July

Ku susiwa ka mudyohi i ndlela yin’wana leyi kombisaka rirhandzu ra Yehovha. Yi kombisa leswaku u lava ku pfuna hinkwerhu ku katsa ni mudyohi. Van’wana evandlheni va nga ha vula leswaku xiboho lexi tekiweke hi vakulu xo susa mudyohi evandlheni a xi nga fanelanga kambe va nga swi boxi swilo swo biha leswi a swi endleke. A hi na vuxokoxoko hinkwabyo bya mhaka yoleyo. I vutlhari ku tshemba leswaku xiboho lexi vakulu va xi tekeke i xinene naswona va tikarhata leswaku va landzelela nkongomiso wa Matsalwa ni ku avanyisa hi ndlela ya “Yehovha.” (2 Tikr. 19:6) Loko u seketela xiboho xa vakulu xo susiwa ka munhu loyi u n’wi rhandzaka u nga ha n’wi pfuna leswaku a tlhelela eka Yehovha. Elizabeth u ri: “A swi tika ku va hi nga ha vulavuli ni n’wana wa hina. Kambe endzhaku ka loko a tlhelele ka Yehovha u pfumerile leswaku a swi fanela leswaku a susiwa. Hi ku famba ka nkarhi u vule leswaku wa swi tlangela leswi a swi dyondzeke.” w21.09 28-29 ¶11-12

Ehleketa hi noni yoleyo. A yi swi lava ku nyikela hi mali yo tala eka Yehovha. Hambiswiritano, yi endle leswi a swi ri ematimbeni ya yona, yi nyike Yehovha swimalana swa yona swo hetelela. Yesu a a swi tiva leswaku Tata wakwe wa tinyungubyisa swinene hi munyikelo wa noni yoleyo. Hi leyi dyondzo ya nkoka leyi hi yi dyondzaka: Yehovha wa tsaka loko hi n’wi nyika swilo swa hina swa nkoka ni loko hi n’wi tirhela hi mbilu hinkwayo. (Mat. 22:37; Kol. 3:23) Yehovha wa tsaka loko hi endla matshalatshala yo n’wi tirhela! Matshalatshala wolawo, ma katsa nkarhi ni matimba lawa hi ma hetaka entirhweni wa Yehovha, ku katsa ku ya ensin’wini ni le tinhlengeletanweni ta vandlha. U nga swi tirhisa njhani leswi u swi dyondzaka eka noni? Ehleketa hi vanhu lava u nga va khutazaka, u va byela leswaku Yehovha wa tsaka hi ntirho lowu va n’wi endlelaka wona. Kumbexana i makwerhu wo karhi wa xisati loyi a dyuhaleke kumbe a vabyaka naswona a tivonaka a nga ha pfuni nchumu hileswi a nga ha swi kotiki ku tirhela Yehovha hilaha a a endla hakona khale. w21.04 6 ¶17, 19-20

Yehovha u wu tiva kahle nkarhi lowu faneleke wo herisa misava leyi. Hikwalaho ka leswi a lehiseke mbilu, swi endle leswaku ku va ni ntshungu lowukulu wa timiliyoni lowu n’wi gandzelaka. Hinkwavo va tsaka leswi Yehovha a tiyiseleke nkarhi wo leha kukondza va velekiwa, va dyondza ku n’wi rhandza ni ku tinyiketela eka yena hi ku khuvuriwa. Xiboho lexi Yehovha a xi tekeke xo tiyisela xi ta endla leswaku a tsaka swinene loko a hakela vanhu va timiliyoni hikwalaho ka leswi va tiyiseleke ku ya fika emakumu! Hambileswi Sathana a vangaka maxangu ni ku xaniseka, Yehovha wa ha ri “Xikwembu lexi tsakeke.” (1 Tim. 1:11) Na hina hi nga swi kota ku tshama hi tsakile loko ha ha rindzele Yehovha leswaku a kwetsimisa vito rakwe, a vangamisa vuhosi byakwe, a herisa vuhomboloki ni swiphiqo hinkwaswo leswi hi langutanaka na swona. Onge hi nga tiyimisela ku tiyisela ku ya fika emakumu ni ku tlhela hi chaveleleka hi ku tiva leswaku Tata wa hina wa le matilweni na yena u tiyisela na hina. w21.07 13 ¶18-19

Vanhu vo tala enkarhini wa vaapostola a va kaneta Yesu. Loko va n’wi languta, a vo vona n’wana wa xisiwana lexi nga muvatli. Nakambe a a huma eNazareta, ku nga muti lowu a wu tekiwa wu nga ri wa nkoka. Hambi ku ri Nathaniyele, loyi a veke mudyondzisiwa wa Yesu, u tshame a ku: “Xana ku nga huma nchumu lowunene eNazareta?” Kumbexana a a ehleketa hi vuprofeta lebyi nga eka Mikiya 5:2, lebyi vulaka leswaku Mesiya a a ta velekiwa eBetlehema, ku nga ri eNazareta. Muprofeta Esaya u profete leswaku valala va Yesu a va ta byi ba hi makatla “vuxokoxoko” lebyi vulavulaka hi rixaka leri Mesiya a a ta huma eka rona. (Esa. 53:8) Loko vanhu volavo a va lo tinyika nkarhi wo kambisisa vuxokoxoko byebyo, a va ta va va swi xiyile leswaku Yesu u velekeriwe eBetlehema naswona a a ri ntukulu wa Hosi Davhida. (Luka 2:4-7) Yesu u velekeriwe endhawini leyi ku profetiweke hi yona eka Mikiya 5:2. Xana xiphiqo xi ve kwihi? Vanhu va teke xiboho hi magugu va nga ri na vuxokoxoko hinkwabyo. Sweswo hi swona leswi endleke va kaneta Yesu. w21.05 2-3 ¶4-6

