Mikateko Ya Dyondzo Ya Le Gilead Yi Hangalaka eMisaveni Hinkwayo

DYONDZO emisaveni leyi ya khale yi ni ntikelo lowutsongo ntsena. Tanihi leswi ngopfu-ngopfu yi sekeriweke emianakanyweni ya vanhu, ematshan’wini ya ntiyiso wa Xikwembu, a yi nyiki xikongomelo xa ntiyiso evuton’wini. Kambe Xikolo xa Gilead xi hambanile. Eka marito yakwe yo sungula loko ku thwasa ntlawa wa vu-93 wa Gilead, Theodore Jaracz wa Huvo leyi Fumaka u vule leswaku xikolo lexi xi dyondzisa dyondzo ya mongo wa ntiyiso. Hi laha Pisalema 119:160 (NW) yi vulaka ha kona, “mongo wa rito ra [Xikwembu] i ntiyiso.” Kutani vayingiseri lava lavaka ku fika eka 6 000 va yingisele nongonoko wo thwasisa hi ku nyanyuka lokukulu hi September 13, 1992.

Nkulumo yo rhanga ya ni mixo leyi nyikeriweke hi Lon Schilling wa Komiti ya Mapurasi ya Watchtower, a yi ku “Hambetani Mi Hlula Misava Ni Mulawuri Wa Yona.” Makwerhu Schilling u hlamusele Nhlavutelo 12:11 ivi a boxa leswaku tindzimana ti komba tindlela tinharhu ta ku hlula: (1) hi ngati ya Xinyimpfana, (2) hi ku veka vumbhoni ni (3) ku va ni moya wa ku tinyiketa. U tsundzuxe swichudeni leswaku malandza yo tala ya Yehovha ma kombe moya wo tano naswona ma tlhele ma langutana ni rifu hi ku tiyimisela leswaku ma hlayisa ku tshembeka ka wona.

Xihloko lexi hlamuseriweke hi John E. Barr wa Huvo leyi Fumaka a xi ku “Hlayisani Ntshembo Wa N’wina Lowunene.” Hi rito ra yena lerinene, u fananise ku tshembana loku nga kona exikarhi ka Yehovha ni malandza yakwe ni ku tshembana loku vaka kona evukatini lebyinene. Hi ku tirhisa tinhla leti humaka eka 2 Timotiya 1:12, 13, u khongotele swichudeni ku hlayisa ntshembo wa swona hi ku khomelela eka “ntila wa marito lama tiyeke ya xiviri” lama nga eBibeleni. U kandziyise ku endla leswaku dyondzo ya munhu hi yexe yi va yinhla yo hlawuleka ya xiyimiso xa siku na siku naswona u tsundzuxe swichudeni hi musa leswaku swi nga tshuki swi endla leswaku tinhlamulo ta swona eminhlanganweni ti va mhaka yo hetisisa nawu, kambe swi ti endla ti aka nkarhi hinkwawo.

William Van De Wall wa Komiti ya Ndzawulo ya Ntirho u nyikele nkulumo leyi tlhandlameke, “Kombisa Nkhathalelo Wa Rirhandzu Eka Vanhu Lava Fanaka Ni Tinyimpfu.” U vutise swichudeni leswaku a swi ta langutela leswaku muongori wa ndyangu a va njhani, kutani a swi khutaza leswaku swi hlakulela nsovo, ntwela-vusiwana ni tintswalo leti a swi ta ti langutela.

Daniel Sydlik wa Huvo leyi Fumaka u vulavule hi ndlela leyi susaka vurhongo, hi xihloko lexi nge “Swilo Hinkwaswo Swa Koteka Eka Xikwembu.” U tsundzuxe swichudeni leswaku Abrahama na Sara va hlekile hikwalaho ka ku langutela loku a ku vonaka ku nga ta koteka, ka ku va ni n’wana va dyuharile. Swo tala swa switshembiso swa Xikwembu swi vonaka swi nga koteki hi ku ya hi langutelo ra munhu, kambe swi ve hi laha ntsumi yi vutiseke Abrahama ha kona, “šana yi kona e mhaka le’yi nga hlulaka Yehova?” (Genesa 18:14) Makwerhu Sydlik u khongotele swichudeni leswaku swi pfumela leswaku Xikwembu xa swi kota ku endla leswi nga kotekiki, swi nga tshiki ripfumelo ra swona ri hela kumbe ri tsekatseka, ku nga khathariseki leswaku swi langutana ni miringo yihi.

