December

Vuxaka lebyi Yesu a ri na byona ni vadyondzisiwa, u byi fanise ni lebyi murisi a nga na byona ni tinyimpfu. (Yoh. 10:14) Sweswo a swi twala. Tinyimpfu ta n’wi tiva murisi wa tona naswona ti yingisa rito rakwe. Muvalangi un’wana u pfumelelana na yona mhaka leyi. U te: “A hi lava tinyimpfu ti tshinela eka hina leswaku hi ta kota ku ti teka swinepe. Kambe leswi a ti nga ri tivi rito ra hina, a ti tshinelanga. Endzhakunyana ku te xifanyetana lexi a xi ri murisi kutani xi ti vitana, hiloko ti ya eka xona.” Ntokoto lowu wa muvalangi wu hi tsundzuxa marito ya Yesu mayelana ni tinyimpfu takwe, ku nga vadyondzisiwa vakwe. U te: “Ti ta yingisa rito ra mina.” Kambe sweswi Yesu u le tilweni. Hikwalaho, hi n’wi yingisa njhani? Ndlela yin’wana leyi hi nga swi kombisaka hayona leswaku hi yingisa rito ra N’wini wa hina, i ku tirhisa tidyondzo takwe evuton’wini bya hina.—Mat. 7:24, 25. w21.12 16 ¶1-2

Muapostola Pawulo a a ri muxanisi wa Vakreste la nga ni tihanyi loyi a nga lavi ni ku twa nchumu. Kambe hi ku famba ka nkarhi, u xiye swihoxo swakwe ni ku tlhela a tiyimisela ku cinca langutelo ni vumunhu byakwe. (1 Tim. 1:12-16) Hi ku pfuniwa hi Yehovha, Pawulo u ve murisi la nga ni rirhandzu, ntwelavusiwana ni ku tlhela a titsongahata. U hlawule ku tshemba leswaku Yehovha u n’wi rivalerile, ematshan’weni yo tshamela ku ehleketa hi swihoxo swakwe. (Rhom. 7:21-25) A a swi tiva leswaku u ta swi endla swihoxo. U kulule a n’watseka leswaku a va ni vumunhu lebyinene bya Vukreste naswona u titshege hi Yehovha leswaku a n’wi pfuna a endla ntirho wakwe. (1 Kor. 9:27; Filp. 4:13) Vakulu a va hlawuriwi hileswi va nga endliki swihoxo. Kambe Yehovha u langutele leswaku va amukela swihoxo swa vona ni ku tikarhatela ku va ni vumunhu bya Vukreste. (Efe. 4:23, 24) Nkulu u fanele a tikambisisa hi ku tirhisa Rito ra Xikwembu ivi a antswisa loko swi fanerile. Kutani Yehovha u ta n’wi pfuna leswaku a tsaka ni ku va nkulu lonene.—Yak. 1:25. w22.03 29-30 ¶13-15

Hi fanele hi endla yini loko hi xiya leswaku hi avanyise makwerhu? Hi fanele hi tsundzuka leswaku hi fanele hi rhandza vamakwerhu. (Yak. 2:8) Nakambe hi fanele hi khongela hi timbilu ta hina hinkwato, hi kombela Yehovha a hi pfuna hi tshika mukhuva wo avanyisa van’wana. Hi nga ha tlhela hi hanya hi ku ya hi leswi hi swi khongeleleke hi ku hungasa ni loyi a hi n’wi avanyisa. Hi nga ha n’wi rhamba ensin’wini kumbe eka swakudya swo fihluta. Loko hi ya hi n’wi tiva, hi ta tekelela xikombiso xa Yesu na Yehovha hi ku languta leswinene. Loko hi endla tano, hi kombisa leswaku hi yingisa xitsundzuxo xa murisi lonene xo tshika ku avanyisa. Hilaha tinyimpfu ti yingisaka rito ra murisi wa tona, valandzeri va Yesu na vona va yingisa rito rakwe. Onge hi nga ya emahlweni hi yingisa rito ra murisi lonene, swi nga ri na mhaka leswaku hi wela eka lava “ntlhambinyana” kumbe “tinyimpfu tin’wana.”—Luka 12:32; Yoh. 10:11, 14, 16. w21.12 19 ¶11; 21 ¶17-18

Loko Rehobuwama a ve hosi ya Israyele, vanhu vakwe va endle xikombelo. Va kombele leswaku a va vevukisela ndzhwalo lowu tata wakwe Solomoni a va rhwexe wona. Lexi tsakisaka, Rehobuwama u kombele switsundzuxo eka vakulukumba va Israyele leswaku a tiva ndlela leyi a nga va hlamulaka ha yona. Vakulukumba va n’wi tsundzuxe leswaku loko o endla leswi vanhu va n’wi kombelaka swona, va ta ya emahlweni va n’wi seketela. (1 Tih. 12:3-7) Xitsundzuxo xexo a xi n’wi dyisanga byi rhelela kutani u ye a ya kombela xitsundzuxo eka tintangha takwe. Ti n’wi byele leswaku a ya a tikisela vanhu. (1 Tih. 12:9-11) Rehobuwama a a fanele a vutise Yehovha a kombela a N’wi pfuna a hlawula xiboho lexinene. Hambiswiritano, u hlawule ku yingisa tintangha takwe. Ku ve ni vuyelo byo biha ngopfu eka Rehobuwama ni le ka Vaisrayele. Hilaha ku fanaka, hi nga nyikiwa switsundzuxo leswi nga hi tsakisiki kambe loko swi huma eka Rito ra Xikwembu hi fanele hi swi amukela. w22.02 9 ¶6

