Varhumiwa Lava Engetelekeke Eka Ntshovelo Wa Misava Hinkwayo
SEPTEMBER i n’hweti yo tshovela eka varimi, kambe ntirho lowu engetelekeke wa nkoka swinene wu kokele ntshungu lowukulu eHolweni ya Nhlengeletano ya Timbhoni ta Yehova eDoroba-nkulu ra Jersey, entsungeni wa Nambu wa Hudson loko u huma eDoroba-nkulu ra New York hi September 8, 1991. Ntlawa wa vu-91 wa Xikolo xa Bibele xa Gilead xa Watchtower a wu thwasa. Swirho wa ndyangu wa Bethele swa kwalomu ka 4 263 ni vaendzi lava rhambiweke a va ri kwalaho, ni van’wana va 1 151 lava a va hlanganisiwe hi tilayeni ta riqingho eka tindlu-nkulu ta Brooklyn ni le mapurasini ya Wallkill na Patterson.
Muungameri wa Xikolo xa Gilead, Frederick W. Franz, loyi a nga ni kwalomu ka malembe ya 98 hi vukhale, u pfule nongonoko hi xikhongelo lexi khumbaka ni lexi humaka embilwini. Albert D. Schroeder, xirho xa Huvo leyi Fumaka ni khale ka muamukeri ni muleteri wa xikolo lexi, u tirhe tanihi mutshama-xitulu wa nongonoko wo thwasisa. U tsundzuxe vayingiseri hi ta Psalma 2:1, 2 ni vuprofeta byin’wana lebyi vhumbaka minkarhi leyi ya ku tsekatseka ni mpfilumpfilu exikarhi ka matiko. Nkarhi lowu wa ku tsekatseka wu vula ku pfuleka ka masimu yo tala lamantshwa ya ntirho wo tshovela.
Nkulumo yo sungula ya siku yi nyikeriwe hi George M. Couch, xirho xa Komiti ya Bethele. Nkulumo ya yena a yi ku “Tlangela Mikateko Ya Wena.” U tsundzuxe swichudeni swa Gilead leswaku nkarhi wu fikile wo sungula mukhuva lowu. U vule leswaku swichudeni hi swoxe swi katekile hakunene kambe mikateko leyi yi te ntsena endzhaku ka ntirho wo nonon’hwa. Hi laha ku fanaka, Yakobo, wa malembe ya 97 hi vukhale u lwe ni ntsumi vusiku hinkwabyo—a endlela ku kuma nkateko. (Genesa 32:24-32) Makwerhu Couch u khutaze swichudeni leswaku swi nga vi ni mianakanyo leyi hambaneke kambe swi va nkateko eka van’wana hi ku hlakulela ku rhula ka mianakanyo hi xikhongelo ni ku tiyisela.
John E. Barr wa Huvo leyi Fumaka u landzerile hi nkulumo leyi nge “Mi Rhandzana.” Valandzeri va Yesu a a va tiyimisele ku felana. U vutise swichudeni a ku “Xana mi twa rirhandzu ra muxaka lowu ri ri kona etimbilwini ta n’wina?” U te ‘handle ka rirhandzu leri, a hi nchumu. Swi le rivaleni.’ (1 Vakorinto 13:3) Makwerhu Barr u xaxamete tindlela to karhi to olova to kombisa rirhandzu. U khutaze swichudeni ku khoma varhumiwa-kulobye hi xichavo, minkarhi hinkwayo va lava ndlela ya vutlhari yo vula swilo. U swi tsundzuxile, hi ku tshaha 1 Petro 4:8 a ku ‘rivalani mimphikamakaneta leyitsongo.’ U xiye ni leswaku hambi ku ri masiku ya varhumiwa yo sweka a ku ri minkarhi yo kombisa rirhandzu hi ku languta ntirho lowu tanihi lowu tlulaka ntirho wo tisusa nandzu. U tsundzuxe swichudeni: “A hi nge tshiki ku kolota vamakwerhu va hina va xinuna ni va xisati rirhandzu.”—Varhoma 13:8.
“Mi Tshembeka Ku Fikela Kwihi?” a a ku ri nkulumo leyi nyanyulaka leyi nyikeriweke hi David A. Olson wa Komiti ya Ndzhawulo ya Ntirho. U kombise tindhawu timbirhi to tshembela eka tona: eka Yehova ni nhlengeletano ya yena, leswi ha swona hi nga ni swivangelo leswi nga hlayekiki (Swivuriso 14:6; Yeremia 17:8); ni le ka munhu hi xiyexe. Varhumiwa va ni xivangelo xa ku titshemba loku pimiweke, tanihi xisekelo xa vona tanihi vatirheli ni ndzhwalo lowu Yehova ni nhlengeletano ya yena a wu vekeke eka vona. Muapostola Pawulo u kombise ntshembo wo tano hikwalaho ka swivangelo leswi fanaka. (1 Vakorinto 16:13; Vafilipiya 4:13) Hambi swi ri tano, makwerhu Olson u tsundzuxile ehenhleni ka ku titshemba ku tlurisa mpimo loku misava yi ku hlohlotelaka, hi laha swi kombisiwaka ha kona hi mutsari un’wana la dumeke loyi a vikiwaka a ku: “Hakanyingi ndza titshaha. Swi engetela ku nandziha ka mhaka ya mina.” Hambi swi ri tano, ntshembo lowu ringaniseriwaka ni ku titsongahata wu nga ha hi endla hi tshemba van’wana. Leswi hakunene a a swi ri tano hakunene emhakeni ya Pawulo.—Vafilipiya 1:12-14.
