Ndzetelo Wa Gilead Hi Ripfumelo Ro Kwetsima Ku Tlurisa

“SWICHUDENI swa hina swi leteriwe kahle hi ripfumelo ro kwetsima ku tlurisa.” Lawa a a ku ri marito yo pfula ya nongonoko wo thwasisa wa ntlawa wa vu-95 wa Xikolo xa Bibele xa Gilead xa Watchtower, lowu khomiweke hi Sonto, September 12, 1993. Mpundzu wolowo, vaendzi va 4 614 lava rhambiweke, ni swirho swa ndyangu wa Bethele, lava a va hlengeletane eHolweni ya Nhlengeletano ya Doroba ra Jersey va rhangeriwe hi xikhongelo xo pfula hi George Gangas. Makwerhu Gangas u ni malembe ya 65 a ri xirho xa ndyangu wa Bethele naswona leswi a nga ni malembe ya 97 hi vukhale, hi yena lonkulu hi malembe eka swirho swa Huvo leyi Fumaka.

Albert Schroeder, loyi na yena a nga xirho xa Huvo leyi Fumaka ni mutshama-xitulu wa nongonoko, u te: “Ku ringana tin’hweti ta ntlhanu dyondzo ya Gilead a yi sekeriwe eripfumelweni ro kwetsima ku tlurisa.” Kambe ‘ripfumelo ro kwetsima ku tlurisa’ i yini? U hlamusele leswaku ‘ripfumelo leri ro kwetsima ku tlurisa,’ leri hlamuseriwaka eka Yuda 20, i ntiyiso hinkwawo wa Bibele. Kutani dyondzo ya Gilead yi sekeriwe eRitweni ra Yehovha, Bibele, leyi yi nga buku-mpfuno leyi tirhisiwaka ngopfu eka dyondzo leyi.

Swichudeni Swi Kuma Ndzetelo Lowu Engetelekeke

Xivulavuri xo sungula a ku ri John Stuefloten wa Komiti ya Mapurasi ya Watchtower, loyi a hlamuseleke nhloko-mhaka leyi nge “Ku Pfuniwa Hi Nkucetelo Wa Vanhu Vo Tlhariha.” Bibele yi vula leswaku lava “fambaka ni tintlhari [va] ta tlhariha.” (Swivuriso 13:20) Hi nkarhi wa dyondzo ya Gilead, swichudeni swi hete tiawara ta 900 swi dyondza Bibele. Makwerhu Stuefloten u vutise swichudeni a ku: “Xana nkucetelo wa Yehovha wu ta mi khumba njhani enkarhini lowu taka? Mi ya ematikweni ya 18 lama nga ni ntsengo wa vaaka-tiko va 170 wa timiliyoni. Kutani xana mi ta va kucetela njhani vanhu volavo?” Hi ku kombisa vutlharhi bya Yehovha, varhumiwa lavantshwa va ta kota ku pfuna van’wana leswaku va va vagandzeri va Yehovha, Xihlovo xa vutlharhi lebyi nga pimekiki.

“Ku Tiendla Swilo Hinkwaswo Eka Vanhu Hinkwavo” a ku ri xihloko xa nkulumo leyi landzeleke, leyi nyikeriweke hi Lloyd Barry wa Huvo leyi Fumaka. (1 Vakorinto 9:22, King James Version) Emalembeni ya kwalomu ka 45 lama hundzeke, Makwerhu Barry hi byakwe a a ri xichudeni eka ntlawa wa vu-11 wa Gilead. Sweswi ntlawa wa vu-95 wu tsakele ku kambisisa ndzayo leyi tirhaka leyi humaka eka loyi khale a a ri murhumiwa, la nga ni malembe ya ntokoto a tirha etikweni rimbe. U khutaze swichudeni ku hatla swi tolovelana ni vanhu va le nsin’wini ya swona leyintshwa ya tiko rimbe hi ku tiva mikhuva ya kona ni ku dyondza ririmi leri vulavuriwaka. U vule leswaku leswi va nga swi endla hi ku hlangana ni ku tirhisana ni vanhu va ndhawu yoleyo kun’we ni ku dyondza mikhuva ya vona va tlhela va hanya hi yona loko swi fanerile.