Bibele yi vulavula hi vanhu lava endleke leswinene lava katekisiweke hikwalaho ko amukela ndzayo. Xiya mhaka ya Yobo. Hambileswi a a chava Xikwembu kambe a a pfa a endla swihoxo. Loko a tshikilelekile, u ve ni mavonelo lama hoxeke. Hikwalaho ka sweswo Yehovha na Elihu va n’wi tshinyile. Xana u angule njhani? U te: “Ndzi vulavule swilo leswi ndzi nga swi twisisiki . . . ndza tisola hileswi ndzi swi vuleke, ndzi tshame enkumeni ni le ntshurini.” (Yobo 42:3-6, 12-17) U kombise leswaku wa titsongahata hi ku amukela ndzayo leyi Elihu a n’wi nyikeke yona, hambileswi Elihu a a ri ntsongo eka yena. (Yobo 32:6, 7) Ku titsongahata swi ta endla hi tirhisa ndzayo hambiloko hi vona onge a swi nga fanelanga leswaku hi tshinyiwa kumbe loko loyi a hi nyikaka yona a ri ntsongo eka hina. Hinkwerhu hi fanele hi tikarhatela ku kombisa mihandzu ya moya lowo kwetsima ni ku va vachumayeri ni vadyondzisi va mahungu lamanene. w22.02 11 ¶8; 12 ¶12

Hinkwerhu evandlheni hi ni vutihlamuleri byo kondletela ku rhula ni ku komba van’wana rirhandzu leswaku va nga titwi va ri ni xivundza. Leswi hi swi endlaka ni ku swi vula swi nga khutaza van’wana! U nga va pfuna njhani lava nga Timbhoni va ri voxe emakaya ya vona leswaku va titwa va ri ekaya loko va ri evandlheni? Ringeta ku va munghana wa lava ha ku fikaka. Hi nga endla tano hi ku amukela lava ha ku fikaka evandlheni. (Rhom. 15:7) Hambiswiritano, a hi lavi ku va pfuxela ntsena. Hi lava ku va vanghana va vona. Va kombe leswaku wa khathala ha vona. U nga ngheneleli etimhakeni ta vona kambe ringeta ku twisisa leswi va langutanaka na swona. Van’wana swa va tikela ku phofula ndlela leyi va titwaka hayona kutani tivoneli leswaku u nga va sindzisi ku vulavula loko va nga swi lavi. Ku hambana ni sweswo, va vutise swivutiso leswi nga ta va endla va tsakela ku vulavula naswona u va yingisela hi vukheta. Hi xikombiso, u nga ha va vutisa ndlela leyi va wu kumeke hayona ntiyiso. w21.06 11 ¶13-14

Ha tsaka swinene leswi hi kotaka ku tirhela Yehovha hi vun’we ni vamakwerhu tanihi “ntlhambi wun’we” hi kongomisiwa hi ‘murisi un’we.’ Buku leyi nge Nhlangano Lowu Endlaka Ku Rhandza Ka Yehovha, eka tluka 165 yi ri: “Leswaku u vuyeriwa hi vun’we byebyo u ni vutihlamuleri bya ku hoxa xandla leswaku byi tshama byi ri kona.” Hikwalaho, hi fanele hi “tiletela leswaku hi languta vamakwerhu hi ndlela leyi Yehovha a va langutaka hayona.” Hinkwerhu hina “lavatsongo,” hi va risima eka Yehovha. Xana na wena u va teka tano vamakwerhu? Yehovha wa swi vona ni ku swi tlangela hinkwaswo leswi u swi endlaka leswaku u va pfuna ni ku va khathalela. (Mat. 10:42) Ha va rhandza vamakwerhu. Hikwalaho, a hi ‘tivoneleni leswaku hi nga veki xikhunguvanyiso kumbe nchumu lowu nga wisaka makwerhu.’ (Rhom. 14:13) Hi teka vamakwerhu va ri lava tlakukeke eka hina naswona hi lava ku va rivalela swi suka embilwini. Onge hi nga tirha hi matimba leswaku hi nga pfumeleli van’wana va hi khunguvanyisa hi ku olova. Ku engetela kwalaho, “a hi lavisiseni swilo leswi endlaka leswaku ku va ni ku rhula ni swilo leswi akaka van’wana.”—Rhom. 14:19. w21.06 24 ¶16-17

Loko hi dyondza ni ku tirhisa leswi hi swi dyondzaka eRitweni ra Xikwembu ni le ka nhlangano wakwe, hi ta va ni vumunhu lebyi fanelaka Vakreste. Nakambe ndlela leyi hi xi tivaka hayona Xikwembu yi ta kula. Yesu u tirhise xifaniso ku hlamusela leswaku mahungu lamanene ya Mfumo lawa hi ma chumayelaka ma fana ni mbewu leyitsongo leyi kulaka eka vanhu lava nga ni timbilu letinene. U te: “Mbewu yi mila yi tlhela yi kula kambe [mubyari] a nga swi tivi leswaku yi mila njhani. Misava yi kurisa mbewu hakatsongotsongo, ku sungula rihlanga, ku landzela xichocho, kutani xichocho xi va ni tindzoho.” (Mar. 4:27, 28) Yesu a a vula leswaku tanihi leswi ximilana xi kulaka hakatsongotsongo, ni vuxaka lebyi munhu a nga na byona na Yehovha endzhaku ka loko a amukele mahungu lamanene ya Mfumo byi kula hakatsongotsongo. Hi xikombiso, loko swichudeni swa hina swa Bibele swi ya swi va ni vuxaka lebyinene na Yehovha, hi ta vona swi cinca mahanyelo ya swona. (Efe. 4:22-24) Kambe hi fanele hi tsundzuka leswaku loyi a kurisaka mbewu i Yehovha. w21.08 8-9 ¶4-5