Valeteri Va Nyika Ndzayo

Ku landzelele valeteri vambirhi va le Gilead va vulavula. Wo sungula, Jack D. Redford u hlamusele xihloko lexi nge “Ku Tiendlela Vito Lerinene Ni Xikwembu.” U vule leswaku lexi endlaka vito ri va lerinene kumbe ri biha, i munhu loyi a nga na rona. U kombise ku hambana exikarhi ka mavito yo tanihi Adamu, Nimrodi, Yezabele, Sawulo na Yudasi, swin’we ni mavito yo tanihi Nowa, Abrahama, Rhuti, Pawulo na Timotiya. Vito ha rin’we, ri ni swilo swa rona swo tala hi ku ya hi ndlela ya vutomi bya n’wini wa rona. U vutise swichudeni leswaku swi ta va ni vito ra muxaka muni emalembeni ya 10, 100 kumbe ya 1 000 ku sukela enkarhini wolowo—xana va ta vitaniwa mubaleki kumbe muvileri, kumbe va ta vitaniwa varhumiwa lava tshembekaka? U va tsundzuxe leswaku va yisa nyingiso eka tinhlamulo ni swikongomelo ematshan’wini yo languta swiphiqo.

Xihloko lexi tlhontlhaka miehleketo lexi nge “Xana Ripfumelo Ra Wena U Ri Hlayisa Kahle Hi Ndlela Yihi?” xi hlamuseriwe hi Ulysses V. Glass. U fananise ripfumelo leri tiyeke ni khompasi leyi nkarhi hinkwawo yi kombaka ndlela leyinene. Khompasi ya movha yi nga ha kavanyetiwa hi swilo swin’wana swa nkoka-nsimbhi, handle ka misava, kutani swilo swo tano swi fanele ku hetiwa matimba. Hi ku fanana, misava leyi ya khale yi ni minkucetelo yo tala leyi yi nga hetaka kumbe ku tsanisa ripfumelo ra hina loko hi yi pfumelela. Loko a ri karhi a tsundzuxa ntlawa hi minkucetelo yo tano, Makwerhu Glass u tlhele a va bumabumela hi ku xiya ka vona malangutelo ni mintlhaveko ya van’wana.

Nkulumo yo hetelela ya ni mixo yi nyikeriwe hi Albert D. Schroeder, xirho xa Huvo leyi Fumaka. U khutaze swichudeni a ku, “Yanani eMahlweni Ni Moya Wa Vurhumiwa,” a swi bumabumela hikwalaho ko kombisa moya lowu fanaka wa vurhumiwa hi laha ntlawa wo rhanga wu endleke ha kona le ndzhaku hi 1943, loko yena a ha tirha tanihi mutsarisi wa xikolo. U boxe leswaku a va rhandza vanhu, ku chumayela a swi ri engatini ya vona, naswona a va lava ku kongomisiwa hi moya wa Xikwembu. U va khutaze a ku, hambetani mi kurisa moya wolowo, mi tirhisa New World Translation hi xitalo eka dyondzo ya munhu hi yexe. U gimete hi bulo ra ndzimana yin’wana ni yin’wana ya Pisalema 24 tanihi xikombiso xa sweswo.

Lexi landzeleke, swichudeni swa le Gilead swi ve mathwasana ya le Gilead! Swi nyikiwe tidiploma ta swona loko ku ri karhi ku hlayiwa swiavelo swa swona hi rito lerikulu, vayingiseri va ri karhi va phokotela.

Ni ndzhenga, Calvin Chyke wa Komiti ya le Fektri u fambise Dyondzo ya Xihondzo xo Rindza. Ku landzele nongonoko lowu tsakisaka wa swichudeni, lowu vulavuleke hi mintokoto ya swichudeni ya le nsin’wini, etin’hwetini ta ntlhanu ta dyondzo, nakambe wu kombise ni ti-slide ta matiko man’wana lawa va averiweke ka wona. Ku engetela kwalaho, ku vulavurisiwe mpatswa wun’wana lowu kuleke, naswona wu hlamusele vutlharhi ni ntokoto lowu va nga wu kuma emalembeni yo tala va ri varhumiwa. Ndzhenga wolowo wu pfale hi drama leyi nga enkarhini leyi nge Mi Nga Hambukisiwi Kumbe Ku Sola Xikwembu.

Vayingiseri va suke va nyanyukile, va tsakele ku vona leswi dyondzo ya ntiyiso wa Xikwembu yi nga swi endla, naswona va tsakele ku tiva leswaku mbuyelo wa dyondzo yo tano wu ta hambeta wu voniwa emisaveni hinkwayo. Loko varhumiwa lava va 48 va hangalaka va ya eswiavelweni swa vona, va landzeriwa hi swikhongelo swo tala, leswi kombisaka ntshembo lowu humaka embilwini ni ku kholwa leswaku vanhu lava vo tshembeka va ta va nkateko eka vanhu va Xikwembu, hinkwako lomu va yaka kona.