Endzhaku ka sweswo, Dean Songer wa Komiti ya Fektri u vulavule hi nhloko-mhaka leyi nyanyulaka leyi nge “Ku Ntshunxiwa eNtirhweni.” Endzhaku ka malembe ya kwalomu ka 35 ya ntirho wa nkarhi hinkwawo, Makwerhu Songer wa swi twisisa leswi swi vulaka swona ku hanya vutomi lebyi kongomeke, lebyi olovaka, u langutana ni ntirho lowu endliwaka, handle ka ku karhateka hi swilo leswi vonakaka. Wolowo a ku ri mongo wa ndzayo yakwe eka swichudeni. Vayimbeleri etempeleni ya Yehovha a a va ntshunxiwile eka mintirho yin’wana leyi a yi endliwa hi Valevhi van’wana leswaku va kota ku tinyiketela hi ku helela exiavelweni xa vona xo hlawuleka. (1 Tikronika 9:33) Hi laha ku fanaka, varhumiwa va le Gilead va ntshunxiwile eka swilo leswi tolovelekeke swo tanihi ntirho wa ku tihanyisa leswaku va ta langutana ni ntirho wa vona wo hlawuleka. Makwerhu Songer u gimete hi xikhutazo lexi: “Hlayisani langutelo ra n’wina ni vutomi bya n’wina mi byi hlayisa byi olova. Vutihlamuleri bya n’wina tanihi lava ntshuxiweke entirhweni i ku endla ntirho vusiku ni nhlikanhi, mi dzunisa Yehovha.”

Xirho xa Huvo leyi Fumaka Daniel Sydlik u landzerile hi nhloko-mhaka leyi nge “Ku Dyondzisa Van’wana Ndlela Ya Ku Kuma Leswinene Ngopfu eVuton’wini.” U khutaze swichudeni “leswaku swi dyondzisa dyondzo ya xisekelo swi tlhela swi tiya nhlana wa ku komba vanhu leswi va faneleke ku swi endla leswaku vutomi bya vona byi pfumelelana ni ku rhandza ka Xikwembu.” Vadyondzisi lavanene va fanele va nyika matimba ni nsusumeto. U te: “Khathalelani ku dyondzisa van’wana mahanyelo ya Vukreste ematshan’weni yo dyondzisa milawu ni swiletelo,” ivi eku heteleleni a engeta a ku: “Vamakwerhu lava rhandzekaka, ehenhla ka hinkwaswo, tidyondziseni n’wina, mi dyondzisa ni van’wana ku va ni rirhandzu, hikuva i xiboho lexi hetisekeke xa vun’we.”—1 Vakorinto 13:1-3; Vakolosa 3:14.

Endzhaku ka tin’hweti to tala ta ndzetelo, swichudeni swi tsakisiwe ngopfu hi valeteri va swona vambirhi va le Gilead. Jack Redford, khale ka murhumiwa, u rhange a vulavula hi nhloko-mhaka leyi nge “Mi Hlawule Kahle.” Etikweni ra khale ra Vayuda, a nga si va muapostola wa Mukreste, Pawulo a a ri ni xikhundlha, ndhuma, nkucetelo ni mali leyi ringaneke. Kambe eka Vafilipiya 3:8 (NW), Pawulo u hlamusele leswi hinkwaswo tanihi “nhulu ya thyaka,” kumbe “thyaka,” hi ku ya hi vuhundzuluxeri bya Phillips. Mbilu yakwe a yi ri evutirhelini, naswona u hlawule kahle. Ku hambana ni sweswo, vanhu vo tala namuntlha va kombisa hi leswi va swi hlawulaka evuton’wini leswaku va languta rifuwo ra vona ra swilo leswi vonakaka ri ri ra risima swinene ku tlula vutomi lebyi nga heriki. Varhumiwa va le Gilead va hlawule kahle. Jack Redford u gimete hi ku vula leswi: “A ku na nchumu lexi misava ya Diyavulosi yi nga mi nyikaka xona lexi ringanaka ni ntirho wa vurhumiwa. Hlayisani lunghelo rero leri nga ringaniki na nchumu, ivi mi tshika misava yi khathalela thyaka ra yona!”

Eka malembe ya 32 lama hundzeke, Ulysses Glass a a ri muleteri wa le Gilead. U nyike swichudeni ndzayo yo lela hi nhloko-mhaka leyi nge “I Xikwembu Ntsena Lexi Nga Endlaka Murhi,” a seketele nkulumo yakwe eka Pisalema 1:3. Thekinoloji ya manguva lawa a yi si tshama yi swi kota ku endla murhi lowu fanaka ni leyi endliweke hi Xikwembu. Hi ndlela yo karhi, Vakreste va ntiyiso va kotisa mirhi, leyi byariweke ni leyi cheletiwaka hi Yehovha. Makwerhu Glass u xiye leswaku etin’hwetini ta ntlhanu, swichudeni a swi “hambeta swi cheletiwa hi xihlovo xa mati lama nyikaka vutomi xa Rito ra Xikwembu,” ku kotisa mirhi entangeni kumbe eparadeyisini ya moya. Kambe, tanihi varhumiwa, va fanele va hlayisa “rimitsu ra vona ra moya leswaku ri nga vaviseki.” Va khutaziwe ku ‘hambeta va nwa mati ya vutomi lama humaka eka Yehovha hikuva i Xikwembu ntsena lexi nga endlaka murhi.’

