sivelaka Xikwembu ku hi rhandza! Pawulo a a kholwa leswaku Xikwembu xa n’wi rhandza. A a swi tiva leswaku Yehovha u lehisele Vaisrayele mbilu. w21.04 22 ¶8-10

Loko u dyondza Bibele ni xichudeni xi pfune leswaku xi rhandza Yehovha. Njhani? Tinyike nkarhi wo xi hlamusela leswi Yehovha a nga xiswona. Pfuna xichudeni xi teka Yehovha tanihi Xikwembu lexi tsakeke naswona xi pfunaka lava xi rhandzaka. (1 Tim. 1:11; Hev. 11:6) Xi byele ndlela leyi xi nga ta vuyeriwa hayona loko xi tirhisa leswi xi swi dyondzaka, u tlhela u xi komba leswaku sweswo swi kombisa leswaku Yehovha wa xi rhandza. (Esa. 48:17, 18) Xi ta endla nhluvuko loko xi ya xi rhandza Yehovha swinene. Leswaku xichudeni xi fanelekela ku khuvuriwa, xi fanele xi endla ku cinca ko karhi. Swichudeni swin’wana swi nga ha boheka ku lahlekeriwa hi rifuwo ra swona. Van’wana va nga ha boheka ku tshika vanghana lava nga n’wi rhandziki Yehovha. Van’wana va nga ha fularheriwa hi maxaka ya vona lama nga laviki ku twa nchumu hi Timbhoni ta Yehovha. Yesu u tshembise leswaku lava n’wi landzelaka va ta kuma mikateko. Va ta kuma maxaka yo tala loko va tirhela Yehovha.—Mar. 10:29, 30 w21.06 4 ¶8-9

Muapostola Pawulo u fanise ntirho wo endla vadyondzisiwa ni ku byala mbewu, u kombise leswaku a hi fanelanga hi byala mbewu swi helela kwalaho. U byele Vakorinto a ku: “Mina ndzi byarile, Apolosi a cheleta . . . Nwina mi nsimu ya Xikwembu leyi rimiwaka.” (1 Kor. 3:6-9) Leswi hi nga vatirhi ‘ensin’wini ya Xikwembu,’ a hi byali mbewu ntsena kambe hi tlhela hi yi cheleta ni ku tshama hi ri karhi hi yi kamba loko yi kula. Hambiswiritano ha swi xiya leswaku i Xikwembu lexi endlaka leswaku mbewu yi kula. Hakunene i nkateko ku chumayela ni ku dyondzisa van’wana ntiyiso! Ntirho lowu wu endla hi tsaka. Muapostola Pawulo, loyi a pfuneke vanhu vo tala eTesalonika leswaku va va vadyondzisiwa, u hlamusele ndlela leyi a titwaka hayona, u te: “Hi wihi ntshembo wa hina kumbe ntsako kumbe harhi ya ku khana emahlweni ka Hosi ya hina Yesu hi nkarhi wa ku vuya kakwe? Xana a hi n’wina? Hakunene mi ku vangama ni ntsako wa hina.”—1 Tes. 2:19, 20; Mit. 17:1-4 w21.07 3 ¶5; 7 ¶17

Yehovha u koke un’wana ni un’wana wa hina leswaku a tshinela eka yena. (Yoh. 6:44) Anakanya hi leswi sweswo swi vulaka swona. Loko Yehovha a ri karhi a kambisisa timbilu ta vanhu va tibiliyoni laha misaveni, u vone leswaku u ni mbilu leyinene naswona u ta n’wi rhandza. (1 Tikr. 28:9) Yehovha u ku tiva kahle, wa ku twisisa naswona wa ku rhandza. Swa chavelela ku tiva leswi! Yehovha wa khathala swinene hi wena ni hi vamakwerhu hinkwavo lava nga Vakreste. Leswaku a hi pfuna hi yi twisisa kahle mhaka leyi, Yesu u fanise Yehovha ni murisi. Loko murisi a ri ni tinyimpfu ta 100 ivi ku lahleka yin’we, xana u ta endla yini? U ta ‘siya leta 99 etintshaveni kutani a ya lava leyi lahlekeke.’ Loko murisi a kume nyimpfu yakwe, a nge yi hlundzukeli hileswi yi lahlekeke. Kambe u ta tsaka swinene. Hi dyondza yini? Tinyimpfu hinkwato i ta risima eka Yehovha. Yesu u te: “Tata wa mina la nga ematilweni a nga naveli leswaku un’wana wa lava lavatsongo a lova.”—Mat. 18:12-14. w21.06 20 ¶1-2

