Wa Tsundzuka Xana?

Xana u anakanyisise hi vukheta mayelana ni minkandziyiso ya sweswinyana ya Xihondzo xo Rindza? U nga ha tsakela ku tsundzuka leswi landzelaka:

◻ Xana munhu a nga ‘ta eka Yesu’ njhani hi ku pfumelelana ni xirhambo lexi nga eka Matewu 11:28?

Yesu u te: “Loko munhu a lava ku ndzi landza, a a titshike, a tirhwexa [mhandzi ya yena ya nxaniso, NW], kutani a ndzi landza.” (Matewu 16:24) Hikwalaho, ku ta eka Yesu swi vula ku titsongahata eka Xikwembu na Kreste, ni ku amukela ndzhwalo wo karhi wa vutihlamuleri ivi u hambeta u endla tano.—8/15, tluka 17.

◻ Ha yini va nga “talanga” lava kumaka ‘nyangwa yo khuma leyi yisaka evuton’wini’ leyi boxiweke hi Yesu eka Matewu 7:13, 14?

Hikuva ndlela leyo khuma yi ni swipimelo swa milawu ni misinya ya milawu ya Xikwembu. Hikwalaho, yi tsakisa ntsena munhu la rhandzaka ku twananisa vutomi bya yena ni mimpimanyeto ya Xikwembu hi mbilu yakwe hinkwayo. Hambi loko yi tikomba yi ri ni swinawanawana, ‘ndlela leyo khuma’ yi nyika munhu ntshunxeko eka xin’wana ni xin’wana lexi nga xa nkoka. Swipimelo swa yona swi vekiwe hi “Nawu lowu hetisekeke wa ku ntshunxeka.” (Yakobo 1:25)—9/1, tluka 5.

◻ Xana ku twisisa ku nga hlakuleriwa hi ndlela yihi?

Ku twisisa a ku ti hi ku olova kumbe hi ntumbuluko. Kambe hi ku lehisa mbilu, hi xikhongelo, hi matshalatshala lamakulu, hi ku hlawula vanghana hi vutlhari, hi ku dyondza Bibele ni ku anakanyisisa hi yona, ni hi ku tshembela eka moya lowo kwetsima wa Yehovha, ku twisisa ku nga hlakuleriwa hi ndlela yoleyo.—9/1, tluka 21.

◻ Xana mavondzo ma nga susumetela munhu ku endla leswinene hi ndlela yihi?

Ma nga susumetela munhu leswaku a sirhelela munhu loyi a n’wi rhandzaka eka minkucetelo yo biha. Ku tlula kwalaho, vanhu va nga kombisa mavondzo hi ndlela leyinene hi Yehovha ni vugandzeri bya yena. (1 Tihosi 19:10)—9/15, matluka 8, 9.

◻ Xana xi vula yini xiga lexi nga eka Genesa 50:23 mayelana ni vatukulu va Yosefa: “V̌a v̌elekiwile e maṭolweni ya Yosefa”?

Leswi swi nga ha vula ntsena leswaku Yosefa u amukele vana lava tanihi vatukulu va yena. Nakambe swi nga ha tlhela swi kombisa leswaku u tlange ni vana hi ndlela ya rirhandzu, a va veka ematsolweni ya yena, a va tlangisa. Hi laha ku fanaka namuntlha, vatatana va fanele va kombisa vana va vona rirhandzu leri fanaka.—9/15, matluka 20, 21.

◻ I yini lexi nga xa nkoka ngopfu leswaku vukati ni vutomi bya ndyangu byi humelela?

Leswaku va kuma vuyelo byo tano lebyi tsakisaka, vanghana va vukati minkarhi hinkwayo va fanele va rhangisa ku rhandza ka Xikwembu. Hi ku endla tano, mimpatswa leyi tekaneke yi ta ringeta ku namarhelana ni ku tlhantlha swiphiqo swa yona hi ku tirhisa ndzayo ya Rito ra Xikwembu. Xisweswo va papalata ku karhateka hinkwako ka mbilu loku nga vaka kona loko ku honisiwa ku rhandza ka Xikwembu. (Pisalema 19:7-11)—10/1, tluka 11.

