Nkambisiso Wa Mahungu

I Vavungunyi Va Kriste Ke?

“Vavungunyi Va Evangeli eGondzweni” a ku ri nhloko-mhaka leyi humeleleke eka Church Times, nyuziphepha ya Kereke ya Nghilandi. A yi tivisa ku endza ka lembe na lembe ka Nkombiso Wa Le Patwini Wa Vuthu Ra Kereke etindhawini leti hlawuriweke kusuhi ni lwandle eNghilandi na Wales. Vuthu ra Kereke leri simekiweke ku tlula dzana ra malembe lama hundzeke tanihi xisirhelelo xa Kereke ya Nghilandi, a ri fanele ku haxa evangeli “exikarhi ka lava hlongoriweke ni swigevenga swa le switarateni swa Westminster.”

Namuntlha, varhangeri va Vuthu ra Kereke va ha khathalela leswaku “vuevangeli byi fanele ku nyikeriwa ndhawu ya byona leyi faneleke.” Swikongomelo swa Nkombiso wa vona wa le Patwini swa ku nyikela evangeli “hi ndlela yo hlekisa eka vanhu lava va nga ni ntokoto lowu nga nyawuriki wa Xikwembu, ni lava a va nga ta ehleketa hi ku ta eka xiendlakalo lexi khomeriweke ekerekeni kumbe holo ya kereke.” “Vavungunyi va Evangeli” lava ambaleke tirhoko enkombisweni wa le patwini va tshemba leswaku “ku endla ka vona mafenya ka ku tinyiketela ku ta endla leswaku vahundzi va yima ivi va yingiselanyana,” ku xiya Church Times.

Hambi swi ri tano, hambi leswi mpahla ya vona yo hlekisa, yo vungunya ni tibaloni ta mahala swi kokeke mahlo ya vana lavo tala, lavakulu va siyiwe va hlamarile leswaku ku tshinelela loku ku fambisana njhani ni vuevhangeli lebyi sunguriweke hi Kriste.

I ntiyiso, muapostola Pawulo u tsarile a ku: ‘Hi hundzukile madodomedzi emisaveni hinkwayo . . . Hi swihunguki hikwalaho ka Kriste.’ (1 Vakorinto 4:9, 10) Kambe xana a a ri na yini emianakanyweni? Ku vungunya kumbe ku ‘kanganyisa’ leswaku a koka mahlo ya vahundzi? E-e. Pawulo a a kombisa ndlela leyi misava yi xiyaka Vakriste va ri swihunguki ha yona, “va ri exiyin’weni xo hlekuriwa ni ku khomisiwa tingana,” tanihi laha The New International Dictionary of New Testament Theology yi swi vekaka ha kona, hikwalaho ka ripfumelo ni tidyondzo ta vona.

Ku hambana ni “Vavungunyi Va Evangeli” va Vuthu ra Kereke, Yesu u dyondzise mintshungu ‘tanihi loyi a nga ni vuhosi.’ Vutirheli byakwe a byi tshembekile naswona byi ri hava vukanganyisi. Tanihi laha a hlamuseleke ha kona, “Ndzi vula swilo leswi hi laha Tatana a ndzi dyondziseke ha kona.” Xana vuyelo ku ve byihi ke? “Lavo tala va pfumela eka yena.”—Matewu 7:29; Yohane 8:28, 30.

“Ndzhwalo Wa Ripfalo”

Eugene Stockwell, mukongomisi wa Commission on World Mission and Evangelism of the World Council of Churches, ku nga ri khale u amukele xiyenge xa vukanganyisi lexi vafundhisi ni tikereke ta Vujagani va xi endleke hi nkarhi wa tinyimpi ta misava hinkwato. U byele nhlengeletano ya matiko hinkwawo eWarsaw, le Poland a ku: “I ndzhwalo lowu tikaka wa ripfalo eka Vakriste leswi tinyimpi timbirhi letikulu ta misava ta lembe xidzana leri ti tlhekekeke exikarhi ka matiko lama nga ni mikhuva ya khale ya Vukriste exikarhi ka wona ni lama minhlaselo ya wona ya mavuthu ya nyimpi hakanyingi a yi katekisiwa hi varhangeri va tikereke ta Vukriste.”

