Xana Xikwembu Xa Ku Hlwerisa Ku Avanyisa Ka Xona?

A HI nge u yimele n’eni la humaka ekule la ku byeleke siku ra ku fika kakwe kambe hayi nkarhi wa kona. Loko nkarhi wu ri karhi wu famba, naswona a nga fiki, u sungula ku vilela loko ku ri leswaku u khomiwile hi swin’wana. Xana leri hakunene a ku ri siku leri a vuleke leswaku u ta ta ha rona? Ku nga va ku vile ni xidoledole (ku nga twisisi) ke? Hi ku nonoka, leswi eku sunguleni a swi ri ku hela mbilu ntsena swi pfulela nchumu wun’wana lowu pfilunganyaka swinene, nchumu lowu vitaniwaka ku kanakana.

Leswi swi nga ha hlamusela khwatsi ndlela leyi vanhu van’wana va titwaka ha yona hi ta ku fika loku tshembisiweke ka nkarhi wa Xikwembu wo tisa ku avanyisiwa ka vuhomboloki. Kahle-kahle, vagandzeri va xona va ku rindzerile hi nkarhi wo leha. Teka Hosi Davhida la tshembekaka tanihi xikombiso. Ku tlula malembe ya 3 000 lama hundzeke u te: “Yehova hi yexe evokweni ra wena ra xinene kunene u ta fayetela tihosi hi siku ra vukarhi bya yena. U ta tisa ku avanyisa exikarhi ka matiko.” Hikwalaho u kona loyi namuntlha a nga soriwaka loko a vutisa leswaku hi rini xana?—Psalma 110:5, 6, NW.

Hi ku pimanisa swiyimo swa misava ni vuprofeta bya Bibele ni ku khathalela mahlayelele ya Bibele, swichudeni leswi chivirikaka swa Bibele swi khorwisekile leswaku siku ra Xikwembu ra ku avanyisa eku heteleleni ri tshinele. Kambe xana vanhu vo tala enkarhini lowu hundzeke a va swi vonisanga sweswo, kambe endzhakunyana va swi tshubula leswaku a va hoxile ke? Xana yi kona ndlela leyi tiyisekeke yo kumisisa hi ku pakanisa leswaku ku avanyisa ka Xikwembu ku ta tisiwa rini?

Hi ‘Nkarhi Lowu Vekiweke’ Wa Xikwembu

Yesu u kombe leswaku ku avanyisa a ku ta endleka hi nkarhi wo karhi. Kambe loko a tsundzuxa valandzeri vakwe, u te: “Tlharihani mi hiteka, hikuva a mi tivi leswaku nkarhi wu ta va rini?”—Marka 13:33.

Habakuku, la rhumiweke hi Xikwembu malembe xidzana ya tsevu emahlweni ka kwalaho leswaku a tsala hi ta ku tisiwa ka ku avanyisa ka le henhla, u tlhele a vula leswaku a ku ta ta hi ‘nkarhi wa kona.’ Naswona tanihi xitsundzuxo ehenhleni ka ku hela mbilu, kumbexana hambi ku ri ku kanetana, hi nkongomiso wa Xikwembu u tshembisile a ku: “Yi nga ka yi nga šisi. Hambi yi nga hlwela, u yi langutela, hikuv̌a yi ta endlakala ŝinene, yi nga ka yi nga hlweri.”—Habakuk 2:2, 3.

Kambe loko ku avanyisa ka Xikwembu ku ri ka ‘nkarhi wa kona’ ni loko ‘ku ta ka ku nga hlweri,’ hikwalaho ka yini Habakuku a ku “hambi yi nga hlwela” ke? Kahle-kahle i ku komba leswaku van’wana va vanhu va Xikwembu a va ta rindzela leswaku ku ta hi xihatla ku tlula nkarhi lowu faneleke. Ha yini ke? Hikuva nkarhi lowu faneleke wa ku ta ka kona a wu ta tshama wu nga tiveki eka vona.

Hambi a ri Yesu loko a ha ri emisaveni a nga wu tivanga nkarhi lowu faneleke, hikuva u te: “Loko ri ri siku ra kona ni nkarhi wa kona, a ku na loyi a swi tivaka, hambi ti ri tintsumi ta le tilweni, hambi a ri N’wana; swi tiviwa hi Tatana ntsena.” (Marka 13:32) Lexi a xi tiveke hambi swi ri tano, a ku ri nguva leyi ku avanyisa a ku ta endleka ha yona. Xisweswo, eka xikombelo xa vadyondzisiwa vakwe, u nyikile xikombiso lexi a xi ta va pfuna ku xiya nguva leyi loko yi sungurile. Vumbhoni bya yona byo sungula, Yesu u te, a swi ta ‘fana ni ku lumiwa ko sungula ka ku veleka.’ Sweswi, kavula, wansati la tikeke loyi a nga kusuhi ni ku veleka a nga wu tivi nkarhi lowu kongomeke lowu n’wana wakwe a nga ta velekiwa ha wona. Hambi swi ri tano, wa swi tiva leswaku ku velekiwa ka yena ku kusuhi.—Matewu 24:3-8, Today’s English Version.

“Rixaka Leri Ri Nga Ka Ri Nga Hundzi”

Handle ka ku tiva leswaku hi rini laha nguva ya ku avanyisa ka le henhla yi nga ta fika kona, Yesu u swi kotile ku veka ndzilakana wa malehele ya yona. Hi ku tirhisa xifaniso xa murhi wa nkuwa, u te: “Loko marhavi ya wona ma sungula ku olova, loko matluka ya wona ma hluka, mi tiva leswaku ximumu xi le kusuhi. Hi mukhuva wolowo, loko mi vona swilo sweswo hinkwaswo, tivani leswaku nkarhi wu le kusuhi, wu le nyangweni. Ndzi tiyisile ndzi ri ka n’wina: Rixaka leri ri nga ka ri nga hundzi, ku nga si humelela swilo leswi hinkwaswo.”—Matewu 24:32-34.