Lyman A. Swingle wa Huvo leyi Fumaka u landzerile a khutaza swichudeni a ku: “Yanani Eka Nsimu Leyi Lavaka Ku Tshoveriwa, N’wina Vathwasi Va Gilead!” U vule leswaku leri a ku ri siku ro tshovela eXikolweni xa Gilead ni le ka vumakwerhu bya misava hinkwayo, tanihi leswi vathwasi va nga ta ya emahlweni ni ku joyina magidi ya vathwasi va le ku sunguleni lava ha riki entirhweni wa vurhumiwa—van’wana va mintlawa yo sungula, ya vumbirhi ni ya vunharhu ya va-1940! Makwerhu Swingle u vule leswaku eku sunguleni a ku nga ri na munhu la tivaka leswaku ntirho wa vurhumiwa wu ta ya emahlweni ku ringana malembe man’wana ya 50, kumbe leswaku Vunazi ni Vufascist ni ku sivela kun’wana ka mfumo ka ntirho wa ku chumayela swi ta hela. U vutisile a ku: “Loko hi chavisiwa hi leswi Yehova a swi endleke enkarhini lowu hundzeke, ku vuriwa yini hi swa nkarhi lowu taka?” U hetelele hi xirhambo lexi nyanyulaka eka swichudeni a ku: “Yanani ensin’wini!”
Valeteri vambirhi lavakulu va Xikolo xa Gilead endzhaku va vulavurisane ni ntlawa wa vu-91 ro hetelela. Jack D. Redford u vulavule hi nkulumo leyi nge “Kuma Vutlhari.” U byele swichudeni leswaku xikolo xa Gilead xi dyondzisa vutivi ni ku twisisa, kambe va fanele ku kuma vutlhari, vuswikoti byo tirhisa vutivi bya vona hi ndlela leyinene. U khutaze swichudeni ku lahla mintsheketo hinkwayo leyi va dyondzeke ha yona eGilead. “Leswi nga ni ntikelo hi leswi mi swi dyondzeke endzhaku ka xikolo.” Swilo swin’wana leswi va ha faneleke ku swi dyondza i: ku tirhisana ni vanhu hi ku rhula, ku kota ku vula leswaku “ndza tisola” eka munghana, murhumiwa-kulobye ni le ka vamakwerhu va xinuna ni va xisati va kwalaho; ku va ni vukheta eku tshembeni ka marito yo sungula ni ku xiya leswaku xiphiqo xin’wana ni xin’wana a swi olovi ku xi tlhantlha, ku lava ku twisisa loku enteke ka swiyimo u nga si nyikela xitsundzuxo xa vutlhari; ni ku xixima vamakwerhu va kwalaho hikwalaho ka vuswikoti bya vona byo humelela eka swiyimo leswi nonon’hwaka.—Swivuriso 15:28; 16:23; Yakobo 1:19.
Ulysses V. Glass, muamukeri wa Xikolo xa Gilead, u tirhise Vafilipiya 3:16 tanihi nhloko-mhaka ya nkulumo ya yena. U bumabumele ntlawa hi nhluvuko lowu va wu endleke ni ku va khutaza ku ya emahlweni hi ku fambisana ni tsalwa rero. U xiye leswaku hambi loko swichudeni swo hambeta swi kuma vutivi lebyi kongomeke, a swi nge pfuki swi tive hinkwaswo. U kombise yinhla leyi hi xikomba-nkarhi xa tinomboro. N’wini wa yona a nga ha tiva ndlela yo yi endla leswaku yi tirha handle ko tiva ndlela leyi kahle-kahle yi tirhaka ha yona. Hi laha ku fanaka, varhumiwa va fanele va nga va tekeli ehansi lava, hambi leswi va nga riki ni vutivi byo ringana ni bya vona, va tivaka leswi swi nga swa nkoka—ndlela yo chava Yehova. (Swivuriso 1:7) U tsundzuxe ntlawa hi nkoka wa ku va ‘ni tihlo leri oloveke.’ (Matewu 6:22) Tihlo ra moya ri nga ha onhaka hi laha tihlo ra nyama ri nga ha endlaka ha kona. Hi xikombiso, van’wana va ni langutelo leri tlakukeke—va langutisisa swinene eka vuxokoxoko byi nga ri byingani leswaku va vona mhaka hinkwayo—loko van’wana, ku hambana na sweswo, va vona ntsena timhaka leti nga erivaleni naswona va nga swi koti ku fikelela timhaka-nkulu leti va lavaka ku ti vula.
