February

Yehovha u lava leswaku vanhu hinkwavo lava n’wi gandzelaka va tshama va tsakile. U le kusuhi ni un’wana ni n’wana naswona wa swi vona loko hi ri ni gome. (Ps. 145:18, 19) Xiya ndlela leyi Yehovha a n’wi khathaleleke hayona muprofeta Eliya. Wanuna yoloye wo tshembeka u hanye emikarhini leyi swiyimo a swi tika eIsrayele. Vagandzeri va Yehovha a va xanisiwa swinene, naswona valala va Xikwembu lava a va ri na matimba a va lava ku dlaya Eliya. (1 Tih. 19:1, 2) Xin’wana lexi a xi endla muprofeta Eliya a karhateka, a a ehleketa leswaku hi yena ntsena loyi a saleke eka vaprofeta va Yehovha. (1 Tih. 19:10) Xikwembu xi teke goza ro n’wi pfuna. Yehovha u rhumele ntsumi yi n’wi tiyisekisa leswaku a nga yexe, yi n’wi byele leswaku ku ni Vaisrayele vo tala lava chavaka Xikwembu! (1 Tih. 19:5, 18) Yesu u byele vadyondzisiwa vakwe leswaku va ta kuma maxaka evandlheni. (Mar. 10:29, 30) Yehovha Tata wa hina wa le Tilweni, u tshembise leswaku u ta pfuna hinkwavo lava lavaka ku n’wi tirhela.—Ps. 9:10. w21.06 8-9 ¶3-4

Vo tala va hi kaneta hikuva hi paluxa tidyondzo ta vukhongeri bya mavunwa. Vafundhisi va dyondzisa leswaku Xikwembu xi xupula vanhu vo biha etiheleni. Va endla tano hileswi va lavaka ku lawula vanhu. Leswi hi nga malandza ya Yehovha, ku nga Xikwembu lexi rhandzaka vanhu, hi paluxa dyondzo yoleyo ya mavunwa. Vafundhisi va tlhela va dyondzisa leswaku moya a wu fi. Hi dyondzisa vanhu leswaku dyondzo yoleyo a hi ntiyiso, loko a yi ri ntiyiso a ku nga ta va ni xilaveko xa ku pfuxiwa ka vafi. Nakambe vafundhisi va dyondzisa leswaku Xikwembu hi xona lexi hi lawulaka eka swilo hinkwaswo. Hi paluxa dyondzo yoleyo ya mavunwa hi ku byela vanhu leswaku un’wana ni un’wana u ni tshunxeko wo tihlawulela loko a lava ku gandzela Xikwembu kumbe a nga swi lavi. Xana vafundhisi va angula njhani? Hakanyingi va bava va khalakhasa! Loko hi rhandza ntiyiso, hi fanele hi yingisa leswi Xikwembu xi swi vulaka. (Yoh. 8:45, 46) Ku hambana na Sathana Diyavulosi, a hi nge tshiki ku tirhela Yehovha. Hi ta hanya hi leswi hi swi dyondzaka eBibeleni. (Yoh. 8:44) Xikwembu xi lava leswaku vanhu va xona va venga “swilo swo homboloka” kutani va “namarhela swo lulama” hilaha Yesu a endleke hakona.—Rhom. 12:9; Hev. 1:9. w21.05 10 ¶10-11

Hi fanele hi endla yini loko hi vona onge ha tikukumuxa kumbe hi ni makwanga? Hi fanele hi ku swi thyaa! Muapostola Pawulo u vule leswaku lava Diyavulosi “a va phaseke va ri karhi va hanya,” va nga swi kota ku balekela mintlhamu yakwe. (2 Tim. 2:26) Tsundzuka leswaku Yehovha u ni matimba yo tlula ya Sathana. Loko hi pfumela ku pfuniwa hi Yehovha, hi ta swi kota ku balekela mintlhamu ya Diyavulosi. Leswaku hi nga phasiwi hi mintlhamu ya Sathana, a hi fanelanga hi tikukumuxa kumbe ku va ni makwanga. Hi nga kota ku endla tano hi ku pfuniwa hi Xikwembu. Hikwalaho, kombela Yehovha siku ni siku leswaku a ku pfuna u tikambisisa. (Ps. 139:23, 24) U nga pfumeleli makwanga ni ku tikukumuxa swi dzima timitsu embilwini ya wena. Se swi ni malembe ya madzana, Sathana a ri muhloti wa vanhu. Kambe ku nga ri khale u ta bohiwa ni ku tlhela a lovisiwa. (Nhlav. 20:1-3, 10) Hi ri langutele hi mahlongati siku rero. Loko ha ha rindzele sweswo, a hi tshameni hi xalamukile eka mintlhamu ya Sathana. Tikarhatele ku papalata ku tikukumuxa ni makwanga. Tiyimisele ku “kaneta Diyavulosi kutani u ta baleka.” w21.06 19 ¶15-17

