“A Ndzi Si Tshama Ndzi Vona Swo Fana Ni Leswi!”

HI 1993, rhavi ra hofisi ra Sosayiti ya Watch Tower ra le Argentina ri komberiwe ku rhumela vapfhumba va gidi le Santiago, eChile, eka Ntsombano wa Muganga wa masiku ya mune wa “Dyondzo ya Xikwembu” wa Timbhoni ta Yehovha. A ku ri ro sungula Timbhoni ta le Argentina ti rhamberiwa ku famba tanihi ntlawa lowukulu ti ya entsombanweni wumbe.a Ti angule njhani? Swikombelo swo tlula 8 500 swi te hi xitalo, laha eka swona ku hlawuriweke vapfhumba va 1 039.

Mabazi lama ringanaka 14 a ma qachiwile leswaku ku fambiwa ha wona eka riendzo leri ra tikhilomitara ta 1 400, ku suka le Buenos Aires ku ya eSantiago. Riendzo leri ra tiawara ta 26 a ri tsakisa hi laha ku engetelekeke hikwalaho ka swivono leswi xiyekaka. Loko va tsemakanya Tintshava ta Andes, vapfhumba va hundze ekusuhi na Aconcagua, leyi nga timitara ta 6 960 ku nga nhlonhlorhi leyi tlakukeke swinene eka Hafu ya Misava ya le Vupela-dyambu. Lexi nga rivalekiki i ndlela yo voyama, yo jikajika leyi yaka eChile. Vachayeri va mabazi va beriwe mavoko hi ku phindha-phindha hikwalaho ka vuswikoti bya vona byo chayela mabazi endleleni leyi yo voyama!

Hambi swi ri tano, xiendlakalo lexi tsakisaka swinene a xi ta va entsombanweni hi woxe. Emisaveni leyi nga ni madzolonga ya tinxaka-nxaka, ni ntshikilelo wa rixaka, swa phyuphyisa swonghasi ku vona ntshungu lowu nga ni vun’we wa vanhu va 80 000 vo huma ematikweni ya 24 wa lava a va ri kona—entiyisweni i vumakwerhu bya misava hinkwayo! Vachayeri van’wana va mabazi va kombise ku tsakela ku dyondza leswi engetelekeke hi Timbhoni ta Yehovha, leswi va nga tivonela hi mahlo ya vona vun’we lebyi nga exikarhi ka vatsombani. Un’wana wa vona u te: “A ndzi si tshama ndzi vona swo fana ni leswi!”

[Nhlamuselo ya le hansi]