Ku Thwasa Ka Ntlawa Wa Vu-83 Wa Gilead Kunene I Xiendlo Xo Tsakisa
“Dunisani Yehova, hikuv̌a o lulamile, hikuv̌a tintŝalo ta yena hi le’ti nga heriki!” (Psalma 136:1) Koloko a ku ri ku titwa ka lava ringanaka 4 391 lava veke kona eka nongonoko wa ku thwasa ka ntlawa wa vu-83 wa Xikolo xa Bibele xa Gilead xa Watchtower eka ximun’wana lexi. Tinkulumo, mintokoto ni drama ya Bibele leswi nyikeriweke hi nkarhi wa nongonoko lowu swi endle leswaku hinkwavo va famba va tsakile. Ku thwasa loku ku endleke hi September 6, 1987, eHolweni yo saseka ya Nhlengeletano eDorobeni-nkulu ra Jersey, leyi khale a yi tiviwa tanihi Stanley Theater.
Endzhaku ka risimu ro sungula, ni xikhongelo hi John Booth wa Huvo leyi Fumaka, mutshami wa xitulu, Albert Schroeder, xirho xin’wana xa Huvo leyi Fumaka, u amukele hinkwavo eka xiendlo lexi xo tsakisa. Swichudeni swa 24 a swi huma ematikweni ya ntlhanu, kutani sweswi a swi ri karhi swi rhumeriwa etindhawini ta nhungu to hambana-hambana. Makwerhu Schroeder u kandziyise ku tiyiseka loku vanhu va Yehova va nga na kona hi leswi ripfumelo ra vona ri seketeriweke hi mintiyiso. Hi xikombiso, va swi tiva leswaku Yehova i Mulawuri wa Vuako hinkwabyo ni leswaku Rito ra yena, Bibele leyo Kwetsima, i ntiyiso lowu hetisekeke. Leswi swi hambana swinene ni tifilosofi ta vanhu leti seketeriweke hi swilo swo mbambela ni ku vhumba.
Xivulavuri xo sungula a ku ri Martin Poetzinger, na yena i xirho xa Huvo leyi Fumaka, loyi a heteke malembe ya kaye eminxaxeni ya nxaniso ya Manazi. Xihloko xa yena a xi ku “U Tshemba Mani Xana?” lexi seketeriweke eka Swivuriso 3:5, 6. Eka swichudeni u tshikilele xilaveko xa ku tshemba Yehova ni nhlengeletano ya yena leyi vonakaka hi xitalo, xikan’we ni ku tivonakarisa swi tshembekile hi swoxe. Vuleteri bya Gilead bya swichudeni a ku ri masungulo ntsena; sweswi swi fanele ku aka ehenhla ka wona ni ku landzela xitsundzuxo xa Pawulo eka Vaefesa 5:15, 16. ‘Mi nga yimi,’ ku khutaza xivulavuri. ‘Mi ta va na swona swiphiqo eswiavelweni swa n’wina swa vurhumiwa swo tanihi ririmi, maxelo, swakudya ni swin’wana; kambe hi ku tshemba Yehova, mi nga swi lulamisa hinkwaswo swiphiqo sweswo. Ku rhandza vanhu i xilotlelo xa n’wina xa ku humelela. Xikhutazo xin’wana ni xin’wana xi huma eka Xikwembu; xin’wana ni xin’wana lexi hetaka matimba xi huma eka Sathana.’
Xivulavuri lexi landzeleke a ku ri Eldor Timm, xirho xa Komiti ya Fektri, loyi a seketeleke switsundzuxo swa yena eka 2 Vakorinto 13:5 leyi nge: “Yanani emahlweni mi tikamba, ku vona loko ma ha ri eku pfumeleni. ” U vule leswaku, swichudeni a swi hetile swikambelo leswi tsariwaka, kambe swi ta hambeta swi kongomana ni miringo yo tala eswiavelweni swa vona swa vurhumiwa. Ndlela leyi va langutanaka ni miringo yoleyo ha yona yi ta vula ku humelela ka vona tanihi varhumiwa. Va fanele ku tivonela eku titshembeni loku tlulaka mpimo hi ku hlayisa ndzayo leyi nge: “Loyi a anakanyaka leswaku wa ha yimile, a a tivonele leswaku a nga wi.” (1 Vakorinto 10:12) Va ta hambeta va endla nhluvuko loko va hlayisa xiyimo lexinene xa miehleketo.