Yehovha wa tsaka loko munhu a amukela ntiyiso lowu nga eBibeleni a tlhela a wu dyondzisa van’wana. (Swiv. 23:15, 16) Yehovha u tsaka ngopfu loko a vona ntirho lowu hi wu endlaka namuntlha! Hi xikombiso, hambileswi emisaveni hinkwayo eka lembe ra ntirho ra 2020 ku veke ni ntungu, ku dyondzisiwe vanhu vo ringana 7 705 765 Bibele naswona sweswo swi endle leswaku vanhu vo ringana 241 994 va khuvuriwa. Vadyondzisiwa lava lavantshwa na vona va ta dyondza ni vanhu Bibele naswona sweswo swi ta endla leswaku nhlayo ya vadyondzisiwa yi engeteleka. (Luka 6:40) A swi kanakanisi leswaku Yehovha wa tsaka loko hi pfuna van’wana leswaku va va vadyondzisiwa. A swi olovi ku endla vadyondzisiwa kambe hi ku pfuniwa hi Yehovha hi nga swi kota ku dyondzisa swichudeni leswintshwa leswaku swi rhandza Tata wa hina wa le tilweni. A hi tiyimiseleni ku kuma vanhu lava hi nga dyondzaka na vona Bibele. Swi ta hi hlamarisa ngopfu ku vona ndlela leyi va nga ta angula hayona loko hi kombela ku dyondza na vona Bibele. w21.07 6-7 ¶14-16

Hosi Davhida u nyikele hi mali ni swilo swo tala leswaku a seketela ntirho wo aka tempele. (1 Tikr. 22:11-16) Loko hi nga ha ri na wona matimba yo katseka eka ku aka tiholo ta nhlangano, hi nga ha ya emahlweni hi seketela ntirho lowu hi ku nyikela hilaha hi nga kotaka hakona. Nakambe hi nga pfuna vantshwa hi mitokoto leyi hi veke na yona. Loko swi ta emhakeni ya malwandla, xiya xikombiso lexi muapostola Pawulo a hi vekeleke xona. U rhambe Timotiya loyi a ha ri muntshwa leswaku a famba na yena entirhweni wa vurhumiwa ni ku tlhela a n’wi dyondzisa tindlela to chumayela. (Mit. 16:1-3) Ndzetelo wa Pawulo wu pfune Timotiya leswaku a va muchumayeri wa vutshila wa mahungu lamanene. (1 Kor. 4:17) Endzhaku, Timotiya u tirhise leswi Pawulo a n’wi dyondziseke swona leswaku a letela van’wana. w21.09 12 ¶14-15

Hi nga dyondza yini eka mudyondzisiwa Apolosi na muapostola Pawulo? Vavanuna lava a va ma tiva kahle Matsalwa. A va dumile naswona a va ri vadyondzisi lavanene. Hinkwavo va tirhe ngopfu eku endleni ka vadyondzisiwa vo tala. Kambe a va nga vondzokani. (Mit. 18:24) Endzhaku ka nkarhinyana Apolosi a suke eKorinto, Pawulo u n’wi kombele leswaku a tlhelela. (1 Kor. 16:12) Apolosi a a tirhisa tinyiko takwe hi ndlela leyinene ku nga ku chumayela mahungu lamanene ni ku tiyisa vamakwerhu. Hi nga tiyiseka leswaku Apolosi a a titsongahata. Hi xikombiso, a ku kona laha Bibele yi kombisaka leswaku u khunguvanyekile loko Akhwila na Prisila va n’wi “hlamusela kahle ndlela ya Xikwembu.” (Mit. 18:24-28) Muapostola Pawulo a a yi tiva kahle mitirho leyinene leyi Apolosi a yi endleke. Kambe a nga vileli hileswaku vanhu va ta teka Apolosi a antswa ku n’wi tlula. Ku titsongahata ka Pawulo ni ku anakanyela kakwe ku vonaka eka ndzayo leyi a yi nyikeke vandlha ra le Korinto.—1 Kor. 3:4-6. w21.07 18-19 ¶15-17

Adamu na Evha va dyohele Xikwembu hi vomu kutani a swi fanela leswaku va hlongoriwa endyangwini wa xona. Kambe a ku ta endleka yini hi vana va vona? Leswi Yehovha a nga ni rirhandzu, u endle swi koteka leswaku lava n’wi yingisaka va va endyangwini wakwe. U endle tano hi ku nyikela hi N’wana wakwe la tswariweke a ri swakwe. (Yoh. 3:16) Gandzelo ra Yesu ri endle swi koteka leswaku vanhu vo tshembeka va 144 000 va hlawuriwa ku ya hanya etilweni tanihi vana Xikwembu. (Rhom. 8:15-17; Nhlav. 14:1) Nakambe vanhu va timiliyoni namuntlha va tirhela Yehovha hi ku tshembeka. Va ni ntshembo wo va endyangwini wa Xikwembu endzhaku ka ndzingo wo hetelela loko ku hela malembe ya 1 000. (Ps. 25:14; Rhom. 8:20, 21) Ninamuntlha va vula leswaku Yehovha Muvumbi wa vona i ‘Tatana.’ (Mat. 6:9) Lava nga ta pfuxiwa, na vona va ta nyikiwa nkarhi wo dyondza leswi Yehovha a swi languteleke eka vona. Lava nga ta hlawula ku n’wi yingisa, va ta va endyangwini wakwe. w21.08 5 ¶10-11