Loko hi anakanyisisa hi rirhandzu leri Xikwembu xi hi kombeke rona, swi endla hi xi rhandza swinene ni ku tiyisa vuxaka bya hina na xona. (Rhom. 8:38, 39) Swi endla hi lava ku tekelela xikombiso xa Yesu. (1 Pet. 2:21) Loko masiku ya Xitsundzuxo ma ri karhi ma tshinela, hi hlaya tindzimana ta le Bibeleni leti vulavulaka hi mavhiki ya Yesu yo hetelela a ri laha misaveni, rifu rakwe ni ku pfuxiwa kakwe. Hi siku ra Xitsundzuxo, mbulavulo lowu vaka kona wu hi tsundzuxa rirhandzu ra Yesu. (Efe. 5:2; 1 Yoh. 3:16) Loko hi ri karhi hi hlaya hi xikombiso xa ku tinyiketela ka Yesu ni ku anakanyisisa hi xona, hi susumeteleka ku “famba hilaha yena a fambeke hakona.” (1 Yoh. 2:6) Hi tiyimisele ku tshama hi ri karhi hi rhandziwa hi Xikwembu. (Yuda 20, 21) Hi rhandziwa hi Xikwembu loko xi yingisa, hi kwetsimisa vito ra xona hi tlhela hi xi tsakisa. (Swiv. 27:11; Mat. 6:9; 1 Yoh. 5:3) Ku va kona eXitsundzuxweni swi hi susumetela ku hanya hi ndlela leyi nga ta kombisa leswaku hi lava ku tshama hi ri karhi hi rhandziwa hi Yehovha! w22.01 23 ¶17; 25 ¶18-19

Yehovha u hi nyike ntshunxeko wo tihlawulela. Hi kota ku tihlawulela leswi hi lavaka ku swi endla evuton’wini. Tata wa hina wa rirhandzu wa tsaka loko hi hlawula ku n’wi tirhela. (Ps. 84:11; Swiv. 27:11) Hi nga tirhisa ntshunxeko wa hina wo tihlawulela hi ku endla swiboho leswinene. Hi nga tekelela xikombiso xa Yesu hi ku hlawula ku rhangisa swilaveko swa van’wana ku tlula swa hina. Siku rin’wana, Yesu ni vaapostola vakwe a va karhele swinene, hiloko va ya endhawini leyi nga riki na vanhu leswaku va ya wisanyana. Kambe a swi vanga tano. Ntshungu wu va lave kukondza wu va kuma naswona a wu lava ku dyondza swo tala eka Yesu. Kambe Yesu a nga kwatanga. Ematshan’weni ya sweswo, u wu twele vusiwana. Xana u endle yini? ‘U sungule ku wu dyondzisa swilo swo tala.’ (Mar. 6:30-34) Loko hi tekelela Yesu hi ku tirhisa nkarhi ni matimba ya hina leswaku hi pfuna van’wana, hi vangamisa Tata wa hina wa le tilweni.—Mat. 5:14-16. w21.08 3 ¶7-8

Yehovha a nga langutelanga leswaku hinkwerhu hi fana. Leswi swi vonaka kahle eka ntumbuluko wakwe ku katsa na hina vanhu. Un’wana ni un’wana wa hina i wa nkoka. Hikwalaho, Yehovha a nga ku ringanisi ni van’wana. U kambela leswi mbilu ya wena yi nga xiswona. (1 Sam. 16:7) U tiva vuswikoti bya wena, ku tsana ka wena ni ndlela leyi u kurisiweke hayona. A nga lavi leswaku u endla leswi u tsandzekaka ku swi endla. Hi fanele hi tekelela Yehovha hi ku tivona hi ndlela leyi a hi vonaka hayona. Hikwalaho, hi ta kota ku “ehleketa kahle” hi nga tivoni hi tlakukile ku tlula van’wana kumbe ku tivona hi nga pfuni nchumu. (Rhom. 12:3) I ntiyiso leswaku, hi nga pfuneka hi ku tekelela xikombiso lexinene xa vamakwerhu vo tshembeka lava tirhaka kahle ensin’wini. (Hev. 13:7) Sweswo swi ta hi pfuna hi kuma tindlela leti hi nga ti tirhisaka leswaku swi hi fambela kahle ensin’wini. (Filp. 3:17) Kambe ku na ku hambana eka ku tekelela xikombiso lexinene xa munhu un’wana ni ku tiringanisa na yena. w21.07 20 ¶1-2

U nga tiyisa ripfumelo ra wena eka Muvumbi hi ku tinyika nkarhi wo langutisa swiharhi, swimilana ni tinyeleti. (Ps. 19:1) Loko u ya u dyondza hi swilo sweswo, u ta tiyiseka leswaku Yehovha i Muvumbi. Loko u dyondza hi ntumbuluko, anakanyisisa hileswi sweswo swi ku dyondzisaka swona hi Muvumbi. (Rhom. 1:20) Hi xikombiso, dyambu ri hi nyika miseve leyi lavekaka leswaku hi kota ku hanya kambe yi nga tlhela yi va ni khombo. Hi fanele hi sirheleriwa eka miseve yoleyo leyi nga ni khombo. Swi tano, ha sirheleleka! Njhani? Misava ya hina yi ni ozone layer leyi endlaka leswaku miseve ya dyambu leyi nga ni khombo yi nga hi vavisi. Loko miseve leyi nga ni khombo yi ya yi tlhava, xisirhelelo xa hina na xona xi tirha hi matimba leswaku xi hi sirhelela. Xana leswi a swi ku endli u swi vona leswaku ku ni Muvumbi loyi a nga ni vutlhari loyi a vumbeke swilo leswi? w21.08 17 ¶9-10