Stockwell u tlhandlekerile a ku: “Xikwembu xi tivisiwe xi ri lexi nga eka tlhelo rin’wana ra mpfilumpfilu kumbe eka lerin’wana hi ku chivirika . . . Na hina Vakriste hinkwerhu hi ku olova hi veka ripfumelo ra hina entirhweni wa vukarhi bya hina.” U vule leswaku Nyimpi ya Vumbirhi ya Misava a ku ri “vumbhoni lebyikulu bya ku hluleka ka hina tanihi ‘matiko ya Vukriste’ ku hanya hi ripfumelo ra hina, ripfumelo leri hakanyingi ri phofuriweke hi marito ni leri entiyisweni ri landzuriwaka hi xiendlo.”

Kambe xana “ndzhwalo lowu wo tika wa ripfalo” wu pfune lava vuriwaka Vakriste ni vafundhisi va vona ku kuma dyondzo? Hi ku ya hi Ecumenical Press Service, Mukongomisi Stockwell u seketerile hi ku: “Hi vulavula hi ku rhandza valala va hina, naswona ha va dlaya. Hi vulavula hi ku nyiketa ni rhama lerin’wana, kutani hi hloma ku tlurisa mpimo. Hi vulavula hi ku rhula loku tlulaka ku twisisa, ivi hi katseka enyimpini leyi tlulaka ku twisisa kwihi na kwihi. Hi vulavula hi ripfumelo eka Xikwembu kutani hi veka ripfumelo ra hina ra ntiyiso eka switlhavani swa ndzoviso.”

Vafundhisi va Vujagana lava seketelaka nyimpi ni valandzeri va vona va fana swinene ni lava a va vulavula swa hava emasikwini ya muapostola Pawulo. Ha vona, u te: “Hi milomo ya vona, va vula leswaku va tiva Xikwembu, kambe hi mintirho ya vona va xi landzula.”—Tito 1:10, 16.

Xitempe Lexi “Solekaka”

Hi November 19, 1987, South African Postal Administration yi kunguhate ku humesa switempe swa mune swa ku tlangela hi swona ehenhleni ka Bibele. Xin’wana xa switempe leswi a xi ri ni marito lama nge “Rito Ra Xikwembu” hi Xigriki na “Rito ra Yehova” hi Xiheveru. A ku ri ni ku gandlisiwa loku heleleke ka tikopi ta 1 750 000 ta xitempe lexi.

Hambi swi ri tano, hi ku hatlisa emahlweni ka siku ra ku humesiwa ka swona, tihofisi ta poso ti amukele thelegiramu yi va byela ku tlherisa nhundzu ya vona ya xitempe lexi. Xivangelo a ku ri xihi ke? “Hikuva xi kumiwe xi soleka eka vaaki va Vayuda va orthodox,” ku vike The Star, phepha-hungu ra Johannesburg. Ri tlhandlekerile ri ku: “Mufundhisi David Hazdan wa Johannesburg u vule leswaku vito ra Xikwembu leri tsariweke hi ku helela tanihi leswi a ri tsarisiwe xiswona exitempeni hakanyingi a ri hlayiseriwa swiendlakalo leswi hlawulekeke swa vukhongeri ntsena.”

I mhaka ya mukhuva lowu fanaka wa Vayuda leswi vahundzuluxeri vo tala va Bibele va manguva lawa va papalateke ku tirhisa vito ra Yehova naswona va ri sive hi swithopo ntsena, tanihi “Hosi” kumbe “Xikwembu.” A swi hlamarisi leswi Yesu a byeleke varhangeri va vukhongeri va siku ra yena a ku: “Mi onha rito ra Xikwembu hi mikhuva ya n’wina.”—Matewu 15:6.