Muapostola Pawulo a a nyikiwe ntirho wo chumayela naswona a wu teka wu ri wa nkoka evuton’wini byakwe. U chumayele “erivaleni ni hi yindlu ni yindlu.” (Mit. 20:20) A a chumayela nkarhi wun’wana ni wun’wana lowu a a wu kuma! Hi xikombiso, loko a ha yimele vanghana vakwe eAtena, u chumayele ntlawa wa swidyondzeki naswona swi n’wi yingisile. (Mit. 17:16, 17, 34) Pawulo u chumayele ni loko a ri “ekhotsweni.” (Filp. 1:13, 14; Mit. 28:16-24) Pawulo u wu tirhise kahle nkarhi wakwe. Mikarhi yo tala a a rhamba van’wana leswaku va chumayela na yena. Hi xikombiso, eka riendzo rakwe ro sungula ra vurhumiwa u fambe na Yohane Marka, kasi eka riendzo rakwe ra vumbirhi u fambe na Timotiya. (Mit. 12:25; 16:1-4) A swi kanakanisi leswaku Pawulo u dyondzise vavanuna lava ku hlela vandlha, ku endla ntirho wa vurisi ni leswaku va va vadyondzisi lavanene.—1 Kor. 4:17. w22.03 27 ¶5-6

Van’wana a va tshembi leswaku ku ni Muvumbi hikuva va vula leswaku va tshemba ntsena eka swilo leswi va swi vonaka. Kambe entiyisweni va swi tshemba leswi va nga swi voniki, hi xikombiso va tshemba leswaku loko swilo swi ya ehenhla swi ta tlhela swi vuya ehansi. Ripfumelo leri ku vulavuriwaka ha rona eBibeleni ri katsa vumbhoni bya “swilo swa xiviri leswi nga voniwiki.” (Hev. 11:1) Swi lava nkarhi ni ku tikarhata leswaku hi tilavela vumbhoni bya hina vini kambe vanhu vo tala a va lavi ku endla tano. Munhu loyi a nga laveki ku tilavela vumbhoni hi yexe a nga hetelela a tibyele leswaku a ku na Xikwembu. Endzhaku ka loko van’wasayense van’wana va tilavele vumbhoni, va sungule ku tshemba leswaku Xikwembu hi xona xi tumbuluxeke tilo ni misava. Eku sunguleni a va tibyela leswaku a ku na Muvumbi hileswi va nga dyondzangiki hi Yena eyunivhesiti. Hambiswiritano, sweswi se va sungule ku tiva Yehovha ni ku n’wi rhandza. Kahlekahle hinkwerhu hi fanele hi tiyisa ripfumelo ra hina eka Xikwembu, swi nga ri na mhaka leswaku hi dyondzekile kumbe a hi dyondzekanga. w21.08 14 ¶1; 15-16 ¶6-7

Leswaku a kombisa tintswalo ta Yehovha, Yesu u tirhise xifaniso lexi khumbaka mbilu xa n’wana wa vusopfa. U rhurhe ekaya a ya endhawini ya le kule “a fika a tlanga hi rifuwo rakwe hi ku hanya vutomi bya vusopfa.” (Luka 15:13) Hi ku famba ka nkarhi u tisorile eka swiendlo swakwe swo biha, a sungula ku titsongahata naswona u teke goza ro tlhelela ekaya. Xana tata wakwe u angule njhani? Yesu u te: “Loko a ha ri ekulenyana, tata wakwe a n’wi vona a n’wi twela vusiwana, a tsutsuma a n’wi hlanganisa a fika a n’wi angarha, a n’wi tswontswa.” Tata wakwe a nga n’wi khomisanga tingana. Kambe u n’wi rivalerile ni ku n’wi amukela hi mandla mambirhi ekaya. Jaha leri a ri endle swilo swo biha ngopfu kambe loko tata wa rona a xiya leswaku se ri hundzukile, u ri rivalerile. Tatana wa le xifanisweni lexi, u yimela Yehovha. Exifanisweni lexi khumbaka mbilu, Yesu a a kombisa ndlela leyi Tata wakwe a swi rhandzaka hayona ku rivalela vadyohi lava hundzukaka hi timbilu ta vona hinkwato.—Luka 15:17-24. w21.10 8 ¶4; 9 ¶6