Munhu loyi a titsongahataka u ta langutisa swinene matimba lawa vantshwa va nga na wona ku nga ri vuswikoti bya vona eka mitirho yo karhi. A nge phikizani na vona kambe u ta va teka tanihi vatirhikulobye. Vantshwa i tinyiko ta risima leti humaka eka Yehovha naswona vamakwerhu lava dyuhaleke va ti tlangela. Loko vadyuhari va xiya ku matimba ya vona a ma ha va pfumeleli ku endla swo tala, va swi tlangela loko va vona leswaku ku ni vantshwa lava kotaka ku endla mitirho yo tala evandlheni. Nawomi i xikombiso lexinene xa le Bibeleni xa mudyuhari loyi a pfumeleke ku pfuniwa hi muntshwa. Endzhaku ka loko Rhuti a ve noni, Nawomi u n’wi kombele leswaku a tlhelela eka rikwavo. Kambe loko Rhuti a sindzisa ku tlhelela na yena eBetlehema, Nawomi u wu pfumerile nseketelo wolowo. (Rhu. 1:7, 8, 18) Sweswo swi endle leswaku vavasati lava havambirhi ka vona va kuma mikateko! (Rhu. 4:13-16) Loko lava dyuhaleke va titsongahata, va ta tekelela xikombiso xa Nawomi. w21.09 10-11 ¶9-11

Tata wa hina wa le tilweni wa swi twisisa leswaku hi hambanile. Kumbexana u kota ku endla swo tala ku tlula van’wana. Kumbexana a wu koti ku endla swo tala ku fana ni van’wana hikwalaho ka vutihlamuleri byo wundla ndyangu, rihanyo ni ku dyuhala. U nga wi mapa. (Gal. 6:4) Yehovha a nge yi rivali mitirho ya wena. Ntsena loko u endla leswi u nga swi kotaka hi xikongomelo lexinene, Yehovha u ta tsaka. Yehovha u tiva leswi nga embilwini ya wena. U lava leswaku u tsaka u tlhela u eneriseka hi leswi u kotaka ku swi endla loko u n’wi gandzela. Ha pepa emoyeni hi ku tiva leswaku Yehovha wa va pfuna vagandzeri vakwe loko va ri ni swiphiqo. (Esa. 41:9, 10) Hi ni swivangelo leswinene swo va hi tsaka loko hi ri karhi hi gandzela Tata wa hina loyi a nga ni rirhandzu loyi a faneriwaka hi ku “dzunisiwa ni ku xiximiwa” hi swivumbiwa swakwe hinkwaswo!—Nhlav. 4:11. w22.03 24 ¶16; 25 ¶18

Hi lava ku tekelela Yesu kambe hi nga wi mapa loko hi nga swi koti ku tekelela Yesu hi ku helela. (Yak. 3:2) Xichudeni a xi nge n’wi tekeleli hi ku helela mudyondzisi wa xona. Xichudeni xi ta antswisa loko xo ya emahlweni xi dyondza eka swihoxo swa xona ni ku lwa hi matimba ku tekelela mudyondzisi wa xona. Na hina hi nga swi kota ku tekelela Yesu loko hi tirhisa leswi hi swi dyondzaka eBibeleni ni ku tikarhatela ku lulamisa swihoxo swa hina. (Ps. 119:59) Hi hanya emisaveni ya mina hi mina. Kambe vanhu va Yehovha a va tano. Ya hi tsakisa ndlela leyi Yesu a pfuneke van’wana hayona naswona hi lava ku n’wi tekelela. (1 Pet. 2:21) Loko hi tikarhatela ku tekelela ndlela leyi Yesu a a pfuna van’wana hayona, hi ta tsaka ku tiva leswaku hi tsakisa Yehovha. w22.02 24 ¶16; 25 ¶18

Yehovha u kongomisa vanhu vakwe namuntlha hi ku tirhisa Rito rakwe ku nga Bibele. Loko hi tinyika nkarhi wo ehleketisisa hi leswi Yehovha a hi dyondzisaka swona, hi ta swi kota ku landzelela nkongomiso ni ku endla ntirho wo chumayela. (1 Tim. 4:15, 16) Ndlela yin’wana leyi Yehovha a hi kongomisaka hayona i ku tirhisa “nandza wo tshembeka ni wo tlhariha.” (Mat. 24:45) Mikarhi yin’wana nandza a nga hi nyika nkongomiso lowu hi nga wu twisisiki kahle. Hi xikombiso, mikarhi yin’wana hi nga ha byeriwa leswaku hi tshama hi vambe ngoma leswaku hi ta pona mhangu ya ntumbuluko leyi hi vonaka onge a yi nge endleki emugangeni wa ka hina. Hi fanele hi endla yini loko hi nyikiwa nkongomiso lowu hi vonaka onge a wu twali? Ehleketa hi swikombiso leswi hi dyondzeke ha swona eBibeleni. Mikarhi yin’wana vanhu va Xikwembu va nyikiwe nkongomiso lowu a wu vonaka wu nga twali kambe wu poniseke vutomi bya vona.—Vaav. 7:7; 8:10. w22.03 18-19 ¶15-16

