“Swilo Leswi Vumbaka Ku Langutela Ka Hina”

A KU ri mixo lowu kufumelaka wa Sonto, September 10, loko vanhu va 4 155 va hlengeletanela mintirho ya nthwasiso wa ntlawa wa vu-87 wa Xikolo xa Bibele xa Gilead xa Watchtower eHolweni leyo saseka ya Nhlengeletano ya Timbhoni ta Yehova eDoroba-nkulu ra Jersey, New Jersey. Lava a va ri kona a ku ri swichudeni swa 24 ni vaendzi va swona lava rhambiweke kun’we ni swirho swa ndyangu wa Bethele leswi humaka eBrooklyn ni le mapurasini ya Sosayiti.

Vayingiseri va byeriwe ku tshamiseka hi ku hatlisa hi 10:00 a.m. hi Albert Schroeder, loyi a tirheke tanihi mutshami wa xitulu wa siku. Endzhaku ka risimu ro sungula, xikhongelo xi nyikeriwile hi John Barr. Vamakwerhu lava havambirhi i swirho swa Huvo leyi Fumaka. Makwerhu Schroeder u nyikele nkulumo yo koma hi ntlawa lowu, kutani a vula leswaku mathwasana a ma “tilulamisele ku hlanganyela entirhweni wa misava hinkwayo wa Timbhoni ta Yehova, sweswi ematikweni ya 210.” Kutani u ye emahlweni a tivisa swivulavuri swa nkombo.

Robert Wallen, loyi a tirhaka eka Tihofisi ta Mintirho eyindlu-nkulu eBrooklyn, u seketele nhloko-mhaka yakwe leyi nge “Rhandzanani Swinene,” eka 1 Petro 4:8. U vule leswaku varhumiwa va fanele ku pfunana, naswona leswi swichudeni hinkwaswo swa ntlawa lowu a swi tekanile, u kongomise marito ya yena ngopfu-ngopfu eka mimpatswa leyi tekaneke. U tsundzuxile a ku: “Wansati u fanele ku rhandza nuna wa yena hambi loko a nga ha dyondza ririmi rimbe hi ku hatlisa ku tlula leswi yena a ri dyondzisaka swona. U fanele ku twisisa ni ku va ni ntwela-vusiwana. Nakambe, u fanele ku ringeta ku n’wi twisisa loko a va na siku ra yena ra vhiki ni vhiki ro sweka!” (Hakanyingi, murhumiwa un’wana ni un’wana u averiwa siku nkarhi na nkarhi ku lunghiselela swakudya swa siku rero swa hinkwavo lava tshamaka ekaya ra varhumiwa.) Kutani xivulavuri xi hlamusele gome ni mintokoto leyi hlekisaka leyi vavanuna van’wana va vaka na yona loko va dyondza ku sweka, tanihi ntokoto wa wanuna loyi a tirhiseke baking soda ematshan’wini ya baking powder. Makwerhu Wallen nakambe u vule leswaku wanuna u fanele “a twisisa swilaveko swa nsati wa yena,” tanihi leswi nkarhi wo tala wa wanuna wu nga tirhisiwaka ku khathalela vutihlamuleri bya bandlha. Eka vavanuna ni vavasati, u te: “Minkarhi hinkwayo vanani lava akaka; mi nga vulavuli marito lama hetaka matimba, hambi ku ri eka n’wina hinkwenu. Papalatani ku tihambanisa. Naswona loko mi endla swihoxo, swi amukeleni.”

Xivulavuri lexi landzelaka, Daniel Sydlik, xirho xa Huvo leyi Fumaka, xi hlawule nhloko-mhaka leyi nge: “Tshamani Mi Ri Karhi Mi Hlanganyeta Ndzilo Wa Moya Wa Xikwembu,” leyi sekeriweke eka 1 Vatesalonika 5:19. U te: “Ndzilo wu nga kufumeta ni ku vavisa. Minkarhi yin’wana varhumiwa va khutaza naswona minkarhi yin’wana va xungeta. Wanuna wa khale wa Muntima u tshama a ku: ‘Pfurhetela hi vukheta,’ tanihi le ka xisana lexi u ringetaka ku xi pfurhisa! Loko mi ri karhi mi vulavula hi swilo leswi mi nga swi kumaka exiavelweni xa n’wina—phayiphi yo fambisa thyaka leyi pfulekeke, tinhongana, mimovha leyi baka huwa, tiko lerintshwa ni vukhongeri lebyi nga tolovelekangiki—kombisani xichavo. U phasa tinhongani to tala hi vulombe ku tlula hi vhiniga. Dyondzani ku ‘pfurhetela hi vukheta’ ivi mi hlanganyeta ndzilo wa moya wa Yehova.”