[Bokisi leri nga eka tluka 19]

Tinhlayo Ta Ntlawa

Nhlayo ya matiko lama yimeriweke: 7

Nhlayo ya matiko lawa va averiweke eka wona: 18

Nhlayo ya swichudeni: 48

Nhlayo ya mimpatswa leyi takaneke: 24

Avhareji ya malembe: 32,8

Avhareji ya malembe entiyisweni: 15,3

Avhareji ya malembe evutirhelini bya nkarhi hinkwawo: 10,4

[Bokisi leri nga eka tluka 20]

MATHWASANA YA NTLAWA LOWU ENGETELAKA WA LE GILEAD

Hi June 21, 1992, ntlawa wa varhumiwa va 24 wu thwasile eka ntlawa wa vumune wa Xikolo lexi Engetelaka xa le Gilead le Selters/Taunus, eJarimani. Ntlawa lowu a wu ri ni mimpatswa ya 11 leyi takaneke ni vamakwerhu vambirhi va xisati lava nga si tekiwaka, lava humaka ematikweni ya nkombo, lava a va ri ni avhareji ya malembe ya 32 hi vukhale, va ri ni malembe ya 14 ku sukela loko va khuvuriwile ni malembe ya 8,5 va ri entirhweni wa nkarhi hinkwawo wa ku vula evhangeli. A ku ri ni vanhu vo tlula 2 000 loko ku thwasisiwa.

Makwerhu Jaracz u pfule nongonoko hi ku bula hi Swivuriso 11:24, leyi nge: ‘Ku ni munhu loyi a hangalasaka kambe wa engeteleriwa.’ U xiye leswaku swichudeni a swi ri kusuhi ni ku hangalasiwa naswona a swi ta engetela ku andza hakunene.

Ku nyikeriwe tinkulumo leti khutazaka ta matsalwa hi Richard Kelsey, mufambisi wa Komiti ya Rhavi ra le Jarimani; Wolfgang Gruppe wa Ndzawulo ya Ntirho; Werner Rudtke na Edmund Anstadt, na vona i swirho swa Komiti ya Rhavi; ni valeteri vambirhi, Dietrich Förster na Lothar Kaemmer. Albert Schroeder wa Huvo leyi Fumaka u nyikele nkulumo yo tsakisa leyi nge “Hambetani Mi Va Valavisisi Va Rifuwo Ra Moya.” Nongonoko wu chapute hi ku humesiwa ka swiavelo swa le matikweni ya 11, eAfrika, Amerika Xikarhi ni le Yuropa Vuxa, kutani endzhaku ka sweswo thwasana rin’wana ri hlaye papila leri tsariweke hi ntlawa, wu ri tsalela Huvo leyi Fumaka wu komba ku tlangela loku humaka embilwini.

[Xifaniso lexi nga eka tluka 18]

Ntlawa Wa Vu-93 Lowu Thwasaka Wa Xikolo Xa Bibele Xa Gilead Xa Watchtower

Eka nxaxamelo lowu nga laha hansi, tilayini ti hlayeriwa ku sukela emahlweni ku ya endzhaku naswona mavito ma xaxametiwe ku suka eximatsini ku ya exineneni eka layini yin’wana ni yin’wana.

(1) Hitesman, C.; West, P.; Evans, D.; Hipps, M.; Simonelli, N.; Wood, S.; Corkle, M.; Flores, C.; Thomas, J. (2) Jones, M.; Nissinen, J.; Sponenberg, M.; Zachary, K.; Ravn, G.; Backman, M.; Wettergren, A.; Evans, D.; Flores, R.; Caporale, G. (3) Simonelli, N.; Rechsteiner, M.; Rechsteiner, M.; Ruiz-Esparza, L.; Gerbig, B.; Simpson, C.; Zanewich, C.; Zachary, B.; Ricketts, L.; (4) Simpson, J.; Backman, J.; Corkle, G.; Gerbig, M.; Ricketts, B.; Bagger-Hansen, L.; Jones, A.; Zanewich, K.; Ravn, J.; Hipps, C. (5) Sponenberg, S.; Hitesman, A.; Caporale, L.; Ruiz-Esparza, S.; Thomas, R.; Bagger-Hansen, B.; Wood, M.; West, M.; Wettergren, C.; Nissinen, E.