Handle ko ba mariri, Yesu u vule marito lama nga eka ndzimana ya namuntlha. Yesu a a swi tiva leswaku vutomi byakwe byi titshege hi Yehovha naswona a a tiyiseka leswaku Tata wakwe u ta n’wi tsundzuka. Hi dyondza yini eka marito ya Yesu? Titshege hi Yehovha. Leswaku u kota ku endla tano, u fanele u “tshemba Yehovha hi mbilu ya wena hinkwayo.” (Swiv. 3:5) Twana hi ta Joshua, loyi a nga Mbhoni naswona a nga ni malembe ya 15, loyi a a khomiwe hi vuvabyi lebyi nga ni khombo. U ale ku amukela vutshunguri lebyi lwisanaka ni milawu ya Xikwembu. Emahlweninyana ko va a lova, u byele mana wakwe a ku: “Mama, vutomi bya mina byi le mavokweni ya Yehovha. . . . Ndzi lava u tiva mhaka leyi: Ndza tiyiseka leswaku hambiloko ndzo fa, Yehovha u ta ndzi pfuxa. U yi tiva kahle mbilu ya mina naswona ndza n’wi rhandza swinene.” Hinkwerhu hi ta va hi endla kahle loko hi tivutisa xivutiso lexi nge, ‘Loko ndzo tikuma ndzi langutane ni xiyimo lexi xungetaka vutomi, xana ndzi ta titshega hi Yehovha ni ku tshemba leswaku u ta ndzi pfuxa hambiloko ndzo fa?’ w21.04 12-13 ¶15-16

Vanhu va Yehovha va tiyisiwa hi ntirho wo chumayela. Loko hi chumayela van’wana, ha phyuphya ni ku tlhela hi kuma matimba, swi nga ri na mhaka leswaku va angula njhani. Van’wana, va vona onge a va nge swi koti ku chumayela hi laha va lavaka hakona hikwalaho ka swiyimo swo karhi. Loko ku ri leswaku na wena u titwa tano, swi tive leswaku Yehovha wa tsaka loko u endla matshalatshala yo n’wi tirhela. Yehovha wa ma vona ni ku ma tlangela matshalatshala ya hina yo chumayela hambiloko hi nga swi koti ku huma emakaya hikwalaho ka mavabyi. U ta hi pfuna hi kota ku chumayela madokodela ni vaongori. Loko ho pimanisa leswi hi kotaka ku swi endla sweswi ni leswi a hi kota ku swi endla khale, sweswo swi ta hi heta matimba. Kambe loko hi twisisa ndlela leyi Yehovha a hi pfunaka hayona sweswi, hi ta va ni matimba yo kota ku tiyisela miringo hi tsakile. A hi swi tivi leswaku mbewu ya ntiyiso leyi hi yi byalaka yi ta mila kwihi kutani yi sungula ku kula.—Ekl. 11:6 w21.05 24-25 ¶14-17

Makwanga ma endle leswaku Hosi Davhida a rivala hinkwaswo leswi Yehovha a n’wi nyikeke swona, leswi katsaka rifuwo, xikhundlha ni ku va ni matimba yo hlula valala vakwe vo tala. U pfumerile leswaku Xikwembu xi n’wi nyike tinyiko to ‘tala ngopfu lerova a nge swi koti ku swi rungula!’ (Ps. 40:5) Kambe siku rin’wana, Davhida u rivarile leswi Yehovha a n’wi nyikeke swona. Hambileswi a a ri ni vavasati vo tala kambe u sungule ku navela nsati wa wanuna un’wana. Vito ra wansati yoloye a ku ri Bati-xeba naswona nuna wakwe a ku ri Uriya lowa Muheti. Davhida u etlele na Bati-xeba nsati wa Uriya naswona u tikile. Leswi a swi endleke a swi bihe ngopfu kambe endzhaku u endle nileswaku Uriya a dlayiwa. (2 Sam. 11:2-15) Xana a a ehleketa yini? Xana a a ehleketa leswaku Yehovha a nge swi voni? Hambileswi a tirheleke Yehovha hi ku tshembeka malembe yo tala kambe makwanga ma endle leswaku a weriwa hi makhombo. Hi ku famba ka nkarhi u phofule swidyoho swakwe a tlhela a hundzuka. A a tsake ngopfu loko Yehovha a n’wi rivalela!—2 Sam. 12:7-13. w21.06 17 ¶10

Hi nga ha tibyela leswaku hi pfumala vuswikoti byo dyondzisa vanhu Bibele. Kumbexana hi tibyela leswaku ku laveka vutivi kumbe vuswikoti byo karhi leswaku hi kota ku dyondzisa munhu Bibele. Loko u titwa tano, xiya swilo swinharhu leswi nga ku pfunaka u titshemba. Xo sungula, Yehovha u ku vona u faneleka ku dyondzisa van’wana. Xa vumbirhi, Yesu loyi a “nyikiweke matimba yo lawula swilo hinkwaswo etilweni ni le misaveni” u ku rhume ku dyondzisa. (Mat. 28:18) Xa vunharhu, u nga kombela mpfuno eka van’wana. Yesu a a titshege hileswi Tata wakwe a a n’wi dyondzise swona na wena u nga endla tano. (Yoh. 8:28; 12:49) Nakambe u nga kombela mulanguteri wa ntlawa wa nsimu ya ka n’wina, phayona kumbe muhuweleri loyi a nga ni ntokoto leswaku va ku pfuna u sungula ku dyondza ni munhu Bibele. Xin’wana lexi nga ku pfunaka, i ku famba na vona loko va ya dyondza ni swichudeni swa vona swa Bibele. w21.07 6 ¶12

