Vakulu—Hlayisani Vutihlamuleri Bya N’wina
“Tilanguteleni ke, mi langutela ni ntlhambi hinkwawo lowu Moya lowo Kwetsima wu nga mi veka ku va varhangeri va wona; risani [bandlha ra] Xikwembu, [leri] xi nga tifuwela [rona] hi rifu ra N’wana wa xona wa xiviri.”—MINTIRHO 20:28.
1. Xana vutihlamuleri bya Vukriste byi katsa yini?
YEHOVA XIKWEMBU u nyike lava nga enhlengeletanweni yakwe ya laha misaveni vutihlamuleri lebyi hlamarisaka. Kambe vutihlamuleri i yini xana? I nchumu wa nkoka lowu byarhisiweke munhu la faneleke ku tihlamulela. Vutihlamuleri bya Vukriste byi katsa ‘ntila wa marito lama hanyisaka,’ ntiyiso lowu nyikiweke hi ku tirhisa Matsalwa naswona wu phameriwa hi “nandza lowo tshembeka, lowa vutlhari” tanihi “swakudya hi nkarhi wa kona.” (2 Timotiya 1:13, 14; Matewu 24:45-47) Vutihlamuleri lebyi byi katsa vutirheli lebyi yelanaka ni ntiyiso, lowu wu faneleke ku chumayeriwa endzeni ni le handle ka bandlha. (2 Timotiya 4:1-5) Vahuweleri va Mfumo, ku katsa ni vakulu lava hlawuriweke hi moya, va fanele ku teka vutihlamuleri lebyi tanihi bya nkoka lowukulu.
2. Vakulu va ni vutihlamuleri byihi lebyi engetelekeke naswona Petro u vule yini mayelana na byona?
2 Vakulu va Vukriste va ni vutihlamuleri lebyi engetelekeke—vutihlamuleri bya ku risa ntlhambi wa Xikwembu. Emhakeni leyi, muapostola Petro u tsarile: “Sweswi ke, ndzi khongotela vakulukumba lava nge xikarhi ka n’wina, leswi na mina ndzi nga un’wana wa vona; ndzi mbhoni ya ku vaviseka ka Kriste, ni loyi a tshembaka ku averiwa ku kwetsima loku nga ta humelela, kutani ndzi ri: Risani ntlhambi wa Xikwembu lowu nge hansi ka n’wina, mi wu hlayisa ku nga ri hi ku sindzisiwa, kambe ku ri hi ku swi rhandza, hi laha Xikwembu xi swi lavaka ha kona, na swona ku nga ri hi ku langutela bindzu leri khomisaka tingana, kambe hi ku hiseka. Mi nga tshuki mi fuma lava mi nga nyikiwa vona ku va risa, kambe mi boxela ntlhambi entila lowunene. Kutani siku murisi lonkulu a nga ta humelela, mi ta kuma harhi leyo kwetsima, leyi nga riki na ku onhaka.”—1 Petro 5:1-4.
3. Vakulu va Vukriste va fanele va va xihlovo xa yini?
3 Vakulu va Vukriste va fanele va “kotisa šisirelelo loko moya wu hunga, kukota šitšhav̌elo loko šidzedze ši fika, kukota šinambyana ša mati e tikweni ra dyanḍa, ni nḍuti wa ribye le’ri tlakukeke tikweni leri omeke.” (Esaya 32:1, 2) Leswi swi vula leswaku vakulu va fanele va va xihlovo xa ku hlayiseka, ku rhula ni matimba entlhambini wa malandza ya Xikwembu yo tanihi tinyimpfu. Ku laveka ‘swo tala swinene’ eka vakulu kumbe varisi va ntlhambi, hikuva va ‘byarhisiwe swo tala.’ (Luka 12:48) Naswona entiyisweni va ni vutihlamuleri bya nkoka swinene lebyi faneleke ku hlayisiwa.
Ha Yini Byi Vekiwe eMavokweni Ya N’wina?