Xirho xa Huvo ya Ndzawulo ya Ntirho, Joel Adams, xi landzerile. Xi vulavule ehenhla ka mhaka leyi nge: “Ehleketa Ku Fana Na Yesu, Kombisa Ku Tsakela Ka Xiviri Ka Van’wana.” Mayana xikombiso lexinene lexi Yesu a xi vekeke emhakeni leyi! Xikombiso xa yena xa ku pfumala vutianakanyi ni ku titsongahata xi kandziyiseriwe hina eka Vafilipiya 2:3-5. Loko van’wana va ri ndzingo eka hina hikwalaho ka swihoxo swa vona kumbe va pfumala vutlhari, a hi endleni matshalatshala yo kombisa tintswalo eka vona. Loko Xikolo xa Gilead xa ha ya emahlweni, vo tala va kombise ku tsakela swichudeni; sweswi swi salele swona ku endla leswi fanaka eka van’wana. Varhumiwa lava humelelaka swinene hi lava kombisaka ku tsakela mikhuva, ririmi, swilaveko swa van’wana ni swin’wana.
Endzhaku, swichudeni swi khutaziwile hi un’wana loyi a a ri murhumiwa hi malembe layo tala, Lloyd Barry, na yena a nga xirho wa Huvo leyi Fumaka. U vulavule hi nhloko-mhaka leyi nge “Yimbelelani Ka Yehova,” leyi seketeriweke eka Psalma 96:1. Vanhu va Yehova va tsakela ku yimbelela. Ku yimbelela ku fambisana ni ku tsaka, kutani ke u khutaze swichudeni leswaku swi nga tshuki swi lahlekeriwa hi ntsako wa ku yisa ntiyiso eka van’wana. ‘Loko u fanele ku dyondza ririmi lerintshwa,’ ku khutaza yena ‘veka mbilu ya wena eka rona wa ha sungula. Diyavulosi u ta ringeta ku ku heta matimba, a ku endla u navela ekaya, a vanga ku hambana eka lava u tshamaka na vona. U nga n’wi nyiki na xinkarhana!’ Makwerhu Barry u kombetele eka “murhangeri wa varhumiwa,” Edwin Skinner, loyi a nga na malembe ya 60 wa le India a ri exiavelweni xa yena xa le ndhawini yimbe, loyi sweswi a nga na malembe ya 93 kambe a swi kotaka ku endla ntirho wa siku leri teleke. Hi ku ya hi Makwerhu Skinner, xilotlelo xa ku humelela tanihi murhumiwa xi na marito ya mune lama nge: “Ku Titsongahata I Mhaka-nkulu!”
Endzhaku ka marito lawa, mutshami wa xitulu u hlaye tithelegramu to hlayanyana leti nkhensaka vadyondzi ni ku va hoyozela. Marungula ma kumiwile ma huma eBolivia, eanada, Ecuador, Honduras, Spain, Sweden ni le Trinidad.
Jack Redford, un’wana wa valeteri eXikolweni xa Gilead, u vulavule ehenhla ka mhaka leyi nge “Yana eMahlweni U Va Munghana Wa Yehova.” U sungule hi ku vula leswaku ku na swikolo swo tala swa bindzu leswi nyikelaka vuleteri hi ta ku humelela ebindzwini hi ku tikumela vanghana ni ku kucetela vanhu. Swichudeni, tanihi varhumiwa va mundzuku, swi dyondzisiwile ndlela yo tikumela vanghana ni yo kucetela vanhu, hambi swi ri tano, ku nga ri hi ku bindzula ka vutianakanyi, kambe leswaku vanhu vo tano va va vanghana va Xikwembu. ‘Vutomi bya n’wina i bya ku tinyiketela ka munhu hi xiyexe,’ ku vula xivulavuri. ‘Mi amukele mahala, nyikani mahala. A ku na ku aneriseka kumbe ntsako lowukulu ku tlula ku humelela eku pfuneni ka vanhu leswaku va va vanghana va Xikwembu. Vunghana ni Xikwembu i lunghelo lerikulu leri xivumbiwa xihi na xihi xi nga vaka na rona. Yakobo 2:23 yi hi byela leswaku Abrahama u ve munghana wa Yehova hi ku kombisa ripfumelo eka Xikwembu. U ye etikweni rimbe naswona a nga langutanga endzhaku; na n’wina varhumiwa a mi fanelanga ku languta endzhaku, kambe, ematshan’wini ya sweswo, langutelani mikateko emisaveni leyintshwa ya Xikwembu.’