Leswi makumu ma nga kwala nyongeni, hi fanele hi tshemba ndlela leyi Yehovha a endlaka swilo hayona ku tlula eku sunguleni. Hikwalahokayini? Hi nkarhi wa nhlomulo lowukulu, hi nga ha nyikiwa nkongomiso lowu hi vonaka wu tika kumbe wu nga twali. I ntiyiso leswaku Yehovha a nge vulavuli na hina hi ku kongoma. U ta hi kongomisa hi ku tirhisa lava a va hlawuleke ku hi rhangela. Wolowo ku ta va ku nga ri wona nkarhi wo ehleketa kambirhi kumbe hi debyisa mavoko kutani hi ku: ‘Xana leswi swi huma eka Yehovha kumbe vakulu vo tisungulela?’ Xana u ta tshemba Yehovha ni nhlangano wakwe hi nkarhi wolowo? Nhlamulo yi titshege hi ndlela leyi u wu amukelaka hayona nkongomiso sweswi. Loko u nga bi mariri ku yingisa nkongomiso wa Yehovha sweswi, swi ta ku olovela ku wu yingisa hi nkarhi wa nhlomulo lowukulu. w22.02 6 ¶15

Yehovha u pfune Gidiyoni ni vavanuna vakwe va 300 leswaku va hlula enyimpini naswona a va ta va va tibume hi swona. Vavanuna va Efrayimi va hlangane na Gidiyoni ku nga ri leswaku va ta n’wi bumabumela kambe leswaku va ta n’wi holovisa hileswi Gidiyoni a nga va rhambangiki leswaku va ya lwa ni valala va Xikwembu. (Vaav. 8:1) Gidiyoni u va tsundzuxe ndlela leyi Yehovha a va pfuneke hayona ku endla swilo leswikulu. Hikwalaho ka sweswo vavanuna lava “a va ha n’wi karihelanga.” (Vaav. 8:3) Gidiyoni a a tiyimisele ku titsongahata leswaku a kondletela ku rhula exikarhi ka vanhu va Xikwembu. Eka Vaefrayimi hi dyondza leswaku a hi fanelanga hi karhateka ngopfu hi hina vini kambe hi fanele hi karhateka hi ku vangamisa Yehovha. Tinhloko ta mindyangu ni vakulu va nga dyondza swo karhi eka Gidiyoni. Loko munhu a khunguvanyisiwe hileswi hi swi endleke, hi fanele hi ringeta ku twisisa ndlela leyi a titwaka hayona. Hi nga bumabumela munhu loko a endle leswinene. Sweswo swi lava ku titsongahata. Kambe ku rhula i ka nkoka ngopfu ku tlula ku va hi tikukumuxa. w21.07 16-17 ¶10-12

Yehovha u kombise leswaku u hi teka hi ri va nkoka hi ku hi vumba hi xifaniso xakwe. Leswi hi vumbiweke hi xifaniso xa Xikwembu, hi kota ku tekelela rirhandzu, ntwelavusiwana, ku tshembeka ni vululami bya xona. (Ps. 86:15; 145:17) Loko hi endla tano, hi yisa ku dzuneka eka Yehovha naswona hi kombisa leswaku ha n’wi khensa. (1 Pet. 1:14-16) Loko hi hanya hi ndlela leyi tsakisaka Tata wa hina wa le tilweni, swi ta endla leswaku hi tsaka ni ku eneriseka. Nakambe leswi a hi vumbeke hi xifaniso xakwe, hi kota ku hanya hi ndlela leyi a lavaka leswaku lava nga xiphemu xa ndyangu wakwe va hanya hayona. Yehovha u hi endlele kaya ro xonga. Loko a nga si vumba munhu wo sungula, Yehovha u rhange hi ku tumbuluxa misava. (Yobo 38:4-6; Yer. 10:12) Leswi a nga ni musa ni malwandla, u hi nyike swilo swo tala leswinene leswaku hi tiphina hi swona. (Ps. 104:14, 15, 24) Nakambe u tinyike nkarhi wo languta swilo hinkwaswo leswi a swi tumbuluxeke kutani a “vona leswaku swi sasekile.”—Gen. 1:10, 12, 31. w21.08 3 ¶5-6

Hinkwerhu hi ni vutihlamuleri byo chumayela ni ku endla vadyondzisiwa. (Mat. 28:19, 20; Rhom. 10:14) Xana wa swi lava ku antswisa vuswikoti bya wena eka ntirho lowu wa nkoka? Tivekele leswi u lavaka ku swi fikelela loko u ri karhi u dyondza broxara leyi nge Tinyiketele Eku Hlayeni Ni Le Ku Dyondziseni. U nga rivali leswaku nchumu wa nkoka swinene lowu u faneleke u wu hlakulela i ku va ni vumunhu bya Vukreste lebyi tsakisaka Xikwembu. (Kol. 3:12; 2 Pet. 1:5-8) Hinkwerhu ha swi lava ku endlela Yehovha ntirho wo tala ku tlula lowu hi n’wi endlelaka wona sweswi. Emisaveni leyintshwa ya Xikwembu, hi ta swi kota ku xi tirhela hilaha hi lavaka hakona. Kambe loko sweswi hi tikarhatela ku tirha hi matimba eka mitirho leyi hi yi endlelaka Yehovha, hi ta engetela ntsako wa hina naswona a hi nge heli matimba. Xa nkoka swinene, hi ta yisa ku dzuneka hinkwako eka Yehovha “Xikwembu lexi tsakeke.” (1 Tim. 1:11) Hikwalaho, a hi yeni emahlweni hi tsaka eka mitirho hinkwayo leyi hi kotaka ku yi endla sweswi! w21.08 25 ¶18-20