Hambiloko munhu se a khuvuriwile, hi fanele hi ya emahlweni hi n’wi rhandza ni ku n’wi xixima. (1 Yoh. 4:20) Hi nga swi endla njhani leswi? Ndlela yin’wana leyi hi nga swi kombisaka hayona i ku n’wi tshemba. Hi xikombiso, loko a endla swo karhi, a hi nge hatliseli ku ehleketa leswaku swi bihile kumbe u endla tano hileswi a lavaka ku vuyeriwa yena n’wini. Ematshan’weni ya sweswo, hi ta xixima vamakwerhu ni ku tlhela hi va teka va ri lava tlakukeke eka hina. (Rhom. 12:10; Filp. 2:3) Hikwalaho, kombisa musa ni tintswalo eka vanhu hinkwavo. Loko hi lava ku va exikarhi ka lava nga ta vitana Tata wa vona Yehovha hilaha ku nga heriki, hi fanele hi tirhisa Rito ra Xikwembu evuton’wini bya hina. Hi xikombiso, Yesu u dyondzise leswaku hi fanele hi kombisa musa ni tintswalo eka vanhu hinkwavo, hambi ku ri valala va hina. (Luka 6:32-36) Mikarhi yin’wana hi nga ha vona swi hi tikela ku endla tano. Loko swi ri tano, hi fanele hi dyondza ku ehleketa ni ku endla swilo ku fana na Yesu. Loko hi wa hi pfuka leswaku hi yingisa Yehovha ni ku tekelela Yesu, hi komba Tata wa hina wa le tilweni leswaku hi lava ku va endyangwini wakwe hilaha ku nga heriki. w21.08 6 ¶14-15

Titshege hi Yehovha. U hi tshembisa mikateko yo tala loko hi n’wi tshemba hi tlhela hi n’wi tirhela hi timbilu ta hina hinkwato. Bibele yi ni swikombiso swo tala swa malandza ya Yehovha lama n’wi tirheleke hi timbilu ta wona hinkwato. Mikarhi yo tala, a ma fanele ma endla swo karhi leswaku ma ta kuma mikateko ya Yehovha. Hi xikombiso, Yehovha u katekise Abrahama endzhaku ka loko a sukele kaya rakwe “hambileswi a a nga ku tivi lomu a a ya kona.” (Hev. 11:8) Yehovha u katekise Yakobo endzhaku ka loko a tshwimbirisane ni ntsumi. (Gen. 32:24-30) Loko Vaisrayele va ri ekusuhi ni ku nghena eTikweni leri Tshembisiweke, va kote ku tsemakanya Nambu wa Yordani endzhaku ka loko Vaprista va pete milenge ya vona ematini. (Yox. 3:14-16) Na wena u nga dyondza swo tala eka vamakwerhu va manguva lawa lava titshegeke hi Yehovha leswaku va ya emahlweni va n’wi tirhela. w21.08 29-30 ¶12-14

N’wina vamakwerhu lava dyuhaleke, mi yi tiva kahle ndlela leyi swilo a swi endliwa hayona khale kambe mi tiyimisele ku ya emahlweni mi dyondza ndlela leyi swi endliwaka hayona sweswi. N’wina vadyuhari lava ha ku khuvuriwaka na n’wina mi nga pfuna van’wana hi tindlela to tala. Vantshwa va ta swi tsakela ku twa mitokoto ya n’wina ni leswi mi swi dyondzeke evuton’wini. Loko mi ‘hanya hi ku nyika’ hi ku tirhisa mitokoto ya n’wina, Yehovha u ta mi katekisa swinene. (Luka 6:38) Loko vadyuhari ni vantshwa mi va vanghana, mi ta kota ku seketelana. (Rhom. 1:12) Hinkwenu mi ni swo tala leswi mi nga pfunanaka ha swona. Vadyuhari va ni vutlhari ni ntokoto lowu va wu kumeke loko va ri karhi va kula. Vantshwa va ni matimba yo tala. Loko vantshwa ni vadyuhari va tirhisana tanihi vanghana, swi ta yisa ku dzuneka eka Tata wa hina wa le matilweni loyi a nga ni rirhandzu naswona swi ta vuyerisa vandlha hinkwaro. w21.09 8 ¶3; 13 ¶17-18