4. Ha yini ku laveka vakulu vo tala swonghasi?
4 Vukona bya mabandlha yo tlula 60 000 ya Timbhoni ta Yehova emisaveni hinkwayo byi lava makume ya magidi ya vavanuna lava fanelekaka hi tlhelo ra moya ku langutela ntlhambi wa Xikwembu. Ku ni vakulu vo tala etikweni rin’wana ni rin’wana naswona leswi swa tsakisa. Emisaveni hinkwayo ku ni avhareji ya kwalomu ka vahuweleri va Mfumo va 60 eka bandlha rin’wana ni rin’wana. Hikwalaho, ku ni ntirho wo tala lowu vakulu va faneleke ku wu endla.—1 Vakorinto 15:58.
5. Xana lunghelo ra ku tirha tanihi nkulu ri nyikiwa wanuna ehansi ka swisekelo swihi?
5 Loko u ri nkulu, ha yini lunghelo leri ri katekisiweke ri fikelele na wena? Hikuva u endle swilo swo karhi naswona u ni timfanelo ta moya. Hi xikombiso, u fanele u ri hlayile swinene Rito ra Xikwembu. (Yoxuwa 1:7, 8) U fanele u hlanganyerile hi ku gingiriteka evutirhelini bya nsimu, nakambe u pfuna van’wana ku va vahuweleri va Mfumo. Loko u “rhange hi ku kambiwa,” u tirhe hi ku tshembeka tanihi nandza wa vutirheli. U ‘fikelerile,’ kumbe u tikarhatele ku faneleka, leswaku u va nkulu, hi ku vona leswaku ku va mulanguteri i “ntirho lowunene.” (1 Timotiya 3:1, 10) Ku fana na Timotiya, ‘u bumabumeriwe kahle hi vamakwenu.’ (Mintirho 16:2) Loko u bumabumeriwa tanihi nkulu, kumbexana a wu ri eku heleni ka malembe ya wena ya va-20 kumbe ku tlula naswona a wu ri ni ntokoto evuton’wini. Bandlha ri ku xiximile tanihi makwerhu la vupfeke emoyeni, la tshinelelekaka, la swi kotaka ku nyikela ndzayo leyi humelelaka ya Matsalwa ni ku hlayisa xihundla.—Swivuriso 25:9, 10.
Ndlela Yo Hlayisa Vutihlamuleri Bya Wena
6, 7. Timotiya wo Sungula 4:13-15 yi nyikela xitsundzuxo xihi ku pfuna wanuna ku hlayisa vutihlamuleri byakwe tanihi nkulu?
6 Ina, loko u ri nkulu, u nyikiwe vulanguteri bya Vukriste hikwalaho ka swivangelo leswi twalaka. U ri vone ri ri lunghelo swinene! Kambe xana u nga byi hlayisisa ku yini vutihlamuleri bya wena?
7 Ndlela yin’wana yo hlayisa vutihlamuleri bya wena tanihi nkulu i ku va la tiyeke ni ku gingiriteka eku hetisiseni ka mintirho ya wena. Hinkwerhu ka hina hi ni swiavelo leswi nga ni vutihlamuleri lebyi hamba-hambanaka enhlengeletanweni ya Yehova. Hikwalaho, hlayisa ndhawu ya wena naswona u aneriseka hi ku ‘tikhoma tanihi lontsongo.’ (Luka 9:46-48; ringanisa Vaavanyisi 7:21.) Tlangela malunghelo ya wena naswona u nga tshuki ‘u tirha hi voko leri tsaneke.’ (Swivuriso 10:4) U nga yimi, kambe hi mpfuno wa Yehova, endla nhluvuko etimhakeni hinkwato ta vutirheli. Entiyisweni, landzela xitsundzuxo lexi xi nyikeriweke hi Pawulo eka Timotiya: “Tinyikete ku hlayela vanhu eMatsalwa, u khongotela ni ku dyondzisa, ndzi ko ndzi fika. U nga tlangi hi nyiko leyi u nga na yona, leyi u yi nyikiweke hi ku ya hi leswi nga vuriwa ehenhla ka wena, siku vakulukumba va ku tlhandlekeke mavoko. Endla tifanelo leti, tinyiketele eka tona, leswaku hinkwavo va ta vona hi laha u yaka emahlweni ha kona.”—1 Timotiya 4:13-15.