Swa olova ku kuma ntsako loko hi eneriseka hi leswi hi nga na swona. Munhu loyi a tsakaka hileswi “matihlo ma swi vonaka,” hi xitalo u swi khensa swinene leswi a nga na swona. Kambe munhu wo navela leswi a nga riki na swona, u tshama a ri karhi a ehleketa hi swilo leswi a nga ta tsandzeka ku swi kuma. Hi dyondza yini? Leswaku hi tshama hi tsakile, hi fanele hi ehleketa hi leswi hi nga na swona ni ku tlhela hi tsaka hi leswi hi kotaka ku swi endla. Xana swa koteka leswaku hi tsaka hi leswi hi nga na swona hambileswi hi tshamelaka ku langutana ni mitlhontlho leyi nga tolovelekangiki? Ina, swa koteka. Hi nga swi kota ku tsaka hi leswi “matihlo ma swi vonaka.” Hi nga swi endla njhani sweswo? Leswaku u kuma nhlamulo, kambisisa xifaniso xa Yesu xa titalenta lexi kumekaka eka Matewu 25:14-30 ni ku tlhela u dzikisa mianakanyo ya wena eka leswi yi ku dyondzisaka swona mayelana ni tindlela to kuma ntsako ni ku tiphina hi mikateko leyi u nga na yona sweswi. w21.08 21 ¶5-6

Yehovha wa khathala swinene hi “lava tshikileriwaka ni lava titsongahataka.” A hi vakulu ntsena lava nga khutazaka vamakwerhu lava kambe hinkwerhu hi nga swi kota. Ndlela yin’wana leyi hi nga endlaka hayona i ku va komba leswaku ha va rhandza. Yehovha u lava hi va komba leswaku wa va rhandza. (Swiv. 19:17) Nakambe hi nga pfuna vamakwerhu loko hi titsongahata hi tlhela hi nga tibumi hi vuswikoti lebyi hi nga na byona. A hi fanelanga hi titlakusa hikuva a hi lavi leswaku van’wana va hi vondzoka. Ematshwan’weni ya sweswo, hi tirhisa vuswikoti ni vutivi bya hina leswaku hi khutaza van’wana. (1 Pet. 4:10, 11) Hi nga dyondza swo tala mayelana ni ndlela leyi hi nga va khomaka hayona van’wana hi ku xiyisisa ndlela leyi Yesu a a va khoma hayona valandzeri vakwe. A a tlakukile ku tlula vanhu hinkwavo. Kambe a a ri ni ‘musa a tlhela a titsongahata.’ (Mat. 11:28-30) Loko a dyondzisa vanhu, a a tirhisa ririmi ro olova naswona a a tirhisa swifaniso leswi vanhu lava titsongahataka a swi va olovela ku swi twisisa.—Luka 10:21. w21.07 23 ¶11-12

Tinyike nkarhi wo vulavula ni vadyuhari. Swi nga ha endleka leswaku a va ha voni kahle, va famba hi ku nonoka ni ku vulavula hi ku nonoka kambe mabyongo ya vona ma ha tirha naswona va tiendlele “vito lerinene” na Yehovha. (Ekl. 7:1) Tsundzuka xivangelo lexi endlaka Yehovha u va teka va ri va nkoka. Yana emahlweni u va xixima. Fana na Elixa. U sindzise ku tshama ekusuhi na Eliya eka siku ra vona ro hetelela va ri swin’we. Ku ringana kanharhu, Elixa u te: “Ndzi famba na wena.” (2 Tih. 2:2, 4, 6) Kombisa vamakwerhu lava dyuhaleke leswaku wa khathala hi vona hi ku va vutisa swivutiso. (Swiv. 1:5; 20:5; 1 Tim. 5:1, 2) Va vutise swivutiso swo fana ni leswi: “Loko wa ha ri muntshwa, i yini lexi ku endleke u tshemba leswaku u kume ntiyiso?” “Xana leswi u langutaneke na swona evuton’wini swi ku pfune njhani leswaku u tshinela eka Yehovha?” “I yini lexi ku pfuneke ku ya emahlweni u tirhela Yehovha u tsakile?” (1 Tim. 6:6-8) Endzhaku ka sweswo, rhiya ndleve loko va ku rungulela. w21.09 5 ¶14; 7 ¶15