Loko u kurisiwe hi vatswari lava nga Timbhoni ta Yehovha, swi nga endleka leswaku u dyondze hi Yehovha wa ha ritsongo. U dyondzisiwe leswaku hi yena Muvumbi loyi a hanyisanaka kahle ni vanhu naswona u tshembisa vanhu vumundzuku byo tsakisa. (Gen. 1:1; Mit. 17:24-27) Vanhu vo tala a va tshembi leswaku Xikwembu xi kona, nileswaku hi xona xi vumbeke swilo hinkwaswo. Kambe va tshemba leswaku vutomi byi lo tisungulela ivi byi cinca hakatsongotsongo byi va swilo leswikulu. Van’wana lava kholwaka mhaka leyi hi lava dyondzekeke. Va vula leswaku sayense yi ni vumbhoni lebyi kombisaka ku Bibele a yi na ntiyiso naswona lava tshembaka leswaku ku na Muvumbi a va dyondzekanga, a va tlharihanga naswona a va tivi nchumu. Hambiloko hi ri ni nkarhi wo leha hi ri Timbhoni ta Yehovha, hinkwerhu hi fanele hi tshama hi ri karhi hi tiyisa ripfumelo ra hina. Loko hi endla tano a hi nge phasiwi hi “vutlhari bya misava leyi ni vuxisi” leswi dyondzisiwaka hi vanhu lava nga ri tshembiki Rito ra Xikwembu.—Kol. 2:8. w21.08 14 ¶1-3

Avele, Nowa, Abrahama na Yobo va swi kombisile leswaku va n’wi xixima ni ku n’wi rhandza Yehovha hi ku va ni ripfumelo eka yena, va n’wi yingisa ni ku n’wi endlela magandzelo. Swi le rivaleni leswaku a va swi rhandza ku xixima Yehovha naswona ndlela leyi a va n’wi gandzela hayona a yi n’wi tsakisa. Hi ku famba ka nkarhi Yehovha u nyike vatukulu va Abrahama Nawu hi ku tirhisa Muxe. Nawu wolowo a wu katsa swileriso swa ndlela leyi Yehovha a lavaka ku gandzeriwa hayona. Endzhaku ka ku fa ni ku pfuxiwa ka Yesu, Yehovha a a nga ha langutelanga leswaku vanhu va n’wi gandzela hi ku landza Nawu lowu a wu nyike Vaisrayele. (Rhom. 10:4) Vakreste a va ta fanela ku landzela nawu lowuntshwa ku nga “nawu wa Kreste.” (Gal. 6:2) “Nawu” lowu a va ta wu yingisa hi ku tekelela xikombiso xa Yesu ni ku yingisa tidyondzo takwe ku nga ri hi ku landzela swileriso swo tala. Hikwalaho, Vakreste namuntlha va wa va pfuka ku landzela Kreste leswaku va tsakisa Yehovha ni ku va va “phyuphyisiwa.”—Mat. 11:29. w22.03 20-21 ¶4-5

Yehovha wa va yingisa vana vakwe. U yingise swikhongelo swo tala swa n’wana wakwe wa mativula loko a ha ri laha misaveni. U yingise xikhongelo xakwe xo hlawula vaapostola va 12. (Luka 6:12, 13) Nakambe u tlhele a yingisa xikhongelo xakwe loko a tshikilelekile. Loko Yudasi a nga se n’wi xavisa, u khongele swinene eka Tata wakwe hikwalaho ka xiyimo xo tika lexi a a ta langutana na xona ku nga ri khale. Yehovha a nga lo hlamula xikhongelo xa Yesu ntsena kambe u tlhele a rhumela ntsumi leswaku yi ta tiyisa n’wana wakwe. (Luka 22:41-44) Ninamuntlha, Yehovha wa swi yingisa swikhongelo swa malandza yakwe naswona wa swi hlamula hi nkarhi lowunene. (Ps. 116:1, 2) Xiya ndlela leyi makwerhu waxisati wa le India a swi voneke hayona sweswo. A a karhatiwa hi ku vilela ngopfu naswona u khongele hi mhaka yoleyo eka Yehovha. U ri: “Vuhaxi bya JW bya May 2019 lebyi vulavulaka hi ndlela yo lwisana ni ku vilela, byi ndzi pfunile swinene. A ku ri nhlamulo ya swikhongelo swa mina.” w21.09 21-22 ¶6-7

A swi kanakanisi leswaku a swi va tikela Vakreste va le nkarhini wa vaapostola ku sukela makaya ya vona ivi va ya sungula vutomi lebyintshwa endhawini yin’wana. A swi lava ripfumelo ni ku tshemba leswaku Yehovha a a ta va khathalela. Kambe ku ve ni swin’wana leswi va pfuneke. Emahlweni ka malembe ya ntlhanu Varhoma va nga si rhendzela muti wa Yerusalema, muapostola Pawulo u nyike Vaheveru xitsundzuxo lexi: “Mi nga rhandzi mali, kambe enerisekani hi swilo leswi mi nga na swona. Hikuva xi te: ‘Ndzi nga ka ndzi nga ku tshiki naswona ndzi nga ka ndzi nga ku fularheli.’ Leswaku hi ta va ni xivindzi xo vula hi ku: ‘Yehovha i mupfuni wa mina; a ndzi nge chavi. Xana munhu a nga ndzi endla yini?’” (Hev. 13:5, 6) Swi le rivaleni leswaku lava yingiseke xitsundzuxo xa Pawulo loko Varhoma va nga si hlasela muti, swi va oloverile ku hanya vutomi byo olova emakaya ya vona lamantshwa. A va nga kanakani leswaku Yehovha u ta va khathalela. w22.01 4 ¶7, 9

