Ku Tikhoma Ka N’wina A Ku Kule Naswona Ku Nga Heli

“Seketela ku pfumela ka [wena] hi ku tikhoma.”—2 PETRO 1:5, 6.

1. Hi le ka xiyimo xihi lexi nga tolovelekangiki lexi Mukreste a nga nyikelaka vumbhoni eka xona?

YESU u te: “Mi ta yisiwa emahlweni ka tindhuna ni le mahlweni ka tihosi hikwalaho ka mina, leswaku mi humesa vumbhoni eka vona.” (Matewu 10:18) Loko wo vitiwa ku ya vonana ni ndhuna, muavanyisi, kumbe muungameri, a a wu ta vulavula ha yini ke? Kumbexana xo sungula a ku ta va lexi ku tiseke kwalaho, ku nga lexi u hehleriwaka xona. Moya wa Xikwembu a wu ta ku pfuna leswaku u vulavula sweswo. (Luka 12:11, 12) Kambe tiehlekete u vulavula hi ku tikhoma? Xana sweswo u swi vona swi ri xiphemu xa nkoka xa rungula ra hina ra Vukreste?

2, 3. (a) Xana swi endlekise ku yini leswaku Pawulo a nyikela vumbhoni eka Felikisi na Drusila? (b) Ha yini ku tikhoma ku ri mhaka leyi fanelaka kahle yo va Pawulo a vulavule ha yona exiyin’weni xexo?

² Xiya xikombiso xa leswi endlekeke hakunene. Un’wana wa timbhoni ta Yehovha u khomiwile ivi a ya tengisiwa. Loko a nyikiwa nkarhi wo vulavula, u lave ku hlamusela leswi a a pfumela eka swona tanihi Mukreste, tanihi mbhoni. Loko u kambisisa rhekhodo ya kona u ta kuma leswaku u nyikele vumbhoni lebyi ku laviwaka byona etihubyeni “hi ta ku lulama, ni ta ku tikhoma, ni ta ku avanyisiwa loku nga ta ta.” Hi vulavula hi ntokoto wa muapostola Pawulo eKhezariya. A ku ri ni nkonaniso wo sungula. “Loko ku hundzile masiku ma nga ri mangani, Felikisi a ta a ri na Drusila, nsati wa yena loyi a a ri Muyuda; kuteloko a vitanile Pawulo, a n’wi yingisela loko a vulavula hi ta ku pfumela eka Kriste Yesu.” (Mintirho 24:24) Matimu ma vika leswaku Felikisi “a a endla mixaka hinkwayo ya tihanyi ni makolo, naswona a a tirhisa matimba ya vuhosi tanihi hlonga.” Se a teke kambirhi emahlweni ko va a kucetele Drusila ku tshika nuna wakwe (a onha nawu wa Xikwembu) a va nsati wa yena wa vunharhu. Kumbexana i nsati loyi la laveke ku twa ta vukhongeri lebyintshwa, Vukreste.

³ Pawulo u ye emahlweni a vulavula “hi ta ku lulama, ni ta ku tikhoma, ni ta ku avanyisiwa loku nga ta ta.” (Mintirho 24:25) Leswi a swi ta veka erivaleni ku hambana ka mimpimanyeto ya Xikwembu ya ku lulama ni tihanyi swin’we ni ku avanyisa hi nsele loku Felikisi na Drusila a va ri na kona. Pawulo a nga ha va a lave ku endla leswaku Felikisi a kombisa vululami emhakeni leyi a va tlhuvutsana na yona. Kambe ha yini a khumbe “ku tikhoma, ni ta ku avanyisa loku nga ta ta”? Mpatswa lowu wo homboloka a wu vutisa leswi “ku pfumela eka Kriste Yesu” ku lavaka swona. Kutani a va fanele va swi tiva leswaku ku landzela yena swi lava leswaku munhu a lawula mianakanyo, ni mavulavulelo, ni swiendlo swakwe, ku nga leswi ku tikhoma swi vulaka swona. Vanhu hinkwavo va ta tihlamulela eka Xikwembu hi leswi va swi anakanyaka, ni leswi va swi vulavulaka ni leswi va swi endlaka. Xisweswo, lexi nga xa nkoka ku tlula ku avanyisa hinkwako loku a ku endliwa hi Felikisi emhakeni ya Pawulo, a a ku ri ku avanyisa loku mufumi loyi ni nkatakwe va langutaneke na kona, loku humaka eka Xikwembu. (Mintirho 17:30, 31; Varhoma 14:10-12) Hi laha ku twisisekaka, loko a twe rungula ra Pawulo, “Felikisi a khomiwa hi ku chava.”

