Xana Wa Faneleka Ku Tirhela?

“Matimba ya hina ma huma ka Xikwembu.”—2 VAKORINTO 3:5.

1. Xana i vanhu va njhani lava bandlha ra Vukriste ri nga riki na xivandla xa vona?

YEHOVA XIKWEMBU na Yesu Kriste i vatirhi. Yesu u te: “Ku fikela sweswi, Tata wa mina a nga si tshika ku tirha, kutani na mina, tanihi yena, ndza tirha.” (Yohane 5:17) Xikwembu a xi va amukeli vanhu lava alaka ku tirha; hambi ku ri lava lavaka vutihlamuleri leswaku va ta fuma van’wana. Bandlha ra Vukriste a ri na ndhawu ya malolo kumbe ya vanhu lava nga ni ku navela ka vutianakanyi.—Matewu 20:25-27; 2 Vatesalonika 3:10.

2. Hikwalaho ka yini sweswi ku ri na xilaveko lexikulu xa vanhu vo byarha vutihlamuleri ebandlheni ra Vukriste?

² Timbhoni ta Yehova ti na ‘swo tala swo swi endla entirhweni wa Hosi,’ ngopfu-ngopfu sweswi leswi vanhu vo tala va khitikanelaka “nṭhav̌eni” ya vugandzeri bya ntiyiso. (1 Vakorinto 15:58; Esaya 2:2-4) Ku na xilaveko lexikulu xa vanhu lava fanelekaka hi tlhelo ra moya leswaku va byarha vutihlamuleri bya bandlha. Ku nga ri ku fambisiwa hi ku navela ka vutianakanyi, vanhu vo tano va kurisa Yehova, ku nga ri ku tikurisa. (Swivuriso 8:13) Va swi tiva leswaku i Xikwembu lexi va pfunaka leswaku va fanelekela mintirho ya bandlha, hi laha xi ‘endlaka malandza ya ntwanano lowuntshwa, ma faneleka ha kona.’—2 Vakorinto 3:4-6.

3. Kahle-kahle, xana vutihlamuleri bya vakulu ni malandza ya vutirheli hi byihi?

³ Namuntlha, tanihi le ka Vakriste vo sungula, vanhu va hlawuriwa hi moya wo kwetsima na hi lunghiselelo ra nhlengeletano ya Yehova leswaku va tirha tanihi vakulu ni malandza ya vutirheli. (Mintirho 20:28; Vafilipiya 1:1; Tito 1:5) Vakulu va risa ntlhambi wa Xikwembu hi tlhelo ra moya, va nyika vulanguteri lebyi sirhelelaka. Va pfuniwa hi malandza ya vutirheli, lawa ntirho wa wona hi ku kongoma wu nga katsiki vulanguteri hi tlhelo ra moya. (1 Petro 5:2; ringanisa Mintirho 6:1-6.) Ku fana ni N’wana wa Xikwembu, loyi a a tele ku ta tirhela, vahlawuriwa vo tano va navela ku pfuna vapfumeri-kulobye. (Marka 10:45) Loko u ri wanuna wa Mukriste, xana u na wona moya wo tano?

Timfanelo Leti Fanaka

4. Xana hi kwihi laha ngopfu-ngopfu hi kumaka nxaxamelo wa timfanelo ta lava va byarhisiweke vutihlamuleri bya bandlha?

⁴ Ngopfu-ngopfu i swilaveko swa lava va byarhisiweke vutihlamuleri bya bandlha leswi vuriweke hi muapostola Pawulo eka 1 Timotiya 3:1-10, 12, 13 na Tito 1:5-9. Loko hi ri karhi hi langutisa timfanelo leti, tin’wana ta tona leti rirhaka eka vakulu ni malandza ya vutirheli, a hi fanelanga hi ti languta hi ku ya hi mimpimanyeto ya misava. Ematshan’wini ya sweswo, hi fanele hi ti languta hi xiyimo xa tona xa lembe-xidzana ro sungula ni hi laha ti tirhaka ha kona exikarhi ka vanhu va Yehova. Ku fikelela swilaveko leswi a swi lavi ku hetiseka, loko a swi ri tano a ku nga ta va na munhu loyi a ta faneleka hi nkarhi wolowo. (1 Yohane 1:8) Kambe loko u ri wanuna wa Mukriste, ku nga khathariseki leswaku sweswi u na yona ya mintirho ya bandlha kumbe e-e, hikwalaho ka yini u nga kambisisi timfanelo ta wena n’wini?