8. I yini lexi nga ta pfuna nkulu ku nyikela xitsundzuxo lexi twalaka ni ku nyikela nchumu lowu fuwisaka hi ntlhelo ra moya eminhlanganweni?
8 Tiyiseka leswaku u hlayisa xiyimiso lexinene, lexi vuyerisaka xa dyondzo ya munhu hi xiyexe. Tanihi nkulu, hi laha ku faneleke u languteriwe ku nyikela ndzayo leyi twalaka ya Matsalwa. Leswaku u tihlomisela vutihlamuleri lebyi, xana u yi hlayile Bibele hinkwayo hi ku anakanyisisa, kumbexana minkarhi yo tala? (Swivuriso 15:28) Ku vuriwa yini hi swiavelo swa wena swa le platifomo? Swi lunghiselele kahle, hi xikhongelo u lava mpfuno wa Yehova leswaku u ta nyikela nchumu lowu fuwisaka emoyeni eka lava nga kona eminhlanganweni ya hina. Vakulu hi laha ku hlawulekeke va fanele va ‘vula leswi pfunaka ku aka, leswaku swi tisa mikateko eka lava yingisaka.’—Vaefesa 4:29; Varhoma 1:11.
9. Hi ku ya hi 2 Timotiya 4:2, nkulu u fanele a endla yini?
9 Tanihi nkulu, yingisa xitsundzuxo xa Pawulo lexi nge: “Twarisa Rito, u hiseka hi nkarhi wa kona hambi ku nga ri hi nkarhi wa kona; khorwisa, u laya ni ku khongotela; u nga tsandzeki hi tlhelo ra ku lehisa mbilu ni le ku dyondziseni.” (2 Timotiya 4:2) Pawulo a a karhateka swinene mayelana ni vugwinehi hikuva van’wana ebandlheni ‘a va phikisana hi marito,’ va nghenela ‘ku vutisa ka vuhunguki,’ naswona ‘a va nga voyamelanga entiyisweni.’ (2 Timotiya 2:14-18, 23-25; 3:8-13; 4:3, 4) Hambi swi ri tano, ku nga khathariseki leswaku bandlha ri tokota xiyimo lexi karhataka kumbe lexinene, Timotiya a a fanele a “twarisa Rito.” Leswi a swi ta tiyisa vapfumeri-kulobye ku hlula vugwinehi. Hi ku fanana namuntlha, vakulu va fanele va chumayela Rito leri nghenaka kumbe mahungu ya Xikwembu, lama fikelelaka mbilu ni lama khutaza ku namarhela mimpimanyeto ya Yehova.—Vaheveru 4:12.
10. Ha yini nkulu a fanele a tirha nkarhi na nkarhi ni swirho swa ndyangu wa yena ni van’wana evutirhelini bya nsimu?
10 Leswaku a vulavula kahle, nkulu u fanele ku hanya hi ku pfumelelana ni Rito ra Xikwembu. Kambe a nga hlayisi vutihlamuleri byakwe hi xitalo loko a “twarisa Rito” eplatifomo endzeni ka bandlha ntsena. Hi mongo lowu fanaka Pawulo u khongotele Timotiya a ku: “Tirha ntirho wa muvuri wa Rito.” Leswaku u ‘hetisisa vutirheli bya wena hi xitalo’ tanihi nkulu, u fanele u chumayela Rito ra Xikwembu “erivaleni ni le mindyangwini.” (2 Timotiya 4:5; Mintirho 20:20, 21) Hikwalaho, tirha evutirhelini bya nsimu ni swirho swa ndyangu wa wena. Leswi swi nga tiyisa xiboho xa moya exikarhi ka wena ni nsati wa wena naswona swi ta vuyerisa vana va n’wina swinene. Nakambe, tirhisani nkarhi wo karhi, mi avelana ntirho wo chumayela ni swirho swin’wana swa bandlha. Leswi swi tiyisa swiboho swa moya naswona swi kurisa rirhandzu ra vumakwerhu. (Yohane 13:34, 35) Kavula, nkulu u fanele a tikarhatela ku ringanisela eku aveni ka nkarhi wa nkoka exikarhi ka ndyangu wakwe ni bandlha. Ku tirhisa ku twisisa ku ta n’wi sivela ku tirhisa nkarhi wo tala swinene eka wun’wana, ivi a honisa ni ku vavisa wun’wana.
