Xana U Nga Yi Tshemba Bibele?

“SWI antswa swinene ku vula leswaku loko u hlangana ni un’wana loyi a tivulaka loyi a nga pfumeliki eka hundzuluko, munhu yoloye u hava vutivi, i xiphukuphuku kumbe ntlunya.” Xana marito lama ma vuriweke hi Richard Dawkins mutivi wa ntivo-vutomi ma ku khumbisa ku yini ke? Loko u tshemba Bibele, kumbexana u pfumela eka ntumbuluko ematshan’wini ya mianakanyo ya hundzuluko. Xana sweswo swi vula leswaku, tanihi loyi a tshembaka Bibele, u hava vutivi, u xiphukuphuku kumbe ntlunya ke?

Nakambe xiya marito lawa: “Vadyondzi va Testamente Leyintshwa va swi seketerile handle ko kanakana kwihi na kwihi loku nga vaka kona leswaku Yesu wa matsalwa yo sungula ya Vukriste hi mpimo wo karhi i ntsheketo wa mianakanyo ya Vakriste.” Marito lawa ma nga eka buku leyi nge The Weekend Australian ma vuriwe hi Dr. Robert W. Funk, profesa wa le yunivhesiti wa tidyondzo ta vukhongeri ni mutsari wa tibuku to tala ehenhleni ka nhlamuselo ya vukhongeri.

Dr. Funk u sungule ntirho lowu tivekaka tanihi Seminara ya Yesu, ntlawa wa vadyondzi va Bibele lava tlulaka dzana lava xopaxopaka kun’we marito ya Yesu lama vikiweke eBibeleni. Hi xikombiso, va fikelele makumu ya leswaku Xikhongelo xa Hosi a xi nga vumbiwanga ha Yesu; leswaku Yesu a nga vulanga leswaku lavo lulama a va ta dya ndzhaka ya misava kumbe leswaku lava endlaka ku rhula a va ta vitaniwa vana va Xikwembu; ni leswaku a nga vulanga a ku: “Hi mina ku pfuka ni vutomi; la pfumelaka ka mina, . . . a nga ka a nga fi ni siku ni rin’we.”—Yohane 11:25, 26; Matewu 5:5, 9; 6:9, 10.

Hambi leswi makumu ya vona ma nga ha ku hlamarisaka, a hi lama nga tolovelekangiki. I vuyelo bya vuxopaxopi bya manguva lawa bya Bibele, naswona mianakanyo leyi fanaka yi dyondzisiwile etiseminarini ta vukhongeri hi nkarhi wo leha. Kumbexana u honise ku yingisela loko Bibele yi kanetiwa hi vativi va sayense. Kambe loko varhangeri va vukhongeri va tisa ku kanakana entiyisweni wa rhekhodo ya Bibele, u nga ha tivutisa loko ku ri nkarhi wo tlhela u xiyisisa xiyimo xa wena n’wini. Xana swa twala ku tshemba Bibele loko tintlhari to tala swinene exivandleni xa vukhongeri entiyisweni ti nga yi tshembi?