Xisweswo ku avanyisa a ku ta tisiwa enkarhini wa ku hanya ka vanhu lava vonaka vumbhoni byo sungula bya nguva leyi vhumbiweke hi Yesu. Ku sungula ka nguva leyi a ku ta fungha ku sungula ka makumu ya misava ya Sathana, leyi Mfumo wa Xikwembu Iowa ha ku tlhomiwaka etilweni a wu ta tisa ku avanyisa ka le henhla eka yona. Ku hlayelela ka Bibele ni ku hetiseka ka vuprofeta bya Bibele swi nyikela vumbhoni lebyi ringaneke bya leswaku nguva leyi yi sungule hi 1914.a

Kutani emahlweni ka ku va rixaka ra 1914 ri hela hi ku fa, ku avanyisa ka Xikwembu ku fanele ku tisiwa. Rixaka leri ra ha ri kona hi tinhlayo letikulu. Hi xikombiso, hi 1980 a ka ha ri ni vanhu va 1 597 700 lava hanyaka eFederal Republic ya Jarimani lava velekiweke hi 1900 kumbe emahlweni ka rona. Nhlayo leyi a yi ta va leyikulu ku tlula kwalaho loko a ku ri leswaku timiliyoni ta vaaki va rona a ti hlangavetananga na rifu ra xiwelo enkarhini wa tinyimpi timbirhi ta misava.

Loko a tshembisa leswaku “rixaka leri ri nga ka ri nga hundzi,” Yesu u tirhise marito mambirhi yo landzula ya Xigriki ou na me. The Companion Bible yi hlamusela matirhisele lama hi ndlela leyi: “Marito lawa mambirhi ya nandzulo loko ma hlanganile ya lahlekeriwa hi tinhlamuselo leti xiyekaka ta wona, kutani ya vumba mpfumelo wa matimba lowu kandziyisaka swinene.” Hi sweswi ntsena, enkarhini lowu swi vonekaka onge rixaka leri ri nga hundza swilo sweswo hinkwaswo swi nga si hetiseka, laha marito ya Yesu lama nge “ri nga ka” ya nga ya nkoka wa xiviri.

Ndzingo Wa Ripfumelo

Marito ya Habakuku ya xitsundzuxo ya komba leswaku a ku ta va ni ku hlwelanyana ka ku avanyisa ka Yehova, loku tirhaka tanihi ndzingo wa ripfumelo. Entiyisweni ndzingo lowu a wu nga ta humelela ku ya fika ekusuhi ni ku hela ka rixaka leri Yesu a vulavuleke ha rona. Hi ku ya hi xikombiso eku sunguleni ka nhloko-mhaka leyi, xiya leswi: Xana hi rini laha a wu ta sungula kona ku kanakana swinene leswaku n’eni wa wena wa ta ke? Kunene a ku nga ta va hi awara ya kaye ni mixo, kumbe ninhlikanhi, hambi ku ri nindzhenga lowukulu. Kambe kahle-kahle ripfumelo ra wena a ri ta ringiwa loko nkarhi wa madyambu wu sungula. Hambi swi ri tano, tsundzuka leswaku hambi ku ri hi 11:30 p.m. n’eni wa wena a a ta va a ha ri ni nkarhi lowu ringaneke wo ta a ta hetisisa xitshembiso xa yena!

Ku hava xivangelo xa ku vilela hi ku Rito ra Xikwembu ri nga ka ri nga hetiseki. A ri si tshama ri hluleka. Marito ya Yoxuwa lawa a ma byeleke Vaisrayele malembe lama tlulaka 3 000 lama hundzeke i ya ntiyiso namuntlha ku fana ni leswi a ya ri xiswona hi nkarhi wolowo: “Mi tiv̌a leŝaku a ku wanga ni rito riṅwe ra marito hikwawo la’manene lawa Yehova, Šikwembu ša ṅwina, a ma v̌uleke henhla ka ṅwina; kambe mi endleriwe hikwawo, a ku wanga na rito riṅwe.”—Yoxuwa 23:14.

“Malunghana ni ku hetiseka ka vuprofeta swi vonaka wu ri ntumbuluko eka hina ni le ka vanhu hinkwavo, ku hela mbilu ni ku rindzela leswaku swilo swi endleka hi xihatla swinene ku tlula leswi hi ntolovelo swi endlekisaka xiswona.” Ku vule Xihondzo xo Rindza xa Xinghezi enkandziyisweni wa xona wa May 1, 1910, xi engeta xi ku: “Loku i ku hlwela hi ku ya hi ku rindzela ka hina, kambe hi nga tiyiseka leswaku ku hava ku hlwela emhakeni leyi hi ku ya hi xikongomelo xa Xikwembu . . . A hi kanakani leswaku vuyelo byi ta fikeleriwa hi nkarhi lowu faneleke—nkarhi wa Xikwembu.”

Loko va languta endzhaku, Vakriste lava tshembekaka lava hanyaka namuntlha va nga vona swivangelo leswinene leswaku hikwalaho ka yini ku avanyisa ka Xikwembu ku nga si tisiwa. Entiyisweni, va tsaka leswi ku nga siki taka. Nhloko-mhaka ya hina leyi landzelaka ya hlamusela leswaku hikwalaho ka yini.

[Nhlamselo ya le hansi]