11. Hikwalaho ka yini nkulu a fanele a tirha hi matimba ku antswisa vuswikoti bya yena tanihi mudyondzisi?
11 Leswaku u hlayisa vutihlamuleri bya wena tanihi nkulu, nakambe tirha hi matimba ku antswisa vuswikoti bya wena tanihi mudyondzisi. Pawulo u te: “Loyi a nga ni nyiko ya ku dyondzisa, a a dyondzise; loyi a nga ni nyiko ya ku khongotela a a khongotele.” (Varhoma 12:7, 8) Tanihi leswi mudyondzisi a yimaka emahlweni ka van’wana tanihi muleteri, va ni mfanelo yo langutela swo tala eka yena. Loko nkulu o endla xihoxo lexikulu eku dyondziseni ka yena ivi leswi swi vanga swiphiqo eka vapfumeri-kulobye, u ta avanyisiwa hi Xikwembu. Ina, vadyondzisi va ta “kuma ku avanyisiwa loku tikaka.” (Yakobo 3:1, 2; Matewu 12:36, 37) Kutani vakulu va fanele ku va swichudeni leswi tiyimiseleke swa Rito ra Xikwembu naswona va fanele va ri tirhisa evuton’wini. Manuku ku dyondzisa ka vona ka Matsalwa, loku seketeriweke hi ku ma tirhisa ka munhu hi xiyexe, ku ta tlangeriwa swinene hi vapfumeri-kulobye. Nakambe ku ta sirhelela bandlha eka minkucetelo leyi nga tengangiki, ku katsa ni vugwinehi.
Papalata Mintlhamu
12. I xitsundzuxo xihi lexi tshameke xi humesiwa eka magazini lowu lexi nga ta pfuna nkulu ku papalata ku tirhisa ririmi hi ndlela leyo biha?
12 Nakambe, hlayisa vutihlamuleri bya wena tanihi nkulu hi ku papalata mintlhamu. Swin’wana swa leswi i ku tirhisiwa loko biha ka ririmi tanihi mudyondzisi. Xilaveko xa ku xalamuka emhakeni leyi i khale xi ri karhi xi tshikileriwa hi nhlengeletano ya Yehova. Hi xikombiso, enkandziyisweni wa wona wa Xinghezi wa May 15, 1897, magazini lowu wu hlamusele Yakobo 3:1-13 ivi ngopfu-ngopfu hi vakulu wu vula leswi: “Loko va ri ni ririmi leri nga ni marito lamanene swi nga ha va ndlela ya nkateko lowukulu, swi yisa tinhlayo letikulu eHosini, entiyisweni ni le ndleleni ya ku lulama; kumbe, hi tlhelo rin’wana, loko ri tale hi swihoxo, ririmi ri nga endla khombo leri nga vulekiki—ri vavisa ripfumelo, mahanyelo ni mintirho leyinene. I ntiyiso hakunene, leswaku wihi na wihi la tirhisaka nyiko ya ku dyondzisa u tiveke eka vutihlamuleri lebyikulu emahlweni ka Xikwembu ni le ka vanhu. . . . Wihi na wihi loyi a nga ta va xihlovo lexi eka xona ku nga ta huma Rito ra Xikwembu, lexi rhwalaka mikateko ni ku phyuphya ni matimba, u fanele ku vona leswaku mati yo bava, tidyondzo ta mavunwa leti nga ta tisa ndzhukano, mbanga—leti delelaka Xikwembu leti hambukisaka Rito ra xona—a va fanelanga ku ti vula. Eku hlawuleni ka vakulu, ku fikelela mfanelo ya ‘ririmi,’ hi laha swi andlariweke ha kona laha a swi fanelanga ku honisiwa. Lava va nga na ririmi leri tlhavaka a va fanelanga ku hlawuriwa, kambe lava titsongahataka, lava ringaniselaka, lava va ‘kambelaka’ ririmi ra vona naswona va ringeta hi vukheta ku ‘vulavula tanihi malandza ya Xikwembu’ ntsena.” I swa nkoka swinene swonghasi leswaku nkulu a tirhisa ririmi rakwe hi ndlela leyi faneleke!
