Kereke Leyi Avaneke—Xana Yi Avane Ku Fikela Kwihi?

“KU FANA ni ndyangu lowukulu, lowu nga ni minkitsikitsi, lowu tshamaka endlwini ya khale swinene leyi nga ha mbindzimukaka rini na rini, leyi khumbi ra yona ra le mahlweni ra ha ku waka, eka kamara ra yona rin’wana ni rin’wana ku tikomba ku ri na nyimpi leyikulu—vana va Yesu va ri karhi va ba swingomana va holovela vasodoma lava xiximiwaka va Anglo-Catholic lava ambaleke tisudu ta silika ta ntima.”—The Sunday Times, London, April 11, 1993.

Ndyangu lowu i Kereke ya le Nghilandhi. Pongo leri ri vangiwa hi ku pfumeleriwa ka vavasati leswaku va va vaprista. Mpfilumpfilu lowu hlamuseriweke hi ku kongoma laha henhla, wa ku avana lokukulu, wa fana ni lowu nga le Vujaganini hinkwabyo. Leswi vapatriarka va Kereke ya Orthodox ni mupapa, va solaka xiboho xo pfumelela vavasati leswaku va va vaprista, vuyelo bya kona, hi ku ya hi xiviko xin’wana, hi leswaku “mianakanyo ya leswaku yi va nyandza yin’we ni Vujagana hinkwabyo, a ya ha ri na matimba ku fana ni le ku sunguleni.”

Xana Kereke Yi Avane Ku Fikela Kwihi?

Loko hi hlaya eka Matewu 7:21, Yesu Kreste u vule leswaku vo tala va ta vula leswaku va pfumela eka yena tanihi Hosi kambe va tama va tsandzeka ku ‘endla ku rhandza ka Tata wakwe.’ Magazini lowu nge Maclean’s wu ri: “Leswi Vakreste ni tikereke ta vona va hambanaka swinene swonghasi emhakeni ya leswaku ku rhandza ka Xikwembu kahle-kahle i yini, vanhu lava hlayaka Matewu hi ku lava ku pona, va nga khomeriwa loko va pfilunganyeka emhakeni leyi.” Nkambisiso lowu endliweke exikarhi ka Mucanada, wu gimeta hi leswaku ku na “ku hambana lokukulu exikarhi ka tidyondzo ni mikhuva ya Vakreste va le Canada—kahle-kahle ku ni ku hambana lokukulu exikarhi ka swirho swa ntlawa wihi na wihi, ku tlula ku hambana loku nga kona exikarhi ka mintlawa hi yoxe.”

Hi ku ya hi nkambisiso wa yona, tiphesete ta 91 ta Makhatoliki ti pfumelelana na kona ku kunguhata ndyangu hi ku tirhisa mirhi, hambi leswi kereke yi lwisanaka na swona; tiphesente ta 78 ti anakanya leswaku vavasati va fanele va pfumeleriwa ku va vaprista; naswona tiphesente ta 41 ta swi amukela ku susa khwiri “ehansi ka swiyimo swokarhi.” Ku avana loku nga kona exikarhi ka mintlawa yo hambana-hambana eka “timhaka to tala ta vukhongeri,” hi ku ya hi Maclean’s “swi kombisa ku hambana loku nga kona exikarhi ka tikereke-nkulu.”

Milawu Leyi Cincacincaka

Ku ni milawu leyi cincacincaka ya mahanyelo ni mimpimanyeto ya mahanyelo leyi lwisanaka. Vanhu van’wana va vula leswaku va seketela misinya ya milawu ya Bibele, kambe van’wana va yi sandza. Hi xikombiso, xana nkhuvo wa “vukati” lowu endleriweke vavasati vambirhi le Kerekeni ya Metropolitan ya le Toronto, wu pfumelelana ni ku rhandza ka Xikwembu? Swi le rivaleni leswaku vini va swona a va anakanya tano. Va te: “Hi lava ku kombisa rirhandzu ra hina emahlweni ka vanhu ni le mahlweni ka Xikwembu.”

Mutsari un’wana wa phepha-hungu u vutisile leswaku swi tisa ku yini leswaku “bixopo-nkulu wa Khatoliki, loyi se a kumeke swivilelo swonghasi, a tama a ha yisa vaprista lava endlaka rimbewu ni swifanyetana eka kereke yin’wana, laha na kona ku nga ni swifanyetana leswi hlayisiwaka hi kereke.” Muprista Andrew Greeley u ringanyeta leswaku vaprista vo sukela eka 2 000 ku ya eka 4 000 swi nga ha endleka va pfinye vana vo ringana 100 000 lava ha riki vatsongo, naswona minkarhi yo tala a ku endliwi nchumu ha swona.

Kereke leyi avaneke yi humesa vanhu lava avaneke. Le Matikweni ya Balkan, “Vakreste” lava va nga Maserbia ni va le Macroati, va vona onge Kreste wa va seketela eka nyimpi ya vona yo “lulama.” Vo tala va hakarha swihambano loko va ri enyimpini; un’wana ku vikiwaka leswaku “minkarhi hinkwayo a a luma xihambano xa yena hi nomu loko nyimpi yi hisa.”

“Ku Nga Tshuki Ku Va Ni Ku Avana Exikarhi Ka N’wina”

Ina, timhaka tin’wana Bibele yi ti siyela ripfalo ra munhu, kambe leswi a swi vuli swona leswaku ku fanele ku va ni ku avana konghasi. Muapostola Pawulo u swi veke kahle erivaleni a ku: “Twananani hinkwenu eku vulavuleni [ni le swiendlweni]. Ku nga tshuki ku va ni ku avana exikarhi ka n’wina.”—1 Vakorinto 1:10; Vaefesa 4:15, 16.

Nkambisiso wa vukheta wa “Vukreste” endzhaku ka malembe ya kwalomu ka magidi mambirhi muapostola Pawulo a tsale marito lawa, wu tlakusa swivutiso swa nkoka swinene. Hikwalaho ka yini “Vakreste” va avane swonghasi? Xana kereke yo avana hi mikhuva lowu yi ta tlhaveriwa hi dyambu? Xana byi ta kala byi va kona Vujagana lebyi nga ni vun’we? Xihloko lexi landzelaka xi ta hlamula swivutiso leswi.

[Xifaniso lexi nga eka tluka 3]

Ku vilela ka vaprista lava lwisanaka ni ku xixa nyimba

[Xihlovo Xa Kona]

Cover and above: Eleftherios/Sipa Press