Loko u tirha hi matimba entirhweni wo chumayela ni wo endla vadyondzisiwa, swi kombisa leswaku u rhandza Xikwembu. (1 Yoh. 5:3) Ehleketa hi mhaka leyi: Ku rhandza Yehovha swi ku susumetele leswaku u famba hi muti ni muti u chumayela. Xana swa olova ku yingisa xileriso lexi? Nikatsongo. Xana u titwe njhani loko u nghena emutini ro sungula u lava ku chumayela? Swi le rivaleni leswaku a wu chuhile! Kambe a wu swi tiva leswaku u endla ntirho lowu Yesu a ku rhumeke wona naswona u yingisa xileriso xakwe. Hi ku famba ka nkarhi, se a swi ku olovela ku chumayela. Xana swi njhani loko u fanele u dyondza ni munhu Bibele? Wa chava? Kumbexana. Kambe loko u kombela Yehovha leswaku a ku pfuna u hlula ku chava ni ku tlhela u kombela xivindzi xo kota ku dyondzisa Bibele, Yehovha u ta hlamula xikombelo xa wena naswona u ta ku pfuna u rhandza ntirho wo chumayela. w21.07 3 ¶7

Mahlonga ya le nkarhini wa khale a ma ri ni mimfungho leyi a yi komba leswaku n’wini wa wona i mani. Hilaha ku fanaka, ninamuntlha vanhu va ta sindzisiwa ku va ni mimfungho leyi kombisaka leswaku va seketela tlhelo rihi. Ndlela leyi va ehleketaka ni ku endla swilo hayona, yi ta kombisa leswaku va seketela tlhelo ra tipolitiki ta misava leyi. Xana hi ta amukela mfungho wa misava leyi ivi hi seketela tipolitiki ta vafumi va misava leyi? Lava nga ta ala mfungho lowu, va ta xanisiwa naswona va ta va ekhombyeni lerikulu. Buku ya Nhlavutelo yi ri: “[A ku] na munhu la kotaka ku xava kumbe ku xavisa loko a nga ri na mfungho.” (Nhlav. 13:17) Kambe malandza ya Xikwembu ma swi tiva leswi nga ta humelela lava nga ta va ni mfungho lowu boxiweke eka Nhlavutelo 14:9, 10. Ematshan’weni yo amukela mfungho wolowo, va ta tsala leswi evokweni ra vona: “Mina ndzi wa Yehovha.” (Esa. 44:5) Lowu i nkarhi wo tikambela hi vona loko vutshembeki bya hina byi tiyile eka Yehovha. Hikwalaho, Yehovha u ta tsaka ku tiva leswaku hi va yena! w21.09 18 ¶15-16

Van’wana va nga hi pfuna leswaku hi kota ku wu endla kahle ntirho wa hina wa nsimu. Muapostola Pawulo u dyondzise Timotiya ku chumayela, u tlhele a n’wi tsundzuxa leswaku na yena a dyondzisa van’wana. (1 Kor. 4:17) Ku fana na Timotiya, hi nga dyondza swo tala eka vamakwerhu lava ku nga khale va chumayela. Na hina hi nga kombela Yehovha a hi pfuna. Mikarhi hinkwayo loko u ya ensin’wini khongela u kombela Yehovha a ku pfuna. Hinkwerhu hi kota ku chumayela hikwalaho ko pfuniwa hi moya wo kwetsima wa Yehovha. (Ps. 127:1; Luka 11:13) Loko u khongela, swi kombele hi ku kongoma leswi u lavaka Yehovha a ku pfuna hi swona. Hi xikombiso, n’wi kombele a ku pfuna u kuma munhu loyi a lavaka ku dyondza Bibele hi mbilu hinkwayo. Hi fanele hi tlhela hi tixavela nkarhi wo dyondza Bibele. Bibele yi ri: “Tiyiseka hi ku rhandza ka Xikwembu loku nga kunene, loku amukelekaka ni loku hetisekeke.” (Rhom. 12:2) Loko hi tiyiseka leswaku leswi hi swi tivaka hi Xikwembu i ntiyiso, a hi nge tilumalumi loko hi chumayela. w21.05 18 ¶14-16

A hi nge u boheka ku tshika ku dyondza ni xichudeni xa wena xa Bibele lexi u tikarhataka swinene ni ku tlhela u xi khongelela kambe swo fana ni kwala. Kumbe hi mpfhuka u sungula ku chumayela a wu se tshama u pfuna munhu leswaku a khuvuriwa. Xana u fanele u titwa nandzu ivi u gimeta hi ku vula leswaku Yehovha a nga wu katekisi ntirho wa wena wo chumayela? Xiya leswi endlaka Yehovha a teka ntirho wa hina tanihi lowu humelelaka. Yehovha u languta ku tikarhata ni ku tiyisela ka hina entirhweni wakwe. Yehovha u teka ntirho wa hina tanihi lowu humelelaka loko hi tikarhata hi matimba naswona hi wu rhandza hambiloko hi kanetiwa. Pawulo u te: “Xikwembu xi lulamile naswona a xi nge wu rivali ntirho wa n’wina ni rirhandzu leri mi ri kombiseke hikwalaho ka vito ra xona, hi ku tirhela vakwetsimi naswona ma ha ya emahlweni mi va tirhela.” (Hev. 6:10) Yehovha wa yi tsundzuka ndlela leyi hi tikarhateke hayona entirhweni wakwe ni rirhandzu leri hi ri kombiseke hambiloko hi nga ri na xona xichudeni lexi endleke nhluvuko ivi xi khuvuriwa. Tirhisa leswi Pawulo a swi vuleke eka ndzimana ya namuntlha. w21.10 25 ¶4-6