Namuntlha varhangeri va vukhongeri va we va pfuka leswaku va ringeta ku tumbeta vito ra Xikwembu. Va kale va ri susa ni le Tibibeleni ta vona naswona etikerekeni ta vona a va lavi na ku ri twa. Xana u kona loyi a nga kanakanaka leswaku Timbhoni ta Yehovha hi tona ntsena ti tirhisaka vito ra Xikwembu ni ku ri xixima hilaha ri faneleke hakona? Hi tirha hi matimba leswaku vito ra Xikwembu ri tiviwa emisaveni hinkwayo, ku tlula mitlawa ya vukhongeri hinkwabyo lebyi nga kona! Nakambe hi tikarhatela ku hanya hi ku pfumelelana ni vito leri hi vitaniwaka harona, ku nga Timbhoni ta Yehovha. (Esa. 43:10-12) Hi humese Tibibele ta Vuhundzuluxeri Bya Misava Leyintshwa Bya Matsalwa Yo Kwetsima leti tlulaka 240 wa timiliyoni, leti ngheniseke vito ra Yehovha laha ri susiweke kona. Nakambe hi humesa tibuku leti dyondzisaka vanhu Bibele ni ku vulavula ngopfu hi vito ra Yehovha, leti kumekaka hi tindzimi leti tlulaka 1 000! w21.10 20-21 ¶9-10

Loko hi pfuna Vakrestekulobye lava lavaka mpfuno hi va hi gandzela Yehovha. Yehovha u tshembise ku katekisa Vaisrayele lava a va pfuna swisiwana. (Det. 15:10) Yehovha u swi teka swi fana ni loko hi n’wi nyika nyiko loko hi pfuna vamakwerhu lava lavaka ku pfuniwa. (Swiv. 19:17) Hi xikombiso loko Vakreste va le Filipiya va rhumela nyiko eka Pawulo loyi a a khotsiwile, u yi teke tanihi “gandzelo leri amukelekaka ni leri tsakisaka swinene eka Xikwembu.” (Filp. 4:18) Xiyisisa vamakwerhu evandlheni kutani u tivutisa, ‘Xana u kona loyi ndzi nga n’wi pfunaka?’ Yehovha wa tsaka loko hi tirhisa nkarhi, matimba, vuswikoti, ni swilo swa hina leswaku hi pfuna lava lavaka ku pfuniwa. Sweswo u swi teka ku ri ndlela yin’wana ya ku n’wi gandzela. (Yak. 1:27) Ku gandzela Yehovha swi lava nkarhi ni matshalatshala. Kambe a hi ndzhwalo. (1 Yoh. 5:3) Hikwalahokayini? Hikuva hi swi endla hi leswi hi rhandzaka Yehovha ni vamakwerhu. w22.03 24 ¶14-15

Loko hi lava ku komba vamakwerhu ntwelavusiwana, hi fanele hi rhanga hi tiva swiphiqo leswi va langutanaka na swona. Hi xikombiso, makwerhu a nga ha va a ri ni swiphiqo swa rihanyo. A nga tshameli ku tiputa vusiwana hi swona kambe a nga tsaka swinene loko munhu un’wana o n’wi pfuna. Xana hi nga hoxa xandla hi ku n’wi pfuna hi ku sweka kumbe ku n’wi basisela yindlu? A hi nge makwerhu u lahlekeriwe hi ntirho wakwe. Xana hi nga swi kota ku n’wi pfuna hi mali hi nga kalanga hi n’wi byela leswaku yi huma kwihi ku fikela loko a kuma ntirho wun’wana? A hi fanelanga hi yimela vamakwerhu va ta kombela mpfuno eka hina kutani ku ri kona hi va twelaka vusiwana. Hi nga tekelela Yehovha hi ku va pfuna va nga se ta eka hina. U hi humesela dyambu masiku hinkwawo hi nga kalanga hi n’wi kombela! Nakambe miseve ya dyambu yi tlhavela vanhu hinkwavo, ku nga ri malandza yakwe ntsena. Xana a wu pfumelelani na swona leswaku leswi Yehovha a hi nyikaka swilo hinkwaswo leswi hi swi lavaka, swi kombisa ku wa hi rhandza? Ha n’wi rhandza swinene Yehovha hikwalaho ka musa ni malwandla yakwe! w21.09 22-23 ¶12-13

Rirhandzu lerikulu ra Xikwembu ri xi susumetela leswaku xi rivalela. Loko Yehovha a vona mudyohi loyi a hundzukeke ni ku tshika swiendlo swakwe leswi nga ha n’wi dyohisaka, rirhandzu Rakwe lerikulu ri N’wi susumeta leswaku a rivalela. Mupisalema Davhida u vule leswi hi Yehovha: “A nga hi khomanga hi ku ya hi swidyoho swa hina, kumbe ku hi xupula hi ku ya hi swihoxo swa hina.” (Ps. 103:8-11) Mupisalema Davhida a a swi tiva leswaku swi njhani ku va munhu a biwa hi ripfalo loko a endle xidyoho. Kambe u tlhele a dyondza leswaku Yehovha “u lunghekele ku rivalela.” I yini lexi endlaka Yehovha a rivalela? Nhlamulo hi yi kuma eka ndzimana ya siku ya namuntlha. Hilaha Davhida a vuleke hakona exikhongelweni xakwe, Yehovha wa rivalela hikuva u ni rirhandzu lerikulu eka lava kombelaka ku rivaleriwa. Loko hi endle xidyoho, i swinene ku titwa nandzu. Swi ta hi pfuna leswaku hi hundzuka kutani hi teka goza ro lulamisa swihoxo swa hina. w21.11 5 ¶11-12

