Va Swi Endlela Yini?

LEMBE rin’wana ni rin’wana emisaveni hinkwayo Timbhoni ta Yehovha ta hlengeletana hi magidi emintsombanweni. Ti tiphina hi vunakulobye ni ku twa nongonoko wa ndzetelo wa Bibele wa xiyimo xa le henhla. Van’wana va endla matshalatshala lamakulu leswaku va va kona emintsombanweni leyi. Hi xikombiso, n’wexemu le Malawi, mpatswa lowu nga ni malembe ya le xikarhi ka va-60, swin’we ni n’wana wa vona wa xinuna ni nsati wa yena ni n’wana, va fambe 80 wa tikhilomitara hi xikanyakanya leswaku va ya entsombanweni. Va suke emutini hi awara ya tsevu nimixo ivi va fika erivaleni ra ntsombano endzhaku ka tiawara ta 15.

Le Mozambhiki, ntlawa wun’wana wu fambe masiku manharhu hi xikanyakanya wu ya entsombanweni. Hi vusiku byin’wana, loko wu etlele enhoveni, wu twe tinghala ti vomba ekusuhi. Hambileswi wu hoxeke swisana swa ndzilo etlhelweni leri a ti vomba ti ri eka rona, tinghala ti tshame ku kondza ku va vurhonga. Mbhoni yin’wana leyi a yi ya entsombanweni wolowo yi hlangane ni nghala endleleni. Yi yimile yi nga tshukatshuki ku kondza nghala yi famba. Entsombanweni lowu Timbhoni leti ti hlamusele hi ntsako ndlela leyi ti “kutsuriw[eke] enon’wini wa tinghala” ha yona.—2 Timotiya 4:17.

Timbhoni ta Yehovha to tala ti endla matshalatshala lamakulu leswaku ti ya emintsombanweni kumbe hambi ku ri eminhlanganweni ya vhiki na vhiki ya vandlha leswaku ti ya gandzela. Ha yini? Swihloko leswi landzelaka swi ta ku pfuna ku twisisa lexi endlaka ku hlengeletana ku va ka nkoka swinene.