5. Xana ku ka u nga ri na xisandzu swi vula yini?

⁵ Ku nga sandzeki; ku va ni vumbhoni lebyinene evanhwini va le handle; ku va hava swihehlo. (1 Timotiya 3:2, 7, 8, 10; Tito 1:6, 7) Loko va hlawuriwile ni loko va ri karhi va tirha, malandza ya vutirheli ni vakulu va fanele va va lava nga sandzekiki, hi leswaku, va va hava xisandzu ni xilaveko xihi na xihi xa ku soriwa hi xihehlo xa ntiyiso xa ku tikhoma kumbe dyondzo leyi hoxeke. Swihehlo swa vunwa leswi endliwaka hi “vamakwerhu va mavunwa” kumbe van’wana, a swi endli leswaku munhu a sandzeka. Leswaku munhu a tekeriwa malunghelo ya ntirho ebandlheni, xihehlo xi fanele xi va xa ntikelo, naswona xi fanele xi pfumelelana ni mimpimanyeto ya Matsalwa. (2 Vakorinto 11:26; 1 Timotiya 5:19) La hlawuriweke ebandlheni “u fanele ku va loyi vanhu va le handle va n’wi xiximaka, hikuva nkarhi wun’wana a nga wela eku sandziweni ni le ntlhan’wini wa Diyavulosi.” Loko munhu a endle xidyoho lexikulu enkarhini lowu hundzeke, a nga hlawuriwa ntsena loko a tshike xisandzu xihi na xihi naswona a tiendlele vito lerinene.

6. Xana ku va wanuna wa nsati un’we swi vula yini?

⁶ Wanuna wa nsati un’we. (1 Timotya 3:2, 12; Tito 1:6) Leswi a swi vuli swona leswaku i vanhu lava tekeke ntsena va nga vaka malandza ya vutirheli ni vakulu. Hambi loko a tekile, wanuna u fanele ku va na nsati un’we naswona a tshembeka eka yena. (Vaheveru 13:4) Ku hambana ni vavanuna lava nga riki Vakriste va lembe xidzana ro sungula, wanuna a nge teki tshengwe.a

7. (a) Xana i malembe ya munhu lawa ma n’wi endlaka a fanelekela ku va nkulu? (b) Xana i yini swi katsekaka leswaku u fambisa ndyangu hi mukhuva lowunene?

⁷ Ku langutela ndyangu wa yena hi mukhuva lowunene, ni ku titsonghahata ka vana. (1 Timotiya 3:4, 5, 12; Tito 1:6) Van’wana va nga ha ehleketa leswaku vakulu va fanele va va ni kwalomu ka 30 wa malembe hi vukhale, kambe Bibele a yi vekangi malembe yo karhi. Kambe, munhu wa kona u fanele a hanya tanihi munhu lonkulu hi tlhelo ra moya. Malandza ya vutirheli ni vakulu va fanele va va lava kuleke ku ringana leswaku va nga va ni vana. Loko a tekile, wanuna a nga faneleki loko a endla hi ndlela ya Xikwembu kun’wana, kambe a fuma hi lunya ekaya ra yena. U fanele a va a kume xichavo xa vulanguteri endyangwini wa yena hi ku ya hi misinya ya Bibele, naswona xikongomelo xa yena xi fanele xi va ku endla leswaku xirho xin’wana ni xin’wana xa ndyangu xi humelela hi tlhelo ra moya. Tanihi nawu wa ntolovelo, nkulu la nga tatana u fanele a va ni vana lava nga ni mahanyelo lamanene, lava va nga “vapfumeri.” Va nga ha va va endla nhluvuko wo tinyiketela eka Xikwembu kumbe se va khuvuriwile tanihi Timbhoni ta Yehova. Wanuna la tsandzekaka ku aka ripfumelo eka vana va yena, a nge swi koti ku ri aka eka van’wana.