Hikwalahokayini Vayuda vo tala va khunguvanyekile mayelana ni rifu ra Yesu? A va teka Yesu a ri xigevenga ni mudyohi, ku nga ri Mesiya hileswi a feleke emhandzini. (Det. 21:22, 23) Vayuda lava a va kaneta Yesu va tsandzekile ku vona leswaku Yesu a nga ri na nandzu naswona swihehlo leswi a a hehliwa hi swona a ku nga ri ntiyiso. Vanhu lava a va tamele nandzu wakwe a va nga ri na mhaka ni nawu. Huvo leyi tlakukeke ya Vayuda yi hlangane hi ku hatlisa leswaku yi ta n’wi avanyisa swi nga ri enawini. (Luka 22:54; Yoh. 18:24) Ematshan’weni yo yingisela swihehlo leswi a a hehliwa hi swona ni ku lava vumbhoni, vaavanyisi va lave “vumbhoni bya mavunwa byo hehla Yesu leswaku va ta n’wi dlaya.” (Mat. 26:59; Mar. 14:55-64) Endzhaku ka loko Yesu a pfuxiwile eku feni, vaavanyisi volavo vo homboloka va hakele masocha ya Varhoma lawa a ma rindze sirha rakwe “mali yo tala ya silivhere” leswaku ma byela vanhu mavunwa ya leswi endleke esirheni ku nga ri na munhu.—Mat. 28:11-15. w21.05 11 ¶12-13

Yehovha a nga herisa misava leyi nkarhi wun’wana ni wun’wana. Kambe ndlela leyi a lehisaka mbilu hayona yi hi pfunile! Vatukulu hinkwavo va Adamu na Evha va velekiwa ni xidyoho. Hambiswiritano, Yehovha wa va rhandza naswona wa khathala swinene hi vona naswona u tshembise ku herisa misava leyi yo homboloka. (1 Yoh. 4:19) Nakambe u veke siku leri a nga ta herisa ku xaniseka hinkwako. Xana rirhandzu rakwe a ri fanelanga ri hi susumetela ku tiyisela hilaha hi nga kotaka hakona? Yehovha u hi vekele xikombiso lexinene ngopfu xa ku tiyisela. Yesu u tekelele xikombiso xa Tata wakwe xa ku tiyisela. Loko a ha ri laha misaveni, u tiyisele ku rhukaniwa, ku khomisiwa tingana ni rifu emhandzini ya nxaniso hikwalaho ka hina. (Hev. 12:2, 3) A swi kanakanisi leswaku xikombiso xa Yehovha xa ku tiyisela hi xona lexi pfuneke Yesu a kota ku tiyisela. Na hina xi nga hi pfuna. w21.07 12-13 ¶15-17

Siku ni siku hi vona tintswalo ta Tata wa hina wa le matilweni. (Ps. 103:10-14) Hambileswi mikarhi yin’wana vadyondzisiwa va Yesu a va pfa va endla swihoxo kambe a a va rivalela ni ku va komba tintswalo. U kale a nyikela ni hi vutomi byakwe leswaku hi ta rivaleriwa swidyoho swa hina. (1 Yoh. 2:1, 2) Hi tiyisa rirhandzu leri hi nga na rona eka vamakwerhu hi ku va ‘rivalela hi ku tshunxeka.’ (Efe. 4:32) Mikarhi yin’wana swi nga ha hi tikela ku rivalela van’wana kambe hi fanele hi tikarhata swinene. Makwerhu un’wana waxisati u boxa ndlela leyi nhlokomhaka ya Xihondzo xo Rindza leyi nge “Rivalelanani Hi ku Ntshunxeka,” yi n’wi pfuneke hayona leswaku a kota ku endla tano. U ri: “Nhlokomhaka leyi yi hlamusela leswaku ku rivalela van’wana a swi vuli swona leswaku u pfumelelana nileswi va swi endleke kumbe a swi ku twisanga ku vava. Kambe ku va rivalela swi ta ku pfuna leswaku u nga vi na xikhomela naswona u tshama u ri ni ku rhula.” Loko hi rivalela vamakwerhu, hi kombisa leswaku ha va rhandza naswona hi tekelela Tata wa hina Yehovha. w21.09 23-24 ¶15-16

Yesu a a wu rhandza ntiyiso mayelana ni Xikwembu ni swikongomelo swa xona. A hanya hi ndlela leyi kombisaka leswaku u rhandza ntiyiso naswona a a wu dyondzisa van’wana. (Yoh. 18:37) Valandzeri va Yesu na vona a va wu rhandza ntiyiso. (Yoh. 4:23) Hikwalaho, muapostola Petro u vule leswaku ndlela leyi Vakreste va hanyaka hayona i “ndlela ya ntiyiso.” (2 Pet. 2:2) Leswi a va wu rhandza swinene ntiyiso, va bakanye tidyondzo ta vukhongeri bya mavunwa, ta mindhavuko ni mavonelo lama hoxeke lama nga fambisaniki ni ntiyiso. (Kol. 2:8) Ninamuntlha, Vakreste va ntiyiso va tikarhatela ku ya emahlweni va “famba entiyisweni” naswona va tirhisa Bibele eka swilo hinkwaswo leswi va swi endlaka. (3 Yoh. 3, 4) Vanhu va Xikwembu namuntlha a va tiendli onge va tiva hinkwaswo leswi nga eBibeleni. Mikarhi yin’wana va pfa va endla swihoxo hi matwisiselo ya tidyondzo to karhi kumbe ndlela leyi nhlangano wu faneleke wu kongomisiwa hayona. Loko ntiyiso wu ya wu voninga, va endle ku cinca loku faneleke. w21.10 21-22 ¶11-12