Yesu u kombise leswaku u ni musa ni rirhandzu hi ndlela leyi a a va khoma hayona vadyondzisiwa vakwe. A a swi tiva leswaku vuswikoti ni swiyimo swa vona a swi fani. Hikwalaho, hinkwavo a va nga ta endla swilo leswi fanaka kumbe va tirha ku fana entirhweni wo chumayela. Kambe a a tsakisiwa hi leswi ha un’we wa vona a a kota ku swi endla. Yesu u kombise leswaku u titwa hi ndlela yoleyo eka xifaniso xa titalenta. Eka xifaniso xolexo, n’wini wa malandza u nyike nandza ha un’we ntirho “hi ku ya hi vuswikoti bya yena.” Malandza man’wana mambirhi lama gingiritekaka ma kume titalenta to tlula ta laman’wana. Kambe n’wini wa wona u ma bumabumele hi marito lama fanaka, a ku: “U endle kahle, wena nandza lonene ni wo tshembeka!” (Mat. 25:14-23) Yesu u hi komba musa ni rirhandzu. Wa swi tiva leswaku vuswikoti ni swiyimo swa hina a swi fani naswona wa tsaka loko hi endla leswi hi swi kotaka. Hi fanele hi tekelela Yesu hi ndlela leyi hi khomaka van’wana hayona. w21.07 23 ¶12-14

A hi mikarhi hinkwayo leyi Hosi Davhida a a ri ni tintswalo. Hi xikombiso, loko Nabali wanuna loyi a a nga ri ni ntwelavusiwana a rhukane Davhida ni masocha yakwe, Davhida u hlundzuke ngopfu lerova a kala a lava ku dlaya Nabali ni ndyangu wakwe hinkwawo. Leswi Abigayele nsati wa Nabali a a tlharihile naswona a a ri ni ntwelavusiwana, u ponise Davhida eka nandzu wo halata ngati. (1 Sam. 25:9-22, 32-35) Xiya leswaku loko Davhida a hlundzukile, u vone Nabali ni vavanuna vakwe va faneriwa hi rifu. Nakambe a a tiyimisele ku n’wi gwevela rifu wanuna wa le xifanisweni xa Nathani. Eka xikombiso xa Nathani, hi nga ha tivutisa leswaku ha yini wanuna loyi wo lulama a nga avanyisanga hi ndlela ya ntwelavusiwana. Xiya leswi a swi endleke. Hi nkarhi wolowo, Davhida a a biwa hi ripfalo. Munhu loyi a nga avanyisiki hi ndlela ya ntwelavusiwana ni vululami, swi kombisa leswaku a nga na vuxaka lebyinene na Yehovha. w21.10 12 ¶17-18; 13 ¶20

Eka marito ya ndzimana ya namuntlha hi dyondza ku tekelela Yehovha loyi ku nga yena xikombiso lexinene xa ku kwetsima. Hi fanele hi kwetsima. Swi nga ha vonaka swi nga koteki hikuva hi velekiwe ni xidyoho. Muapostola Petro na yena u endle swihoxo swo tala kambe xikombiso xakwe xi hi dyondzisa leswaku na hina hi nga swi kota ku kwetsima. Loko vanhu va ehleketa hi munhu loyi a kwetsimaka va ehleketa hi loyi a nga n’wayiteliki, loyi a tshamaka a ambale tiphurhaphurha ta vukhongeri naswona u tshama a bohanile exikandzeni. Kambe sweswo a hi ntiyiso. Yehovha loyi a kwetsimaka u hlamuseriwa tanihi “Xikwembu lexi tsakeke.” (1 Tim. 1:11) Lava n’wi gandzelaka va vitaniwa lava ‘tsakeke.’ (Ps. 144:15) Yesu u sole lava ambalaka swiambalo leswi va hambanisaka ni van’wana naswona va tiendla onge va lulamile. (Mat. 6:1; Mar. 12:38) Leswi hi nga Vakreste, ha swi tiva leswi Bibele yi hi dyondzisaka swona mayelana ni ku kwetsima. Ha swi tiva leswaku Xikwembu xa hina xa hi rhandza naswona a xi nge pfuki xi hi byele ku endla leswi hi nga tsandzekaka ku swi endla. w21.12 2 ¶1, 3

Nyiko leyikulu leyi Xikwembu xi hi nyikeke yona i ku va hi kota ku xi gandzela. Hi komba Yehovha leswaku ha n’wi rhandza hi ku ‘yingisa swileriso swakwe.’ (1 Yoh. 5:3) Yesu u hi nyike xileriso lexi humaka eka Tata wakwe xo endla vadyondzisiwa ni ku va khuvula. (Mat. 28:19) Nakambe, u hi lerise leswaku hi rhandzana. (Yoh. 13:35) Yehovha u ta endla leswaku lava n’wi yingisaka va va endyangwini wakwe hilaha ku nga heriki. (Ps. 15:1, 2) Rhandza van’wana. Rirhandzu i ra nkoka eka Yehovha. (1 Yoh. 4:8) Yehovha u sungule a hi rhandza hi nga si n’wi tiva. (1 Yoh. 4:9, 10) Hi kombisa leswaku ha n’wi tekelela hi ku rhandza van’wana. (Efe. 5:1) Ndlela yin’wana leyi hi nga kombisaka leswaku hi rhandza van’wana hayona, i ku va dyondzisa hi Yehovha swa ha pfumela. (Mat. 9:36-38) Loko hi endla tano, va ta tiva leswi va faneleke va swi endla leswaku va va endyangwini wa Xikwembu. w21.08 5-6 ¶13-14