8. Loko wanuna wa ndyangu a nga si va nkulu, i yini lexi a faneleke ku xi endla?

⁸ Loko wanuna wa ndyangu a nga si va nkulu la kotaka ku nyikela vulanguteri bya moya ebandlheni, u fanele ku dyondza ku fambisa ndyangu wa yena n’wini. ‘Loko munhu wihi na wihi a nga tivi ku ungamela ndyangu wa yena, xana a nga swi kotisa ku yini ku hlayisa bandlha ra Xikwembu?’ (1 Timotiya 3:5) Hakunene, wanuna a nga ha kanetiwa hi nsati la nga pfumeriki. (Matewu 10:36; Luka 12:52) Kumbe un’wana wa vana va yena a nga ha va ni nandzu wa xidyoho lexikulu, hambi loko lavan’wana va endla kahle hi tlhelo ra moya. Kambe, loko wanuna yoloye a endle hinkwaswo leswi nga languteriwaka, ngopfu-ngopfu loko a humelerile hi tlhelo ra moya eka van’wana endyangwini wa yena, ku ariwa ka vukongomisi lebyinene bya yena hi xirho xin’we xa ndyangu a ku nge n’wi endli a tekeriwa malunghelo ya ku va nandza wa vutirheli kumbe nkulu.

9. Xana i nkhathalelo wihi lowu nkulu kumbe nandza wa vutirheli a faneleka ku wu kombisa mayela ni swonwa swa xihoko?

⁹ A nga vi xidakwa xa tinyimpi kumbe la tinyiketaka ebyaleni. (1 Timotiya 3:3, 8; Tito 1:7) Nandza wa vutirheli kumbe nkulu a nga fanelanga ku nwa ngopfu swakunwa swa xihoko. Ku godzomberiwa hi swona ku nga va endla va tsandzeka ku lawula miehleketo ni mintlhaveko, leswi vangaka ku dakwa ni tinyimpi. A nga fanelanga a va ‘la tinyiketaka eka vhinya yo tala’ kumbe ku va ni ndhuma ya ku va la tshamelaka ku nwa kumbe ku va xilovekelo. (Swivuriso 23:20, 21, 29-35) Vona ndlela leyi swi nga nyumisaka ha yona loko riendzo ra vurisi ri nga kavanyetiwa hi vudakwa! Loko makwerhu a nwa, a nga fanelanga ku nwa loko a ta hlanganyela eminhlanganweni, evutirhelini kumbe ntirho wun’wana wo kwetsima.—Levitika 10:8-11; Ezekiel 44:21.

10. Hikwalaho ka yini lava rhandzaka mali ni va makwanga yo lava ku vuyeriwa hi vuxisi va nga fanelekeli ku va vakulu kumbe malandza ya vutirheli?

¹⁰ Ku nga ri la rhandzaka ngopfu mali kumbe la nga ni makwanga yo lava ku vuyeriwa hi vuxisi. (1 Timotiya 3:3, 8; Tito 1:7) Varhandzi va mali va le ndzingweni hi tlhelo ra moya, vanhu “va makwanga” va nge dyi ndzhaka ya Mfumo wa Xikwembu. Hikwalaho, vavanuna vo tano a va faneleki leswaku va va vakulu kumbe malandza ya vutirheli. (1 Vakorinto 6:9, 10; 1 Timotiya 6:9, 10) Eka Xigriki rimitsu leri hundzuluxeriweke va ku “vukanganyisi,” (BX) hakanyingi ri vula ku “nyumisa,” naswona rito rero leri hundzuluxeriweke va ku “mpindzulo” ri kombetela eka muxaka wun’wana ni wun’wana wa bindzu kumbe vuyelo. (Vafilipiya 1:21; 3:4-8) Kavula, munhu loyi vumunhu bya yena byi kombisaka leswaku u ta khoma “tinyimpfu” ta Xikwembu hi ndlela yo biha, a nga faneleki eka vutihlamuleri bya bandlha. (Ezekiel 34:7-10; Mintirho 20:33-35; Yuda 16) Xilaveko xa vutlhari loko ku endliwa swibumabumelo xa kula loko hi xiya leswaku munhu la tshameke a hlawuriwa a nga ha byarisiwa timali ivi a ringiwa ku yiva yin’wana ya mali leyi.—Yohane 12:4-6.