Ku fana ni makhumbi lamakulu lawa a ma sirhelela miti ya khale, rirhandzu lerikulu ra Yehovha ra hi sirhelela eka makhombo lama endlaka leswaku hi nga tshembeki eka yena. Nakambe ri n’wi susumetela leswaku a tshinela ekusuhi na hina. (Yer. 31:3) Mupisalema Davhida u boxe swin’wana leswi hlamuselaka nsirhelelo lowu vanhu va Xikwembu va tiphinaka ha wona. U te: “Xikwembu i vutumbelo bya mina lebyi sirhelelekeke, Xikwembu lexi ndzi rhandzaka.” U tlhele a ku: “I khokholo ra mina naswona wa ndzi rhandza, vutumbelo bya mina ni muponisi wa mina, xitlhangu xa mina ni Loyi ndzi tumbelaka eka yena.” (Ps. 59:17; 144:2) Hikwalahokayini Davhida a fanise rirhandzu lerikulu ra Yehovha ni vutumbelo lebyi sirhelelekeke? Loko ntsena ha ha ri malandza ya Yehovha, u ta hi nyika nsirhelelo lowu hi wu lavaka leswaku hi hlayisa vuxaka bya hina na yena swi nga ri na mhaka leswaku hi tshama kwihi. w21.11 6 ¶14-15

Loko Yesu ni vadyondzisiwa vakwe va kumiwa hi xidzedze elwandle, Yesu u tirhise nkarhi wolowo leswaku a va pfuna va va ni ripfumelo leri tiyeke. (Mat. 8:23-26) Loko xidzedze xi ya xi kariha ni mati ma ya ma nghena endzeni ka xikepe, Yesu a a etlele. Loko vadyondzisiwa vakwe lava a va chuhile va n’wi pfuxa leswaku a ta va ponisa, Yesu u va tshinyile a ku: “Hikwalaho ka yini mi chava, n’wina va ripfumelo leritsongo?” Xana u ni swiphiqo leswikulu? Kumbexana swi nga ha vangiwa hi timhangu ta ntumbuluko. Kumbexana i swiphiqo swa rihanyo leswi ku hetaka matimba naswona swi ku siyaka u nga tivi ta wena. U nga ha karhateka hikwalaho ka swona kambe u nga swi pfumeleli swi ku endla u nga ha n’wi tshembi Yehovha. Tshinela eka yena hi xikhongelo. Tiyisa ripfumelo ra wena hi ku anakanyisisa hi ndlela leyi Yehovha a ku pfuneke hayona enkarhini lowu nga hundza. (Ps. 77:11) Sweswo swi ta ku endla u tiyiseka leswaku a nge pfuki a ku tshikile. w21.11 22 ¶7, 10

Swi nga endleka van’wana va tibyela ku ku yiva i ku teka leswi nga riki swa vona ntsena. Kambe va nga ha va na rintiho hi tindlela tin’wana. Hi xikombiso, muxavisi loyi a a tirhisa swikalo kumbe mimpimo leyi nga riki yona leswaku a kanganyisa vaxavi vakwe, a swi fana niloko a ri eku yiveni. Levhitika 19:13 yi hlamusela ndlela leyi ku yiva swi fanaka hayona ni ku nga tshembeki loku nga kona eka swa mabindzu, yi ri: “U nga tshuki u dyelela munhukuloni.” Hikwalaho, loko munhu a nga tshembeki loko a fambisa mabindzu yakwe, u le ku yiveni. Nawu wa vunhungu a wu vula leswaku ku yiva swi bihile kutani leswi kumekaka ebukwini ya Levhitika swi hi pfuna ku vona leswaku hi nga wu tirhisa njhani nawu lowu loko hi lava ku tshembeka eka swilo hinkwaswo. Na hina hi nga vuyeriwa loko hi anakanyisisa hi ndlela leyi Yehovha a swi vengaka hayona ku nga tshembeki ni ku yiva. Hi nga ha tivutisa leswi: ‘Xana swi kona swin’wana leswi boxiweke eka Levhitika 19:11-13 leswi ndzi faneleke ndzi swi lulamisa evuton’wini bya mina? Xana ndzi fanele ndzi endla ku cinca ko karhi loko swi ta eka ndlela leyi ndzi ma fambisaka hayona mabindzu ya mina kumbe ntirho?’ w21.12 9-10 ¶6-8

