Vutomi Ni Vutirheli Bya Yesu

Va Tsandzeka Ku Phasa Yesu

YESU a a ri eku dyondziseni etempeleni naswona wa ha ku byela valala va yena va vukhongeri swifaniso swinharhu leswi swi paluxaka vubihi bya vona. Vafarisi va hlundzukile naswona va lava ndlela yo n’wi phasa leswaku a vula xin’wana lexi va nga ta n’wi khoma ha xona. Va boha makungu kutani va rhuma vadyondzisiwa va vona, kun’we ni ntlawa wa valandzeri lava seketelaka Heroda, ku ya ringeta ku n’wi phasa.

Vavanuna volavo va ku: “Mudyondzisi, ha swi tiva leswaku u vula leswi tiyeke, ni leswaku u dyondzisa ndlela ya Xikwembu hi ntiyiso u nga landzeleli swa munhu, hikuva a wu yi hi nghohe. U nga hi byela miehleketo ya wena emhakeni leyi: Xana swa fanela ku humesela Khezari endzuvo, kumbe a swi faneli ke?”

Yesu a nga xisiwi hi vukanganyisi lebyi. U xiye leswaku loko o vula a ku, ‘Doo, a swi faneli kumbe swa fanela ku humesa ndzuvo lowu,’ u ta va ni nandzu wo pfilunganya ehenhla ka Rhoma. Kambe loko o vula a ku, ‘Ina, mi fanele ku humesa ndzuvo lowu,’ Vayuda, lava a va venga ku fumiwa ka vona hi Rhoma, va ta n’wi venga. Kutani u hlamula a ku: “Mi ndzi ringela yini, n’wina vakanganyisi? Ndzi kombeni mali ya ndzuvo.”

Loko va n’wi tisele yin’we, wa vutisa: “Xifaniso lexi i xa mani ke? Ni vito leri i ra mani ke?”

Va hlamula va ku: “I swa Khezari.”

“Nyikani Khezari leswi nga swa Khezari, ni Xikwembu leswi nga swa Xikwembu.”

Kutani, loko vavanuna volavo va twa nhlamulo leyi ya vutlhari, va hlamala. Kutani va n’wi siya va suka va famba.

Hi ku vona ku hluleka ka Vafarisi ku kuma lexi va nga hehlaka Yesu ha xona, Vasaduki, lava vulaka leswaku a ku na ku pfuxiwa ka vafi va n’wi tshinelela kutani va n’wi vutisa va ku: “Mudyondzisi, Muxe ú te: ‘Loko munhu a fa a nga ri na vana, makwavo wa yena ú ta teka nsati wa mufi, a pfuxa ndyangu wa makwavo.’ Sweswi ku ni mhaka leyi: A ku ri ni vamakwavo va 7 exikarhi ka hina; lowa mativula a a tekile nsati, kutani a fa, a nga ri na vana; hikwalaho ka swona, ndzisana ya yena yi sala yi hlayisa nsati wa kona. Swi endliwa sweswo ni ka makwavo wa mufi wa vumbirhi, ni ka lowa vunharhu, ku ya fika eka lowa vu-7. Endzhaku ka vona hinkwavo, wansati na yena a fa. Leswi lava 7 hinkwavo va veke vanuna va wansati loyi, xana hi siku ra ku pfuka eku feni, ú ta va nsati wa mani exikarhi ka vona xana?”

Yesu a va hlamula a ku: “Mi lahlekile ngopfu, hikuva a mi tivi Matsalwa ni matimba ya Xikwembu! Loko vanhu va pfuka eku feni, a va ha teki, hambi ku ri ku tekiwa, kambe va fana ni tintsumi ematilweni. Loko va ri vafi ni ku pfuka ka vona, xana a mi hlayanga ta vona ebukwini ya Muxe xana? Loko Xikwembu xi vulavule na yena exihlahleni, xi te: ‘Hi mina Xikwembu xa Abrahama, ni Xikwembu xa Isaka, ni Xikwembu xa Yakobo!’ Xona a hi Xikwembu xa vafi, kambe i Xikwembu xa lava hanyaka.”

Nakambe mintshungu ya hlamarisiwa hi nhlamulo ya Yesu. Hambi va ri van’wana va vatsari va pfumela va ku: “Mudyondzisi, u vulavule swinene.”

Loko Vafarisi va vona leswaku Yesu u miyete Vasaduki, va ta eka yena hi ntlawa wu ri wun’we. Ku n’wi ringa ku ya emahlweni, un’wana wa vona wa vutisa: “Mudyondzisi, xana nawu lowukulu eMilawini hi wihi xana?”

Yesu u hlamula a ku: “Nawu lowo rhanga hi lowu nge: ‘Yingisa we Israyele, [Yehova] Xikwembu xa hina, i [Yehova a ri yexe], a ku na [un’wana]. Rhandza [Yehova] Xikwembu xa wena hi mbilu ya wena hinkwayo, ni moya wa wena hinkwawo, ni ku anakanya ka wena hinkwako, ni matimba ya wena hinkwawo.’ Nawu wa vumbirhi hi lowu nge: ‘Rhandza munhu-kuloni, kukota loko u tirhandza.’ A ku na nawu wun’wana lowu tlulaka milawu yoleyo.” Entiyisweni, Yesu u engeta a ku: “Milawu lemimbirhi leyi yi katsa Milawu hinkwayo ni marito ya Vaprofeta.”

Mutsari a ku ka yena: ‘Mudyondzisi, u vule ntiyiso loko u te: “I Xin’we, naswona a ku na xin’wana handle ka Xona naswona ku xi rhandza hi mbilu hinkwayo, ni ku anakanya hinkwako, ni matimba hinkwawo, swin’we ni ku rhandza munhu-kulobye, tanihi loko munhu a tirhandza, swi tlula magandzelo hinkwawo lama hisiwaka ni timhamba hinkwato.”’

Hi ku vona leswaku mutsari u hlamule hi vutlhari, Yesu a ku ka yena: “A wu le kule ni Mfumo wa Xikwembu.”

Sweswi ku ringana masiku manharhu—Sonto, Musumbunuku ni Ravumbirhi—Yesu a a dyondzisa etempeleni. Vanhu va n’wi yingisele hi ntsako, kambe varhangeri va vukhongeri lava hlundzukeke va lava ku n’wi dlaya. Matewu 22:15-40; Marka 12:13-34; Luka 20:20-40.

◆ I makungu wahi lawa Vafarisi va ma bohaka yo phasa Yesu, naswona ku ta humelela yini loko o nyika nhlamulo leyi nge ina kumbe e-e?

◆ Yesu nakambe u yi hlurise ku yini miringo ya Vasaduki yo n’wi phasa?

◆ Hi wahi matshalatshala man’wana lawa Vafarisi va ma endlaka ku ringa Yesu, naswona vuyelo hi byihi?

◆ Enkarhini wa vutirheli bya yena byo hetelela eYerusalema, i masiku mangani lawa Yesu a dyondziseke etempeleni ha wona naswona hi vuyelo byihi?