Leswi Yesu a rhandzaka Yehovha swinene, u n’wi yingisile ni ku tlhela a hi fela. (Yoh. 14:31) Yesu u kombise ku u rhandza vanhu swinene hi ndlela leyi a hanyeke ha yona loko a ri laha misaveni. Mikarhi hinkwayo Yesu a a kombisa rirhandzu naswona a a twela vanhu vusiwana hambiloko a kanetiwa. Ndlela yin’wana ya nkoka leyi Yesu a kombiseke hayona leswaku u rhandza vanhu, u va dyondzise hi Mfumo wa Xikwembu. (Luka 4:43, 44) Yesu u tlhele a kombisa leswaku u rhandza Xikwembu ni vanhu hi ku tinyikela leswaku a fa rifu ro vava swinene a dlayiwa hi vadyohi. U endle leswaku swi koteka ku vanhu va kuma vutomi lebyi nga heriki. Hi tinyiketele eka Yehovha hi tlhela hi khuvuriwa hikwalaho ka leswi hi n’wi rhandzaka. Ku fana na Yesu, na hina hi fanele hi kombisa rirhandzu ra hina eka Yehovha hi ndlela leyi hi khomaka van’wana hayona. Muapostola Yohane u tsale a ku: “Loyi a nga rhandziki makwavo, la n’wi vonaka, a nge xi rhandzi Xikwembu lexi a nga si tshamaka a xi vona.”—1 Yoh. 4:20. w22.03 10 ¶8-9

Hambileswi swi hi tsakisaka ku khongela ni ku hlaya Bibele kambe ku vula ntiyiso a swi olovi. Hi ni migingiriko yo tala ya siku ni siku, leyi endlaka swi nga olovi ku ti vekela nkarhi wo tiyisa vuxaka bya hina na Yehovha. Nakambe mitirho, vutihlamuleri bya ndyangu ni swin’wana swi nga hi tekela nkarhi wo tala wo khongela, wo dyondza ni ku anakanyisisa. Ku ni swin’wana leswi nga hi dyelaka nkarhi loko hi nga swi xiyi. A swi hoxanga ku endla mitirho yin’wana kambe loko hi nga tivoneli, hi nga ti kuma hi hete nkarhi tala eka yona, lowu a hi ta wu tirhisa ku tiyisa vuxaka bya hina na Yehovha. Vuhungasi a byi bihanga naswona ha vuyeriwa swinene eka byona. Kambe loko hi nga tivoneli, hambiloko vuhungasi byi ri byinene byi nga hi dyela nkarhi wo tiyisa vuxaka bya hina na Yehovha. A hi fanelanga hi rhangisa vuhungasi evuton’wini bya hina.—Swiv. 25:27; 1 Tim. 4:8. w22.01 26 ¶2-3

Loko Yehovha a lerisa Vaisrayele leswaku va rhandza wa rikwenu, a a nga vuli swona leswaku va fanele va rhandza Vaisrayelekuloni ntsena. A va fanele va rhandza ni valuveri lava tshamaka na vona. Xexo i xileriso lexi nga eka Levhitika 19:33, 34. Munhu wa le tikweni rin’wana a a fanele a khomiwa ku fana ni “muaki wa tiko” naswona Vaisrayele a va fanele va “n’wi rhandza” hi ndlela leyi va tirhandzaka hayona. Hi xikombiso, Nawu wu byele Vaisrayele leswaku va nga wu tshoveli hinkwawo ntshovelo wa vona, a va fanele va siyela swisiwana ni valuveri. (Lev. 19:9, 10) Nawu wo rhandza vanhu va le matikweni man’wana wa ha tirha ni le ka Vakreste namuntlha. (Luka 10:30-37) Njhani? Ku ni timiliyoni ta vanhu lava humaka ematikweni ya le handle naswona van’wana hi tshama na vona kwala kusuhi. I swa nkoka ku va komba xichavo ni ku va xixima, swi nga ri na mhaka ku i vavanuna, vavasati kumbe vana. w21.12 12 ¶16

Loko hi titshega hi Yehovha sweswi, hi ta ya hi n’wi tshemba leswaku ni le nkarhini lowu taka u ta hi pfuna. Swi lava ripfumelo na ku tiyimisela ku titshega hi Yehovha loko hi lava ku kombela masiku yo wisa entirhweni leswaku hi ya etinhlengeletanwini ta muganga kumbe ta xifundzha, hambi ku ri ku kombela ku hunguteriwa nkarhi hi xikongomelo xo ya etinhlengeletanweni ta vandlha kumbe xo chumayela. A hi nge muthori u ala xikombelo xa wena ivi u lahlekeriwa hi ntirho. Xana hi ni ripfumelo ra leswaku Yehovha a nge hi tshiki naswona u ta khathalela swilaveko swa hina? (Hev. 13:5) Vo tala lava nga eka ntirho wa nkarhi hinkwawo va ni mitokoto yo tala leyi kombisaka ndlela leyi Yehovha ava pfuneke hayona loko va lava mpfuno. Yehovha wa tshembeka. Loko Yehovha a ri na hina, a hi na xivangelo xo chava leswi nga ta endleka enkarhini lowu taka. Xikwembu xa hina a xi nge hi tshiki ntsena loko hi rhangisa ku endla ku rhandza ka xona evuton’wini bya hina. w22.01 7 ¶16-17