13. I ku xalamuka kwihi loku vakulu va faneleke ku ku tirhisa malunghana ni ku tihungasa?
13 Ku tihungasa loku nga ringaniseriwangiki na kona i ntlhamu wo wu papalata. Ku tihungasa ku fanele ku phyuphyisa ni ku aka, hayi ku karharisa ni ku kavanyeta Mukriste. Ku tlula kwalaho, valanguteri va fanele va ‘ringanisela.’ (1 Timotiya 3:2) Loko ku ringanisela ku fuma leswi u swi endlaka malunghana ni ku tihungasa, leswi swi ta sirhelela wena ni ndyangu wa wena naswona swi ta nyikela xikombiso lexinene ebandlheni. U ta va u nga veki xikombiso lexinene loko nkarhi na nkarhi, u tshamela ku famba u ya tihungasa hi mahelo-vhiki loko, vapfumeri-kuloni va ri karhi va gingiriteka evutirhelini bya nsimu. Mahungu lamanene ma fanele ku chumayeriwa, naswona vakulu va fanele ku rhangela entirhweni lowu tanihi vahuweleri va Mfumo lava gingiritekaka.—Marka 13:10; Tito 2:14.
14. (a) I swikombiso swihi swa Matsalwa leswi kandziyiseke xilaveko eka vakulu xo tivonela ehenhleni ka vunghwavava? (b) I xitsundzuxo xihi lexi phindhiweke lexi vakulu va nga fanelangiki ku xi honisa loko va pfuna vamakwerhu va xisati va moya?
14 Vunghwavava i ntlhamu wun’wana wo wu papalata. Ku thyaka ka mahanyelo ya misava ku nga hambukisa hambi ku ri nkulu loko a nga yi fularheli miringo leyi tirhisiwaka hi Sathana ematshalatshaleni yakwe yo tshova ku tshembeka ka vanhu va Xikwembu. (Ringanisa Matewu 4:1-11; 6:9, 13.) Tsundzuka leswaku muprofeta Balama, loko a tsandzekile ematshalatshaleni yakwe yo rhukana Vaisrayele, u vule leswaku Yehova hi yexe a a ta va rhukana loko vo xisiwa leswaku va nghenela vugandzeri bya rimbewu. Kutani Balama u dyondzise Balaka hosi ya Mumoab “ku veka xikhunguvanyiso emahlweni ka vana va Israyele, leswaku va dya swakudya leswi phahleriweke swikwembu swa hava, ni ku endla vuoswi.” Xana va xi papalatile xihoxo xexo ke? Doo, hikuva Vaisrayele va 24 000 va file hi nkhavi wo huma eka Yehova hikuva va ve ni vuxaka lebyi thyakeke ni vavasati va Moab ni ku nkhinsamela swikwembu swa vona. (Nhlavutelo 2:14; Tinhlayo 25:1-9) Nakambe, tsundzuka leswaku hambi ku ri Davhida, ‘munhu la amukelekaka embilwini ya Xikwembu,’ u wele entlhan’wini wa vunghwavava. (1 Samuel 13:14; 2 Samuel 11:2-4) Kutani ke, tanihi nkulu, yingisa xitsundzuxo lexi phindhiweke xa “mulanguteri lowo tshembeka,” u nga tshuki u pfuna makwerhu wa xisati wa moya exihundleni kambe u va ni nkulu un’wana loko u hetisisa vutihlamuleri lebyi.—Luka 12:42.