Siku ni siku loko u khongela, ehleketa hi swihoxo leswi u swi endleke kutani u kombela Yehovha a ku rivalela. Loko u endle xidyoho lexikulu, swi nga lava leswaku u ya ni le ka vakulu u ya kombela ku pfuniwa. Va ta ku yingisela va tlhela va ku pfuna hi ku tirhisa Rito ra Xikwembu. Va ta khongela na wena, va kombela Yehovha a ku rivalela hi ku tirhisa gandzelo ra Yesu leswaku u “ta hola.” (Yak. 5:14-16) Nakambe swi ta ku pfuna ku anakanya hi nkutsulo. Na wena swi nga endleka u tlhaveka loko u ehleketa hi maxangu lawa N’wana wa Xikwembu a ma voneke. Ku anakanyisisa hi nkutsulo, swi ta endla leswaku u ya u n’wi rhandza ngopfu Yesu swin’we ni Tata wakwe. Lembe ni lembe hi kombisa leswaku ha wu khensa nkutsulo hi ku va kona eXitsundzuxweni xa rifu ra Yesu ni ku rhamba van’wana leswaku va va kona. Mawaku nkateko wonghasi lowu Yehovha a hi nyikeke wona, wo dyondzisa van’wana hi N’wana wakwe! w21.04 18-19 ¶13-16

Ehleketa ndlela leyi Yesu a titweke hayona loko vanhu vo tala va ya hlangana na yena. A a hete vusiku hinkwabyo a ri karhi a khongela. Swi nga ha endleka leswaku a a karhele ngopfu kambe loko a va vona, u va twele vusiwana vanhu lava a va ri swisiwana ni lava a va vabya. A nga lo va hanyisa ntsena kambe u tlhele a nyikela yin’wana ya mivulavulo leyi khutazaka ematin’wini, ku nga Dyondzo ya le Ntshaveni. (Luka 6:12-20) Yesu u tirhise nkarhi wakwe leswaku a pfuna van’wana hambiloko a lava ku va yexe. Ehleketa ndlela leyi Yesu a titweke hayona loko a twa leswaku munghana wakwe Yohane Mukhuvuri u dlayiwile. Bibele yi ri: “Loko a twa [hi ta rifu ra Yohane], Yesu a suka kwalaho a famba hi xikepe a ya endhawini leyi nga riki na vanhu.” (Mat. 14:10-13) Ntshungu wu n’wi rhangele ku fika endhawini leyi a a lava ku va yexe eka yona. (Mar. 6:31-33) Yesu u swi xiyile leswaku a wu lava mpfuno ni nchavelelo lowu humaka eka Xikwembu kutani a nga banga mariri.—Luka 9:10, 11. w22.02 21 ¶4, 6

Hi fanele hi endla yini loko hi xiya leswaku hi tlulane milenge ni makwerhu? Hi fanele hi khongela eka Yehovha. Hi nga n’wi kombela leswaku a katekisa matshalatshala ya hina yo kondletela ku rhula ni makwerhu. I swinene ku sungula hi ku tikambela. Hi nga tivutisa swivutiso swo fana ni leswi: ‘Xana ndzi tiyimisele ku tshika manyunyu kutani hi ku titsongahata ndzi kombela ku rivaleriwa naswona ndzi kondletela ku rhula? Xana Yehovha na Yesu va ta titwa njhani loko ndzi va wo rhanga ku kondletela ku rhula ni makwerhu?’ Tinhlamulo ta swivutiso leswi, ti ta hi pfuna leswaku hi tikarhatela ku yingisa Yesu kutani hi kondletela ku rhula ni makwerhu. Loko hi ya lulamisa timhaka ni makwenu, hi fanele hi endla tano hi moya wo titsongahata. (Efe. 4:2, 3) Hi fanele hi ya eka makwerhu yoloye hi xikongomelo xo papalata ku n’wi pfatlanya. Tsundzuka leswaku ku kondletela ku rhula ni makwavo hi swona swa nkoka ku tlula ku kombana hi tintiho.—1 Kor. 6:7. w21.12 26 ¶13-16

Yesu u twe ku vava swinene hikuva a a swi tiva leswaku Vayuda vo tala a va nga ta ma yingisela mahungu lamanene ya Mfumo lawa a ma chumayela. Muti wa Yerusalema a wu ta lovisiwa naswona Vayuda lava poneke a va ta yisiwa evuhlongeni. (Luka 21:20-24) Lexi twisaka ku vava, vanhu vo tala a va n’wi yingisanga Yesu. Xana vanhu va laha u tshamaka kona, va angula njhani loko u va chumayela mahungu lamanene ya Mfumo? Loko ku ri vanhu vatsongo lava amukelaka loko u va chumayela, u nga dyondza yini eka mihloti ya Yesu? Yehovha wa khathala hi vanhu. Mihloti ya Yesu yi hi tsundzuxa ndlela leyi Yehovha a khathalaka hayona hi vanhu. “A nga naveli leswaku ku lova ni un’we, u lava leswaku vanhu hinkwavo va hundzuka.” (2 Pet. 3:9) Namuntlha hi kombisa leswaku hi rhandza vanhu hi ku va chumayela mahungu lamanene lama fikelelaka timbilu ta vona.—Mat. 22:39. w22.01 16 ¶10-12