11. Hikwalaho ka yini “munhu loyi a ha ku pfumelaka” a nga fanelanga ku hlawuleriwa vutihlamuleri bya bandlha?

¹¹ A nga vi munhu loyi a ha ku pfumelaka; a a ve la kambiweke loko a faneleka. (1 Timotiya 3:6, 10) Munhu loyi a ha ku khuvuriwaka a nga vanga na wona nkarhi wa ku kombisa leswaku u ta khathalela ntirho lowu a wu averiwaka hi ku tshembeka. A nga ha va a pfumala ntwela-vusiwana eka lava hlunameke, kumbe vutlhari lebyi lavekaka byo pfuna vagandzeri-kulobye naswona a nga ha langutela van’wana ehansi. Hikwalaho, emahlweni ka ku va a hlawuriwa tanihi nandza wa vutirheli naswona ngopfu-ngopfu tanihi nkulu, wanuna u fanele ku “kamberiwa loko a faneleka,” (NW) naswona u fanele ku nyika vumbhoni bya ku ahlula lokunene ni ku tsembeka. A ku na nkarhi lowu vekiweke wa nkambelo lowu, naswona vanhu va hambana hi mpimo wa ku kula hi tlhelo ra moya. Kambe vakulu va nge hlawuri wanuna lontshwa hi ku hatlisa “hikuva a nga tshuka a tela hi manyunyu a tikukumuxa, kutani a avanyisiwa kukota Diyavulosi.” Munhu a sungule a kombisa ku titsongahata loku fanaka ni ka Kriste.—Vafilipiya 2:5-8.

Leswi Languteriwaka Eka Malandza Ya Vutirheli

12. Xana swilaveko leswi swi xaxameteriweke malandza ya vutirheli swi fanele ku fikeleriwa hi vona ntsena?

¹² Swilaveko swin’wana swi xaxameteriwe malandza ya vutirheli. Nakambe, loko vakulu va nga swi fikelelanga swilaveko swo tano, a va nga ta faneleka ku tirhela. Tanihi wanuna wa Mukriste, xana wa faneleka eka timhaka leti?

13. Xana ku va la chavisekaka swi vula yini?

¹³ Lava chavisekaka. (1 Timotiya 3:8) Munhu loyi a fanelekaka leswaku a tirha tanihi nandza wa vutirheli a nga fanelanga ku teka vutihlamuleri hi ndlela yo vevuka. U fanele ku tikhoma hi mukhuva lowu xiximekaka lowu tisaka xichavo. Hambi loko mafenya ma amukeleka minkarhi yin’wana, a nge faneleki loko a tshamela ku huhwa.

14. (a) Xana ku ka u nga ri na milomu mimbirhi swi vula yini? (b) Ku va ni ripfalo leri tengeke swi vula yini?

¹⁴ Va nga vi na milomu mimbirhi, va va ni ripfalo leri tengeke. (1 Timotiya 3:8, 9) Malandza ya vutirheli (ni vakulu) va fanele va tshembeka, va nga hlevi kumbe ku va ni vuxisi. Tanihi leswi va nga fanelangiki hi milomu mimbirhi, a va fanelanga leswaku hi vukanganyisi va vula xo karhi kutani va ya vula mhaka yeleyo eka un’wana hi ndlela leyi hambaneke. (Swivuriso 3:32; Yakobo 3:17) Vanhu lava va fanele nakambe va ri vaseketeri lava tiyeke va ntiyiso lowu paluxiweke, “va fanele ku hlayisa xihundla xa vupfumeri hi ripfalo leri tengeke.” Emahlweni ka Xikwembu, ripfalo ra munhu wo tano ri fanele ri nyikela vumbhoni bya leswaku u lulamile naswona a nga endli nchumu swa le xihundleni kumbe leswi nyamisaka. (Varhoma 9:1; 2 Vakorinto 1:12; 4:2; 7:1) A ku na munhu la fanelekaka ku tirhela ntlhambi wa Xikwembu handle ka loko a namarhela ntiyiso ni misinya ya milawu ya Xikwembu.