Munhu loyi a nga ni tintswalo u ni musa, rirhandzu, ntwelavusiwana ni malwandla. Hi nga ha ehleketa hi xifaniso xa Yesu xa Musamariya wa musa. Hambileswi a a huma etikweni rin’wana kambe u n’wi ‘kombe tintswalo’ Muyuda loyi a weleke emavokweni ya swigevenga. Wanuna loyi wa Musamariya u ‘n’wi twele vusiwana’ Muyuda loyi a a vavisekile naswona hi rirhandzu u n’wi khathalerile. (Luka 10:29-37) Xikombiso lexi xi hi dyondzisa tintswalo leti Xikwembu xi nga na tona. Rirhandzu ra xona ri kombisa leswaku xi ni tintswalo naswona xi hi komba tona hi tindlela to tala siku ni siku. Ku ni ndlela yin’wana leyi munhu a nga kombisaka tintswalo hayona. Munhu loyi a nga ni tintswalo a nga hlawula ku nga n’wi xupuli munhu un’wana hambiloko a ri ni xivangelo xo endla tano. Emhakeni yoleyo, Yehovha u hi kombise tintswalo hinkwerhu. Mupisalema u te: “A nga hi khomanga hi ku ya hi swidyoho swa hina.” (Ps. 103:10) Kambe mikarhi yin’wana, Yehovha a nga ha boheka ku tshinya munhu loyi a endleke xidyoho. w21.10 8 ¶1-2

Yehovha u kombisa rirhandzu lerikulu ntsena eka malandza yakwe lama nga ni vuxaka lebyinene na yena. Leswi hi swi vona eka leswi vuriweke hi Hosi Davhida na muprofeta Daniyele. Hi xikombiso, Davhida u te: “Tshama u ri karhi u rhandza lava ku tivaka.” “Rirhandzu ra Yehovha i ra hilaha ku nga heriki eka lava n’wi chavaka.” Nakambe Daniyele u te: “Yehovha Xikwembu xa ntiyiso, [loyi] a rhandzaka lava n’wi rhandzaka va tlhela va yingisa swileriso swakwe.” (Ps. 36:10; 103:17; Dan. 9:4) Hilaha hi swi tweke hakona, Yehovha u kombisa rirhandzu rakwe eka malandza yakwe hikuva ma n’wi tiva, ma n’wi chava, ma n’wi rhandza naswona ma yingisa swileriso swakwe. Yehovha u ma kombisa rirhandzu malandza yakwe lama n’wi gandzelaka hi ku tshembeka. Yehovha u hi kombise rirhandzu leri a ri kombaka vanhu hinkwavo niloko hi nga se sungula ku n’wi tirhela. (Ps. 104:14) Kambe leswi sweswi se hi n’wi tirhelaka hi ku tshembeka, Yehovha u hi kombisa rirhandzu rakwe lerikulu. w21.11 4 ¶8-9

Hambi ko ba lexi dumaka, hi tiyimisele ku yingisa marito ya Yesu lama nga laha henhla. Vanhu vo tala namuntlha va landzela vafundhisi lava dumeke. Va va rhandza ngopfu lerova se ko xota katsongo va va gandzela. Vo tala va ya etikerekeni ta vona, va xava tibuku ta vona ni ku nyikela hi mali yo tala leswaku va va seketela. Van’wana va tshemba hinkwaswo leswi vuriwaka etikerekeni. Swi twisa ku vava ku xiya leswaku ndlela leyi va va khomaka hayona vafundhisi lava onge hiloko va vona Yesu! Ku hambana na vona, vagandzeri va ntiyiso a va na vafundhisi. Hambileswi hi xiximaka lava rhangelaka kambe hi yi tekela enhlokweni dyondzo ya Yesu leyi nge: “N’wina hinkwenu mi vamakwavo.” (Mat. 23:8-10) A hi gandzeli vanhu, swi nga ri na mhaka leswaku i varhangeri va vukhongeri kumbe va tipolitiki. Nakambe a hi swi seketeli swiendlo swa vona. A hi katseki eka leswi va swi endlaka naswona a hi xiphemu xa misava. Ndlela leyi hi gandzelaka hayona yi hambanile ni ya vukhongeri byin’wana lebyi tivulaka Vakreste.—Yoh. 18:36. w21.10 20 ¶6-7