I Swa Nkoka Kambe A Swi Olovi

4. Ha yini ku tikhoma ku ri xiphemu xa nkoka xa Vukreste bya ntiyiso?

⁴ Muapostola Pawulo u vone ku tikhoma ku ri xiphemu xa risima xa Vukreste. Muapostola Petro, un’wana wa vanghana lavakulu va Yesu, u swi tiyisekisile leswi. Loko a tsalela lava a ‘va ta va ni xiphemu xa ku va ni xiyimo xa vukwembu’ etilweni, Petro u khutaze ku kombisa timfanelo tin’wana leti a ti ri ta nkoka, tanihi ripfumelo, rirhandzu, ni ku tikhoma. Hikwalaho, ku tikhoma a ku katseka eka xitiyisekiso lexi nge: “Loko mi ri ni swilo leswi, ni loko swi mi talela swi andza, swi ta endla leswaku mi nga phyami kumbe ku pfumala mihandzu, kutani swi ta mi fikisa eku tiveni loku hetisekeke ka Hosi ya hina Yesu Kriste.”—2 Petro 1:1, 4-8.

5. Ha yini hi fanele ngopfu-ngopfu hi tikarhatela ku tikhoma?

⁵ Hambi swi ri tano, ma swi tiva leswaku swa olova ku vula leswaku hi fanele hi kombisa ku tikhoma ku tlula ku swi endla hi xiviri evuton’wini bya hina bya siku ni siku. Xivangelo xin’wana hi leswaku ku tikhoma ka kala. Eka 2 Timotiya 3:1-5 Pawulo u hlamusela swiyimo leswi a swi ta va kona enkarhini wa hina, “emasikwini ya makumu.” Mukhuva wun’wana lowu a wu ta fungha nguva ya hina hi leswaku lavanyingi a va ta va lava nga ‘kotiki ku tikhoma.’ Leswi ha swi vona swi endleka hinkwako lomu hi nga kona, xana a swi tano?

6. Xana ku tsandzeka ku tikhoma ku vonaka njhani namuntlha?

⁶ Vanhu vo tala va kholwa leswaku i swinene ngopfu ku “kalakala” kumbe ku “tlatlarhuka.” Mavonelo ya vona ma vangiwa hi vamakomba-ndlela va vona lava dumeke ngopfu, lava vonakaka va ri lava honisaka ku tikhoma ka muxaka wun’wana ni wun’wana, lava lavaka ku enerisa minsusumeto ya vona. Hi xikombiso: Vo tala lava rhandzaka mintlango ya ndhuma va kule va tolovele ku kombisa mintlhaveko hi ndlela ya vuharhi, ni ya vukarhi lebyikulu. Xana a wu swi tsundzuki swiendlakalo leswi u swi voneke, hambi ku ri eka phepha-hungu, swa nyimpi ya tihanyi kumbe ku mpfhumpfha ka ntshungu emintlangweni? Hambi swi ri tano, xin’wana hi leswaku a swi laveki hi heta nkarhi wo tala hi ri karhi hi pfuxeta swikombiso swa ku pfumala ku tikhoma. U nga vula swivandla swo tala leswi hi fanelaka ku kombisa ku tikhoma eka swona—ku dya ni ku nwa ka hina, ku tikhoma ka hina loko hi ri ni va rimbewu leri hambaneke, swin’we ni nkarhi ni mali leyi hi yi hetaka hi ku titsakisa. Kambe ematshan’wini yo khumbanyana swo tala swa swivandla swo tano, a hi kambisiseni xivandla xin’wana lexikulu lexi hi fanelaka ku kombisa ku tikhoma eka xona.