Ripfumelo ra wena ri ta tiya loko u anakanyisisa hi ndlela leyi Yehovha a ma pfuneke hayona malandza yakwe ku katsa na wena. Xa nkoka ngopfu, ndlela leyi u n’wi rhandzaka hayona Yehovha yi ta kula. Ku tlula swilo hinkwaswo, rirhandzu hi rona ra nkoka leri nga ku susumetelaka ku yingisa Yehovha hi mbilu hinkwayo, ku titsona swo karhi leswaku u n’wi tsakisa ni ku tiyisela miringo. (Mat. 22:37-39; 1 Kor. 13:4, 7; 1 Yoh. 5:3) A xi kona lexi nga xa nkoka ku tlula ku va ni vuxaka lebyinene na Yehovha! (Ps. 63:1-7) Tsundzuka leswaku xikhongelo, ku dyondza Bibele ni ku anakanyisisa i xiphemu xa vugandzeri bya hina. Ku fana na Yesu, lava ndhawu leyi nga lo tititi, laha u nga ta va na Yehovha. U nga pfumeleli nchumu wo karhi wu ku kavanyeta. Nakambe kombela Yehovha a ku pfuna u nga kavanyeteki loko u ri karhi u dyondza Bibele, u anakanyisisa niloko u ri etinhlengeletanweni ta vandlha. Loko u wu tirhisa hi vutlhari nkarhi wa wena sweswi, Yehovha u ta ku katekisa hi vutomi lebyi nga heriki eparadeyisini.—Mar. 4:24. w22.01 31 ¶18-20

Hi endla leswi hi tshamelaka ku ehleketa ha swona. Hi yona mhaka leyi Yesu a hi dyondziseke leswaku hi papalata ku ehleketa hi swilo leswi nga ta hi endlisa xidyoho. (Mat. 5:21, 22, 28, 29) Hi lava ku tsakisa Tata wa hina wa le tilweni. Hikwalaho, i swa nkoka leswaku loko hi teriwa hi miehleketo yo biha hi namba hi ku yi thyaa! Yesu u te: “Leswi humaka enon’wini swi huma embilwini.” (Mat. 15:18) Mavulavulelo ya hina ma paluxa leswi hi nga swona. Tivutise: ‘Xana ndzi vulavula ntiyiso hambiloko ku endla tano swi ta ndzi khela matluka? Loko ku ve u catile, xana wa swi papalata ku tlanga hi rirhandzu ni vanhu van’wana? Xana ndzi ma papalata hi ku helela mavulavulelo lama thyakeke? Xana ndzi hlamula kahle hambiloko un’wana a ndzi kwatisile?’ Swi ta ku pfuna ku ehleketa hi swivutiso leswi. Loko u tshika ku hemba ni mavulavulelo lama nga basangiki swi ta ku olovela ku tshika vumunhu bya khale. w22.03 5 ¶12-14

Lava kombelaka switsundzuxo emhakeni yo karhi ku ri ni ku yimela ku tsundzuxiwa, vuxaka bya vona na Yehovha bya tiya swinene ku tlula bya lava va nga swi laviki. Hikwalaho, u nga chavi ku kombela switsundzuxo. Hi le ka swiyimo swihi laha hi nga kombelaka switsundzuxo eka makwerhu? Xiya swiyimo leswi landzelaka. (1) Makwerhu wa xisati u kombela muhuweleri loyi a nga ni ntokoto leswaku a n’wi heleketa loko a ya dyondza ni xichudeni xa yena xa Bibele, ivi endzhaku a kombela switsundzuxo swa ndlela leyi a nga antswisaka hayona. (2) Makwerhu wa xisati loyi a nga tekiwangiki u lava ku xava mpahla kutani u vutisa makwerhu wa xisati loyi a kuleke leswaku u yi vona njhani mpahla leyi a yi hlawuleke. (3) Makwerhu u lava ku nyikela mbulavulo wakwe wo sungula. U kombela makwerhu loyi a nga ni ntokoto wo nyikela mivulavulo leswaku a n’wi yingisela kutani endzhaku a kombela switsundzuxo swa ndlela leyi a nga antswisaka hayona eka mbulavulo wakwe. Hambi ku ri makwerhu loyi a nga ni malembe yo tala a ri karhi a nyikela mivulavulo, u ta va a endla kahle loko a kombela switsundzuxo eka swivulavuri leswi nga ni ntokoto ivi a tirhisa leswi a byeriwaka swona.—Swiv. 19:20. w22.02 13 ¶15-17