Vakreste hinkwavo lava lavaka ku kwetsima, va fanele va tivonela leswaku a va pfumeleli nchumu kumbe munhu wo karhi leswaku a va wa nkoka ku tlula vuxaka bya vona ni Xikwembu. Nakambe leswi hi nga Timbhoni ta Yehovha, hi tiyimisele ku papalata nchumu wihi ni wihi lowu thyakisaka kumbe ku tisa xisandzu evitweni rakwe leri kwetsimaka. (Lev. 19:12; Esa. 57:15) Leswaku Vaisrayele va teka Yehovha tanihi Xikwembu xa vona, a va fanele va yingisa milawu yakwe. Levhitika 18:4 yi ri: “Mi fanele mi yingisa swiboho swa mina swa vuavanyisi naswona mi fanele mi hlayisa milawu ya mina, mi hanya hi yona. Hi mina Yehovha Xikwembu xa n’wina.” Ndzima 19 yi boxa ni “milawu” yin’wana leyi Vaisrayele a va fanele va yi hlayisa. Hi xikombiso, tindzimana 5-8, 21 na 22, ti vulavula hi ndlela leyi a va fanele va ma nyikela hayona magandzelo ya swiharhi. A va fanele va ma nyikela hi ndlela leyi a yi nga ta ‘nyamisa nchumu wo kwetsima wa Yehovha.’ Ku hlaya tindzimana teto swi fanele swi hi susumetela ku endla hinkwaswo leswi nga ematimbeni ya hina leswaku hi tsakisa Yehovha ni ku nyikela magandzelo yo n’wi dzunisa, hilaha Vaheveru 13:15 yi hi khutazaka hakona. w21.12 5-6 ¶14-15

Vatekani lava ha riki vantshwa va nga dyondza swo tala eka van’wana lava titshegeke hi Yehovha. Vatekani van’wana swi nga ha endleka va hete nkarhi wo tala entirhweni wa nkarhi hinkwawo. Hikwalahokayini u nga kombeli switsundzuxo swa vona loko u lava ku teka swiboho? Yoleyo i ndlela yin’wana leyi kombisaka leswaku wa n’wi tshemba Yehovha. (Swiv. 22:17, 19) Tsundzuka leswaku vukati i nyiko ya risima leyi humaka eka Yehovha. (Mat. 19:5, 6) U lava leswaku vatekani va tiphina hi yona. Vatekani lava ha riki vantshwa, hikwalahokayini mi nga kambisisi ndlela leyi mi wu tirhisaka hayona nkarhi wa n’wina? Xana mi endla hinkwaswo leswi mi nga swi kotaka ku kombisa Yehovha leswaku ma yi tlangela nyiko ya risima leyi a mi nyikeke yona? Vulavulani na Yehovha hi xikhongelo. Dyondzani Rito ra Xikwembu ivi mi vona leswi nga mi pfunaka exiyin’weni xa n’wina. Ku engetela kwalaho, tirhisani xitsundzuxo lexi Yehovha a mi nyikaka xona. Mi ta tiyiseka hi ntsako lowu mi nga ta va na wona ni ku hanya vutomi lebyi nga ni xikongomelo loko mi teka ku tirhela Yehovha tanihi nchumu wa nkoka evuton’wini bya n’wina! w21.11 19 ¶16, 18

Yakobo a a nga tikukumuxi. Yakobo a a nga ri na makatla hileswi a a ri ndzisana ya Yesu kumbe hileswi a a ri ni vutihlamuleri byo karhi evandlheni. A a teka vagandzeri kulobye tanihi “vamakwerhu lava rhandzekaka.” (Yak. 1:16, 19; 2:5) A nga ringetanga ku endla van’wana va vona onge yena a nga swi endli swihoxo. Leswi hi swi dyondzaka: Tsundzuka leswaku hinkwerhu hi vadyohi. A hi fanelanga hi ehleketa leswaku ha antswa ku tlula lava hi va dyondzisaka. Hikwalahokayini? Loko hi endla xichudeni xa hina xi ehleketa leswaku a hi swi endli swihoxo, xi nga ha tibyela leswaku milawu ya Xikwembu ya tika. Kambe loko hi boxa leswaku mikarhi yin’wana a swi nga hi oloveli ku yingisa milawu ya le Matsalweni naswona hi tlhela hi xi hlamusela ndlela leyi Yehovha a hi pfuneke hayona ku endla ku cinca evuton’wini bya hina, hi ta xi pfuna xi vona leswaku na xona xi nga swi kota ku tirhela Yehovha. w22.01 11-12 ¶13-14

Loko hi ya hi ehleketa ku fana na Yesu, hi ta ya hi endla swilo ku fana na yena naswona sweswo swi ta endla leswaku hi ya hi tekelela vumunhu byakwe. (Hev. 1:3) Hi nga ha ku: ‘Yesu a nga endli swihoxo. A ndzi nge pfuki ndzi fane na yena!’ Loko u titwa tano, tsundzuka leswi. Xo sungula, u vumbiwe u ri ni vuswikoti byo kota ku tekela Yehovha na Yesu. Kutani u nga hlawula ku va tekelela naswona u nga swi kota hi mpimo wo karhi. (Gen. 1:26) Xa vumbirhi, moya lowo kwetsima wa Xikwembu wu ni matimba. Wu nga ku pfuna ku endla swilo leswi a wu nga ta pfuka u swi kotile. Xa vunharhu, Yehovha a nga langutelanga leswaku u kombisa mihandzu ya moya lowo kwetsima kwatsaa, enkarhini wa sweswi. Hi yona mhaka Tata wa hina la nga ni rirhandzu a nga ta nyika vanhu lava nga ta hanya laha misaveni malembe ya 1 000, leswaku va kota ku kombisa mihandzu ya moya lowo kwetsima kwatsaa! (Nhlav. 20:1-3) Sweswi Yehovha u langutele leswaku hi endla leswi hi nga swi kotaka ni ku titshega hi yena leswaku a hi pfuna. w22.03 9 ¶5-6