Ku Tikhoma Malunghana Ni Mintlhaveko Ya Hina

7. I xiphemu xihi xa ku tikhoma lexi faneriwaka hi ku xiyisisiwa?

⁷ Vo tala va hina ha swi kota swinene ku fuma kumbe ku lawula mintirho ya hina. A hi yivi, a hi oswi naswona a hi dlayi; ha swi tiva leswaku nawu wa Xikwembu wu ri yini hi vubihi byo tano. Hambi swi tano, xana hi swi kotisa ku yini ku lawula mintlhaveko ya hina? Hi ku famba ka nkarhi, lava va tsandzekaka ku hlakulela ku lawula mintlhaveko ya vona va tala ku tsandzeka ku tikhoma ni le mintirhweni ya vona. Kutani a hi kambisiseni mintlhaveko ya hina.

8. Xana Yehovha u langutele yini mayelana ni mintlhaveko ya hina?

⁸ Yehovha Xikwembu a nga rindzelanga swona leswaku hi fana ni tirhoboto, lerova hi nga vi na mintlhaveko kumbe hi nga ha koti ku kombisa mintlhaveko yin’wana ni yin’wana. Esirheni ra Lazaro, Yesu u “tlhavek[e] swinene emoyeni ni ku twa ku vaviseka lokukulu.” Kutani “Yesu a rila.” (Yohane 11:32-38) U kombise mintlhaveko yo hambana ngopfu ni ya loko a hlongola vaxavisi etempeleni, laha a lawula swiendlo swakwe hi ku hetiseka. (Matewu 21:12, 13; Yohane 2:14-17) Vadyondzisiwa vakwe vo tshembeka na vona va kombise mintlhaveko leyi enteke. (Luka 10:17; 24:41; Yohane 16:20-22; Mintirho 11:23; 12:12-14; 20:36-38; 3 Yohane 4) Hambi swi ri tano, va vone xilaveko xa ku tikhoma leswaku mintlhaveko ya vona yi nga va yisi eku dyoheni. Vaefesa 4:26 yi swi andlala kahle leswi, yi ku: “Loko mi tshuka mi hlundzuka, mi nga weli eku dyoheni; dyambu ri nga tshuki ri pela ma ha hlundzukile.”

9. Ha yini swi ri swa nkoka ku lawula mintlhaveko ya hina?

⁹ Ku ni khombo ra leswaku Mukreste a vonaka onge u kombisa ku tikhoma kasi, kahle-kahle, mintlhaveko yakwe a yi lawuleki. Tsundzuka n’wangulo wa loko Xikwembu xi amukela gandzelo ra Avele leri hisiweke: “Kayin a kariha ngopfu, ni mombo wa yena wu khanyana. Kutani Yehova a byela Kayin, a ku: Šana u karihela yini, ni mombo wa wena wu khanyana ha yini? Loko u endla [le]ŝinene, šana a u nga ti nkhensiwa šana? Kambe loko u nga endli [le]ŝinene, v̌udyoho byi ṭhamile nyangweni; ku nav̌ela ka byona ku ta ku wonga.” (Genesa 4:5-7) Kayini u tsandzekile ku lawula mintlhaveko yakwe, laha yi nga n’wi vangela ku dlaya Avele. Mintlhaveko leyi nga lawuriwiki yi vanga swiendlo leswi nga lawulekiki.