◻ Xana ku va ni langutelo ra xihatla etimhakeni ta Xikwembu i swa nkoka ku fikela kwihi namuntlha?

Langutelo ro chava Xikwembu ra ku endla swilo hi xihatla i xiphemu xa nkoka eku endleleni ka Yehovha vutirheli bya moya-xiviri hinkwawo. Ri susa ni ku herisa matshalatshala ya Diyavulosi yo vangela malandza ya Xikwembu ku “karhal[a] kumbe ku hela mbilu.” (Vaheveru 12:3) Ri ma endla leswaku ma nga ngheni hi nhloko eka swilo swa misava ni ku rhandza swilo swa yona leswi vonakaka, ri hlayisa mianakanyo ya vona yi ri eka swilo swa le tilweni—eka “vutomi bya xiviri.” (1 Timotiya 6:19)—10/1, tluka 28.

◻ Exifanisweni xa tinyimpfu ni timbuti, xana Yesu u tshame rini exiluvelweni xa yena naswona ha yini? (Matewu 25:31-33)

Xifaniso a xi n’wi kombisi a tshamile tanihi Hosi. Ematshan’wini ya sweswo, u tshama tanihi Muavanyisi. Ku avanyisa koloko a ku nga yi emahlweni hi malembe yo tala lama engetelekeke. Kambe ematshan’wini ya sweswo, xifaniso xi kombetela enkarhini lowu taka loko Yesu hi nkarhi lowu vekiweke a ta avanyisa ni ku herisa matiko.—10/15, matluka 22, 23.

◻ Xana hi xihi “xitukulwana” lexi hakanyingi Yesu a vulavula ha xona?

Yesu u tirhise rito “xitukulwana lexi” eka mintshungu ya nkarhi wolowo ni “vakongomisi vo fa mahlo” lava na vona a va vumba rixaka ra Xiyuda. (Matewu 11:16; 15:14, NW; 24:34)—11/1, tluka 14.

◻ Eku hetisekeni ko hetelela ka vuprofeta bya Yesu eka Matewu 24:34-39, xana xiga lexi nge “xitukulwana lexi” xikombetela eka xihi?

Yesu u swi veke erivaleni leswaku a kombetela eka vanhu va misava lava vonaka xikombiso xa vukona bya Kreste kambe va tsandzeka ku lulamisa tindlela ta vona.—11/1, matluka 19, 31.

◻ Xana lunghiselelo ra miti ya vuchavelo ni swipimelo swa yona ri pfune Israyele hi ndlela yihi?

Ri dyondzise Vaisrayele leswaku a va fanelanga va nga khathali kumbe va nga vi na mhaka hi vutomi bya munhu. Ri tlhela ri kandziyisa xilaveko xo kombisa musa loko ku endla tano swi laveka. (Yakobo 2:13)—11/15, tluka 14.

◻ Xana muti wa vuchavelo wo fanekisela i yini?

I lunghiselelo ra Xikwembu ro hi sirheleta eka rifu ni le ku tluleni ka swileriso swa xona mayelana ni ku kwetsima ka ngati. (Genesa 9:6)—11/15, tluka 17.

◻ Xana vumakwerhu bya Vukreste byi nga hi pfuna hi ndlela yihi leswaku hi “kuma matimba”? (Esaya 40:31)

Exikarhi ka vamakwerhu va Kreste va xinuna ni va xisati, va kona van’wana lava tshameke va langutana ni mintshikilelo kumbe miringo ni lava veke ni mintlhaveko leyi fanaka swinene ni ya hina. (1 Petro 5:9) Swa chavelela ni ku hi tiyisa ripfumelo ku tiva leswaku leswi hi langutanaka na swona swi tolovelekile ni leswaku mintlhaveko ya hina yi tolovelekile.—12/1, matluka 15, 16.