15. Xana ndyangu wa nkulu wu nga n’wi pfunisa ku yini ku papalata ntlhamu wa ku rhandza swilo leswi vonekaka?
15 Ku navela swilo leswi vonekaka i ntlhamu wun’wana lowu nkulu a faneleke ku wu papalata. Aneriseka hi swilaveko, hi ku tiva leswaku Yehova u ta endla lunghiselelo leri aneleke. (Matewu 6:25-33; Vaheveru 13:5) Letela ndyangu wa wena ku va ni vukheta, hikuva vusopfa i khamba ra nkarhi ni nhundzu leswi nga tirhisiwaka ku pfuna ndyangu, kun’we ni ku katseka evutirhelini bya nsimu, wu tiyisa bandlha ni ku seketela timhaka ta Mfumo. Nkulu wa pfuneka eka ntirhisano wa ndyangu wakwe emhakeni leyi naswona swa tlangeriwa loko va nga n’wi tshikileli hi swilo leswi entiyisweni swi nga laviwiki. Kahle-kahle, “rifuwonyana le’ri nga ni ku tšhav̌a Yehova, ri tlurisa rifuwo lerikulu leri nga ni mikarateko.”—Swivuriso 15:16.
“Tilanguteleni”
16. I xitsundzuxo xihi lexi Pawulo a xi nyikeke valanguteri va le Efesa?
16 Loko vakulu va ta hlayisa vutihlamuleri bya vona, va fanele ku tirhisa xitsundzuxo xa Pawulo eka valanguteri va le Efesa. U te eka vona: “Tilanguteleni ke, mi langutela ni ntlhambi hinkwawo lowu Moya lowo Kwetsima wu nga mi veka ku va varhangeri va wona; risani [bandlha ra] Xikwembu, [leri] xi nga tifuwela [rona] hi rifu ra N’wana wa xona wa xiviri. Hikuva mina ndza swi tiva leswaku, loko ndzi sukile, mi ta ngheneriwa hi timhisi leto leva, leti nga ta ka ti nga tsetseleli ntlhambi; na swona, ndzi tiva leswaku ku ta huma van’wana exikarhi ka n’wina lava nga ta vula mavunwa ku tilavela vadyondzisiwa. Loko swi ri tano, hitekani, mi tsundzuka leswaku, vusiku ni nhlekanhi, a ndzi rhutelanga ku dyondzisa hi mihloti un’wana ni un’wana wa n’wina, hi nkarhi wo ringana malembe manharhu.”—Mintirho 20:28-31.
17, 18. I xitsundzuxo xihi lexi humesiweke eka magazini lowu kwalomu ka malembe ya 80 lama hundzeke lexi xa ha tirhaka eka vakulu va Vukriste?
17 Ku tlula malembe ya 80 lama hundzeke, Xihondzo xo Rindza (xa Xinghezi xa March 1, 1909) xi tshahe xitsundzuxo lexi nga laha henhla xa Pawulo lexi yaka eka vakulu-kulobye ivi xi ku: “Vakulu kun’wana ni kun’wana va fanele ku nyikela nyingiso wo hlawuleka; hikuva eka ndzingo wun’wana ni wun’wana lava rhandziwaka swinene ni lava dumeke swinene va ni swihinga ni mindzingo yo tika. Hikwalaho [Yakobo] wa khongotela, ‘A swi fanelanga leswaku lavo tala exikarhi ka n’wina va hundzuka vadyondzisi, vamakwerhu, hi ku tiva leswaku munhu u ta amukela ndzingo lowo tika.’ Hi ku fanana, na hina hi khongotela Vakulu hinkwavo lava tengeke embilwini, lava nga hava vutianakanyi, leswaku va va ni rirhandzu ni ku navelela vanhu hinkwavo leswinene ntsena ni leswaku va ya va tatiwa swinene hi rirhandzu ni mikateko ya Moya lowo kwetsima, va yingisa ni ntlhambi. Tsundzukani, leswaku ntlhambi i wa Hosi ni leswaku mi ni vutihlamuleri eHosini, ni le ka vona. Tsundzukani, leswaku mi fanele mi langutela mimoya (swilaveko) ya vona tanihi lava faneleke ku tihlamulela eka Murisi-nkulu. Tsundzukani leswaku xilo lexikulu i Rirhandzu, eka hinkwaswo; naswona, mi nga honisi tidyondzo, nyikelani nyingiso swinene eku tirheni ka Moya wa Hosi exikarhi ka swirho swo hambana-hambana swa Huvo ya yona, ni leswaku xisweswo ‘swi fanelekela ndzhaka ya vakwetsimi eku vonakaleni,’ kutani, hi ku ya hi ku rhandza ka Xikwembu, mi nga tokoti ku khunguvanyeka esikwini leri ro biha, kambe, loko mi endle hinkwaswo, mi yima mi helerile eka Kriste, Huvo yakwe, Swirho swakwe, Vatinyiketeri kun’we na yena, Vadyandzhaka-kulobye.”