Ndlela leyi hi va tshembaka hayona vakulu yi nga ringiwa njhani? A hi nge munhu loyi a susiweke i munghana wa hina lonkulu. Hi nga ha vilerisiwa hileswaku vakulu a va yi lavisisanga kahle mhaka kumbe a va yi avanyisanga hi ndlela leyi Yehovha a a ta yi avanyisa hayona. I yini lexi nga hi pfunaka hi tshama hi ri ni langutelo lerinene hi xiboho xa vakulu? Hi fanele hi tsundzuka leswaku ku susa mudyohi evandlheni i lunghiselelo ra Yehovha naswona swi vuyerisa vandlha ni ku pfuna mudyohi a hundzuka. Tamatisi ro bola ri borisa man’wana, swi tano na hi mudyohi la nga hundzukiki u va nkucetelo wo biha loko o tshikiwa evandlheni. (Gal. 5:9) Nakambe, a nga ha tsandzeka ku vona vukulu bya xidyoho xakwe naswona a nga ha vona ku ri hava xivangelo xo hundzuka leswaku a ta amukeriwa hi Yehovha. (Ekl. 8:11) Vakulu va byi teka byi ri bya nkoka vutihlamuleri bya vona kutani hi nga tiyiseka leswaku loko va susa mudyohi, va yi lavisise hi vukheta mhaka. w22.02 5-6 ¶13-14

Swi lava ku lehisa mbilu ni ku va ni musa ngopfungopfu loko munhu loyi a nyikiwaka ndzayo a yi ala. Nkulu a nga fanelanga a va ni ximbilwambilwana loko lava a va nyikeke ndzayo va nga yi tirhisi. Nkulu a nga kombela Yehovha hi xikhongelo leswaku a pfuna makwerhu loyi a lavaka ndzayo ku a yi twisisa ni ku tlhela a yi tirhisa. Makwerhu loyi a nyikiweke ndzayo, a nga ha lava nkarhi wo yi gayela. Loko nkulu a lehisa mbilu a tlhela a va ni musa, loyi a pfuniwaka u ta yingisa leswi a byeriweke swona ematshan’weni yo ehleketisisa ngopfu hi ndlela leyi a byeriweke hayona. Mikarhi hinkwayo, ndzayo yi fanele yi huma eRitweni ra Xikwembu. Hi lava leswaku ndzayo ya hina yi pfuna vamakwerhu nileswaku yi “tsakisa mbilu.”—Swiv. 27:9. w22.02 18 ¶17; 19 ¶19

Loko hi ri ni swiphiqo kumbe hi lwa ni ku tshika mikhuva leyi nga n’wi tsakisiki Yehovha, hi nga ha khongela hi kombela mpfuno kambe loko hi vona onge wa hlwela ku hlamula swikhongelo swa hina, hi nga ha hela matimba. I yini lexi endlaka Yehovha a nga hlamuli swikhongelo swa hina hi ku hatlisa? Loko hi khongela, u swi teka ku ri vumbhoni byo kombisa ripfumelo. (Hev. 11:6) Yehovha u lava hi kombisa leswaku hi tiyimiserile ku n’wi tsakisa ni ku hanya hi ku ya hi leswi hi swi khongelelaka. (1 Yoh. 3:22) Loko hi lwisana ni ku tshika mikhuva leyi nga n’wi tsakisiki Yehovha, hi fanele hi khongela ni ku hanya hi leswi hi swi khongelelaka naswona hi lehisa mbilu. Yesu u vule leswaku a hi mikarhi hinkwayo swikhongelo swa hina swi nga hlamuriwaka hi ku hatlisa. U te: “Yanani emahlweni mi kombela, mi ta nyikiwa; yanani emahlweni mi lava, mi ta swi kuma; yanani emahlweni mi gongondza, mi ta pfuleriwa; hikuva loyi a kombelaka u ta nyikiwa, loyi a lavaka u ta swi kuma naswona loyi a gongondzaka u ta pfuleriwa.”—Mat. 7:7, 8. w21.08 8 ¶1; 10 ¶9-10

Loko u lava ku tiyisa ripfumelo ra wena eka Muvumbi u fanele u ya emahlweni u hlaya Rito ra Xikwembu. (Yox. 1:8) Nakambe anakanyisisa hi vuprofeta ni ndlela leyi byi hetisekeke hayona. Loko u endla tano swi ta tiyisa ripfumelo ra wena ra leswaku Muvumbi loyi a nga ni rirhandzu ni vutlhari hi yena loyi a nga hi vumba naswona hi yena a tsaleke Bibele. (2 Tim. 3:14; 2 Pet. 1:21) Loko u dyondza Rito ra Xikwembu, xiya ndlela leyi ri ku pfunaka hayona. Hi xikombiso, i khale Bibele yi vula leswaku ku rhandza mali swi ni khombo naswona swi vangela “switlhavi swo tala.” (1 Tim. 6:9, 10; Swiv. 28:20; Mat. 6:24) Hakunene swa pfuna ku yingisa xitsundzuxo lexi xa Bibele xo papalata ku rhandza mali! Xana swi kona switsundzuxo swa le Bibeleni leswi ku pfuneke? Loko hi ya hi rhandza switsundzuxo swa le Bibeleni, hi ta ya hi titshega hi vutlhari lebyi Muvumbi wa hina a hi nyikaka byona lebyi nga hundzeriwiki hi nkarhi. (Yak. 1:5) Loko hi endla tano, hi ta hanya vutomi byo tsakisa.—Esa. 48:17, 18. w21.08 17-18 ¶12-13