10. Xana u dyondza yini eka xikombiso xa Hamani?

¹⁰ Nakambe, xiya xikombiso xa le minkarhini ya Mordekayi na Estere. Ndhuna leyi a va ku i Hamani yi karihile hikwalaho ka leswi Mordekayi a nga n’wi losangiki. Endzhaku, hi xihoxo Hamani u ehlekete leswaku u ta xiximiwa. “Hi siku rolero, Haman a huma a ṭakile mbilwini ya yena, a tikorisile; kambe kaku loko Haman a v̌ona Mordekai a ri emahlweni ka nyangwa ya hosi, a nga yimanga ku ṅwi [komba xichavo, NW], a karihela Mordekai. Kambe Haman a tikhoma; kutani [a ya ekaya ka yena].” (Estere 5:9, 10) A a hatlisa ku nyanyuka. Kambe a kota ku hatlisa a kariha hi ku vona ntsena munhu loyi a n’wi khomeke hi mbilu. Xana u ehleketa leswaku loko Bibele yi ku Hamani “a tikhoma” yi vula leswaku a ri xikombiso lexinene xa ku tikhoma? Doo. Hamani u lawule swiendlo ni ku kombisa mintlhaveko yihi ni yihi swa nkarhinyana, kambe u tsandzekile ku lawula vukarhi bya yena bya mavondzo. Mintlhaveko yakwe yi n’wi lukise mano yo dlaya.

11. Evandlheni ra le Filipiya, ku ve ni xiphiqo xihi, naswona i yini lexi nga vaka xi vange sweswo?

¹¹ Hi ku fanana, ku tsandzeka ku lawula mintlhaveko swi nga vavisa ngopfu Vakreste namuntlha. Van’wana va nga ha ku: ‘Ha, leswi swi nge vi xiphiqo evandlheni.’ Kambe swi tshame swi va tano. Vakreste vambirhi lava totiweke va le Filipiya va ve ni njhekanjhekisano lowukulu lowu Bibele yi nga wu hlamuseriki. Ehleketa leswi onge hi leswi nga humelela: Efodiya u rhambe vamakwavo van’wana va xinuna ni va xisati eswakudyeni kumbe exinkhubyanini xo titsakisa. Sintika a a nga rhambiwanga, kutani swi n’wi khunguvanyisile. Kumbexana u tlherisele hi ku ka a nga rhambi Efodiya exinkhubyanini lexi landzeleke. Kutani havambirhi va sungule ku vonana nandzu; eku heteleleni, a va nga ha vulavurisani. Eka xiendlakalo xo tano, xana xiphiqo lexikulu i ku ka un’wana a nga rhambiwanga eswakudyeni? Doo. Sweswo a swi to va nhlahle ntsena. Loko vamakwerhu lava va totiweke va tsandzeke ku lawula mintlhaveko ya vona, nhlahle yi hundzuke ndzilo lowukulu. Xiphiqo xexo xi tame xi kula ku fikela laha muapostola a bohekeke ku nghenelela.—Vafilipiya 4:2, 3.

Mintlhaveko Ya Wena Ni Vamakwenu

12. Ha yini Xikwembu xi hi nyika ndzayo leyi nga eka Eklesiasta 7:9?

¹² I ntiyiso, a swi olovi ku lawula mintlhaveko loko u vona va ku bakanyela etlhelo, va ku khunguvanyisa, kumbe va ku komba xihlawuhlawu. Yehovha wa swi tiva sweswo, hikuva u xiye ndlela leyi vanhu va khomanaka ha yona ku sukela eku tumbuluxiweni ka munhu. Xikwembu xa hi laya: “U nga ṭhuki u hatlisa ku kariha e mbilwini ya wena, hikuv̌a v̌ukari byi salela e šifuv̌eni ša šihunguki.” (Eklesiasta 7:9) Xiya leswaku Xikwembu xi languta mintlhaveko ku sungula hayi swiendlo. (Swivuriso 14:17; 16:32; Yakobo 1:19) Tivutise, ‘Xana ndzi fanele ndzi tikarhatela ngopfu ku lawula mintlhaveko ya mina?’

