Va Endla Leswi Va Nga Swi Kotaka

Hambi leswi va nga swi kotiki ku hakela Yehova hikwalaho ka hinkwaswo leswi yena a va pfunaka ha swona, vo tala va endla leswi va nga swi kotaka ku seketela ntirho wo chumayela wa misava hinkwayo wa Timbhoni ta yena. (Matewu 24:14; ringanisa Marka 14:3-9.) Lexi tsakisaka emhakeni leyi i papila leri ri humaka eka ndyangu wa le Minnesota, U.S.A.:

“Eka Vamakwerhu,

“Hi rhumela munyikelo hi ntsengo wa $——. Hi kombela leswaku wu tirhiseriwa ku hakelela ntirho wa misava hinkwayo kumbe wu tirhisiwa eka Nkwama Wa Ku Akiwa Ka Tiholo Ta Mfumo, kumbe eka xilaveko xihi na xihi lexi nhlengeletano yi nga ha vaka na xona. . . .

“Ha tiyiseka leswaku mali leyi yi ta tirhisiwa hi ku twanana ni ku rhandza ka [Yehova]. Hi tsakela ku tirhisa nkarhi lowu ku nyikela xikhutazo xa hina ku yisa ntirho lowu lowunene emahlweni, naswona ngopfu-ngopfu hi nkhensa thepi ya “video” ya mintirho ya misava hinkwayo ya Sosayiti ya [Watch Tower]. I thepi leyi, leyi yi hi endleke hi xalamukela vukulu bya ntirho, naswona swi endle hi swi vona leswaku minyikelo ya hina yo tirhandzela ya laveka. Khale, a hi tshika bandlha, xifundza, ni muganga leswaku swi vonana ni ku rhumela minyikelo eka n’wina, kambe sweswi hi nkhensa Yehova leswi a hi lehiseleke mbilu eka langutelo ra hina ro koma ivi hi rirhandzu a hi komba xilaveko xa hina xa munhu hi xiyexe xo pfuneta ku hakelela ntirho lowu wo ponisa vutomi, ku engetela eka swivumbeko swin’wana swa minyikelo. Hi ndyangu, hi kunguhata ku rhumela, ntsengo wa $—— hi n’hweti . . . leyi yaka le New York hi ku kongoma.

“Nakambe, hi nkhensa mpfuno lowunene lowu mi veke na wona eka hina ni vutshembeki eka Yehova lebyi mi byi kombiseke.”