Swivutiso Swa Vahlayi

Xana mudyondzisiwa Yakobo a a vula yini loko a ku: “Vamakwerhu, a swi fanelanga leswaku lavo tala exikarhi ka n’wina va hundzuka vadyondzisi, hikuva ma swi tiva leswaku ku avanyisiwa ka hina vadyondzisi, ku ta tika ku tlula ku avanyisiwa ka vanhu lavan’wana”?—Yakobo 3:1.

Kahle-kahle, Yakobo a a nga tshikisi Vakreste ku dyondzisa van’wana ntiyiso. Eka Matewu 28:19, 20, Yesu u lerise vadyondzisiwa va yena leswaku “eka vamatiko hinkwavo, . . . va endla [vanhu, NW] vadyondzisiwa . . . , [va] va dyondzisa ku hlayisa hinkwaswo leswi [a va] leriseke swona.” Hikwalaho, Vakreste hinkwavo va fanele va va vadyondzisi. Muapostola Pawulo u tsundzuxe Vakreste va Vaheveru hi mhaka ya leswi a va nga si va vadyondzisi. U tsarile: “Hikuva hambileswi sweswi a mi fanele ku va vadyondzisi, ma ha lava ku dyondzisiwa na kambe tidyondzo to sungula ta Rito ra Xikwembu, hi munhu un’wana.”—Vaheveru 5:12.

Xisweswo, xana Yakobo a a vulavula ha yini? A vulavula hi lava va nga ni malunghelo yo hlawuleka yo dyondzisa evandlheni. Eka Vaefesa 4:11, ha hlaya: “[Yesu Kreste, Nhloko ya vandlha u nyike] van’wana ku va vaapostola, van’wana vaprofeta, van’wana ku va vavuri va Evhangeli, van’wana ku va vafundhisi ni vadyondzisi.” A ku ri ni swikhundlha swo hlawuleka swa ku dyondzisa emavandlheni ya lembe-xidzana ro sungula tanihi laha swi nga ha kona namuntlha. Hi xikombiso, Huvo leyi Fumaka yi yimela “nandza la tshembekaka, wo tlhariha” naswona yi ni vutihlamuleri byo langutela ku dyondzisiwa ka vandlha ra misava hinkwayo. (Matewu 24:45) Valanguteri lava famba-fambaka ni vakulu va le mavandlheni na vona va ni vutihlamuleri byo hlawuleka bya ku dyondzisa.

Xana Yakobo a byela vavanuna lava fanelekaka va Vakreste leswaku va nga wu amukeli ntirho wo dyondzisa leswaku va nga ta weriwa hi ku avanyisa loku tikaka ka Xikwembu? Nikatsongo. Xikhundlha xa ku va nkulu i lunghelo lerikulu, hi laha swi kombisiweke ha kona eka 1 Timotiya 3:1, leyi nge: “Loko munhu a navela ku va mufambisi wa [vandlha, NW], ú navela ntirho lowunene.” Yin’wana ya timfanelo leti lavekaka leswaku munhu a hlawuriwa tanihi nkulu wa vandlha hi leswaku munhu a “kota ku dyondzisa.” (1 Timotiya 3:2) Yakobo a a nga kanetani ni marito lama huhuteriweke ya Pawulo.

Kambe, swi tikomba onge eka lembe-xidzana ro sungula C.E., van’wana a va tiveka tanihi vadyondzisi, hambi loko va nga faneleki naswona va nga hlawuriwanga. Kumbexana, a va vona onge ntirho wolowo wu va endla va va lava tlakukeke, a va tinavelela swikhundlha swa le henhla. (Ringanisa Marka 12:38-40; 1 Timotiya 5:17.) Muapostola Yohane u boxe Diyotrefo, loyi ‘a a rhandza ku kuma ndhawu yo sungula, kambe a nga amukelanga nchumu xo huma eka Yohane hi xichavo.’ (3 Yohane 9, ringanisa NW.) Timotiya wo Sungula 1:7 u vulavula hi van’wana lava a va “navela ku va vadyondzisi va Nawu, kambe va nga twisisi leswi va swi vulaka kumbe timhaka leti va vulaka leswaku va tiyile eka tona.” Marito ya Yakobo 3:1 ma fanela swinene eka vavanuna lava va navelaka ku va vadyondzisi kambe va ri ni nsusumeto lowu hoxeke. Vanhu vo tano va nga wu vavisa swinene ntlhambi, xisweswo va ta avanyisiwa hi ndlela yo tika.—Varhoma 2:17-21; 14:12.

Yakobo 3:1 nakambe i xitsundzuxo lexinene eka lava va fanelekaka naswona va tirhaka tanihi vadyondzisi. Tanihi leswi va byarhisiweke swo tala, ku ta laveka swo tala eka vona. (Luka 12:48) Yesu u te: “Hi siku ra ku avanyisiwa, vanhu va ta tihlamulela eka rito rin’wana ni rin’wana ra hava leri va tshamaka va ri vula.” (Matewu 12:36) Leswi swi tirha swinene eka lava marito ya vona ma nga ni ntikelo lowu engetelekeke, vakulu lava hlawuriweke.

Vakulu va ta tihlamulela hi ndlela leyi va khomaka tinyimpfu ta Yehovha ha yona. (Vaheveru 13:17) Leswi va swi vulaka swi khumba vutomi bya vanhu. Hikwalaho, nkulu u fanele a tivonela leswaku a nga nghenisi vonelo rakwe kumbe a khoma tinyimpfu hi ndlela yo biha hi laha Vafarisi va endleke ha kona. U fanele a lwela ku kombisa rirhandzu lerikulu leri Yesu a a ri kombiseke. Eka nkarhi wihi na wihi wo dyondzisa, ngopfu-ngopfu loko a ri etimhakeni ta vuavanyisi, nkulu u fanele a hluta marito yakwe, a nga humi endleleni kumbe a phofula leswi swi ngo va mianakanyo yakwe ntsena. Hi ku titshega swinene hi Yehovha, Rito rakwe, ni minkongomiso ya yena hi ku tirhisa nhlengeletano yakwe, murisi u ta kuma mikateko leyi fuweke ya Xikwembu, ku nga ri “ku avanyisa loku tikaka.”—NW.