Nkulumo yo hetelela yi nyikeriwe hi Carey Barber, xirho xa Huvo leyi Fumaka. Endzhaku ka malembe ya 70 ya ntirho wa nkarhi hinkwawo, Makwerhu Barber u vulavule hi xivindzi hi nhloko-mhaka leyi nge “Tinyiketeleni Hi Laha Ku Hlawulekeke Eka Yehovha.” Vunyingi lebyikulu bya vanhu a byi tinyiketelanga hi ku helela eka Yehovha. (Deteronoma 5:9) Hambi swi ri tano, hi laha Makwerhu Barber a kombiseke ha kona, ku nga khathariseki ku nga hetiseki, “swa koteka swinene ku tinyiketela eka Xikwembu hi ku helela.” U engeterile: “Ku hava loyi a nga vulaka a ku: ‘I Diyavulosi la nga vanga leswaku ndzi swi endla.’” Kambe Diyavulosi a nga hi hlula loko hi tsandzeka ku n’wi kaneta. (Yakobo 4:7) Ku tshama hi khomekile entirhweni wa Yehovha i ndlela leyikulu ya ku kaneta Sathana ni misava yakwe ivi hi tinyiketela eka Yehovha hi laha ku heleleke.

Ku Vekiwa Tanihi Varhumiwa

Nongonoko wa ni mixo wu gimete hi ku vekiwa ximfumo ka swichudeni hinkwaswo swa 46 swa varhumiwa. Mimpatswa leyi ya 23 yi amukele tidiploma leti vulaka leswaku mathwasana ma “faneleka hi laha ku hlawulekeke leswaku ma endla ntirho wa ku dyondzisa, ma hlohlotela vunene ni ku tirhela ku rhula loku nga heriki ni nawu wa nhleleko lowu hetisekeke ni ku lulama exikarhi ka vanhu.” Ntlawa wa vu-95 wa Gilead entiyisweni wu ta lwela ku hetisisa ntirho wa wona lowu hlawulekeke ematikweni ya 18 lawa va averiweke eka wona. Swiavelo leswi swi katsa misava hinkwayo ku hlanganisa ni matiko ya le Asia, Afrika, Yuropa, Latin Amerika ni le Caribbean.

Ni ndzhenga, endzhaku ka Dyondzo ya Xihondzo xo Rindza leyi komisiweke leyi a yi fambisiwa hi Charles Woody wa Komiti ya Ndzawulo ya Ntirho, mathwasana lamantshwa ya le Gilead ma nyikele nongonoko wa vona wa swichudeni, lowu a wu ri ni nhloko-mhaka leyi nge “Gilead Yi Hi Lunghiselele Ku Dyondzisa Tanihi Varhumiwa.” Xiyimiso lexi xi pfale hi drama leyi nge “Minhlawulo Leyi Hi Langutaneke Na Yona.”

Endzhaku ka nongonoko lowu wu phyuphyisaka, varhumiwa lavantshwa se a va lulamele ku rhumiwa ematlhelweni ya mune ya misava va ya avelana ni van’wana ‘ripfumelo ro kwetsima ku tlurisa.’

[Bokisi leri nga eka tluka 26]

Tinhlayo Ta Ntlawa

Nhlayo ya matiko lama yimeriweke: 7

Nhlayo ya matiko lawa va averiweke eka wona: 18

Nhlayo ya swichudeni: 46

Nhlayo ya mimpatswa leyi tekaneke: 23

Avhareji ya malembe: 30,06

Avhareji ya malembe entiyisweni: 12,92

Avhareji ya malembe evutirhelini bya nkarhi hinkwawo: 9,4

[Xifaniso lexi nga eka tluka 26]

Ntlawa Wa Vu-95 Lowu Thwasaka Wa Xikolo Xa Bibele Xa Gilead Xa Watchtower

Eka nxaxamelo lowu nga laha hansi, tilayeni ti hlayeriwe ku sukela emahlweni ku ya endzhaku naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Buelow, D.; Donzé, V.; Innes, S.; Fulk, N.; Billingsby, M.; Hoddinott, L.; Nygren, B.; Eriksson, L. (2) Boker, J.; Thomas, M.; Stedman, S.; Billingsby, D.; Waugh, I.; Purves, M.; Luttrell, M. (3) Jacobsen, T.; Boker, J.; Martínez, L.; Nilsson, E.; Purves, P.; Holt, L.; Larsen, M.; Jones, L. (4) Numminen, P.; Numminen, H.; Buelow, M.; Olson, W.; Holt, S.; Donzé, G.; DesJardins, C.; DesJardins, D. (5) Larsen, K.; Martínez, D.; Nygren, P.; Waugh, P.; Jones, D.; Hoddinott, J.; Thomas, G. (6) Innes, B.; Fulk, R.; Eriksson, A.; Nilsson, S.; Stedman, J.; Olson, K.; Jacobsen, F.; Luttrell, J.