Ku Kambisisa Timfanelo Ta Vakulu

15. Xana i timfanelo ta vamani leti sweswi ti kamberiwaka, naswona ngopfu-ngopfu ti khumba yini?

¹⁵ Timfanelo tin’wana ti tirha ngopfu-ngopfu eka vakulu naswona ti langutana ni ntirho wa vona tanihi varisi ni vadyondzisi. Tanihi wanuna wa Mukriste, xana wa swi fikelela swilaveko leswi?

16. (a) Xana ku laveka yini leswaku u ringanisela eka mikhuva? (b) Xana nkulu a nga ku hlayisa njhani ku fuma vutomi bya yena?

¹⁶ A dya hi ku pima; a kota ku fuma mahanyelo ya yena. (1 Timotiya 3:2; Tito 1:8) Nkulu u fanele a tikhoma, a nga vi hlonga ra mikhuva yo biha. Loko a langutana ni miringo, Xikwembu xi ta n’wi pfuna leswaku a yima a tiyile loko a khongela hi laha mupisalema a endleka ha kona: “Mahlomulo ya mbilu ya mina ma engetekile; u nḍi humesa e makhombyeni ya mina!” (Psalma 25:17) Mulanguteri u fanele nakambe a khongelela moya wa Xikwembu naswona a kombisa mihandzu ya wona, ku katsa ni ku tikhoma. (Luka 11:13; Vagalatiya 5:22, 23) Ku hamba a kambisisa miehleketo, mhaka ni swiendlo, swi endla nkulu a kota ku papalata ku hundzeleta loko a nyikela vukongomisi bya moya ebandlheni.

17. Xana ku laveka yini leswaku u tikhoma?

¹⁷ A tikhoma. (1 Timotiya 3:2) Nkulu u fanela a va la xalamukeke, la tlhariheke ni la twisisaka. U fanele a va ni xikongomelo, la twisisekaka hi ku vulavula ni swiendlo. Ku titsongahata ka yena, ni ku ehleketa hi ku ringanisela swi sekeriwe eka vutlharhi bya Xikwembu ni le ka tidyondzo leti tengeke ta Rito ra Yehova, leswi vulaka leswaku u fanele a va xichudeni xa migingiriko.—Varhoma 12:3; Tito 2:1.

18. Xana ku laveka yini leswaku nkulu a hleleka?

¹⁸ A hleleka. (1 Timotiya 3:2) Rito ra Xigriki leri tirhisiweke laha, ri hundzluxeriwe va ku “hlelekeke kahle” eka 1 Timotiya 2:9. (NW) Kutani nkulu u fanela a va ni ndlela ya vutomi leyinene, leyi hlelekeke kahle. Hi xikombiso, u fanele a hlayisa nkarhi. Vakriste va lembe xidzana ro sungula onge a va nga kandziyisi swinene ku hlayisa rhekhodo, naswona namuntlha a swi bohi leswaku mulanguteri a kala a va n’watikonta kumbe a va matsalana. Malandza ya vutirheli ma nga khathalela swilo leswi lavekaka etimhakeni leti. Kambe rito ra Xigriki ra ku “hleleka” ri nga vula hanyelo lerinene, naswona entiyisweni, wanuna a nge faneleki leswaku a va nkulu loko a ome nhloko kumbe a nga hlelekangi.—1 Vatesalonika 5:14; 2 Vatesalonika 3:6-12; Tito 1:10.

19. Hi mhaka ya leswi a nga ni malwanda, xana nkulu u endla yini?

¹⁹ A va ni malwandla. (1 Timotiya 3:2; Tito 1:8) Nkulu ‘u teka ndlela ya malwandla.’ (Varhoma 12:13; Vaheveru 13:2) Rito ra Xigriki leri hundzluxeriweke va ku ‘malwandla’ hi ku kongoma ri vula “ku tsakela vaendzi.” Xisweswo, nkulu la nga ni malwandla u amukela vanhu lavantshwa hi ku tsaka eminhlanganweni ya Vukriste, a kombisa ntsako lowu fanaka eka swisiwana hi laha a endlaka ha kona eka lava fuweke. U ni malwandla eka lava famba-fambaka hikwalaho ka swilaveko swa Vukriste, naswona a va lela “hi laha swi fanelaka ha kona entirhweni wa Xikwembu.” (3 Yohane 5-8) Hakunene, nkulu u kombisa malwandla ngopfu-ngopfu eka vapfumeri-kulobye hi ku ya hi swilaveko swa vona ni hi laha swiyimo swa yena swi pfumelaka ha kona.—Yakobo 2:14-17.