Nkulumo yo hetelela ya ni mixo a yi ku “Ku Tiva Ni Ku Tirha Ni Nhlengeletano Ya Yehova,” leyi nyikeriweke hi Theodore Jaracz wa Huvo leyi Fumaka. Makwerhu Jaracz u vule leswaku hambi leswi ku nga ni magidi ya tinhlengeletano ni tisosayiti emisaveni, i yin’we ntsena ya leti leyi nga riki ya misava. Hi nga yi tiva njhani leyi yi yimelaka Yehova? Rito ra Xikwembu ri nyikela mimfungho yo yi tiva. Bibele yi kombisa leswaku swivumbiwa swa xona swa le tilweni swi hlawuleke swinene. (Psalma 103:20, 21; Esaya 40:26) Nhlengeletano ya Yehova nakambe yi vonaka hi nhleleko wa yona kun’we ni ku hambana ka yona ni misava, ku namarhela ka yona lokukulu eka minsinya ya milawu ya Bibele, xiyimo xa yona xa mahanyelo lama baseke ni rirhandzu exikarhi ka swirho swa yona. Makwerhu Jaracz u khutaze swichudeni swa Gilead ku pfuna vo tala hi laha swi nga kotaka ha kona eka swiavelo swa swona leswaku va vona nhlengeletano ya Yehova hi Matsalwa. Malunghana ni sweswo, u endle xitiviso lexi nyanyulaka: Xikolo xa Gilead ku nga ri khale xi ta andza kambirhi hi mpimo, ku ya kwalomu ka 50 wa swichudeni eka ntlawa wa vu-93! Nakambe, mintlawa ya Xikolo xa Xiengetelo xa Gilead eJarimani yi ta sungula hi nkarhi wun’we. Ku phokotela a ku lehile naswona a ku twakalela ehenhla!
Tanihi ku chaputa ka mixo wolowo, swichudeni hinkwaswo swa 24 swa Gilead swi amukele tidiploma. Hi ku hatlisa va ta va endleleni ya vona ku ya ematikweni ya 12 lama hambaneke emisaveni hinkwayo. Ntlawa lowu wu nyikele xiboho lexi humaka embilwini, wu nkhesa Huvo leyi Fumaka na ndyangu wa Bethele. Endzhaku ka swakudya swa ninhlikanhi, Makwerhu Charles J. Rice wa Komiti ya Mapurasi ya Watchtower u fambise Dyondzo leyi komisiweke ya Xihondzo xo Rindza. Kutani mathwasani ma sungule nongonoko lowu tsakisaka, ma kombisa yin’wana ya mintokoto ya wona leyi ma yi kumeke entirhweni wa nsimu hi nkarhi wa dyondzo ya wona ya ntlhanu wa tin’hweti eWallkill, New York. Endzhaku ka sweswo, vahuweleri lava yimelaka mabandlha yo hlayanyana ya kwalaho va nyikele drama leyi nge Vantshwa Lava Tsundzukaka Muvumbi Wa Vona Sweswi.
Ku pfala nongonoko, Makwerhu George Gangas, xirho xa Huvo leyi Fumaka wa malembe ya 95 hi vukhale, u nyikele xikhongelo lexi khutazaka, eka Yehova. Vayingiseri va fambe va tsakile, handle ko kanakana un’wana ni un’wana a susumeteleke ku va ni xiphemu lexikulu eka ntshovelo wa misava hinkwayo.
[Bokisi leri nga eka tluka 22]
Tinhlayo Ta Ntlawa
Nhlayo ya matiko lama yimeriweke: 6
Nhlayo ya matiko lawa va averiweke eka wona: 12
Nhlayo ya swichudeni: 24
Nhlayo ya mimpatswa leyi tekaneke: 12
Avhareji ya malembe: 33,4
Avhareji ya malembe entiyisweni; 16,13
Avhareji ya malembe evutirhelini bya nkarhi hinkwawo: 11,3
[Xifaniso lexi nga eka tluka 23]
Ntlawa Wa Vu-91 Lowu Thwasaka Wa Xikolo Xa Bibele Xa Gilead Xa Watchtower
Eka nxaxamelo lowu nga laha hansi, tilayini ti hlayeriwe ku sukela emahlweni ku ya endzhaku naswona mavito ya xaxametiwe ku suka eximatsini ku ya exineneni eka layeni yin’wana ni yin’wana.
(1) McDowell, A.; Youngquist, L.; Skokan, B.; Wargnier, N.; Miller, Y.; Muñoz, M. (2) Bales, M.; Perez, D.; Attick, E.; Vainikainen, A.; Mostberg, K. (3) DePriest, D.; DePriest, T.; Perez, R.; Wargnier, J.; Muñoz, J.; Miller, J. (4) McDowell, S.; Bales, D.; Skokan, M.; Attick, C.; Youngquist, W.; Vainikainen, J.; Mostberg, S.