Yehovha wa ri rhandza vito rakwe naswona u lava leswaku vanhu hinkwavo va ri xixima. (Esa. 42:8) Kambe eka malembe ya 6 000 lama hundzeke, vito rakwe ri thyakisiwile. (Ps. 74:10, 18, 23) Sweswo swi sungule loko Diyavulosi (leswi vulaka “Mulumbeti”) a hehla Xikwembu hi ku vula leswaku xi tsona Adamu na Evha leswi va swi lavaka. (Gen. 3:1-5) Ku sukela kwalaho, Yehovha u hehliwe hi ku tsona vanhu leswi va swi lavaka. Yesu a a twa ku vava hikwalaho ka leswi vito ra Tata wakwe ri thyakisiweke. Yehovha hi yena ntsena a nga ni mfanelo yo fuma matilo ni misava naswona swa n’wi fanela hikuva u fuma hi vululami. (Nhlav. 4:11) Kambe Diyavulosi u hambukise tintsumi ni vanhu hi ku va endla va ehleketa leswaku Yehovha a swi n’wi faneli ku fuma. Ku nga ri khale mhaka ya vuhosi bya Xikwembu yi ta lulamisiwa. Yehovha u ta kombisa leswaku hi yena ntsena a nga ni mfanelo yo fuma loko ku fuma Mfumo wakwe laha misaveni, lowu nga ta va ni ku rhula ni nsirhelelo wa xiviri. w21.07 9 ¶5-6

Swi fanerile leswaku nhloko ya ndyangu yi khwajakhwaja leswaku yi wundla ndyangu wa yona hi ku wu nyika swakudya, swiambalo ni ndhawu yo tshama. Xana xiyimo xi le ku ku tikeleni hi tlhelo ra timali? Loko swi ri tano, u koka exilogweni. Kambe hambiloko swiyimo swi ku tikela, u nga tirhisa nkarhi wolowo leswaku u tiyisa ripfumelo ra wena. Khongela ni ku anakanyisisa hi marito ya Yesu lama kumekaka eka Matewu 6:25-34. Dyondza hi swikombiso swa ndlela leyi Yehovha a ma khathalelaka hayona malandza yakwe namuntlha lawa ma tikarhatela ku rhangisa Mfumo wakwe ku sungula. (1 Kor. 15:58) Sweswo swi ta tiyisa ripfumelo ra wena ra leswaku Tata wa wena wa le matilweni u ta ku pfuna hilaha a va pfuneke hakona. Wa swi tiva leswi u swi lavaka ni ndlela leyi a nga ta ku khathalela hayona. Loko u ya u vona ndlela leyi Yehovha a ku pfunaka hayona, ripfumelo ra wena ri ta tiya leswaku u kota ku tiyisela miringo yo tala. w21.11 20 ¶3; 21 ¶6

Mhaka ya nkutsulo yi tiyise ripfumelo ra Vakreste vo tala. Yi endle leswaku va ya emahlweni ni ntirho wa vona wo chumayela hambiloko va kanetiwa ni ku tiyisela maxangu yo hambanahambana vutomi hinkwabyo. Twana leswi muapostola Yohane a swi endleke. U hete malembe ya kwalomu ka 60 a ri karhi a chumayela hi ta Kreste ni nkutsulo. Loko a ri ni malembe yo tlula 90, Mfumo wa Rhoma wu n’wi pfalele ejele exihlaleni xa Patmosi, hi ku ehleketa leswaku u ni nkucetelo wo biha evanhwini. Hikwalahokayini a khomiwile? A khomeriwa ku “vulavula hi Xikwembu ni ku nyikela vumbhoni hi Yesu.” (Nhlav. 1:9) Hi dyondza swo tala eka Yohane loko swi ta emhakeni ya ripfumelo ni ku tiyisela! Eka tibuku takwe leti huhuteriweke, Yohane u kombise leswaku u rhandza Yesu hi mbilu hinkwayo naswona wa wu khensa swinene nkutsulo. Ku ringana mikarhi yo tlula 100, u vulavule hi nkutsulo kumbe ndlela leyi nkutsulo wu hi vuyerisaka hayona. (1 Yoh. 2:2) Swi lo tlangandla, leswaku hakunene Yohane a wu khensa swinene nkutsulo. w21.04 17 ¶9-10

