Mpfuno Wo Antswa Wo Tiva Vumundzuku
Hi Un’wana Loyi A Kumeke Gondzo Ro Ya eVuton’wini
VUKHONGERI byi teke xiphemu xa nkoka evuton’wini bya ndyangu wa mina. Tatana a a ri Muyuda, naswona hambi loko a hundzukele eka Vukhatoliki leswaku a teka manana, a a ha ri ni xichavo lexikulu xa Bibele. Manana a a huma endyangwini lowu dzimeke timitsu swinene emikhuveni ya Khatoliki—vambirihi va vamakwavo va yena va xisati a va ri tinani, n’wana hahani wakwe a a ri mufundhisi-nkulu, naswona vatukulu vambirhi a va ri swirho swa vukhongeri.
Hi nkarhi wa nyimpi ya vumbirhi ya misava, ku karhateka, ku chava ni nxungeto wa nkarhi na nkarhi wa ku yisiwa ekampeni ya nxaniso hikwalaho ka ku va Muyuda swi endle leswaku tatana a hatlisa a fa. Hi ku pfumela swinene eka dyondzo ya ku nga fi ka moya, manana u hlanganyerile eka lava vulavulaka ni mimoya, a ringeta ku tihlanganisa na tatana.
Loko ndzi fikelele malembe ya vun’hwana, vukhongeri bya mikhuva byi ye emahlweni byi va xiphemu xa vutomi bya mina. Ndzi tshame ndzi ri “Mukhatoliki lonene.” Hambi swi ri tano, Vukhatoliki a byi nga koti ku hlamusela leswi vumundzuku a byi ndzi khomele swona. Xana a ndzi ta hundzukela eka mani leswaku ndzi kuma mpfuno eku kumeni nhlamulo?
Tanihi laha manana a tshameke a endla ha kona, na mina ndzi tihlanganise ni lava tirhisaka mimoya. Tanihi leswi va sunguleke xiendlo xin’wana ni xin’wana hi mfungho wa xihambano ni swikhongelo, a ndzi khorwile leswaku mahlori lama ndzi ma voneke hi mahlo a ma huma eka Xikwembu. A ku ri enkarhini lowu laha, hi ku lava ku endla swin’wana leswaku ndzi ntshunxa ku xaniseka ka van’wana, ndzi joyineke nhlangano wa Khatoliki lowu a wu kunguhata maendzo yo ya evukwetsimelweni bya Mariya eLourdes, laha vavabyi a va langutela ku horisiwa ka singita.
A ndzi nga si tshama ndzi twa hi Timbhoni ta Yehova ku kondza ku fika siku leri nuna wa mina a kumeke timagazini timbirhi leti ndzi ti kumeke ti tsakisa swinene. Lexi ndzi khumbeke ngopfu a ku ri leswi Bibele a yi tshahiwile eku seketeleni ka tinhlamuselo leti ti nga eka timagazini. Kan’we-kan’we ndzi xiye leswaku timagazini leti ti ta pfuna swinene eku kumeni ka vutivi bya Rito ra Xikwembu. Ndzi tsale ndzi kombela xikhokhelo xa timagazini hatimbirhi. Timbhoni ta Yehova ti ndzi endzerile, kutani ndzi sungule ku dyondza Bibele.
A ndzi hiseka ngopfu ehenhleni ka mintiyiso ya Bibele leyi a ndzi yi dyondza ivi ndzi sungula ku vulavula ha yona ni lava ndzi tolovelaneke na vona. Ndzi hlamarisiwile hi nhlamulo ya munghana, loyi a a kunguhata maendzo ya vukhongeri yo ya evukwetsimelweni, loko ndzi n’wi byele leswaku a ndzi dyondza Bibele na Timbhoni. U sungule ku hlundzuka swinene ivi a vula swilo swo biha mayelana na tona lerova ndzi n’wi siya. Kutani ndzi boheke ku kongomana ni ku kaneta ka nuna wa mina. (Matewu 10:36) Eku sunguleni a swi nonon’hwa, kambe loko ndzi titoloveta ku endla swilo leswi a ndzi swi dyondza, vutomi bya ndyangu wa mina byi hundzuke byi va lebyi antswaka. Ndzi khuvuriwe hi 1977.
Ndzi swi xiyile leswaku a ndzi nga ta kuma gondzo leri yaka evuton’wini loko Timbhoni ta Yehova a ti nga kombisanga ku khathalela hi ku ringeta ku ndzi pfuna leswaku ndzi tiva mintiyiso leyi hlamarisaka ya Bibele. Ndzi swi tivile leswaku na mina a ndzi ri ehansi ka ndzhwalo wo endla hinkwaswo leswi ndzi nga swi kotaka ku pfuna van’wana leswaku va tiva hi ta Yehova ni xikongomelo xa yena lexi hlamarisaka xa vumundzuku. Xana leswi a ndzi ta swi endlisa ku yini ke? Ndlela leyi antswaka a ku ri ku teka vutirheli bya nkarhi hinkwawo. Tanihi leswi a ndzi tshama ekaya leri avaneke hi tlhelo ra vukhongeri, leswi a swi nga olovi eka mina. Kambe ndzi tshembe nseketelo ni vukongomisi bya Yehova ivi ndzi chavela eka yena. Sweswi, ndzi hanya emalembeni lama tsakisaka swinene ma vutomi bya mina tanihi phayona ra nkarhi hinkwawo. Ndzi kholwa swinene ku tlula rini na rini leswaku “Yehova i lo’nene” ni leswaku un’wana ni un’wana “l’a tšhav̌elaka ka yena” u katekile.—Psalma 34:8.