13, 14. (a) Emisaveni, i yini lexi talaka ku humelela hikwalaho ko tsandzeka ku lawula mintlhaveko? (b) I swilo swihi leswi nga ha vangelaka Vakreste ku va ni xikhomela?

¹³ Vanhu lavanyingi lava tsandzekaka ku lawula mintlhaveko ya vona emisaveni, va sungula timholovo—rivengo, hambi madzolongo, ni ku lwa hi nchumu lowu endlekeke kumbe lowu ngo kumbeteriwa hi vona kumbe xaka. Loko mintlhaveko yi kala yi nga ha lawuleki, yi pfurhetela nhlonhlotelo wa vona wo biha wu nga heli. (Ringanisa Genesa 34:1-7, 25-27; 49:5-7; 2 Samuwele 2:17-23; 3:23-30; Swivuriso 26:24-26.) Entiyisweni Vakreste, ku nga khathariseki leswaku i va rixaka rihi kumbe ndhavuko wihi, va fanele va languta nsele ni xikhomela xo tano swi ri leswi hoxeke, swi ri swo biha, ni leswi fanelaka ku papalatiwa. (Levhitika 19:17) Xana u languta ku papalata lunya tanihi xiphemu xa ku tikhoma malunghana ni mintlhaveko?

¹⁴ Ku fana ni le mhakeni ya Efodiya na Sintika, ku tsandzeka ku lawula mintlhaveko swi nga vanga swiphiqo sweswi. Makwerhu wa xisati a nga titwa a bakanyeriwe etlhelo loko a nga rhambiwanga enkhubyeni wa vukati. Kumbexana ku nga va ku ri n’wanakwe kumbe makwavo la nga rhambiwangiki. Kumbexana makwerhu wa xinuna u xave movha eka Mukreste-kulobye, naswona ku nga ri kungani wu fa. Ku nga khathariseki leswaku wu onhiwe hi yini, leswi swi twisa ku vava, naswona loko mintlhaveko yi nga lawuriwi, lava va khumbekaka va hlundzuka. Kutani ku endleka yini ke?

15. (a) I vuyelo byihi lebyi vavisaka lebyi veke kona hikwalaho ka xikhomela exikarhi ka Vakreste? (b) Hi yihi ndzayo ya Bibele leyi vulavulaka hi mukhuva wo va ni xikhomela?

¹⁵ Loko munhu la hlundzukeke a nga lweli ku lawula mintlhaveko ni ku kondletela ku rhula ni makwavo wakwe, xikhomela xi ta sungula. Ku ve ni swiyimo laha Mbhoni yi nga kombela ku ka yi nga averiwi eka Dyondzo yo karhi ya Buku ya Vandlha hikwalaho ka leswi “a yi nga lavi ku vonana” ni Mukreste kumbe ndyangu wun’wana lowu hlanganyelaka kwalaho. Swi twisa ku vava swonghasi! Bibele yi ri loko Vakreste vo yisana etihubyeni ta misava va ta va va kombisa leswaku a va vupfanga, kambe xana hi ta va hi nga kombisi leswaku a hi vupfanga hi ndlela leyi fanaka loko hi papalata makwerhu loyi a hi hlundzukiseke kumbe ku hlundzukisa xaka ra hina? Xana mintlhaveko ya hina yi kombisa leswaku hi rhangisa vuxaka bya ku tswalana ku ri ni ku hlanganyetela ku rhula ni vamakwerhu va moya? Xana ha vula leswaku hi nga tiyimisela ku fela makwerhu wa xisati, kambe mintlhaveko ya hina yi hi susumetela ku ka hi nga ha vulavurisani na yena sweswi? (Ringanisa Yohane 15:13.) Xikwembu xi hi byela hi ku kongoma: “Mi nga rihiseli swo biha hi leswo biha. . . . Endlani hinkwaswo leswi mi swi kotaka, hi tlhelo ra n’wina, ku hanyisana ni vanhu hinkwavo hi ku rhula. Varhandziwa, mi nga tshuki mi tirihisela mi ri n’wina; kambe kendlukelani vukari.”—Varhoma 12:17-19; 1 Vakorinto 6:7.