18 Marito lawa a ma kongomisiwe eka vakulu lava totiweke hi moya ni vapfumeri kulobye hi ku ya hi ku twisisa ni swiyimo swa nhlengeletano ya Yehova emasikwini wolawo yo sungula. Kambe, vona ndlela leyi xitsundzuxo xexo xi tirhaka kahle ha yona namuntlha! Ku nga khathariseki leswaku mintshembo ya vona i ya le tilweni kumbe i ya le misaveni, vakulu va Vakriste va fanele ku tilangutela, va hlayisa vutihlamuleri bya vona naswona hi rirhandzu va khathalela swilaveko swa ntlhambi wa Xikwembu.
Ntsako Wu Va Kona Hi Ku Hlayisa Vutihlamuleri Bya Wena
19, 20. Ha yini ku nga vuriwaka leswaku ntsako wu va kona loko vakulu va hlayisa vutihlamuleri bya vona ke?
19 Ntsako—entiyisweni, ntsako lowu humaka embilwini—wu huma eku hlayiseni ka vutihlamuleri bya wena tanihi nkulu wa Vukriste. Ku ni ntsako eku hetisiseni ka vutihlamuleri lebyikulu kahle. Vana ni vukheta, hi xikhongelo, u gingiriteka. Hlayisa vutihlamuleri bya wena tanihi nkulu ivi u langutela nkarhi lowu u nga ta vula ha wona, hi laha wanuna la nga ni nkotloto wa mutsari a vuleke ha kona a ku: “Nḍi endlile hi laha u nḍi leriseke ha kona.”—Ezekiel 9:3, 4, 11.
20 Ina, tirha hi ku tshembeka tanihi nkulu leswaku ku ta vuriwa eka wena hi laha swi veke ha kona eka Nowa: “A endlisa ŝeŝo.” (Genesa 6:22) Eka ntirho wo tano wo gingiriteka, bandlha ri pfuneka hi tindlela to tala. Eka hinkwaswo, Yehova wa dzunisiwa hi mabandlha lama tiyeke ni lama chivirikaka lama pfuniwaka hi vakulu lava tshembekaka lava hlayisaka vutihlamuleri bya vona. Kambe ku laveka swo tala loko endzhaku, u ta byeriwa leswaku: “Hi swona, nandza lonene”! (Luka 19:17) Tanihi nkulu, u fanele u khoma ntlhambi wa Xikwembu hi musa.
A Wu Ta Ku Yini Xana?
◻ I vutihlamuleri byihi lebyi engetelekeke lebyi vakulu va Vukriste va nga na byona?
◻ I magoza wahi lama kongomeke lama nkulu a nga ma tekaka ku hlayisa vutihlamuleri byakwe?
◻ Leswaku a hlayisa vutihlamuleri byakwe, i mintlhamu yihi leyi nkulu a faneleke ku yi papalata?
◻ Ha yini ntsako wu va kona loko vakulu va hlayisa vutihlamuleri bya vona?
[Xifaniso lexi nga eka tluka 10]
Vakulu va Vukriste va fanele va va tanihi “xisirhelelo loko moya wu hunga”
[Xifaniso lexi nga eka tluka 12]
Tanihi nkulu, hlanganyela nkarhi hikwawo evutirhelini bya nsimu ni swirho swa ndyangu wa wena ni van’wana
[Xifaniso lexi nga eka tluka 13]
Loko u hlayisa vutihlamuleri bya wena tanihi nkulu, bandlha ri ta pfuneka hi tindlela to tala