Ulysses Glass, muleteri eGilead ni muamukeri wa swichudeni wa Xikolo, kutani u vulavule hi nhloko-mhaka leyi nge “Dyondzo Yo Hetelela.” U vule leswaku swichudeni swi dyondzile ndlela leyi hakunene milawu ya Yehova yi anameke ni ku lava vuxiyaxiya ha yona. Hi ku tirhisa xikombiso, u kombetele eka vuxokoxoko byo tala lebyi yelanaka ni magandzelo lama endliweke hi Siku ra ku Phahla mhamba ni swifuwo swo tala leswi a swi katseka. (Levitika, ndzima 16) U bumabumele swichudeni hikwalaho ka ku tlangela ka swona loku vonakaka loku humaka embilwini kutani a ku Psalma 145:7 yi hlamusela xiyimo xa swona xa miehleketo loko yi ku: “A ku ḍunisiwe ku anakanya ka tintŝalo ta wena le’tikulu, a ku huv̌eriwe ni ku lulama ka wena!” Eku gimeteni ka yena, nakambe u tshahe Swivuriso 3:5-7, a kandziyisa xilaveko xa ku ‘tshemba Yehova hi timbilu ta vona hinkwato.’
Makwerhu F. W. Franz, muungameri wa Xikolo xa Gilead la nga ni malembe ya 94 a tlhela a va muungameri wa Watch Tower Bible and Tract Society, u nyikele nkulumo yo hetelela ya mixo. Eka yona u hlamusele matimu ya Sosayiti ku sukela enkarhini wa muungameri wo sungula, C. T. Russell, ku fikela eku sunguriweni ka Xikolo xa Gilead. Ku vulavula ka yena ka matimba ni ku hiseka ka yena ku tlangeriwe swinene hi hinkwavo. Endzhaku ka nkulumo ya yena, swichudeni swa 24 swi amukele tidiploma ta swona xikan’we ni tinyiko to karhi, kutani ke xichudeni xin’wana xi hlaye papila lerinene leri kombisaka ku tlangela ka swichudeni ka mpfuno hinkwawo lowu swi wu kumeke eka Huvo leyi Fumaka ni le ndyangwini wa Bethele.
Endzhaku ka ku wisa ka kwalomu ka tiawara timbirhi, Phil Wilcox, xirho xa Komiti ya Mapurasi ya Watchtower, u fambise dyondzo leyi komisiweke ya Xihondzo xo Rindza ya siku rero leyi eka yona swivutiso swa dyondzo a swi hlamuseriwa hi swichudeni. Sweswo swi landzeriwe hi nongonoko wa swichudeni lowu eka wona swi tlheleke swi kombisa mintokoto leyi swi yi tsakeleke loko swi ri karhi swi nyikela vumbhoni hi mindzhenga ya Ravunharhu eMutini wa New York. Lexi a ku ri xiphemu xa vuleteri bya Gilead. Nakambe va swi kombise kahle swiphiqo swo hambana-hambana leswi va faneleke va langutela ku kongomana na swona loko va fika eka swiavelo swa vona swimbe.
Tanihi ku hela loku fanelekaka ka nongonoko hinkwawo, swichudeni swi nyikele drama ya Bibele ya swiphemu swimbirhi swi ambale swiambalo swa kona, ku kombisa nkoka wa minkarhi leyi hi hanyaka eka yona. Drama yi endle leswi hi ku fananisa masiku ya hina ni minkarhi leyi hundzeke ya ku avanyisa. Hi 4:15 p.m., hi ku yimbeleriwa ka risimu leri nge “Ku Andza Ka Vulawuri Bya Xikwembu” ni xikhongelo hi xirho xa Huvo leyi Fumaka, Milton Henschel, nongonoko wo tsakisa swinene wu fike emakumu.
[Xifaniso lexi nga eka tluka 23]
Ntlawa wa vu-83 lowu Thwasaka wa Xikolo xa Bibele xa Gilead xa Watchtower
Eka nxaxamelo lowu nga laha hansi, tilayeni ti funghiwe ku sukela emahlweni ku ya endzhaku, naswona mavito ya xaxametiwe ku suka eximatsini ku ya exineneni eka layeni yin’wana ni yin’wana. (1) Melin, O.; Goode, M.; Ramos, M.; Chow, N.; Hermanson, A.; Dagostini, D. (2) David, E.; DiPaolo, A.; Neiman, O.; Shephard, J.; Foster, M.; Ramos, R. (3) Foster, W.; Melin, O.; Fristad, O.; Fristad, R.; White, L.; Dagostini, F. (4) Neiman, D.; Ness, S.; Shephard, D.; Goode, J.; White, K.; Hermanson, L.