16. Abrahama u veke xikombiso xihi lexinene mayelana ni ku langutana ni mintlhaveko?

¹⁶ Goza ra leswaku hi kota ku lawula mintlhaveko ya hina i ku kondletela ku rhula kumbe ku lulamisa lexi vangaka hi vilela, ku nga ri ku tshika rivengo ri ya emahlweni. Tsundzuka loko madyelo ma nga ha swi koti ku hlayisa mintlhambi leyikulu ya Abrahama swin’we ni ya Lota, kutani varisi va vona lava thoriweke va sungula ku holova. Xana Abrahama u tshike mintlhaveko yakwe yi n’wi lawula? Kumbe u kombise ku tikhoma ke? Lexi nkhensekaka, u ringanyete rimitsu ro herisa ku lwetana hi madyelo; un’wana ni un’wana a tikumele ndhawu yakwe etlhelweni. Kutani u pfumelele Lota ku rhanga a langa. Lexi kombaka leswaku Abrahama a a nga hlundzukanga ni leswaku a a nga ri na xikhomela, endzhaku u hume nyimpi ku ya lamula Lota.—Genesa 13:5-12; 14:13-16.

17. Xana Pawulo na Barnaba va tsandzeke njhani ku lulamisa xiphiqo xin’wana, kambe ku landzele yini endzhakunyana ka sweswo?

¹⁷ Nakambe hi nga dyondza ku tikhoma eka xiendlakalo lexi katsaka Pawulo na Barnaba. Endzhaku ko va va ve vanakulobye malembe yo hlayanyana, va kwetlembetanile hi mhaka ya leswaku va famba na Marka kumbe va nga fambi na yena. “Kutani ku humelela mholovo exikarhi ka vona, va kondza va avana; Barnaba a teka Marka, a ya eKipra hi ngalava.” (Mintirho 15:39) Mhaka ya leswaku vavanuna lava vo wupfa va tsandzeke ku lawula mintlhaveko ya vona exiendlakalweni xexo yi fanele yi va xitsundzuxo eka hina. Loko swi endlekile eka vona, swi nga endleka ni le ka hina. Hambi swi ri tano, a va pfumelanga leswaku ku tshama ku ri ni rihlampfu exikarhi ka vona kumbe leswaku ku kula timholovo. Rhekhodo yi komba leswaku vamakwerhu lava va tlhele va lawula mintlhaveko ya vona naswona endzhaku va tirhe swin’we hi ku rhula.—Vakolosa 4:10; 2 Timotiya 4:11.

18. Loko Mukreste la wupfeke a khunguvanyisiwile, xana a nga endla yini?

¹⁸ Hi nga ha rindzela leswaku swikhunguvanyiso ni rivengo swi nga ha va kona exikarhi ka vanhu va Xikwembu. A swi ri kona eminkarhini ya Vaheveru ni le masikwini ya vaapostola. Nakambe swi humelerile eka malandza ya Yehovha enkarhini wa hina, hikuva hikwerhu a hi hetisekanga. (Yakobo 3:2) Yesu u khongotele valandzeri vakwe ku hatla va lulamisa swiphiqo swo tano exikarhi ka vamakwavo. (Matewu 5:23-25) Kambe swa antswa ku rhanga hi ku swi sivela hi ku antswisa ku tikhoma ka hina. Loko u tivona u bakanyeriwa etlhelo kumbe u khunguvanyisiwa hi nchumunyana wutsongo lowu vuriweke kumbe wu endliweke hi makwenu, ha yini u nga lawuli mintlhaveko ya wena u rivala ha swona? Xana i swa nkoka hakunene ku vonana ni munhu wa kona, onge hi loko u ta ka u nga eneriseki ku kondza yena a pfumela leswaku u hoxile? Xana u yi lawula ku fikela kwihi mintlhaveko ya wena ke?