Kutani nhloko-mhaka leyi nge “Namarhela Xiavelo Xa Wena Hi Ku Gingiriteka Ni Ku Khathalela” yi vumbiwile hi Kenneth Flodin, mulanguteri wa Kaya ra Bethele eMapurasini ya Watchtower. Tanihi leswi Xikolo xa Gilead sweswi xi nga eMapurasini ya Watchtower, mathwasana hinkwawo a ma tolovelane swinene na Makwerhu Flodin. Swivandla swimbirhi swa ku tivonela swi vumbiwile enkulumeni yakwe: (1) swilo leswi vonakaka ni (2) ku vulavula loku hetaka matimba ni mianakanyo leyi hetaka matimba. “Papalata vutianakanyi naswona u nga titweli vusiwana” a ku ri xitsundzuxo. U te: “Langutela ku chavelela ni swilo leswinene emisaveni leyintshwa; u nga swi lavi sweswi.” Ku pfuna swichudeni ku papalata ku hela matimba, xivulavuri xi tshahe Tinhlayo 13:28, 32. U te: “Minkarhi yin’wana vanhu va vona nchumu lowu fanaka, naswona van’wana va ta va ni langutelo leri hetaka matimba, van’wana va va ni langutelo lerinene. Ku fana na Kaleb wa khale, tshemba Yehova. Byela van’wana mianakanyo ya wena leyinene. Naswona loko ku vulavula loku hetaka matimba ku kongomana na wena, hundzula nhloko-mhaka leswaku u papalata mianakanyo leyi hetaka matimba.”

Lloyd Barry, xirho xa Huvo leyi Fumaka ni khale ka murhumiwa hi byakwe, u nyike xitsundzuxo lexi twisisekaka. U te: “Rirhandzu, ntsako ni ku rhula i timfanelo ta nkoka ta varhumiwa lavantshwa. U ta ku vona ku tsana ka van’wana ekaya ra n’wina ra varhumiwa, kambe kambisisa ku tsana ka wena n’wini.” U tsundzuke masiku yakwe yo sungula eJapani loko varhumiwa va tiphine hi nhlampfi siku rin’wana ni rin’wana, kambe endzhakunyana varhumiwa lavantshwa lava a va nga yi rhandzi nhlampfi va fikile. Kutani lunghiselelo ra swakudya ri hundzuriwile hikwalaho ka rirhandzu ra vanhu lavantshwa. U tlhele a tsundzuxa a ku: “Hlayisa ntlhaveko wa wena wu ri lowunene; u nga pfumeleli dyambu ri pelela swiphiqo swihi na swihi leswi u nga na swona. Hlayisa ku rhula ekaya, kutani u ta tsaka evuton’wini bya wena bya vurhumiwa.”—Vaefesa 4:26.

Jack Redford, un’wana wa valeteri va Gilead, endzhakunyana u vulavule hi nhloko-mhaka leyi nge: “Yehova U Ta Herisa Ku Ringetiwa Ka N’wina,” a seketela marito ya yena eka 1 Petro 5:10. U te: “Yehova a nga ku dyondzisa hi ku pfumelela swiyimo leswi nonon’hwaka ku hlangavetana na swona swi tlhekeka. Tanihi leswi a dyondziseke vaapostola ku hlangavetana ni ku himpfilitana ka vumunhu, na wena u ta ku dyondzisa. U nga heli matimba loko ku ri ni ku hambana ka mianakanyo. Tiyimiseli ku lulamisa vumunhu bya wena. Ku tikukumuxa ku endla leswi swi tika, kambe ku titsongahata ku swi endla swi koteka. Dyondza ku va la olovaka. Yehova u ta tlhela a ku dyondzisa ku tirhisana ni van’wana. ‘U nga ehleketi ngopfu hi marito hinkwawo lama vanhu va nga ma vulavulaka’ ha wena.” (Eklesiasta 7:21, 22) Ku xanisiwa na kona ku tirha tanihi dyondzo. Varhumiwa lava tiyiseleke ku xanisiwa va tsakile naswona a va tisoli, va tsaka hikwalaho ka leswi va dyondzisiweke hi ku xanisiwa ntsena.

Ulysses Glass, muleteri un’wana, endzhakunyana u nyike marito yakwe yo hetelela eka mathwasana. U yise nyingiso eka Vaefesa 4:1-3, a bumabumela ntlawa hikwalaho ko kombisa timfanelo leti hlanganisaka leti hlamuseriweke eka yona, ni ku va khutaza ku ya emahlweni va endla tano, a ku: “Ku rhula i xitirho lexi hlanganisaka, naswona xa laveka leswaku ku va ni vun’we.” Kutani u ye emahlweni na Vaefesa 4:4-6 ivi a pfuxeta ku chavisa ka moya wa Xikwembu, a tsundzuxa hinkwavo leswaku “Yehova i Xihlovo xa matimba lamakulu. Hi fanele ku n’wi chava; i nchumu lowu chavisaka ku wela emavokweni ya yena.”—Vaheveru 10:31.

