Xiviko Xa Vahuweleri Va Mfumo

Guinea Ri Hoyozela Vatsombani Va “Ku Rhula Ka Xikwembu”

MASIKU yo sungula ya mune ya 1987 ya vone ntsombano wo sungula wa muganga wa Timbhoni ta Yehova lowu khomeriweke eRiphabliki ra Guinea, eVupela-dyambu bya Afrika. Hambi leswi Guinea ngopfu-ngopfu ri nga tiko ra Vamuslim laha ntirho wa Timbhoni ta Yehova wu nga siki amukeriwaka ximfumo, Timbhoni kwalaho ti kume ku twala tanihi vanhu lavanene, va musa, vo rhula. A ku ri hikwalaho ka ku duma loku laha hulumendhe yi pfuleke tinyangwa swinene leswaku a amukela vatsombani va “Ku Rhula Ka Xikwembu.”

Exikarhi ka vapfhumba a ku ri na varhumiwa va kaye lava a va huma eFreetown, Sierra Leone, hi xibebe na hi swithuthuthu swimbirhi. Endzilakaneni, a va fanele ku tsemakanya nambu hi swikwekwetsu swinharhu leswi kovotliweke swa mapulanga lama hingakanyiweke eka swona. Endzhaku ka loko va tsemakanye hi ku hlayiseka hi mimovha, varhumiwa va vutisile va ku: “Xana hi hakela mali muni?” “N’wina vanhu ndzin’wina mi Timbhoni ta Yehova,” a ku ri nhlamulo. “A mi hakerisiwi.”

Ku vuriwa yini hi mikhuva ni ku nghena etikweni? “Mi nga vileli hi swona,” va byeriwa. “Xin’wana ni xin’wana xi lunghisiwile. Ambalani tibeje ta n’wina ntsena.” Madzana yan’wana ya vapfhumba a ya ri na mintokoto leyi fanaka. Hulumendhe ya Guinea a yi pfumelelanga ku tsemakanya nambu lowu hambanisaka Guinea na Sierra Leone na Liberia mahala ntsena; va tshike mikhuva ni ku nghena etikweni ximfumo eka un’wana ni un’wana la nga ni beje ya “Ku Rhula Ka Xikwembu!” Mulanguteri un’wana wa xifundza, loyi a a huma eLiberia, u te: “Beje a yi antswa swinene ku tlula pasi ro endza.”

Hulumendhe ya Guinea a yi pfuna hi tindlela tin’wana. Yi lunghiselele movha wo fambisa Timbhoni ku suka entsindza, eConakry, ku ya emutini wa ntsombano wa Guéckédou, ku tlula tikhilomitara ta 640 hi vukule. Va pfumeleriwe ku xava mafurha ya mimovha leyi a yi huma eFreetown. Va lerise hodela leyi a yi ri kusuhi ni ndhawu ya ntsombano ku hlayisela Timbhoni tikamara ta vona hinkwato. Nakambe va pfumeleriwe ku tirhisela holo ya muti ku khomela ntsombano, va va nyika yona mahala.

Mufumi wa muganga, la nga mutirhela-mfumo la tlakukeke eka xiphemu xexo xa tiko, u amukele vapfhumba va 11 laha a tshamaka kona. Nakambe a a ri exikarhi ka 1 132 wa lava yingiseleke nkulumo ya le rivaleni hi Sonto.

Yehova Xikwembu a nga ka a nga rivali musa wo tano lowu kombiweke malandza yakwe.—Matewu 10:42; 25:40.