Yehovha a a lava leswaku vanhu vakwe va va ni musa eka lava lamaleke. Hi xikombiso, Yehovha u byele Vaisrayele leswaku a va fanelanga va rhukana munhu la feke tindleve. Sweswo a swi katsa ku n’wi xungeta kumbe ku vulavula ku biha hi yena. Lowu i nsele wa lunya lowu a wu nga fanelanga wu endliwa eka yena! Phela a a nga ta swi kota ku tihlamulela hileswi a nga twi. Nakambe eka Levhitika 19:14 hi dyondza leswaku malandza ya Xikwembu a ma nga fanelanga ma “veka nchumu wo karhi emahlweni ka munhu la feke matihlo.” Buku yin’wana yi vula leswi mayelana ni lava a va lamarile: “Enkarhini wa khale, a va nga khomiwi kahle naswona a va xanisiwa.” Mikarhi yin’wana vanhu lava nga ni timbilu to biha a va ta veka nchumu wo karhi emahlweni ka bofu hi xikongomelo xo n’wi wisa ivi va n’wi hleka. Lowu a ku ri nsele lowukulu! Hikwalaho, nawu wa Yehovha a wu kombisa ndlela leyi swi nga swa nkoka hayona ku va vanhu vakwe va kombisa musa eka lava lamaleke. w21.12 8-9 ¶3-4

Yakobo a a karhatekile hileswi a a ehleketa ku buti wakwe wa ha bhimbindzele mahlundzu. U khongele eka Yehovha hi mhaka leyi. Kutani, u rhumele tinyiko eka makwavo. (Gen. 32:9-15) Eku heteleleni, loko se vamakwavo lava va hlangana, Yakobo u kombise Esawu leswaku wa n’wi xixima swinene. U khinsame emahlweni ka Esawu, ku nga ri kan’we kumbe kambirhi kambe ka nkombo! Leswi a a titsongahata ni ku n’wi xixima swinene, Yakobo u kondletele ku rhula ni makwavo. (Gen. 33:3, 4) Hi dyondza swo karhi eka ndlela leyi Yakobo a a tilunghiselele hayona ku hlangana ni makwavo. Hi ku titsongahata, Yakobo u kombele mpfuno eka Yehovha. Endzhaku ka sweswo, u hanye hi ku pfumelelana nileswi a swi khongeleleke hi ku kondletela ku rhula ni makwavo. Loko se va hlangana, a va kombananga hi tintiho. Xikongomelo xa Yakobo a ku ri ku kondletela ku rhula. Hi nga n’wi tekelela njhani Yakobo?—Mat. 5:23, 24. w21.12 25 ¶11-12

Loko u ehleketa hi ku va Yesu a fele swidyoho swa wena, u nga tibyela leswi, ‘Ndzo va mani mina leswaku a nga ndzi fela.’ I yini lexi nga endlaka u titwa tano? Timbilu ta hina ti nga hi kanganyisa, ti endla hi titwa hi nga pfuni nchumu kumbe hi nga rhandziwi. (1 Yoh. 3:19) Loko hi sungula ku titwa tano, hi fanele hi tsundzuka leswaku “Xikwembu i xikulu eka timbilu ta hina.” Hi fanele hi tshama hi swi tiva leswaku Tata wa hina wa le tilweni wa hi rhandza naswona u tiyimisele ku hi rivalela. Hi fanele hi yi tshemba hi ku helela mhaka leyi. Leswaku hi kota ku endla tano, hi fanele hi dyondza Rito rakwe, hi khongela ni ku tihlanganisa ni vamakwerhu nkarhi ni nkarhi. Hikwalahokayini ku endla tano swi ri swa nkoka? U ta swi vona leswaku Yehovha u ni vumunhu lebyinene. U ta tlhela u swi vona leswaku wa ku rhandza swinene. Loko u anakanyisisa hi Rito ra Xikwembu siku ni siku, u ta kota ku ehleketa kahle ni ku “lulamisa swilo” emiehleketweni ni le mbilwini ya wena.—2 Tim. 3:16. w21.04 23-24 ¶12-13

Ku ni swin’wana leswi hi faneleke hi swi endla leswaku hi tiyisa ripfumelo ra hina. Hi fanele hi anakanyisisa hileswi hi swi dyondzaka. Xiya xikombiso xa mutsari wa Pisalema 77. A a tshikilelekile hileswi a ehleketa leswaku Yehovha u n’wi hlambele mavoko swin’we ni Vaisrayelekuloni. Vurhongo a byi nga phahi hileswi a karhateka hi mhaka leyi. (Tindzimana 2-8) U endle yini? U byele Yehovha a ku: ‘Ndzi ta anakanyisisa hi mitirho ya wena hinkwayo ni ku ehleketisisa hi swiendlo swa wena.’ (Ndzimana 12) Swi le rivaleni leswaku mupisalema a a swi tiva leswi Yehovha a swi endleleke vanhu Vakwe enkarhini lowu nga hundza, hambiswiritano a a tivutisa leswi: “Xana Xikwembu xi rivale ku va ni musa, kumbe, xana ku hlundzuka ka xona ku endle leswaku xi nga ha vi na tintswalo?” (Ndzimana 9) Mupisalema u anakanyisise hi mitirho ya Yehovha ni musa lowu a wu kombeke vanhu vakwe enkarhini lowu nga hundza. (Ndzimana 11) Vuyelo byi ve byihi? Mupisalema u sungule ku swi tshemba hi ku helela leswaku Yehovha a nge va tshiki vanhu Vakwe. (Ndzimana 15) w22.01 30-31 ¶17-18