20. Xana i tindlela tihi leti nkulu a faneleke a fanelekela ku dyondzisa ha tona?

²⁰ A kota ku dyondzisa. (1 Timotiya 3:2) Vuswikoti bya nkulu tanihi mudyondzisi hi tlhelo ra moya a byi yi hi vutlhari bya ntumbuluko kumbe vutlhari bya misava. (1 Vakorinto 2:1-5, 13) Byi ta hi leswi a nga “namarhel[a] Rito leri tshembekeke, leri fambelanaka ni leswi dyondzisiwaka, a ta kota ku tiyisa van’wana hi dyondzo leyi nga yona ya xiviri, ni ku komba ku hoxa ka lava lwaka na yona.” (Tito 1:9; ringanisa Mintirho 20:18-21, 26, 27.) U fanele a kota ku ‘laya vakaneti va yena khwatsi.’ (2 Timotiya 2:23-26) Hambi loko nkulu a nga ri xivulavuri xa le rivaleni xo antswa ebandlheni, u fanele a va xichudeni lexinene xa Rito ra Xikwembu lerova a va ni vutshila byo dyondzisa ni ku tsundzuxa vapfumeri, lava na vona va dyondzaka Bibele. (2 Vakorinto 11:6) U fanele a faneleka ku va la nyikelaka “dyondzo leyi nga yona ya xiviri” leyi pfunaka mindyangu ni vanhu leswaku valandzelela ku chava Xikwembu.—Tito 2:1-10.

21. (a) Hikwalaho ka yini ku nga vuriwaka leswaku nkulu a hi munhu wa tinyimpi? (b) Xana swi vula yini ku va lowo rhula? (c) Xana ku ka u nga ri na vuntswaka swi vula yini?

²¹ A nga vi munhu wa tinyimpi, kambe a va lowo rhula, a nga vi na vuntswaka. (1 Timotiya 3:3; Tito 1:7) Hi ku va la rhuleke, nkulu a nge va vavisi vanhu enyameni kumbe ku va chavisa hi ku va holovela hi ku tirhisa marito lama tlhavaka kumbe lama vavisaka. (Ringanisa 2 Vakorinto 11:20.) (Nhlamuselo yo rhanga ya leswaku “a nga vi xidakwa” yi kombisa leswaku u papalata ku tirhisa xihoko hi ndlela yo biha, leswi hakanyingi swi vangaka timholovo.) Ku va lowo “rhula” (kumbe, ‘ku titsongahata’), ku nga ri la sindzisaka ni loyi swi nonon’hwaka ku n’wi tsakisa, a nga hlundzukisiwi hi timhaka leti nga vuliki nchumu. (1 Vakorinto 9:12; Vafilipiya 4:5; 1 Petro 2:18) Tanihi leswi nkulu a nga riki na vuntswaka, kumbe ku rhandza ku kanetana, u papalata timholovo naswona a hi “wa ximbilwa-mbilwana.”—Tito 3:2; Yakobo 1:19, 20.

22. I yini lexi kombisiwaka hi mhaka ya leswaku nkulu a nga fanelanga a titiva?

²² A nga vi munhu la titivaka. (Tito 1:7) Hi ku kongoma, leswi swi vula ku “titsakisa.” (Ringanisa 2 Petro 2:10.) Nkulu a nga fanelanga leswaku a lerisa, kambe u fanele a titsongahata hi vuswikoti bya yena. A nga ehleketi leswaku u endla swilo hi ndlela yo antswa ku tlula un’wana na un’wana, u avelana vutihlamuleri ni van’wana hi ku titsongahata ni ku tlangela vatsundzuxi vo tala.—Tinhlayo 11:26-29; Swivuriso 11:14; Varhoma 12:3, 16.

23. (a) Xana u nga n’wi hlamuserisa ku yini ‘la rhandzaka vunene’? (b) Xana ku va lowo lulama swi vula yini?

