Xiviko Xa Vahuweleri Va Mfumo
Chumayela ‘Hi Nguva Leyinene Ni Hi Nguva Ya Ku Karhateka’
LOKO nyimpi yi ri karhi yi tinyike matimba etikweni ra Bosnia na Herzegovina, vanhu vo tala va langutane ni maxangu lamakulu. Hi nkarhi wolowo lowu ringaka, Timbhoni ta Yehovha ti endle matshalatshala hinkwawo leswaku ti chavelela vanhu ni ku endla leswaku va va ni ntshembo. Marito lama landzelaka ma huma epapileni leri tsariweke hi Mbhoni leyi tirheke nkarhinyana eSarajevo.
“Vutomi bya tika laha, kambe vanhu va wu amukela swinene ntiyiso wa Bibele. Timbhoni ta laha i swikombiso leswinene swa ku tiyisela. Hi tlhelo ra swilo leswi vonakaka a va na nchumu, kambe va ni nsusumeto lowunene. Kwalomu ka vantshwa hinkwavo evandlheni va le ntirhweni wa nkarhi hinkwawo. Vahuweleri lavantshwa va khutaziwa hi ku hiseka loku, naswona swi tolovelekile eka vona ku tirha tiawara ta 60 kumbe ku tlula hi n’hweti evutirhelini bya vona, ku sukela loko va sungula ku huma nsimu.
“Handle ka ku chumayela hi yindlu ni yindlu, hi ringete maendlelo man’wana yo hambana-hambana ya ku fikelela vanhu. Hi xikombiso, hi ve ni vuyelo lebyinene loko hi fambisa tibuku ta Bibele eswilahlweni swo tala swa doroba.
“Ku nyikeriwe vumbhoni ni le swibedlhele. Eka Ndzawulo ya Vutivi bya Mbilu ya xibedlhele xa le Sarajevo, dokodela-nkulu u amukele Xalamuka! ya December 8, 1996, leyi nga ni swihloko leswi tlhandlamanaka leswi vulavulaka hi vuvabyi bya mbilu. U kombele tikopi leti engetelekeke leswaku a ta ti nyika madokodela man’wana. Hiloko a pfumelela Timbhoni ku endzela vavabyi hinkwavo lava nga endzawulweni yakwe. Xisweswo, hi nkarhi lowu tlulakanyana awara, ku fambisiwe timagazini to tlula 100, eka mubedo wun’wana ni wun’wana. Vavabyi vo tala va vule leswaku a ku ri ro sungula ku va va endzeriwa hi munhu exibedlhele a ta va chavelela ni ku endla leswaku va va ni ntshembo.
“Hi nkarhi wun’wana, Ndzawulo ya Mavabyi ya Vana yi endzeriwile yi khomeriwe timagazini leti nga ni swihloko leswi faneleke vana. Dokodela-nkulu na yena u amukele tikopi ti nga ri tingani ta Buku Yanga Ya Timhaka Ta Bibele, leti nga ta tshama endlwini yo hlayela eka yona. Sweswi, vamanana lava endzelaka vana va vona exibedlhele va va hlayela switori swa le Bibeleni siku rin’wana ni rin’wana. Ku endliwe ni malunghiselelo ya ku endzela dokodela loyi ekaya rakwe.
“Le Sarajevo ku na magidi ya masocha ya NATO [North Atlantic Treaty Organization] ya tinxaka to hambana-hambana. Na wona ma kume vumbhoni lebyinene. Minkarhi yin’wana hi suka eka movha wun’wana wa nyimpi hi ya eka wun’wana, hi tirhisa xibukwana lexi nge Good News for All Nations, swin’we ni Xihondzo xo Rindza na Xalamuka! hi tindzimi to hambana-hambana. Ku fambisiwe timagazini to tlula 200 evutshan’wini bya masocha ya le Italiya. Lexi hlamarisaka, masocha yo tala ya le Italiya ma vule leswaku a ma nga si tshama ma vulavula ni Timbhoni ta Yehovha. I swinene leswi hi koteke ku vulavula na wona eSarajevo.
“Siku rin’wana movha wa nyimpi a wu yime etlhelo ka patu. Ndzi gongondze emovheni lowu hi xambhulelo xa mina kutani ku huma socha. Ndzi ri fambisele Xihondzo xo Rindza lexi xifunengeto xa xona a xi ri ni xihloko lexi nge ‘Varhumiwa Va Ku Rhula—Xana I Vamani?’ Socha leri ri ndzi langutile kutani ri ku, ‘U un’wana wa Timbhoni ta Yehovha, a swi tano ke?’ Endzhaku ko vona leswaku ndzi un’wana wa tona, ri te, ‘A ndzi kholwi; mi kona ni laha! Xana yi kona ndhawu emisaveni laha Timbhoni ta Yehovha ti nga riki kona?’”
Muapostola Pawulo u khutazile a ku: “Chumayela rito, u va eka rona hi xihatla hi nguva leyinene, hi nguva ya ku karhateka.” (2 Timotiya 4:2) Ku fana ni vapfumeri-kulobye emisaveni hinkwayo, Timbhoni ta Yehovha eSarajevo ti endla tano, hambi ku ri ku suka eka mubedo wun’wana ku ya eka wun’wana ni ku suka emovheni wun’wana wa nyimpi ku ya eka wun’wana!