Xana Yehovha u titwa njhani hi vavanuna ni vavasati vo tshembeka lava feke? U swi lava hi mbilu hinkwayo ku tlhela a va vona! (Yobo 14:15) Xana wa yi ehleketa ndlela leyi Yehovha a n’wi tsundzukaka hayona munghana wakwe Abrahama? (Yak. 2:23) Kumbe Muxe loyi a a vulavula na yena “hi ku kongoma”? (Eks. 33:11) U swi langutele hi mahlongati ku tlhela a vona Davhida ni vatsari van’wana va tipisalema va n’wi dzunisa hi tinsimu to tsakisa. (Ps. 104:33) Hambileswi va etleleke eku feni, Yehovha a nga va rivalanga. (Esa. 49:15) U byi tsundzuka kahle vumunhu bya vona. Nkarhi wa ta lowu a nga ta va pfuxa hinkwavo ni ku tlhela a twa swikhongelo swa vona leswi sukaka embilwini ni ku amukela vugandzeri bya vona. Loko u feriwe hi xaka kumbe munghana, onge marito lawa ma nga ku chavelela ni ku ku nyika ntshembo. Loko ku va ni ku xandzuka entangeni wa Edeni, Yehovha a a swi tiva leswaku xiyimo xi ta tika hi ku famba ka nkarhi. Wa byi venga vuhomboloki, ku pfumala vululami ni madzolonga lama nga kona namuntlha laha misaveni. w21.07 10 ¶11; 12 ¶12

Loko hi rhandza vamakwerhu, hi kombisa leswaku ha wu khensa nkutsulo. Hikwalahokayini? Hikuva Yesu a nga felanga hina ntsena kambe u fele ni vamakwerhu. Leswi a va feleke, swi vula leswaku na vona i va nkoka eka yena. (1 Yoh. 3:16-18) Hi komba vamakwerhu leswaku ha va rhandza hi ndlela leyi hi va khomaka hayona. (Efe. 4:29, 31–5:2) Hi xikombiso, ha va seketela loko va vabya kumbe loko va langutana ni miringo yo tika ni loko va weriwe hi timhangu ta ntumbuluko. A hi nge makwerhu wo karhi u hi khunguvanyisile, xana hi fanele hi endla yini? Xana swa ku tikela ku rivalela? (Lev. 19:18) Loko swi ri tano, yingisa xitsundzuxo lexi: “Yanani emahlweni mi lehiselana mbilu ni ku rivalelana hi ku tshunxeka hambiloko munhu a ri ni xivangelo xa ku vilerisiwa hi un’wana. Tanihi leswi Yehovha a mi rivaleleke hi ku tshunxeka, na n’wina mi fanele mi endla tano.” (Kol. 3:13) Loko hi rivalela vamakwerhu, hi komba Tata wa hina wa le tilweni leswaku hakunene ha wu khensa nkutsulo. w21.04 18 ¶12-13

Hi nga ha tirhela Yehovha hi matimba ni ku tlhela hi pfuna van’wana leswaku va khuvuriwa. Kambe mikarhi hinkwayo hi fanele hi tsundzuka leswaku hi kota ku endla tano hi ku pfuniwa hi Yehovha. Hi dyondza mhaka yin’wana eka xikombiso xa Apolosi na muapostola Pawulo, loko hi ri na vutihlamuleri lebyikulu evandlheni hi nga endla swo tala leswaku hi kondletela ku rhula. Ha tsaka swinene loko vavanuna lava hlawuriweke evandlheni va kondletela ku rhula ni vun’we. Va endla tano hi ku nyikela switsundzuxo leswi humaka eBibeleni. A va ringeti ku tiendla onge i va nkoka kambe va pfuna van’wana evandlheni leswaku va yingisa Yesu ni ku landzela xikombiso xakwe. (1 Kor. 4:6, 7) Xikwembu xi nyike un’wana ni un’wana vuswikoti ni vutshila byo karhi. Hi nga vona onge leswi hi swi endlaka a swi pfuni nchumu. Kambe tsundzuka leswaku ritiho rin’we a ri nusi hove. Onge hinkwerhu hi nga tirha hi matimba leswaku hi tsuvula moya wa ku phikizana. A hi tiyimiseleni ku endla hinkwaswo leswi hi nga swi kotaka leswaku hi kondletela ku rhula ni vun’we evandlheni.—Efe. 4:3. w21.07 19 ¶18-19