Yehovha wa hi rhandza naswona wa khathala hi hina, hilaha a endleke hakona eka Yesu loko a langutane ni ntirho wo tika wa laha misaveni. (Yoh. 5:20) U tiyise ripfumelo ra Yesu, a n’wi khutaza ni ku n’wi nyika leswi a a swi lava leswaku a kota ku hanya. Yehovha u ye emahlweni a kombisa n’wana wakwe rirhandzu, nileswaku a a n’wi amukela. (Mat. 3:16, 17) Leswi Yesu a a titshege hi Tata wakwe loyi a nga ni rirhandzu, a a nga titwi a ri ni xivundza. Ku fana na Yesu, hinkwerhu ka hina hi vone rirhandzu ra Yehovha hi tindlela to tala. Ehleketa hi mhaka leyi: Yehovha u hi kokele eka yena naswona u hi nyike ndyangu lowu nga ni rirhandzu ni vun’we lowu hi endlaka hi tsaka ni ku hi khutaza loko hi hele matimba. (Yoh. 6:44) Nakambe Yehovha u tlhela a hi nyika hinkwaswo leswi hi swi lavaka leswaku hi tiyisa ripfumelo ra hina. U tlhela a hi pfuna leswaku hi kuma swilo hinkwaswo leswi hi swi lavaka ku hi kota ku hanya. (Mat. 6:31, 32) Loko hi ehleketisisa hi rirhandzu ra Yehovha, ndlela leyi hi n’wi rhandzaka hayona yi ta ya yi kula. w21.09 22 ¶8-9

A wu hanya njhani loko u nga si sungula ku dyondza Bibele ni Timbhoni ta Yehovha? Kumbexana ni ku hlamuseleka a swi hlamuseleki. Vo tala va hina kumbexana a ho tihanyela ku fana ni vanhu va misava leyi lava nga tiviki leswinene ni leswo biha. Loko ku ve vutomi bya hina a byi ri tano, a hi “nga ri na ntshembo naswona a [hi] nga tivi Xikwembu emisaveni.” (Efe. 2:12) Kambe loko u ri karhi u dyondza Bibele, u dyondze leswaku u ni Tatana wa le tilweni loyi a ku rhandzaka ngopfu. U xiye leswaku loko u lava ku tsakisa Yehovha ni ku va un’wana wa vagandzeri vakwe, u fanele u cinca mahanyelo ya wena ni ndlela leyi u ehleketaka ha yona. U dyondze ku hanya hi milawu yakwe leyi tlakukeke. (Efe. 5:3-5) Yehovha Muvumbi ni Tata wa hina la nga le matilweni u ni mfanelo yo byela swirho swa ndyangu wakwe ndlela leyi swi faneleke swi hanya hayona. U lava leswaku loko hi nga si khuvuriwa hi tikarhatela ku “[hluvula] vumunhu bya khale ni mikhuva ya byona.” w22.03 2 ¶1-3

Lava tinyimpfu tin’wana na vona va va kona leswaku va va vahlaleri eXitsundzuxweni naswona va anakanyisisa hi ntshembo wa vona. Va wu langutela hi mahlongati mbulavulo wa Xitsundzuxo hikuva wu vulavula ngopfu hileswi Kreste ni lava 144 000, lava a nga ta fuma na vona va nga ta swi endlela vanhu hi nkarhi wa Mfumo wa Gidi ra Malembe. Ehansi ka Mfumo wa Hosi Yesu Kreste, lava a nga ta fuma na vona va ta pfuneta eku pfuxeteni ka misava yi va paradeyisi ni ku pfuna vanhu leswaku va tlhela va nga ha vi na xidyoho. Mayana ku tsakisa ka swona loko vahlaleri va timiliyoni lava vaka kona eXitsundzuxweni, va swi vona hi mahlo ya mianakanyo ku hetiseka ka vuprofeta bya le Bibeleni, byo tanihi lebyi nga eka Esaya 35:5, 6; 65:21-23 na Nhlavutelo 21:3, 4. Loko va tivona va ri emisaveni leyintshwa ni maxaka ya vona, ntshembo lowu va nga na wona wo hanya eparadeyisini wa tiya naswona hambi ko ba lexi dumaka, a va nge tshiki ku tirhela Yehovha.—Mat. 24:13; Gal. 6:9. w22.01 21 ¶5-7

I yini nkutsulo? Nkutsulo i vutomi bya Yesu lebyi a byi nyikeleke leswaku a vuyisa leswi lahliweke hi Adamu. (1 Kor. 15:22) Hikwalahokayini hi lava ku kutsuriwa? Nawu lowu Yehovha a a wu nyike Vaisrayele, a wu vula leswaku vutomi byi fanele byi rihiwa hi vutomi. (Eks. 21:23, 24) Adamu a a nga ri na xidyoho kambe u tlange hi nkateko lowu a a nyikiwe wona. Leswi Yesu a a nga ri na xidyoho, u nyikele hi vutomi byakwe leswaku Xikwembu xi ta kota ku fikelela xikongomelo xa xona. (Rhom. 5:17) Hikwalaho, u ve “Tatana La Nga Riki Na Makumu” eka hinkwavo lava nga ni ripfumelo eka nkutsulo. (Esa. 9:6; Rhom. 3:23, 24) Yesu u nyikele hi vutomi byakwe hileswi a rhandzaka Tata wakwe wa le tilweni swin’we na hina. (Yoh. 14:31; 15:13) Rirhandzu rero, hi rona leri endleke leswaku a endla ku rhandza ka Tata wakwe ni ku tshama a tshembekile ku ya fika eku feni. Hikwalaho ka sweswo, Yehovha u ta kota ku fikelela xikongomelo xakwe hi vanhu ni misava. w21.04 14 ¶2-3