Ku Langutela Lokukulu

Kutani hinkwavo va yingisele hi ku tsakela lokukulu eka Theodore Jaracz, xirho xa Huvo leyi Fumaka ya Timbhoni ta Yehova, loyi a vulavuleke hi nhloko-mhaka leyi kombisiweke leyi nge: “Swilo Leswi Vumbaka Ku Langutela Ka Hina.” Loko a anakanyisisa hi 1 Vakorinto 2:9, u te: “Ndzimana leyi a yi vulavuli hi swilo leswi vonakaka, hikuva ndzimana leyi landzelaka, 1 Vakorinto 2:10, yi vulavula hi ‘swilo leswi enteke swa Xikwembu.’ Leswi swi katse ‘vutlhari bya Xikwembu’ malunghana ni ‘xihundla xo hlawuleka, vutlhari bya xona lebyi fihliweke’ lebyi humaka exivandleni lexi tlulaka misava leyi, ina, lebyi humaka eka Xikwembu hi xoxe.” (1 Vakorinto 2:7) Vayingiseri manuku va kombeteriwe eka Esaya 64:4, leyi a yi ri xitsundzuxo xo ‘tshama u ri eku languteleni’ ka Xikwembu ni ka swilo leswi xi swi lunghiseleleke.

I ku langutela muni konghasi loku vanhu va Xikwembu va nga na kona hakunene! Makwerhu Jaracz u kombetele leswi landzelaka: “Hi 1919 ku ve ni ku wa ka Babilona Lonkulu; hi 1922 ku ve ni xikhongotelo lexi nyanyulaka xo ‘twarisa Hosi na Mfumo,’ ku chumayela Mfumo lowu simekiweke emisaveni hinkwayo; hi 1935 vanhu va Xikwembu va dyondze nkoka wa ‘ntshungu lowukulu’ eka Nhlavutelo 7:9; hi 1943 va vone Xikolo xa Gilead xi sungula ku rhumela varhumiwa ku ya fika emakun’wini ya misava; namuntlha, hi 1989, n’wina mathwasana mi ni lunghelo ro byela vanhu swilo leswinene lava tiyimiseleke ku yingisela eswiavelweni swa n’wina.”

Endzhaku ka loko tidiploma ti nyikeriwile, xin’wana xa swichudeni xi hlaye papila leri khumbaka mbilu ro tlangela leri humaka eka ntlawa.

Ni ndzhenga, Lon Schilling, muhlanganisa wa Komiti ya Mapurasi ya Watchtower, u fambise Dyondzo ya Xihondzo xo Rindza leyi komisiweke. Kutani swichudeni swi nyikele nongonoko lowu tsakisaka wa vuyimbeleri ivi swi kombisa yin’wana ya mintokoto ya swona ya ntirho wa nsimu. Endzhaku ka leswi, vahuweleri va kwalaho va nyikele drama leyi nga enkarhini leyi nge: “Ku Hlangavetana Ni Mintirho Ya Sathana Ya Vukanganyisi.” Eku heteleleni, endzhaku ko yingisela ku vulavurisana ka tsevu wa mathwasana lamantshwa, ntshungu lowu tsakeke wu yimbelele risimu ro hetelela naswona wu tsakele ku hlanganyela exikhongelweni xa presidente wa Xikolo xa Gilead loyi a nga ni malembe ya 96 hi vukhale, Frederick Franz.

[Bokisi leri nga eka tluka 23]

TINHLAYO TA NTLAWA

Nhlayo ya matiko lama swichudeni swi humaka eka wona: 5

Nhlayo ya matiko lama va averiweke eka wona: 10

Nhlayo ya mimpatswa leyi tekaneke: 12

Ntsengo wa swichudeni: 24

Avhareji ya malembe 30, 9

Avhareji ya malembe entiyisweni: 13,4

Avhareji ya malembe evutirhelini bya nkarhi hinkwawo: 9,2

[Xifaniso lexi nga eka tluka 23]

Ntlawa Wa Vu-87 Lowu Thwasaka Wa Xikolo Xa Bibele Xa Gilead Xa Watchtower

Eka nxaxamelo lowu nga laha hansi, tilayini ti hlayeriwe ku sukela emahlweni ku ya endzhaku, naswona mavito ya xaxametiwe ku suka eximatsini ku ya exineneni eka layini yin’wana ni yin’wana.

(1) Heindel, E.; Andrews, D.; Casavant, D.; Montanez, E.; Nale, P.; Koukaras, S. (2) Miell, T.; Heithaus, M.; Melton, T.; Hagberg, N.; Kettinen, M. (3) Kettinen, L.; Andrews, W.; Koukaras, E.; McCollough, S.; Melton, G.; McCollough, J. (4) Heindel, W.; Casavant, G.; Miell, G.; Montanez, J.; Nale, M.; Hagberg, I.; Heithaus, K.