Loko ku ri hi leswaku se ti dya ti ya emagoveni, tiyiseka leswaku Yehovha wa wu tsundzuka ntirho lowu u n’wi endleleke wona enkarhini lowu nga hundza. U seketele ntirho wo chumayela hi mbilu hinkwayo. U tiyisele miringo yo tika, hambi ku ri leyi ku vangeleke gome swinene ni ku ya emahlweni u yingisa milawu yo lulama ya le Bibeleni naswona u tlhele u endla mitirho yo tala enhlanganweni wa Yehovha hi ku tshembeka ni ku pfuna van’wana. U endle leswi nga ematimbeni ya wena leswaku u fambisana ni ku cinca loku endliweke hi nhlangano wa Yehovha. U seketele ni ku tlhela u khutaza van’wana lava nga eka ntirho wa nkarhi hinkwawo. Yehovha wa ku rhandza swinene hileswi u tshembekeke. U tshembisa leswaku “a nge ma fularheli malandza yakwe yo tshembeka.” (Ps. 37:28) U ku tshembisa a ku: “Ndzi ta ku rhwala kukondza misisi ya wena yi va yo basa.” (Esa. 46:4) Hikwalaho, u nga tibyeli leswaku leswi ti dyaka ti ya emagoveni, a wa ha ri wa nkoka enhlanganweni wa Yehovha. U wa nkoka swinene! w21.09 3 ¶4

Yehovha u hi kombisa tintswalo hileswi a nga ni vutlhari lebyikulu. Bibele yi vula leswaku “vutlhari lebyi humaka ehenhla” byi ni “tintswalo ni mihandzu leyinene.” (Yak. 3:17) Ku fana ni mutswari loyi a nga ni rirhandzu, Yehovha wa swi tiva leswaku tintswalo takwe ti vuyerisa vana vakwe. (Esa. 49:15) Leswi a va kombaka tintswalo, va ni ntshembo hi vumundzuku hambileswi va velekiweke ni xidyoho. Hikwalaho, leswi Yehovha a nga ni vutlhari lebyikulu u komba vana vakwe tintswalo loko ku ri ni xivangelo xo endla tano. Kambe a hi mikarhi hinkwayo Yehovha a kombisaka tintswalo. Hi vutlhari, a nga kombisi tintswalo laha a swi tivaka leswaku swi ta susumetela vanhu ku ya emahlweni va endla swilo swo biha. A hi nge ku ni makwerhu un’wana loyi se a sungulaka ku hanya hi xidyoho. Xana hi fanele hi endla yini? Pawulo u hi khutaze leswaku hi “tshika ku tihlanganisa” na yena. (1 Kor. 5:11) Vadyohi lava nga hundzukiki va susiwa evandlheni. Leswi i swa nkoka hikuva swi sirhelela vamakwerhu ni ku endla leswaku moya wa Yehovha wu tirha evandlheni. w21.10 9-10 ¶7-8

Hi gandzela Yehovha loko hi seketela mitirho ya Mfumo hi minyikelo ya hina. Vaisrayele a va nga fanelanga va humelela emahlweni ka Yehovha va ri ximandlamandla. (Det. 16:16) A va fanele va nyikela hi ku ya hi swiyimo swa vona. Hi ku endla tano a va kombisa ndlela leyi va swi tlangelaka hayona swilo hinkwaswo leswi Yehovha a a va endlela swona. Hi nga swi kombisa njhani leswaku ha n’wi rhandza Yehovha ni ku tlangela swilo hinkwaswo leswi a hi endlelaka swona leswaku hi n’wi gandzela? Hi nga nyikela hi mali emavandlheni ni le ka ntirho wa misava hinkwayo hi ku ya hi swiyimo swa hina. Muapostola Pawulo u te: “Loko mi lava ku nyika, swa amukeleka, hi ku ya hi leswi munhu a nga na swona, ku nga ri leswi a nga riki na swona.” (2 Kor. 8:4, 12) Yehovha wa yi amukela minyikelo yin’wana ni yin’wana hambiloko yi vonaka yi nga nyawuli ntsena loko yi huma embilwini.—Mar. 12:42-44. w22.03 24 ¶13

Vakulu a va nge yi susi miringo leyi vanhu va Yehovha va langutanaka na yona. Nilokoswiritano, Yehovha u lava vakulu va khutaza ni ku sirhelela tinyimpfu takwe. Vakulu va nga wu kuma kwihi nkarhi wa ku pfuna van’wana hambiloko va ri bizi? Tekelela xikombiso xa Pawulo. Pawulo a a lava tindlela ta ku bumabumela vamakwavo ni ku tlhela a va aka. Vakulu va endla kahle loko va tekelela xikombiso xakwe hi ku komba vanhu va Yehovha rirhandzu. (1 Tes. 2:7) Pawulo u tiyisekise vagandzerikulobye leswaku wa va rhandza ni leswaku Yehovha wa va rhandza. (2 Kor. 2:4; Efe. 2:4, 5) A a teka vamakwerhu evandlheni va ri vanghana vakwe naswona a a tinyika nkarhi wa ku va na vona. U va kombe leswaku wa va tshemba hi ku va byela leswi n’wi chavisaka ni swihoxo swakwe. (2 Kor. 7:5; 1 Tim. 1:15) Kambe Pawulo a nga ti putanga vusiwana hi swihoxo swakwe. Ku ri na sweswo, a a lava ku va pfuna. w22.03 28 ¶9-10