Xiviko Xa Vahuweleri Va Mfumo

Ku Tirhisa Nkarhi Wun’wana Ni Wun’wana Lowu Ku Pfulekeleke

TIMBHONI TA YEHOVHA ta tiviwa emisaveni hinkwayo hi ntirho wa tona wo dyondzisa Bibele. Kambe ti fambisa ni minongonoko leyi tisaka vuyelo byin’wana evanhwini. Ntirho lowu wo pfuna tiko wu amukeriwe kahle, hilaha mintokoto leyi landzelaka ya le Ecuador yi kombisaka hakona.

◻ Valawuri va fektri leyikulu ya tinghilazi a va lava ku hlela khoso leyi vulavulaka hi mahanyelo ya ndyangu va hlelela vatirhi va vona. Mukongomisi wa vatirhi u rhambe vafundhisi vo hlayanyana va Khatoliki leswaku va ta hlanganyela kambe a va vanga na yona nhlamulo. Mufundhisi un’wana u n’wi byele leswaku a hi vangani vafundhisi lava fanelekaka ku vulavula hi mhaka yo tano lerova swi tikomba onge ku hava ni un’we la nga humelelaka. Loko a twa leswi, mutirhi la nga Mbhoni u endle malunghiselelo ya leswaku makwerhu loyi hakanyingi a tirhaka nsimu ya mabindzu a endzela fektri yoleyo.

Hi siku leri tlhandlamaka, Mbhoni yi tshinelele mukongomisi wa vatirhi yi lava ku ringanyeta nongonoko wa dyondzo. Ku hleriwe nongonoko wa tidyondzo leti humaka eka tibuku to hambana-hambana ta Sosayiti ya Watch Tower. Mukongomisi a a nyanyukile. U hlawule tinhloko-mhaka tinharhu leti a nga ta bula ha tona—dyondzo ya vuxaka bya vanhu, mahanyelo entirhweni ni le ndyangwini. Kutani ku endliwe malunghiselelo yo kambisisa rungula ni vatirhi hinkwavo.

Vatirhi va avanyisiwe va va mintlawa ya nkombo leyi nga na vanhu va 30 ha wun’we-wun’we, laha endzhaku vamakwerhu vanharhu lava fanelekaka va nyikeleke rungula eka vona. Vuyelo byi ve byihi? Vatirhi vo hlaya swinene va kombele ku endzeriwa emakaya ya vona, naswona ku fambisiwe swipfuneto swo dyondza Bibele swa 216. Valawuri a va tsake swinene lerova va vutisa loko Timbhoni ti ta swi kota ku lunghiselela tinkulumo tin’wana leti engetelekeke.

◻ Sweswinyana, Ecuador ri veke nawu lowu pfumelelaka leswaku vukhongeri byi dyondzisiwa exikolweni. Makwerhu wa xisati la nga murhumiwa u endzele mulanguteri wa xisati wa xikolo xa le hansi ivi a n’wi vutisa ndlela leyi nawu lowuntshwa a wu tirha ha yona. Mulanguteri u hlamusele leswaku ku endliwe matshalatshala yo sungula nongonoko wa vugandzeri bya Mariya kambe a swi hetisisiwanga. Loko makwerhu wa xisati a vule leswaku vugandzeri byo tano byi nga vanga swiphiqo eka vana lava nga riki wona Makhatoliki, mulanguteri u pfumerile. Murhumiwa u te: “Hambiswiritano, hi ni nongonoko wo dyondzisa misinya ya milawu ya mahanyelo leyi humaka eBibeleni lowu nga bohiki munhu ku amukela vukhongeri byo karhi.” Mulanguteri u hlamurile a ku: “U nga ta rini? Mundlwana?” Endzhaku ka loko murhumiwa a n’wi kombise buku leyi nge Listening to the Great Teacher, ku endliwe xiboho xa leswaku ku ta kambisisiwa ndzima leyi nge “Va Tsaka Lava Kondletelaka Ku Rhula.”

Loko a tlhelela, murhumiwa u hete tiawara tinharhu a endzela titlilasi ta nkombo to hambana-hambana mulanguteri a ri karhi a yingiserile. Endzhaku ko dyondzisa ntlawa wa lembe ra vuntlhanu, un’wana wa swichudeni u te: “Manana, ndzi kombela u tiyiseka leswaku wa wu endzela ntlawa wa lembe ra vutsevu. Minkarhi hinkwayo va ringeta ku hi ba ivi ku sungula nyimpi!” Mudyondzisi un’wana u te: “Madzolonga i nhloko-mhaka ya nkoka swinene. Hi lava nkarhi lowu engetelekeke leswaku hi bula hi mhaka leyi.”

Ku endliwe malunghiselelo ya maendzo yo vuyela exikolweni leswaku ku ya buriwa hi tinhloko-mhaka to tanihi ku yingisa ni vuxisi. Ku fikela sweswi, vuyelo bya kona byi ve lebyi enerisaka swinene. Sweswi loko makwerhu wa xisati wa murhumiwa a famba exitarateni, vana va n’wi tsutsumela leswaku va n’wi xeweta ni ku n’wi vutisa swivutiso swa Bibele. Van’wana hi ku tinyungubyisa va n’wi tivisa eka vatswari va vona. Ku engetela kwalaho, dyondzo ya le kaya ya Bibele yi sunguriwile ni vana vambirhi va xikolo.