A hi xikhongelo ntsena lexi tiyisaka vuxaka bya hina na Yehovha. Ku dyondza Rito ra Xikwembu ni ku va kona etinhlengeletanweni ta vandlha swi ta hi pfuna ku tshinela ekusuhi ni Xikwembu. Xana swi kona swin’wana leswi u nga swi endlaka leswaku u wu tirhisa kahle nkarhi wo dyondza ni wo ya etinhlengeletanweni ta vandlha? Tivutise, ‘Xana i yini leswi ndzi kavanyetaka loko ndzi ri etinhlengeletanweni ta vandlha kumbe ndzi lava ku dyondza Bibele?’ Xana i ku hlamula foni, ti-email kumbe marungula lawa u rhumeriwaka wona? Loko u xiya leswaku u sungula ku ehleketa swin’wana loko u ri eku dyondzeni ka Bibele kumbe loko u ri etinhlengeletanweni ta vandlha, kombela Yehovha a ku pfuna u nga kavanyeteki. Swi nga ha ku tikela ku swi ba hi makatla kutani u hlaya Bibele kambe i swa nkoka ku u endla tano. Kombela ku rhula ka Xikwembu leswaku ku rindza mbilu ni ‘mianakanyo ya wena.’—Filp. 4:6, 7. w22.01 29-30 ¶12-14

Hosi Uziya u ale ndzayo. U nghene etempeleni ya Yehovha endhawini leyi a ku pfumeleriwa vaprista ntsena leswaku a hisa murhi wo nun’hwela. Vaprista va Yehovha va te: “A hi ntirho wa wena Uziya, ku hisela Yehovha murhi wo nun’hwela! I vaprista ntsena lava faneleke va endla tano.” Uziya u endle yini? Loko a lo titsongahata ivi a amukela xitsundzuxo kutani a hatla a huma etempeleni, kumbexana Yehovha a a ta va a n’wi rivalerile. Kambe ku ri na sweswo, ‘Uziya u hlundzukile.’ Hikwalahokayini a tiomise nhloko? A a ti byela leswaku leswi a a ri hosi a nge twi hi munhu. Kambe Yehovha a nga swi pfumelelanga sweswo. Hikwalaho ko tikukumuxa, Uziya u biwe hi nhlokonho naswona “u tshame a ri ni nhlokonho kukondza a fa.” (2 Tikr. 26:16-21) Mhaka ya Uziya yi hi dyondzisa leswaku swi nga ri ni mhaka leswaku hi va mani, loko hi nga yi yingisi ndzayo ya le Bibeleni hi ta lahlekeriwa hi vuxaka bya hina na Yehovha. w22.02 9 ¶7

Munhu loyi a lawuriwaka hi “vumunhu bya khale” hi ntolovelo u ehleketa ni ku endla swilo hi ku kuceteriwa hi xidyoho lexi a tswariweke na xona. (Kol. 3:9) A nga ehleketeleli vanhu van’wana, u hatla a hlundzuka, a nga khensi naswona u ni makatla. Kumbexana u tsakisiwa hi ku hlalela timhaka ta masangu ni tifilimi leti nga ni madzolonga. A swi kanakanisi leswaku ku ni swilo leswinene leswi a swi endlaka kahle naswona kumbexana u titwa nandzu hikwalaho ka swilo swo biha leswi a swi endlaka kumbe a swi vulaka. Kambe a nga tikarhati leswaku a cinca mahanyelo yakwe ni ndlela leyi a ehleketaka hayona. (Gal. 5:19-21; 2 Tim. 3:2-5) Hi velekiwe hi ri ni xidyoho, kutani a hi nge swi koti ku tshika ku ehleketa hi swilo swo biha hilaha ku heleleke ni ku susa ku navela ko biha etimbilwini ta hina. Mikarhi yin’wana hi vula ni ku endla swilo leswi hi salaka hi tisola. (Yer. 17:9; Yak. 3:2) Loko hi tshika vumunhu bya khale, a hi nge he lawuriwi hi mikhuva ni swiendlo swo biha. Hi ta va vanhu lavanene.—Esa. 55:7. w22.03 3 ¶4-5

Vakulu, xiyisisani swilo leswinene leswi vamakwerhu va swi endlaka. Munhu un’wana ni un’wana wa swi endla swihoxo kambe ku ni leswinene leswi a swi endlaka. Nkarhi ni nkarhi swi nga ha lava leswaku vakulu va pfuna makwerhu a va ni langutelo lerinene. Kambe ku fana na muapostola Pawulo, vakulu va fanele va tikarhatela ku nga dziki ngopfu eka mavulavulelo ni maendlelo ya munhu ya swilo lama nga tsakisiki. Va ta va va endla kahle loko va xiyisisa ndlela leyi a rhandzaka Yehovha ni ku tiyisela hayona loko a ri karhi a n’wi gandzela nileswaku a nga swi kota ku antswisa. Vakulu lava nga ni langutelo lerinene va endla leswaku vamakwerhu evandlheni va tsaka. Tsundzukani leswaku Yehovha wa swi tiva leswaku mi ta swi endla swihoxo kambe u lava mi tshembeka. (1 Kor. 4:2) U nga tiyiseka leswaku Yehovha wa tsaka hi ntirho lowu u n’wi endlelaka wona. Yehovha a nge pfuki a wu ‘rivarile ntirho wa n’wina ni rirhandzu leri mi ri kombiseke hikwalaho ka vito ra yena, hi ku tirhela vakwetsimi naswona ma ha ya emahlweni mi va tirhela.’—Hev. 6:10. w22.03 31 ¶19, 21