Tiyiseka leswaku u ta tlhela u ma vona maxaka ni vanghana va wena lava feke. Mihloti ya Yesu leyi vangiweke hi gome ro feriwa hi vanghana vakwe, i vumbhoni bya leswaku wa swi lava ku pfuxa lava feke! (Yoh. 11:35) U nga seketela lava feriweke. Yesu a nga lo rila na Marta na Mariya ntsena kambe u tlhele a va yingisela ni ku va chavelela. (Yoh. 11:25-27) Hi nga endla tano eka lava feriweke. Dan nkulu loyi a tshamaka eAustralia, u ri: “Endzhaku ko feriwa hi nsati, a ndzi lava ku seketeriwa. Vatekani vo tala a va tshama va lunghekele ku ndzi pfuna. Va ndzi yingiserile loko ndzi phofula ndlela leyi ndzi titwaka hayona. Va tlhele va ndzi pfuna hi ku ndzi hlantswela movha, va ndzi xavela swakudya eswitolo ni ku ndzi swekela loko ndzi tsandzeka ku endla tano. Nakambe va khongele na mina ko tala. Va ve vanghana va ntiyiso lava veke kona hi nkarhi wa ‘maxangu.’”—Swiv. 17:17. w22.01 16 ¶8-9

Yehovha u hi navelela leswinene. (Swiv. 4:20-22) Loko a hi tsundzuxa hi ku tirhisa Rito rakwe, mikandziyiso leyi humesiwaka hi nhlangano kumbe makwerhu, u kombisa leswaku wa hi rhandza. (Hev. 12:9, 10) Ehleketisisa ngopfu hi ndzayo, ku nga ri ndlela leyi u nyikiweke hayona. Mikarhi yin’wana hi nga ha vona onge ndlela leyi hi nyikiweke ndzayo hayona a yi nga ri yinene. Loyi a nyikelaka ndzayo, u fanele a endla tano hi ndlela leyi swi nga ta olova ku yi amukela. (Gal. 6:1) Kambe loko ku ri hina hi nyikiwaka ndzayo, hi fanele hi anakanyisisa hi leswi hi swi dyondzaka hambiloko hi vona onge ku ni ndlela yo antswa leyi a hi ta va hi tshinyiwe ha yona. Hi nga ha tivutisa leswi: ‘Hambileswi ndzayo yi nyikeriweke hi ndlela leyi nga ndzi tsakisiki, xana ku ni leswi ndzi nga swi dyondzaka eka yona? Xana ndzi nga swi kota ku swi ba hi makatla swihoxo swa loyi a ndzi nyikeke yona leswaku ndzi pfuneka?’ Ku ta va ku ri vutlhari ku lavisisa tindlela leti hi nga vuyeriwaka ha tona eka ndzayo leyi hi nyikiweke yona. w22.02 12 ¶13-14

Yehovha wa swi tiva leswaku a swi hi oloveli ku papalata ku endla swilo swo biha ni ku ehleketa hi swona. (Ps. 103:13, 14) Kambe hi ku tirhisa Rito rakwe, moya lowo kwetsima ni nhlangano wakwe Yehovha u hi nyika vutlhari, matimba ni ku tlhela a hi seketela leswaku hi cinca vumunhu bya hina. Tirhisa Bibele ku tikambisisa. Rito ra Xikwembu ri fana ni xivoni; ri nga ku pfuna leswaku u kambela ndlela leyi u ehleketaka, u vulavulaka ni ku endla swilo hayona. (Yak. 1:22-25) Nakambe Yehovha u tshama a lunghekele ku ku pfuna. Wa yi tiva ndlela leyi a nga ku pfunaka hayona; ni leswi nga embilwini ya wena. (Swiv. 14:10; 15:11) Hikwalaho titolovete ku khongela eka yena ni ku dyondza Rito rakwe masiku hinkwawo. Tiyiseka leswaku milawu ya Yehovha i yinene. Hinkwaswo leswi Yehovha a lavaka hi swi endla swa hi pfuna. Lava hanyaka hi milawu yakwe va va ni xindzhuti, va swi tiva leswaku va hanyela yini naswona va tsaka.—Ps. 19:8-11. w22.03 4 ¶8-10

Hi gandzela Yehovha loko hi aka ni ku khathalela tindhawu to n’wi gandzela. Bibele yi vula leswaku ntirho wo endla tabernakela ni nhundzu ya yona a ku ri ‘ntirho wo kwetsima.’ (Eks. 36:1, 4) Ninamuntlha, Yehovha u teka ntirho wo aka Tiholo ta Mfumo ni miako yin’wana ya nhlangano ku ri ndlela yin’wana ya ku n’wi gandzela. Vamakwerhu van’wana va heta nkarhi wo tala eka mitirho leyi. Nseketelo wa vona i wa nkoka naswona ha wu tlangela. Vamakwerhu lava va tlhela va katseka eka ntirho wo chumayela. Van’wana va vona va swi tsakela ku va maphayona. Vakulu emavandlheni va nga seketela ntirho wo aka hi ku pfumelela vamakwerhu lava ku va maphayona loko va faneleka. Hambiloko hi nga ri na byona vuswikoti byo aka, hinkwerhu ka hina hi nga hoxa xandla eku basiseni ni ku khathalela miako ya hina. w22.03 22 ¶11-12