²³ La rhandzaka vunene; la lulameke. (Tito 1:8) Leswaku a faneleka tanihi nkulu, munhu u fanele ku rhandza vunene naswona a va wo lulama. La rhandzaka vunene u rhandza leswi swi nga swinene emahlweni ka Yehova, u endla mintirho ya musa ni leyi pfunaka naswona u tlangela vunene bya van’wana. (Luka 6:35; ringanisa Mintirho 9:36, 39; 1 Timotiya 5:9, 10.) Ku va la lulameke swi vula ku tixaxameta ni nawu swin’we ni mimpimanyeto ya Xikwembu. Hi xikombiso, munhu wo tano a nga hlawuli ndluwa a siya hoxe, naswona u hlayisa swilo swo lulama, leswinene ni swo tenga emiehleketweni. (Luka 1:6; Vafilipiya 4:8, 9; Yakobo 2:1-9) Tanihi leswi vunene byi hambaneke ni vululami, hi leswi byi tlulaka leswi ku lulama ku lavaka swona, la rhandzaka vunene u endlela van’wana swo tala ku tlula leswi swi languteriweke eka yena.—Matewu 20:4, 13-15; Varhoma 5:7.

24. Xana ku va wo tshembeka swi lava yini?

²⁴ Ku tshembeka. (Tito 1:8) Munhu la fanelekaka ku va nkulu u hlayisa ku tinyiketela loku nga heriki eka Xikwembu naswona a namarhela milawu ya Xikwembu, ku nga khathariseki ndlela leyi vutshembeki bya yena byi ringiwaka ha yona. U endla leswi Yehova a swi languteleke eka yena, naswona leswi swi katsa ku tirha tanihi mutwarisi wo tshembeka wa Mfumo.—Matewu 24:14; Luka 1:74, 75; Mintirho 5:29; 1 Vatesalonika 2:10.

Ku Fikela Timfanelo

25. Xana timfanelo leti ta ha ku hlamuseriwaka ti laviwa eka vamani, naswona timfanelo to tano ti nga fikeleriwa njhani?

²⁵ Vunyingi bya timfanelo leti ka ha ku vulavuriwaka ha tona ti khumba swilo leswi lavekaka eka Mbhoni yin’wana ni yin’wana ya Yehova, naswona swi kumiwa hi mikateko ya Xikwembu eka dyondzo yin’wana ni yin’wana ya munhu, matshalatshala, ni vanghana lavanene swin’we ni xikhongelo. Vanhu va nga ha va ni matimba eka timfanelo tin’wana ku tlula eka tin’wana. Kambe hi mpimo wo karhi, malandza ya vutirheli ni vakulu va fanele ku fikelela swilaveko hinkwaswo swa lunghelo ra vona ro karhi.

26. Hikwalaho ka yini vavanuna va Vakriste va tiendla va kumeka eka vutihlamuleri bya bandlha?

²⁶ Hinkwato Timbhoni ta Yehova ti fanele ku endla hinkwaswo leswi kotekaka entirhweni wa Xikwembu. Moya lowu wu susumeta vanhu va Vakriste ku tiendla va kumeka eka vutihlamuleri bya bandlha. Xana u munhu la tinyiketeleke hi nkhuvulo? Loko swi ri tano, tiendle u faneleka naswona u endla matshalatshala hinkwawo leswaku u fanelekela ku tirhela!

[Nhlamuselo ya le hansi]

A Wu Ta Hlamurisa Ku Yini?

◻ Hikwalaho ka yini sweswi ku ri ni xilaveko lexikulu xa vanhu lava khuvuriweke leswaku va amukela vutihlamuleri bya bandlha?

◻ Hi tihi timfanelo tin’wana leti ti faneleke ku fikeleriwa hi malandza ya vutirheli?

◻ Hi swihi swilaveko swin’wana leswi vakulu va faneleke va swi fikelela?

◻ Hikwalaho ka yini nkulu a fanele a tiva ndlela yo fambisa ndyangu wa yena kahle ha yona?

◻ I yini leswi susumetaka vavanuna va Vakriste leswaku va tiendla va kumeka emintirhweni ya bandlha?

[Swifaniso leswi nga eka tluka 24, 25]

Vakulu ni malandza ya vutirheli va fanele va fambisa mindyangu ya vona hi ku ya hi misinya ya milawu ya Bibele