Swa Koteka!

19. Ha yini swi fanela leswaku mhaka ya hina yi khumba ngopfu ku lawula mintlhaveko ya hina?

¹⁹ Hi kambisise xiphemu xin’we xa ku tikhoma, ku nga ku lawula mintlhaveko ya hina. Xexo i xiphemu lexikulu hikuva ku tsandzeka ku lawula mintlhaveko ya hina swi nga vanga ku tsandzeka ku lawula ririmi ra hina, minsusumeto ya hina ya rimbewu, ndlela leyi hi dyaka ha yona ni swilo swin’wana leswinyingi swa vutomi, leswi hi fanelaka ku kombisa ku tikhoma eka swona. (1 Vakorinto 7:8, 9; Yakobo 3:5-10) Hambi swi ri tano, tiya nhlana, hikuva u nga swi kota ku hlayisa ku tikhoma.

20. Hi nga tiyiseka njhani leswaku ku antswisa swa koteka?

²⁰ Yehovha wa swi rhandza ku hi pfuna. Xana hi nga tiyiseka njhani? Phela, ku tikhoma i wun’wana wa mihandzu ya moya. (Vagalatiya 5:22, 23) Xisweswo, hi ku landza ndlela leyi hi tirhaka swinene ha yona leswaku hi fanelekela moya lowo kwetsima lowu humaka eka Yehovha ni ku wu kuma swin’we ni ku kombisa mihandzu ya wona, hi ta rindzela ku tikhoma swinene hi ndlela leyi fanaka. Hi nga rivali xitiyisekiso xa Yesu: ‘Tatana la nge matilweni u ta nyika moya wo kwetsima eka lava va wu kombelaka eka yena!’—Luka 11:13; 1 Yohane 5:14, 15.

21. Xana u tiyimisele ku endla yini enkarhini lowu taka mayelana ni ku tikhoma ni mintlhaveko ya wena?

²¹ U nga ehleketi leswaku swi ta olova. Naswona swi nga ha nonon’hwa eka van’wana lava kuleleke evanhwini lava va phyaphyarhaka va nga lawuli mintlhaveko ya vona, ni le ka lava hatlisaka ku nyanyuka, kumbe eka van’wana lava ni ku ringeta va nga ringetiki leswaku va kombisa ku tikhoma. Eka Mukreste wo tano, ku va ni ku tikhoma loku nga heriki swi nga va ntirho lowukulu. Kambe swa koteka. (1 Vakorinto 9:24-27) Loko hi ya hi tshinelela makumu ya mafambiselo lawa ya swilo, gome ni ntshikilelo swi ta andza. A hi nge lavi ku tikhoma lokutsongo kambe hi ta lava lokukulu swinene! Kambisisa ku tikhoma ka wena. Loko u vona swivandla swin’wana leswi u fanelaka ku swi antswisa, swi antswise. (Pisalema 139:23, 24) Kombela Xikwembu xi ku nyika moya wa xona lowu engetelekeke. Xi ta ku twa naswona xi ta ku pfuna leswaku u va ni ku tikhoma loku nga heriki.—2 Petro 1:5-8.

Tinhla Leti Nga Tsundzukiwaka

◻ Ha yini swi hlawulekile ku lawula mintlhaveko ya hina?

◻ U dyondze yini eka swikombiso swa Hamani na Efodiya na Sintika?

◻ I yini leswi wena u nga ta ringeta ku swi endla hakunene loko ku va ni xikhunguvanyiso?

◻ Ku tikhoma ku nga ku pfuna hi ndlela yihi leswaku u papalata ku va ni xikhomela eka munhu wo karhi?

[Xifaniso lexi nga eka tluka 18]

Loko a ri emahlweni ka Felikisi na Drusila, Pawulo u vulavule hi ku lulama ni ku tikhoma